1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h用銀phah兩支號頭，用phah ê法來做，hō͘你用來聚集會眾，也hō͘ ta̍k營起身。Lí tio̍h ēng gûn phah nn̄g ki hō-thâu, ēng phah ê hoat lâi chòe, hō͘ lí ēng lâi chū-chi̍p hōe-chiòng, iā hō͘ ta̍k-iâⁿ khí-sin.

3Pûn hiah-ê ê時，全會眾人tio̍h到你hia，聚集tī會幕門口。Pûn hiah-ê ê sî, choân-hōe chèng-lâng tio̍h kàu lí hia, chū-chi̍p tī hōe-bō͘ mn̂g-kháu.

4若kan-ta pûn一支，眾首領，就是以色列ê族長，tio̍h聚集到你hia。Nā kan-ta pûn chi̍t-ki, chèng siú-léng, chiū-sī Í-sek-lia̍t ê cho̍k-tiúⁿ, tio̍h chū-chi̍p kàu lí hia.

5Pûn大聲ê時，東pêng所安ê營lóng tio̍h起身。Pûn tōa-siaⁿ ê sî, tang-pêng só͘ an ê iâⁿ lóng tio̍h khí-sin.

6第二pái pûn大聲ê時，南pêng所安ê營tio̍h起身；in beh起身的確pûn大聲。Tē-jī pái pûn tōa-siaⁿ ê sî, lâm-pêng só͘ an ê iâⁿ tio̍h khí-sin; in beh khí-sin tek-khak pûn tōa-siaⁿ.

7若beh聚集會眾，lín tio̍h pûn號頭，總是m̄-thang pûn大聲。Nā beh chū-chi̍p hōe-chiòng, lín tio̍h pûn hō-thâu, chóng-sī m̄-thang pûn tōa-siaⁿ.

8亞倫ê kiáⁿ孫做祭司ê，tio̍h pûn hiah-ê號頭；這beh做lín代代永遠ê例。A-lûn ê kiáⁿ-sun chòe chè-si ê, tio̍h pûn hiah ê hō-thâu; che beh chòe lín tāi-tāi éng-oán ê lē.

9Lín tī本地kap欺壓lín ê對敵交戰，就tio̍h用號頭pûn大聲，就tī耶和華lín ê上帝ê面前得tio̍h記念，也beh得tio̍h救脫離lín ê對敵。Lín tī pún-tōe kap khi-ap lín ê tùi-te̍k kau-chiàn, chiū tio̍h ēng hō-thâu pûn tōa-siaⁿ, chiū tī Iâ-hô-hoa lín ê Siōng-tè ê bīn-chêng tit-tio̍h kì-liām, iā beh tit-tio̍h kiù thoat-lī lín ê tùi-te̍k.

10也tī lín快樂ê日，kap節期，kap月ê初一，是tī lín獻燒祭kap謝恩祭ê時，也tio̍h pûn號頭；這lóng beh tī lín ê上帝ê面前做記念；我是耶和華lín ê上帝。Iā tī lín khoài-lo̍k ê ji̍t, kap choeh-kî, kap ge̍h ê chhoe-it, sī tī lín hiàn sio-chè kap siā-un-chè ê sî, iā tio̍h pûn hō-thâu; che lóng beh tī lín ê Siōng-tè ê bīn-chêng chòe kì-liām; Góa sī Iâ-hô-hoa lín ê Siōng-tè.

11第二年二月二十日，雲tùi證據ê會幕收chiūⁿ去。Tē-jī nî jī-ge̍h jī-cha̍p ji̍t, hûn tùi chèng-kù ê hōe-bō͘ siu chiūⁿ-khì.

12以色列人就照in ê路站起身，離開西奈ê曠野；雲停tī Pa-lân ê曠野。Í-sek-lia̍t lâng chiū chiàu in ê lō͘-chām khí-sin, lī-khui Se-nái ê khòng-iá; hûn thêng tī Pa-lân ê khòng-iá.

13這是in照耶和華託摩西所命令ê，頭一pái起身。Che sī in chiàu Iâ-hô-hoa thok Mô͘-se só͘ bēng-lēng-ê, thâu-chi̍t-pái khí-sin.

