1Chit月二四日，以色列人聚集禁食，穿麻衫，sám火灰。Chit-ge̍h jī-sì ji̍t, Í-sek-lia̍t lâng chū-chi̍p kìm-chia̍h, chhēng môa-saⁿ, sám hé-hu.

2以色列ê後裔就kap一切外邦人隔開，khiā-teh認家己ê罪惡，kap in列祖ê罪過。Í-sek-lia̍t ê hō͘-è chiū kap it-chhè gōa-pang lâng keh-khui, khiā-teh jīn ka-kī ê chōe-ok, kap in lia̍t-chó͘ ê chōe-kòa.

3In khiā tī in ê所在，用hit日ê時間四份一，讀耶和華in ê上帝律法ê冊；koh用時間ê四份一認罪，敬拜耶和華in ê上帝。In khiā tī in ê só͘-chāi, ēng hit-ji̍t ê sî-kan sì-hūn-chi̍t, tha̍k Iâ-hô-hoa in ê Siōng-tè lu̍t-hoat ê chheh; koh ēng sî-kan ê sì-hūn-chi̍t jīn-chōe, kèng-pài Iâ-hô-hoa in ê Siōng-tè.

4Iâ-su-a、Pa-nî、Kah-bia̍t、Sī-pa-nî、Pò͘-nî、Sī-lī-pí、Pa-nî、Ki-ná-nî，khiā tī利未人ê台頂，大聲求叫耶和華in ê上帝。Iâ-su-a, Pa-nî, Kah-bia̍t, Sī-pa-nî, Pò͘-nî, Sī-lī-pí, Pa-nî, Ki-ná-nî, khiā tī Lī-bī lâng ê tâi-téng, tōa-siaⁿ kiû-kiò Iâ-hô-hoa in ê Siōng-tè.

5利未人Iâ-su-a、Kah-bia̍t、Pa-nî、Hap-sa-nî、Sī-lī-pí、O-tē-ngá、Sī-pa-nî、Pì-tha-hi-ngá，講，Lín tio̍h khiā起來o-ló耶和華lín ê上帝，tùi永遠到永遠。耶和華ah，你榮光ê名是應該o-ló ê，pôaⁿ過一切ê稱呼o-ló。Lī-bī lâng Iâ-su-a, Kah-bia̍t, Pa-nî, Hap-sa-nî, Sī-lī-pí, O-tē-ngá, Sī-pa-nî, Pì-tha-hi-ngá, kóng, Lín tio̍h khiā--khí-lâi o-ló Iâ-hô-hoa lín ê Siōng-tè, tùi éng-oán kàu éng-oán. Iâ-hô-hoa ah, Lí êng-kng ê miâ sī eng-kai o-ló ê, pôaⁿ-kè it-chhè ê chheng-ho͘ o-ló.

6你，獨獨你，是耶和華；你創造天，kap chiah-ê天ê天，kap天頂ê萬軍，地kap地上ê萬物，海kap海中ê萬物；這一切lóng是你所保存ê；天軍也敬拜你。Lí, to̍k-to̍k Lí, sī Iâ-hô-hoa; Lí chhòng-chō thiⁿ, kap chiah ê thiⁿ ê thiⁿ, kap thiⁿ-téng ê bān-kun, tōe kap tōe-chiūⁿ ê bān-mi̍h, hái kap hái-tiong ê bān-mi̍h; che it-chhè lóng sī Lí só͘ pó-chûn ê; thian-kun iā kèng-pài Lí.

7耶和華ah，你是上帝，bat揀選亞伯蘭，chhōa伊出Ka-le̍k-tí ê Ngô͘-jíⁿ，賞賜伊名叫亞伯拉罕。Iâ-hô-hoa ah, Lí sī Siōng-tè, bat kéng-soán A-pek-lân, chhōa i chhut Ka-le̍k-tí ê Ngô͘-jíⁿ, siúⁿ-sù i miâ kiò A-pek-la̍h-hán.

8你看伊ê心盡忠tī你ê面前，就kap伊立約，應允將迦南人、Hek人、A-mô͘-lī人、Pí-lī-sé人、Iâ-pò͘-su人、Kek-ka-sat人ê地hō͘伊ê後裔，koh有應驗你ê話；因為你是公義ê。Lí khòaⁿ i ê sim chīn-tiong tī Lí ê bīn-chêng, chiū kap i li̍p-iok, èng-ún chiong Ka-lâm lâng, Hek lâng, A-mô͘-lī lâng, Pí-lī-sé lâng, Iâ-pò͘-su lâng, Kek-ka-sat lâng ê tōe hō͘ i ê hō͘-è, koh ū èng-giām Lí ê ōe; in-ūi Lí sī kong-gī--ê.

9你bat看見阮ê列祖tī埃及所受ê困苦，聽in tī紅海邊ê哀求，Lí bat khòaⁿ-kìⁿ goán ê lia̍t-chó͘ tī Ai-ki̍p só͘ siū ê khùn-khó͘, thiaⁿ in tī Âng-hái piⁿ ê ai-kiû,

10就行神跡奇事，責罰法老kap伊ê眾人臣，以及伊國內ê眾百姓；因為你知in驕傲款待阮ê列祖，你就為家己得tio̍h名聲，親像今á日一樣。chiū kiâⁿ sîn-jiah kî-sū, chek-hoa̍t Hoat-ló kap i ê chèng jîn-sîn, í-ki̍p i kok-lāi ê chèng peh-sìⁿ; in-ūi Lí chai in kiau-ngō͘ khoán-thāi goán ê lia̍t-chó͘, Lí chiū ūi ka-kī tit-tio̍h miâ-siaⁿ, chhin-chhiūⁿ kin-á-ji̍t chi̍t-iūⁿ.

11你tī in ê面前分開海，hō͘ in tùi海中行乾地過去，追jip in ê，你hiat in tī深海，親像hiat石頭tī大水中。Lí tī in ê bīn-chêng pun-khui hái, hō͘ in tùi hái-tiong kiâⁿ ta-tōe kè-khì, tui-jip in--ê, Lí hiat in tī chhim-hái, chhin-chhiūⁿ hiat chio̍h-thâu tī tōa-chúi-tiong.

12又koh日時你用雲柱chhōa in，暝時你用火柱照光in所行ê路。Iū-koh ji̍t--sî Lí ēng hûn-thiāu chhōa in, mî--sî Lí ēng hé-thiāu chiò-kng in só͘ kiâⁿ ê lō͘.

