1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h差人去偷看我所賜hō͘以色列人ê迦南地，tio̍h 對in祖公ta̍k支派中差一人，lóng是tī in中間做首領ê。Lí tio̍h chhe lâng khì thau-khòaⁿ Góa só͘ sù hō͘ Í-sek-lia̍t lâng ê Ka-lâm tōe, tio̍h tùi in chó͘-kong ta̍k chi-phài tiong chhe chi̍t-lâng, lóng sī tī in tiong-kan chòe siú-léng ê.

3摩西就照耶和華ê命令，tùi Pa-lân ê曠野差in去，in lóng是以色列人ê族長。Mô͘-se chiū chiàu Iâ-hô-hoa ê bēng-lēng, tùi Pa-lân ê khòng-iá chhe in khì, in lóng sī Í-sek-lia̍t lâng ê cho̍k-tiúⁿ.

4In ê名記tī下底；屬Liû-piān ê支派，Sat-khek ê kiáⁿ Sa-bó͘-a；In ê miâ kì tī ē-tóe; sio̍k Liû-piān ê chi-phài, Sat-khek ê kiáⁿ Sa-bó͘-a;

5屬西門ê支派，Hô-lī ê kiáⁿ Sa-hoat；sio̍k Se-biān ê chi-phài, Hô-lī ê kiáⁿ Sa-hoat;

6屬猶大ê支派，Iâ-hu-nî ê kiáⁿ迦勒；sio̍k Iû-tāi ê chi-phài, Iâ-hu-nî ê kiáⁿ Ka-le̍k;

7屬Í-sat-ka ê支派，約瑟ê kiáⁿ Í-ka；sio̍k Í-sat-ka ê chi-phài, Iok-sek ê kiáⁿ Í-ka;

8屬伊2-hoat-liân ê支派，Lùn ê kiáⁿ何西阿；sio̍k Í-hoat-liân ê chi-phài, Lùn ê kiáⁿ Hô-se-a;

9屬便雅憫ê支派，La̍h-hu ê kiáⁿ phàⁿ-thê；sio̍k Piān-ngá-bín ê chi-phài, La̍h-hu ê kiáⁿ Phàⁿ-thê;

10屬Se-pò͘-lûn ê支派，So-tí ê kiáⁿ Ka-tia̍p；sio̍k Se-pò͘-lûn ê chi-phài, So-tí ê kiáⁿ Ka-tia̍p;

11約瑟ê kiáⁿ孫，屬Má-ná-se ê支派，So͘-se ê kiáⁿ Ka-tí；Iok-sek ê kiáⁿ-sun, sio̍k Má-ná-se ê chi-phài, So͘-se ê kiáⁿ Ka-tí;

12屬Tàn ê支派，Ki-má-lī ê kiáⁿ A-bí-lī；sio̍k Tàn ê chi-phài, Ki-má-lī ê kiáⁿ A-bí-lī;

13屬A-siat ê支派，Bí-ka-le̍k ê kiáⁿ Se-thiap；sio̍k A-siat ê chi-phài, Bí-ka-le̍k ê kiáⁿ Se-thiap;

14屬Ná-hut-tha-lī ê支派，Po̍k-se ê kiáⁿ Ná-pí；sio̍k Ná-hut-tha-lī ê chi-phài, Po̍k-se ê kiáⁿ Ná-pí;

15屬Ka-tek ê支派，Má-ki ê kiáⁿ Kiū-lī。sio̍k Ka-tek ê chi-phài, Má-ki ê kiáⁿ Kiū-lī.

16Chiah-ê就是摩西所差去偷看hit-ê地ê人ê名。摩西就稱Lùn ê kiáⁿ何西阿做約書亞。Chiah-ê chiū-sī Mô͘-se só͘ chhe khì thau-khòaⁿ hit ê tōe ê lâng ê miâ. Mô͘-se chiū chheng Lùn ê kiáⁿ Hô-se-a chòe Iok-su-a.

17摩西差in去偷看迦南地，對in講，Lín tùi chit-ê南方上去，續peh上in ê山，Mô͘-se chhe in khì thau-khòaⁿ Ka-lâm tōe, tùi in kóng, Lín tùi chit ê lâm-hng chiūⁿ-khì, sòa peh-chiūⁿ in ê soaⁿ,

18看hit-ê地怎樣；其中所khiā ê百姓是強á是弱，是少á是chōe；khòaⁿ hit ê tōe cháiⁿ-iūⁿ; kî-tiong só͘ khiā ê peh-sìⁿ sī kiông á-sī jio̍k, sī chió á-sī chōe;

19所khiā起ê地是甚麼款，是好á是pháiⁿ；所khiā ê所在甚麼款，是營盤á是堅固ê城；só͘ khiā-khí ê tōe sī sím-mi̍h khoán, sī hó á-sī pháiⁿ; só͘ khiā ê só͘-chāi sím-mi̍h khoán, sī iâⁿ-pôaⁿ á-sī kian-kò͘ ê siâⁿ;

20koh看hit-ê地土怎樣，是肥á是sán；hit中間有樹木á無。Lín tio̍h好膽，將hit所在ê果子帶kóa-á來；hit時tú-á是葡萄起頭熟ê時。koh khòaⁿ hit ê tōe-thó͘ cháiⁿ-iūⁿ, sī pûi á-sī sán; hit tiong-kan ū chhiū-ba̍k á-bô. Lín tio̍h hó-táⁿ, chiong hit só͘-chāi ê ké-chí tòa kóa-á lâi; hit-sî tú-á sī phû-tô khí-thâu se̍k ê sî.

