1會眾就出聲，大喉叫；hit暝百姓lóng啼哭。Hōe-chiòng chiū chhut-siaⁿ, tōa âu-kiò; hit-mî peh-sìⁿ lóng thî-khàu.

2以色列人哀怨摩西、亞倫；會眾對in講，M̄值tio̍h阮死tī埃及地！m̄值tio̍h死tī chit曠野！Í-sek-lia̍t lâng ai-oàn Mô͘-se A-lûn; hōe-chiòng tùi in kóng, M̄-ta̍t-tio̍h goán sí tī Ai-ki̍p tōe! m̄-ta̍t-tio̍h sí tī chit khòng-iá!

3耶和華啥事chhōa阮到chit所在，hō͘阮倒tī刀下ah？阮ê bó͘ kap kiáⁿ beh受掠；阮tò去埃及kiám無khah好mah？Iâ-hô-hoa siáⁿ-sū chhōa goán kàu chit só͘-chāi, hō͘ goán tó tī to-ē ah? Goán ê bó͘ kap kiáⁿ beh siū lia̍h; goán tò-khì Ai-ki̍p kiám bô khah-hó mah?

4In相kap講：咱tio̍h立一個首領，tò去埃及。In saⁿ-kap kóng, Lán tio̍h li̍p chi̍t ê siú-léng, tò-khì Ai-ki̍p.

5摩西、亞倫就仆落tī以色列全會眾人ê面前。Mô͘-se A-lûn chiū phak-lo̍h tī Í-sek-lia̍t choân-hōe chèng-lâng ê bīn-chêng.

6偷看地ê人ê中間，Lùn ê kiáⁿ約書亞，kap Iâ-hu-nî ê kiáⁿ迦勒，拆裂in ê衫；Thau-khòaⁿ tōe ê lâng ê tiong-kan, Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, thiah-li̍h in ê saⁿ;

7對以色列全會講：阮所經過偷看ê地，是極好ê地。tùi Í-sek-lia̍t choân-hōe kóng, Goán só͘ keng-kè thau-khòaⁿ ê tōe, sī ke̍k-hó ê tōe.

8耶和華若歡喜咱，就beh chhōa咱到hit-ê地，將地賞賜咱；hit-ê地是流奶kap蜜ê地。Iâ-hô-hoa nā hoaⁿ-hí lán, chiū beh chhōa lán kàu hit ê tōe, chiong tōe siúⁿ-sù lán; hit ê tōe sī lâu lin kap bi̍t ê tōe.

9總是lín m̄-thang背叛耶和華，也莫得驚hit所在ê百姓，因為in是做咱ê食物；koh致蔭in ê已經離開in；koh有耶和華kap咱tī-teh；m̄免驚in。Chóng-sī lín m̄-thang pōe-poān Iâ-hô-hoa, iā bo̍h-tit kiaⁿ hit só͘ -chāi ê peh-sìⁿ, in-ūi in sī chòe lán ê chia̍h-mi̍h; koh tì-ìm in ê í-keng lī-khui in; koh ū Iâ-hô-hoa kap lán tī-teh; m̄ bián kiaⁿ in.

10總是全會講：用石頭tìm死in。耶和華ê榮光tī會幕ǹg以色列人出現。Chóng-sī choân-hōe kóng, Ēng chio̍h-thâu tìm-sí in. Iâ-hô-hoa ê êng-kng tī hōe-bō͘ ǹg Í-sek-lia̍t lâng chhut-hiān.

11耶和華對摩西講：Chit-ê百姓看輕我beh到tī時ah？我tī in中間行這一切ê神蹟，in iáu-kú m̄信我，beh到tī時？Iâ-hô-hoa tùi Mô͘-se kóng, Chit ê peh-sìⁿ khòaⁿ-khin Góa beh kàu tī-sî ah? Góa tī in tiong-kan kiâⁿ che it-chhè ê sîn-jiah, in iáu-kú m̄-sìn Góa, beh kàu tī-sî?

12我beh用瘟疫來phah in，hō͘ in bōe得tio̍h承接業；hō͘你成做大國，比in khah強。Góa beh ēng un-e̍k lâi phah in, hō͘ in bōe tit-tio̍h sêng-chiap gia̍p; hō͘ lí chiâⁿ-chòe tōa-kok, pí in khah-kiông.

13摩西對耶和華講：Án-ni，埃及人beh聽見；因為你用你ê權能，chhōa chiah-ê百姓對in中間上來。Mô͘-se tùi Iâ-hô-hoa kóng, Án-ni, Ai-ki̍p lâng beh thiaⁿ-kìⁿ; in-ūi Lí ēng Lí ê koân-lêng, chhōa chiah ê peh-sìⁿ tùi in tiong-kan chiūⁿ-lâi.

14In beh用chiah-ê事kā chit所在khiā起ê人講。In已經聽見耶和華你tī chiah-ê百姓ê中間；因為耶和華你當面hō͘人看見，koh你ê雲停tī in ê頂面，你日時tī雲柱中，暝時tī火柱中，tī in ê面前行。In beh ēng chiah ê sū kā chit só͘-chāi khiā-khí ê lâng kóng. In í-keng thiaⁿ-kìⁿ Iâ-hô-hoa Lí tī chiah ê peh-sìⁿ ê tiong-kan; in-ūi Iâ-hô-hoa Lí tng-bīn hō͘ lâng khòaⁿ-kìⁿ, koh Lí ê hûn thêng tī in ê téng-bīn, Lí ji̍t-sî tī hûn-thiāu tiong, mî-sî tī hé-thiāu tiong, tī in ê bīn-chêng kiâⁿ.

15Taⁿ你若thâi死chiah-ê百姓，親像thâi死一人，hiah-ê聽見你ê名聲ê列國beh議論講：Taⁿ Lí nā thâi-sí chiah ê peh-sìⁿ, chhin-chhiūⁿ thâi-sí chi̍t-lâng, hiah ê thiaⁿ-kìⁿ Lí ê miâ-siaⁿ ê lia̍t-kok beh gī-lūn kóng,

16因為耶和華bōe能chhōa chiah-ê百姓入伊對in chiù-chōa應允ê地，所以tī曠野thâi死in。In-ūi Iâ-hô-hoa bōe-ōe chhōa chiah ê peh-sìⁿ ji̍p I tùi in chiù-chōa èng-ún ê tōe, só͘-í tī khòng-iá thâi-sí in.

