1謹慎莫得tī人ê面前行lín ê義，故意hō͘ in看見；若án-ni，就無得tio̍h報賞tī lín天裡ê父。Kín-sīn bo̍h-tit tī lâng ê bīn-chêng kiâⁿ lín ê gī, kò͘-ì hō͘ in khòaⁿ-kìⁿ; nā án-ni, chiū bô tit-tio̍h pò-siúⁿ tī lín thiⁿ-ni̍h ê Pē.

2所以賑濟ê時，莫得tī你ê面前pûn號頭，親像假好ê人tī會堂kap街路所做ê，ài人榮光in。我實在kā lín講，In已經受tio̍h in ê報賞lah。Só͘-í chín-chè ê sî, bo̍h-tit tī lí ê bīn-chêng pûn hō-thâu, chhin-chhiūⁿ ké-hó ê lâng tī hōe-tn̂g kap ke-lō͘ só͘ chòe ê, ài lâng êng-kng in. Góa si̍t-chāi kā lín kóng, In í-keng siū-tio̍h in ê pò-siúⁿ lah.

3獨獨你賑濟ê時，莫得hō͘你ê tò手知你ê chiàⁿ手ê所做；To̍k-to̍k lí chín-chè ê sî, bo̍h-tit hō͘ lí ê tò-chhiú chai lí ê chiàⁿ-chhiú ê só͘ chòe;

4hō͘你ê賑濟隱密；就你ê父，鑑察tī隱密ê，beh報答你。hō͘ lí ê chín-chè ún-ba̍t; chiū lí ê Pē, kàm-chhat tī ún-ba̍t ê, beh pò-tap lí.

5Lín祈禱ê時，莫得親像假好ê人；因為in ài khiā tī會堂kap大街面ê oat-kak祈禱，beh hō͘人看見。我實在kā lín講，In已經受tio̍h in ê報賞lah。Lín kî-tó ê sî, bo̍h-tit chhin-chhiūⁿ ké-hó ê lâng; in-ūi in ài khiā tī hōe-tn̂g kap tōa koe-bīn ê oat-kak kî-tó, beh hō͘ lâng khòaⁿ-kìⁿ. Góa si̍t-chāi kā lín kóng, In í-keng siū-tio̍h in ê pò-siúⁿ lah.

6獨獨你祈禱ê時，tio̍h入你ê密房，關門，求你ê父，tiàm tī隱密ê；就你ê父，鑑察tī隱密ê，beh報答你。To̍k-to̍k lí kî-tó ê sî, tio̍h ji̍p lí ê ba̍t-pâng, koaiⁿ mn̂g, kiû lí ê Pē, tiàm tī ún-ba̍t ê; chiū lí ê Pē, kàm-chhat tī ún-ba̍t ê, beh pò-tap lí.

7Koh lín祈禱ê時，話莫得ta̍uh-ta̍uh重(têng)，親像外邦人；因為in phah算講chōe-chōe話，chiah得tio̍h聽見。Koh lín kî-tó ê sî, ōe bo̍h-tit ta̍uh-ta̍uh têng, chhin-chhiūⁿ gōa-pang lâng; in-ūi in phah-sǹg kóng chōe-chōe ōe, chiah tit-tio̍h thiaⁿ-kìⁿ.

8所以lín莫得學in；因為lín bē求伊ê事先，lín ê父已經知lín所欠用ê。Só͘-í lín bo̍h-tit o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê.

9所以lín tio̍h án-ni祈禱：阮tī天裡ê父，願你ê名聖。Só͘-í lín tio̍h án-ni kî-tó: Goán tī thiⁿ-ni̍h ê Pē, Goān lí ê miâ sèng.

10你ê國臨到。你ê旨意得成，tī地裡親像tī天裡。Lí ê kok lîm-kàu. Lí ê chí-ì tit chiâⁿ, tī tōe-ni̍h chhin-chhiūⁿ tī thiⁿ-ni̍h.

11阮ê日食，今á日hō͘阮。Goán ê ji̍t-si̍t, kin-á-ji̍t hō͘ goán.

12赦免阮ê辜負，親像阮亦有赦免辜負阮ê人。Sià-bián goán ê ko͘-hū, chhin-chhiūⁿ goán ia̍h ū sià-bián ko͘-hū goán ê lâng.

