1城牆起好，我已經安門，顧門ê，唱歌ê kap利未人，lóng派定tio̍h；Siâⁿ-chhiûⁿ khí-hó, góa í-keng an-mn̂g, kò͘-mn̂g--ê, chhiùⁿ-koa-ê kap Lī-bī lâng, lóng phài tiāⁿ-tio̍h;

2我就派我ê兄弟，kap管王宮ê Hap-ná-nî-ngá，管理耶路撒冷；因為伊是忠信koh敬畏上帝，贏過別人。góa chiū phài góa ê hiaⁿ-tī, kap koán ông-kiong ê Hap-ná-nî-ngá, koán-lí Iâ-lō͘-sat-léng; in-ūi i sī tiong-sìn koh kèng-ùi Siōng-tè, iâⁿ-kè pa̍t-lâng.

3我吩咐in講，thèng候日頭高ê時，chiah開耶路撒冷ê城門；人khiā-teh顧ê時，in tio̍h關門，你tio̍h閂(chhòaⁿ)伊，也tio̍h派耶路撒冷khiā起ê百姓顧守，ta̍k-ê照in ê班列tī in ê厝對面ê所在。Góa hoan-hù in kóng, Thèng-hāu ji̍t-thâu koâiⁿ ê sî, chiah khui Iâ-lō͘-sat-léng ê siâⁿ-mn̂g; lâng khiā-teh kò͘ ê sî, in tio̍h koaiⁿ-mn̂g, lí tio̍h chhòaⁿ--i, iā tio̍h phài Iâ-lō͘-sat-léng khiā-khí ê peh-sìⁿ kò͘-siú, ta̍k-ê chiàu in ê pan-lia̍t tī in ê chhù tùi-bīn ê só͘-chāi.

4城是闊大，總是其中百姓少，厝iáu未起。Siâⁿ sī khoah-tōa, chóng-sī kî-tiong peh-sìⁿ chió, chhù iáu-bē khí.

5我ê上帝感動我ê心，招集貴族、官長，kap百姓，照in ê世系來算伊。我chhē-tio̍h頭一pái上來ê人ê族譜，hit內面有記載；Góa ê Siōng-tè kám-tōng góa ê sim, chio-chi̍p kùi-cho̍k, koaⁿ-tiúⁿ, kap peh-sìⁿ, chiàu in ê sè-hē lâi sǹg--i. Góa chhē-tio̍h thâu-chi̍t pái chiūⁿ-lâi ê lâng ê cho̍k-phó͘, hit lāi-bīn ū kì-chài;

6前巴比倫王Nî-pò͘-kah-nî-sat掠到巴比倫ê，猶大省百姓中有人tùi受掠到ê所在tò來耶路撒冷kap猶大，ta̍k人tò去伊ê城；chêng Pa-pí-lûn ông Nî-pò͘-kah-nî-sat lia̍h kàu Pa-pí-lûn ê, Iû-tāi séng peh-sìⁿ-tiong ū lâng tùi siū-lia̍h kàu ê só͘-chāi tò-lâi Iâ-lō͘-sat-léng kap Iû-tāi, ta̍k-lâng tò-khì i ê siâⁿ;

7就是kap Só͘-lô-pa-pek、Iâ-su-a、尼希米、A-sat-lī-ngá、La̍h-bí、Ná-hap-má-nî、Bo̍k-tí-kái、Pit-san、Bí-su-pí-lia̍t、Pí-kek-óa-i、Nî-hông、Pa-ná，相kap tò來ê。 以色列百姓ê人額記tī下底；chiū-sī kap Só͘-lô-pa-pek , Iâ-su-a, Nî-hi-bí, A-sat-lī-ngá, La̍h-bí, Ná-hap-má-nî, Bo̍k-tí-kái, Pit-san, Bí-su-pí-lia̍t, Pí-kek-óa-i, Nî-hông, Pa-ná, saⁿ-kap tò-lâi ê. Í-sek-lia̍t peh-sìⁿ ê lâng-gia̍h kì tī ē-tóe;

8Pa-lio̍k ê後裔，兩千一百七十二人。Pa-lio̍k ê hō͘-è, nn̄g-chheng chi̍t-pah chhit-cha̍p-jī lâng.

9Sī-hoat-thê-ngá ê後裔，三百七十二人。Sī-hoat-thê-ngá ê hō͘-è, saⁿ-pah chhit-cha̍p-jī lâng.

10A-la̍h ê後裔，六百五十二人。A-la̍h ê hō͘-è, la̍k-pah gō͘-cha̍p-jī lâng.

11Pa-hap-mô͘-ap ê後裔，就是Iâ-su-a kap Iok-ap ê後裔，兩千八百十八人。Pa-hap-mô͘-ap ê hō͘-è, chiū-sī Iâ-su-a kap Iok-ap ê hō͘-è, nn̄g-chheng poeh-pah cha̍p-poeh lâng.

12Í-lân ê後裔，一千兩百五十四人。Í-lân ê hō͘-è, chi̍t-chheng nn̄g-pah gō͘-cha̍p-sì lâng.

13Sat-thó͘ ê後裔，八百四十五人。Sat-thó͘ ê hō͘-è, poeh-pah sì-cha̍p-gō͘ lâng.

14Sat-kái ê後裔，七百六十人。Sat-kái ê hō͘-è, chhit-pah la̍k-cha̍p lâng.

15Pin-lōe ê後裔，六百四十八人。Pin-lōe ê hō͘-è, la̍k-pah sì-cha̍p-poeh lâng.

16Pí-pài ê後裔，六百二十八人。Pí-pài ê hō͘-è, la̍k-pah jī-cha̍p-poeh lâng.

17Ap-kah ê後裔，兩千三百二十二人。Ap-kah ê hō͘-è, nn̄g-chheng saⁿ-pah jī-cha̍p-jī lâng.

18A-to-nî-kan ê後裔，六百六十七人。A-to-nî-kan ê hō͘-è, la̍k-pah la̍k-cha̍p-chhit lâng.

19Pí-kek-óa-i ê後裔，兩千連六十七人。Pí-kek-óa-i ê hō͘-è, nn̄g-chheng liân la̍k-cha̍p-chhit lâng.

20A-teng ê後裔，六百五十五人。A-teng ê hō͘-è, la̍k-pah gō͘-cha̍p-gō͘ lâng.

21A-te̍k ê後裔，屬Hi-se-ka ê，九十八人。A-te̍k ê hō͘-è, sio̍k Hi-se-ka ê, káu-cha̍p-poeh lâng.

