1錫安成隊ê百姓ah，taⁿ你聚集做軍隊；伊圍圍攻擊咱；in用柺á phah以色列審判司ê嘴phóe。Sek-an chiâⁿ-tūi ê peh-sìⁿ ah, taⁿ lí chū-chi̍p chòe kun-tūi; i ûi-ûi kong-kek lán; in ēng koáiⁿ-á phah Í-sek-lia̍t sím-phòaⁿ-si ê chhùi-phóe.

2伯利恆Í-hoat-tha ah，你tī猶大chiah-ê鄉社中做微細ê，beh有一個對你hia出來，tī以色列中間kā我做掌權ê；伊ê根源tùi古早，tùi第一起頭就有。Pek-lī-hêng Í-hoat-tha ah, lí tī Iû-tāi chiah ê hiuⁿ-siā-tiong chòe bî-sòe--ê, beh ū chi̍t-ê tùi lí hia chhut-lâi, tī Í-sek-lia̍t tiong-kan kā Góa chòe chiáng-koân--ê; i ê kun-goân tùi kó͘-chá, tùi tē-it khí-thâu chiū ū.

3所以伊beh將in交hō͘對敵，到生產ê婦人人生kiáⁿ；hit時伊所chhun ê兄弟beh tò來歸以色列。Só͘-í i beh chiong in kau hō͘ tùi-te̍k, kàu seng-sán ê hū-jîn-lâng siⁿ-kiáⁿ; hit-sî i só͘-chhun ê hiaⁿ-tī beh tò-lâi kui Í-sek-lia̍t.

4伊beh khiā-teh，óa靠耶和華ê權能，kap伊ê上帝耶和華威嚴ê名，來飼伊ê羊群；in beh安然khiā起；伊beh做大，到地ê極頭。I beh khiā-teh, óa-khò Iâ-hô-hoa ê koân-lêng, kap i ê Siōng-tè Iâ-hô-hoa ui-giâm ê miâ, lâi chhī i ê iûⁿ-kûn; in beh an-jiân khiā-khí; i beh chòe-tōa, kàu tōe ê ke̍k-thâu.

5Chit-ê人beh做咱ê平安；亞述入咱ê地界thún踏咱ê宮殿ê時，咱beh興起七個牧者，八個首領攻擊伊。Chit ê lâng beh chòe lán ê pêng-an; A-su̍t ji̍p lán ê tōe-kài thún-ta̍h lán ê kiong-tiān ê sî, lán beh heng-khí chhit ê bo̍k-chiá, poeh ê siú-léng kong-kek i.

6In beh用刀劍毀壞亞述地，kap Lêng-lio̍k ê地，tī伊出入ê所在；亞述入咱ê地，thún踏咱ê地界ê時，伊beh救咱脫離。In beh ēng to-kiàm húi-hoāi A-su̍t tōe, kap Lêng-lio̍k ê tōe, tī i chhut-ji̍p ê só͘-chāi; A-su̍t ji̍p lán ê tōe, thún-ta̍h lán ê tōe-kài ê sî, i beh kiù lán thoat-lī.

7雅各chhun ê人beh tī chōe-chōe國ê百姓中親像tùi耶和華降落ê露水，koh親像潤澤草ê雨，m̄免óa靠人，也無thèng候世間人。Ngá-kok chhun ê lâng beh tī chōe-chōe kok ê peh-sìⁿ-tiong chhin-chhiūⁿ tùi Iâ-hô-hoa kàng-lo̍h ê lō͘-chúi, koh chhin-chhiūⁿ lūn-te̍k chháu ê hō͘, m̄-bián óa-khò lâng, iā bô thèng-hāu sè-kan lâng.

8雅各所chhun ê人beh tī chōe-chōe國ê百姓中，親像樹林內百獸中ê獅，也親像細隻勇ê獅tī羊群中；伊若經過，就beh thún踏拆裂，無人會救伊。Ngá-kok só͘ chhun ê lâng beh tī chōe-chōe kok ê peh-sìⁿ-tiong, chhin-chhiūⁿ chhiū-nâ-lāi pah-siù-tiong ê sai, iā chhin-chhiūⁿ sòe-chiah ióng ê sai tī iûⁿ-kûn-tiong; i nā keng-kè, chiū beh thún-ta̍h thiah-li̍h, bô lâng ōe kiù i.

9願祢ê手kia̍h起tī祢ê對敵ê頂面，願祢ê對敵lóng受剪除。Goān Lí ê chhiú kia̍h-khí tī Lí ê tùi-te̍k ê téng-bīn, goān Lí ê tùi-te̍k lóng siū chián-tû.