13莫得chhōa阮入tī試，tio̍h救阮脫離hit-ê pháiⁿ-ê。Bo̍h-tit chhōa goán ji̍p tī chhì, tio̍h kiù goán thoat-lī hit ê pháiⁿ-ê.

14因為lín若赦免人ê過失，lín ê天父亦beh赦免lín。In-ūi lín nā sià-bián lâng ê kè-sit, lín ê Thiⁿ Pē ia̍h beh sià-bián lín.

15Lín若無赦免人ê過失，lín ê父亦無beh赦免lín ê過失。Lín nā bô sià-bián lâng ê kè-sit, lín ê Pē ia̍h bô beh sià-bián lín ê kè-sit.

16Koh lín禁食ê時，莫得親像假好ê人帶憂容；因為in將in ê面變pháiⁿ看，beh hō͘人看見in teh禁食。我實在kā lín講，In已經受tio̍h in ê報賞lah。Koh lín kìm-chia̍h ê sî, bo̍h-tit chhin-chhiūⁿ ké-hó ê lâng tài iu-iông; in-ūi in chiong in ê bīn pìⁿ pháiⁿ khòaⁿ, beh hō͘ lâng khòaⁿ-kìⁿ in teh kìm-chia̍h. Góa si̍t-chāi kā lín kóng, In í-keng siū-tio̍h in ê pò-siúⁿ lah.

17獨獨你禁食ê時，tio̍h抹你ê頭，洗你ê面；To̍k-to̍k lí kìm-chia̍h ê sî, tio̍h boah lí ê thâu, sóe lí ê bīn;

18無hō͘人看見你teh禁食，是hō͘你tòa tī隱密ê父看見；就你ê父，鑑察tī隱密ê，beh報答你。bô hō͘ lâng khòaⁿ-kìⁿ lí teh kìm-chia̍h, sī hō͘ lí tòa tī ún-ba̍t ê Pē khòaⁿ-kìⁿ; chiū lí ê Pē, kàm-chhat tī ún-ba̍t ê, beh pò-tap lí.

19莫得為tio̍h家己積聚財寶tī地裡，有蟲kap sian phah-pháiⁿ，也有賊iah孔偷the̍h ê所在。Bo̍h-tit ūi-tio̍h ka-kī chek-chū châi-pó tī tōe-ni̍h, ū thâng kap sian phah-pháiⁿ, iā ū chha̍t iah khang thau-the̍h ê só͘-chāi.

20獨獨為tio̍h家己積聚財寶tī天裡，蟲kap sian無phah-pháiⁿ，也無賊iah孔偷the̍h ê所在。To̍k-to̍k ūi-tio̍h ka-kī chek-chū châi-pó tī thiⁿ-ni̍h, thâng kap sian bô phah-pháiⁿ, iā bô chha̍t iah khang thau-the̍h ê só͘-chāi.

21因為lín ê財寶tī hia，lín ê心也beh tī hia。In-ūi lín ê châi-pó tī hia, lín ê sim iā beh tī hia.

22身軀ê燈就是目睭；你ê目睭若金，thong身軀就有光。Seng-khu ê teng chiū-sī ba̍k-chiu; lí ê ba̍k-chiu nā kim, thong seng-khu chiū kng.

23你ê目睭若花，thong身軀就暗。你內面ê光若暗，hit-ê暗jōa大ah！Lí ê ba̍k-chiu nā hoe, thong seng-khu chiū àm. Lí lāi-bīn ê kng nā àm, hit ê àm jōa tōa ah!

24無人會服事兩個主人；因為伊會怨恨chit-ê，疼hit-ê；á是會tùi-tiōng chit-ê，看輕hit-ê；lín bōe-ōe服事上帝續服事錢財。Bô lâng ōe ho̍k-sāi nn̄g ê chú-lâng; in-ūi i ōe oàn-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi.