22Hap-sūn ê後裔，三百二十八人。Hap-sūn ê hō͘-è, saⁿ-pah jī-cha̍p-poeh lâng.

23Pí-sai3e5後裔，三百二四人。Pí-sài ê hō͘-è, saⁿ-pah jī-sì lâng.

24Hap-la̍h ê後裔，一百十二人。Hap-la̍h ê hō͘-è, chi̍t-pah cha̍p-jī lâng.

25Ki-piàn人，九十五個。Ki-piàn lâng, káu-cha̍p-gō͘ ê.

26伯利恆人kap Nî-tô-hoat人，共一百八十八人。Pek-lī-hêng lâng kap Nî-tô-hoat lâng, kiōng chi̍t-pah poeh-cha̍p-poeh lâng.

27A-ná-tu̍t人，一百二十八個。A-ná-tu̍t lâng, chi̍t-pah jī-cha̍p-poeh ê.

28Pek-a-su-má-hut人，四十二個。Pek-a-su-má-hut lâng, sì-cha̍p-jī ê.

29Ki-lia̍t-iâ-lîm人，Ki-hui-la̍h人，Pí-lio̍k人，共七百四十三個。Ki-lia̍t-iâ-lîm lâng, Ki-hui-la̍h lâng, Pí-lio̍k lâng, kiōng chhit-pah sì-cha̍p-saⁿ ê.

30La̍h-má人kap Ka-pa人，共六百二十一個。La̍h-má lâng kap Ka-pa lâng, kiōng la̍k-pah jī-cha̍p-it ê.

31Be̍k-má人，一百二十二個。Be̍k-má lâng, chi̍t-pah jī-cha̍p-jī ê.

32Pek-te̍k-lī人kap Ai ê人，共一百二十三個。Pek-te̍k-lī lâng kap Ai ê lâng, kiōng chi̍t-pah jī-cha̍p-saⁿ ê.

33別ê Nî-pho ê人，五十二個。Pa̍t ê Nî-pho ê lâng, gō͘-cha̍p-jī ê.

34別ê Í-lân後裔，一千兩百五十四人。Pa̍t ê Í-lân hō͘-è, chi̍t chheng nn̄g-pah gō͘-cha̍p-sì lâng.

35Hap-lîm ê後裔，三百二十個。Hap-lîm ê hō͘-è, saⁿ-pah jī-cha̍p ê.

36耶利哥人，三百四十五個。Iâ-lī-ko lâng, saⁿ-pah sì-cha̍p-gō͘ ê.

37羅得人、Hap-tē人、O-lô人，共七百二十一個。Lô-tek lâng, Hap-tē lâng, O-lô lâng, kiōng chhit-pah jī-cha̍p-it ê.

38Se-ná人，三千九百三十個。Se-ná lâng, saⁿ-chheng káu-pah saⁿ-cha̍p ê.

39祭司；Iâ-su-a ê家，Iâ-tāi-ngá ê後裔，九百七十三人。Chè-si; Iâ-su-a ê ke, Iâ-tāi-ngá ê hō͘-è, káu-pah chhit-cha̍p-saⁿ lâng.

40Im-le̍k ê後裔，一千連五十二人。Im-be̍k ê hō͘-è, chi̍t-chheng liân gō͘-cha̍p-jī lâng.

41Pa-si-hō͘-jíⁿ ê後裔，一千兩百四十七人。Pa-si-hō͘-jíⁿ ê hō͘-è, chi̍t-chheng nn̄g-pah sì-cha̍p-chhit lâng.

42Hap-lîm ê後裔，一千連十七人。Hap-lîm ê hō͘-è, chi̍t-chheng liân cha̍p-chhit lâng.

43利未人；Hô-ta̍t-ui ê後裔，屬Iâ-su-a kap Kah-biat8e5後裔，七十四人。Lī-bī lâng; Hô-ta̍t-ui ê hō͘-è, sio̍k Iâ-su-a kap Kah-bia̍t ê hō͘-è, chhit-cha̍p-sì lâng.

44唱歌ê，A-sat ê後裔，一百四十八人。Chhiùⁿ-koa--ê, A-sat ê hō͘-è, chi̍t-pah sì-cha̍p-poeh lâng.

45顧門ê；Sa-liong5e5後裔，A-te̍k ê後裔，Ta̍t-bûn ê後裔，A-kok ê後裔，Hap-tí-tāi ê後裔，Sok-pài ê後裔，共一百三十八人。Kò͘-mn̂g--ê; Sa-liông ê hō͘-è, A-te̍k ê hō͘-è, Ta̍t-bûn ê hō͘-è, A-kok ê hō͘-è, Hap-tí-tāi ê hō͘-è, Sok-pài ê hō͘-è, kiōng chi̍t-pah saⁿ-cha̍p-poeh lâng.

46Nî-thê-lêng；Se-hap ê後裔，Hap-so͘-pa ê後裔，Tap-pa-gô ê後裔；Nî-thê-lêng; Se-hap ê hō͘-è, Hap-so͘-pa ê hō͘-è, Tap-pa-gô ê hō͘-è;

47Ki-lio̍k ê後裔、Se-a ê後裔、Pa-tùn ê後裔；Ki-lio̍k ê hō͘-è, Se-a ê hō͘-è, Pa-tùn ê hō͘-è;

48Lī-pa-ná ê後裔、Hap-ka-pa ê後裔、Sat-mái ê後裔；Lī-pa-ná ê hō͘-è, Hap-ka-pa ê hō͘-è, Sat-mái ê hō͘-è;

49哈蘭ê後裔、Kiat-tek ê後裔、Ka-hap ê後裔；Hap-lân ê hō͘-è, Kiat-tek ê hō͘-è, Ka-hap ê hō͘-è;

50Lī-a-ngá ê後裔、Lī-sin3e5後裔、Nî-ko-tāi ê後裔；Lī-a-ngá ê hō͘-è, Lī-sìn ê hō͘-è, Nî-ko-tāi ê hō͘-è;

51Ka-sàn ê後裔、O͘-sat ê後裔、Pa-se-a ê後裔；Ka-sàn ê hō͘-è, O͘-sat ê hō͘-è, Pa-se-a ê hō͘-è;

52Pí-sài ê後裔、Bí-o͘-lêng ê後裔、Nî-phó͘-心ê後裔；Pí-sài ê hō͘-è, Bí-o͘-lêng ê hō͘-è, Nî-phó͘-sim ê hō͘-è;

53Pa-pok ê後裔、Hap-kok-pa ê後裔、Hap-hut ê後裔；Pa-pok ê hō͘-è, Hap-kok-pa ê hō͘-è, Hap-hut ê hō͘-è;

54Pa-sé-lu̍t ê後裔、Bí-hi-tāi ê後裔、Hap-sa ê後裔；Pa-sé-lu̍t ê hō͘-è, Bí-hi-tāi ê hō͘-è, Hap-sa ê hō͘-è;

55Pa-kho ê後裔、Se-se-la̍h ê後裔、Tap-má ê後裔；Pa-kho ê hō͘-è, Se-se-la̍h ê hō͘-è, Tap-má ê hō͘-è;

56Nî-sè-a ê後裔、Hap-thê-發ê後裔。Nî-sè-a ê hō͘-è, Hap-thê-hoat ê hō͘-è.