10耶和華講，到hit日，我beh對你中間除去你ê馬，毀壞你ê車。Iâ-hô-hoa kóng, Kàu hit-ji̍t, Góa beh tùi lí tiong-kan tû-khì lí ê bé, húi-hoāi lí ê chhia.

11我beh毀滅你ê地方chiah-ê城，chhia倒你一切ê衛所。Góa beh húi-bia̍t lí ê tōe-hng chiah ê siâⁿ, chhia-tó lí it-chhè ê ōe-só͘.

12我也beh除去你手中ê邪術，tī你hia無koh有占卜ê，Góa iā beh tû-khì lí chhiú-tiong ê siâ-su̍t, tī lí hia bô koh ū chiam-pok--ê,

13我beh對你中間除滅雕刻ê偶像kap柱像，你就無koh跪拜家己ê手所造ê。Góa beh tùi lí tiong-kan tû-bia̍t tiau-khek ê ngó͘-siōng kap thiāu-siōng, lí chiū bô koh kūi-pài ka-kī ê chhiú só͘ chō--ê.

14我beh對你中間拔出你chiah-ê柴柱，koh毀滅你chiah-ê城。Góa beh tùi lí tiong-kan pu̍ih-chhut lí chiah ê chhâ-thiāu, koh húi-bia̍t lí chiah ê siâⁿ.

15我beh發出大受氣，來報應hiah-ê無順thàn ê國。Góa beh hoat-chhut tōa siū-khì, lâi pò-èng hiah ê bô sūn-thàn ê kok.

1Taⁿ tio̍h聽耶和華所講ê：起來，你tio̍h tī chiah-ê山ê面前辯論，hō͘ chiah-ê山嶺聽見你ê聲。Taⁿ tio̍h thiaⁿ Iâ-hô-hoa só͘ kóng--ê: Khí-lâi, lí tio̍h tī chiah ê soaⁿ ê bīn-chêng piān-lūn, hō͘ chiah ê soaⁿ-niá thiaⁿ-kìⁿ lí ê siaⁿ.

2Chiah-ê山kap地堅固ê根基ah，tio̍h聽耶和華爭辯ê話；因為耶和華beh kap伊ê百姓爭辯，koh beh kap以色列排情理。Chiah ê soaⁿ kap tōe kian-kò͘ ê kun-ki ah, tio̍h thiaⁿ Iâ-hô-hoa cheng-piān ê ōe; in-ūi Iâ-hô-hoa beh kap I ê peh-sìⁿ cheng-piān, koh beh kap Í-sek-lia̍t pâi chêng-lí.

3我ê百姓ah，我bat對你做甚麼？我有甚麼hō͘你為難？你thang對我指出。Góa ê peh-sìⁿ ah, Góa bat tùi lí chòe sím-mi̍h? Góa ū sím-mi̍h hō͘ lí ûi-lân? lí thang tùi Góa chí-chhut.

4我bat chhōa你出埃及地，救贖你脫離做奴才ê厝；差摩西、亞倫、Bí-lī-àm tī你ê面前。Góa bat chhōa lí chhut Ai-ki̍p tōe, kiù-sio̍k lí thoat-lī chòe lô͘-châi ê chhù; chhe Mô͘-se A-lûn Bí-lī-àm tī lí ê bīn-chêng.

5我ê百姓ah，lín tio̍h記得Mô͘-ap王 Pa-le̍k所計謀ê，kap Pí-jíⁿ ê kiáⁿ Pa-lân應伊ê話，tùi Si̍p-têng到Kiat-kah ê事，thang hō͘ lín知耶和華所行ê公義。Góa ê peh-sìⁿ ah, lín tio̍h kì-tit Mô͘-ap ông Pa-le̍k só͘ kè-bô͘--ê, kap Pí-jíⁿ ê kiáⁿ Pa-lân ìn i ê ōe, tùi Si̍p-têng kàu Kiat-kah ê sū, thang hō͘ lín chai Iâ-hô-hoa só͘-kiâⁿ ê kong-gī.

6我就近耶和華，跪拜至koânê上帝，tio̍h用甚麼ah？tio̍h用燒祭á是滿年ê牛á來就近祂ah？Góa chiū-kūn Iâ-hô-hoa, kūi-pài chì-koâiⁿ ê Siōng-tè, tio̍h ēng sím-mi̍h ah? tio̍h ēng sio-chè á-sī móa-nî ê gû-á lâi chiū-kūn I ah?

