1A-ta̍t-siat-se王二十年，Nî-sàn月，有酒tī王ê面前，我就進酒hō͘王。我平素tī王ê面前bē-bat有憂悶ê面色。A-ta̍t-siat-se ông jī-cha̍p nî, Nî-sàn ge̍h, ū chiú tī ông ê bīn-chêng, góa chiū chìn chiú hō͘ ông. Góa pêng-sò͘ tī ông ê bīn-chêng bē-bat ū iu-būn ê bīn-sek.

2王kā我講，你無破病，怎樣面帶憂容ah？這無別項，是你心內有憂悶。我Tùi án-ni，真驚。Ông kā góa kóng, Lí bô phòa-pīⁿ, cháiⁿ-iūⁿ bīn tài-iu-iông ah? Che bô pa̍t-hāng, sī lí sim-lāi ū iu-būn. Góa tùi án-ni chin kiaⁿ.

3我kā王講，願王萬歲；我ê列祖墳墓ê所在hit-ê城拋荒，城門lóng hō͘火燒去，我thái-thó無帶憂容mah？Góa kā ông kóng, Goān ông bān-sòe; góa ê lia̍t-chó͘ hûn-bōng ê só͘-chāi hit ê siâⁿ pha-hng, siâⁿ-mn̂g lóng hō͘ hé sio--khì, góa thái-thó bô tài-iu-iông mah?

4王問我講，你ài求甚麼？Tùi án-ni，我祈禱天頂ê上帝。Ông mn̄g góa kóng, Lí ài kiû sím-mi̍h? Tùi án-ni góa kî-tó thiⁿ-téng ê Siōng-tè.

5我對王講，王若歡喜，你ê奴僕若得tio̍h恩典tī你ê面前，就求你差我去猶大，到我ê列祖墳墓hit-ê城，我thang koh起伊。Góa tùi ông kóng, Ông nā hoaⁿ-hí, lí ê lô͘-po̍k nā tit-tio̍h un-tiàn tī Lí ê bīn-chêng, chiū kiû lí chhe góa khì Iû-tāi, kàu góa ê lia̍t-chó͘ hûn-bōng hit ê siâⁿ, góa thang koh khí i.

6Hit時王后kap王相kap坐，王kā我講，你beh行ê路站tio̍h jōa久？甚麼時beh tò來？王歡喜差我去，我就kap伊定tio̍h一個期限。Hit-sî ông-hō͘ kap ông saⁿ-kap chē, ông kā góa kóng, Lí beh kiâⁿ ê lō͘-chām tio̍h jōa-kú? sím-mi̍h sî beh tò-lâi? Ông hoaⁿ-hí chhe góa khì, góa chiū kap i tiāⁿ-tio̍h chi̍t ê kî-hān.

7我koh kā王講，王若歡喜，請用詔書hō͘我帶去交河外hiah-ê總督，准我經過到猶大；Góa koh kā ông kóng, Ông nā hoaⁿ-hí, chhiáⁿ ēng chiàu-su hō͘ góa tòa-khì kau Hô-gōa hiah ê chóng-tok, chún góa keng-kè kàu Iû-tāi;

8koh用詔書一封，寄hō͘管理王ê樹林ê官A-sat，kah伊hō͘我柴料，thang做殿邊營盤ê門，kap城牆，kap我所beh tòa ê厝ê路用。王就准我所求ê，因為我ê上帝施恩ê手幫贊我。koh ēng chiàu-su chi̍t-hong, kià hō͘ koán-lí ông ê chhiū-nâ ê koaⁿ A-sat, kah i hō͘ góa chhâ-liāu, thang chòe tiān-piⁿ iâⁿ-pôaⁿ ê mn̂g, kap siâⁿ-chhiûⁿ, kap góa só͘ beh tòa ê chhù ê lō͘-ēng. Ông chiū chún góa só͘ kiû ê, in-ūi góa ê Siōng-tè si-un ê chhiú pang-chān góa.

9王派kúi-nā ê兵頭，kap馬兵kap我去。我到河外hiah-ê總督hia，將王ê詔書交hō͘ in。Ông phài kúi-nā ê peng-thâu, kap bé-peng kap góa khì. Góa kàu Hô-gōa hiah ê chóng-tok hia, chiong ông ê chiàu-su kau hō͘ in.

10Hô-lûn人Chham-pa-la̍h，kap做奴才ê A-bûn人To-pí-ngá聽見有人來beh為以色列人圖謀利益，就真擘腹。Hô-lûn lâng Chham-pa-la̍h, kap chòe lô͘-châi ê A-bûn lâng To-pí-ngá thiaⁿ-kìⁿ ū lâng lâi beh ūi Í-sek-lia̍t lâng tô͘-bô͘ lī-ek, chiū chin peh-pak.