14照in ê軍隊做頭起身ê，是猶大族ê營ê大旗；軍隊ê統領是A-bí-ná-ta̍t ê kiáⁿ Ná-sūn。Chiàu in ê kun-tūi chòe-thâu khí-sin ê, sī Iû-tāi cho̍k ê iâⁿ ê tōa-kî; kun-tūi ê thóng-léng sī A-bí-ná-ta̍t ê kiáⁿ Ná-sūn.

15Í-sat-ka支派軍隊ê統領是So͘-ap ê kiáⁿ Ná-thán-gia̍p。Í-sat-ka chi-phài kun-tūi ê thóng-léng sī So͘-ap ê kiáⁿ Ná-thán-gia̍p.

16Se-pò͘-lûn ê支派軍隊ê統領是Hi-lûn ê kiáⁿ Í-lī-ap。Se-pò͘-lûn ê chi-phài kun-tūi ê thóng-léng sī Hi-lûn ê kiáⁿ Í-lī-ap.

17會幕就拆起來；扛會幕ê，Kek-sūn ê kiáⁿ孫kap Bí-la̍h-lī ê kiáⁿ孫起身行。Hōe-bō͘ chiū thiah-khí-lâi; kng hōe-bō͘-ê, Kek-sūn ê kiáⁿ-sun kap Bí-la̍h-lī ê kiáⁿ-sun khí-sin kiâⁿ.

18照伊ê軍隊，Liû-piān營ê大旗起身；伊ê軍隊ê統領是Sī-tiu-jíⁿ ê kiáⁿ Í-lī-siok。Chiàu i ê kun-tūi, Liû-piān iâⁿ ê tōa-kî khí-sin; i ê kun-tūi ê thóng-léng sī Sī-tiu-jíⁿ ê kiáⁿ Í-lī-siok.

19西門支派軍隊ê統領是So͘-lī-sa-tāi ê kiáⁿ Sī-lō͘-bia̍t。Se-biān chi-phài kun-tūi ê thóng-léng sī So͘-lī-sa-tāi ê kiáⁿ Sī-lō͘-bia̍t.

20Ka-tek支派軍隊ê統領是Tiu-jíⁿ ê kiáⁿ Í-lī-ngá-sat。Ka-tek chi-phài kun-tūi ê thóng-léng sī Tiu-jíⁿ ê kiáⁿ Í-lī-ngá-sat.

21Ko-hat人扛聖物ê起身行；in bē到ê事先，hiah-ê人會幕已經搭好。Ko-hat lâng kng sèng-mi̍h-ê khí-sin kiâⁿ; in bē kàu ê tāi-seng, hiah ê lâng hōe-bō͘ í-keng tah hó.

22照伊ê軍隊，Í-hoat-liân營ê大旗起身；伊ê軍隊ê統領是A-bí-hut ê kiáⁿ Í-lī-sa-má。Chiàu i ê kun-tūi, Í-hoat-liân iâⁿ ê tōa-kî khí-sin; i ê kun-tūi ê thóng-léng sī A-bí-hut ê kiáⁿ Í-lī-sa-má.

23Má-ná-se支派軍隊ê統領是Pí-tāi-siok ê kiáⁿ Ka-má-lia̍t。Má-ná-se chi-phài kun-tūi ê thóng-léng sī Pí-tāi-siok ê kiáⁿ Ka-má-lia̍t.

24便雅憫支派軍隊ê統領是Ki-to-nî ê kiáⁿ A-pí-tàn。Piān-ngá-bín chi-phài kun-tūi ê thóng-léng sī Ki-to-nî ê kiáⁿ A-pí-tàn.

25做chiah-ê營ê路尾隊ê，是Tàn ê營ê大旗，照伊ê軍隊起身；伊ê軍隊ê統領是A-bí-sa-tāi ê kiáⁿ A-hi-í-siā。Chòe chiah ê iâⁿ ê lō͘-bé tūi ê, sī Tàn ê iâⁿ ê tōa-kî, chiàu i ê kun-tūi khí-sin; i ê kun-tūi ê thóng-léng sī A-bí-sa-tāi ê kiáⁿ A-hi-í-siā.