13你也降臨tī西奈山，tùi天裡kap in講話，賞賜in正直ê法度，真實ê法度，好ê律例kap誡命；Lí iā kàng-lîm tī Se-nái soaⁿ, tùi thiⁿ--nih kap in kóng-ōe, siúⁿ-sù in chèng-ti̍t ê hoat-tō͘, chin-si̍t ê hoat-tō͘, hó ê lu̍t-lē kap kài-bēng;

14koh hō͘ in知你安歇ê聖日，也託你ê奴僕摩西用誡命、律例、法度，命令in；koh hō͘ in chai Lí an-hioh ê sèng-ji̍t, iā thok Lí ê lô͘-po̍k Mô͘-se ēng kài-bēng, lu̍t-lē, hoat-tō͘, bēng-lēng in;

15為tio̍h in iau，就tùi天賞賜米糧，為tio̍h in嘴乾，就tùi石磐出水，koh命令in去承接你所chiù-chōa beh hō͘ in ê地。ūi-tio̍h in iau, chiū tùi thiⁿ siúⁿ-sù bí-niû, ūi-tio̍h in chhùi-ta, chiū tùi chio̍h-pôaⁿ chhut-chúi, koh bēng-lēng in khì sêng-chiap Lí só͘ chiù-chōa beh hō͘ in ê tōe.

16總是in kap阮ê列祖行tāi-chì驕傲，硬in ê頷頸，無聽thàn你ê誡命，Chóng-sī in kap goán ê lia̍t-chó͘ kiâⁿ tāi-chì kiau-ngō͘, ngī in ê ām-kún, bô thiaⁿ-thàn Lí ê kài-bēng,

17m̄肯順thàn，也無記念你tī in中間所行ê奇事，竟然硬in ê頷頸，tī悖逆中家己設立首領，beh oat tò去in做奴才ê地。總是你是歡喜赦免人，有恩典、憐憫，無快快受氣，有滿滿慈愛ê上帝；也無放sak in。m̄-khéng sūn-thàn, iā bô kì-liām Lí tī in tiong-kan só͘ kiâⁿ ê kî-sū, kéng-jiân ngī in ê ām-kún, tī pōe-ge̍k tiong ka-kī siat-li̍p siú-léng, beh oat tò-khì in chòe lô͘-châi ê tōe. Chóng-sī Lí sī hoaⁿ-hí sià-bián lâng, ū un-tián, lîn-bín, bô khoài-khoài siū-khì, ū móa-móa chû-ài ê Siōng-tè; iā bô pàng-sak in.

18In雖然鑄一隻牛á，koh講，這是你ê上帝bat chhōa你出埃及ê，án-ni大大激動受氣；In sui-jiân chù chi̍t-chiah gû-á, koh kóng, Che sī lí ê Siōng-tè bat chhōa lí chhut Ai-ki̍p--ê, án-ni tōa-tōa kek-tōng siū-khì;

19你iáu-kú大施憐憫，無放sak in tī曠野；日時，雲柱無離開in，chhōa in行路；暝時，火柱也無離開in，照光in kap in所tio̍h行ê路。Lí iáu-kú tōa si lîn-bín, bô pàng-sak in tī khòng-iá; ji̍t-sî, hûn-thiāu bô lī-khui in, chhōa in kiâⁿ lō͘; mî-sî, hé-thiāu iā bô lī-khui in, chiò-kng in kap in só͘ tio̍h kiâⁿ ê lō͘.

20你也賞賜你好ê神來教示in，你ê má-ná猶原hō͘ in食無soah，為tio̍h in嘴乾，賞賜in水。Lí iā siúⁿ-sù Lí hó ê sîn lâi kà-sī in, Lí ê má-ná iû-goân hō͘ in chia̍h bô soah, ūi-tio̍h in chhùi-ta, siúⁿ-sù in chúi.

21Tī曠野四十年，你養飼in；in就無欠缺一項，in ê衫無破，in ê腳無phòng-phā。Tī khòng-iá sì-cha̍p nî Lí iúⁿ-chhī in; in chiū bô khiàm-kheh chi̍t-hāng, in ê saⁿ bô phòa, in ê kha bô phòng-phā.

22你將列邦kap hiah-ê百姓hō͘ in，分派in tī ta̍k角頭，in就得tio̍h Se-hông ê地，Hi-si̍t-pún王ê地，kap Pa-san王Go̍k ê地。Lí chiong lia̍t-pang kap hiah ê peh-sìⁿ hō͘ in, hun-phài in tī ta̍k kak-thâu, in chiū tit-tio̍h Se-hông ê tōe, Hi-si̍t-pún ông ê tōe, kap Pa-san ông Go̍k ê tōe.

23你加添in ê kiáⁿ孫親像天星ê罪，chhōa in到hit-ê地，就是你kā in ê列祖講，in beh入去承接ê。Lí ke-thiⁿ in ê kiáⁿ-sun chhin-chhiūⁿ thiⁿ-chhiⁿ ê chōe, chhōa in kàu hit ê tōe, chiū-sī Lí kā in ê lia̍t-chó͘ kóng, in beh ji̍p-khì sêng-chiap ê.

24Án-ni，in ê kiáⁿ孫入去承接hit-ê地，你tī in ê面前制壓hit所在khiā起ê百姓，就是迦南人，將in kap in ê君王，kap hit所在ê百姓，lóng交tī in ê手，hō͘ in chhut-chāi意思來款待in。Án-ni, in ê kiáⁿ-sun ji̍p-khì sêng-chiap hit ê tōe, Lí tī in ê bīn-chêng chè-ap hit só͘-chāi khiā-khí ê peh-sìⁿ, chiū-sī Ka-lâm lâng, chiong in kap in ê kun-ông, kap hit só͘-chāi ê peh-sìⁿ, lóng kau tī in ê chhiú, hō͘ in chhut-chāi ì-sù lâi khoán-thāi in.

25In取堅固ê城，肥ê土地，得tio̍h充滿ta̍k樣好物ê厝宅，開便便ê水井，葡萄園、橄欖園，果子樹chōe-chōe；in得tio̍h食飽，身體肥；因為你ê大恩心內快樂。In chhú kian-kò͘ ê siâⁿ, pûi ê thó͘-tōe, tit-tio̍h chhiong-móa ta̍k-iūⁿ hó-mi̍h ê chhù-the̍h, khui piān-piān ê chúi-chíⁿ, phû-tô-hn̂g, kaⁿ-ná-hn̂g, ké-chí-chhiū chōe-chōe; in tit-tio̍h chia̍h-pá, sin-thé pûi; in-ūi Lí ê tōa-un sim-lāi khoài-lo̍k.