11我到耶路撒冷，tiàm hia三日。Góa kàu Iâ-lō͘-sat-léng, tiàm hia saⁿ-ji̍t.

12我透暝起來，有kúi-nā人kap我相kap；總是我ê上帝感動我ê心所beh為耶路撒冷做ê，我並無kā人講；除我騎ê cheng-siⁿ以外，也無別隻 cheng-siⁿ kap我去。Góa thàu-mî khí-lâi, ū kúi-nā lâng kap góa saⁿ-kap; chóng-sī góa ê Siōng-tè kám-tōng góa ê sim só͘ beh ūi Iâ-lō͘-sat-léng chòe-ê, góa pēng-bô kā lâng kóng; tû góa khiâ ê cheng-siⁿ í-gōa, iā bô pa̍t chiah cheng-siⁿ kap góa khì.

13我透暝tùi山谷門出去，到lêng井ê頭前，也到糞埽門，觀察耶路撒冷ê城牆，看見城牆拆毀，城門hō͘火燒去。Góa thàu-mî tùi soaⁿ-kok mn̂g chhut-khì, kàu lêng-chíⁿ ê thâu-chêng, iā kàu pùn-sò mn̂g, koan-chhat Iâ-lō͘-sat-léng ê siâⁿ-chhiûⁿ, khòaⁿ-kìⁿ siâⁿ-chhiûⁿ thiah-húi, siâⁿ-mn̂g hō͘ hé sio--khì.

14我koh進前去到水泉ê門，kap王ê池；總是tī-hia無一位á thang hō͘我騎ê cheng-siⁿ過去。Góa koh chìn-chêng khì kàu chúi-chôaⁿ ê mn̂g, kap ông ê tî; chóng-sī tī-hia bô chi̍t-ūi-á thang hō͘ góa khiâ ê cheng-siⁿ kè-khì.

15Tùi án-ni，我透暝沿溪上去，觀察城牆，koh oa̍t-tńg身，tùi山谷ê門入去，chiah tò來。Tùi án-ni, góa thàu-mî iân khoe chiūⁿ-khì, koan-chhat siâⁿ-chhiûⁿ, koh oa̍t-tńg-sin, tùi soaⁿ-kok ê mn̂g ji̍p-khì, chiah tò-lâi.

16Hiah-ê官長m̄知我去toh落，做甚麼事；我iáu未有kā猶大ê百姓、祭司、貴族、官長，kap其餘做工ê人講。Hiah ê koaⁿ-tiúⁿ m̄-chai góa khì toh-lo̍h, chòe sím-mi̍h sū; góa iáu-bē ū kā Iû-tāi ê peh-sìⁿ, chè-si, kùi-cho̍k, koaⁿ-tiúⁿ, kap kî-û chòe-kang ê lâng kóng.

17後來我kā in講，咱所tú-tio̍h ê患難，耶路撒冷怎樣拋荒，城門hō͘火燒，lín lóng看見；來ah，咱koh起耶路撒冷ê城牆，免得咱koh受凌辱。Āu-lâi góa kā in kóng, Lán só͘ tú-tio̍h ê hoān-lān, Iâ-lō͘-sat-léng cháiⁿ-iūⁿ pha-hng, siâⁿ-mn̂g hō͘ hé sio, lín lóng khòaⁿ-kìⁿ; lâi ah, lán koh khí Iâ-lō͘-sat-léng ê siâⁿ-chhiûⁿ, bián-tit lán koh siū lêng-jio̍k.

18我kā in講我ê上帝ê手怎樣幫贊我，kap王對我講甚麼話；in講，咱起來起造。Tùi án-ni，in奮勇做chit-ê好ê工。Góa kā in kóng góa ê Siōng-tè ê chhiú cháiⁿ-iūⁿ pang-chān góa, kap ông tùi góa kóng sím-mi̍h ōe; in kóng, Lán khí-lâi khí-chō. Tùi án-ni in hùn-ióng chòe chit ê hó ê kang.

19總是Hô-lûn人Chham-pa-la̍h kap做奴僕ê A-bûn人To-pí-ngá，kap阿拉伯人Ki-siān，聽見就恥笑阮，看輕阮，講，Lín所做是甚麼？beh背叛王mah？Chóng-sī Hô-lûn lâng Chham-pa-la̍h kap chòe lô͘-po̍k ê A-bûn lâng To-pí-ngá, kap A-la̍h-pek lâng Ki-siān, thiaⁿ-kìⁿ chiū thí-chhiò goán, khòaⁿ-khin goán, kóng, Lín só͘ chòe sī sím-mi̍h? beh pōe-poān ông mah?