57所羅門ê奴僕ê後裔；Só-thài ê後裔、Só-hui-lia̍t ê後裔、Pí-lō͘-tāi ê後裔；Só͘-lô-bûn ê lô͘-po̍k ê hō͘-è; Só-thài ê hō͘-è, Só-hui-lia̍t ê hō͘-è, Pí-lō͘-tāi ê hō͘-è;

58Ngá-la̍h ê後裔、Ta̍t-khun ê後裔、Kiat-tek ê後裔；Ngá-la̍h ê hō͘-è, Ta̍t-khun ê hō͘-è, Kiat-tek ê hō͘-è;

59Sī-hoat-thê-ngá ê後裔、Hap-thè ê後裔、Pho-hek-lia̍t-hap-su-pa-im ê後裔、A-bûn ê後裔。Sī-hoat-thê-ngá ê hō͘-è, Hap-thòe ê hō͘-è, Pho-hek-lia̍t-hap-su-pa-im ê hō͘-è, A-bûn ê hō͘-è.

60Nî-thê-lêng kap所羅門奴僕ê後裔，共三百九十二人。Nî-thê-lêng kap Só͘-lô-bûn lô͘-po̍k ê hō͘-è, kiōng saⁿ-pah káu-cha̍p-jī lâng.

61Tùi Te̍k-bí-la̍h、Te̍k-hap-sat、Ki-lio̍k、A-tùn、Im-be̍k上來ê，bōe能證明in ê宗族世系，真正是以色列人á m̄是。Tùi Te̍k-bí-la̍h, Te̍k-hap-sat, Ki-lio̍k, A-tùn, Im-be̍k chiūⁿ-lâi--ê, bōe-ōe chèng-bêng in ê chong-cho̍k sè-hē, chin-chiàⁿ sī Í-sek-lia̍t lâng á m̄-sī.

62In是Tē-lâi-ngá ê後裔、To-pí-ngá ê後裔、Nî-ko-tāi ê後裔，共六百四十二人。In sī Tē-lâi-ngá ê hō͘-è, To-pí-ngá ê hō͘-è, Nî-ko-tāi ê hō͘-è, kiōng la̍k-pah sì-cha̍p-jī lâng.

63祭司中，有Hap-pa-ngá ê後裔、Hap-ko-su ê後裔、Pa-se-lâi ê後裔；Pa-se來娶Ki-lia̍t人Pa-se-lâi ê cha-bó͘-kiáⁿ做bó͘，所以用in ê名來稱伊。Chè-si-tiong, ū Hap-pa-ngá ê hō͘-è, Hap-ko-su ê hō͘-è, Pa-se-lâi ê hō͘-è; Pa-se-lâi chhōa Ki-lia̍t lâng Pa-se-lâi ê cha-bó͘-kiáⁿ chòe bó͘, só͘-í ēng in ê miâ lâi chheng i.

64Chiah-ê家tī in ê族譜中chhē in ê世系，也chhē無，所以算做無清氣，m̄准in 當祭司ê職。Chiah ê ke tī in ê cho̍k-phó͘ tiong chhē in ê sè-hē, iā chhē-bô, só͘-í sǹg-chòe bô chheng-khì, m̄-chún in tng chè-si ê chit.

65總督kā in講，m̄-thang食至聖ê物，thèng候有O͘-lêng kap Thó͘-bêng ê祭司起來。Chóng-tok kā in kóng, m̄-thang chia̍h chì-sèng ê mi̍h, thèng-hāu ū O͘-lêng kap Thó͘-bêng ê chè-si khí-lâi.

66會眾共有四萬兩千三百六十人；Hōe-chiòng kiōng ū sì-bān nn̄g-chheng saⁿ-pah la̍k-cha̍p lâng;

67以外iáu有in ê奴僕女婢，七千三百三十七人，男女唱歌ê，有兩百四十五人；í-gōa iáu-ū in ê lô͘-po̍k lú-pī, chhit-chheng saⁿ-pah saⁿ-cha̍p-chhit lâng, lâm-lú chhiùⁿ-koa--ê, ū nn̄g-pah sì-cha̍p-gō͘ lâng;

68in ê馬，七百三十六隻；in ê騾，兩百四十五隻；in ê bé, chhit-pah saⁿ-cha̍p-la̍k chiah; in ê lô, nn̄g-pah sì-cha̍p-gō͘ chiah;

69駱駝，四百三十五隻；驢，六千七百二十隻。lo̍k-tô, sì-pah saⁿ-cha̍p-gō͘ chiah; lû, la̍k-chheng chhit-pah jī-cha̍p chiah.

70有族長kúi-nā人為tio̍h工程來獻。總督獻tī庫房ê金一千ta̍t-lī-khek，碗五十塊，祭司ê禮服五百三十領。Ū cho̍k-tiúⁿ kúi-nā lâng ūi-tio̍h kang-tiâⁿ lâi hiàn. Chóng-tok hiàn tī khò͘-pâng ê kim chi̍t-chheng ta̍t-lī-khek, óaⁿ gō͘-cha̍p tè, chè-si ê lé-ho̍k gō͘-pah saⁿ-cha̍p niá.

71Koh有族長獻入工程ê府庫，金兩萬ta̍t-lī-khek，銀兩千兩百bî-ná。Koh ū cho̍k-tiúⁿ hiàn ji̍p kang-tiâⁿ ê hú-khò͘, kim nn̄g-bān ta̍t-lī-khek, gûn nn̄g-chheng nn̄g-pah bî-ná.

