1Tī眠床圖謀罪過，造作奸惡ê，到天光，因為手有力，就去行伊，chit號人有災厄ah。Tī bîn-chhn̂g tô͘-bô͘ chōe-kòa, chō-chok kan-ok--ê, kàu thiⁿ-kng, in-ūi chhiú ū la̍t, chiū khì kiâⁿ i, chit-hō lâng ū chai-ē ah.

2In貪人ê田園，就搶伊；貪人ê厝宅，就佔伊，in壓制人kap伊ê家，就是人kap伊ê產業。In tham lâng ê chhân-hn̂g, chiū chhiúⁿ i; tham lâng ê chhù-the̍h, chiū chiàm i, in ap-chè lâng kap i ê ke, chiū-sī lâng kap i ê sán-gia̍p.

3所以耶和華án-ni講，看ah，我圖謀降災厄tī chit-ê族，lín bōe能hō͘伊脫離lín ê頷頸；lín也bōe能頭殼kia̍h高高來行，因為chit-ê時勢真pháiⁿ。Só͘-í Iâ-hô-hoa án-ni kóng, Khòaⁿ ah, Góa tô͘-bô͘ kàng chai-ē tī chit ê cho̍k, lín bōe-ōe hō͘ i thoat-lī lín ê ām-kún; lín iā bōe-ōe thâu-khak kia̍h koâiⁿ-koâiⁿ lâi kiâⁿ, in-ūi chit ê sî-sè chin-pháiⁿ.

4到hit日，人beh用俗語批評lín，koh beh用哀慘ê哀歌來哀傷講，阮lóng衰敗；伊變換我ê百姓ê份額；伊移徙伊離開我到怎樣ah！伊將阮ê田地分hō͘悖逆ê人。Kàu hit-ji̍t lâng beh ēng sio̍k-gú phoe-phêng lín, koh beh ēng ai-chhám ê ai-ko lâi ai-siong kóng, Goán lóng soe-pāi; i piàn-ōaⁿ góa ê peh-sìⁿ ê hūn-gia̍h; i î-sóa i lī-khui góa kàu cháiⁿ-iūⁿ ah! i chiong goán ê chhân-tōe pun hō͘ pōe-ge̍k ê lâng.

5所以tī耶和華ê大會中，你的確無人thang liam-khau牽繩線。Só͘-í tī Iâ-hô-hoa ê tōa-hōe-tiong, lí tek-khak bô lâng thang liam-khau khan chîn-sòaⁿ.

6In宣傳講，Lín m̄-thang宣傳；in無beh宣傳chiah-ê事；凌辱無beh soah。In soan-thoân kóng, Lín m̄-thang soan-thoân; in bô beh soan-thoân chiah ê sū; lêng-jio̍k bô beh soah.

7Lín得tio̍h稱做雅各ê家ah，耶和華ê神kiám是狹toe̍h mah？chiah-ê事kiám是伊所做mah？我ê話kiám無利益行正直ê人mah？Lín tit-tio̍h chheng-chòe Ngá-kok ê ke ah, Iâ-hô-hoa ê Sîn kiám-sī oe̍h-toe̍h mah? Chiah ê sū kiám-sī I só͘ chòe mah? Góa ê ōe kiám bô lī-ek kiâⁿ chèng-ti̍t ê lâng mah?

8總是近日我ê百姓起來親像對敵；tùi hiah-ê安然經過，m̄-ài交戰ê人，搶伊ê外衫kap內衫。Chóng-sī kūn-ji̍t Góa ê peh-sìⁿ khí-lâi chhin-chhiūⁿ tùi-te̍k; tùi hiah-ê an-jiân keng-kè, m̄-ài kau-chiàn ê lâng, chhiúⁿ i ê gōa-saⁿ kap lāi-saⁿ.

9我ê百姓ê婦人人，lín趕in出in安樂ê家，koh將我ê榮光，tùi in ê細kiáⁿ永遠搶去。Góa ê peh-sìⁿ ê hū-jîn-lâng, lín kóaⁿ in chhut in an-lo̍k ê ke, koh chiong Góa ê êng-kng, tùi in ê sòe-kiáⁿ éng-oán chhiúⁿ-khì.

10起來ah，去ah，chia m̄是lín安歇ê所在；因為地已經hō͘污穢所敗壞，伊ê敗壞是傷重。Khí-lâi ah, khì ah, chia m̄-sī lín an-hioh ê só͘-chāi; in-ūi tōe í-keng hō͘ ù-òe só͘ pāi-hoāi, i ê pāi-hoāi sī siong-tiōng.

11若有人講荒唐kap白賊話，講，我beh對lín宣傳薄酒kap厚酒，就chit人beh做chiah-ê百姓ê先知。Nā ū lâng kóng hong-tông kap pe̍h-chha̍t-ōe, kóng, Góa beh tùi lín soan-thoân po̍h-chiú kap kāu-chiú, chiū chit-lâng beh chòe chiah ê peh-sìⁿ ê sian-ti.