7耶和華歡喜千千隻 ê公羊mah？á是萬萬條溪ê油mah？我tio̍h為家己ê罪過獻我ê大kiáⁿ mah？為tio̍h我心內ê罪惡，獻我本身所生ê mah？Iâ-hô-hoa hoaⁿ-hí chheng-chheng chiah ê kang-iûⁿ mah? á-sī bān-bān tiâu-khoe ê iû mah? góa tio̍h ūi ka-kī ê chōe-kòa hiàn góa ê tōa-kiáⁿ mah? ūi-tio̍h góa sim-lāi ê chōe-ok, hiàn góa pún-sin só͘ siⁿ ê mah?

8人ah，伊bat指示你甚麼是好；耶和華ài你甚麼？獨獨ài你行公義，心存憐憫，謙卑kap你ê上帝相kap行。Lâng ah, I bat chí-sī lí sím-mi̍h sī hó; Iâ-hô-hoa ài lí sím-mi̍h? To̍k-to̍k ài lí kiâⁿ kong-gī, sim chûn lîn-bín, khiam-pi kap lí ê Siōng-tè saⁿ-kap kiâⁿ.

9耶和華ê聲對城teh叫，智慧ê beh敬畏祢ê名，lín tio̍h聽柺á，也是誰定tio̍h伊。Iâ-hô-hoa ê siaⁿ tùi siâⁿ teh kiò, tì-hūi--ê beh kèng-ùi Lí ê miâ, lín tio̍h thiaⁿ koáiⁿ-á, iā chī-chūi tiāⁿ-tio̍h--i.

10Pháiⁿ人ê家iáu有不義ê錢mah？iáu有可惡ê細I-hoat mah？Pháiⁿ-lâng ê ke iáu ū put-gī ê chîⁿ mah? iáu ū khó-ò͘ⁿ ê sòe i-hoat mah?

11我若用無公道ê天秤，袋á內有假ê秤錘，kiám會算做清氣mah？Góa nā ēng bô kong-tō ê thian-pêng, tē-á-lāi ū ké ê chhìn-thûi, kiám ōe sǹg chòe chheng-khì mah?

12Hiah-ê好額人滿滿強暴，khiā起ê百姓講白賊話，in ê嘴舌詭譎。Hiah-ê hó-gia̍h lâng móa-móa kiông-pō, khiā-khí ê peh-sìⁿ kóng pe̍h-chha̍t ōe, in ê chhùi-chi̍h khúi-khiat.

13所以我phah你，hō͘你受重傷，因為你ê罪hō͘你荒廢。Só͘-í Góa phah lí, hō͘ lí siū tāng-siong, in-ūi lí ê chōe hō͘ lí hong-hòe.

14你beh食，總是食bōe飽；你ê空虛beh tī你內面；你beh搬徙，總是bōe能安然帶物件去，你所帶去ê，我lóng beh交hō͘刀劍。Lí beh chia̍h, chóng-sī chia̍h bōe pá; lí ê khang-hu beh tī lí lāi-bīn; lí beh poaⁿ-sóa, chóng-sī bōe-ōe an-jiân tòa mi̍h-kiāⁿ khì, lí só͘ tòa-khì--ê, Góa lóng beh kau hō͘ to-kiàm.

15你beh掖種，亦無thang收割；踏橄欖亦無得tio̍h油thang抹；踏葡萄亦無酒thang lim。Lí beh iā chéng, ia̍h bô thang siu-koah; ta̍h kaⁿ-ná ia̍h bô tit-tio̍h iû thang boah; ta̍h phû-tô ia̍h bô chiú thang lim.

16因為你守Àm-lī ê律法，kap A-hap ê家一切ê所行，順thàn in ê計謀，致到我hō͘你荒廢，hō͘ khiā起tī-hia ê百姓受人恥笑；lín也beh擔當我ê百姓ê凌辱。In-ūi lí siú Àm-lī ê lu̍t-hoat, kap A-hap ê ke it-chhè ê só͘ kiâⁿ, sūn-thàn in ê kè-bô͘, tì-kàu Góa hō͘ lí hong-hòe, hō͘ khiā-khí tī-hia ê peh-sìⁿ siū lâng thí-chhiò; lín iā beh tam-tng Góa ê peh-sìⁿ ê lêng-jio̍k.