17Taⁿ求主顯出大權能，照你所bat講ê，講：Taⁿ kiû Chú hián-chhut tōa koân-lêng, chiàu Lí só͘ bat kóng ê, kóng,

18耶和華無快受氣，koh有豐盛ê慈愛，赦免罪過過失，決斷無掠有罪ê做無罪，的確歸咎伊ê罪，tùi父到kiáⁿ，到三四代。Iâ-hô-hoa bô khoài siū-khì, koh ū hong-sēng ê chû-ài, sià-bián chōe-kòa kè-sit, koat-toàn bô lia̍h ū-chōe ê chòe bô chōe, tek-khak kui-kiū i ê chōe, tùi pē kàu kiáⁿ, kàu saⁿ-sì tāi.

19求你照你ê大慈愛赦免chit-ê百姓ê罪，親像你tùi埃及到taⁿ，常常赦免in一樣。Kiû Lí chiàu Lí ê tōa chû-ài sià-bián chit ê peh-sìⁿ ê chōe, chhin-chhiūⁿ Lí tùi Ai-ki̍p kàu taⁿ, siông-siông sià-bián in chi̍t-iūⁿ.

20耶和華講：我照你ê話有赦免in。Iâ-hô-hoa kóng, Góa chiàu lí ê ōe ū sià-bián in.

21總是我kí我ê活命來講：遍地beh充滿耶和華ê榮光。Chóng-sī Góa kí Góa ê oa̍h-miā lâi kóng, Piàn-tōe beh chhiong-móa Iâ-hô-hoa ê êng-kng.

22因為chiah-ê人有看見我ê榮光，以及我所行tī埃及kap曠野ê神蹟，iáu-kú試我十pái，m̄聽thàn我ê話；In-ūi chiah ê lâng ū khòaⁿ-kìⁿ Góa ê êng-kng, í-ki̍p Góa só͘ kiâⁿ tī Ai-ki̍p kap khòng-iá ê sîn-jiah, iáu-kú chhì Góa cha̍p-pái, m̄ thiaⁿ-thàn Góa ê ōe;

23in決斷bōe得tio̍h看見我對in ê列祖所chiù-chōa應允ê地；凡若看輕我ê lóng bōe得tio̍h看見。in koat-toàn bōe tit-tio̍h khòaⁿ-kìⁿ Góa tùi in ê lia̍t-chó͘ só͘ chiù-chōa èng-ún ê tōe; hoān-nā khòaⁿ-khin Góa-ê lóng bōe tit-tio̍h khòaⁿ-kìⁿ.

24獨獨我ê奴僕迦勒，因為伊另外有一個心志，完全tè我，我beh chhōa伊入伊所行到ê地，伊ê後裔也beh得tio̍h hit-ê地做業。To̍k-to̍k Góa ê lô͘-po̍k Ka-le̍k, in-ūi i lēng-gōa ū chi̍t ê sim-chì, oân-choân tè Góa, Góa beh chhōa i ji̍p i só͘ kiâⁿ-kàu ê tōe, i ê hō͘-è iā beh tit-tio̍h hit ê tōe chòe gia̍p.

25A-má-le̍k人kap迦南人tiàm tī山谷中；明á日lín tio̍h oa̍t倒tńg，tùi紅海ê路去曠野。A-má-le̍k lâng kap Ka-lâm lâng tiàm tī soaⁿ-kok tiong; bîn-á-ji̍t lín tio̍h oa̍t-tò-tńg, tùi Âng-hái ê lō͘ khì khòng-iá.

26耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

27Chiah-ê pháiⁿ ê會眾對我發出怨言，我吞忍in beh到tī時ah？以色列人哀怨我ê怨言，我lóng聽見lah。Chiah ê pháiⁿ ê hōe-chiòng tùi Góa hoat-chhut oàn-giân, Góa thun-lún in beh kàu tī-sî ah? Í-sek-lia̍t lâng ai-oàn Góa ê oàn-giân, Góa lóng thiaⁿ-kìⁿ lah.

28Tio̍h kā in講：耶和華講：我kí我ê活命來講：Lín hō͘我聽見ê話，我beh照án-ni款待lín。Tio̍h kā in kóng, Iâ-hô-hoa kóng, Góa kí Góa ê oa̍h-miā lâi kóng, Lín hō͘ Góa thiaⁿ-kìⁿ ê ōe, Góa beh chiàu án-ni khoán-thāi lín.

29Lín ê身屍beh倒tī chit曠野，見若lín中間計算ê人，照伊ê數額，tùi二十歲以上，對我出怨言ê，Lín ê sin-si beh tó tī chit khòng-iá, kìⁿ-nā lín tiong-kan kè-sǹg ê lâng, chiàu i ê siàu-gia̍h, tùi jī-cha̍p hè í-chiūⁿ, tùi Góa chhut oàn-giân ê,

30的確bōe得tio̍h入我chiù-chōa應允lín khiā起ê地；獨獨Iâ-hu-nî ê kiáⁿ迦勒，kap Lùn ê kiáⁿ約書亞，beh入去。tek-khak bōe tit-tio̍h ji̍p Góa chiù-chōa èng-ún lín khiā-khí ê tōe; to̍k-to̍k Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a, beh ji̍p-khì.

31總是lín ê gín-á，就是lín所講beh受掠ê，我beh chhōa in入去，in就知lín所棄sak hit-ê地。Chóng-sī lín ê gín-á, chiū-sī lín só͘ kóng beh siū-lia̍h ê, Góa beh chhōa in ji̍p-khì, in chiū chai lín só͘ khì-sak hit ê tōe.

32論到lín，lín ê身屍beh倒tī chit曠野。Lūn-kàu lín, lín ê sin-si beh tó tī chit khòng-iá.

