1我有災厄ah，我親像夏天ê果子收成了ê時，koh親像挽葡萄所chhun ê lân-san粒，無kui-pha thang食；我ê心欣慕起頭熟ê無花果。Góa ū chai-ē ah, góa chhin-chhiūⁿ hē-thiⁿ ê ké-chí siu-sêng-liáu ê sî, koh chhin-chhiūⁿ bán phû-tô só͘ chhun ê lân-san lia̍p, bô kui-pha thang chia̍h; góa ê sim him-bō͘ khí-thâu-se̍k ê bû-hoa-kó.

2地上虔誠ê人死無，tī人ê中間無正直ê；in lóng埋伏beh thâi死人，用羅網當伊ê兄弟。Tōe-chiūⁿ khiân-sêng ê lâng sí-bô, tī lâng ê tiong-kan bô chèng-ti̍t--ê; in lóng bâi-ho̍k beh thâi-sí lâng, ēng lô-bāng tng i ê hiaⁿ-tī.

3In ê手專專做pháiⁿ，首領kap審判司討pò͘賂，大官員吐出伊心內ê私慾，相kap組織pháiⁿ。In ê chhiú choan-choan chòe pháiⁿ, siú-léng kap sím-phòaⁿ-si thó pò͘-lō͘, tōa koaⁿ-oân thò͘-chhut i sim-lāi ê su-io̍k, saⁿ-kap chó͘-chit pháiⁿ.

4In中間第一好ê，親像蒺藜，第一正直ê親像籬笆ê刺á；你ê守望ê所講ê日，就是你受刑罰ê日，近lah；in ê迷亂到lah。In tiong-kan tē-it hó--ê, chhin-chhiūⁿ chi̍t-lê, tē-it chèng-ti̍t--ê chhin-chhiūⁿ lî-pa ê chhì-á; lí ê siú-bāng--ê só͘ kóng ê ji̍t, chiū-sī lí siū hêng-hoa̍t ê ji̍t, kūn--lah; in ê bê-loān kàu lah.

5莫得óa靠同伴，莫得信親密ê朋友；tio̍h約束你ê嘴，莫得對所疼ê bó͘講起。Bo̍h-tit óa-khò tâng-phōaⁿ, bo̍h-tit sìn chhin-bi̍t ê pêng-iú; tio̍h iok-sok lí ê chhùi, bo̍h-tit tùi só͘ thiàⁿ ê bó͘ kóng-khí.

6因為kiáⁿ藐視老父，cha-bó͘-kiáⁿ忤逆老母，新婦忤逆ta-ke；人ê對敵，就是伊家內ê人。In-ūi kiáⁿ biáu-sī lāu-pē, cha-bó͘-kiáⁿ ngó͘-ge̍k lāu-bú, sim-pū ngó͘-ge̍k ta-ke; lâng ê tùi-te̍k, chiū-sī i ke-lāi ê lâng.

7若是我，我beh ǹg望耶和華，亦beh thèng候救我ê上帝；我ê上帝beh聽我。Nā-sī góa, góa beh ǹg-bāng Iâ-hô-hoa, ia̍h beh thèng-hāu kiù góa ê Siōng-tè; góa ê Siōng-tè beh thiaⁿ góa.

8我ê對敵ah，莫得因為我來歡喜；我雖然跋倒，beh koh起來；我坐tī烏暗，耶和華做我ê光。Góa ê tùi-te̍k ah, bo̍h-tit in-ūi góa lâi hoaⁿ-hí; góa sui-jiân poa̍h-tó, beh koh khí-lâi; góa chē tī o͘-àm, Iâ-hô-hoa chòe góa ê kng.

9我beh忍受耶和華ê受氣，因為我得罪祂：thèng候祂辯護我ê案，kā我判斷；祂beh chhōa我出來到tī光明，我也beh看見祂ê公義。Góa beh jím-siū Iâ-hô-hoa ê siū-khì, in-ūi góa tek-chōe I: thèng-hāu I piān-hō͘ góa ê àn, kā góa phòaⁿ-toàn; I beh chhōa góa chhut-lâi kàu tī kng-bêng, góa iā beh khòaⁿ-kìⁿ I ê kong-gī.