26A-siat支派軍隊ê統領是Gô-lân ê kiáⁿ Phàⁿ-kiat。A-siat chi-phài kun-tūi ê thóng-léng sī Gô-lân ê kiáⁿ Phàⁿ-kiat.

27Ná-hut-tha-lī支派軍隊ê統領是Í-lâm ê kiáⁿ A-hi-la̍h。Ná-hut-tha-lī chi-phài kun-tūi ê thóng-léng sī Í-lâm ê kiáⁿ A-hi-la̍h.

28以色列人照伊ê軍隊起身，伊ê隊伍就是án-ni。Í-sek-lia̍t lâng chiàu i ê kun-tūi khí-sin, i ê tūi-ngó͘ chiū-sī án-ni.

29摩西對伊ê外戚米甸人Liû-jíⁿ ê kiáⁿ Hô-pa講：阮beh去耶和華所bat講：我用伊賞賜lín ê地，請你kap阮來去，阮beh好款待你；因為耶和華已經應允賜福氣hō͘以色列人。Mô͘-se tùi i ê gōa-chhek Bí-tiân lâng Liû-jíⁿ ê kiáⁿ Hô-pa kóng, Goán beh khì Iâ-hô-hoa só͘ bat kóng, Góa ēng i siúⁿ-sù lín ê tōe, chhiáⁿ lí kap goán lâi-khì, goán beh hó khoán-thāi lí; in-ūi Iâ-hô-hoa í-keng èng-ún sù hok-khì hō͘ Í-sek-lia̍t lâng.

30伊應講，我m̄去，我beh tò去我ê本地本族hia。I ìn kóng, Góa m̄ khì, góa beh tò-khì góa ê pún-tōe pún-cho̍k hia.

31摩西講：求你m̄-thang離開阮，因為你知阮tī曠野tio̍h怎樣紮營；你thang做阮ê目睭。Mô͘-se kóng, Kiû lí m̄-thang lī-khui goán, in-ūi lí chai goán tī khòng-iá tio̍h cháiⁿ-iūⁿ chat-iâⁿ; lí thang chòe goán ê ba̍k-chiu.

32你若beh kap阮去，見若耶和華所hō͘阮ê福氣，阮也的確án-ni hō͘你。Lí nā beh kap goán khì, kìⁿ-nā Iâ-hô-hoa só͘ hō͘ goán ê hok-khì, goán iā tek-khak án-ni hō͘ lí.

33In離開耶和華ê山，起身行三日ê路站；耶和華ê約櫃tī頭前行三日ê路站，kā in chhē安歇ê所在。In lī-khui Iâ-hô-hoa ê soaⁿ, khí-sin kiâⁿ saⁿ-ji̍t ê lō͘-chām; Iâ-hô-hoa ê iok-kūi tī thâu-chêng kiâⁿ saⁿ-ji̍t ê lō͘-chām, kā in chhē an-hioh ê só͘-chāi.

34In撤營起身，日時耶和華ê雲tī in ê頂面。In thiat-iâⁿ khí-sin, ji̍t-sî Iâ-hô-hoa ê hûn tī in ê téng-bīn.

35約櫃起身ê時，摩西就講：耶和華ah，求你起來；願你ê對敵四散；願怨恨你ê人tī你ê面前逃走。Iok-kūi khí-sin ê sî, Mô͘-se chiū kóng, Iâ-hô-hoa ah, kiû Lí khí-lâi; goān Lí ê tùi-te̍k sì-sòaⁿ; goān oàn-hūn Lí ê lâng tī Lí ê bīn-chêng tô-cháu.

36約櫃停ê時，伊就講：耶和華ah，求你tò來到以色列千千萬萬人ê中間。Iok-kūi thêng ê sî, i chiū kóng, Iâ-hô-hoa ah, kiû Lí tò-lâi kàu Í-sek-lia̍t chheng-chheng bān-bān lâng ê tiong-kan.

1眾百姓nga̍uh-nga̍uh念，in ê pháiⁿ話到耶和華ê耳孔；耶和華聽見就大受氣。耶和華ê火to̍h tī in中間，燒tī營ê邊角。Chèng peh-sìⁿ nga̍uh-nga̍uh-liām, in ê pháiⁿ-ōe kàu Iâ-hô-hoa ê hī-khang; Iâ-hô-hoa thiaⁿ-kìⁿ chiū tōa siū-khì. Iâ-hô-hoa ê hé to̍h tī in tiong-kan, sio tī iâⁿ ê piⁿ-kak.