72其餘ê百姓所獻ê金兩萬ta̍t-lī-khek，銀兩千bî-ná，祭司ê禮服六十七領。Kî-û ê peh-sìⁿ só͘ hiàn ê kim nn̄g-bān ta̍t-lī-khek, gûn nn̄g chheng bî-ná, chè-si ê lé-ho̍k la̍k-cha̍p-chhit niá.

73Tùi án-ni，祭司、利未人、顧門ê、唱歌ê，百姓中一部分ê人，Nî-thê-lêng，kap以色列眾人ta̍k-ê khiā起tī in ê城。Tùi án-ni chè-si, Lī-bī lâng, kò͘-mn̂g--ê, chhiùⁿ-koa--ê, peh-sìⁿ tiong chi̍t-pō͘-hūn ê lâng, Nî-thê-lêng, kap Í-sek-lia̍t chèng-lâng ta̍k-ê khiā-khí tī in ê siâⁿ.

1到第七月，以色列人已經khiā起in hiah-ê城。Hit時百姓親像一人lóng聚集tī水門前寬闊ê所在，請經學士，Í-su-la̍h，帶摩西律法ê冊來，就是耶和華所bat命令以色列ê。Kàu tē-chhit ge̍h, Í-sek-lia̍t lâng í-keng khiā-khí in hiah ê siâⁿ. Hit-sî peh-sìⁿ chhin-chhiūⁿ chi̍t-lâng lóng chū-chi̍p tī chúi-mn̂g-chêng khoan-khoah ê só͘-chāi, chhiáⁿ keng-ha̍k-sū, Í-su-la̍h, tòa Mô͘-se lu̍t-hoat ê chheh lâi, chiū-sī Iâ-hô-hoa só͘ bat bēng-lēng Í-sek-lia̍t ê.

2七月初一日，祭司Í-su-la̍h tòa律法到公會前，或男或女，以及見若聽了會曉得ê ê面前。Chhit-ge̍h chhoe-it ji̍t, chè-si Í-su-la̍h tòa lu̍t-hoat kàu kong-hōe chêng, he̍k lâm he̍k lú, í-ki̍p kìⁿ-nā thiaⁿ-liáu ōe hiáu tit--ê ê bīn-chêng.

3Tī水門前寬闊ê所在，tùi天光到日晝，tī眾男女kap hiah-ê能明白ê ê面前讀伊，百姓àⁿ耳孔聽律法ê冊。Tī chúi-mn̂g-chêng khoan-khoah ê só͘-chāi, tùi thiⁿ-kng kàu ji̍t-tàu, tī chèng lâm-lú kap hiah ê ōe bêng-pe̍k--ê ê bīn-chêng tha̍k i, peh-sìⁿ àⁿ hī-khang thiaⁿ lu̍t-hoat ê chheh.

4經學士Í-su-la̍h khiā tī in為tio̍h chit-ê事所備辦ê柴台頂；tī伊ê身邊有Má-tha-thê-ngá、Sī-má、A-nāi-ngá、O͘-lī-a、Hi-le̍k-ka、kap Má-se-ngá，khiā tī伊ê chiàⁿ-pêng；Pí-tāi-ná、Bí-sa-lī、Má-ki-ngá、Hap-sūn、Hap-poa̍t-tāi-ná、撒迦利亞，kap Bí-su-lân，khiā tī伊ê tò-pêng。Keng-ha̍k-sū Í-su-la̍h khiā tī in ūi-tio̍h chit ê sū só͘ pī-pān ê chhâ-tâi-téng; tī i ê sin-piⁿ ū Má-tha-thê-ngá, Sī-má, A-nāi-ngá, O͘-lī-a, Hi-le̍k-ka, kap Má-se-ngá, khiā tī i ê chiàⁿ-pêng; Pí-tāi-n[g]á, Bí-sa-lī, Má-ki-ngá, Hap-sūn, Hap-poa̍t-tāi-ná, Sat-ka-lī-a, kap Bí-su-lân, khiā tī i ê tò-pêng.

5Í-su-la̍h khiā tī眾百姓ê頂面，tī眾百姓ê目睭前掀開chit本冊；伊一下掀開，眾百姓就lóng起來khiā。Í-su-la̍h khiā tī chèng peh-sìⁿ ê téng-bīn, tī chèng peh-sìⁿ ê ba̍k-chiu-chêng hian-khui chit pún chheh; i chi̍t-ē hian-khui, chèng peh-sìⁿ chiū lóng khí-lâi khiā.

6Í-su-la̍h o-ló耶和華至大ê上帝；眾百姓lóng kia̍h起手，應講，A-bēng，A-bēng，就àⁿ頭，面ǹg地，敬拜耶和華。Í-su-la̍h o-ló Iâ-hô-hoa chì-tōa ê Siōng-tè; chèng peh-sìⁿ lóng kia̍h-khí chhiú, ìn kóng, A-bēng, A-bēng, chiū àⁿ-thâu, bīn ǹg tōe, kèng-pài Iâ-hô-hoa.

7Iâ-su-a、Pa-nî，Sī-lī-pí、Ngá-bín、A-kok、Sa-pí-thài、Ho[O]-tē-ngá、Má-se-ngá、Ki-lī-tha、A-sat-lī-ngá、Iok-sat-poa̍t、哈蘭、Pí-lâi-ngá，kap利未人，hō͘百姓明白律法；百姓lóng khiā tī伊ê所在。Iâ-su-a, Pa-nî, Sī-lī-pí, Ngá-bín, A-kok, Sa-pí-thài, Ho[O]-tē-ngá, Má-se-ngá, Ki-lī-tha, A-sat-lī-ngá, Iok-sat-poa̍t, Hap-lân, Pí-lâi-ngá, kap Lī-bī lâng, hō͘ peh-sìⁿ bêng-pe̍k lu̍t-hoat; peh-sìⁿ lóng khiā tī i ê só͘-chāi.

8In讀上帝律法ê冊到明白koh開拆hit-ê意思，hō͘百姓明白所讀ê。In tha̍k Siōng-tè lu̍t-hoat ê chheh kàu bêng-pe̍k koh khui-thiah hit ê ì-sù, hō͘ peh-sìⁿ bêng-pe̍k só͘ tha̍k ê.