10Hit時我ê對敵，就是bat對我講，耶和華你ê上帝tī toh-lo̍h-ê，伊一下看見，就大大見笑，我beh親目看見伊；伊beh受thún踏，親像街路ê土糜。Hit-sî góa ê tùi-te̍k, chiū-sī bat tùi góa kóng, Iâ-hô-hoa lí ê Siōng-tè tī toh-lo̍h--ê, i chi̍t-ē khòaⁿ-kìⁿ, chiū tōa-tōa kiàn-siàu, góa beh chhin-ba̍k khòaⁿ-kìⁿ i; i beh siū thún-ta̍h, chhin-chhiūⁿ ke-lō͘ ê thô͘-bê.

11起你ê城牆ê日到lah，hit日你ê地界beh開闊。Khí lí ê siâⁿ-chhiûⁿ ê ji̍t kàu lah, hit-ji̍t lí ê tōe-kài beh khui-khoah.

12Hit日in beh tùi亞述到埃及chiah-ê城，tùi埃及到大河，tùi chit-ê海到hit-ê海，tùi chit-ê山到hit-ê山，lóng beh歸óa。Hit-ji̍t in beh tùi A-su̍t kàu Ai-ki̍p chiah ê siâⁿ, tùi Ai-ki̍p kàu Tōa-hô, tùi chit ê hái kàu hit ê hái, tùi chit ê soaⁿ kàu hit ê soaⁿ, lóng beh kui-óa.

13總是地beh因為khiā起ê百姓ê緣故來拋荒，是in行做ê結果。Chóng-sī tōe beh in-ūi khiā-khí ê peh-sìⁿ ê iân-kò͘ lâi pha-hng, sī in kiâⁿ-chòe ê kiat-kó.

14求你用你ê柺á飼你ê百姓，就是你ê產業ê羊群，tī Ka-bi̍t山家己tiàm tī樹林內ê，飼in tī Pa-san kap Ki-lia̍t，親像早時一樣。Kiû Lí ēng Lí ê koáiⁿ-á chhī Lí ê peh-sìⁿ, chiū-sī Lí ê sán-gia̍p ê iûⁿ-kûn, tī Ka-bi̍t soaⁿ ka-kī tiàm tī chhiū-nâ-lāi--ê, chhī in tī Pa-san kap Ki-lia̍t, chhin-chhiūⁿ chá-sî chi̍t-iūⁿ.

15我beh顯出奇事hō͘伊看，親像你出埃及地ê時一樣。Góa beh hián-chhut kî-sū hō͘ i khòaⁿ, chhin-chhiūⁿ lí chhut Ai-ki̍p tōe ê sî chi̍t-iūⁿ.

16列邦看見就beh為家己ê勢力見笑；in beh用手掩嘴；in ê耳孔也beh臭聾。Lia̍t-pang khòaⁿ-kìⁿ chiū beh ūi ka-kī ê sè-le̍k kiàn-siàu; in beh ēng chhiú ng chhùi; in ê hī-khang iā beh chhàu-lâng.

17In beh舐(chī)土粉親像蛇；親像tī土腳teh sô ê物，ngia̍uh-ngia̍uh-chhoah出伊ê孔；in beh驚惶來歸咱ê上帝耶和華，koh因為祢來驚惶。In beh chī thô͘-hún chhin-chhiūⁿ chôa; chhin-chhiūⁿ tī thô͘-kha teh sô ê mi̍h, ngia̍uh-ngia̍uh-chhoah chhut i ê khang; in beh kiaⁿ-hiâⁿ lâi kui lán ê Siōng-tè Iâ-hô-hoa, koh in-ūi Lí lâi kiaⁿ-hiâⁿ.

18上帝ah，chī-cui7親像祢，是赦免罪過，寬恕祂所chhun ê百姓ê過失ê？祂無永永khǹg受氣，因為祂歡喜憐憫。Siōng-tè ah, chī-chūi chhin-chhiūⁿ Lí, sī sià-bián chōe-kòa, khoan-sù I só͘ chhun ê peh-sìⁿ ê kè-sit--ê? I bô éng-éng khǹg siū-khì, in-ūi I hoaⁿ-hí lîn-bín.