21In就去偷看hit-ê地，tùi Sîm ê曠野到Lī-ha̍p，到入Hap-má ê路口。In chiū khì thau-khòaⁿ hit ê tōe, tùi Sîm ê khòng-iá kàu Lī-ha̍p, kàu ji̍p Hap-má ê lō͘-kháu.

22In tùi南方上去，到Hi-pek-lûn；tī-hia有A-la̍p族ê人，A-hi-bān、Sī-su、That-mái。(Hi-pek-lûn城起造比埃及ê Só-an城khah早七年。)In tùi lâm-hng chiūⁿ-khì, kàu Hi-pek-lûn; tī-hia ū A-la̍p cho̍k ê lâng, A-hi-bān, Sī-su, That-mái. (Hi-pek-lûn siâⁿ khí-chō pí Ai-ki̍p ê Só-an siâⁿ khah-chá chhit-nî.)

23In到Í-si̍t-kok ê山谷，tùi-hia剉(chhò)葡萄樹一支，頂面有一葩(pha)葡萄，兩人用kǹg-á扛伊；koh帶kóa-á石榴，kap無花果來。In kàu Í-si̍t-kok ê soaⁿ-kok, tùi-hia chhò phû-tô-chhiū chi̍t-ki, téng-bīn ū chi̍t-pha phû-tô, nn̄g-lâng ēng kǹg-á kng i; koh tòa kóa-á sia̍h-liû, kap bû-hoa-kó lâi.

24因為以色列人tùi-hia剉一葩葡萄，hit所在chiah號做Í-si̍t-kok ê山谷。In-ūi Í-sek-lia̍t lâng tùi-hia chhò chi̍t pha phû-tô, hit só͘-chāi chiah hō-chòe Í-si̍t-kok ê soaⁿ-kok.

25In偷看hit-ê地四十日久chiah tò來。In thau-khòaⁿ hit ê tōe sì-cha̍p ji̍t kú chiah tò-lâi.

26到Pa-lân ê曠野ê Ka-te-su，見摩西、亞倫，kap以色列ê會眾，回復in kap全會；koh用hit所在ê果子hō͘ in看。Kàu Pa-lân ê khòng-iá ê Ka-te-su, kìⁿ Mô͘-se, A-lûn, kap Í-sek-lia̍t ê hōe-chiòng, hê-hok in kap choân-hōe; koh ēng hit só͘-chāi ê ké-chí hō͘ in khòaⁿ.

27Koh kā伊講，阮到你所差阮去ê地，果然是流奶kap蜜ê地；這就是hit-ê地ê果子。Koh kā i kóng, Goán kàu lí só͘ chhe goán khì ê tōe, kó-jiân sī lâu lin kap bi̍t ê tōe; che chiū-sī hit ê tōe ê ké-chí.

28總是hit所在ê百姓勇壯，城也堅固闊大；阮tī-hia也看見A-la̍p族。Chóng-sī hit só͘-chāi ê peh-sìⁿ ióng-chòng, siâⁿ iā kian-kò͘ khoah-tōa; goán tī-hia iā khòaⁿ-kìⁿ A-la̍p cho̍k.

29A-má-le̍k人tiàm tī南方；Hek人、Iâ-pò͘-su人、A-mô͘-lī人，tiàm tī山地；迦南人tiàm tī海邊，kap約旦河邊。A-má-le̍k lâng tiàm tī lâm-hng; Hek lâng, Iâ-pò͘-su lâng, A-mô͘-lī lâng, tiàm tī soaⁿ-tōe; Ka-lâm lâng tiàm tī hái-piⁿ, kap Iok-tàn hô-piⁿ.

30迦勒tī摩西ê面前安慰百姓，講：咱tio̍h立刻上去來得tio̍h hit所在；咱有夠額ê力能khah贏in。Ka-le̍k tī Mô͘-se ê bīn-chêng an-ùi peh-sìⁿ, kóng, Lán tio̍h li̍p-khek chiūⁿ-khì lâi tit-tio̍h hit só͘-chāi; lán ū kàu-gia̍h ê la̍t ōe khah-iâⁿ in.

31獨獨hiah-ê kap伊上去ê人講：咱bōe能上去攻擊hiah-ê百姓；因為in比咱khah勇壯。To̍k-to̍k hiah-ê kap i chiūⁿ-khì ê lâng kóng, Lán bōe-ōe chiūⁿ-khì kong-kek hiah ê peh-sìⁿ; in-ūi in pí lán khah ióng-chòng.

32In hiah-ê人，論所偷看ê地，對以色列人報pháiⁿ消息，講：阮所經過偷看ê地，是吞食hiah-ê khiā起ê百姓ê地；阮tī-hia所看見ê百姓lóng真大漢。In hiah ê lâng, lūn só͘ thau-khòaⁿ ê tōe, tùi Í-sek-lia̍t lâng pò pháiⁿ siau-sit, kóng, Goán só͘ keng-kè thau-khòaⁿ ê tōe, sī thun-chia̍h hiah ê khiā-khí ê peh-sìⁿ ê tōe; goán tī-hia só͘ khòaⁿ-kìⁿ ê peh-sìⁿ lóng chin tōa-hàn.