25所以我kā lín講，莫得掛慮lín ê性命beh食甚麼，beh lim甚麼，á是lín ê身軀beh穿甚麼。Lín ê性命kiám無khah大tī米糧，也lín ê身軀kiám無khah大tī衣裳mah？Só͘-í góa kā lín kóng, Bo̍h-tit khòa-lū lín ê sìⁿ-miā beh chia̍h sím-mi̍h, beh lim sím-mi̍h, á-sī lín ê seng-khu beh chhēng sím-mi̍h. Lín ê sìⁿ-miā kiám bô khah tōa tī bí-niû, iā lín ê seng-khu kiám bô khah tōa tī i-chiûⁿ mah?

26試看天中ê飛鳥，無種作，無收成，無積聚tī粟倉，lín ê天父也teh飼in。Lín kiám無比hiah-ê khah貴氣mah？Chhì-khòaⁿ thiⁿ-tiong ê pe-chiáu, bô chèng-choh, bô siu-sêng, bô chek-chū tī chhek-chhng, lín ê Thiⁿ Pē iā teh chhī in. Lín kiám bô pí hiah-ê khah kùi-khì mah?

27Lín甚麼人會用掛慮hō͘性命khah長一刻久？Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú?

28啥事為tio̍h衣裳掛慮ah？試想山裡ê百合花，怎樣大叢；in無tio̍h磨，無紡績(cheh)；Siáⁿ-sū ūi-tio̍h i-chiûⁿ khòa-lū ah? Chhì-siūⁿ soaⁿ-ni̍h ê pek-ha̍p-hoe, cháiⁿ-iūⁿ tōa châng; in bô tio̍h-bôa, bô pháng cheh;

29但是我kā lín講，當所羅門極hâng-ngó͘ ê時，伊所穿ê m̄值tio̍h chit號花ê一蕊。nā-sī góa kā lín kóng, tng Só͘-lô-bûn ke̍k hâng-ngó͘ ê sî, i só͘ chhēng ê m̄ ta̍t-tio̍h chit hō hoe ê chi̍t lúi.

30Taⁿ山裡ê草，今á日tī-teh，明á日hiat tī火爐，上帝hō͘伊穿到án-ni，何況lín，小信ê人ah？Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè hō͘ i chhēng kàu án-ni, hô-hòng lín, sió-sìn ê lâng ah?

31所以莫得掛慮講，阮beh食甚麼？Beh lim甚麼？Beh穿甚麼？Só͘-í bo̍h-tit khòa-lū kóng, Goán beh chia̍h sím-mi̍h? Beh lim sím-mi̍h? Beh chhēng sím-mi̍h?

32因為chiah-ê lóng是外邦人所求ê；lín ê天父也知chiah-ê lóng是lín欠用ê。In-ūi chiah-ê lóng sī gōa-pang lâng só͘ kiû ê; lín ê Thiⁿ Pē iā chai chiah-ê lóng sī lín khiàm-ēng ê.

33獨獨事先求伊ê國kap伊ê義，就chiah-ê物lóng beh 續 hō͘ lín。To̍k-to̍k tāi-seng kiû I ê kok kap I ê gī, chiū chiah ê mi̍h lóng beh sòa hō͘ lín.

34所以莫得為tio̍h明á日掛慮；因為hit-ê明á日，伊beh家己掛慮。一日ê艱苦tī一日夠額。Só͘-í bo̍h-tit ūi-tio̍h bîn-á-ji̍t khòa-lū; in-ūi hit ê bîn-á-ji̍t, i beh ka-kī khòa-lū. Chi̍t ji̍t ê kan-khó͘ tī chi̍t ji̍t kàu-gia̍h.

1莫得批評人，chiah免tú-tio̍h批評。Bo̍h-tit phoe-phêng lâng, chiah bián tú-tio̍h phoe-phêng.

2因為lín用甚麼批評來批評，亦beh án-ni受批評；lín用甚麼量來量，亦beh án-ni量hō͘ lín。In-ūi lín ēng sím-mi̍h phoe-phêng lâi phoe-phêng, ia̍h beh án-ni siū phoe-phêng; lín ēng sím-mi̍h niû lâi niû, ia̍h beh án-ni niû hō͘ lín.

3Koh你怎樣看見兄弟目睭內ê草á幼，亦無想你目睭內ê楹á柴ah？Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu-lāi ê chháu-á-iù, ia̍h bô siūⁿ lí ba̍k-chiu-lāi ê îⁿ-á-chhâ ah?