20我應in講，天頂ê上帝伊beh hō͘阮興起；阮做伊ê奴僕ê beh起來起造；總是lín tī耶路撒冷無份，無權，無名字。Góa ìn in kóng, Thiⁿ-téng ê Siōng-tè I beh hō͘ goán heng-khí; goán chòe I ê lô͘-po̍k--ê beh khí-lâi khí-chō; chóng-sī lín tī Iâ-lō͘-sat-léng bô-hūn, bô koân, bô miâ-jī.

1Hit時祭司頭Í-lī-a-si̍t，kap伊ê兄弟hiah-ê祭司，起來起造羊門，分別伊做聖，安hit-ê門扇，就是到Hap-bí-a ê守更樓，也到Hap-lâm-gia̍p ê守更樓，分別做聖。Hit-sî chè-si-thâu Í-lī-a-si̍t, kap i ê hiaⁿ-tī hiah ê chè-si, khí-lâi khí-chō iûⁿ-mn̂g, hun-piat i chòe-sèng, an hit ê mn̂g-sìⁿ, chiū-sī kàu Hap-bí-a ê chiú-kiⁿ-lâu, iā kàu Hap-lâm-gia̍p ê chiú-kiⁿ-lâu, hun-piat chòe-sèng.

2續接伊ê，是耶利哥人起造；接續伊ê，是Im-lī ê kiáⁿ Sat-khek起造。Chiap-sòa i--ê, sī Iâ-lī-ko lâng khí-chō; chiap-sòa i--ê, sī Im-lī ê kiáⁿ Sat-khek khí-chō.

3Hap-se-ná hiah-ê kiáⁿ起造魚門；hē伊ê楹，安伊ê門扇，kap伊ê鎖，伊ê栱。Hap-se-ná hiah ê kiáⁿ khí-chō hî-mn̂g; hē i ê îⁿ, an i ê mn̂g-sìⁿ, kap i ê só, i ê kông.

4續接伊ê，是Hap-ko-su ê孫，O͘-lī-a ê kiáⁿ，Bí-lī-boa̍t修理。續接伊ê，是Bí-sī-sat-pia̍t ê孫，Pí-lī-ka ê kiáⁿ，Bí-su-lân修理。續接伊ê，是Pa-ná ê kiáⁿ Sat-tok修理。Chiap-sòa i--ê, sī Hap-ko-su ê sun, O͘-lī-a ê kiáⁿ, Bí-lī-boa̍t siu-lí. Chiap-sòa i--ê, sī Bí-sī-sat-pia̍t ê sun, Pí-lī-ka ê kiáⁿ, Bí-su-lân siu-lí. Chiap-sòa i--ê, sī Pa-ná ê kiáⁿ Sat-tok siu-lí.

5續接伊ê，是Thê-ko-a人修理；總是in ê貴族無擔當in ê主ê工。Chiap-sòa i--ê, sī Thê-ko-a lâng siu-lí; chóng-sī in ê kùi-cho̍k bô tam-tng in ê chú ê kang.

6Pa-se-a ê kiáⁿ Iâ-hô-iâ-tāi，kap Pí-só͘-tāi ê kiáⁿ Bí-su-lân，修理舊門，hē伊ê楹，安伊ê門扇，kap伊ê鎖，伊ê栱。Pa-se-a ê kiáⁿ Iâ-hô-iâ-tāi, kap Pí-só͘-tāi ê kiáⁿ Bí-su-lân, siu-lí kū-mn̂g, hē i ê îⁿ, an i ê mn̂g-sìⁿ, kap i ê só, i ê kông.

7續接伊ê，是Ki-piàn人Bí-la̍h-thê，Bí-lûn人Ngá-tùn，kap Ki-piàn人，kap屬河外ê總督所管ê Bí-su-pa人修理。Chiap-sòa i--ê, sī Ki-piàn lâng Bí-la̍h-thê, Bí-lûn lâng Ngá-tùn, kap Ki-piàn lâng, kap sio̍k Hô-gōa ê chóng-tok só͘ koán ê Bí-su-pa lâng siu-lí.