33阮tī-hia看見A-la̍p族人，就是大漢人，in是大漢人ê後裔；照阮看家己親像草蜢，照in看阮也是án-ni。Goán tī-hia khòaⁿ-kìⁿ A-la̍p cho̍k lâng, chiū-sī tōa-hàn lâng, in sī tōa-hàn lâng ê hō͘-è; chiàu goán khòaⁿ ka-kī chhin-chhiūⁿ chháu-meh, chiàu in khòaⁿ goán iā sī án-ni.

1會眾就出聲，大喉叫；hit暝百姓lóng啼哭。Hōe-chiòng chiū chhut-siaⁿ, tōa âu-kiò; hit-mî peh-sìⁿ lóng thî-khàu.

2以色列人哀怨摩西、亞倫；會眾對in講，M̄值tio̍h阮死tī埃及地！m̄值tio̍h死tī chit曠野！Í-sek-lia̍t lâng ai-oàn Mô͘-se A-lûn; hōe-chiòng tùi in kóng, M̄-ta̍t-tio̍h goán sí tī Ai-ki̍p tōe! m̄-ta̍t-tio̍h sí tī chit khòng-iá!

3耶和華啥事chhōa阮到chit所在，hō͘阮倒tī刀下ah？阮ê bó͘ kap kiáⁿ beh受掠；阮tò去埃及kiám無khah好mah？Iâ-hô-hoa siáⁿ-sū chhōa goán kàu chit só͘-chāi, hō͘ goán tó tī to-ē ah? Goán ê bó͘ kap kiáⁿ beh siū lia̍h; goán tò-khì Ai-ki̍p kiám bô khah-hó mah?

4In相kap講：咱tio̍h立一個首領，tò去埃及。In saⁿ-kap kóng, Lán tio̍h li̍p chi̍t ê siú-léng, tò-khì Ai-ki̍p.

5摩西、亞倫就仆落tī以色列全會眾人ê面前。Mô͘-se A-lûn chiū phak-lo̍h tī Í-sek-lia̍t choân-hōe chèng-lâng ê bīn-chêng.

6偷看地ê人ê中間，Lùn ê kiáⁿ約書亞，kap Iâ-hu-nî ê kiáⁿ迦勒，拆裂in ê衫；Thau-khòaⁿ tōe ê lâng ê tiong-kan, Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, thiah-li̍h in ê saⁿ;

7對以色列全會講：阮所經過偷看ê地，是極好ê地。tùi Í-sek-lia̍t choân-hōe kóng, Goán só͘ keng-kè thau-khòaⁿ ê tōe, sī ke̍k-hó ê tōe.

8耶和華若歡喜咱，就beh chhōa咱到hit-ê地，將地賞賜咱；hit-ê地是流奶kap蜜ê地。Iâ-hô-hoa nā hoaⁿ-hí lán, chiū beh chhōa lán kàu hit ê tōe, chiong tōe siúⁿ-sù lán; hit ê tōe sī lâu lin kap bi̍t ê tōe.

9總是lín m̄-thang背叛耶和華，也莫得驚hit所在ê百姓，因為in是做咱ê食物；koh致蔭in ê已經離開in；koh有耶和華kap咱tī-teh；m̄免驚in。Chóng-sī lín m̄-thang pōe-poān Iâ-hô-hoa, iā bo̍h-tit kiaⁿ hit só͘ -chāi ê peh-sìⁿ, in-ūi in sī chòe lán ê chia̍h-mi̍h; koh tì-ìm in ê í-keng lī-khui in; koh ū Iâ-hô-hoa kap lán tī-teh; m̄ bián kiaⁿ in.

10總是全會講：用石頭tìm死in。耶和華ê榮光tī會幕ǹg以色列人出現。Chóng-sī choân-hōe kóng, Ēng chio̍h-thâu tìm-sí in. Iâ-hô-hoa ê êng-kng tī hōe-bō͘ ǹg Í-sek-lia̍t lâng chhut-hiān.

11耶和華對摩西講：Chit-ê百姓看輕我beh到tī時ah？我tī in中間行這一切ê神蹟，in iáu-kú m̄信我，beh到tī時？Iâ-hô-hoa tùi Mô͘-se kóng, Chit ê peh-sìⁿ khòaⁿ-khin Góa beh kàu tī-sî ah? Góa tī in tiong-kan kiâⁿ che it-chhè ê sîn-jiah, in iáu-kú m̄-sìn Góa, beh kàu tī-sî?

12我beh用瘟疫來phah in，hō͘ in bōe得tio̍h承接業；hō͘你成做大國，比in khah強。Góa beh ēng un-e̍k lâi phah in, hō͘ in bōe tit-tio̍h sêng-chiap gia̍p; hō͘ lí chiâⁿ-chòe tōa-kok, pí in khah-kiông.

13摩西對耶和華講：Án-ni，埃及人beh聽見；因為你用你ê權能，chhōa chiah-ê百姓對in中間上來。Mô͘-se tùi Iâ-hô-hoa kóng, Án-ni, Ai-ki̍p lâng beh thiaⁿ-kìⁿ; in-ūi Lí ēng Lí ê koân-lêng, chhōa chiah ê peh-sìⁿ tùi in tiong-kan chiūⁿ-lâi.