19祂beh oa̍t-tńg憐憫咱；伊踏咱ê罪惡tī腳下；祢beh將in一切ê罪惡，hiat tī深海。I beh oa̍t-tńg lîn-bín lán; I ta̍h lán ê chōe-ok tī kha-ē; Lí beh chiong in it-chhè ê chōe-ok, hiat tī chhim-hái.

20祢beh照古早所對阮ê列祖chiù-chōa-ê，施誠實tī雅各，行慈愛tī亞伯拉罕。Lí beh chiàu kó͘-chá só͘ tùi goán ê lia̍t-chó͘ chiù-chōa--ê, si sêng-si̍t tī Ngá-kok, kiâⁿ chû-ài tī A-pek-la̍h-hán.

1論尼尼微ê默示，I-le̍k-ko-su人那鴻所看見ê異象，記tī冊裡。Lūn Nî-nî-bî ê be̍k-sī, I-le̍k-ko-su lâng Ná-hông só͘ khòaⁿ-kìⁿ ê īⁿ-siōng, kì tī chheh--nih.

2耶和華是熱心ê上帝，亦行報仇；耶和華是報仇koh大受氣；耶和華對祂ê對敵報仇，為tio̍h祂ê仇讎來khǹg受氣。Iâ-hô-hoa sī jia̍t-sim ê Siōng-tè, ia̍h kiâⁿ pò-siû; Iâ-hô-hoa sī pò-siû koh tōa siū-khì; Iâ-hô-hoa tùi I ê tùi-te̍k pò-siû, ūi-tio̍h I ê kiû-siû lâi khǹg siū-khì.

3耶和華無快受氣，有大能力；決斷無掠有罪ê做無罪；耶和華ê路tī捲螺風kap狂風ê中間，雲是祂ê腳ê土粉。Iâ-hô-hoa bô khoài siū-khì, ū tōa lêng-le̍k; koat-toàn bô lia̍h ū-chōe--ê chòe bô-chōe; Iâ-hô-hoa ê lō͘ tī kńg-lê-hong kap kông-hong ê tiong-kan, hûn sī I ê kha ê thô͘-hún.

4祂責備海hō͘伊乾，亦hō͘ chiah-ê河lóng無水；Pa-san kap Ka-bi̍t衰敗，黎巴嫩ê花木也衰敗。I chek-pī hái hō͘ i ta, ia̍h hō͘ chiah ê hô lóng bô chúi; Pa-san kap Ka-bi̍t soe-pāi, Lī-pa-lùn ê hoe-ba̍k iā soe-pāi.

5山頭因為祂振動，山嶺亦lóng消溶，大地tī伊ê面前phòng起來，世界kap tiàm-tī hit中間ê也是án-ni。Soaⁿ-thâu in-ūi I tín-tāng, soaⁿ-niá ia̍h lóng siau-iûⁿ, tōa-tōe tī I ê bīn-chêng phòng--khí-lâi, sè-kài kap tiàm-tī hit tiong-kan--ê iā sī án-ni.

6祂一下痛恨，是誰能khiā-teh？伊大受氣是誰當ōe起？祂ê受氣親像火piàⁿ出，石磐因為祂爆裂。I chi̍t-ē thòng-hūn, chī-chūi ōe khiā-teh? I tōa siū-khì chī-chūi tng-ōe-khí? I ê siū-khì chhin-chhiūⁿ hé piàⁿ-chhut, chio̍h-pôaⁿ in-ūi I piak-li̍h.

7耶和華是好，tī患難ê日，祂做衛所；koh bat hiah-ê óa靠祂ê人。Iâ-hô-hoa sī hó, tī hoān-lān ê ji̍t, I chòe ōe-só͘; koh bat hiah-ê óa-khò I ê lâng.

8總是祂beh用氾濫ê大水淹滅祂ê地，趕對敵入烏暗。Chóng-sī I beh ēng hoàn-lām ê tōa-chúi im-bia̍t i ê tōe, kóaⁿ tùi-te̍k ji̍p o͘-àm.

9Lín設甚麼計謀對敵耶和華？祂beh做到盡頭，免koh第二pái ê災厄。Lín siat sím-mi̍h kè-bô͘ tùi-te̍k Iâ-hô-hoa? I beh chòe kàu chīn-thâu, bián koh tē-jī-pái ê chai-ē.