8續接伊ê，是金匠Hap-hái-ngá ê kiáⁿ O͘-siat修理。續接伊ê，是做香料ê Hap-ná-nî-ngá修理；chiah-ê人堅固耶路撒冷，夠闊ê牆。Chiap-sòa i--ê, sī kim-chhiūⁿ Hap-hái-ngá ê kiáⁿ O͘-siat siu-lí. Chiap-sòa i--ê, sī chòe hiuⁿ-liāu ê Hap-ná-nî-ngá siu-lí; chiah ê lâng kian-kò͘ Iâ-lō͘-sat-léng, kàu khoah ê chhiûⁿ.

9續接伊ê，是管理耶路撒冷ê一半ê，Hō͘-jíⁿ ê kiáⁿ Lī-hoat-ngá修理。Chiap-sòa i--ê, sī koán-lí Iâ-lō͘-sat-léng ê chi̍t-pòaⁿ-ê, Hō͘-jíⁿ ê kiáⁿ Lī-hoat-ngá siu-lí.

10續接伊ê，是Hap-lō͘-boat ê kiáⁿ Iâ-tāi-ngá，tī家己ê厝對面修理。續接伊ê，是Hap-sa-nî ê kiáⁿ Hap-tu̍t修理。Chiap-sòa i-ê, sī Hap-lō͘-boat ê kiáⁿ Iâ-tāi-ngá, tī ka-kī ê chhù tùi-bīn siu-lí. Chiap-sòa i--ê, sī Hap-sa-nî ê kiáⁿ Hap-tu̍t siu-lí.

11Hap-lîm ê kiáⁿ Má-ki-ngá，kap Pa-hap-mô͘-ap ê kiáⁿ Hap-tu̍t，修理一段，以及火爐ê樓。Hap-lîm ê kiáⁿ Má-ki-ngá, kap Pa-hap-mô͘-ap ê kiáⁿ Hap-tu̍t, siu-lí chi̍t-tōaⁿ, í-ki̍p hé-lô͘ ê lâu.

12續接伊ê，是管理耶路撒冷hit一半ê。Hap-lô-hek ê kiáⁿ Sa-liông，kap伊hiah-ê cha-bó͘-kiáⁿ修理。chiap-sòa i--ê, sī koán-lí Iâ-lō͘-sat-léng hit chi̍t-pòaⁿ ê. Hap-lô-hek ê kiáⁿ Sa-liông, kap i hiah ê cha-bó͘-kiáⁿ siu-lí.

13Hap-lùn kap Sat-lô-a khiā起ê百姓修理山谷ê門，起造伊，安伊ê門扇，kap伊ê鎖，伊ê栱，以及城牆一千肘，到糞埽ê門。Hap-lùn kap Sat-lô-a khiā-khí ê peh-sìⁿ siu-lí soaⁿ-kok ê mn̂g, khí-chō i, an i ê mn̂g-sìⁿ, kap i ê só, i ê kông, í-ki̍p siâⁿ-chhiûⁿ chi̍t-chheng tiú, kàu pùn-sò ê mn̂g.

14管理Pek-hap-ki-lîm地ê Lī-kah ê kiáⁿ Má-ki-ngá修理糞埽門；起造伊，an伊ê門扇，kap伊ê鎖，伊ê栱。Koán-lí Pek-hap-ki-lîm tōe ê Lī-kah ê kiáⁿ Má-ki-ngá siu-lí pùn-sò mn̂g; khí-chō i, an i ê mn̂g-sìⁿ, kap i ê só, i ê kông.

15管理Bí-su-pa地ê，Kok-hô-se ê kiáⁿ Sa-lûn，修理水泉ê門；起造伊，蓋伊，安伊ê門扇，kap伊ê鎖，伊ê栱，以及óa近王園ê西羅亞池ê牆，到hit-ê tùi大衛城落來ê崎á。Koán-lí Bí-su-pa tōe--ê, Kok-hô-se ê kiáⁿ Sa-lûn, siu-lí chúi-chôaⁿ ê mn̂g; khí-chō i, khàm i, an i ê mn̂g-sìⁿ, kap i ê só, i ê kông, í-ki̍p óa-kūn ông-hn̂g ê Se-lô-a tî ê chhiûⁿ, kàu hit-ê tùi Tāi-pi̍t siâⁿ lo̍h-lâi ê kiā-á.

16續接伊ê是管理Pek-siok地ê一半，Ap-pok ê kiáⁿ 尼希米修理，到大衛墳墓ê對面，koh到開好ê池，以及勇士ê厝。Chiap-sòa i--ê sī koán-lí Pek-siok tōe ê chi̍t-pòaⁿ, Ap-pok ê kiáⁿ Nî-hi-bí siu-lí, kàu Tāi-pi̍t hûn-bōng ê tùi-bīn, koh kàu khui-hó ê tî, í-ki̍p ióng-sū ê chhù.