14In beh用chiah-ê事kā chit所在khiā起ê人講。In已經聽見耶和華你tī chiah-ê百姓ê中間；因為耶和華你當面hō͘人看見，koh你ê雲停tī in ê頂面，你日時tī雲柱中，暝時tī火柱中，tī in ê面前行。In beh ēng chiah ê sū kā chit só͘-chāi khiā-khí ê lâng kóng. In í-keng thiaⁿ-kìⁿ Iâ-hô-hoa Lí tī chiah ê peh-sìⁿ ê tiong-kan; in-ūi Iâ-hô-hoa Lí tng-bīn hō͘ lâng khòaⁿ-kìⁿ, koh Lí ê hûn thêng tī in ê téng-bīn, Lí ji̍t-sî tī hûn-thiāu tiong, mî-sî tī hé-thiāu tiong, tī in ê bīn-chêng kiâⁿ.

15Taⁿ你若thâi死chiah-ê百姓，親像thâi死一人，hiah-ê聽見你ê名聲ê列國beh議論講：Taⁿ Lí nā thâi-sí chiah ê peh-sìⁿ, chhin-chhiūⁿ thâi-sí chi̍t-lâng, hiah ê thiaⁿ-kìⁿ Lí ê miâ-siaⁿ ê lia̍t-kok beh gī-lūn kóng,

16因為耶和華bōe能chhōa chiah-ê百姓入伊對in chiù-chōa應允ê地，所以tī曠野thâi死in。In-ūi Iâ-hô-hoa bōe-ōe chhōa chiah ê peh-sìⁿ ji̍p I tùi in chiù-chōa èng-ún ê tōe, só͘-í tī khòng-iá thâi-sí in.

17Taⁿ求主顯出大權能，照你所bat講ê，講：Taⁿ kiû Chú hián-chhut tōa koân-lêng, chiàu Lí só͘ bat kóng ê, kóng,

18耶和華無快受氣，koh有豐盛ê慈愛，赦免罪過過失，決斷無掠有罪ê做無罪，的確歸咎伊ê罪，tùi父到kiáⁿ，到三四代。Iâ-hô-hoa bô khoài siū-khì, koh ū hong-sēng ê chû-ài, sià-bián chōe-kòa kè-sit, koat-toàn bô lia̍h ū-chōe ê chòe bô chōe, tek-khak kui-kiū i ê chōe, tùi pē kàu kiáⁿ, kàu saⁿ-sì tāi.

19求你照你ê大慈愛赦免chit-ê百姓ê罪，親像你tùi埃及到taⁿ，常常赦免in一樣。Kiû Lí chiàu Lí ê tōa chû-ài sià-bián chit ê peh-sìⁿ ê chōe, chhin-chhiūⁿ Lí tùi Ai-ki̍p kàu taⁿ, siông-siông sià-bián in chi̍t-iūⁿ.

20耶和華講：我照你ê話有赦免in。Iâ-hô-hoa kóng, Góa chiàu lí ê ōe ū sià-bián in.

21總是我kí我ê活命來講：遍地beh充滿耶和華ê榮光。Chóng-sī Góa kí Góa ê oa̍h-miā lâi kóng, Piàn-tōe beh chhiong-móa Iâ-hô-hoa ê êng-kng.

22因為chiah-ê人有看見我ê榮光，以及我所行tī埃及kap曠野ê神蹟，iáu-kú試我十pái，m̄聽thàn我ê話；In-ūi chiah ê lâng ū khòaⁿ-kìⁿ Góa ê êng-kng, í-ki̍p Góa só͘ kiâⁿ tī Ai-ki̍p kap khòng-iá ê sîn-jiah, iáu-kú chhì Góa cha̍p-pái, m̄ thiaⁿ-thàn Góa ê ōe;

23in決斷bōe得tio̍h看見我對in ê列祖所chiù-chōa應允ê地；凡若看輕我ê lóng bōe得tio̍h看見。in koat-toàn bōe tit-tio̍h khòaⁿ-kìⁿ Góa tùi in ê lia̍t-chó͘ só͘ chiù-chōa èng-ún ê tōe; hoān-nā khòaⁿ-khin Góa-ê lóng bōe tit-tio̍h khòaⁿ-kìⁿ.

24獨獨我ê奴僕迦勒，因為伊另外有一個心志，完全tè我，我beh chhōa伊入伊所行到ê地，伊ê後裔也beh得tio̍h hit-ê地做業。To̍k-to̍k Góa ê lô͘-po̍k Ka-le̍k, in-ūi i lēng-gōa ū chi̍t ê sim-chì, oân-choân tè Góa, Góa beh chhōa i ji̍p i só͘ kiâⁿ-kàu ê tōe, i ê hō͘-è iā beh tit-tio̍h hit ê tōe chòe gia̍p.

25A-má-le̍k人kap迦南人tiàm tī山谷中；明á日lín tio̍h oa̍t倒tńg，tùi紅海ê路去曠野。A-má-le̍k lâng kap Ka-lâm lâng tiàm tī soaⁿ-kok tiong; bîn-á-ji̍t lín tio̍h oa̍t-tò-tńg, tùi Âng-hái ê lō͘ khì khòng-iá.

26耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

27Chiah-ê pháiⁿ ê會眾對我發出怨言，我吞忍in beh到tī時ah？以色列人哀怨我ê怨言，我lóng聽見lah。Chiah ê pháiⁿ ê hōe-chiòng tùi Góa hoat-chhut oàn-giân, Góa thun-lún in beh kàu tī-sî ah? Í-sek-lia̍t lâng ai-oàn Góa ê oàn-giân, Góa lóng thiaⁿ-kìⁿ lah.

28Tio̍h kā in講：耶和華講：我kí我ê活命來講：Lín hō͘我聽見ê話，我beh照án-ni款待lín。Tio̍h kā in kóng, Iâ-hô-hoa kóng, Góa kí Góa ê oa̍h-miā lâi kóng, Lín hō͘ Góa thiaⁿ-kìⁿ ê ōe, Góa beh chiàu án-ni khoán-thāi lín.