9總督尼希米，kap做祭司ê經學士Í-su-la̍h，kap教示百姓ê利未人，對眾百姓講，今á日是耶和華lín上帝ê聖日；m̄-thang悲哀啼哭。因為眾百姓聽見律法ê話lóng啼哭。Chóng-tok Nî-hi-bí, kap chòe chè-si ê keng-ha̍k-sū Í-su-la̍h, kap kà-sī peh-sìⁿ ê Lī-bī lâng, tùi chèng peh-sìⁿ kóng, Kin-á-ji̍t sī Iâ-hô-hoa lín Siōng-tè ê sèng-ji̍t; m̄-thang pi-ai thî-khàu. In-ūi chèng peh-sìⁿ thiaⁿ-kìⁿ lu̍t-hoat ê ōe lóng thî-khàu.

10伊koh kā in講，去ah，lín去食肥ê物，lim甜ê味；無備辦物ê人，tio̍h分hō͘伊；因為今á日是咱ê主ê聖日；lín m̄-thang憂悶，因為tùi耶和華得tio̍h ê歡喜是lín ê能力。I koh kā in kóng, Khì ah, lín khì chia̍h pûi ê mi̍h, lim tiⁿ ê bī; bô pī-pān mi̍h ê lâng, tio̍h pun hō͘ i; in-ūi kin-á-ji̍t sī lán ê Chú ê sèng-ji̍t; lín m̄-thang iu-būn, in-ūi tùi Iâ-hô-hoa tit-tio̍h ê hoaⁿ-hí sī lín ê lêng-le̍k.

11Tùi án-ni，利未人安慰眾百姓講，Tio̍h靜靜，因為今á日是聖日；m̄-thang憂悶。Tùi án-ni Lī-bī lâng an-ùi chèng peh-sìⁿ kóng, Tio̍h chēng-chēng, in-ūi kin-á-ji̍t sī sèng-ji̍t; m̄-thang iu-būn.

12眾百姓就去lim食，也分物hō͘人，大歡喜；因為in明白所傳hō͘ in ê話。Chèng peh-sìⁿ chiū khì lim-chia̍h, iā pun mi̍h hō͘ lâng, tōa hoaⁿ-hí; in-ūi in bêng-pe̍k só͘ thoân hō͘ in ê ōe.

13隔日眾百姓ê族長、祭司，kap利未人，lóng聚集到經學士Í-su-la̍h hia，beh致意聽律法ê話。Keh-ji̍t chèng peh-sìⁿ ê cho̍k-tiúⁿ, chè-si, kap Lī-bī lâng, lóng chū-chi̍p kàu keng-ha̍k-sū Í-su-la̍h hia, beh tì-ì thiaⁿ lu̍t-hoat ê ōe.

14In看tio̍h律法中有記載耶和華託摩西命令以色列人，tio̍h tī七月ê節期tiàm tī草寮；In khòaⁿ-tio̍h lu̍t-hoat tiong ū kì-chài Iâ-hô-hoa thok Mô͘-se bēng-lēng Í-sek-lia̍t lâng, tio̍h tī chhit-ge̍h ê choeh-kî tiàm tī chháu-liâu;

15koh tio̍h tī ta̍k-ê城kap耶路撒冷宣傳報告講，Lín tio̍h出去山裡，取橄欖樹枝，野橄欖樹枝，kong-liam樹枝，棗樹枝，ām樹ê樹枝，來搭草寮照所記載ê。koh tio̍h tī ta̍k ê siâⁿ kap Iâ-lō͘-sat-léng soan-thoân pò-kò kóng, Lín tio̍h chhut-khì soaⁿ--nih, chhú kaⁿ-ná chhiū-ki, iá kaⁿ-ná chhiū-ki, kong-liam chhiū-ki, chó-chhiū-ki, ām-chhiū ê chhiū-ki, lâi tah chháu-liâu chiàu só͘ kì-chài ê.

16百姓就出去，帶樹枝來，ta̍k人tī家己ê厝頂tī院內，tī上帝殿ê院內，tī水門寬闊ê所在，tī Í-hoat-liân門寬闊ê所在，搭草寮。Peh-sìⁿ chiū chhut-khì, tòa chhiū-ki lâi, ta̍k-lâng tī ka-kī ê chhù-téng tī īⁿ-lāi, tī Siōng-tè tiān ê īⁿ-lāi, tī chúi-mn̂g khoan-khoah ê só͘-chāi, tī Í-hoat-liân mn̂g khoan-khoah ê só͘-chāi, tah chháu-liâu.

17Hiah-ê受掠去koh tò來ê會眾就搭草寮，坐tī草寮裡；因為tùi Lùn ê kiáⁿ約書亞ê時到chit日，以色列人m̄-bat án-ni行。Tùi án-ni，in大大歡喜。Hiah ê siū-lia̍h--khì koh tò-lâi ê hōe-chiòng chiū tah chháu-liâu, chē tī chháu-liâu--nih; in-ūi tùi Lùn ê kiáⁿ Iok-su-a ê sî kàu chit-ji̍t, Í-sek-lia̍t lâng m̄-bat án-ni kiâⁿ. Tùi án-ni in tōa-tōa hoaⁿ-hí.

18Tùi頭一日，到路尾日，Í-su-la̍h ta̍k日讀上帝ê律法。眾人守節七日，到第八日有嚴肅會，照定tio̍h ê例。Tùi thâu-chi̍t ji̍t, kàu lō͘-bé ji̍t, Í-su-la̍h ta̍k-ji̍t tha̍k Siōng-tè ê lu̍t-hoat. Chèng-lâng siú-choeh chhit-ji̍t, kàu tē-poeh ji̍t ū giâm-siok-hōe, chiàu tiāⁿ-tio̍h ê lē.

1Chit月二四日，以色列人聚集禁食，穿麻衫，sám火灰。Chit-ge̍h jī-sì ji̍t, Í-sek-lia̍t lâng chū-chi̍p kìm-chia̍h, chhēng môa-saⁿ, sám hé-hu.

2以色列ê後裔就kap一切外邦人隔開，khiā-teh認家己ê罪惡，kap in列祖ê罪過。Í-sek-lia̍t ê hō͘-è chiū kap it-chhè gōa-pang lâng keh-khui, khiā-teh jīn ka-kī ê chōe-ok, kap in lia̍t-chó͘ ê chōe-kòa.

3In khiā tī in ê所在，用hit日ê時間四份一，讀耶和華in ê上帝律法ê冊；koh用時間ê四份一認罪，敬拜耶和華in ê上帝。In khiā tī in ê só͘-chāi, ēng hit-ji̍t ê sî-kan sì-hūn-chi̍t, tha̍k Iâ-hô-hoa in ê Siōng-tè lu̍t-hoat ê chheh; koh ēng sî-kan ê sì-hūn-chi̍t jīn-chōe, kèng-pài Iâ-hô-hoa in ê Siōng-tè.