1我有災厄ah，我親像夏天ê果子收成了ê時，koh親像挽葡萄所chhun ê lân-san粒，無kui-pha thang食；我ê心欣慕起頭熟ê無花果。Góa ū chai-ē ah, góa chhin-chhiūⁿ hē-thiⁿ ê ké-chí siu-sêng-liáu ê sî, koh chhin-chhiūⁿ bán phû-tô só͘ chhun ê lân-san lia̍p, bô kui-pha thang chia̍h; góa ê sim him-bō͘ khí-thâu-se̍k ê bû-hoa-kó.

2地上虔誠ê人死無，tī人ê中間無正直ê；in lóng埋伏beh thâi死人，用羅網當伊ê兄弟。Tōe-chiūⁿ khiân-sêng ê lâng sí-bô, tī lâng ê tiong-kan bô chèng-ti̍t--ê; in lóng bâi-ho̍k beh thâi-sí lâng, ēng lô-bāng tng i ê hiaⁿ-tī.

3In ê手專專做pháiⁿ，首領kap審判司討pò͘賂，大官員吐出伊心內ê私慾，相kap組織pháiⁿ。In ê chhiú choan-choan chòe pháiⁿ, siú-léng kap sím-phòaⁿ-si thó pò͘-lō͘, tōa koaⁿ-oân thò͘-chhut i sim-lāi ê su-io̍k, saⁿ-kap chó͘-chit pháiⁿ.

4In中間第一好ê，親像蒺藜，第一正直ê親像籬笆ê刺á；你ê守望ê所講ê日，就是你受刑罰ê日，近lah；in ê迷亂到lah。In tiong-kan tē-it hó--ê, chhin-chhiūⁿ chi̍t-lê, tē-it chèng-ti̍t--ê chhin-chhiūⁿ lî-pa ê chhì-á; lí ê siú-bāng--ê só͘ kóng ê ji̍t, chiū-sī lí siū hêng-hoa̍t ê ji̍t, kūn--lah; in ê bê-loān kàu lah.

5莫得óa靠同伴，莫得信親密ê朋友；tio̍h約束你ê嘴，莫得對所疼ê bó͘講起。Bo̍h-tit óa-khò tâng-phōaⁿ, bo̍h-tit sìn chhin-bi̍t ê pêng-iú; tio̍h iok-sok lí ê chhùi, bo̍h-tit tùi só͘ thiàⁿ ê bó͘ kóng-khí.

6因為kiáⁿ藐視老父，cha-bó͘-kiáⁿ忤逆老母，新婦忤逆ta-ke；人ê對敵，就是伊家內ê人。In-ūi kiáⁿ biáu-sī lāu-pē, cha-bó͘-kiáⁿ ngó͘-ge̍k lāu-bú, sim-pū ngó͘-ge̍k ta-ke; lâng ê tùi-te̍k, chiū-sī i ke-lāi ê lâng.

7若是我，我beh ǹg望耶和華，亦beh thèng候救我ê上帝；我ê上帝beh聽我。Nā-sī góa, góa beh ǹg-bāng Iâ-hô-hoa, ia̍h beh thèng-hāu kiù góa ê Siōng-tè; góa ê Siōng-tè beh thiaⁿ góa.

8我ê對敵ah，莫得因為我來歡喜；我雖然跋倒，beh koh起來；我坐tī烏暗，耶和華做我ê光。Góa ê tùi-te̍k ah, bo̍h-tit in-ūi góa lâi hoaⁿ-hí; góa sui-jiân poa̍h-tó, beh koh khí-lâi; góa chē tī o͘-àm, Iâ-hô-hoa chòe góa ê kng.

9我beh忍受耶和華ê受氣，因為我得罪祂：thèng候祂辯護我ê案，kā我判斷；祂beh chhōa我出來到tī光明，我也beh看見祂ê公義。Góa beh jím-siū Iâ-hô-hoa ê siū-khì, in-ūi góa tek-chōe I: thèng-hāu I piān-hō͘ góa ê àn, kā góa phòaⁿ-toàn; I beh chhōa góa chhut-lâi kàu tī kng-bêng, góa iā beh khòaⁿ-kìⁿ I ê kong-gī.

10Hit時我ê對敵，就是bat對我講，耶和華你ê上帝tī toh-lo̍h-ê，伊一下看見，就大大見笑，我beh親目看見伊；伊beh受thún踏，親像街路ê土糜。Hit-sî góa ê tùi-te̍k, chiū-sī bat tùi góa kóng, Iâ-hô-hoa lí ê Siōng-tè tī toh-lo̍h--ê, i chi̍t-ē khòaⁿ-kìⁿ, chiū tōa-tōa kiàn-siàu, góa beh chhin-ba̍k khòaⁿ-kìⁿ i; i beh siū thún-ta̍h, chhin-chhiūⁿ ke-lō͘ ê thô͘-bê.