29Lín ê身屍beh倒tī chit曠野，見若lín中間計算ê人，照伊ê數額，tùi二十歲以上，對我出怨言ê，Lín ê sin-si beh tó tī chit khòng-iá, kìⁿ-nā lín tiong-kan kè-sǹg ê lâng, chiàu i ê siàu-gia̍h, tùi jī-cha̍p hè í-chiūⁿ, tùi Góa chhut oàn-giân ê,

30的確bōe得tio̍h入我chiù-chōa應允lín khiā起ê地；獨獨Iâ-hu-nî ê kiáⁿ迦勒，kap Lùn ê kiáⁿ約書亞，beh入去。tek-khak bōe tit-tio̍h ji̍p Góa chiù-chōa èng-ún lín khiā-khí ê tōe; to̍k-to̍k Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a, beh ji̍p-khì.

31總是lín ê gín-á，就是lín所講beh受掠ê，我beh chhōa in入去，in就知lín所棄sak hit-ê地。Chóng-sī lín ê gín-á, chiū-sī lín só͘ kóng beh siū-lia̍h ê, Góa beh chhōa in ji̍p-khì, in chiū chai lín só͘ khì-sak hit ê tōe.

32論到lín，lín ê身屍beh倒tī chit曠野。Lūn-kàu lín, lín ê sin-si beh tó tī chit khòng-iá.

33Lín ê kiáⁿ兒beh tī曠野漂流四十年，擔當lín淫行ê罪，直到lín ê身屍tī曠野消滅。Lín ê kiáⁿ-jî beh tī khòng-iá phiau-liû sì-cha̍p nî, tam-tng lín îm-hēng ê chōe, ti̍t-kàu lín ê sin-si tī khòng-iá siau-bia̍t.

34照lín偷看hit-ê地ê日子，共四十日，一日抵一年，lín tio̍h擔當罪四十年；lín就知我棄sak lín。Chiàu lín thau-khòaⁿ hit ê tōe ê ji̍t-chí, kiōng sì-cha̍p ji̍t, chi̍t-ji̍t tí chi̍t-nî, lín tio̍h tam-tng chōe sì-cha̍p nî; lín chiū chai Góa khì-sak lín.

35我耶和華已經講：我beh án-ni款待這一切聚集對敵我ê pháiⁿ會眾；in beh tī chit曠野消滅，死tī-chia。Góa Iâ-hô-hoa í-keng kóng, Góa beh án-ni khoán-thāi che it-chhè chū-chi̍p tùi-te̍k Góa ê pháiⁿ hōe-chiòng; in beh tī chit khòng-iá siau-bia̍t, sí tī-chia.

36摩西所差偷看hit-ê地，倒tńg來報hit所在ê pháiⁿ消息，致到全會哀怨伊；Mô͘-se só͘ chhe thau-khòaⁿ hit ê tōe, tò-tńg lâi pò hit só͘-chāi ê pháiⁿ siau-sit, tì-kàu choân-hōe ai-oàn i;

37hiah-ê報hit所在pháiⁿ消息ê人，lóng tú-tio̍h瘟疫，死tī耶和華ê面前。hiah ê pò hit só͘-chāi pháiⁿ siau-sit ê lâng, lóng tú-tio̍h un-e̍k, sí tī Iâ-hô-hoa ê bīn-chêng.

38偷看hit所在ê人ê中間，只有Lùn ê kiáⁿ約書亞，kap Iâ-hu-nî ê kiáⁿ迦勒，iáu-kú活teh。Thau-khòaⁿ hit só͘-chāi ê lâng ê tiong-kan, chí-ū Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, iáu-kú oa̍h-teh.

39摩西將chiah-ê話kā以色列ê眾人講：百姓就真憂悶。Mô͘-se chiong chiah ê ōe kā Í-sek-lia̍t ê chèng-lâng kóng, peh-sìⁿ chiū chin iu-būn.

40In早早起來上去山頂，講：看ah，阮tī-chia，beh上去耶和華所應允ê地，因為阮有犯罪。In chá-chá khí-lâi chiūⁿ-khì soaⁿ-téng, kóng, Khòaⁿ ah, goán tī-chia, beh chiūⁿ-khì Iâ-hô-hoa só͘ èng-ún ê tōe, in-ūi goán ū hoān-chōe.

41摩西講：Lín啥事違背耶和華ê命令ah？Chit-ê事bōe會興通。Mô͘-se kóng, Lín siáⁿ-sū ûi-pōe Iâ-hô-hoa ê bēng-lēng ah? chit ê sū bōe-ōe heng-thong.

42莫得chiūⁿ去，因為耶和華無tī lín中間，驚了lín hō͘對敵phah敗。Bo̍h-tit chiūⁿ-khì, in-ūi Iâ-hô-hoa bô tī lín tiong-kan, kiaⁿ-liáu lín hō͘ tùi-te̍k phah-pāi.

43因為A-má-le̍k人，kap迦南人，lóng tī-hia tī lín ê頭前，lín beh倒tī刀下；因為lín oa̍t頭無tè耶和華；所以耶和華無beh kap lín tī-teh。In-ūi A-má-le̍k lâng, kap Ka-lâm lâng, lóng tī-hia tī lín ê thâu-chêng, lín beh tó tī to-ē; in-ūi lín oa̍t-thâu bô tè Iâ-hô-hoa; só͘-í Iâ-hô-hoa bô beh kap lín tī-teh.