2百姓tùi摩西哀求，摩西祈求耶和華；hit-ê火就熄。Peh-sìⁿ tùi Mô͘-se ai-kiû, Mô͘-se kî-kiû Iâ-hô-hoa; hit ê hé chiū sit.

3Hit所在就叫做Tha-pī-la̍h，因為耶和華ê火燒tī in中間。Hit só͘-chāi chiū kiò chòe Tha-pī-la̍h, in-ūi Iâ-hô-hoa ê hé sio tī in tiong-kan.

4In中間十色人大興起貪慾ê心；以色列人koh啼哭講：Chī-chūi hō͘阮肉thang食ah？In tiong-kan cha̍p-sek lâng tōa heng-khí tham-io̍k ê sim; Í-sek-lia̍t lâng koh thî-khàu kóng, Chī-chūi hō͘ goán bah thang chia̍h ah?

5阮記得tī埃及ê時，食魚免錢，也記得有黃瓜、絲瓜、韭菜、蔥á、蒜á。Goán kì-tit tī Ai-ki̍p ê sî, chia̍h hî bián chîⁿ, iā kì-tit ū n̂g-koe, si-koe, kú-chhài, chhang-á, soàn-á.

6Taⁿ阮ê精力枯焦(tâ)，無半項物；除má-ná以外，tī阮ê目睭前ê無別項物。Taⁿ goán ê cheng-le̍k ko͘-tâ, bô pòaⁿ-hāng mi̍h; tû má-ná í-gōa, tī goán ê ba̍k-chiu-chêng ê bô pa̍t-hāng mi̍h.

7Chit-ê má-ná親像莞荽(oân-sui)仁，款式親像珍珠ê款。Chit ê má-ná chhin-chhiūⁿ oân-sui-jîn, khoán-sit chhin-chhiūⁿ chin-chu ê khoán.

8百姓四界行拾伊，有ê用磨磨伊，有ê用臼舂伊，tī鼎裡pek做餅；滋味親像調和油ê食物。Peh-sìⁿ sì-kòe kiâⁿ khioh i, ū-ê ēng bō bō i, ū-ê ēng khū cheng i, tī tiáⁿ-ni̍h pek chòe piáⁿ; chu-bī chhin-chhiūⁿ tiau-hô iû ê chia̍h-mi̍h.

9暝時露水落tī營中，má-ná也tè伊落。Mî-sî lō͘-chúi lo̍h tī iâⁿ-tiong, má-ná iā tè i lo̍h.

10摩西聽見百姓ê ta̍k家ta̍k人tī家己ê布棚門口teh啼哭；耶和華大受氣，摩西也無歡喜。Mô͘-se thiaⁿ-kìⁿ peh-sìⁿ ê ta̍k-ke ta̍k-lâng tī ka-kī ê pò͘-pîⁿ mn̂g-kháu teh thî-khàu; Iâ-hô-hoa tōa siū-khì, Mô͘-se iā bô hoaⁿ-hí.

11摩西對耶和華講：你啥事pháiⁿ款待你ê奴僕；我怎樣無tī你ê面前得tio̍h恩典，你竟然用chiah-ê百姓ê擔hē tī我ê身上？Mô͘-se tùi Iâ-hô-hoa kóng, Lí siáⁿ-sū pháiⁿ khoán-thāi Lí ê lô͘-po̍k; góa cháiⁿ-iūⁿ bô tī Lí ê bīn-chêng tit-tio̍h un-tián, Lí kéng-jiân ēng chiah ê peh-sìⁿ ê tàⁿ hē tī góa ê sin-chiūⁿ?

12Chiah-ê百姓kiám是我懷孕ê？kiám是我生ê mah，你竟然對我講，抱in tī胸前，親像養飼gín-ná ê老父抱食奶ê嬰á，到tī你chiù-chōa賞賜in ê祖公ê地？Chiah ê peh-sìⁿ kiám sī góa hoâi-īn ê? Kiám sī góa siⁿ ê mah, Lí kéng-jiân tùi góa kóng, Phō in tī heng-chêng, chhin-chhiūⁿ iúⁿ-chhī gín-ná ê lāu-pē phō chia̍h-leng ê eⁿ-á, kàu tī Lí chiù-chōa siúⁿ-sù in ê chó͘-kong ê tōe?