4Iâ-su-a、Pa-nî、Kah-bia̍t、Sī-pa-nî、Pò͘-nî、Sī-lī-pí、Pa-nî、Ki-ná-nî，khiā tī利未人ê台頂，大聲求叫耶和華in ê上帝。Iâ-su-a, Pa-nî, Kah-bia̍t, Sī-pa-nî, Pò͘-nî, Sī-lī-pí, Pa-nî, Ki-ná-nî, khiā tī Lī-bī lâng ê tâi-téng, tōa-siaⁿ kiû-kiò Iâ-hô-hoa in ê Siōng-tè.

5利未人Iâ-su-a、Kah-bia̍t、Pa-nî、Hap-sa-nî、Sī-lī-pí、O-tē-ngá、Sī-pa-nî、Pì-tha-hi-ngá，講，Lín tio̍h khiā起來o-ló耶和華lín ê上帝，tùi永遠到永遠。耶和華ah，你榮光ê名是應該o-ló ê，pôaⁿ過一切ê稱呼o-ló。Lī-bī lâng Iâ-su-a, Kah-bia̍t, Pa-nî, Hap-sa-nî, Sī-lī-pí, O-tē-ngá, Sī-pa-nî, Pì-tha-hi-ngá, kóng, Lín tio̍h khiā--khí-lâi o-ló Iâ-hô-hoa lín ê Siōng-tè, tùi éng-oán kàu éng-oán. Iâ-hô-hoa ah, Lí êng-kng ê miâ sī eng-kai o-ló ê, pôaⁿ-kè it-chhè ê chheng-ho͘ o-ló.

6你，獨獨你，是耶和華；你創造天，kap chiah-ê天ê天，kap天頂ê萬軍，地kap地上ê萬物，海kap海中ê萬物；這一切lóng是你所保存ê；天軍也敬拜你。Lí, to̍k-to̍k Lí, sī Iâ-hô-hoa; Lí chhòng-chō thiⁿ, kap chiah ê thiⁿ ê thiⁿ, kap thiⁿ-téng ê bān-kun, tōe kap tōe-chiūⁿ ê bān-mi̍h, hái kap hái-tiong ê bān-mi̍h; che it-chhè lóng sī Lí só͘ pó-chûn ê; thian-kun iā kèng-pài Lí.

7耶和華ah，你是上帝，bat揀選亞伯蘭，chhōa伊出Ka-le̍k-tí ê Ngô͘-jíⁿ，賞賜伊名叫亞伯拉罕。Iâ-hô-hoa ah, Lí sī Siōng-tè, bat kéng-soán A-pek-lân, chhōa i chhut Ka-le̍k-tí ê Ngô͘-jíⁿ, siúⁿ-sù i miâ kiò A-pek-la̍h-hán.

8你看伊ê心盡忠tī你ê面前，就kap伊立約，應允將迦南人、Hek人、A-mô͘-lī人、Pí-lī-sé人、Iâ-pò͘-su人、Kek-ka-sat人ê地hō͘伊ê後裔，koh有應驗你ê話；因為你是公義ê。Lí khòaⁿ i ê sim chīn-tiong tī Lí ê bīn-chêng, chiū kap i li̍p-iok, èng-ún chiong Ka-lâm lâng, Hek lâng, A-mô͘-lī lâng, Pí-lī-sé lâng, Iâ-pò͘-su lâng, Kek-ka-sat lâng ê tōe hō͘ i ê hō͘-è, koh ū èng-giām Lí ê ōe; in-ūi Lí sī kong-gī--ê.

9你bat看見阮ê列祖tī埃及所受ê困苦，聽in tī紅海邊ê哀求，Lí bat khòaⁿ-kìⁿ goán ê lia̍t-chó͘ tī Ai-ki̍p só͘ siū ê khùn-khó͘, thiaⁿ in tī Âng-hái piⁿ ê ai-kiû,

10就行神跡奇事，責罰法老kap伊ê眾人臣，以及伊國內ê眾百姓；因為你知in驕傲款待阮ê列祖，你就為家己得tio̍h名聲，親像今á日一樣。chiū kiâⁿ sîn-jiah kî-sū, chek-hoa̍t Hoat-ló kap i ê chèng jîn-sîn, í-ki̍p i kok-lāi ê chèng peh-sìⁿ; in-ūi Lí chai in kiau-ngō͘ khoán-thāi goán ê lia̍t-chó͘, Lí chiū ūi ka-kī tit-tio̍h miâ-siaⁿ, chhin-chhiūⁿ kin-á-ji̍t chi̍t-iūⁿ.

11你tī in ê面前分開海，hō͘ in tùi海中行乾地過去，追jip in ê，你hiat in tī深海，親像hiat石頭tī大水中。Lí tī in ê bīn-chêng pun-khui hái, hō͘ in tùi hái-tiong kiâⁿ ta-tōe kè-khì, tui-jip in--ê, Lí hiat in tī chhim-hái, chhin-chhiūⁿ hiat chio̍h-thâu tī tōa-chúi-tiong.

12又koh日時你用雲柱chhōa in，暝時你用火柱照光in所行ê路。Iū-koh ji̍t--sî Lí ēng hûn-thiāu chhōa in, mî--sî Lí ēng hé-thiāu chiò-kng in só͘ kiâⁿ ê lō͘.

13你也降臨tī西奈山，tùi天裡kap in講話，賞賜in正直ê法度，真實ê法度，好ê律例kap誡命；Lí iā kàng-lîm tī Se-nái soaⁿ, tùi thiⁿ--nih kap in kóng-ōe, siúⁿ-sù in chèng-ti̍t ê hoat-tō͘, chin-si̍t ê hoat-tō͘, hó ê lu̍t-lē kap kài-bēng;

14koh hō͘ in知你安歇ê聖日，也託你ê奴僕摩西用誡命、律例、法度，命令in；koh hō͘ in chai Lí an-hioh ê sèng-ji̍t, iā thok Lí ê lô͘-po̍k Mô͘-se ēng kài-bēng, lu̍t-lē, hoat-tō͘, bēng-lēng in;

15為tio̍h in iau，就tùi天賞賜米糧，為tio̍h in嘴乾，就tùi石磐出水，koh命令in去承接你所chiù-chōa beh hō͘ in ê地。ūi-tio̍h in iau, chiū tùi thiⁿ siúⁿ-sù bí-niû, ūi-tio̍h in chhùi-ta, chiū tùi chio̍h-pôaⁿ chhut-chúi, koh bēng-lēng in khì sêng-chiap Lí só͘ chiù-chōa beh hō͘ in ê tōe.