33Lín ê kiáⁿ兒beh tī曠野漂流四十年，擔當lín淫行ê罪，直到lín ê身屍tī曠野消滅。Lín ê kiáⁿ-jî beh tī khòng-iá phiau-liû sì-cha̍p nî, tam-tng lín îm-hēng ê chōe, ti̍t-kàu lín ê sin-si tī khòng-iá siau-bia̍t.

34照lín偷看hit-ê地ê日子，共四十日，一日抵一年，lín tio̍h擔當罪四十年；lín就知我棄sak lín。Chiàu lín thau-khòaⁿ hit ê tōe ê ji̍t-chí, kiōng sì-cha̍p ji̍t, chi̍t-ji̍t tí chi̍t-nî, lín tio̍h tam-tng chōe sì-cha̍p nî; lín chiū chai Góa khì-sak lín.

35我耶和華已經講：我beh án-ni款待這一切聚集對敵我ê pháiⁿ會眾；in beh tī chit曠野消滅，死tī-chia。Góa Iâ-hô-hoa í-keng kóng, Góa beh án-ni khoán-thāi che it-chhè chū-chi̍p tùi-te̍k Góa ê pháiⁿ hōe-chiòng; in beh tī chit khòng-iá siau-bia̍t, sí tī-chia.

36摩西所差偷看hit-ê地，倒tńg來報hit所在ê pháiⁿ消息，致到全會哀怨伊；Mô͘-se só͘ chhe thau-khòaⁿ hit ê tōe, tò-tńg lâi pò hit só͘-chāi ê pháiⁿ siau-sit, tì-kàu choân-hōe ai-oàn i;

37hiah-ê報hit所在pháiⁿ消息ê人，lóng tú-tio̍h瘟疫，死tī耶和華ê面前。hiah ê pò hit só͘-chāi pháiⁿ siau-sit ê lâng, lóng tú-tio̍h un-e̍k, sí tī Iâ-hô-hoa ê bīn-chêng.

38偷看hit所在ê人ê中間，只有Lùn ê kiáⁿ約書亞，kap Iâ-hu-nî ê kiáⁿ迦勒，iáu-kú活teh。Thau-khòaⁿ hit só͘-chāi ê lâng ê tiong-kan, chí-ū Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, iáu-kú oa̍h-teh.

39摩西將chiah-ê話kā以色列ê眾人講：百姓就真憂悶。Mô͘-se chiong chiah ê ōe kā Í-sek-lia̍t ê chèng-lâng kóng, peh-sìⁿ chiū chin iu-būn.

40In早早起來上去山頂，講：看ah，阮tī-chia，beh上去耶和華所應允ê地，因為阮有犯罪。In chá-chá khí-lâi chiūⁿ-khì soaⁿ-téng, kóng, Khòaⁿ ah, goán tī-chia, beh chiūⁿ-khì Iâ-hô-hoa só͘ èng-ún ê tōe, in-ūi goán ū hoān-chōe.

41摩西講：Lín啥事違背耶和華ê命令ah？Chit-ê事bōe會興通。Mô͘-se kóng, Lín siáⁿ-sū ûi-pōe Iâ-hô-hoa ê bēng-lēng ah? chit ê sū bōe-ōe heng-thong.

42莫得chiūⁿ去，因為耶和華無tī lín中間，驚了lín hō͘對敵phah敗。Bo̍h-tit chiūⁿ-khì, in-ūi Iâ-hô-hoa bô tī lín tiong-kan, kiaⁿ-liáu lín hō͘ tùi-te̍k phah-pāi.

43因為A-má-le̍k人，kap迦南人，lóng tī-hia tī lín ê頭前，lín beh倒tī刀下；因為lín oa̍t頭無tè耶和華；所以耶和華無beh kap lín tī-teh。In-ūi A-má-le̍k lâng, kap Ka-lâm lâng, lóng tī-hia tī lín ê thâu-chêng, lín beh tó tī to-ē; in-ūi lín oa̍t-thâu bô tè Iâ-hô-hoa; só͘-í Iâ-hô-hoa bô beh kap lín tī-teh.

44總是in自專上山頂；但是耶和華ê約櫃kap摩西無出營。Chóng-sī in chū-choan chiūⁿ soaⁿ-téng; nā-sī Iâ-hô-hoa ê iok-kūi kap Mô͘-se bô chhut-iâⁿ.

45Tùi án-ni，A-má-le̍k人，kap迦南人，khiā起tī山裡 ê，lóng落來攻擊in，phah敗in，到tī Hô-jíⁿ-má。Tùi án-ni A-má-le̍k lâng, kap Ka-lâm lâng, khiā-khí tī soaⁿ-ni̍h ê, lóng lo̍h-lâi kong-kek in, phah-pāi in, kàu tī Hô-jíⁿ-má.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人，kā in講：Lín若到我所賞賜lín khiā起ê地，Lí tio̍h hoan-hù Í-sek-lia̍t lâng, kā in kóng, Lín nā kàu Góa só͘ siúⁿ-sù lín khiā-khí ê tōe,

3若ài tùi牛群á羊群獻hō͘耶和華做火祭，就是燒祭，á是別號ê祭，beh謝願，á是做歡喜獻ê祭，á是到定tio̍h ê節期，做芳芳獻hō͘耶和華；nā ài tùi gû-kûn á iûⁿ-kûn hiàn-hō͘ Iâ-hô-hoa chòe hé-chè, chiū-sī sio-chè, á-sī pa̍t-hō ê chè, beh siā-goān, á-sī chòe hoaⁿ-hí hiàn ê chè, á-sī kàu tiāⁿ-tio̍h ê choeh-kî, chòe phang-phang hiàn hō͘ Iâ-hô-hoa;

4hit-ê獻禮物ê，ta̍k隻羊á tio̍h配幼ê麵粉i-hoat十份一，kap油一him四份一，調和做素祭；hit ê hiàn lé-mi̍h ê, ta̍k chiah iûⁿ-á tio̍h phòe iù ê mī-hún i-hoat cha̍p-hūn-chi̍t, kap iû chi̍t-him sì-hūn-chi̍t, tiau-hô chòe sò͘-chè;

5酒也tio̍h一him四份ê一，來做灌奠；無論燒祭，á是別物祭，lóng tio̍h án-ni來獻hō͘耶和華。chiú iā tio̍h chi̍t-him sì-hūn ê chi̍t, lâi chòe koàn-tiān; bô-lūn sio-chè, á-sī pa̍t-mi̍h chè, lóng tio̍h án-ni lâi hiàn hō͘ Iâ-hô-hoa.