12雅各ah，我的確beh聚集lín；我的確beh招集以色列chhun ê人；我beh安置in tī一所在，親像Pho-su-la̍h ê羊，koh親像草場中ê羊群；因為人額chōe，beh大大喧嘩。Ngá-kok ah, Góa tek-khak beh chū-chi̍p lín; Góa tek-khak beh chio-chi̍p Í-sek-lia̍t chhun ê lâng; Góa beh an-tì in tī chi̍t só͘-chāi, chhin-chhiūⁿ Pho-su-la̍h ê iûⁿ, koh chhin-chhiūⁿ chháu-tiûⁿ-tiong ê iûⁿ-kûn; in-ūi lâng-gia̍h chōe, beh tōa-tōa soan-hoa.

13攻破ê tī in ê頭前上去；in攻破直直經過到城門；koh tùi-hia出來；in ê王做頭行，耶和華chhōa in去。Kong-phòa--ê tī in ê thâu-chêng chiūⁿ-khì; in kong-phòa ti̍t-ti̍t keng-kè kàu siâⁿ-mn̂g; koh tùi-hia chhut-lâi; in ê ông chòe-thâu kiâⁿ, Iâ-hô-hoa chhōa in khì.

1我講，雅各chiah-ê首領，以色列家chiah-ê官長ah，lín tio̍h聽；lín kiám m̄-tio̍h知影公平mah？Góa kóng, Ngá-kok chiah ê siú-léng, Í-sek-lia̍t-ke chiah ê koaⁿ-tiúⁿ ah, lín tio̍h thiaⁿ; lín kiám-m̄-tio̍h chai-iáⁿ kong-pêng mah?

2Lín怨恨好ài pháiⁿ；剝人ê皮，tùi in ê骨剔(thek)肉。Lín oàn-hūn hó ài pháiⁿ; pak lâng ê phê, tùi in ê kut thek-bah.

3亦食我ê百姓ê肉，剝in ê皮，at折in ê骨頭，切kui塊，親像beh落鍋，koh親像鼎內ê肉。Ia̍h chia̍h Góa ê peh-sìⁿ ê bah, pak in ê phê, at-chi̍h in ê kut-thâu, chhiat kui-tè, chhin-chhiūⁿ beh lo̍h e, koh chhin-chhiūⁿ tiáⁿ-lāi ê bah.

4Hit時in beh求叫耶和華，但是祂無beh應in；hit時祂beh照in所行ê pháiⁿ-tāi，對in掩面。Hit-sî in beh kiû-kiò Iâ-hô-hoa, nā-sī I bô beh ìn in; hit-sî I beh chiàu in só͘ kiâⁿ ê pháiⁿ-tāi, tùi in ng-bīn.

5耶和華論到hiah-ê hō͘我ê百姓行錯路ê先知án-ni講，in ê嘴齒若有物thang pō͘，就叫講，平安ah；人若無用物塞(that)in ê嘴，in就備辦交戰攻擊伊。Iâ-hô-hoa lūn-kàu hiah-ê hō͘ Góa ê peh-sìⁿ kiâⁿ chhò-lō͘ ê sian-ti án-ni kóng, in ê chhùi-khí nā ū mi̍h thang pō͘, chiū kiò kóng, Pêng-an ah; lâng nā bô ēng mi̍h that in ê chhùi, in chiū pī-pān kau-chiàn kong-kek i.

6所以lín beh tú-tio̍h暗暝，致到bōe看見異象；koh beh tú-tio̍h烏暗，致到bōe占卜；hiah-ê先知beh tú-tio̍h親像日落，亦tú-tio̍h日時變烏暗。Só͘-í lín beh tú-tio̍h àm-mî, tì-kàu bōe khòaⁿ-kìⁿ īⁿ-siōng; koh beh tú-tio̍h o͘-àm, tì-kàu bōe chiam-pok; hiah ê sian-ti beh tú-tio̍h chhin-chhiūⁿ ji̍t-lo̍h, ia̍h tú-tio̍h ji̍t--sî piàn o͘-àm.

7Hit時先見ê見笑，占卜ê漏氣；lóng beh掩in ê嘴唇；因為上帝無聽in。Hit-sî sian-kiàn--ê kiàn-siàu, chiam-pok--ê làu-khùi; lóng beh ng in ê chhùi-tûn; in-ūi Siōng-tè bô thiaⁿ in.

8若是我，我tùi耶和華ê神有氣力，有公平，有才能滿滿，thang對雅各講明伊ê過失，對以色列指出伊ê罪惡。Nā-sī góa, góa tùi Iâ-hô-hoa ê Sîn ū khùi-la̍t, ū kong-pêng, ū châi-lêng móa-móa, thang tùi Ngá-kok kóng-bêng i ê kè-sit, tùi Í-sek-lia̍t chí-chhut i ê chōe-ok.