26總是in m̄順thàn，竟然悖逆你，將你ê律法hiat tī ka-chiah後；你ê先知勸解in，beh hō͘ in歸向你，in就thâi死in；大大激動受氣。Chóng-sī in m̄ sūn-thàn, kéng-jiân pōe-ge̍k Lí, chiong Lí ê lu̍t-hoat hiat tī ka-chiah-āu; Lí ê sian-ti khoàn-kài in, beh hō͘ in kui-ǹg Lí, in chiū thâi-sí--in; tōa-tōa kek-tōng siū-khì.

27所以你交in tī對敵ê手，受in ê苦楚；in tú-tio̍h苦難ê時哀求你，你就tùi天àⁿ落聽，照你ê大憐憫，hō͘ in有拯救ê人，救in脫離對敵ê手。Só͘-í Lí kau in tī tùi-te̍k ê chhiú, siū in ê khó͘-chhó͘; in tú-tio̍h khó͘-lān ê sî ai-kiû Lí, Lí chiū tùi thiⁿ àⁿ-lo̍h thiaⁿ, chiàu Lí ê tōa lîn-bín, hō͘ in ū chín-kiù ê lâng, kiù in thoat-lī tùi-te̍k ê chhiú.

28總是in得tio̍h平安了後，koh tī你ê面前行pháiⁿ；所以你放sak in tī對敵ê手，hō͘對敵管轄in；in oa̍t倒tńg哀求你ê時，你猶原tùi天àⁿ落聽，ta̍uh-ta̍uh照你ê憐憫拯救in；Chóng-sī in tit-tio̍h pêng-an liáu-āu, koh tī Lí ê bīn-chêng kiâⁿ pháiⁿ; só͘-í Lí pàng-sak in tī tùi-te̍k ê chhiú, hō͘ tùi-te̍k koán-hat in; in oa̍t-tò-tńg ai-kiû Lí ê sî, Lí iû-goân tùi thiⁿ àⁿ-lo̍h thiaⁿ, ta̍uh-ta̍uh chiàu Lí ê lîn-bín chín-kiù in;

29koh勸解in，ài beh引chhōa in歸向你ê律法；總是in行tāi-chì驕傲，m̄聽thàn你ê誡命，干犯你hiah-ê法度，(人若行伊，beh對伊得tio̍h活ê，) oa̍t-tńg肩頭，硬頷頸，m̄肯聽thàn。koh khoàn-kài in, ài beh ín-chhōa in kui-ǹg Lí ê lu̍t-hoat; chóng-sī in kiâⁿ tāi-chì kiau-ngō͘, m̄ thiaⁿ-thàn Lí ê kài-bēng, kan-hoān Lí hiah ê hoat-tō͘, (lâng nā kiâⁿ i, beh tùi i tit-tio̍h oa̍h ê,) oa̍t-tńg keng-thâu, ngī ām-kún, m̄-khéng thiaⁿ-thàn.

30總是你chōe-chōe年寬容in，koh用你ê神託你hiah-ê先知來對in做干證，in猶原m̄聽thàn；所以你將in交tī列國ê百姓ê手。Chóng-sī Lí chōe-chōe nî khoan-iông in, koh ēng Lí ê sîn thok Lí hiah ê sian-ti lâi tùi in chòe kan-chèng, in iû-goân m̄ thiaⁿ-thàn; só͘-í Lí chiong in kau tī lia̍t-kok ê peh-sìⁿ ê chhiú.

31總是你tùi你ê大憐憫，無一盡滅in，也無放sak in；因為你是有恩典，有憐憫ê上帝。Chóng-sī Lí tùi Lí ê tōa lîn-bín, bô it-chīn bia̍t in, iā bô pàng-sak in; in-ūi Lí sī ū un-tián, ū lîn-bín ê Siōng-tè.

32Taⁿ阮ê上帝ah，你是至大，有權能，thang驚畏，守約，施慈愛ê上帝；阮ê君王、首領、祭司、先知，列祖kap你ê眾百姓，tùi亞述列王ê時到今á日所tú-tio̍h一切ê苦難，求你莫得掠做小khóa。Taⁿ goán ê Siōng-tè ah, Lí sī chì-tōa, ū koân-lêng, thang kiaⁿ-ùi, siú iok, si chû-ài ê Siōng-tè; goán ê kun-ông, siú-léng, chè-si, sian-ti, lia̍t-chó͘ kap Lí ê chèng peh-sìⁿ, tùi A-su̍t lia̍t-ông ê sî kàu kin-á-ji̍t só͘ tú-tio̍h it-chhè ê khó͘-lān, kiû Lí bo̍h-tit lia̍h-chòe sió-khóa.

33總是見若阮所tú-tio̍h-ê，你是公義；因為你所行ê是真實，阮所行ê是pháiⁿ。Chóng-sī kìⁿ-nā goán só͘ tú-tio̍h--ê, Lí sī kong-gī; in-ūi Lí só͘ kiâⁿ--ê sī chin-si̍t, goán só͘ kiâⁿ--ê sī pháiⁿ.

34阮ê君王、首領、祭司、列祖，lóng無遵守你ê律法，m̄聽thàn你ê誡命，kap你ê干證，就是你對in所干證ê話。Goán ê kun-ông, siú-léng, chè-si, lia̍t-chó͘, lóng bô chun-siú Lí ê lu̍t-hoat, m̄ thiaⁿ-thàn Lí ê kài-bēng, kap Lí ê kan-chèng, chiū-sī Lí tùi in só͘ kan-chèng ê ōe.

35In tī in ê本國，tī你賞賜in大福氣，kap你tī in面前所賞賜闊大肥súi ê地，無服事你，也無oa̍t-tńg離開in ê pháiⁿ所行。In tī in ê pún-kok, tī Lí siúⁿ-sù in tōa hok-khì, kap Lí tī in bīn-chêng só͘ siúⁿ-sù khoah-tōa pûi-súi ê tōe, bô ho̍k-sāi Lí, iā bô oa̍t-tńg lī-khui in ê pháiⁿ só͘ kiâⁿ.