13我beh tùi tah落得tio̍h肉hō͘ chiah-ê百姓？因為in lóng對我啼哭講：你tio̍h用肉hō͘阮，hō͘阮thang食。Góa beh tùi tah-lo̍h tit-tio̍h bah hō͘ chiah ê peh-sìⁿ? in-ūi in lóng tùi góa thî-khàu kóng, Lí tio̍h ēng bah hō͘ goán, hō͘ goán thang chia̍h.

14Chiah-ê百姓ê擔siuⁿ重，我家己擔當bōe起。Chiah ê peh-sìⁿ ê tàⁿ siuⁿ tāng, góa ka-kī tam-tng bōe khí.

15你若án-ni款待我，我若tī你ê面前得tio̍h恩典，求你即時kā我thâi死，免hō͘我看見本身ê苦情。Lí nā án-ni khoán-thāi góa, góa nā tī Lí ê bīn-chêng tit-tio̍h un-tián, kiû Lí chek-sî kā góa thâi-sí, bián hō͘ góa khòaⁿ-kìⁿ pún-sin ê khó͘-chêng.

16耶和華對摩西講：你tio̍h聚集以色列ê長老，七十人，來我chia，就是你所知做百姓ê長老kap官長ê，chhōa in到會幕，hō͘ in kap你khiā tī-hia。Iâ-hô-hoa tùi Mô͘-se kóng, Lí tio̍h chū-chi̍p Í-sek-lia̍t ê tiúⁿ-ló, chhit-cha̍p lâng, lâi Góa chia, chiū-sī lí só͘ chai chòe peh-sìⁿ ê tiúⁿ-ló kap koaⁿ-tiúⁿ ê, chhōa in kàu hōe-bō͘, hō͘ in kap lí khiā tī-hia.

17我beh降臨tī-hia kap你講話，也beh將降落tī你頂面ê神，也降落tī in；in就kap你相kap擔當百姓ê擔，免得你家己擔當。Góa beh kàng-lîm tī-hia kap lí kóng-ōe , iā beh chiong kàng-lo̍h tī lí téng-bīn ê sîn, iā kàng-lo̍h tī in; in chiū kap lí saⁿ-kap tam-tng peh-sìⁿ ê tàⁿ, bián-tit lí ka-kī tam-tng.

18也tio̍h kā百姓講：Lín tio̍h hō͘家己做聖，備辦明á日thang食肉，因為lín有啼哭hō͘耶和華聽見，講：Chī-chūi hō͘阮食肉？因為阮tī埃及真好；所以耶和華beh hō͘ lín肉，hō͘ lín thang食。Iā tio̍h kā peh-sìⁿ kóng, Lín tio̍h hō͘ ka-kī chòe-sèng, pī-pān bîn-á-ji̍t thang chia̍h-bah, in-ūi lín ū thî-khàu hō͘ Iâ-hô-hoa thiaⁿ-kìⁿ, kóng, Chī-chūi hō͘ goán chia̍h bah? in-ūi goán tī Ai-ki̍p chin hó; só͘-í Iâ-hô-hoa beh hō͘ lín bah, hō͘ lín thang chia̍h.

19Lín m̄是食一日、兩日、五日、十日、二十日；Lín m̄-sī chia̍h chi̍t-ji̍t, nn̄g ji̍t, gō͘-ji̍t, cha̍p ji̍t, jī-cha̍p ji̍t;

20beh食到一月日滿，到肉tùi lín ê鼻孔出來，hō͘ lín厭惡；因為lín棄sak tiàm-tī lín中間ê耶和華，tī伊ê面前啼哭講：阮啥事出埃及ah？beh chia̍h kàu chi̍t-ge̍h-ji̍t móa, kàu bah tùi lín ê phīⁿ-khang chhut-lâi, hō͘ lín iàm-ò͘ⁿ; in-ūi lín khì-sak tiàm-tī lín tiong-kan ê Iâ-hô-hoa, tī I ê bīn-chêng thî-khàu kóng, Goán siáⁿ-sū chhut Ai-ki̍p ah?