16總是in kap阮ê列祖行tāi-chì驕傲，硬in ê頷頸，無聽thàn你ê誡命，Chóng-sī in kap goán ê lia̍t-chó͘ kiâⁿ tāi-chì kiau-ngō͘, ngī in ê ām-kún, bô thiaⁿ-thàn Lí ê kài-bēng,

17m̄肯順thàn，也無記念你tī in中間所行ê奇事，竟然硬in ê頷頸，tī悖逆中家己設立首領，beh oat tò去in做奴才ê地。總是你是歡喜赦免人，有恩典、憐憫，無快快受氣，有滿滿慈愛ê上帝；也無放sak in。m̄-khéng sūn-thàn, iā bô kì-liām Lí tī in tiong-kan só͘ kiâⁿ ê kî-sū, kéng-jiân ngī in ê ām-kún, tī pōe-ge̍k tiong ka-kī siat-li̍p siú-léng, beh oat tò-khì in chòe lô͘-châi ê tōe. Chóng-sī Lí sī hoaⁿ-hí sià-bián lâng, ū un-tián, lîn-bín, bô khoài-khoài siū-khì, ū móa-móa chû-ài ê Siōng-tè; iā bô pàng-sak in.

18In雖然鑄一隻牛á，koh講，這是你ê上帝bat chhōa你出埃及ê，án-ni大大激動受氣；In sui-jiân chù chi̍t-chiah gû-á, koh kóng, Che sī lí ê Siōng-tè bat chhōa lí chhut Ai-ki̍p--ê, án-ni tōa-tōa kek-tōng siū-khì;

19你iáu-kú大施憐憫，無放sak in tī曠野；日時，雲柱無離開in，chhōa in行路；暝時，火柱也無離開in，照光in kap in所tio̍h行ê路。Lí iáu-kú tōa si lîn-bín, bô pàng-sak in tī khòng-iá; ji̍t-sî, hûn-thiāu bô lī-khui in, chhōa in kiâⁿ lō͘; mî-sî, hé-thiāu iā bô lī-khui in, chiò-kng in kap in só͘ tio̍h kiâⁿ ê lō͘.

20你也賞賜你好ê神來教示in，你ê má-ná猶原hō͘ in食無soah，為tio̍h in嘴乾，賞賜in水。Lí iā siúⁿ-sù Lí hó ê sîn lâi kà-sī in, Lí ê má-ná iû-goân hō͘ in chia̍h bô soah, ūi-tio̍h in chhùi-ta, siúⁿ-sù in chúi.

21Tī曠野四十年，你養飼in；in就無欠缺一項，in ê衫無破，in ê腳無phòng-phā。Tī khòng-iá sì-cha̍p nî Lí iúⁿ-chhī in; in chiū bô khiàm-kheh chi̍t-hāng, in ê saⁿ bô phòa, in ê kha bô phòng-phā.

22你將列邦kap hiah-ê百姓hō͘ in，分派in tī ta̍k角頭，in就得tio̍h Se-hông ê地，Hi-si̍t-pún王ê地，kap Pa-san王Go̍k ê地。Lí chiong lia̍t-pang kap hiah ê peh-sìⁿ hō͘ in, hun-phài in tī ta̍k kak-thâu, in chiū tit-tio̍h Se-hông ê tōe, Hi-si̍t-pún ông ê tōe, kap Pa-san ông Go̍k ê tōe.

23你加添in ê kiáⁿ孫親像天星ê罪，chhōa in到hit-ê地，就是你kā in ê列祖講，in beh入去承接ê。Lí ke-thiⁿ in ê kiáⁿ-sun chhin-chhiūⁿ thiⁿ-chhiⁿ ê chōe, chhōa in kàu hit ê tōe, chiū-sī Lí kā in ê lia̍t-chó͘ kóng, in beh ji̍p-khì sêng-chiap ê.

24Án-ni，in ê kiáⁿ孫入去承接hit-ê地，你tī in ê面前制壓hit所在khiā起ê百姓，就是迦南人，將in kap in ê君王，kap hit所在ê百姓，lóng交tī in ê手，hō͘ in chhut-chāi意思來款待in。Án-ni, in ê kiáⁿ-sun ji̍p-khì sêng-chiap hit ê tōe, Lí tī in ê bīn-chêng chè-ap hit só͘-chāi khiā-khí ê peh-sìⁿ, chiū-sī Ka-lâm lâng, chiong in kap in ê kun-ông, kap hit só͘-chāi ê peh-sìⁿ, lóng kau tī in ê chhiú, hō͘ in chhut-chāi ì-sù lâi khoán-thāi in.

25In取堅固ê城，肥ê土地，得tio̍h充滿ta̍k樣好物ê厝宅，開便便ê水井，葡萄園、橄欖園，果子樹chōe-chōe；in得tio̍h食飽，身體肥；因為你ê大恩心內快樂。In chhú kian-kò͘ ê siâⁿ, pûi ê thó͘-tōe, tit-tio̍h chhiong-móa ta̍k-iūⁿ hó-mi̍h ê chhù-the̍h, khui piān-piān ê chúi-chíⁿ, phû-tô-hn̂g, kaⁿ-ná-hn̂g, ké-chí-chhiū chōe-chōe; in tit-tio̍h chia̍h-pá, sin-thé pûi; in-ūi Lí ê tōa-un sim-lāi khoài-lo̍k.

26總是in m̄順thàn，竟然悖逆你，將你ê律法hiat tī ka-chiah後；你ê先知勸解in，beh hō͘ in歸向你，in就thâi死in；大大激動受氣。Chóng-sī in m̄ sūn-thàn, kéng-jiân pōe-ge̍k Lí, chiong Lí ê lu̍t-hoat hiat tī ka-chiah-āu; Lí ê sian-ti khoàn-kài in, beh hō͘ in kui-ǹg Lí, in chiū thâi-sí--in; tōa-tōa kek-tōng siū-khì.

27所以你交in tī對敵ê手，受in ê苦楚；in tú-tio̍h苦難ê時哀求你，你就tùi天àⁿ落聽，照你ê大憐憫，hō͘ in有拯救ê人，救in脫離對敵ê手。Só͘-í Lí kau in tī tùi-te̍k ê chhiú, siū in ê khó͘-chhó͘; in tú-tio̍h khó͘-lān ê sî ai-kiû Lí, Lí chiū tùi thiⁿ àⁿ-lo̍h thiaⁿ, chiàu Lí ê tōa lîn-bín, hō͘ in ū chín-kiù ê lâng, kiù in thoat-lī tùi-te̍k ê chhiú.