6為tio̍h綿羊káng，你tio̍h備辦幼ê麵粉i-hoat十份兩，kap油一him三份一，調和做素祭；Ūi-tio̍h mî-iûⁿ-káng, lí tio̍h pī-pān iù ê mī-hún i-hoat cha̍p-hūn-nn̄g, kap iû chi̍t-him saⁿ-hūn-chi̍t, tiau-hô chòe sò͘-chè;

7koh用酒一him相hūn一做灌奠-祭，做芳芳來獻hō͘耶和華。koh ēng chiú chi̍t-him saⁿ-hūn-chi̍t chòe koàn-tiān-chè, chòe phang-phang lâi hiàn hō͘ Iâ-hô-hoa.

8你若備辦牛káng-á做燒祭，á是別號ê祭，來謝願，á是做謝恩祭，來獻hō͘耶和華，Lí nā pī-pān gû-káng-á chòe sio-chè, á-sī pa̍t-hō ê chè, lâi siā-goān, á-sī chòe siā-un-chè, lâi hiàn hō͘ Iâ-hô-hoa,

9就是用幼ê麵粉i-hoat十份三，kap油半him，調和做素祭，kap牛káng-á相kap獻；chiū-sī ēng iù ê mī-hún i-hoat cha̍p-hūn-saⁿ, kap iû pòaⁿ-him, tiau-hô chòe sò͘-chè, kap gû-káng-á saⁿ-kap hiàn;

10koh用酒半him做灌奠ê祭，獻hō͘耶和華做芳芳ê火祭。koh ēng chiú pòaⁿ-him chòe koàn-tiān ê chè, hiàn hō͘ Iâ-hô-hoa chòe phang-phang ê hé-chè.

11或是為tio̍h一隻牛káng，á是一隻綿羊káng，á是一隻綿羊á，á是山羊á，lóng tio̍h án-ni做。He̍k-sī ūi-tio̍h chi̍t-chiah gû-káng, á-sī chi̍t-chiah mî-iûⁿ-káng, á-sī chi̍t-chiah mî-iûⁿ-á, á-sī soaⁿ-iûⁿ-á, lóng tio̍h án-ni chòe.

12照lín所備辦ê數額，照ta̍k-chiah-ê額數，lóng tio̍h án-ni做。Chiàu lín só͘ pī-pān ê siàu-gia̍h, chiàu ta̍k-chiah ê gia̍h-siàu, lóng tio̍h án-ni chòe.

13見若本地人，將芳芳ê火祭獻hō͘耶和華，lóng tio̍h án-ni做chiah-ê tāi-chì。Kìⁿ-nā pún-tōe lâng, chiong phang-phang ê hé-chè hiàn hō͘ Iâ-hô-hoa, lóng tio̍h án-ni chòe chiah ê tāi-chì.

14若有外面人出外tī lín中間，á是ta̍k世代有人khiā起tī lín中間，beh獻火祭，芳芳tī耶和華，lín án-ni行，in也tio̍h án-ni行。Nā ū gōa-bīn lâng chhut-gōa tī lín tiong-kan, á-sī ta̍k sè-tāi ū lâng khiā-khí tī lín tiong-kan, beh hiàn hé-chè, phang-phang tī Iâ-hô-hoa, lín án-ni kiâⁿ, in iā tio̍h án-ni kiâⁿ.

15論會眾，lín kap khiā起tī lín中間ê出外人，lóng同一樣ê例，做lín ta̍k世代永遠ê例，tī耶和華ê面前；lín án-ni，出外人也tio̍h án-ni。Lūn hōe-chiòng, lín kap khiā-khí tī lín tiong-kan ê chhut-gōa lâng, lóng tâng-chi̍t-iūⁿ ê lē, chòe lín ta̍k sè-tāi éng-oán ê lē, tī Iâ-hô-hoa ê bīn-chêng; lín án-ni, chhut-gōa lâng iā tio̍h án-ni.

16Lín kap外面人出外tī lín中間ê，tio̍h同一樣ê例，一樣ê法度。Lín kap gōa-bīn lâng chhut-gōa tī lín tiong-kan ê, tio̍h tâng-chi̍t-iūⁿ ê lē, chi̍t-iūⁿ ê hoat-tō͘.

17耶和華吩咐摩西講：Iâ-hô-hoa hoan-hù Mô͘-se kóng,

18你tio̍h吩咐以色列人kā in講：Lín到我所chhōa lín入去hit-ê地。Lí tio̍h hoan-hù Í-sek-lia̍t lâng kā in kóng, Lín kàu Góa só͘ chhōa lín ji̍p-khì hit ê tōe.

19食hit所在ê米糧，就tio̍h獻舉祭hō͘耶和華。chia̍h hit só͘-chāi ê bí-niû, chiū tio̍h hiàn kú-chè hō͘ Iâ-hô-hoa.

20Lín tio̍h用起頭熟ê麥粉chhòng餅，獻做舉祭；lín舉起，親像舉起五穀場ê五穀一樣。Lín tio̍h ēng khí-thâu se̍k ê be̍h-hún chhòng piáⁿ, hiàn chòe kú-chè; lín kú-khí, chhin-chhiūⁿ kú-khí gō͘-kak-tiûⁿ ê gō͘-kak chi̍t-iūⁿ.

21Lín ta̍k世代tio̍h用lín起頭熟ê麥粉，做舉祭，獻hō͘耶和華。Lín ta̍k sè-tāi tio̍h ēng lín khí-thâu-se̍k ê be̍h-hún, chòe kú-chè, hiàn hō͘ Iâ-hô-hoa.

