1耶穌已經落山，kui大陣ê人tè伊。Iâ-so͘ í-keng lo̍h soaⁿ, kui tōa tīn ê lâng tè I.

2Tú-tn̄g有一個thái-ko ê就近來拜伊講，主ah，你若肯，就會hō͘我清氣。Tú-tn̄g ū chi̍t ê thái-ko ê chiū-kūn lâi pài I kóng, Chú ah, lí nā khéng, chiū ōe hō͘ góa chheng-khì.

3伊就伸手摸伊講，我肯，你thang清氣；伊ê thái-ko liâm-piⁿ清氣。I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì.

4耶穌koh kā伊講，謹慎莫得kā人講；獨獨去，將本身hō͘祭司，亦tio̍h獻摩西所吩咐ê禮物，來做證據tī人。Iâ-so͘ koh kā i kóng, Kín-sīn bo̍h-tit kā lâng kóng; to̍k-to̍k khì, chiong pún-sin hō͘ chè-si giām, ia̍h tio̍h hiàn Mô͘-se só͘ hoan-hù ê lé-mi̍h, lâi chòe chèng-kù tī lâng.

5已經入迦百農，有百總就近伊，來求伊講，Í-keng ji̍p Ka-pek-lông, ū pé-chóng chiū-kūn I, lâi kiû I kóng,

6主ah，我ê奴僕piàn-sūi，倒tī厝內，艱苦到極。Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k.

7伊就kā伊講，我來去kā醫伊。I chiū kā i kóng, Góa lâi khì i i.

8百總應講，主ah，你到我tau，我當bōe起；你kan-ta講一句話，我ê奴僕就會好。Pé-chóng ìn kóng, Chú ah, lí kàu góa tau, góa tng bōe khí; lí kan-ta kóng chi̍t kù ōe, góa ê lô͘-po̍k chiū ōe hó.

9因為我亦是hō͘人管ê人，也有兵hō͘我管；kā chit-ê講，去，伊就去；kā hit-ê講，來，伊就來；kā我ê奴僕講，行án-ni，伊就行án-ni。In-ūi góa ia̍h sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

10耶穌聽見就奇怪，kā tè伊ê人講，我實在kā lín講，親像chit號ê深信，連以色列中，我bē bat tú-tio̍h。Iâ-so͘ thiaⁿ-kìⁿ chiū kî-koài, kā tè I ê lâng kóng, Góa si̍t-chāi kā lín kóng, chhin-chhiūⁿ chit hō ê chhim sìn, liân Í-sek-lia̍t tiong, góa bē bat tú-tio̍h.

11我koh kā lín講，tùi東tùi西，有chōe-chōe人beh到，kap亞伯拉罕、以撒、雅各，坐桌tī天國；Góa koh kā lín kóng, tùi tang tùi sai, ū chōe-chōe lâng beh kàu, kap A-pek-la̍h-hán, Í-sat, Ngá-kok, chē toh tī thian-kok;

12但是國ê子民beh tú-tio̍h趕出tī外面ê烏暗；tī hia beh有啼哭咬牙切齒。nā-sī kok ê chú-bîn beh tú-tio̍h kóaⁿ-chhut tī gōa-bīn ê o͘-àm; tī hia beh ū thî-khàu kā-gê chhiat-chhí.

13耶穌就kā百總講，去ah，照你ê信kā你成；tú-tú hit時，伊ê奴僕就好。Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó.

14耶穌入彼得ê家，看見伊ê丈母，患tio̍h熱病倒teh。Iâ-so͘ ji̍p Pí-tek ê ke, khòaⁿ-kìⁿ i ê tiūⁿ-ḿ, hoān-tio̍h jia̍t-pīⁿ tó-teh.

15就摸伊ê手，熱就退；婦人人就起來伺候伊。Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I.

16到黃昏暗，有人chhōa chōe-chōe患tio̍h鬼ê就近伊；伊用一句話趕出hiah-ê神；koh醫好一切有病ê人；Kàu hông-hun-àm, ū lâng chhōa chōe-chōe hoān-tio̍h kúi ê chiū-kūn I; I ēng chi̍t kù ōe kóaⁿ-chhut hiah ê sîn; koh i-hó it-chhè ū pīⁿ ê lâng;

17就是beh應驗先知以賽亞所講ê，講，伊本身替受咱ê軟弱，擔當咱ê病症。chiū-sī beh èng-giām sian-ti Í-sài-a só͘ kóng ê, kóng, I pún-sin thòe-siū lán ê loán-jio̍k, tam-tng lán ê pīⁿ-chèng.