9雅各ê首領，以色列家 ê官長，怨恨公平，枉屈正直ê ah，lín tio̍h聽。Ngá-kok ê siú-léng, Í-sek-lia̍t-ke ê koaⁿ-tiúⁿ, oàn-hūn kong-pêng, óng-khut chèng-ti̍t--ê ah, lín tio̍h thiaⁿ.

10In用血建立錫安，用罪惡起造耶路撒冷。In ēng huih kiàn-li̍p Sek-an, ēng chōe-ok khí-chō Iâ-lō͘-sat-léng.

11In ê首領為tio̍h pò͘賂來審判，in ê祭司為tio̍h工錢來教示，in ê先知為tio̍h銀來占卜；in iáu-kú óa靠耶和華，講，耶和華kiám無tī咱中間mah？災厄無臨到咱。In ê siú-léng ūi-tio̍h pò͘-lō͘ lâi sím-phòaⁿ, in ê chè-si ūi-tio̍h kang-chîⁿ lâi kà-sī, in ê sian-ti ūi-tio̍h gûn lâi chiam-pok; in iáu-kú óa-khò Iâ-hô-hoa, kóng, Iâ-hô-hoa kiám-bô tī lán tiong-kan mah? chai-ē bô lîm-kàu lán.

12所以因為lín ê緣故，錫安beh hō͘人犁，親像田園，耶路撒冷beh變做土堆，chit-ê殿ê山beh親像樹林高ê所在。Só͘-í in-ūi lín ê iân-kò͘, Sek-an beh hō͘ lâng lôe, chhin-chhiūⁿ chhân-hn̂g, Iâ-lō͘-sat-léng beh piàn-chòe thô͘-tui, chit ê tiān ê soaⁿ beh chhin-chhiūⁿ chhiū-nâ koâiⁿ ê só͘-chāi.

1到hiah-ê日ê了後，耶和華殿ê山beh建立tī chiah-ê山ê頂面，pôaⁿ過lóng總ê山嶺；萬國ê百姓lóng beh來歸伊。Kàu hiah ê ji̍t ê liáu-āu, Iâ-hô-hoa tiān ê soaⁿ beh kiàn-li̍p tī chiah ê soaⁿ ê téng-bīn, pôaⁿ-kè lóng-chóng ê soaⁿ-niá; bān-kok ê peh-sìⁿ lóng beh lâi kui i.

2有chōe-chōe國beh去，講，來ah，咱上耶和華ê山，到雅各ê上帝ê殿；祂beh用祂ê道路教示咱，咱也beh行祂ê路；因為律法beh tùi錫安出，耶和華ê話beh tùi耶路撒冷傳報。Ū chōe-chōe kok beh khì, kóng, Lâi ah, lán chiūⁿ Iâ-hô-hoa ê soaⁿ, kàu Ngá-kok ê Siōng-tè ê tiān; I beh ēng I ê tō-lō͘ kà-sī lán, lán iā beh kiâⁿ I ê lō͘; in-ūi lu̍t-hoat beh tùi Sek-an chhut, Iâ-hô-hoa ê ōe beh tùi Iâ-lō͘-sat-léng thoân-pò.

3祂beh tī chōe-chōe國ê百姓中行審判，為tio̍h chōe-chōe遠遠強猛ê國來解決；in beh將in ê刀phah做犁頭，將in ê鎗phah做鐮á；chit國無kia̍h刀攻擊hit國，in也無koh學習交戰。I beh tī chōe-chōe kok ê peh-sìⁿ-tiong kiâⁿ sím-phòaⁿ, ūi-tio̍h chōe-chōe hn̄g-hn̄g kiông-béng ê kok lâi kái-koat; in beh chiong in ê to phah-chòe lôe-thâu, chiong in ê chhiuⁿ phah-chòe liâm-á; chit-kok bô kia̍h-to kong-kek hit-kok, in iā bô koh ha̍k-si̍p kau-chiàn.

4人人lóng beh坐tī伊家己ê葡萄樹腳，kap家己ê無花果樹腳，無人hō͘伊驚；因為這是萬軍ê耶和華親嘴講ê。Lâng-lâng lóng beh chē tī i ka-kī ê phû-tô-chhiū-kha, kap ka-kī ê bû-hoa-kó chhiū-kha, bô lâng hō͘ i kiaⁿ; in-ūi che sī bān-kun ê Iâ-hô-hoa chhin-chhùi kóng--ê.