22Lín有錯誤ê時，無守耶和華所吩咐摩西chiah-ê一切ê命令，Lín ū chhò-gō͘ ê sî, bô siú Iâ-hô-hoa só͘ hoan-hù Mô͘-se chiah ê it-chhè ê bēng-lēng,

23就是耶和華託摩西一切所命令lín ê，tùi耶和華命令lín ê日，到tī lín ê ta̍k世代，chiū-sī Iâ-hô-hoa thok Mô͘-se it-chhè só͘ bēng-lēng lín ê, tùi Iâ-hô-hoa bēng-lēng lín ê ji̍t, kàu tī lín ê ta̍k sè-tāi,

24若有錯誤行，會眾也m̄知，後來會眾tio̍h獻一隻牛káng-á做燒祭，也照法度用伊ê素祭，kap灌奠ê祭，相kap做芳芳，獻hō͘耶和華；koh tio̍h獻一隻山羊káng做贖罪ê祭。nā ū chhò-gō͘ kiâⁿ, hōe-chiòng iā m̄-chai, āu-lâi hōe-chiòng tio̍h hiàn chi̍t chiah gû-káng-á chòe sio-chè, iā chiàu hoat-tō͘ ēng i ê sò͘-chè, kap koàn-tiān ê chè, saⁿ-kap chòe phang-phang, hiàn hō͘ Iâ-hô-hoa; koh tio̍h hiàn chi̍t chiah soaⁿ-iûⁿ-káng chòe sio̍k-chōe ê chè.

25祭司tio̍h為以色列人ê會眾贖罪，in就得tio̍h赦免；因為這是錯誤，in也因為in ê錯誤，帶in ê禮物，就是獻hō͘耶和華ê火祭，kap贖罪祭，lóng帶到耶和華ê面前；Chè-si tio̍h ūi Í-sek-lia̍t lâng ê hōe-chiòng sio̍k-chōe, in chiū tit-tio̍h sià-bián; in-ūi che sī chhò-gō͘, in iā in-ūi in ê chhò-gō͘, tòa in ê lé-mi̍h, chiū-sī hiàn-hō͘ Iâ-hô-hoa ê hé-chè, kap sio̍k-chōe-chè, lóng tòa kàu Iâ-hô-hoa ê bīn-chêng;

26以色列人ê會眾，kap寄腳tī in中間ê外人，就beh得tio̍h赦免；因為chit-ê罪是百姓錯誤犯ê。Í-sek-lia̍t lâng ê hōe-chiòng, kap kià-kha tī in tiong-kan ê gōa-lâng, chiū beh tit-tio̍h sià-bián; in-ūi chit ê chōe sī peh-sìⁿ chhò-gō͘ hoān ê.

27若有一人錯誤犯罪，伊就tio̍h獻未滿年ê山羊母做贖罪祭。Nā ū chi̍t-lâng chhò-gō͘ hoān-chōe, i chiū tio̍h hiàn bē-móa-nî ê soaⁿ-iûⁿ-bú chòe sio̍k-chōe-chè.

28Hit-ê錯誤行ê人tī伊錯誤犯罪ê時，祭司tio̍h tī耶和華ê面前kā伊贖罪；kā伊贖罪，伊就beh得tio̍h赦免。Hit ê chhò-gō͘ kiâⁿ ê lâng tī i chhò-gō͘ hoān-chōe ê sî, chè-si tio̍h tī Iâ-hô-hoa ê bīn-chêng kā i sio̍k-chōe; kā i sio̍k-chōe, i chiū beh tit-tio̍h sià-bián.

29以色列中ê本地人，kap寄腳tī in中間ê出外人，若錯誤行甚麼事，tio̍h同一個例。Í-sek-lia̍t tiong ê pún-tōe lâng, kap kià-kha tī in tiong-kan ê chhut-gōa lâng, nā chhò-gō͘ kiâⁿ sím-mi̍h sū, tio̍h tâng chi̍t ê lē.

30總是hit-ê自專行tāi-chì ê，無論是本地人，á是寄腳ê，伊褻瀆耶和華，tio̍h tùi伊ê百姓中剪除去。Chóng-sī hit ê chū-choan kiâⁿ tāi-chì ê, bô-lūn sī pún-tōe lâng, á-sī kià-kha-ê, i siat-to̍k Iâ-hô-hoa, tio̍h tùi i ê peh-sìⁿ-tiong chián-tû khì.

31因為伊藐視耶和華ê話，悖逆伊ê命令，hit人tio̍h一盡剪除；伊ê罪過beh歸tī伊。In-ūi i biáu-sī Iâ-hô-hoa ê ōe, pōe-ge̍k I ê bēng-lēng, hit-lâng tio̍h it-chīn chián-tû; i ê chōe-kòa beh kui tī i.

32以色列人tī曠野ê時，tú-tio̍h一人tī安歇日拾柴。Í-sek-lia̍t lâng tī khòng-iá ê sî, tú-tio̍h chi̍t-lâng tī an-hioh-ji̍t khioh-chhâ.

33Hiah-ê tú-tio̍h hit-ê拾柴ê人，帶伊到摩西、亞倫，kap會眾hia。Hiah ê tú-tio̍h hit ê khioh-chhâ ê lâng, tòa i kàu Mô͘-se, A-lûn, kap hōe-chiòng hia.

34In就kā伊關禁，因為iáu未指明tio̍h怎樣辦伊。In chiū kā i koaiⁿ-kìm, in-ūi iáu-bē chí-bêng tio̍h cháiⁿ-iūⁿ pān i.

35耶和華對摩西講：Hit人的確tio̍h hō͘伊死，會眾tio̍h tī營外用石頭tìm伊。Iâ-hô-hoa tùi Mô͘-se kóng, Hit-lâng tek-khak tio̍h hō͘ i sí, hōe-chiòng tio̍h tī iâⁿ-gōa ēng chio̍h-thâu tìm i.

36會眾chhōa hit人出營外，用石頭tìm伊到死；是照耶和華所命令摩西ê。Hōe-chiòng chhōa hit-lâng chhut iâⁿ-gōa, ēng chio̍h-thâu tìm i kàu sí; sī chiàu Iâ-hô-hoa só͘ bēng-lēng Mô͘-se ê.