18耶穌看見kui大陣ê人圍伊，就吩咐過去hit pêng岸。Iâ-so͘ khòaⁿ-kìⁿ kui tōa tīn ê lâng ûi I, chiū hoan-hù kè-khì hit pêng hōaⁿ.

19有一個經學士來，kā伊講，先生ah，你無論tá落去，我beh tè你。Ū chi̍t ê keng-ha̍k-sū lâi, kā I kóng, Sian-siⁿ ah, lí bô lūn tá-lo̍h khì, góa beh tè lí.

20耶穌就kā伊講，狐狸有孔，天中ê飛鳥有siū；獨獨人子無khòa頭殼ê所在。Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

21Koh一個學生kā伊講，主ah，hō͘我先倒去埋葬我ê老父。Koh chi̍t ê ha̍k-seng kā I kóng, Chú ah, hō͘ góa seng tò-khì bâi-chòng góa ê lāu-pē.

22獨獨耶穌kā伊講，你tè我，chhut-chāi死人去埋葬in ê死人。To̍k-to̍k Iâ-so͘ kā i kóng,, Lí tè góa, chhut-chāi sí lâng khì bâi-chòng in ê sí lâng.

23已經落船，伊ê學生tè伊。Í-keng lo̍h chûn, I ê ha̍k-seng tè I.

24忽然海裡起大風湧，致到船hō͘湧蓋；但是耶穌teh睏。Hut-jiân hái-ni̍h khí tōa hong-éng, tì-kàu chûn hō͘ éng khàm; nā-sī Iâ-so͘ teh khùn.

25學生就近來叫伊起來，講，主ah，救o͘h，beh無命lah！Ha̍k-seng chiū-kūn lâi kiò I khí-lâi, kóng, Chú ah, kiù o͘h, beh bô miā lah!

26伊就kā in講，小信ê人ah，怎樣hiah無膽？就起來，責備風kap海，就大平定。I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ.

27Hiah-ê人奇怪講，chit-ê是甚麼號人，風kap海亦順伊？Hiah ê lâng kî-koài kóng, chit-ê sī sím-mi̍h hō lâng, hong kap hái ia̍h sūn I?

28已經過去hit pêng岸，到Ka-tāi-lia̍p人ê地；有患tio̍h鬼ê，兩人，tùi塚墓出來，tú-tio̍h伊，勢面狠kài-kài；致到無人敢tùi hit條路過。Í-keng kè-khì hit pêng hōaⁿ, kàu Ka-tāi-lia̍p lâng ê tōe; ū hoān-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè.

29In忽然喉叫講，上帝ê Kiáⁿ ah，阮kap你有甚麼干涉？時bē到，你來chia是beh苦楚阮mah？In hut-jiân âu-kiò kóng, Siōng-tè ê Kiáⁿ ah, goán kap lí ū sím-mi̍h kan-sia̍p? sî bē kàu, lí lâi chia sī beh khó͘-chhó͘ goán mah?

30離in遠遠有大群ê豬teh討食；Lī in hn̄g-hn̄g ū tōa kûn ê ti teh thó-chia̍h;

31hiah-ê鬼求伊講，你若趕阮，就差阮入豬群。hiah ê kúi kiû I kóng, Lí nā kóaⁿ goán, chiū chhe goán ji̍p ti kûn.

32伊就kā in講，去ah。鬼就出來，去入豬；忽然全群chông落山崁，入海，死tī水裡。I chiū kā in kóng, Khì ah. Kúi chiū chhut-lâi, khì ji̍p ti; hut-jiân choân-kûn chông lo̍h soaⁿ-khàm, ji̍p hái, sí tī chúi-ni̍h.

33顧豬ê走去入城；將chiah-ê事，以及患tio̍h鬼ê人所tú-tio̍h ê，lóng kā人講。Kò͘ ti ê cháu khì ji̍p siâⁿ; chiong chiah ê sū, í-ki̍p hoān-tio̍h kúi ê lâng só͘ tú-tio̍h ê, lóng kā lâng kóng.

34Thong城ê人出去，chhē-tio̍h耶穌；已經見tio̍h，就求伊離開in ê地界。Thong siâⁿ ê lâng chhut-khì, chhē-tio̍h Iâ-so͘; í-keng kìⁿ-tio̍h, chiū kiû I lī-khui in ê tōe-kài.