17續接伊ê是利未人Pa-nî ê kiáⁿ Lī-hông修理。續接伊ê是管理Ki-i-la̍h地ê一半。Hap-sa-pí-ngá 為伊所治理ê地來修理。Chiap-sòa i--ê sī Lī-bī lâng Pa-nî ê kiáⁿ Lī-hông siu-lí. Chiap-sòa i--ê sī koán-lí Ki-i-la̍h tōe ê chi̍t-pòaⁿ. Hap-sa-pí-ngá ūi i só͘ tī-lí ê tōe lâi siu-lí.

18續接伊ê就是in ê兄弟，管理Ki-i-la̍h地hit一半，Hi-ná-ta̍t ê kiáⁿ Pa-óa-i修理。Chiap-sòa i--ê chiū-sī in ê hiaⁿ-tī, koán-lí Ki-i-la̍h tōe hit chi̍t-pòaⁿ, Hi-ná-ta̍t ê kiáⁿ Pa-óa-i siu-lí.

19續接伊ê是管理Bí-su-pa-ê，Iâ-su-a ê kiáⁿ Í-siā修理一段，就是tī上去軍裝局ê對面oat角ê所在。Chiap-sòa i--ê sī koán-lí Bí-su-pa--ê, Iâ-su-a ê kiáⁿ Í-siā siu-lí chi̍t-tōaⁿ, chiū-sī tī chiūⁿ-khì kun-chong-ke̍k ê tùi-bīn oat-kak ê só͘-chāi.

20續接伊ê是Sat-pài ê kiáⁿ Pa-lio̍k，盡力修理一段，tùi oat角到祭司頭Í-lī-a-si̍t厝ê門。Chiap-sòa i-ê sī Sat-pài ê kiáⁿ Pa-lio̍k, chīn-la̍t siu-lí chi̍t-tōaⁿ, tùi oat-kak kàu chè-si-thâu Í-lī-a-si̍t chhù ê mn̂g.

21續接伊ê是Hap-ko-su ê孫O͘-lī-a ê kiáⁿ Bí-lī-boa̍t修理一段，對Í-lī-a-si̍t厝ê門，到Í-lī-a-si̍t厝ê盡頭。Chiap-sòa i--ê sī Hap-ko-su ê sun O͘-lī-a ê kiáⁿ Bí-lī-boa̍t siu-lí chi̍t-tōaⁿ, tùi I-lī-a-si̍t chhù ê mn̂g, kàu Í-lī-a-si̍t chhù ê chīn-thâu.

22續接伊ê是tiàm tī平洋ê人hiah-ê祭司修理伊。Chiap-sòa i--ê sī tiàm tī pîⁿ-iûⁿ ê lâng hiah ê chè-si siu-lí i.

23續接伊ê是便雅憫kap Hap-su̍t tī伊ê厝ê對面修理。續接伊ê是A-lân-nî ê孫Má-se-ngá ê kiáⁿ A-sat-lī-ngá tī伊ê厝ê附近修理。Chiap-sòa i--ê sī Piān-ngá-bín kap Hap-su̍t tī i ê chhù ê tùi-bīn siu-lí. Chiap-sòa i--ê sī A-lân-nî ê sun Má-se-ngá ê kiáⁿ A-sat-lī-ngá tī i ê chhù ê hū-kūn siu-lí.

24續接伊ê是Hi-ná-ta̍t ê kiáⁿ Pin-lōe修理一段，tùi A-sat-lī-ngá ê厝，到oat角，koh到城角。Chiap-sòa i--ê sī Hi-ná-ta̍t ê kiáⁿ Pin-lōe siu-lí chi̍t-tōaⁿ, tùi A-sat-lī-ngá ê chhù, kàu oat-kak, koh kàu siâⁿ-kak.

25O͘-sài ê kiáⁿ Pa-la̍h tī oat角ê對面，kap王高ê厝phòng出來ê守更樓，óa近護衛ê院hit一段。續接伊ê是Pa-lio̍k ê kiáⁿ Pí-tāi-ngá修理。O͘-sài ê kiáⁿ Pa-la̍h tī oat-kak ê tùi-bīn, kap ông koâiⁿ ê chhù phòng chhut-lâi ê chiú-kiⁿ-lâu, óa-kūn hō͘-ōe ê īⁿ hit chi̍t-tōaⁿ. Chiap-sòa i--ê sī Pa-lio̍k ê kiáⁿ Pí-tāi-ngá siu-lí.