4Beh怎樣kā你ê兄弟講，你目睭內ê草á幼hō͘我kā你the̍h起來，亦你目睭內竟然有楹á柴ah？Beh cháiⁿ-iūⁿ kā lí ê hiaⁿ-tī kóng, Lí ba̍k-chiu-lāi ê chháu-á-iù hō͘ góa kā lí the̍h-khí-lâi, ia̍h lí ba̍k-chiu-lāi kèng-jiân ū îⁿ-á-chhâ ah?

5假好ê人ah，事先the̍h去你目睭內ê楹á柴，chiah會明明看見thang the̍h去兄弟目睭內ê草á幼。Ké-hó ê lâng ah, tāi-seng the̍h-khì lí ba̍k-chiu-lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu-lāi ê chháu-á-iù.

6莫得用聖ê物hō͘狗，亦莫得用lín ê珍珠hiat tī豬ê頭前；驚了in用腳踏伊，oa̍t-lìn-tńg來咬lín。Bo̍h-tit ēng sèng ê mi̍h hō͘ káu, ia̍h bo̍h-tit ēng lín ê chin-chu hiat tī ti ê thâu-chêng; kiaⁿ-liáu in ēng kha ta̍h i, oa̍t-lìn-tńg lâi kā lín.

7求就hō͘ lín，chhē就tú-tio̍h，phah門就kā lín開。Kiû chiū hō͘ lín, chhē chiū tú-tio̍h, phah mn̂g chiū kā lín khui.

8因為見若求ê得tio̍h；chhē ê tú-tio̍h；phah門ê，就kā伊開。In-ūi kìⁿ-nā kiû ê tit-tio̍h; chhē ê tú-tio̍h; phah mn̂g ê, chiū kā i khui.

9Lín中間有甚麼人，伊ê Kiáⁿ kā伊討餅，kiám beh用石頭hō͘伊？Lín tiong-kan ū sím-mi̍h lâng, i ê kiáⁿ kā i thó piáⁿ, kiám beh ēng chio̍h-thâu hō͘ i?

10á是beh ti̍h魚，kiám beh用蛇hō͘伊？á-sī beh ti̍h hî, kiám beh ēng chôa hō͘ i?

11Lín chiah-ê雖然pháiⁿ，iáu-kú會曉得用好物hō͘ lín ê Kiáⁿ兒，何況lín tī天裡ê父，kiám無beh用好物hō͘求伊ê人mah？Lín chiah-ê sui-jiân pháiⁿ, iáu-kú ōe hiáu-tit ēng hó mi̍h hō͘ lín ê kiáⁿ-jî, hô-hòng lín tī thiⁿ-ni̍h ê Pē, kiám bô beh ēng hó mi̍h hō͘ kiû I ê lâng mah?

12所以lín見若ài人款待lín ê，lín亦tio̍h án-ni款待人；因為這是律法kap先知。Só͘-í lín kìⁿ-nā ài lâng khoán-thāi lín ê, lín ia̍h tio̍h án-ni khoán-thāi lâng; in-ūi che sī lu̍t-hoat kap sian-ti.

13Lín tio̍h tùi hit-ê狹門入；因為透到滅無ê，hit-ê門闊，hit-ê路大條，tùi hia入ê人chōe。Lín tio̍h tùi hit ê oe̍h mn̂g ji̍p; in-ūi thàu kàu bia̍t-bô ê, hit ê mn̂g khoah, hit ê lō͘ tōa tiâu, tùi hia ji̍p ê lâng chōe.

14透到狹ê，hit-ê門狹，hit-ê路細條，chhē-tio̍h ê人少。Thàu kàu oa̍h ê, hit ê mn̂g oe̍h, hit ê lō͘ sòe tiâu, chhē-tio̍h ê lâng chió.

15謹慎持防假ê先知，in就近lín，外面是羊羔，內面是狠惡ê豺狼。Kín-sīn tî-hông ké ê sian-ti, in chiū-kūn lín, gōa-bīn sī iûⁿ-ko, lāi-bīn sī hiông-ok ê chhâi-lông.

16Lín beh tùi in ê果子來bat伊；kiám tùi刺phè挽(bán)葡萄，tùi蒺藜(chi̍t-lê)挽無花果mah？Lín beh tùi in ê ké-chí lâi bat i; kiám tùi chhì-phè bán phû-tô, tùi chi̍t-lê bán bû-hoa-kó mah?