1耶穌落船過海，去到伊ê本城。Iâ-so͘ lo̍h chûn kè hái, khì kàu I ê pún siâⁿ.

2Tú-tn̄g有人扛一個piàn-sūi ê倒tī舖á裡來就近伊；耶穌看見in ê信，就kā piàn-sūi ê講，Kiáⁿ ah，做你安心，你ê罪赦lah。Tú-tn̄g ū lâng kng chi̍t ê piàn-sūi ê tó tī pho͘-á-ni̍h lâi chiū-kūn I; Iâ-so͘ khòaⁿ-kìⁿ in ê sìn, chiū kā piàn-sūi ê kóng, Kiáⁿ ah, chòe lí an-sim, lí ê chōe sià lah.

3有經學士幾nā人心內講，Chit人僭權lām-sám講。Ū keng-ha̍k-sū kúi-nā lâng sim-lāi kóng, Chit lâng chhiàm-koân lām-sám kóng.

4耶穌知in ê心意，就講，Lín啥事心內khǹg pháiⁿ意思ah？Iâ-so͘ chai in ê sim-ì, chiū kóng, Lín siáⁿ-sū sim-lāi khǹg pháiⁿ ì-sù ah?

5講，你ê罪赦，á是講，起來行，tá-lo̍h一項khah快？Kóng, Lí ê chōe sià, á-sī kóng, Khí-lâi kiâⁿ, tá-lo̍h chi̍t hāng khah khoài?

6總是beh hō͘ lín知，人子tī地裡有權thang赦罪，就kā piàn-sūi ê講，起來，giâ你ê舖á，tò去你ê厝。Chóng-sī beh hō͘ lín chai, Jîn-chú tī tōe-ni̍h ū koân thang sià chōe, chiū kā piàn-sūi ê kóng, Khí-lâi, giâ lí ê pho͘-á, tò-khì lí ê chhù.

7伊就起來，tò去伊ê厝。I chiū khí-lâi, tò-khì i ê chhù.

8眾人看見就驚；歸榮光上帝，就是用chit號權hō͘人ê。Chèng lâng khòaⁿ-kìⁿ chiū kiaⁿ; kui êng-kng Siōng-tè, chiū-sī ēng chit hō koân hō͘ lâng ê.

9耶穌tùi hia經過，看見一人，名馬太，坐tī餉關；就kā伊講，Tè我；伊就起來tè伊。Iâ-so͘ tùi hia keng-kè, khòaⁿ-kìⁿ chi̍t lâng, miâ Má-thài, chē tī hiòng-koan; chiū kā i kóng, Tè góa; i chiū khí-lâi tè I.

10耶穌坐桌tī伊ê厝，有chōe-chōe抽餉ê kap pháiⁿ人來，kap耶穌chham伊ê學生同坐。Iâ-so͘ chē toh tī i ê chhù, ū chōe-chōe thiu-hiòng ê kap pháiⁿ lâng lâi, kap Iâ-so͘ chham I ê ha̍k-seng tâng chē.

11法利賽人看見，kā伊ê學生講，Lín先生啥事kap抽餉ê以及pháiⁿ人saⁿ-kap食？Hoat-lī-sài lâng khòaⁿ-kìⁿ, kā I ê ha̍k-seng kóng, Lín sian-siⁿ siáⁿ-sū kap thiu-hiòng ê í-ki̍p pháiⁿ lâng saⁿ-kap chia̍h?

12耶穌聽見就講，勇健ê人無欠用醫生，獨獨破病ê就tio̍h。Iâ-so͘ thiaⁿ-kìⁿ chiū kóng, Ióng-kiāⁿ ê lâng bô khiàm-ēng i-seng, to̍k-to̍k phòa-pīⁿ ê chiū tio̍h.

13總是，我ài憐憫，m̄ ài祭祀，chit句甚麼意義，lín tio̍h去學。因為我來m̄是beh招義人，是beh招pháiⁿ人。Chóng-sī, Góa ài lîn-bín, m̄ ài chè-sū, chit kù sím-mi̍h ì-gī, lín tio̍h khì o̍h. In-ūi góa lâi m̄ sī beh chio gī lâng, sī beh chio pháiⁿ lâng.

14Hit時約翰ê學生就近伊講，阮kap法利賽人ta̍uh-ta̍uh禁食，但是你ê學生無禁食，是怎樣？Hit sî Iok-hān ê ha̍k-seng chiū-kūn I kóng, Goán kap Hoat-lī-sài lâng ta̍uh-ta̍uh kìm-chia̍h, nā-sī lí ê ha̍k-seng bô kìm-chia̍h, sī cháiⁿ-iūⁿ?