26(Nî-thê-lêng tiàm-tī Gô-húi-le̍k，到ǹg東水門ê對面，kap phòng出來ê守更樓。)(Nî-thê-lêng tiàm-tī Gô-húi-le̍k, kàu ǹg-tang chúi-mn̂g ê tùi-bīn, kap phòng chhut-lâi ê chiú-kiⁿ-lâu.)

27續接伊ê是Thê-ko-a人koh修理一段，tī hit-ê phòng出來ê大樓對面，到Gô-húi-le̍k ê牆。Chiap-sòa i--ê sī Thê-ko-a lâng koh siu-lí chi̍t-tōaⁿ, tī hit ê phòng chhut-lâi ê tōa-lâu tùi-bīn, kàu Gô-húi-le̍k ê chhiûⁿ.

28Tī馬ê門ê頂面，hiah-ê祭司ta̍k-ê tī伊ê厝ê對面修理。Tī Bé ê mn̂g ê téng-bīn, hiah ê chè-si ta̍k-ê tī i ê chhù ê tùi-bīn siu-lí.

29續接伊ê是Im-be̍k ê kiáⁿ Sat-tok，tī家己ê厝ê對面修理。續接伊ê是顧守東門Si-ka-nî ê kiáⁿ Sī-má-ngá修理。Chiap-sòa i--ê sī Im-be̍k ê kiáⁿ Sat-tok, tī ka-kī ê chhù ê tùi-bīn siu-lí. Chiap-sòa i--ê sī kò͘-siú tang-mn̂g Si-ka-nî ê kiáⁿ Sī-má-ngá siu-lí.

30續接伊ê是Sī-lī-bí-ngá ê kiáⁿ Hap-ná-nî-ngá，kap撒拉ê第六kiáⁿ Hap-lùn，koh修理一段。續接伊ê是Pí-lī-ka ê kiáⁿ Bí-su-lân，tī伊ê房間ê對面修理。Chiap-sòa i--ê sī Sī-lī-bí-ngá ê kiáⁿ Hap-ná-nî-ngá, kap Sat-la̍h ê tē-la̍k kiáⁿ Hap-lùn, koh siu-lí chi̍t-tōaⁿ. Chiap-sòa i--ê sī Pí-lī-ka ê kiáⁿ Bí-su-lân, tī i ê pâng-keng ê tùi-bīn siu-lí.

31續接伊ê是金工Má-ki-ngá修理到Nî-thê-lêng kap seng-lí人ê厝，tī Hap-bí-hut-kah門ê對面，到城角ê樓。Chiap-sòa i--ê sī kim-kang Má-ki-ngá siu-lí kàu Nî-thê-lêng kap seng-lí lâng ê chhù, tī Hap-bí-hut-kah mn̂g ê tùi-bīn, kàu siâⁿ-kak ê lâu.

32金工kap seng-lí人修理，tùi城角ê流到羊門。Kim-kang kap seng-lí lâng siu-lí, tùi siâⁿ-kak ê lâu kàu Iûⁿ-mn̂g.

1Chham-pa-la̍h聽見阮起城牆，就大受氣，大痛恨恥笑猶大人。Chham-pa-la̍h thiaⁿ-kìⁿ goán khí siâⁿ-chhiûⁿ, chiū tōa siū-khì, tōa thòng-hūn thí-chhiò Iû-tāi lâng.

2Tī伊ê兄弟kap撒馬利亞ê軍兵ê面前講，chiah-ê軟弱ê猶大teh做甚麼，beh設法hō͘家己堅固mah？beh獻祭mah？beh一日成功mah？beh tùi土堆中the̍h出過火燒ê石頭來koh起mah？Tī i ê hiaⁿ-tī kap Sat-má-lī-a ê kun-peng ê bīn-chêng kóng, Chiah ê loán-jio̍k ê Iû-tāi teh chòe sím-mi̍h, beh siat-hoat hō͘ ka-kī kian-kò͘ mah? beh hiàn-chè mah? beh chi̍t ji̍t sêng-kong mah? beh tùi thô͘-tui tiong the̍h chhut kè hé-sio ê chio̍h-thâu lâi koh khí mah?

3A-bûn人To-pí-ngá khiā tī伊ê身邊講，In所起ê，若有一隻狐狸上去，就beh踏倒in ê石牆。A-bûn lâng To-pí-ngá khiā tī i ê sin-piⁿ kóng, In só͘ khí ê, nā ū chi̍t-chiah hô͘-lî chiūⁿ-khì, chiū beh ta̍h-tó in ê chio̍h-chhiûⁿ.