17Án-ni見若好樹結好果子；pháiⁿ樹結pháiⁿ果子。Án-ni kìⁿ-nā hó chhiū kiat hó ké-chí; pháiⁿ chhiū kiat pháiⁿ ké-chí.

18好樹bōe結pháiⁿ果子，pháiⁿ樹bōe結好果子。Hó chhiū bōe kiat pháiⁿ ké-chí, pháiⁿ chhiū bōe kiat hó ké-chí.

19見若樹無結好果子ê，就chhò伊，hiat落火。Kìⁿ-nā chhiū bô kiat hó ké-chí ê, chiū chhò i, hiat-lo̍h hé.

20所以lín beh tùi in ê果子來bat伊。Só͘-í lín beh tùi in ê ké-chí lâi bat i.

21見若稱呼我講，主ah，主ah ê，無一盡入天國；獨獨行我tī天裡ê父ê旨意ê，chiah會。Kìⁿ-nā chheng-ho͘ góa kóng, Chú ah, Chú ah ê, bô it-chīn ji̍p thian-kok; to̍k-to̍k kiâⁿ góa tī thiⁿ-ni̍h ê Pē ê chí-ì ê, chiah ōe.

22當hit日chōe-chōe人beh kā我講，主ah，主ah，阮kiám m̄是用你ê名傳教，用你ê名趕鬼，用你ê名行chōe-chōe權能mah？Tng hit ji̍t chōe-chōe lâng beh kā góa kóng, Chú ah, Chú ah, goán kiám m̄ sī ēng lí ê miâ thoân kàu, ēng lí ê miâ kóaⁿ kúi, ēng lí ê miâ kiâⁿ chōe-chōe koân-lêng mah?

23就hit時我beh明明kā in講，我lóng m̄-bat lín；做不法ê，tio̍h離開我去。Chiū hit sî góa beh bêng-bêng kā in kóng, Góa lóng m̄ bat lín; chòe put-hoat ê, tio̍h lī-khui góa khì.

24所以見若聽我chiah-ê話來行ê，beh比並知識ê人，起伊ê厝tī石磐頂；Só͘-í kìⁿ-nā thiaⁿ góa chiah ê ōe lâi kiâⁿ ê, beh pí-phēng tì-sek ê lâng, khí i ê chhù tī chio̍h-pôaⁿ téng;

25雨落，大水到，風吹，衝tio̍h hit間厝，亦無倒；因為地基tī石磐頂。hō͘ lo̍h, tōa chúi kàu, hong chhe, chhiong-tio̍h hit keng chhù, ia̍h bô tó; in-ūi tōe-ki tī chio̍h-pôaⁿ téng.

26見若聽我chiah-ê話，無行ê，beh比並戇人，起伊ê厝tī沙頂；Kìⁿ-nā thiaⁿ góa chiah ê ōe, bô kiâⁿ ê, beh pí-phēng gōng lâng, khí i ê chhù tī soa téng;

27雨落，大水到，風吹，衝tio̍h hit間厝，就倒；koh伊ê倒是傷重。hō͘ lo̍h, tōa chúi kàu, hong chhe, chhiong-tio̍h hit keng chhù, chiū tó; koh i ê tó sī siong-tiōng.

28耶穌講chiah-ê話soah，眾人奇怪伊ê教示。Iâ-so͘ kóng chiah ê ōe soah, chèng lâng kî-koài I ê kà-sī.

29因為伊教示人，親像有權能ê，無親像in ê經學士。In-ūi I kà-sī lâng, chhin-chhiūⁿ ū koân-lêng ê, bô chhin-chhiūⁿ in ê keng-ha̍k-sū.

1耶穌已經落山，kui大陣ê人tè伊。Iâ-so͘ í-keng lo̍h soaⁿ, kui tōa tīn ê lâng tè I.

2Tú-tn̄g有一個thái-ko ê就近來拜伊講，主ah，你若肯，就會hō͘我清氣。Tú-tn̄g ū chi̍t ê thái-ko ê chiū-kūn lâi pài I kóng, Chú ah, lí nā khéng, chiū ōe hō͘ góa chheng-khì.