44總是in自專上山頂；但是耶和華ê約櫃kap摩西無出營。Chóng-sī in chū-choan chiūⁿ soaⁿ-téng; nā-sī Iâ-hô-hoa ê iok-kūi kap Mô͘-se bô chhut-iâⁿ.

45Tùi án-ni，A-má-le̍k人，kap迦南人，khiā起tī山裡 ê，lóng落來攻擊in，phah敗in，到tī Hô-jíⁿ-má。Tùi án-ni A-má-le̍k lâng, kap Ka-lâm lâng, khiā-khí tī soaⁿ-ni̍h ê, lóng lo̍h-lâi kong-kek in, phah-pāi in, kàu tī Hô-jíⁿ-má.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人，kā in講：Lín若到我所賞賜lín khiā起ê地，Lí tio̍h hoan-hù Í-sek-lia̍t lâng, kā in kóng, Lín nā kàu Góa só͘ siúⁿ-sù lín khiā-khí ê tōe,

3若ài tùi牛群á羊群獻hō͘耶和華做火祭，就是燒祭，á是別號ê祭，beh謝願，á是做歡喜獻ê祭，á是到定tio̍h ê節期，做芳芳獻hō͘耶和華；nā ài tùi gû-kûn á iûⁿ-kûn hiàn-hō͘ Iâ-hô-hoa chòe hé-chè, chiū-sī sio-chè, á-sī pa̍t-hō ê chè, beh siā-goān, á-sī chòe hoaⁿ-hí hiàn ê chè, á-sī kàu tiāⁿ-tio̍h ê choeh-kî, chòe phang-phang hiàn hō͘ Iâ-hô-hoa;

4hit-ê獻禮物ê，ta̍k隻羊á tio̍h配幼ê麵粉i-hoat十份一，kap油一him四份一，調和做素祭；hit ê hiàn lé-mi̍h ê, ta̍k chiah iûⁿ-á tio̍h phòe iù ê mī-hún i-hoat cha̍p-hūn-chi̍t, kap iû chi̍t-him sì-hūn-chi̍t, tiau-hô chòe sò͘-chè;

5酒也tio̍h一him四份ê一，來做灌奠；無論燒祭，á是別物祭，lóng tio̍h án-ni來獻hō͘耶和華。chiú iā tio̍h chi̍t-him sì-hūn ê chi̍t, lâi chòe koàn-tiān; bô-lūn sio-chè, á-sī pa̍t-mi̍h chè, lóng tio̍h án-ni lâi hiàn hō͘ Iâ-hô-hoa.

6為tio̍h綿羊káng，你tio̍h備辦幼ê麵粉i-hoat十份兩，kap油一him三份一，調和做素祭；Ūi-tio̍h mî-iûⁿ-káng, lí tio̍h pī-pān iù ê mī-hún i-hoat cha̍p-hūn-nn̄g, kap iû chi̍t-him saⁿ-hūn-chi̍t, tiau-hô chòe sò͘-chè;

7koh用酒一him相hūn一做灌奠-祭，做芳芳來獻hō͘耶和華。koh ēng chiú chi̍t-him saⁿ-hūn-chi̍t chòe koàn-tiān-chè, chòe phang-phang lâi hiàn hō͘ Iâ-hô-hoa.

8你若備辦牛káng-á做燒祭，á是別號ê祭，來謝願，á是做謝恩祭，來獻hō͘耶和華，Lí nā pī-pān gû-káng-á chòe sio-chè, á-sī pa̍t-hō ê chè, lâi siā-goān, á-sī chòe siā-un-chè, lâi hiàn hō͘ Iâ-hô-hoa,

9就是用幼ê麵粉i-hoat十份三，kap油半him，調和做素祭，kap牛káng-á相kap獻；chiū-sī ēng iù ê mī-hún i-hoat cha̍p-hūn-saⁿ, kap iû pòaⁿ-him, tiau-hô chòe sò͘-chè, kap gû-káng-á saⁿ-kap hiàn;

10koh用酒半him做灌奠ê祭，獻hō͘耶和華做芳芳ê火祭。koh ēng chiú pòaⁿ-him chòe koàn-tiān ê chè, hiàn hō͘ Iâ-hô-hoa chòe phang-phang ê hé-chè.

11或是為tio̍h一隻牛káng，á是一隻綿羊káng，á是一隻綿羊á，á是山羊á，lóng tio̍h án-ni做。He̍k-sī ūi-tio̍h chi̍t-chiah gû-káng, á-sī chi̍t-chiah mî-iûⁿ-káng, á-sī chi̍t-chiah mî-iûⁿ-á, á-sī soaⁿ-iûⁿ-á, lóng tio̍h án-ni chòe.

12照lín所備辦ê數額，照ta̍k-chiah-ê額數，lóng tio̍h án-ni做。Chiàu lín só͘ pī-pān ê siàu-gia̍h, chiàu ta̍k-chiah ê gia̍h-siàu, lóng tio̍h án-ni chòe.

13見若本地人，將芳芳ê火祭獻hō͘耶和華，lóng tio̍h án-ni做chiah-ê tāi-chì。Kìⁿ-nā pún-tōe lâng, chiong phang-phang ê hé-chè hiàn hō͘ Iâ-hô-hoa, lóng tio̍h án-ni chòe chiah ê tāi-chì.