11起你ê城牆ê日到lah，hit日你ê地界beh開闊。Khí lí ê siâⁿ-chhiûⁿ ê ji̍t kàu lah, hit-ji̍t lí ê tōe-kài beh khui-khoah.

12Hit日in beh tùi亞述到埃及chiah-ê城，tùi埃及到大河，tùi chit-ê海到hit-ê海，tùi chit-ê山到hit-ê山，lóng beh歸óa。Hit-ji̍t in beh tùi A-su̍t kàu Ai-ki̍p chiah ê siâⁿ, tùi Ai-ki̍p kàu Tōa-hô, tùi chit ê hái kàu hit ê hái, tùi chit ê soaⁿ kàu hit ê soaⁿ, lóng beh kui-óa.

13總是地beh因為khiā起ê百姓ê緣故來拋荒，是in行做ê結果。Chóng-sī tōe beh in-ūi khiā-khí ê peh-sìⁿ ê iân-kò͘ lâi pha-hng, sī in kiâⁿ-chòe ê kiat-kó.

14求你用你ê柺á飼你ê百姓，就是你ê產業ê羊群，tī Ka-bi̍t山家己tiàm tī樹林內ê，飼in tī Pa-san kap Ki-lia̍t，親像早時一樣。Kiû Lí ēng Lí ê koáiⁿ-á chhī Lí ê peh-sìⁿ, chiū-sī Lí ê sán-gia̍p ê iûⁿ-kûn, tī Ka-bi̍t soaⁿ ka-kī tiàm tī chhiū-nâ-lāi--ê, chhī in tī Pa-san kap Ki-lia̍t, chhin-chhiūⁿ chá-sî chi̍t-iūⁿ.

15我beh顯出奇事hō͘伊看，親像你出埃及地ê時一樣。Góa beh hián-chhut kî-sū hō͘ i khòaⁿ, chhin-chhiūⁿ lí chhut Ai-ki̍p tōe ê sî chi̍t-iūⁿ.

16列邦看見就beh為家己ê勢力見笑；in beh用手掩嘴；in ê耳孔也beh臭聾。Lia̍t-pang khòaⁿ-kìⁿ chiū beh ūi ka-kī ê sè-le̍k kiàn-siàu; in beh ēng chhiú ng chhùi; in ê hī-khang iā beh chhàu-lâng.

17In beh舐(chī)土粉親像蛇；親像tī土腳teh sô ê物，ngia̍uh-ngia̍uh-chhoah出伊ê孔；in beh驚惶來歸咱ê上帝耶和華，koh因為祢來驚惶。In beh chī thô͘-hún chhin-chhiūⁿ chôa; chhin-chhiūⁿ tī thô͘-kha teh sô ê mi̍h, ngia̍uh-ngia̍uh-chhoah chhut i ê khang; in beh kiaⁿ-hiâⁿ lâi kui lán ê Siōng-tè Iâ-hô-hoa, koh in-ūi Lí lâi kiaⁿ-hiâⁿ.

18上帝ah，chī-cui7親像祢，是赦免罪過，寬恕祂所chhun ê百姓ê過失ê？祂無永永khǹg受氣，因為祂歡喜憐憫。Siōng-tè ah, chī-chūi chhin-chhiūⁿ Lí, sī sià-bián chōe-kòa, khoan-sù I só͘ chhun ê peh-sìⁿ ê kè-sit--ê? I bô éng-éng khǹg siū-khì, in-ūi I hoaⁿ-hí lîn-bín.

19祂beh oa̍t-tńg憐憫咱；伊踏咱ê罪惡tī腳下；祢beh將in一切ê罪惡，hiat tī深海。I beh oa̍t-tńg lîn-bín lán; I ta̍h lán ê chōe-ok tī kha-ē; Lí beh chiong in it-chhè ê chōe-ok, hiat tī chhim-hái.

20祢beh照古早所對阮ê列祖chiù-chōa-ê，施誠實tī雅各，行慈愛tī亞伯拉罕。Lí beh chiàu kó͘-chá só͘ tùi goán ê lia̍t-chó͘ chiù-chōa--ê, si sêng-si̍t tī Ngá-kok, kiâⁿ chû-ài tī A-pek-la̍h-hán.