21摩西講：Chiah-ê kap我tiàm ê百姓，步行ê大人有六十萬，也你講：我beh hō͘ in食肉，hō͘ in thang食到一月日滿。Mô͘-se kóng, Chiah-ê kap góa tiàm ê peh-sìⁿ, pō͘-kiâⁿ ê tōa-lâng ū la̍k-cha̍p-bān, iā Lí kóng, Góa beh hō͘ in chia̍h bah, hō͘ in thang chia̍h kàu chi̍t-ge̍h-ji̍t móa.

22Kiám beh為in thâi羊群、牛群，hō͘ in食夠額？á是為tio̍h in聚集海內所有ê魚，hō͘ in食夠額mah？Kiám beh ūi in thâi iûⁿ-kûn, gû-kûn, hō͘ in chia̍h kàu-gia̍h? á-sī ūi-tio̍h in chū-chi̍p hái-lāi só͘ ū ê hî, hō͘ in chia̍h kàu-gia̍h mah?

23耶和華對摩西講：耶和華ê手kiám是短mah？Taⁿ你beh看我ê話，對你應驗á無。Iâ-hô-hoa tùi Mô͘-se kóng, Iâ-hô-hoa ê chhiú kiám sī té mah? Taⁿ lí beh khòaⁿ Góa ê ōe, tùi lí èng-giām á-bô.

24摩西出去將耶和華ê話kā百姓講；也招集百姓ê長老七十人，hō͘ in khiā tī布棚ê四圍。Mô͘-se chhut-khì chiong Iâ-hô-hoa ê ōe kā peh-sìⁿ kóng; iā chio-chi̍p peh-sìⁿ ê tiúⁿ-ló chhit-cha̍p lâng, hō͘ in khiā tī Pò͘-pîⁿ ê sì-ûi.

25耶和華tī雲中降臨，對摩西講話，將降落tī伊頂面ê神，也降落tī七十ê長老；神臨到in ê時，in就講先知ê話，以後就無koh講。Iâ-hô-hoa tī hûn-tiong kàng-lîm, tùi Mô͘-se kóng-ōe, chiong kàng-lo̍h tī i téng-bīn ê sîn, iā kàng-lo̍h tī chhit-cha̍p ê tiúⁿ-ló; sîn lîm-kàu in ê sî, in chiū kóng sian-ti ê ōe, í-āu chiū bô koh kóng.

26總是有兩人猶原tī營內，一個名叫I-lī-ta̍t，一個名叫Bí-ta̍t，in也記名在內，總是無到布棚hia；神臨到in，in就tī營內講先知ê話。Chóng-sī ū nn̄g-lâng iû-goân tī iâⁿ-lāi, chi̍t-ê miâ-kiò I-lī-ta̍t, chi̍t-ê miâ-kiò Bí-ta̍t, in iā kì-miâ chāi-lāi, chóng-sī bô kàu Pò͘-pîⁿ hia; sîn lîm-kàu in, in chiū tī iâⁿ-lāi kóng sian-ti ê ōe.

27有一個少年人走來kā摩西講：I-lī-ta̍t、Bí-ta̍t tī營內講先知ê話。Ū chi̍t ê siàu-liân lâng cháu-lâi kā Mô͘-se kóng, I-lī-ta̍t Bí-ta̍t tī iâⁿ-lāi kóng sian-ti ê ōe.

28跟隨摩西ê，Lùn ê kiáⁿ約書亞，就是受揀ê一人，講：請我ê主摩西禁止in。Kun-sûi Mô͘-se ê, Lùn ê kiáⁿ Iok-su-a, chiū-sī siū-kéng ê chi̍t-lâng, kóng, Chhiáⁿ góa ê chú Mô͘-se kìm-chí in.

29摩西對伊講，你替我妒忌(tò͘-khī)mah？願耶和華ê百姓lóng做先知，耶和華用伊ê神降落tī in ê頂面。Mô͘-se tùi i kóng, Lí thòe góa tò͘-khī mah? Goān Iâ-hô-hoa ê peh-sìⁿ lóng chòe sian-ti, Iâ-hô-hoa ēng I ê sîn kàng-lo̍h tī in ê téng-bīn.