14若有外面人出外tī lín中間，á是ta̍k世代有人khiā起tī lín中間，beh獻火祭，芳芳tī耶和華，lín án-ni行，in也tio̍h án-ni行。Nā ū gōa-bīn lâng chhut-gōa tī lín tiong-kan, á-sī ta̍k sè-tāi ū lâng khiā-khí tī lín tiong-kan, beh hiàn hé-chè, phang-phang tī Iâ-hô-hoa, lín án-ni kiâⁿ, in iā tio̍h án-ni kiâⁿ.

15論會眾，lín kap khiā起tī lín中間ê出外人，lóng同一樣ê例，做lín ta̍k世代永遠ê例，tī耶和華ê面前；lín án-ni，出外人也tio̍h án-ni。Lūn hōe-chiòng, lín kap khiā-khí tī lín tiong-kan ê chhut-gōa lâng, lóng tâng-chi̍t-iūⁿ ê lē, chòe lín ta̍k sè-tāi éng-oán ê lē, tī Iâ-hô-hoa ê bīn-chêng; lín án-ni, chhut-gōa lâng iā tio̍h án-ni.

16Lín kap外面人出外tī lín中間ê，tio̍h同一樣ê例，一樣ê法度。Lín kap gōa-bīn lâng chhut-gōa tī lín tiong-kan ê, tio̍h tâng-chi̍t-iūⁿ ê lē, chi̍t-iūⁿ ê hoat-tō͘.

17耶和華吩咐摩西講：Iâ-hô-hoa hoan-hù Mô͘-se kóng,

18你tio̍h吩咐以色列人kā in講：Lín到我所chhōa lín入去hit-ê地。Lí tio̍h hoan-hù Í-sek-lia̍t lâng kā in kóng, Lín kàu Góa só͘ chhōa lín ji̍p-khì hit ê tōe.

19食hit所在ê米糧，就tio̍h獻舉祭hō͘耶和華。chia̍h hit só͘-chāi ê bí-niû, chiū tio̍h hiàn kú-chè hō͘ Iâ-hô-hoa.

20Lín tio̍h用起頭熟ê麥粉chhòng餅，獻做舉祭；lín舉起，親像舉起五穀場ê五穀一樣。Lín tio̍h ēng khí-thâu se̍k ê be̍h-hún chhòng piáⁿ, hiàn chòe kú-chè; lín kú-khí, chhin-chhiūⁿ kú-khí gō͘-kak-tiûⁿ ê gō͘-kak chi̍t-iūⁿ.

21Lín ta̍k世代tio̍h用lín起頭熟ê麥粉，做舉祭，獻hō͘耶和華。Lín ta̍k sè-tāi tio̍h ēng lín khí-thâu-se̍k ê be̍h-hún, chòe kú-chè, hiàn hō͘ Iâ-hô-hoa.

22Lín有錯誤ê時，無守耶和華所吩咐摩西chiah-ê一切ê命令，Lín ū chhò-gō͘ ê sî, bô siú Iâ-hô-hoa só͘ hoan-hù Mô͘-se chiah ê it-chhè ê bēng-lēng,

23就是耶和華託摩西一切所命令lín ê，tùi耶和華命令lín ê日，到tī lín ê ta̍k世代，chiū-sī Iâ-hô-hoa thok Mô͘-se it-chhè só͘ bēng-lēng lín ê, tùi Iâ-hô-hoa bēng-lēng lín ê ji̍t, kàu tī lín ê ta̍k sè-tāi,

24若有錯誤行，會眾也m̄知，後來會眾tio̍h獻一隻牛káng-á做燒祭，也照法度用伊ê素祭，kap灌奠ê祭，相kap做芳芳，獻hō͘耶和華；koh tio̍h獻一隻山羊káng做贖罪ê祭。nā ū chhò-gō͘ kiâⁿ, hōe-chiòng iā m̄-chai, āu-lâi hōe-chiòng tio̍h hiàn chi̍t chiah gû-káng-á chòe sio-chè, iā chiàu hoat-tō͘ ēng i ê sò͘-chè, kap koàn-tiān ê chè, saⁿ-kap chòe phang-phang, hiàn hō͘ Iâ-hô-hoa; koh tio̍h hiàn chi̍t chiah soaⁿ-iûⁿ-káng chòe sio̍k-chōe ê chè.

25祭司tio̍h為以色列人ê會眾贖罪，in就得tio̍h赦免；因為這是錯誤，in也因為in ê錯誤，帶in ê禮物，就是獻hō͘耶和華ê火祭，kap贖罪祭，lóng帶到耶和華ê面前；Chè-si tio̍h ūi Í-sek-lia̍t lâng ê hōe-chiòng sio̍k-chōe, in chiū tit-tio̍h sià-bián; in-ūi che sī chhò-gō͘, in iā in-ūi in ê chhò-gō͘, tòa in ê lé-mi̍h, chiū-sī hiàn-hō͘ Iâ-hô-hoa ê hé-chè, kap sio̍k-chōe-chè, lóng tòa kàu Iâ-hô-hoa ê bīn-chêng;

26以色列人ê會眾，kap寄腳tī in中間ê外人，就beh得tio̍h赦免；因為chit-ê罪是百姓錯誤犯ê。Í-sek-lia̍t lâng ê hōe-chiòng, kap kià-kha tī in tiong-kan ê gōa-lâng, chiū beh tit-tio̍h sià-bián; in-ūi chit ê chōe sī peh-sìⁿ chhò-gō͘ hoān ê.