36阮今á日做奴僕；你所賞賜阮列祖ê地，thang食伊ê果子，以及好ê物，看ah，阮tī chit-ê地做奴僕。Goán kin-á-ji̍t chòe lô͘-po̍k; Lí só͘ siúⁿ-sù goán lia̍t-chó͘ ê tōe, thang chia̍h i ê ké-chí, í-ki̍p hó ê mi̍h, khòaⁿ ah, goán tī chit ê tōe chòe lô͘-po̍k.

37Chit-ê地出chōe-chōe物，歸tī列王，就是你因為阮ê罪，你所設立來管轄阮ê，in chhut-chāi意思管轄阮ê身軀kap阮ê cheng-siⁿ；阮tú-tio̍h大患難。Chit ê tōe chhut chōe-chōe mi̍h, kui tī lia̍t-ông, chiū-sī Lí in-ūi goán ê chōe, Lí só͘ siat-li̍p lâi koán-hat goán-ê, in chhut-chāi ì-sù koán-hat goán ê sin-khu kap goán ê cheng-siⁿ; goán tú-tio̍h tōa hoān-lān.

38因為這一切ê事，阮立確實ê約，寫明伊；阮ê首領，利未人，kap祭司，lóng蓋印。In-ūi che it-chhè ê sū, goán li̍p khak-si̍t ê iok, siá-bêng i; goán ê siú-léng, Lī-bī lâng, kap chè-si, lóng khàm-ìn.

1蓋印ê，是Hap-ka-lī-a ê kiáⁿ總督尼希米，kap Se-tí-ka；Khàm-ìn--ê, sī Hap-ka-lī-a ê kiáⁿ chóng-tok Nî-hi-bí, kap Se-tí-ka;

2Se-lâi-ngá、 A-sat-lī-ngá、耶利米；Se-lâi-ngá, A-sat-lī-ngá, Iâ-lī-bí;

3Pa-si-hō͘-jíⁿ、A-má-lī-ngá、Má-ki-ngá；Pa-si-hō͘-jíⁿ, A-má-lī-ngá, Má-ki-ngá;

4Hap-tu̍t、Sī-pa-nî、Má-lo̍k；Hap-tu̍t, Sī-pa-nî, Má-lo̍k;

5Hap-lîm、Bí-lī-boa̍t、Gô-pa-tí-a；Hap-lîm, Bí-lī-boa̍t, Gô-pa-tí-a;

6但以理、Kūn-tùn、Pa-lio̍k；Tān-í-lí, Kūn-tùn, Pa-lio̍k;

7Bí-su-lân、A-pí-ngá、Bí-ngá-bîn；Bí-su-lân, A-pí-ngá, Bí-ngá-bîn;

8Má-se-a、Phek-kai、Sī-má-ngá；頂面chiah-ê是祭司。Má-se-a, Phek-kai, Sī-má-ngá; téng-bīn chiah-ê sī chè-si.

9Koh有利未人；就是A-sàn-nî ê kiáⁿ Iâ-su-a，Hi-ná-ta̍t ê kiáⁿ Pin-lōe、Kah-bia̍t；Koh ū Lī-bī lâng; chiū-sī A-sàn-nî ê kiáⁿ Iâ-su-a, Hi-ná-ta̍t ê kiáⁿ Pin-lōe, Kah-bia̍t;

10iáu有in ê兄弟Sī-pa-nî、Hô-tē-ngá、Ki-lī-tha、Pí-lâi-ngá、哈蘭；iáu-ū in ê hiaⁿ-tī Sī-pa-nî, Hô-tē-ngá, Ki-lī-tha, Pí-lâi-ngá, Hap-lân;

11Bí-ka、Lī-ha̍p、Hap-sa-pí-ngá；Bí-ka, Lī-ha̍p, Hap-sa-pí-ngá;

12Sat-khek、Sī-lī-pí、Sī-pa-nî；Sat-khek, Sī-lī-pí, Sī-pa-nî;

13Hô-tē-ngá、Pa-nî、Pí-nî-lô͘。Hô-tē-ngá, Pa-nî, Pí-nî-lô͘.

14Koh有百姓ê頭人；就是Pa-lio̍k、Pa-hap-mô͘-ap、Í-lân、Sat-thó͘、Pa-nî；Koh ū peh-sìⁿ ê thâu-lâng; chiū-sī Pa-lio̍k, Pa-hap-mô͘-ap, Í-lân, Sat-thó͘, Pa-nî;

15Pò͘-nî、Ap-kap、Pí-pài；Pò͘-nî, Ap-kap, Pí-pài;

16A-to-nî-ngá、Pí-kek-óa-i、A-teng；A-to-nî-ngá, Pí-kek-óa-i, A-teng;

17A-te̍k、Hi-se-ka、Ap-sok；A-te̍k, Hi-se-ka, Ap-sok;

18Hô-tē-ngá、Hap-sūn、Pí-sài；Hô-tē-ngá, Hap-sūn, Pí-sài;

19Hap-la̍h、A-ná-tu̍t、Nî-pài；Hap-la̍h, A-ná-tu̍t, Nî-pài;

20Boat-pí-ap、Bí-su-lân、Hi-sek；Boat-pí-ap, Bí-su-lân, Hi-sek;

21Bí-sī-sat-pia̍t、Sat-tok、Ap-tō͘-a；Bí-sī-sat-pia̍t, Sat-tok, Ap-tō͘-a;

22Pí-la̍h-thê、哈蘭、A-nāi-ngá；Pí-la̍h-thê, Hap-lân, A-nāi-ngá;

23Hô-sè-a、Hap-ná-nî-ngá、Hap-su̍t；Hô-sè-a, Hap-ná-nî-ngá, Hap-su̍t;

24Hap-lô-hek、Pí-lī-hap、Sok-pek；Hap-lô-hek, Pí-lī-hap, Sok-pek;

25Lī-hông、Hap-sa-ná、Má-se-ngá；Lī-hông, Hap-sa-ná, Má-se-ngá;

26A-hi-ngá、哈蘭、A-lân；A-hi-ngá, Hap-lân, A-lân;

27Má-lo̍k、Hap-lîm、Pa-ná。Má-lo̍k, Hap-lîm, Pa-ná.