28總是in得tio̍h平安了後，koh tī你ê面前行pháiⁿ；所以你放sak in tī對敵ê手，hō͘對敵管轄in；in oa̍t倒tńg哀求你ê時，你猶原tùi天àⁿ落聽，ta̍uh-ta̍uh照你ê憐憫拯救in；Chóng-sī in tit-tio̍h pêng-an liáu-āu, koh tī Lí ê bīn-chêng kiâⁿ pháiⁿ; só͘-í Lí pàng-sak in tī tùi-te̍k ê chhiú, hō͘ tùi-te̍k koán-hat in; in oa̍t-tò-tńg ai-kiû Lí ê sî, Lí iû-goân tùi thiⁿ àⁿ-lo̍h thiaⁿ, ta̍uh-ta̍uh chiàu Lí ê lîn-bín chín-kiù in;

29koh勸解in，ài beh引chhōa in歸向你ê律法；總是in行tāi-chì驕傲，m̄聽thàn你ê誡命，干犯你hiah-ê法度，(人若行伊，beh對伊得tio̍h活ê，) oa̍t-tńg肩頭，硬頷頸，m̄肯聽thàn。koh khoàn-kài in, ài beh ín-chhōa in kui-ǹg Lí ê lu̍t-hoat; chóng-sī in kiâⁿ tāi-chì kiau-ngō͘, m̄ thiaⁿ-thàn Lí ê kài-bēng, kan-hoān Lí hiah ê hoat-tō͘, (lâng nā kiâⁿ i, beh tùi i tit-tio̍h oa̍h ê,) oa̍t-tńg keng-thâu, ngī ām-kún, m̄-khéng thiaⁿ-thàn.

30總是你chōe-chōe年寬容in，koh用你ê神託你hiah-ê先知來對in做干證，in猶原m̄聽thàn；所以你將in交tī列國ê百姓ê手。Chóng-sī Lí chōe-chōe nî khoan-iông in, koh ēng Lí ê sîn thok Lí hiah ê sian-ti lâi tùi in chòe kan-chèng, in iû-goân m̄ thiaⁿ-thàn; só͘-í Lí chiong in kau tī lia̍t-kok ê peh-sìⁿ ê chhiú.

31總是你tùi你ê大憐憫，無一盡滅in，也無放sak in；因為你是有恩典，有憐憫ê上帝。Chóng-sī Lí tùi Lí ê tōa lîn-bín, bô it-chīn bia̍t in, iā bô pàng-sak in; in-ūi Lí sī ū un-tián, ū lîn-bín ê Siōng-tè.

32Taⁿ阮ê上帝ah，你是至大，有權能，thang驚畏，守約，施慈愛ê上帝；阮ê君王、首領、祭司、先知，列祖kap你ê眾百姓，tùi亞述列王ê時到今á日所tú-tio̍h一切ê苦難，求你莫得掠做小khóa。Taⁿ goán ê Siōng-tè ah, Lí sī chì-tōa, ū koân-lêng, thang kiaⁿ-ùi, siú iok, si chû-ài ê Siōng-tè; goán ê kun-ông, siú-léng, chè-si, sian-ti, lia̍t-chó͘ kap Lí ê chèng peh-sìⁿ, tùi A-su̍t lia̍t-ông ê sî kàu kin-á-ji̍t só͘ tú-tio̍h it-chhè ê khó͘-lān, kiû Lí bo̍h-tit lia̍h-chòe sió-khóa.

33總是見若阮所tú-tio̍h-ê，你是公義；因為你所行ê是真實，阮所行ê是pháiⁿ。Chóng-sī kìⁿ-nā goán só͘ tú-tio̍h--ê, Lí sī kong-gī; in-ūi Lí só͘ kiâⁿ--ê sī chin-si̍t, goán só͘ kiâⁿ--ê sī pháiⁿ.

34阮ê君王、首領、祭司、列祖，lóng無遵守你ê律法，m̄聽thàn你ê誡命，kap你ê干證，就是你對in所干證ê話。Goán ê kun-ông, siú-léng, chè-si, lia̍t-chó͘, lóng bô chun-siú Lí ê lu̍t-hoat, m̄ thiaⁿ-thàn Lí ê kài-bēng, kap Lí ê kan-chèng, chiū-sī Lí tùi in só͘ kan-chèng ê ōe.

35In tī in ê本國，tī你賞賜in大福氣，kap你tī in面前所賞賜闊大肥súi ê地，無服事你，也無oa̍t-tńg離開in ê pháiⁿ所行。In tī in ê pún-kok, tī Lí siúⁿ-sù in tōa hok-khì, kap Lí tī in bīn-chêng só͘ siúⁿ-sù khoah-tōa pûi-súi ê tōe, bô ho̍k-sāi Lí, iā bô oa̍t-tńg lī-khui in ê pháiⁿ só͘ kiâⁿ.

36阮今á日做奴僕；你所賞賜阮列祖ê地，thang食伊ê果子，以及好ê物，看ah，阮tī chit-ê地做奴僕。Goán kin-á-ji̍t chòe lô͘-po̍k; Lí só͘ siúⁿ-sù goán lia̍t-chó͘ ê tōe, thang chia̍h i ê ké-chí, í-ki̍p hó ê mi̍h, khòaⁿ ah, goán tī chit ê tōe chòe lô͘-po̍k.

37Chit-ê地出chōe-chōe物，歸tī列王，就是你因為阮ê罪，你所設立來管轄阮ê，in chhut-chāi意思管轄阮ê身軀kap阮ê cheng-siⁿ；阮tú-tio̍h大患難。Chit ê tōe chhut chōe-chōe mi̍h, kui tī lia̍t-ông, chiū-sī Lí in-ūi goán ê chōe, Lí só͘ siat-li̍p lâi koán-hat goán-ê, in chhut-chāi ì-sù koán-hat goán ê sin-khu kap goán ê cheng-siⁿ; goán tú-tio̍h tōa hoān-lān.

38因為這一切ê事，阮立確實ê約，寫明伊；阮ê首領，利未人，kap祭司，lóng蓋印。In-ūi che it-chhè ê sū, goán li̍p khak-si̍t ê iok, siá-bêng i; goán ê siú-léng, Lī-bī lâng, kap chè-si, lóng khàm-ìn.