4阮ê上帝ah，求你聽，因為阮hō͘人看輕，求你hō͘ in ê譭謗歸tī in ê頭殼，hō͘ in tī受掠ê地tú-tio̍h搶劫；Goán ê Siōng-tè ah, kiû Lí thiaⁿ, in-ūi goán hō͘ lâng khòaⁿ-khin, kiû Lí hō͘ in ê húi-pòng kui tī in ê thâu-khak, hō͘ in tī siū-lia̍h ê tōe tú-tio̍h chhiúⁿ-kiap;

5莫得遮蓋in ê罪過，莫得hō͘ in ê罪惡tùi你ê面前擦消；因為in tī起造ê人ê面前激動你ê受氣。bo̍h-tit jia-khàm in ê chōe-kòa, bo̍h-tit hō͘ in ê chōe-ok tùi Lí ê bīn-chêng chhat-siau; in-ūi in tī khí-chō ê lâng ê bīn-chêng kek-tōng Lí ê siū-khì.

6Án-ni，阮起城牆，城牆就lóng連絡，高到一半，因為百姓有心teh做工。Án-ni, goán khí siâⁿ-chhiûⁿ, siâⁿ-chhiûⁿ chiū lóng liân-lo̍k, koâiⁿ kàu chi̍t-pòaⁿ, in-ūi peh-sìⁿ ū sim teh chòe-kang.

7Chham-pa-la̍h、To-pí-ngá、阿拉伯人、A-bûn人、A-si̍t-tu̍t人，聽見修理耶路撒冷城牆ê工teh進行，補塞破隙ê所在tú-á teh補塞，就真受氣；Chham-pa-la̍h, To-pí-ngá, A-la̍h-pek lâng, A-bûn lâng, A-si̍t-tu̍t lâng, thiaⁿ-kìⁿ siu-lí Iâ-lō͘-sat-léng siâⁿ-chhiûⁿ ê kang teh chìn-hêng, pó͘-that phòa-khiah ê só͘-chāi tú-á teh pó͘-that, chiū chin siū-khì;

8大家相kap計謀beh來攻擊耶路撒冷，hō͘ hit內面擾亂。tāi-ke saⁿ-kap kè-bô͘ beh lâi kong-kek Iâ-lō͘-sat-léng, hō͘ hí(**hit) lāi-bīn jiáu-loān.

9總是阮祈禱咱ê上帝，koh因為in ê緣故，就派人守望，日暝持防。Chóng-sī goán kî-tó lán ê Siōng-tè, koh in-ūi in ê iân-kò͘, chiū phài-lâng siú-bāng, ji̍t-mî tî-hông.

10猶大人講，Hāu-phiaⁿ-phè iáu-kú chōe，擔teh ê人已經無力，所以咱bōe能起城牆。Iû-tāi lâng kóng, Hāu-phiaⁿ-phè iáu-kú chōe, taⁿ-teh ê lâng í-keng bô la̍t, só͘-í lán bōe-ōe khí siâⁿ-chhiûⁿ.

11咱ê對敵koh bat講，趁in m̄知，無看見，咱入in中間，thâi死in，hō͘ in ê做工lóng soah。Lán ê tùi-te̍k koh bat kóng, Thàn in m̄-chai, bô khòaⁿ-kìⁿ, lán ji̍p in tiong-kan, thâi-sí in, hō͘ in ê chòe-kang lóng soah.

12Hiah-ê óa近對敵khiā起ê猶大人，十pái tùi ta̍k所在來見阮講，Lín的確tio̍h tò來阮chia。Hiah ê óa-kūn tùi-te̍k khiā-khí ê Iû-tāi lâng, cha̍p-pái tùi ta̍k só͘-chāi lâi kìⁿ goán kóng, Lín tek-khak tio̍h tò-lâi goán chia.

13所以我hō͘百姓，各照in ê宗族，kia̍h刀，kia̍h鎗，kia̍h弓ê，khiā tī城牆後低ê所在，空ê所在。Só͘-í góa hō͘ peh-sìⁿ, kok chiàu in ê chong-cho̍k, kia̍h-to, kia̍h-chhiuⁿ, kia̍h-keng--ê, khiā tī siâⁿ-chhiûⁿ-āu kē ê só͘-chāi, khang ê só͘-chāi.