28其餘ê百姓，祭司，利未人，顧門ê，唱歌ê，Nî-thê-lêng，以及一切kap列邦ê百姓隔開來歸服上帝ê律法ê，kap in ê bó͘，in ê kiáⁿ，in ê cha-bó͘-kiáⁿ，見能曉得能明白ê；Kî-û ê peh-sìⁿ, chè-si, Lī-bī lâng, kò͘-mn̂g--ê, chhiùⁿ-koa--ê, Nî-thê-lêng, í-ki̍p it-chhè kap lia̍t-pang ê peh-sìⁿ keh-khui lâi kui-ho̍k Siōng-tè ê lu̍t-hoat ê, kap in ê bó͘, in ê kiáⁿ, in ê cha-bó͘-kiáⁿ, kìⁿ ōe hiáu-tit ōe bêng-pe̍k--ê;

29lóng結聯in ê兄弟in ê貴族，咒詛chiù-chōa beh遵thàn上帝ê律法，就是上帝ê奴僕摩西所傳受ê，執守遵thàn耶和華咱ê主一切誡命法度，律例；lóng kiat-liân in ê hiaⁿ-tī in ê kùi-cho̍k, chiù-chó͘ chiù-chōa beh chun-thàn Siōng-tè ê lu̍t-hoat, chiū-sī Siōng-tè ê lô͘-po̍k Mô͘-se só͘ thoân-siū--ê, chip-siú chun-thàn Iâ-hô-hoa lán ê Chú it-chhè kài-bēng hoat-tō͘, lu̍t-lē;

30也無beh將阮ê cha-bó͘-kiáⁿ配hō͘ chit所在ê百姓，也無beh為阮ê kiáⁿ娶in ê cha-bó͘-kiáⁿ；iā bô beh chiong goán ê cha-bó͘-kiáⁿ phòe hō͘ chit só͘-chāi ê peh-sìⁿ, iā bô beh ūi goán ê kiáⁿ chhōa in ê cha-bó͘-kiáⁿ;

31Chit所在ê百姓，若tī安歇日帶貨物á是五穀來賣，阮tī安歇日á是聖日，阮無beh kā in買；到第七年無beh種作；見若欠阮ê無beh kā伊討。chit só͘-chāi ê peh-sìⁿ, nā tī an-hioh-ji̍t tòa hè-mi̍h á-sī ngó͘-kok lâi bōe, goán tī an-hioh-ji̍t á-sī sèng-ji̍t, goán bô beh kā in bóe; kàu tē-chhit nî bô beh chèng-choh; kìⁿ-nā khiàm-goán--ê bô beh kā i thó.

32阮koh為家己定tio̍h例，ta̍k年ta̍k人tio̍h納sià-khek-le̍k ê三份一，做阮ê上帝殿ê路用；Goán koh ūi ka-kī tiāⁿ-tio̍h lē, ta̍k-nî ta̍k-lâng tio̍h la̍p sià-khek-le̍k ê saⁿ-hūn-chi̍t, chòe goán ê Siōng-tè tiān ê lō͘-ēng;

33就是為tio̍h排列ê餅，kap常常獻ê素祭，kap常常獻ê燒祭，kap安歇日，月ê初一，kap節期所獻ê，kap聖ê物，以及贖罪ê祭，就是為以色列人贖罪ê，以及阮上帝殿內一切ê路用。chiū-sī ūi-tio̍h pâi-lia̍t ê piáⁿ, kap siông-siông hiàn ê sò͘-chè, kap siông-siông hiàn ê sio-chè, kap an-hioh-ji̍t, ge̍h ê chhoe-it, kap choeh-kî só͘ hiàn ê, kap sèng ê mi̍h, í-ki̍p sio̍k-chōe ê chè, chiū-sī ūi Í-sek-lia̍t lâng sio̍k-chōe--ê, í-ki̍p goán Siōng-tè tiān-lāi it-chhè ê lō͘-ēng.

34阮chiah-ê祭司，利未人，kap百姓liam-khau，照阮ê宗族，tī ta̍k年定tio̍h ê時，帶獻祭ê柴到阮上帝ê殿，燒tī耶和華阮上帝ê壇，照律法所記載ê；Goán chiah ê chè-si, Lī-bī lâng, kap peh-sìⁿ liam-khau, chiàu goán ê chong-cho̍k, tī ta̍k-nî tiāⁿ-tio̍h ê sî, tòa hiàn-chè ê chhâ kàu goán Siōng-tè ê tiān, sio tī Iâ-hô-hoa goán Siōng-tè ê tôaⁿ, chiàu lu̍t-hoat só͘ kì-chài-ê;

35koh ta̍k年將阮地上起頭熟ê土產，kap ta̍k號樹起頭熟ê果子，帶到耶和華ê殿；koh ta̍k-nî chiong goán tōe-chiūⁿ khí-thâu se̍k ê thó͘-sán, kap ta̍k-hō chhiū khí-thâu se̍k ê ké-chí, tòa kàu Iâ-hô-hoa ê tiān;

36koh照律法所記載，將阮ê kiáⁿ kap cheng-siⁿ起頭生ê，以及牛群羊群起頭生ê，帶到阮上帝ê殿，到阮上帝ê殿內teh服事ê祭司；koh chiàu lu̍t-hoat só͘ kì-chài, chiong goán ê kiáⁿ kap cheng-siⁿ khí-thâu siⁿ--ê, í-ki̍p gû-kûn iûⁿ-kûn khí-thâu siⁿ--ê, tòa kàu goán Siōng-tè ê tiān, kàu goán Siōng-tè ê tiān-lāi teh ho̍k-sāi ê chè-si;

37也將阮起頭出ê麥粉，以及阮ê舉祭ê禮物，kap ta̍k樣樹ê果子、新酒，kap油，帶hō͘祭司，收入tī阮上帝ê殿ê庫房；將阮地上所收成ê，十份一hō͘利未人，因為利未人tī阮一切出土產ê城，得tio̍h十份一。iā chiong goán khí-thâu chhut ê be̍h-hún, í-ki̍p goán ê kú-chè ê lé-mi̍h, kap ta̍k-iūⁿ chhiū ê ké-chí, sin-chiú, kap iû, tòa hō͘ chè-si, siu-ji̍p tī goán Siōng-tè ê tiān ê khò͘-pâng; chiong goán tōe-chiūⁿ só͘ siu-sêng ê, cha̍p-hūn-chi̍t hō͘ Lī-bī lâng, in-ūi Lī-bī lâng tī goán it-chhè chhut thó͘-sán ê siâⁿ, tit-tio̍h cha̍p-hūn-chi̍t.