37耶和華吩咐摩西講：Iâ-hô-hoa hoan-hù Mô͘-se kóng,

38你tio̍h吩咐以色列人kā in講：hō͘ in代代tī衫á墘做鬚，koh tī下底邊ê鬚頂，釣一條藍色ê幼帶。Lí tio̍h hoan-hù Í-sek-lia̍t lâng kā in kóng, hō͘ in tāi-tāi tī saⁿ-á-kîⁿ chòe chhiu, koh tī ē-tóe piⁿ ê chhiu-téng, tiò chi̍t tiâu lâm-sek ê iù-tòa.

39Beh kā lín做鬚，hō͘ lín看見，thang記得耶和華ê命令來行伊，免得lín放縱家己ê心意，家己ê目睭，來行淫行，親像lín平素所行ê一樣；Beh kā lín chòe chhiu, hō͘ lín khòaⁿ-kìⁿ, thang kì-tit Iâ-hô-hoa ê bēng-lēng lâi kiâⁿ i, bián-tit lín hòng-chhiòng ka-kī ê sim-ì, ka-kī ê ba̍k-chiu, lâi kiâⁿ îm-hēng, chhin-chhiūⁿ lín pêng-sò͘ só͘ kiâⁿ-ê chi̍t-iūⁿ;

40hō͘ lín記得來行我一切ê命令，成做聖歸lín ê上帝。hō͘ lín kì-tit lâi kiâⁿ Góa it-chhè ê bēng-lēng, chiâⁿ-chòe sèng kui lín ê Siōng-tè.

41我是耶和華lín ê上帝，chhōa lín出埃及地，beh做lín ê上帝；我是耶和華lín ê上帝。Góa sī Iâ-hô-hoa lín ê Siōng-tè, chhōa lín chhut Ai-ki̍p tōe, beh chòe lín ê Siōng-tè; Góa sī Iâ-hô-hoa lín ê Siōng-tè.

1利未ê曾孫，Ko-hat ê孫、Í-su-hap ê kiáⁿ Khó-la̍h，kap Liû-piān ê kiáⁿ孫中Í-lī-ap ê kiáⁿ Tāi-tan、A-PÍ-lân，kap Pí-le̍k ê kiáⁿ An，Lī-bī ê cheng-sun, Ko-hat ê sun, Í-su-hap ê kiáⁿ Khó-la̍h, kap Liû-piān ê kiáⁿ-sun-tiong Í-lī-ap ê kiáⁿ Tāi-tan, A-pí-lân, kap Pí-le̍k ê kiáⁿ An,

2結一黨，kap以色列中ê人，就是會中ê首領兩百五十人，是有名望受揀召赴會ê人，相kap起來tī摩西ê面前。kiat chi̍t-tóng, kap Í-sek-lia̍t tiong ê lâng, chiū-sī hōe-tiong ê siú-léng nn̄g-pah gō͘-cha̍p lâng, sī ū bêng-bōng siū kéng-tiàu hù-hōe ê lâng, saⁿ-kap khí-lâi tī Mô͘-se ê bīn-chêng.

3In聚集攻擊摩西、亞倫講：Lín僭權，全會ta̍k人lóng是聖，耶和華也tī in中間；lín啥事自高pôaⁿ過耶和華ê會眾ah？In chū-chi̍p kong-kek Mô͘-se A-lûn kóng, Lín chhiàm-koân, choân-hōe ta̍k-lâng lóng sī sèng, Iâ-hô-hoa iā tī in tiong-kan; lín siáⁿ-sū chū-ko pôaⁿ-kè Iâ-hô-hoa ê hōe-chiòng ah?

4摩西聽見chit-ê話就仆tī地裡，Mô͘-se thiaⁿ-kìⁿ chit ê ōe chiū phak tī tōe-ni̍h,

5對Khó-la̍h kap伊ê全黨ê人講：到明á早起，耶和華beh指示甚麼人是屬祂ê，甚麼人是聖，就beh hō͘ hit人親近祂；祂所揀選ê人beh hō͘ in親近祂。tùi Khó-la̍h kap i ê choân-tóng ê lâng kóng, Kàu bîn-á-chá-khí, Iâ-hô-hoa beh chí-sī sím-mi̍h lâng sī sio̍k I ê, sím-mi̍h lâng sī sèng, chiū beh hō͘ hit-lâng chhin-kūn I; I só͘ kéng-soán ê lâng beh hō͘ in chhin-kūn I.

6Lín tio̍h án-ni行；Khó-la̍h kap伊ê黨，tio̍h the̍h香爐；Lín tio̍h án-ni kiâⁿ; Khó-la̍h kap i ê tóng, tio̍h the̍h hiuⁿ-lô͘;

7明á日tī耶和華ê面前，用火貯tī Hit內面，hē香tī hit頂面；耶和華所揀ê人，伊beh做聖；lín利未ê kiáⁿ孫僭權lah。bîn-á-ji̍t tī Iâ-hô-hoa ê bīn-chêng, ēng hé tóe tī hí lāi-bīn, hē hiuⁿ tī hit téng-bīn; Iâ-hô-hoa só͘ kéng ê lâng, i beh chòe sèng; lín Lī-bī ê kiáⁿ-sun chhiàm-koân lah.

8摩西koh對Khó-la̍h講：利未ê kiáⁿ孫ah，lín tio̍h聽；Mô͘-se koh tùi Khó-la̍h kóng, Lī-bī ê kiáⁿ-sun ah, lín tio̍h thiaⁿ;

9以色列ê上帝，tùi以色列ê會中分別lín，hō͘ lín親近祂，辦耶和華會幕ê事，也khiā tī會眾ê面前來做in ê差用。Í-sek-lia̍t ê Siōng-tè, tùi Í-sek-lia̍t ê hōe-tiong hun-piat lín, hō͘ lín chhin-kūn I, pān Iâ-hô-hoa hōe-bō͘ ê sū, iā khiā tī hōe-chiòng ê bīn-chêng lâi chòe in ê chhe-ēng.

10祂koh hō͘你，kap你lóng總ê兄弟利未ê kiáⁿ孫，相kap親近祂，lín掠這做小khóa mah？Lín iáu-kú要求祭司ê職mah？I koh hō͘ lí, kap lí lóng-chóng ê hiaⁿ-tī Lī-bī ê kiáⁿ-sun, saⁿ-kap chhin-kūn I, lín lia̍h che chòe sió-khóa mah? Lín iáu-kú iau-kiû chè-si ê chit mah?