10In縈纏(îⁿ-tîⁿ)親像刺phè，親像lim酒到醉醉，iáu-kú in beh燒去，親像乾乾ê草。In îⁿ-tîⁿ chhin-chhiūⁿ chhì-phè, chhin-chhiūⁿ lim chiú kàu chùi-chùi, iáu-kú in beh sio--khì, chhin-chhiūⁿ ta-ta ê chháu.

11有一個對你hia出來，圖謀奸惡，設pháiⁿ計謀；攻擊耶和華。Ū chi̍t-ê tùi lí hia chhut--lâi, tô͘-bô͘ kan-ok, siat pháiⁿ kè-bô͘; kong-kek Iâ-hô-hoa.

12耶和華án-ni講，In雖然勢力充足，人額chōe-chōe，亦beh受剪除，歸tī無。我雖然bat hō͘你受苦，以後無koh hō͘你受苦。Iâ-hô-hoa án-ni kóng, In sui-jiân sè-le̍k chhiong-chiok, lâng-gia̍h chōe-chōe, ia̍h beh siū chián-tû, kui tī bô. Góa sui-jiân bat hō͘ lí siū-khó͘, í-āu bô koh hō͘ lí siū-khó͘.

13Taⁿ我beh對你ê頷頸at折伊ê擔，chhoah斷縛你ê索。Taⁿ Góa beh tùi lí ê ām-kún at-chi̍h i ê taⁿ, chhoah-tn̄g pa̍k lí ê soh.

14耶和華bat出命令論到你講，屬你ê人的確無koh傳種；我beh對你ê上帝ê廟內除滅雕刻ê偶像，kap鑄造ê像；我beh kā你備辦墳墓，因為你是卑賤。Iâ-hô-hoa bat chhut bēng-lēng lūn-kàu lí kóng, Sio̍k lí ê lâng tek-khak bô koh thoân-chéng; Góa beh tùi lí ê siōng-tè ê biō-lāi tû-bia̍t tiau-khek ê ngó͘-siōng, kap chù-chō ê siōng; Góa beh kā lí pī-pān hûn-bōng, in-ūi lí sī pi-chiān.

15看ah，有報好消息傳和平ê人，伊ê腳行上山頂。猶大ah，守你ê節期，謝你ê願；因為pháiⁿ人無koh對你ê中間經過；因為伊一盡滅無lah。Khòaⁿ ah, ū pò hó siau-sit thoân hô-pêng ê lâng, i ê kha kiâⁿ chiūⁿ soaⁿ-téng. Iû-tāi ah, siú lí ê choeh-kî, siā lí ê goān; in-ūi pháiⁿ-lâng bô koh tùi lí ê tiong-kan keng-kè; in-ūi i it-chīn bia̍t-bô lah.

1破壞ê上到你ê面前；你tio̍h顧守衛所，持防路頭，腰tio̍h giám硬，氣力極堅固。Phò-hoāi--ê chiūⁿ-kàu lí ê bīn-chêng; lí tio̍h kò͘-siú ōe-só͘, tî-hông lō͘-thâu, io tio̍h giám-ngī, khùi-la̍t ke̍k kian-kò͘.

2因為耶和華復到雅各ê榮光，親像以色列ê榮光；因為搶劫ê已經搶劫伊，koh毀壞in ê葡萄枝。In-ūi Iâ-hô-hoa ho̍k-tò Ngá-kok ê êng-kng, chhin-chhiūⁿ Í-sek-lia̍t ê êng-kng; in-ūi chhiúⁿ-kiap--ê í-keng chhiúⁿ-kiap i, koh húi-hoāi in ê phû-tô-ki.

3伊ê勇士ê藤牌是紅ê，戰士lóng穿朱紅衫；tī伊備辦交戰ê日，戰車ê鋼鐵燄燄sih，伊ê鎗舞來舞去。I ê ióng-sū ê tîn-pâi sī âng--ê, chiàn-sū lóng chhēng chu-âng saⁿ; tī i pī-pān kau-chiàn ê ji̍t, chiàn-chhia ê kǹg-thih iām-iām-sih, i ê chhiuⁿ bú-lâi bú-khì.