15耶穌kā in講，新kiáⁿ婿kap賀娶ê人saⁿ-kap tī-teh，賀娶ê人kiám會哀傷mah？獨獨時日beh到，新kiáⁿ婿tùi in中間無--去，hit時in就beh禁食。Iâ-so͘ kā in kóng, Sin-kiáⁿ-sài kap hō-chhōa ê lâng saⁿ-kap tī-teh, hō-chhōa ê lâng kiám ōe ai-siong mah? to̍k-to̍k sî-ji̍t beh kàu, sin-kiáⁿ-sài tùi in tiong-kan bô--khì, hit sî in chiū beh kìm-chia̍h.

16無人用新布補舊衫；因為所補ê hit塊，會kiù裂hit領衫，伊ê破孔koh khah大。Bô lâng ēng sin pò͘ pó͘ kū saⁿ; in-ūi só͘ pó͘ ê hit tè, ōe kiù-li̍h hit niá saⁿ, i ê phòa-khang koh khah tōa.

17人也無用新酒tóe tī舊皮囊；若是有，就lông裂，酒漏，lông亦續 pháiⁿ；獨獨用新酒tóe tī新皮囊，就兩項lóng保全。Lâng iā bô ēng sin chiú tóe tī kū phê-lông; nā sī ū, chiū lông li̍h, chiú lāu, lông ia̍h sòa pháiⁿ; to̍k-to̍k ēng sin chiú tóe tī sin phê-lông, chiū nn̄g hāng lóng pó-choân.

18講chiah-ê話ê時，tú-tn̄g有一個官來拜伊講，我ê cha-bó͘-kiáⁿ tú-á死，總是你來用手摸伊，伊就會活。Kóng chiah ê ōe ê sî, tú-tn̄g ū chi̍t ê koaⁿ lâi pài I kóng, Góa ê cha-bó͘-kiáⁿ tú-á sí, chóng-sī lí lâi ēng chhiú bong i, i chiū ōe oa̍h.

19耶穌起來tè伊去，伊ê學生亦去。Iâ-so͘ khí-lâi tè i khì, I ê ha̍k-seng ia̍h khì.

20Tú-tn̄g有一個婦人人，血漏十二年，行óa伊ê ka-chiah後，摸伊衫á裾ê鬚；Tú-tn̄g ū chi̍t ê hū-jîn-lâng, hiat-lāu cha̍p-jī nî, kiâⁿ óa I ê ka-chiah-āu, bong I saⁿ-á-ku ê chhiu;

21因為伊心內phah算講，我kan-ta摸伊ê衫，就會好。in-ūi i sim-lāi phah-sǹg kóng, Góa kan-ta bong I ê saⁿ, chiū ōe hó.

22耶穌oa̍t-tńg身，看伊就講，婦人人ah，做你安心，你ê信hō͘你好lah；tùi hit時婦人人就好。Iâ-so͘ oa̍t-tńg-sin, khòaⁿ i chiū kóng, Hū-jîn-lâng ah, chòe lí an-sim, lí ê sìn hō͘ lí hó lah; tùi hit sî hū-jîn-lâng chiū hó.

23耶穌到hit-ê官ê厝，看見pûn笛á ê，也有眾人teh哭；Iâ-so͘ kàu hit ê koaⁿ ê chhù, khòaⁿ-kìⁿ pûn ta̍t-á ê, iā ū chèng lâng teh khàu;

24就講，退去，因為cha-bó͘ gín-ná m̄是死，是teh睏。In就冷笑伊。chiū kóng, Thè-khì, in-ūi cha-bó͘ gín-ná m̄ sī sí, sī teh khùn. In chiū léng-chhiò I.

25已經趕眾人出，就入去，牽伊ê手；cha-bó͘ gín-ná就起來。Í-keng kóaⁿ chèng lâng chhut, chiū ji̍p-khì, khan i ê chhiú; cha-bó͘ gín-ná chiū khí-lâi.

26Chit-ê風聲遍傳tī hit-ê地方。Chit ê hong-siaⁿ piàn thoân tī hit ê tōe-hng.

27耶穌tùi hia經過，有兩個chhiⁿ-mî人tè伊，叫講，大衛ê後裔，憐憫阮。Iâ-so͘ tùi hia keng-kè, ū nn̄g ê chhiⁿ-mî lâng tè I, kiò kóng, Tāi-pi̍t ê hō͘-è, lîn-bín goán.