11所以你kap你ê黨聚集，是teh攻擊耶和華；亞倫是甚麼，lín竟然哀怨伊ah？Só͘-í lí kap lí ê tóng chū-chi̍p, sī teh kong-kek Iâ-hô-hoa; A-lûn sī sím-mi̍h, lín kéng-jiân ai-oàn i ah?

12摩西差人去叫Í-lī-ap ê kiáⁿ Tāi-tan、A-PÍ-lân；in講：阮m̄上去；Mô͘-se chhe lâng khì kiò Í-lī-ap ê kiáⁿ Tāi-tan, A-pí-lân; in kóng, Goán m̄ chiūⁿ-khì;

13你chhōa阮tùi常常流奶kap蜜ê地chiūⁿ來，beh tī曠野thâi死阮，這kiám是小khóa，你iáu-kú beh家己設立做人君來管轄阮mah？lí chhōa goán tùi siông-siông lâu lin kap bi̍t ê tōe chiūⁿ-lâi, beh tī khòng-iá thâi-sí goán, che kiám sī sió-khóa, lí iáu-kú beh ka-kī siat-li̍p chòe jîn-kun lâi koán-hat goán mah?

14Koh你無影chhōa阮到流奶kap蜜ê地，也無用田園，kap葡萄園，hō͘阮做業；總無你beh iah chiah-ê人ê目睭mah？阮無beh上去。Koh lí bô-iáⁿ chhōa goán kàu lâu lin kap bi̍t ê tōe, iā bô ēng chhân-hn̂g, kap phû-tô-hn̂g, hō͘ goán chòe gia̍p; chóng bô lí beh iah chiah ê lâng ê ba̍k-chiu mah? Goán bô beh chiūⁿ-khì.

15摩西受氣到極，對耶和華講：求你莫得監納in所獻ê；我並無牽 in一隻驢，也無害in一人。Mô͘-se siū-khì kàu-ke̍k, tùi Iâ-hô-hoa kóng, Kiû Lí bo̍h-tit kàm-la̍p in só͘ hiàn ê; góa pēng bô khan in chi̍t chiah lû, iā bô hāi in chi̍t-lâng.

16摩西對Khó-la̍h講：你kap你ê黨hiah-ê人，kap亞倫，明á日lóng tio̍h來khiā tī耶和華ê面前。Mô͘-se tùi Khó-la̍h kóng, Lí kap lí ê tóng hiah ê lâng, kap A-lûn, bîn-á-ji̍t lóng tio̍h lâi khiā tī Iâ-hô-hoa ê bīn-chêng.

17Lín ta̍k人帶伊ê香爐，共兩百五十個，hē香tī hit頂面，ta̍k人帶伊ê香爐到耶和華ê面前；你kap亞倫也各帶家己ê香爐。Lín ta̍k-lâng tòa i ê hiuⁿ-lô͘, kiōng nn̄g-pah gō͘-cha̍p ê, hē hiuⁿ tī hí téng-bīn, ta̍k-lâng tòa i ê hiuⁿ-lô͘ kàu Iâ-hô-hoa ê bīn-chêng; lí kap A-lûn iā kok tòa ka-kī ê hiuⁿ-lô͘.

18Tùi án-ni， in ta̍k人the̍h伊ê香爐，貯火tī hit內面，hē香tī hit頂面，kap摩西、亞倫khiā tī會幕門口。Tùi án-ni in ta̍k-lâng the̍h i ê hiuⁿ-lô͘, tóe hé tī hí lāi-bīn, hē hiuⁿ tī hit téng-bīn, kap Mô͘-se A-lûn khiā tī hōe-bō͘ mn̂g-kháu.

19Khó-la̍h招集會眾到會幕門口，攻擊in；耶和華ê榮光顯現tī會眾。Khó-la̍h chio-chi̍p hōe-chiòng kàu hōe-bō͘ mn̂g-kháu, kong-kek in; Iâ-hô-hoa ê êng-kng hián-hiān tī hōe-chiòng.

20耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

21Lín tio̍h離開chit-ê會中，我thang tī一目nih久ê中間剿滅in。Lín tio̍h lī-khui chit ê hōe-tiong, Góa thang tī chi̍t-ba̍k-nih-kú ê tiong-kan châu-bia̍t in.

22In就仆tī地裡，講：上帝ah，賞賜活命hō͘見若有肉體ê ê上帝ah，一人犯罪，你就beh受氣全會mah？In chiū phak tī tōe-ni̍h, kóng, Siōng-tè ah, siúⁿ-sù oa̍h-miā hō͘ kìⁿ-nā ū jio̍k-thé-ê ê Siōng-tè ah, chi̍t-lâng hoān-chōe, Lí chiū beh siū-khì choân-hōe mah?

23耶和華吩咐摩西講：Iâ-hô-hoa hoan-hù Mô͘-se kóng,

24你tio̍h吩咐會眾對in講，Lín tio̍h離開Khó-la̍h、Tāi-tan、A-PÍ-lân布棚ê四圍。Lí tio̍h hoan-hù hōe-chiòng tùi in kóng, Lín tio̍h lī-khui Khó-la̍h, Tāi-tan, A-pí-lân pò͘-pîⁿ ê sì-ûi.

25摩西起來去Tāi-tan、A-PÍ-lân hia，以色列ê長老也tè伊去。Mô͘-se khí-lâi khì Tāi-tan, A-pí-lân hia, Í-sek-lia̍t ê tiúⁿ-ló iā tè i khì.

26伊吩咐會眾講：Lín tio̍h離開chiah-ê pháiⁿ人ê布棚。in ê物件lóng m̄-thang摸，驚了lín也受滅tī in ê罪中。I hoan-hù hōe-chiòng kóng, Lín tio̍h lī-khui chiah ê pháiⁿ-lâng ê pò͘-pîⁿ. in ê mi̍h-kiāⁿ lóng m̄-thang bong, kiaⁿ-liáu lín iā siū bia̍t tī in ê chōe-tiong.