38利未人取十份一ê時，亞倫ê kiáⁿ孫中ê祭司tio̍h有一個kap利未人tī-teh；利未人也tio̍h將十份一ê十份一帶到阮上帝ê殿，到房間，收入府庫。Lī-bī lâng chhú cha̍p-hūn-chi̍t ê sî, A-lûn ê kiáⁿ-sun tiong ê chè-si tio̍h ū chi̍t-ê kap Lī-bī lâng tī-teh; Lī-bī lâng iā tio̍h chiong cha̍p-hūn-chi̍t ê cha̍p-hūn-chi̍t tòa kàu goán Siōng-tè ê tiān, kàu pâng-keng, siu-ji̍p hú-khò͘.

39因為以色列人kap利未人，tio̍h用in舉祭ê五穀、新酒，kap油，帶到收勸聖所ê器具ê房間，就是擔當職ê祭司，顧門ê，唱歌ê，所tiàm ê房間；án-ni阮就無beh放sak阮上帝ê殿。In-ūi Í-sek-lia̍t lâng kap Lī-bī lâng, tio̍h ēng in kú-chè ê ngó͘-kok, sin-chiú, kap iû, tòa kàu siu-khǹg sèng-só͘ ê khì-kū ê pâng-keng, chiū-sī tam-tng chit ê chè-si, kò͘-mn̂g--ê, chhiùⁿ-koa--ê, só͘ tiàm ê pâng-keng; án-ni goán chiū bô beh pàng-sak goán Siōng-tè ê tiān.

1百姓hiah-ê首領tiàm tī耶路撒冷；其餘ê百姓liam-khau，每十人中hō͘一人來tiàm tī聖城耶路撒冷，hit九個tiàm tī別ê城。Peh-sìⁿ hiah ê siú-léng tiàm tī Iâ-lō͘-sat-léng; kî-û ê peh-sìⁿ liam-khau, múi cha̍p-lâng-tiong hō͘ chi̍t-lâng lâi tiàm tī sèng-siâⁿ Iâ-lō͘-sat-léng, hí(**hit) káu-ê tiàm tī pa̍t ê siâⁿ.

2見若家己甘願來tiàm tī耶路撒冷ê，百姓lóng kā in祝福。Kìⁿ-nā ka-kī kam-goān lâi tiàm tī Iâ-lō͘-sat-léng--ê, peh-sìⁿ lóng kā in chiok-hok.

3以色列人，祭司，利未人，Nî-thê-lêng，kap所羅門奴僕ê後裔，lóng tiàm tī猶大hiah-ê城，ta̍k-ê tiàm tī in ê業，in ê城；本省ê頭人，tiàm tī耶路撒冷ê，記tī下面。Í-sek-lia̍t lâng, chè-si, Lī-bī lâng, Nî-thê-lêng, kap Só͘-lô-bûn lô͘-po̍k ê hō͘-è, lóng tiàm tī Iû-tāi hiah ê siâⁿ, ta̍k-ê tiàm tī in ê gia̍p, in ê siâⁿ; pún-séng ê thâu-lâng, tiàm tī Iâ-lō͘-sat-léng ê, kì tī ē-bīn.

4猶大ê kiáⁿ孫，kap便雅憫ê kiáⁿ孫，有ê tiàm tī耶路撒冷。屬猶大ê kiáⁿ孫；Hoat-le̍k-su ê後裔，O͘-se-ngá ê kiáⁿ A-tha-ngá，O͘-se-ngá是Sat-ka-lī-ngá ê kiáⁿ，Sat-ka-lī-ngá是A-má-lī-ngá ê kiáⁿ，A-má-lī-ngá是Sī-hoat-thê-ngá ê kiáⁿ，Sī-hoat-thê-ngá是Má-le̍k-lia̍t ê kiáⁿ；Iû-tāi ê kiáⁿ-sun, kap Piān-ngá-bín ê kiáⁿ-sun, ū-ê tiàm tī Iâ-lō͘-sat-léng. Sio̍k Iû-tāi ê kiáⁿ-sun; Hoat-le̍k-su ê hō͘-è, O͘-se-ngá ê kiáⁿ A-tha-ngá, O͘-se-ngá sī Sat-ka-lī-ngá ê kiáⁿ, Sat-ka-lī-ngá sī A-má-lī-ngá ê kiáⁿ, A-má-lī-ngá sī Sī-hoat-thê-ngá ê kiáⁿ, Sī-hoat-thê-ngá sī Má-le̍k-lia̍t ê kiáⁿ;

5koh有Pa-lio̍k ê kiáⁿ Má-se-ngá，Pa-lio̍k是Kok-hô-se ê kiáⁿ，Kok-hô-se是Hap-sài-ngá ê kiáⁿ，Hap-sài-ngá是A-tāi-ngá ê kiáⁿ，A-tāi-ngá是Iok-ngá-li̍p ê kiáⁿ，Iok-ngá-li̍p是Sat-ka-lī-ngá ê kiáⁿ，Sat-ka-lī-ngá是Sī-lô人/nî ê kiáⁿ。koh ū Pa-lio̍k ê kiáⁿ Má-se-ngá, Pa-lio̍k sī Kok-hô-se ê kiáⁿ, Kok-hô-se sī Hap-sài-ngá ê kiáⁿ, Hap-sài-ngá sī A-tāi-ngá ê kiáⁿ, A-tāi-ngá sī Iok-ngá-li̍p ê kiáⁿ, Iok-ngá-li̍p sī Sat-ka-lī-ngá ê kiáⁿ, Sat-ka-lī-ngá sī Sī-lô-lâng/nî ê kiáⁿ.

6Hoat-le̍k-su ê kiáⁿ孫tiàm tī耶路撒冷ê，共有四百六十八個勇士。Hoat-le̍k-su ê kiáⁿ-sun tiàm tī Iâ-lō͘-sat-léng ê, kiōng ū sì-pah la̍k-cha̍p-poeh ê ióng-sū.

7屬便雅憫kiáⁿ孫ê；有Bí-su-lân ê kiáⁿ Sat-lō͘，Bí-su-lân是Iok-ia̍p ê kiáⁿ，Iok-ia̍p是Pí-tāi-ngá ê kiáⁿ，Pí-tāi-ngá是Ko-nāi-ngá ê kiáⁿ，Ko-nāi-ngá是Má-se-ngá ê kiáⁿ，Má-se-ngá是Í-thiat ê kiáⁿ，Í-thiat是Iâ-sai-a ê kiáⁿ。Sio̍k Piān-ngá-bín kiáⁿ-sun ê; ū Bí-su-lân ê kiáⁿ Sat-lō͘, Bí-su-lân sī Iok-ia̍p ê kiáⁿ, Iok-ia̍p sī Pí-tāi-ngá ê kiáⁿ, Pí-tāi-ngá sī Ko-nāi-ngá ê kiáⁿ, Ko-nāi-ngá sī Má-se-ngá ê kiáⁿ, Má-se-ngá sī Í-thiat ê kiáⁿ, Í-thiat sī Iâ-sai-a ê kiáⁿ.