3伊就伸手摸伊講，我肯，你thang清氣；伊ê thái-ko liâm-piⁿ清氣。I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì.

4耶穌koh kā伊講，謹慎莫得kā人講；獨獨去，將本身hō͘祭司，亦tio̍h獻摩西所吩咐ê禮物，來做證據tī人。Iâ-so͘ koh kā i kóng, Kín-sīn bo̍h-tit kā lâng kóng; to̍k-to̍k khì, chiong pún-sin hō͘ chè-si giām, ia̍h tio̍h hiàn Mô͘-se só͘ hoan-hù ê lé-mi̍h, lâi chòe chèng-kù tī lâng.

5已經入迦百農，有百總就近伊，來求伊講，Í-keng ji̍p Ka-pek-lông, ū pé-chóng chiū-kūn I, lâi kiû I kóng,

6主ah，我ê奴僕piàn-sūi，倒tī厝內，艱苦到極。Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k.

7伊就kā伊講，我來去kā醫伊。I chiū kā i kóng, Góa lâi khì i i.

8百總應講，主ah，你到我tau，我當bōe起；你kan-ta講一句話，我ê奴僕就會好。Pé-chóng ìn kóng, Chú ah, lí kàu góa tau, góa tng bōe khí; lí kan-ta kóng chi̍t kù ōe, góa ê lô͘-po̍k chiū ōe hó.

9因為我亦是hō͘人管ê人，也有兵hō͘我管；kā chit-ê講，去，伊就去；kā hit-ê講，來，伊就來；kā我ê奴僕講，行án-ni，伊就行án-ni。In-ūi góa ia̍h sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

10耶穌聽見就奇怪，kā tè伊ê人講，我實在kā lín講，親像chit號ê深信，連以色列中，我bē bat tú-tio̍h。Iâ-so͘ thiaⁿ-kìⁿ chiū kî-koài, kā tè I ê lâng kóng, Góa si̍t-chāi kā lín kóng, chhin-chhiūⁿ chit hō ê chhim sìn, liân Í-sek-lia̍t tiong, góa bē bat tú-tio̍h.

11我koh kā lín講，tùi東tùi西，有chōe-chōe人beh到，kap亞伯拉罕、以撒、雅各，坐桌tī天國；Góa koh kā lín kóng, tùi tang tùi sai, ū chōe-chōe lâng beh kàu, kap A-pek-la̍h-hán, Í-sat, Ngá-kok, chē toh tī thian-kok;

12但是國ê子民beh tú-tio̍h趕出tī外面ê烏暗；tī hia beh有啼哭咬牙切齒。nā-sī kok ê chú-bîn beh tú-tio̍h kóaⁿ-chhut tī gōa-bīn ê o͘-àm; tī hia beh ū thî-khàu kā-gê chhiat-chhí.

13耶穌就kā百總講，去ah，照你ê信kā你成；tú-tú hit時，伊ê奴僕就好。Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó.

14耶穌入彼得ê家，看見伊ê丈母，患tio̍h熱病倒teh。Iâ-so͘ ji̍p Pí-tek ê ke, khòaⁿ-kìⁿ i ê tiūⁿ-ḿ, hoān-tio̍h jia̍t-pīⁿ tó-teh.

15就摸伊ê手，熱就退；婦人人就起來伺候伊。Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I.

16到黃昏暗，有人chhōa chōe-chōe患tio̍h鬼ê就近伊；伊用一句話趕出hiah-ê神；koh醫好一切有病ê人；Kàu hông-hun-àm, ū lâng chhōa chōe-chōe hoān-tio̍h kúi ê chiū-kūn I; I ēng chi̍t kù ōe kóaⁿ-chhut hiah ê sîn; koh i-hó it-chhè ū pīⁿ ê lâng;

17就是beh應驗先知以賽亞所講ê，講，伊本身替受咱ê軟弱，擔當咱ê病症。chiū-sī beh èng-giām sian-ti Í-sài-a só͘ kóng ê, kóng, I pún-sin thòe-siū lán ê loán-jio̍k, tam-tng lán ê pīⁿ-chèng.