28已經入厝，chhiⁿ-mî人就近伊。耶穌kā in講，Lín信我會做chit-ê事mah？應講，主ah，有。Í-keng ji̍p chhù, chhiⁿ-mî lâng chiū-kūn I. Iâ-so͘ kā in kóng, Lín sìn góa ōe chòe chit ê sū mah? Ìn kóng, Chú ah, ū.

29伊就摸in ê目睭講，照lín ê信，kā lín做成。I chiū bong in ê ba̍k-chiu kóng, chiàu lín ê sìn, kā lín chòe chiâⁿ.

30In ê目睭就開。耶穌嚴嚴吩咐in講，謹慎莫得hō͘人知。In ê ba̍k-chiu chiū khui. Iâ-so͘ giâm-giâm hoan-hù in kóng, Kín-sīn bo̍h-tit hō͘ lâng chai.

31但是in出去，遍傳伊ê名tī hit地方。Nā-sī in chhut-khì, piàn thoân I ê miâ tī hit tōe-hng.

32In出去ê時，tú-tn̄g有人chhōa一個啞口患tio̍h鬼ê來就近耶穌。In chhut-khì ê sî, tú-tn̄g ū lâng chhōa chi̍t ê é-káu hoān-tio̍h kúi ê lâi chiū-kūn Iâ-so͘.

33鬼已經趕出，啞口ê就講話；hiah-ê眾人lóng奇怪講，以色列中bē bat看見án-ni。Kúi í-keng kóaⁿ chhut, é-káu ê chiū kóng ōe; hiah ê chèng lâng lóng kî-koài kóng, Í-sek-lia̍t tiong bē bat khòaⁿ-kìⁿ án-ni.

34但是法利賽人講，伊óa靠鬼王來趕鬼。Nā-sī Hoat-lī-sài lâng kóng, I óa-khò kúi-ông lâi kóaⁿ kúi.

35耶穌遍行chiah-ê城chiah-ê鄉社，tī in ê會堂教示人，傳天國ê福音，醫好ta̍k樣ê症頭，ta̍k樣ê病痛。Iâ-so͘ piàn kiâⁿ chiah ê siâⁿ chiah ê hiuⁿ-siā, tī in ê hōe-tn̂g kà-sī lâng, thoân thian-kok ê hok-im, i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ.

36伊看見hiah-ê眾人，就可憐in；因為in困苦四散，親像羊無牧者。I khòaⁿ-kìⁿ hiah ê chèng lâng, chiū khó-lîn in; in-ūi in khùn-khó͘ sì-sòaⁿ, chhin-chhiūⁿ iûⁿ bô bo̍k-chiá.

37Tùi án-n伊就kā伊ê學生講，Thang收成ê是chōe，做工ê是少；Tùi án-ni chiū kā I ê ha̍k-seng kóng, Thang siu-sêng ê sī chōe, chòe kang ê sī chió;

38所以lín tioh88求園主逼工去kā伊收成。só͘-í lín tio̍h kiû hn̂g Chú pek kang khì kā I siu-sêng.

1耶穌就叫伊十二個學生來，hō͘ in有制壓邪神ê權，來趕逐in，續醫好ta̍k樣ê症頭，ta̍k樣ê病痛。Iâ-so͘ chiū kiò I cha̍p-jī ê ha̍k-seng lâi, hō͘ in ū chè-ap siâ-sîn ê koân, lâi kóaⁿ-tio̍k in, sòa i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ.

2十二使徒ê名就是chiah-ê：頭一個西門(叫做彼得)，kap伊ê兄弟安得烈；西庇太ê Kiáⁿ雅各，kap伊ê兄弟約翰；Cha̍p-jī sù-tô͘ ê miâ chiū-sī chiah-ê: thâu-chi̍t-ê Se-bûn( kiò chòe Pí-tek), kap i ê hiaⁿ-tī An-tek-lia̍t; Se-pí-thài ê kiáⁿ Ngá-kok, kap i ê hiaⁿ-tī Iok-hān;

3腓力，kap Pa-to-lô-mái；To-má，kap抽餉ê馬太；A-le̍k-hui ê Kiáⁿ雅各，kap Ta̍t-thài；Hui-le̍k, kap Pa-to-lô-mái; To-má, kap thiu-hiòng ê Má-thài; A-le̍k-hui ê kiáⁿ Ngá-kok, kap Ta̍t-thài;

4Ka-ná-nî ê西門，kap加略人猶大，就是賣耶穌ê。Ka-ná-nî ê Se-bûn, kap Ka-lio̍k lâng Iû-tāi, chiū-sī bōe Iâ-so͘ ê.