30摩西kap以色列ê長老就tò去營內。Mô͘-se kap Í-sek-lia̍t ê tiúⁿ-ló chiū tò-khì iâⁿ-lāi.

31有風tùi耶和華出，將鵪鶉tùi海裡吹來，墮落tī營邊，chit-pêng約略一日ê路站，hit-pêng約略一日ê路站，tī營ê四圍遍遍是，離地約略有兩肘。Ū hong tùi Iâ-hô-hoa chhut, chiong ian-chhun tùi hái-ni̍h chhe-lâi, tūi-lo̍h tī iâⁿ-piⁿ, chit-pêng iok-lio̍k chi̍t-ji̍t ê lō͘-chām, hit-pêng iok-lio̍k chi̍t-ji̍t ê lō͘-chām, tī iâⁿ ê sì-ûi piàn-piàn sī, lī tōe iok-lio̍k ū nn̄g tiú.

32百姓起來，thong日thong暝，kap隔日ê thong日，掠鵪鶉；極少ê也掠十hō-mûi-jíⁿ；為本身排列tī營ê四圍。Peh-sìⁿ khí-lâi, thong-ji̍t thong-mî, kap keh-ji̍t ê thong-ji̍t, lia̍h ian-chhun; ke̍k-chió-ê iā lia̍h cha̍p hō-mûi-jíⁿ; ūi pún-sin pâi-lia̍t tī iâⁿ ê sì-ûi.

33肉tī in ê嘴齒，iáu食bē了，耶和華就對百姓發受氣；耶和華降大災禍來phah百姓。Bah tī in ê chhùi-khí, iáu chia̍h bē liáu, Iâ-hô-hoa chiū tùi peh-sìⁿ hoat siū-khì; Iâ-hô-hoa kàng tōa chai-ē lâi phah peh-sìⁿ.

34Hit-ê所在號名叫Ki-phok-lô-hap-tha-óa，因為tī-hia埋葬貪慾ê百姓。Hit ê só͘-chāi hō-miâ kiò Ki-phok-lô-hap-tha-óa, in-ūi tī-hia bâi-chòng tham-io̍k ê peh-sìⁿ.

35百姓tùi Ki-phok-lô-hap-tha-óa行到Hap-sé-lio̍k；就tiàm tī Hap-sé-lio̍k。Peh-sìⁿ tùi Ki-phok-lô-hap-tha-óa kiâⁿ kàu Hap-sé-lio̍k; chiū tiàm tī Hap-sé-lio̍k.

1Bí-lī-àm kap亞倫嫌摩西，為tio̍h伊所chhōa Kó͘-si̍t ê cha-bó͘-kiáⁿ；因為摩西bat chhōa Kó͘-si̍t人ê cha-bó͘-kiáⁿ做bó͘。Bí-lī-àm kap A-lûn hiâm Mô͘-se, ūi-tio̍h i só͘ chhōa Kó͘-si̍t ê cha-bó͘-kiáⁿ; in-ūi Mô͘-se bat chhōa Kó͘-si̍t lâng ê cha-bó͘-kiáⁿ chòe bó͘.

2In講：耶和華kiám單單kap摩西講話？Kiám也無kap阮講話mah？Chit-ê話耶和華聽見。In kóng, Iâ-hô-hoa kiám toaⁿ-toaⁿ kap Mô͘-se kóng-ōe? Kiám iā bô kap goán kóng-ōe mah? Chit ê ōe Iâ-hô-hoa thiaⁿ-kìⁿ.

3Hit-ê摩西做人極其溫柔，贏過世上ê眾人。Hit ê Mô͘-se chòe-lâng ke̍k-kî un-jiû, iâⁿ-kè sè-chiūⁿ ê chèng-lâng.

4耶和華忽然對摩西、亞倫、Bí-lī-àm，講：Lín三人出來到會幕chia；in三人就出來。Iâ-hô-hoa hut-jiân tùi Mô͘-se A-lûn Bí-lī-àm, kóng, Lín saⁿ-lâng chhut-lâi kàu hōe-bō͘ chia; in saⁿ-lâng chiū chhut-lâi.