18耶穌看見kui大陣ê人圍伊，就吩咐過去hit pêng岸。Iâ-so͘ khòaⁿ-kìⁿ kui tōa tīn ê lâng ûi I, chiū hoan-hù kè-khì hit pêng hōaⁿ.

19有一個經學士來，kā伊講，先生ah，你無論tá落去，我beh tè你。Ū chi̍t ê keng-ha̍k-sū lâi, kā I kóng, Sian-siⁿ ah, lí bô lūn tá-lo̍h khì, góa beh tè lí.

20耶穌就kā伊講，狐狸有孔，天中ê飛鳥有siū；獨獨人子無khòa頭殼ê所在。Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

21Koh一個學生kā伊講，主ah，hō͘我先倒去埋葬我ê老父。Koh chi̍t ê ha̍k-seng kā I kóng, Chú ah, hō͘ góa seng tò-khì bâi-chòng góa ê lāu-pē.

22獨獨耶穌kā伊講，你tè我，chhut-chāi死人去埋葬in ê死人。To̍k-to̍k Iâ-so͘ kā i kóng,, Lí tè góa, chhut-chāi sí lâng khì bâi-chòng in ê sí lâng.

23已經落船，伊ê學生tè伊。Í-keng lo̍h chûn, I ê ha̍k-seng tè I.

24忽然海裡起大風湧，致到船hō͘湧蓋；但是耶穌teh睏。Hut-jiân hái-ni̍h khí tōa hong-éng, tì-kàu chûn hō͘ éng khàm; nā-sī Iâ-so͘ teh khùn.

25學生就近來叫伊起來，講，主ah，救o͘h，beh無命lah！Ha̍k-seng chiū-kūn lâi kiò I khí-lâi, kóng, Chú ah, kiù o͘h, beh bô miā lah!

26伊就kā in講，小信ê人ah，怎樣hiah無膽？就起來，責備風kap海，就大平定。I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ.

27Hiah-ê人奇怪講，chit-ê是甚麼號人，風kap海亦順伊？Hiah ê lâng kî-koài kóng, chit-ê sī sím-mi̍h hō lâng, hong kap hái ia̍h sūn I?

28已經過去hit pêng岸，到Ka-tāi-lia̍p人ê地；有患tio̍h鬼ê，兩人，tùi塚墓出來，tú-tio̍h伊，勢面狠kài-kài；致到無人敢tùi hit條路過。Í-keng kè-khì hit pêng hōaⁿ, kàu Ka-tāi-lia̍p lâng ê tōe; ū hoān-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè.

29In忽然喉叫講，上帝ê Kiáⁿ ah，阮kap你有甚麼干涉？時bē到，你來chia是beh苦楚阮mah？In hut-jiân âu-kiò kóng, Siōng-tè ê Kiáⁿ ah, goán kap lí ū sím-mi̍h kan-sia̍p? sî bē kàu, lí lâi chia sī beh khó͘-chhó͘ goán mah?

30離in遠遠有大群ê豬teh討食；Lī in hn̄g-hn̄g ū tōa kûn ê ti teh thó-chia̍h;

31hiah-ê鬼求伊講，你若趕阮，就差阮入豬群。hiah ê kúi kiû I kóng, Lí nā kóaⁿ goán, chiū chhe goán ji̍p ti kûn.

32伊就kā in講，去ah。鬼就出來，去入豬；忽然全群chông落山崁，入海，死tī水裡。I chiū kā in kóng, Khì ah. Kúi chiū chhut-lâi, khì ji̍p ti; hut-jiân choân-kûn chông lo̍h soaⁿ-khàm, ji̍p hái, sí tī chúi-ni̍h.

33顧豬ê走去入城；將chiah-ê事，以及患tio̍h鬼ê人所tú-tio̍h ê，lóng kā人講。Kò͘ ti ê cháu khì ji̍p siâⁿ; chiong chiah ê sū, í-ki̍p hoān-tio̍h kúi ê lâng só͘ tú-tio̍h ê, lóng kā lâng kóng.

34Thong城ê人出去，chhē-tio̍h耶穌；已經見tio̍h，就求伊離開in ê地界。Thong siâⁿ ê lâng chhut-khì, chhē-tio̍h Iâ-so͘; í-keng kìⁿ-tio̍h, chiū kiû I lī-khui in ê tōe-kài.