8伊ê tè後有Ka-pài，Sat-lâi，共九百二十八人。I ê tè-āu ū Ka-pài, Sat-lâi, kiōng káu-pah jī-cha̍p-poeh lâng.

9Sè-ki-lī ê kiáⁿ約珥是in ê官長；Hap-se-lô͘-a ê kiáⁿ猶大做hit-ê城ê副官。Sè-ki-lī ê kiáⁿ Iok-jíⁿ sī in ê koaⁿ-tiúⁿ; Hap-se-lô͘-a ê kiáⁿ Iû-tāi chòe hit ê siâⁿ ê hù-koaⁿ.

10屬祭司ê有Iok-ngá-li̍p ê kiáⁿ Iâ-tāi-ngá、Ngá-kun；Sio̍k chè-si--ê ū Iok-ngá-li̍p ê kiáⁿ Iâ-tāi-ngá, Ngá-kun;

11iáu有管理上帝ê殿ê Se-lâi-ngá，Se-lâi-ngá是Hi-le̍k-ka ê kiáⁿ，Hi-le̍k-ka是Bí-su-lân ê kiáⁿ，Bí-su-lân是Sat-tok ê kiáⁿ，Sat-tok是Bí-la̍h-約ê kiáⁿ，Bí-la̍h-iok是A-hi-tu̍t ê kiáⁿ；iáu ū koán-lí Siōng-tè ê tiān ê Se-lâi-ngá, Se-lâi-ngá sī Hi-le̍k-ka ê kiáⁿ, Hi-le̍k-ka sī Bí-su-lân ê kiáⁿ, Bí-su-lân sī Sat-tok ê kiáⁿ, Sat-tok sī Bí-la̍h-iok ê kiáⁿ, Bí-la̍h-iok sī A-hi-tu̍t ê kiáⁿ;

12iáu有in ê兄弟tī殿內擔當職ê，共八百二十二人；koh有Iâ-lô-hán ê kiáⁿ A-tāi-ngá，Iâ-lô-hán是Pí-la̍h-lī ê kiáⁿ，Pí-la̍h-lī是Àm-sé ê kiáⁿ，Àm-sé是撒迦利亞ê kiáⁿ，撒迦利亞是Pa-si-hō͘-jíⁿ ê kiáⁿ，Pa-si-hō͘-jíⁿ是Má-ki-ngá ê kiáⁿ；iáu ū in ê hiaⁿ-tī tī tiān-lāi tam-tng chit ê, kiōng poeh-pah jī-cha̍p-jī lâng; koh ū Iâ-lô-hán ê kiáⁿ A-tāi-ngá, Iâ-lô-hán sī Pí-la̍h-lī ê kiáⁿ, Pí-la̍h-lī sī Àm-sé ê kiáⁿ, Àm-sé sī Sat-ka-lī-a ê kiáⁿ, Sat-ka-lī-a sī Pa-si-hō͘-jíⁿ ê kiáⁿ, Pa-si-hō͘-jíⁿ sī Má-ki-ngá ê kiáⁿ;

13iáu有伊ê兄弟做族長ê，兩百四十二人；koh有A-sat-lia̍t ê kiáⁿ A-má-sòe ，A-sat-lia̍t是A-hap-sài ê kiáⁿ，A-hap-sài是Bí-si̍t-lī-boa̍t ê kiáⁿ，Bí-si̍t-lī-boa̍t是Im-be̍k ê kiáⁿ；iáu ū i ê hiaⁿ-tī chòe cho̍k-tiúⁿ--ê, nn̄g-pah sì-cha̍p-jī lâng; koh ū A-sat-lia̍t ê kiáⁿ A-má-sòe , A-sat-lia̍t sī A-hap-sài ê kiáⁿ, A-hap-sài sī Bí-si̍t-lī-boa̍t ê kiáⁿ, Bí-si̍t-lī-boa̍t sī Im-be̍k ê kiáⁿ;

14iáu有in ê兄弟大權能ê勇士，共一百二十八人；Hap-ki-to-lîm ê kiáⁿ Sat-pa-tē-gia̍p是in ê官長。iáu ū in ê hiaⁿ-tī tōa koân-lêng ê ióng-sū, kiōng chi̍t-pah jī-cha̍p-poeh lâng; Hap-ki-to-lîm ê kiáⁿ Sat-pa-tē-gia̍p sī in ê koaⁿ-tiúⁿ.

15利未人中，有Hap-su̍t ê kiáⁿ Sī-má-ngá，Hap-su̍t是Ap-lī-kam ê kiáⁿ，Ap-lī-kam是Hap-sa-pí-ngá ê kiáⁿ，Hap-sa-pí-ngá是Pò͘-nî ê kiáⁿ；Lī-bī lâng tiong, ū Hap-su̍t ê kiáⁿ Sī-má-ngá, Hap-su̍t sī Ap-lī-kam ê kiáⁿ, Ap-lī-kam sī Hap-sa-pí-ngá ê kiáⁿ, Hap-sa-pí-ngá sī Pò͘-nî ê kiáⁿ;

16koh有利未人ê頭人，Sa-pí-thài kap Iok-sat-poa̍t，管理上帝殿ê外事。koh ū Lī-bī lâng ê thâu-lâng, Sa-pí-thài kap Iok-sat-poa̍t, koán-lí Siōng-tè tiān ê gōa-sū.

17Tī祈禱感謝chhōa頭是Bí-ka ê kiáⁿ Má-tha-nî，Bí-ka是Sat-tí ê kiáⁿ，Sat-tí是A-sat ê kiáⁿ；koh有Má-tha-nî兄弟；koh有Pat-pò͘-ka tī伊ê兄弟中做第二個；iáu有Sa-bó͘-a ê kiáⁿ Ap-tāi，Sa-bó͘-a是Ka-la̍h ê kiáⁿ，Ka-la̍h是Iâ-tō͘-tùn ê kiáⁿ。Tī kî-tó kám-siā chhōa-thâu sī Bí-ka ê kiáⁿ Má-tha-nî, Bí-ka sī Sat-tí ê kiáⁿ, Sat-tí sī A-sat ê kiáⁿ; koh ū Má-tha-nî hiaⁿ-tī; koh ū Pat-pò͘-ka tī i ê hiaⁿ-tī-tiong chòe tē-jī--ê; iáu ū Sa-bó͘-a ê kiáⁿ Ap-tāi, Sa-bó͘-a sī Ka-la̍h ê kiáⁿ, Ka-la̍h sī Iâ-tō͘-tùn ê kiáⁿ.