5耶穌差chit十二人，續吩咐in講，外邦ê路莫得行，撒馬利亞人ê城莫得入；Iâ-so͘ chhe chí cha̍p-jī lâng, sòa hoan-hù in kóng, Gōa-pang ê lō͘ bo̍h-tit kiâⁿ, Sat-má-lī-a lâng ê siâⁿ bo̍h-tit ji̍p;

6khah好tio̍h去就近以色列家失落ê羊。khah hó tio̍h khì chiū-kūn Í-sek-lia̍t ke sit-lo̍h ê iûⁿ.

7行ê時，tio̍h傳講，天國近lah。Kiâⁿ ê sî, tio̍h thoân kóng, Thian-kok kūn lah.

8醫好有病ê；hō͘死ê koh活；hō͘ thái-ko ê清氣；趕鬼；lín白白得tio̍h，tio̍h白白hō͘人。I-hó ū pīⁿ ê; hō͘ sí ê koh-oa̍h; hō͘ thái-ko ê chheng-khì; kóaⁿ kúi; lín pe̍h-pe̍h tit-tio̍h, tio̍h pe̍h-pe̍h hō͘ lâng.

9Lín ê腰肚內，lóng m̄-thang有金、銀、銅；Lín ê io-tó͘ lāi, lóng m̄-thang ū kim, gûn, tâng;

10路裡亦莫得有tah-連，莫得兩領衫，莫得鞋，莫得柺á；因為做工人堪得得tio̍h伊ê lim食。lō͘-ni̍h ia̍h bo̍h-tit ū tah-liân, bo̍h-tit nn̄g niá saⁿ, bo̍h-tit ôe, bo̍h-tit koáiⁿ-á; in-ūi chòe-kang lâng kham-tit tit-tio̍h i ê lim-chia̍h.

11Lín所入ê，無論甚麼城，甚麼鄉里，tio̍h探聽其中是誰會堪得，就tiàm tī hia，到離開ê時。Lín só͘ ji̍p ê, bô lūn sím-mi̍h siâⁿ, sím-mi̍h hiuⁿ-lí, tio̍h thàm-thiaⁿ kî-tiong chī-chūi ōe kham-tit, chiū tiàm tī hia, kàu lī-khui ê sî.

12入hit-ê厝，tio̍h kā伊請安。Ji̍p hit ê chhù, tio̍h kā i chhéng-an.

13Hit-ê厝若會堪得，就hō͘ lín ê平安到tī伊；若bōe堪得，就hō͘ lín ê平安歸tī lín。Hit ê chhù nā ōe kham-tit, chiū hō͘ lín ê pêng-an kàu tī i; nā bōe kham-tit, chiū hō͘ lín ê pêng-an kui tī lín.

14見若m̄接納lín，m̄聽lín ê話ê，出hit-ê厝，hit-ê城ê時，tio̍h拌 (pōaⁿ)去lín腳裡ê土粉。Kìⁿ-nā m̄ chiap-la̍p lín, m̄ thiaⁿ lín ê ōe ê, chhut hit ê chhù, hit ê siâⁿ ê sî, tio̍h pōaⁿ-khì lín kha-ni̍h ê thô͘-hún.

15我實在kā lín講，當審判ê日，所多馬kap Gô͘-mô͘-la̍h ê地方比hit-ê城iáu khah快擔當。Góa si̍t-chāi kā lín kóng, Tng sím-phòaⁿ ê ji̍t, Só͘-to-má kap Gô͘-mô͘-la̍h ê tōe-hng pí hit ê siâⁿ iáu khah khoài tam-tng.

16Taⁿ我差lín親像羊tī豺狼ê中間；所以lín tio̍h知識親像蛇，純良親像鴿á。Taⁿ góa chhe lín chhin-chhiūⁿ iûⁿ tī chhâi-lông ê tiong-kan; só͘-í lín tio̍h tì-sek chhin-chhiūⁿ chôa, sûn-liông chhin-chhiūⁿ chíⁿ-á.