5萬百姓ta̍k-ê奉伊ê上帝ê名來行；總是阮beh奉阮ê上帝耶和華ê名來行，直到永遠。Bān peh-sìⁿ ta̍k-ê hōng i ê siōng-tè ê miâ lâi kiâⁿ; chóng-sī goán beh hōng goán ê Siōng-tè Iâ-hô-hoa ê miâ lâi kiâⁿ, ti̍t-kàu éng-oán.

6耶和華講，到hit日，我beh聚集跛腳ê，招集受趕出ê，kap我所bat hō͘伊受苦ê。Iâ-hô-hoa kóng, Kàu hit-ji̍t, Góa beh chū-chi̍p pái-kha--ê, chio-chi̍p siū kóaⁿ-chhut--ê, kap Góa só͘ bat hō͘ i siū-khó͘-ê.

7我beh hō͘跛腳ê做所chhun ê百姓，hō͘受趕到遠遠ê做強ê國；耶和華beh tī錫安山做王治理in，tùi taⁿ到永遠。Góa beh hō͘ pái-kha--ê chòe só͘-chhun ê peh-sìⁿ, hō͘ siū-kóaⁿ kàu hn̄g-hn̄g--ê chòe kiông ê kok; Iâ-hô-hoa beh tī Sek-an soaⁿ chòe ông tī-lí in, tùi taⁿ kàu éng-oán.

8論到你做kui群羊ê守更樓，做錫安城ê山ah，國權beh歸tī你，koh早時ê國權，耶路撒冷城ê國位lóng beh歸tī你。Lūn-kàu lí chòe kui-kûn iûⁿ ê chiú-kiⁿ-lâu, chòe Sek-an siâⁿ ê soaⁿ ah, kok-koân beh kui tī lí, koh chá-sî ê kok-koân, Iâ-lō͘-sat-léng siâⁿ ê kok-ūi lóng beh kui tī lí.

9Taⁿ你啥事大聲啼哭ah？痛苦擒tio̍h你，親像beh生kiáⁿ ê婦人人，是因為lín中間無王mah？lín ê謀士死無mah？Taⁿ lí siáⁿ-sū tōa-siaⁿ thî-khàu ah? thòng-khó͘ khîⁿ-tio̍h lí, chhin-chhiūⁿ beh siⁿ-kiáⁿ ê hū-jîn-lâng, sī in-ūi lín tiong-kan bô ông mah? lín ê bô͘-sū sí-bô mah?

10錫安ê cha-bó͘-kiáⁿ ah，你tio̍h痛疼艱苦，親像生kiáⁿ ê婦人人，因為你beh出城khiā起tī田裡，beh到巴比倫，tī-hia得tio̍h救，耶和華beh tī-hia贖回你，脫離你ê對敵ê手。Sek-an ê cha-bó͘-kiáⁿ ah, lí tio̍h thàng-thiàⁿ kan-khó͘, chhin-chhiūⁿ siⁿ-kiáⁿ ê hū-jîn-lâng, in-ūi lí beh chhut-siâⁿ khiā-khí tī chhân--nih, beh kàu Pa-pí-lûn, tī-hia tit-tio̍h kiù, Iâ-hô-hoa beh tī-hia sio̍k-hôe lí, thoat-lī lí ê tùi-te̍k ê chhiú.

11Taⁿ chōe-chōe國ê百姓聚集攻擊你，講，願錫安受bak lâ-sâm，hō͘阮親目看見。Taⁿ chōe-chōe kok ê peh-sìⁿ chū-chi̍p kong-kek lí, kóng, Goān Sek-an siū bak lâ-sâm, hō͘ goán chhin-ba̍k khòaⁿ-kìⁿ.

12總是in m̄知耶和華ê意思，也無明白伊ê計畫；伊聚集in，親像稻把聚集tī五穀場。Chóng-sī in m̄-chai Iâ-hô-hoa ê ì-sù, iā bô bêng-pe̍k I ê kè-e̍k; I chū-chi̍p in, chhin-chhiūⁿ tiū-pé chū-chi̍p tī gō͘-kak-tiûⁿ.

13錫安ê cha-bó͘-kiáⁿ ah，起來，踏五穀；我beh hō͘你ê角成做鐵，hō͘你ê蹄成做銅；你beh phah碎chōe-chōe國ê百姓，將in所搶ê物獻hō͘耶和華，將in ê錢財獻hō͘普天下ê主。Sek-an ê cha-bó͘-kiáⁿ ah, khí-lâi, ta̍h gō͘-kak; Góa beh hō͘ lí ê kak chiâⁿ-chòe thih, hō͘ lí ê tôe chiâⁿ-chòe tâng; lí beh phah-chhùi chōe-chōe kok ê peh-sìⁿ, chiong in só͘ chhiúⁿ ê mi̍h hiàn hō͘ Iâ-hô-hoa, chiong in ê chîⁿ-châi hiàn hō͘ phó͘ thiⁿ-ē ê Chú.