18Tī聖城中ê利未人，共兩百八十-四人。Tī sèng-siâⁿ tiong ê Lī-bī lâng, kiōng nn̄g-pah poeh-cha̍p-sì lâng.

19顧門ê A-kok，kap Ta̍t-bûn，kap in ê兄弟teh守門ê，共一百七十二人。Kò͘-mn̂g--ê A-kok, kap Ta̍t-bûn, kap in ê hiaⁿ-tī teh siú-mn̂g--ê, kiōng chi̍t-pah chhit-cha̍p-jī lâng.

20其餘ê以色列人，祭司，利未人，tiàm tī猶大ta̍k-ê城，ta̍k人tī in ê業ê地。Kî-û ê Í-sek-lia̍t lâng, chè-si, Lī-bī lâng, tiàm tī Iû-tāi ta̍k ê siâⁿ, ta̍k-lâng tī in ê gia̍p ê tōe.

21總是Nî-thê-lêng tiàm tī Gô-húi-le̍k；Se-hap kap Ki-su-phàⁿ做Nî-thê-lêng ê頭。Chóng-sī Nî-thê-lêng tiàm tī Gô-húi-le̍k; Se-hap kap Ki-su-phàⁿ chòe Nî-thê-lêng ê thâu.

22Bí-ka ê元孫，Má-tāi-nî ê曾孫，Hap-sa-pì ê孫，Pa-nî ê kiáⁿ O͘-se，tī耶路撒冷管利未人，伊是唱歌ê A-sat ê kiáⁿ孫，管理上帝殿ê事務。Bí-ka ê goân-sun, Má-tāi-nî ê cheng-sun, Hap-sa-pì ê sun, Pa-nî ê kiáⁿ O͘-se, tī Iâ-lō͘-sat-léng koán Lī-bī lâng, i sī chhiùⁿ-koa--ê A-sat ê kiáⁿ-sun, koán-lí Siōng-tè tiān ê sū-bū.

23因為王為tio̍h in來出命令，ta̍k日有定tio̍h ê份額供給hiah-ê唱歌ê人。In-ūi ông ūi-tio̍h in lâi chhut bēng-lēng, ta̍k-ji̍t ū tiāⁿ-tio̍h ê hūn-gia̍h kiong-kip hiah ê chhiùⁿ-koa ê lâng.

24猶大ê kiáⁿ，謝拉 ê kiáⁿ孫，Bí-sī-sat-pia̍t ê kiáⁿ Pí-tha-hi-ngá，tī王ê部下辨理猶大百姓一切ê事。Iû-tāi ê kiáⁿ, Siā-la̍h ê kiáⁿ-sun, Bí-sī-sat-pia̍t ê kiáⁿ Pí-tha-hi-ngá, tī ông ê pō͘-hā pān-lí Iû-tāi peh-sìⁿ it-chhè ê sū.

25論到hiah-ê鄉社kap in ê田地，有猶大人tiàm tī Ki-lia̍t-a-pa kap伊ê鄉社，Tí-pún kap伊ê鄉社，Í-pa-kah-siat kap伊ê鄉社；Lūn-kàu hiah ê hiuⁿ-siā kap in ê chhân-tōe, ū Iû-tāi lâng tiàm tī Ki-lia̍t-a-pa kap i ê hiuⁿ-siā, Tí-pún kap i ê hiuⁿ-siā, Í-pa-kah-siat kap i ê hiuⁿ-siā;

26koh tī Iâ-su-a、Mô͘-la̍h-tāi、Pek-phàⁿ-lia̍t；koh tī Iâ-su-a, Mô͘-la̍h-tāi, Pek-phàⁿ-lia̍t;

27Hap-sat-su-a、別是巴kap伊ê鄉社；Hap-sat-su-a, Pia̍t-sī-pa kap i ê hiuⁿ-siā;

28koh tī Sé-kek-la̍h、Bí-ko-ná kap伊ê鄉社；koh tī Sé-kek-la̍h, Bí-ko-ná kap i ê hiuⁿ-siā;

29koh tī Im-lîm-bûn、Só-la̍h、Iâ-boa̍t，koh tī Im-lîm-bûn, Só-la̍h, Iâ-boa̍t,

30Sat-lô-a、A-tō͘-lân kap in ê鄉社，拉結kap伊ê田地，A-se-ka kap伊ê鄉社。In所tiàm ê地方，是tùi Pia̍t-si-pa到Him-lùn ê山谷。Sat-lô-a, A-tō͘-lân kap in ê hiuⁿ-siā, La̍h-kiat kap i ê chhân-tōe, A-se-ka kap i ê hiuⁿ-siā. In só͘ tiàm ê tōe-hng, sī tùi Pia̍t-si-pa kàu Him-lùn ê soaⁿ-kok.

31便雅憫人tùi Ka-pa 起，tiàm tī Bi̍t-boat、A-ngá、Pek-te̍k-lī，kap伊ê鄉社；Piān-ngá-bín lâng tùi Ka-pa khí, tiàm tī Bi̍t-boat, A-ngá, Pek-te̍k-lī, kap i ê hiuⁿ-siā;

32A-ná-tu̍t、Lô-pek、A-lân-ngá；A-ná-tu̍t, Lô-pek, A-lân-ngá;

33Hā-só、La̍h-má、Ki-tha-im；Hā-só, La̍h-má, Ki-tha-im;

34Hap-tia̍p、Sé-phian、Nî-pat-la̍h；Hap-tia̍p, Sé-phian, Nî-pat-la̍h;

35羅得、O-lô，工匠ê山谷。Lô-tek, O-lô, kang-chhiūⁿ ê soaⁿ-kok.

36利未人ê中間，有kúi-nā班tiàm tī猶大ê ，taⁿ歸tī便雅憫。Lī-bī-lâng ê tiong-kan, ū kúi-nā pan tiàm tī Iû-tāi ê , taⁿ kui tī Piān-ngá-bín.