17總是tio̍h持防人；因為in beh將lín交hō͘公會，亦beh tī lín ê會堂鞭phah lín；Chóng-sī tio̍h tî-hông lâng; in-ūi in beh chiong lín kau hō͘ kong-hōe, ia̍h beh tī lín ê hōe-tn̂g piⁿ-phah lín;

18koh lín亦beh為tio̍h我ê緣故，受拖到總督kap君王ê面前，來做干證tī in kap外邦人。koh lín ia̍h beh ūi-tio̍h góa ê iân-kò͘, siū thoa kàu chóng-tok kap kun-ông ê bīn-chêng, lâi chòe kan-chèng tī in kap gōa-pang lâng.

19但是lín受送交ê時，莫得掛慮beh怎樣講，á是講甚麼話；因為所tio̍h講ê，beh tī hit時賞賜lín。Nā-sī lín siū sàng-kau ê sî, bo̍h-tit khòa-lū beh cháiⁿ-iūⁿ kóng, á-sī kóng sím-mi̍h ōe; in-ūi só͘ tio̍h kóng ê, beh tī hit sî siúⁿ-sù lín.

20因為m̄是lín家己講，是lín ê父ê神tiàm-tī lín teh講。In-ūi m̄ sī lín ka-kī kóng, sī lín ê Pē ê Sîn tiàm-tī lín teh kóng.

21兄弟beh將兄弟送交去死，父款待kiáⁿ亦án-ni；kiáⁿ兒beh起來攻擊父母，hō͘ in死。Hiaⁿ-tī beh chiong hiaⁿ-tī sàng-kau khì sí, pē khoán-thāi kiáⁿ ia̍h án-ni; kiáⁿ-jî beh khí-lâi kong-kek pē-bú, hō͘ in sí.

22亦lín因為我ê名beh hō͘眾人怨恨，獨獨吞忍到路尾ê，伊beh得tio̍h救。Ia̍h lín in-ūi góa ê miâ beh hō͘ chèng lâng oàn-hūn, to̍k-to̍k thun-lún kàu lō͘-bé ê, i beh tit-tio̍h kiù.

23Tī chit-ê城khún-tio̍k lín，tio̍h走到hit城；我實在kā lín講，以色列chiah-ê城，lín行bē thàng，人子就到。Tī chit ê siâⁿ khún-tio̍k lín, tio̍h cháu kàu hit siâⁿ; góa si̍t-chāi kā lín kóng, Í-sek-lia̍t chiah ê siâⁿ, lín kiâⁿ bē thàng, Jîn-chú chiū kàu.

24學生bōe pôaⁿ過先生，奴僕bōe pôaⁿ過主人。Ha̍k-seng bōe pôaⁿ-kè sian-siⁿ, lô͘-po̍k bōe pôaⁿ-kè chú-lâng.

25學生親像先生，奴僕親像主人，就夠額。人既然叫家主做Pia̍t-se-pok，何況叫伊家內ê人。Ha̍k-seng chhin-chhiūⁿ sian-siⁿ, lô͘-po̍k chhin-chhiūⁿ chú-lâng, chiū kàu-gia̍h. Lâng kì-jiân kiò ke-chú chòe Pia̍t-se-pok, hô-hòng kiò i ke-lāi ê lâng.

26所以莫得驚in；因為無有蓋密後來無露出ê事；亦無有隱密後來無hō͘人知ê。Só͘-í bo̍h-tit kiaⁿ in; in-ūi bô ū khàm-ba̍t āu-lâi bô lō͘-chhut ê sū; ia̍h bô ū ún-ba̍t āu-lâi bô hō͘ lâng chai ê.

27我tī暗中kā lín講ê，lín tio̍h tī光明ê所在講出；àⁿ tī耳孔kā lín講ê，tio̍h tī厝頂傳伊。Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; àⁿ tī hī-khang kā lín kóng ê, tio̍h tī chhù-téng thoân i.

28Hiah-ê害死身軀，bōe害死靈魂ê，莫得驚in；獨獨hit-ê會滅靈魂kap身軀tī地獄ê，khah tio̍h驚。Hiah ê hāi-sí sin-khu, bōe hāi-sí lêng-hûn ê, bo̍h-tit kiaⁿ in; to̍k-to̍k hit-ê ōe bia̍t lêng-hûn kap sin-khu tī tē-ge̍k ê, khah tio̍h kiaⁿ.

29兩隻雀鳥á kiám m̄是賣一分銀mah？若m̄是lín ê父有准，一隻亦bōe ka-la̍uh地；Nn̄g chiah chhek-chiáu-á kiám m̄ sī bōe chi̍t hun gûn mah? nā m̄ sī lín ê Pē ū chún, chi̍t chiah ia̍h bōe ka-la̍uh tōe;

30就lín ê頭毛亦lóng計算。chiū lín ê thâu-mn̂g ia̍h lóng kè-sǹg.