14我觀察了，就起來kā貴族、官長，kap其餘ê百姓講，莫得驚in，tio̍h記得主是大koh thang驚ê；tio̍h為tio̍h lín ê兄弟，lín ê kiáⁿ，lín ê cha-bó͘-kiáⁿ，lín ê bó͘，lín ê厝宅來交戰。Góa koan-chhat-liáu, chiū khí-lâi kā kùi-cho̍k, koaⁿ-tiúⁿ, kap kî-û ê peh-sìⁿ kóng, Bo̍h-tit kiaⁿ in, tio̍h kì-tit Chú sī tōa koh thang kiaⁿ ê; tio̍h ūi-tio̍h lín ê hiaⁿ-tī, lín ê kiáⁿ, lín ê cha-bó͘-kiáⁿ, lín ê bó͘, lín ê chhù-the̍h lâi kau-chiàn.

15對敵聽見阮已經知，koh上帝也破壞in ê計畫，阮就lóng 倒tńg來到城牆hia，ta̍k人做in ê工。Tùi-te̍k thiaⁿ-kìⁿ goán í-keng chai, koh Siōng-tè iā phò-hoāi in ê kè-e̍k, goán chiū lóng tò-tńg--lâi kàu siâⁿ-chhiûⁿ hia, ta̍k-lâng chòe in ê kang.

16Tùi hit-tia̍p了後，我ê奴僕一半做工，一半kia̍h鎗、kōaⁿ藤牌、kia̍h弓、穿盔甲；官長lóng khiā tī猶大眾人ê後面。Tùi hit-tia̍p liáu-āu, góa ê lô͘-po̍k chi̍t-pòaⁿ chòe kang, chi̍t-pòaⁿ kia̍h-chhiuⁿ, kōaⁿ tîn-pâi, kia̍h-keng, chhēng khoe-kah; koaⁿ-tiúⁿ lóng khiā tī Iû-tāi chèng-lâng ê āu-bīn.

17起城牆ê，擔teh-ê，各擔in ê擔，一手做工，一手kia̍h軍器。Khí siâⁿ-chhiûⁿ--ê, taⁿ-teh--ê, kok taⁿ in ê tàⁿ, chi̍t-chhiú chòe-kang, chi̍t-chhiú kia̍h kun-khì.

18起造ê，ta̍k-ê,背刀照án-ni起造，pûn哨角ê tī我ê身邊。Khí-chō--ê, ta̍k-ê pē to chiàu án-ni khí-chō, pûn sàu-kak--ê tī góa ê sin-piⁿ.

19我kā chiah-ê貴族、官長，kap其餘ê百姓講，chit-ê工闊大，咱tī城牆頂分開，相離不止遠；Góa kā chiah ê kùi-cho̍k, koaⁿ-tiúⁿ, kap kî-û ê peh-sìⁿ kóng, Chit ê kang khoah-tōa, lán tī siâⁿ-chhiûⁿ-téng pun-khui, saⁿ-lī put-chí hn̄g;

20Lín無論tī toh落聽見哨角ê聲，就tio̍h聚集來到阮hia；咱ê上帝beh替咱交戰。Lín bô-lūn tī toh-lo̍h thiaⁿ-kìⁿ sàu-kak ê siaⁿ, chiū tio̍h chū-chi̍p lâi kàu goán hia; lán ê Siōng-tè beh thòe lán kau-chiàn.

21阮án-ni做工，in ê一半kia̍h鎗，tùi天phú光到星出現ê時。Goán án-ni chòe kang, in ê chi̍t-pòaⁿ kia̍h-chhiuⁿ, tùi thiⁿ-phú-kng kàu chhiⁿ chhut-hiān ê sî.

22Hit時我koh kā百姓講，ta̍k人kap伊ê奴僕tio̍h歇暝tī耶路撒冷ê內面，thang暝時保護阮，日時做工。Hit-sî góa koh kā peh-sìⁿ kóng, Ta̍k-lâng kap i ê lô͘-po̍k tio̍h hioh-mî tī Iâ-lō͘-sat-léng ê lāi-bīn, thang mî--sî pó-hō͘ goán, ji̍t--sî chòe-kang.

23Án-ni我kap我ê兄弟，我ê奴僕，kap tè我ê後衛兵，無一個thǹg衫，出去chhiūⁿ水ê也ta̍k-ê kia̍h ke-si。Án-ni góa kap góa ê hiaⁿ-tī, góa ê lô͘-po̍k, kap tè góa ê hō͘-ōe-peng, bô chi̍t-ê thǹg-saⁿ, chhut-khì chhiūⁿ-chúi--ê iā ta̍k-ê kia̍h ke-si.