5耶和華tī雲柱中降臨，khiā tī布棚門口，召亞倫kap Bí-lī-àm；in兩人就出來。Iâ-hô-hoa tī hûn-thiāu-tiong kàng-lîm, khiā tī Pò͘-pîⁿ mn̂g-kháu, tiàu A-lûn kap Bí-lī-àm; in nn̄g lâng chiū chhut-lâi.

6伊講：Tio̍h聽我ê話；lín中間若有先知，我耶和華beh用異象hō͘ in bat我，tī眠夢中kap in講話。I kóng, Tio̍h thiaⁿ Góa ê ōe; lín tiong-kan nā ū sian-ti, Góa Iâ-hô-hoa beh ēng īⁿ-siōng hō͘ in bat Góa, tī bîn-bāng-tiong kap in kóng-ōe.

7我ê奴僕摩西m̄是án-ni；伊盡忠tī我ê全家。Góa ê lô͘-po̍k Mô͘-se m̄-sī án-ni; i chīn-tiong tī Góa ê choân-ke.

8我beh面tùi面kap伊講話，就是明明講：無用猜語；koh伊beh看見耶和華ê形容；lín嫌我ê奴僕摩西，啥事無驚ah？Góa beh bīn tùi bīn kap i kóng-ōe, chiū-sī bêng-bêng kóng, bô ēng chhai-gú; koh i beh khòaⁿ-kìⁿ Iâ-hô-hoa ê hêng-iông; lín hiâm Góa ê lô͘-po̍k Mô͘-se, siáⁿ-sū bô kiaⁿ ah?

9耶和華受氣in，就去。Iâ-hô-hoa siū-khì in, chiū khì.

10雲tùi布棚頂徙開；看ah，Bí-lī-àm thái-ko親像雪。亞倫看Bí-lī-àm，看ah，伊是thái-ko。Hûn tùi Pò͘-pîⁿ-téng sóa-khui; khòaⁿ ah, Bí-lī-àm thái-ko chhin-chhiūⁿ seh. A-lûn khòaⁿ Bí-lī-àm, khòaⁿ ah, i sī thái-ko.

11亞倫對摩西講：我ê主ah，求你莫得因為阮ê愚戇犯罪，將chit-ê罪歸tī阮。A-lûn tùi Mô͘-se kóng, Góa ê chú ah, kiû lí bo̍h-tit in-ūi goán ê gû-gōng hoān-chōe, chiong chit ê chōe kui tī goán.

12求你m̄-thang hō͘伊親像已經死，chiah tùi老母ê胎出，肉已經爛一半。Kiû lí m̄-thang hō͘ i chhin-chhiūⁿ í-keng sí, chiah tùi lāu-bú ê thai chhut, bah í-keng nōa chi̍t-pòaⁿ.

13摩西就哀求耶和華講：上帝ah，求你醫好伊。Mô͘-se chiū ai-kiû Iâ-hô-hoa kóng, Siōng-tè ah, kiû Lí i-hó i.

14耶和華對摩西講：設使伊ê老父phùi涎(nōa)tī伊ê面，伊kiám無見笑七日mah？Taⁿ tio̍h kā伊關tī營外七日，然後chiah thang chhōa伊入來。Iâ-hô-hoa tùi Mô͘-se kóng, Siat-sú i ê lāu-pē phùi-nōa tī i ê bīn, i kiám bô kiàn-siàu chhit-ji̍t mah? Taⁿ tio̍h kā i koaiⁿ tī iâⁿ-gōa chhit-ji̍t, jiân-āu chiah thang chhōa i ji̍p-lâi.

15Tùi án-ni，關Bí-lī-àm tī營外七日；百姓無起身，thèng候Bí-lī-àm koh入來。Tùi án-ni koaiⁿ Bí-lī-àm tī iâⁿ-gōa chhit-ji̍t; peh-sìⁿ bô khí-sin, thèng-hāu Bí-lī-àm koh ji̍p-lâi.

16後來百姓tùi Hap-sé-lio̍k起身，tī Pa-lân ê曠野安營。Āu-lâi peh-sìⁿ tùi Hap-sé-lio̍k khí-sin, tī Pa-lân ê khòng-iá an-iâⁿ.