31所以lín莫得驚；lín比chōe-chōe雀鳥á khah貴氣。Só͘-í lín bo̍h-tit kiaⁿ; lín pí chōe-chōe chhek-chiáu-á khah kùi-khì.

32所以見若tī人ê面前認我ê，我亦tī我tī天裡ê父ê面前beh認伊。Só͘-í kìⁿ-nā tī lâng ê bīn-chêng jīn góa ê, góa ia̍h tī góa tī thiⁿ-ni̍h ê Pē ê bīn-chêng beh jīn i.

33見若tī人ê面前m̄認我ê，我亦tī我tī天裡ê父ê面前beh m̄認伊。Kìⁿ-nā tī lâng ê bīn-chêng m̄ jīn góa ê, góa ia̍h tī góa tī thiⁿ-ni̍h ê Pē ê bīn-chêng beh m̄ jīn i.

34莫得phah算我來是beh hō͘地上和平；我來m̄是beh hō͘伊和平，就是hiat落刀劍。Bo̍h-tit phah-sǹg góa lâi sī beh hō͘ tōe-chiūⁿ hô-pêng; góa lâi m̄ sī beh hō͘ i hô-pêng, chiū-sī hiat-lo̍h to-kiàm.

35因為我來，是hō͘ kiáⁿ kap伊ê老父絕情，cha-bó͘-kiáⁿ kap伊ê老母，sim-pū kap伊ê ta-ke，亦beh án-ni。In-ūi góa lâi, sī hō͘ kiáⁿ kap i ê lāu-pē choa̍t-chêng, cha-bó͘-kiáⁿ kap i ê lāu-bú, sim-pū kap i ê ta-ke, ia̍h beh án-ni.

36Koh人ê對敵就是伊家己家內ê人。Koh lâng ê tùi-te̍k chiū-sī i ka-kī ke-lāi ê lâng.

37疼父母khah過頭tī疼我ê，bōe堪得tī我；疼kiáⁿ, cha-bó͘-kiáⁿ khah過頭tī疼我ê，bōe堪得tī我；Thiàⁿ pē-bú khah kè-thâu tī thiàⁿ góa ê, bōe kham-tit tī góa; thiàⁿ kiáⁿ cha-bó͘-kiáⁿ khah kè-thâu tī thiàⁿ góa ê, bōe kham-tit tī góa;

38m̄背家己ê十字架來tè tī我ê後面ê，亦bōe堪得tī我。m̄ pē ka-kī ê si̍p-jī-kè lâi tè tī góa ê āu-bīn ê, ia̍h bōe kham-tit tī góa.

39得tio̍h伊ê性命ê人，beh失落伊；為tio̍h我失落伊ê性命ê人，beh得tio̍h伊。Tit-tio̍h i ê sìⁿ-miā ê lâng, beh sit-lo̍h i; ūi-tio̍h góa sit-lo̍h i ê sìⁿ-miā ê lâng, beh tit-tio̍h i.

40接納lín ê，就是接納我；接納我ê，就是接納差我ê。Chiap-la̍p lín ê, chiū-sī chiap-la̍p góa; chiap-la̍p góa ê, chiū-sī chiap-la̍p chhe góa ê.

41為tio̍h先知ê名來接納先知ê，beh得tio̍h先知ê賞；為tio̍h義人ê名來接納義人ê，beh得tio̍h義人ê賞。Ūi-tio̍h sian-ti ê miâ lâi chiap-la̍p sian-ti ê, beh tit-tio̍h sian-ti ê siúⁿ; ūi-tio̍h gī lâng ê miâ lâi chiap-la̍p gī lâng ê, beh tit-tio̍h gī lâng ê siúⁿ.

42見若為tio̍h學生ê名，kan-ta用一杯冷水hō͘ chiah-ê細kiáⁿ ê一個lim ê，我實在kā lín講，伊決斷bōe失落伊ê賞。Kìⁿ-nā ūi-tio̍h ha̍k-seng ê miâ, kan-ta ēng chi̍t poe léng-chúi hō͘ chiah ê sòe-kiáⁿ ê chi̍t ê lim ê, góa si̍t-chāi kā lín kóng, i koat-toàn bōe sit-lo̍h i ê siúⁿ.