4車tī街路亂亂chông，tī開闊ê所在oe-oe khoeh-khoeh；款式親像火把，緊緊走，親像sih-nà。Chhia tī ke-lō͘ loān-loān chông, tī khui-khoah ê só͘-chāi oe-oe khoeh-khoeh; khoán-sit chhin-chhiūⁿ hé-pé, kín-kín cháu, chhin-chhiūⁿ sih-nà.

5伊點算伊ê貴族，in步行顛倒，緊緊到城牆，備辦保護ê器具。I tiám-sǹg i ê kùi-cho̍k, in pō͘-kiâⁿ tian-tó, kín-kín kàu siâⁿ-chhiûⁿ, pī-pān pó-hō͘ ê khì-kū.

6Hiah-ê河閘lóng開，宮殿消滅。Hiah ê hô-cha̍h lóng khui, kiong-tiān siau-bia̍t.

7王后受凌辱，hō͘人掠去；宮女搥胸，哀哮親像鴿ê聲。Ông-hō͘ siū lêng-jio̍k, hō͘ lâng lia̍h-khì; kiong-lú tûi-heng, ai-háu chhin-chhiūⁿ kap ê siaⁿ.

8尼尼微tùi早以來，親像聚集水ê池；taⁿ in lóng逃走，有人叫講，停腳，停腳；總是無人oa̍t頭看。Nî-nî-bî tùi chá í-lâi, chhin-chhiūⁿ chū-chi̍p chúi ê tî; taⁿ in lóng tô-cháu, ū lâng kiò kóng, Thêng-kha, thêng-kha; chóng-sī bô lâng oa̍t-thâu khòaⁿ.

9搶伊ê銀，劫伊ê金；所積聚ê無限量，súi ê古董極豐盛。Chhiúⁿ i ê gûn, kiap i ê kim; só͘ chek-chū--ê bô hān-liōng, súi ê kó͘-tóng ke̍k hong-sēng.

10Taⁿ空虛lah，空空lah，拋荒lah；心失膽，腳頭u相kha̍p，腰lóng痛疼，面lóng變色。Taⁿ khang-hu lah, khang-khang lah, pha-hng lah; sim sit-táⁿ, kha-thâu-u saⁿ-kha̍p, io lóng thàng-thiàⁿ, bīn lóng piàn-sek.

11獅ê穴kap細隻獅，食物ê所在，就是公ê獅，母ê獅，細隻獅，四界行無tio̍h驚ê所在，taⁿ tī toh-lo̍h ah？Sai ê hia̍t kap sòe-chiah sai, chia̍h-mi̍h ê só͘-chāi, chiū-sī kang ê sai, bú ê sai, sòe-chiah sai, sì-kòe kiâⁿ bô tio̍h-kiaⁿ ê só͘-chāi, taⁿ tī toh-lo̍h ah?

12大隻獅拆裂物，hō͘細隻獅食夠額；為tio̍h母ê獅咬死活物，將所拆裂ê囤滿伊ê穴，將所咬tio̍h-ê，積滿伊ê洞。Tōa chiah sai thiah-li̍h mi̍h, hō͘ sòe-chiah sai chia̍h kàu-gia̍h; ūi-tio̍h bú ê sai kā-sí oa̍h-mi̍h, chiong só͘ thiah-li̍h--ê tún-móa i ê hia̍t, chiong só͘ kā-tio̍h--ê, chek-móa i ê tōng.

13萬軍ê耶和華講，看ah，我攻擊你，koh tī火薰中燒pháiⁿ伊ê馬車，刀劍也beh吞滅你ê細隻獅；我beh tùi地上除滅你所搶掠ê；你ê使者ê聲，無koh hō͘人聽見。Bān-kun ê Iâ-hô-hoa kóng, Khòaⁿ ah, Góa kong-kek lí, koh tī hé-hun-tiong sio-pháiⁿ i ê bé-chhia, to-kiàm iā beh thun-bia̍t lí ê sòe-chiah sai; Góa beh tùi tōe-chiūⁿ tû-bia̍t lí só͘ chhiúⁿ-lia̍h--ê; lí ê sù-chiá ê siaⁿ, bô koh hō͘ lâng thiaⁿ-kìⁿ.