27若有一人錯誤犯罪，伊就tio̍h獻未滿年ê山羊母做贖罪祭。Nā ū chi̍t-lâng chhò-gō͘ hoān-chōe, i chiū tio̍h hiàn bē-móa-nî ê soaⁿ-iûⁿ-bú chòe sio̍k-chōe-chè.

28Hit-ê錯誤行ê人tī伊錯誤犯罪ê時，祭司tio̍h tī耶和華ê面前kā伊贖罪；kā伊贖罪，伊就beh得tio̍h赦免。Hit ê chhò-gō͘ kiâⁿ ê lâng tī i chhò-gō͘ hoān-chōe ê sî, chè-si tio̍h tī Iâ-hô-hoa ê bīn-chêng kā i sio̍k-chōe; kā i sio̍k-chōe, i chiū beh tit-tio̍h sià-bián.

29以色列中ê本地人，kap寄腳tī in中間ê出外人，若錯誤行甚麼事，tio̍h同一個例。Í-sek-lia̍t tiong ê pún-tōe lâng, kap kià-kha tī in tiong-kan ê chhut-gōa lâng, nā chhò-gō͘ kiâⁿ sím-mi̍h sū, tio̍h tâng chi̍t ê lē.

30總是hit-ê自專行tāi-chì ê，無論是本地人，á是寄腳ê，伊褻瀆耶和華，tio̍h tùi伊ê百姓中剪除去。Chóng-sī hit ê chū-choan kiâⁿ tāi-chì ê, bô-lūn sī pún-tōe lâng, á-sī kià-kha-ê, i siat-to̍k Iâ-hô-hoa, tio̍h tùi i ê peh-sìⁿ-tiong chián-tû khì.

31因為伊藐視耶和華ê話，悖逆伊ê命令，hit人tio̍h一盡剪除；伊ê罪過beh歸tī伊。In-ūi i biáu-sī Iâ-hô-hoa ê ōe, pōe-ge̍k I ê bēng-lēng, hit-lâng tio̍h it-chīn chián-tû; i ê chōe-kòa beh kui tī i.

32以色列人tī曠野ê時，tú-tio̍h一人tī安歇日拾柴。Í-sek-lia̍t lâng tī khòng-iá ê sî, tú-tio̍h chi̍t-lâng tī an-hioh-ji̍t khioh-chhâ.

33Hiah-ê tú-tio̍h hit-ê拾柴ê人，帶伊到摩西、亞倫，kap會眾hia。Hiah ê tú-tio̍h hit ê khioh-chhâ ê lâng, tòa i kàu Mô͘-se, A-lûn, kap hōe-chiòng hia.

34In就kā伊關禁，因為iáu未指明tio̍h怎樣辦伊。In chiū kā i koaiⁿ-kìm, in-ūi iáu-bē chí-bêng tio̍h cháiⁿ-iūⁿ pān i.

35耶和華對摩西講：Hit人的確tio̍h hō͘伊死，會眾tio̍h tī營外用石頭tìm伊。Iâ-hô-hoa tùi Mô͘-se kóng, Hit-lâng tek-khak tio̍h hō͘ i sí, hōe-chiòng tio̍h tī iâⁿ-gōa ēng chio̍h-thâu tìm i.

36會眾chhōa hit人出營外，用石頭tìm伊到死；是照耶和華所命令摩西ê。Hōe-chiòng chhōa hit-lâng chhut iâⁿ-gōa, ēng chio̍h-thâu tìm i kàu sí; sī chiàu Iâ-hô-hoa só͘ bēng-lēng Mô͘-se ê.

37耶和華吩咐摩西講：Iâ-hô-hoa hoan-hù Mô͘-se kóng,

38你tio̍h吩咐以色列人kā in講：hō͘ in代代tī衫á墘做鬚，koh tī下底邊ê鬚頂，釣一條藍色ê幼帶。Lí tio̍h hoan-hù Í-sek-lia̍t lâng kā in kóng, hō͘ in tāi-tāi tī saⁿ-á-kîⁿ chòe chhiu, koh tī ē-tóe piⁿ ê chhiu-téng, tiò chi̍t tiâu lâm-sek ê iù-tòa.

39Beh kā lín做鬚，hō͘ lín看見，thang記得耶和華ê命令來行伊，免得lín放縱家己ê心意，家己ê目睭，來行淫行，親像lín平素所行ê一樣；Beh kā lín chòe chhiu, hō͘ lín khòaⁿ-kìⁿ, thang kì-tit Iâ-hô-hoa ê bēng-lēng lâi kiâⁿ i, bián-tit lín hòng-chhiòng ka-kī ê sim-ì, ka-kī ê ba̍k-chiu, lâi kiâⁿ îm-hēng, chhin-chhiūⁿ lín pêng-sò͘ só͘ kiâⁿ-ê chi̍t-iūⁿ;

40hō͘ lín記得來行我一切ê命令，成做聖歸lín ê上帝。hō͘ lín kì-tit lâi kiâⁿ Góa it-chhè ê bēng-lēng, chiâⁿ-chòe sèng kui lín ê Siōng-tè.

41我是耶和華lín ê上帝，chhōa lín出埃及地，beh做lín ê上帝；我是耶和華lín ê上帝。Góa sī Iâ-hô-hoa lín ê Siōng-tè, chhōa lín chhut Ai-ki̍p tōe, beh chòe lín ê Siōng-tè; Góa sī Iâ-hô-hoa lín ê Siōng-tè.