27In就離開Khó-la̍h、Tāi-tan、A-PÍ-lân布棚ê四圍；Tāi-tan、A-PÍ-lân kap in ê bó͘，in ê kiáⁿ，in ê細kiáⁿ，lóng出來khiā tī in家己ê布棚門口。In chiū lī-khui Khó-la̍h, Tāi-tan, A-pí-lân pò͘-pîⁿ ê sì-ûi; Tāi-tan, A-pí-lân kap in ê bó͘, in ê kiáⁿ, in ê sòe-kiáⁿ, lóng chhut-lâi khiā tī in ka-kī ê pò͘-pîⁿ mn̂g-kháu.

28摩西講：耶和華差我行這一切ê事，lín tùi án-ni， thang知，因為我m̄是自專來行。Mô͘-se kóng, Iâ-hô-hoa chhe Góa kiâⁿ che it-chhè ê sū, lín tùi án-ni thang chai, in-ūi góa m̄-sī chū-choan lâi kiâⁿ.

29設使chiah-ê人死親像平常人死，in所tú-tio̍h親像平常人所tú-tio̍h，就耶和華無差我。Siat-sú chiah ê lâng sí chhin-chhiūⁿ pêng-siông lâng sí, in só͘ tú-tio̍h chhin-chhiūⁿ pêng-siông lâng só͘ tú-tio̍h, chiū Iâ-hô-hoa bô chhe góa.

30設使耶和華做一項新ê事，hō͘ 地開嘴，將in kap一切屬in-ê lóng吞落去，hō͘ in活活墮落陰間，lín就知chiah-ê人是藐視耶和華。Siat-sú Iâ-hô-hoa chòe chi̍t-hāng sin ê sū, hō͘ tōe khui-chhùi, chiong in kap it-chhè sio̍k in ê lóng thun-lo̍h-khì, hō͘ in oa̍h-oa̍h tūi-lo̍h im-kan, lín chiū chai chiah ê lâng sī biáu-sī Iâ-hô-hoa.

31Chiah-ê話伊tú-á講soah，in下面ê地就裂開。Chiah ê ōe i tú-á kóng soah, in ē-bīn ê tōe chiū li̍h-khui.

32地就開嘴，將in kap in ê家眷，以及一切屬Khó-la̍h ê人丁財物，lóng吞落去。Tōe chiū khui-chhùi, chiong in kap in ê ke-koàn, í-ki̍p it-chhè sio̍k Khó-la̍h ê jîn-teng châi-bu̍t, lóng thun-lo̍h-khì.

33Hiah-ê人kap一切屬in-ê，lóng活活落陰間；地就koh合óa tī in ê頂面，in就tùi會中滅無。Hiah ê lâng kap it-chhè sio̍k in ê, lóng oa̍h-oa̍h lo̍h im-kan; tōe chiū koh ha̍p-óa tī in ê téng-bīn, in chiū tùi hōe-tiong bia̍t-bô.

34Tī in四圍ê以色列人，聽見in喉叫，就lóng逃走講：驚了地也kā咱吞落去。Tī in sì-ûi ê Í-sek-lia̍t lâng, thiaⁿ-kìⁿ in âu-kiò, chiū lóng tô-cháu kóng, Kiaⁿ-liáu tōe iā kā lán thun-lo̍h-khì.

35Koh有火tùi耶和華hia出，吞滅hiah-ê獻香 ê兩百五十人。Koh ū hé tùi Iâ-hô-hoa hia chhut, thun-bia̍t hiah ê hiàn-hiuⁿ ê nn̄g-pah gō͘-cha̍p lâng.

36耶和華吩咐摩西講：Iâ-hô-hoa hoan-hù Mô͘-se kóng,

37你tio̍h吩咐祭司亞倫ê kiáⁿ Í-lī-a-sat，tùi火中拾hiah-ê香爐起來，phah散tī-hia ê火；因為hiah-ê香爐已經是聖。Lí tio̍h hoan-hù chè-si A-lûn ê kiáⁿ Í-lī-a-sat, tùi hé-tiong khioh hiah ê hiuⁿ-lô͘ khí-lâi, phah-sòaⁿ tī-hia ê hé; in-ūi hiah ê hiuⁿ-lô͘ í-keng sī sèng.

38用hiah-ê犯罪害家己ê性命ê人ê香爐，搥做kui片，來安祭壇；因為in獻tī耶和華ê面前，所以是聖ê，thang hō͘以色列人做鑑戒。Ēng hiah ê hoān-chōe hāi ka-kī ê sìⁿ-miā ê lâng ê hiuⁿ-lô͘, tûi chòe kui-phìⁿ, lâi an chè-tôaⁿ; in-ūi in hiàn tī Iâ-hô-hoa ê bīn-chêng, só͘-í sī sèng-ê, thang hō͘ Í-sek-lia̍t lâng chòe kàm-kài.

39祭司Í-lī-a-sat就the̍h hiah-ê人所獻ê銅爐，搥做kui片，來安祭壇，hō͘以色列人做鑑戒；Chè-si Í-lī-a-sat chiū the̍h hiah ê lâng só͘ hiàn ê tâng-lô͘, tûi chòe kui-phìⁿ, lâi an chè-tôaⁿ, hō͘ Í-sek-lia̍t lâng chòe kàm-kài;

40hō͘外面人，m̄是屬亞倫ê後裔ê，bōe-thang óa近耶和華來燒香，免得in親像Khó-la̍h kap伊ê黨；這是照耶和華託摩西所命令ê。hō͘ gōa-bīn lâng, m̄-sī sio̍k A-lûn ê hō͘-è ê, bōe thang óa-kūn Iâ-hô-hoa lâi sio-hiuⁿ, bián-tit in chhin-chhiūⁿ Khó-la̍h kap i ê tóng; che sī chiàu Iâ-hô-hoa thok Mô͘-se só͘ bēng-lēng ê.

41隔日以色列人全會lóng哀怨摩西、亞倫，講：Lín害死耶和華ê百姓。Keh-ji̍t Í-sek-lia̍t lâng choân-hōe lóng ai-oàn Mô͘-se A-lûn, kóng, Lín hāi-sí Iâ-hô-hoa ê peh-sìⁿ.

42會眾聚集攻擊摩西、亞倫ê時，ǹg會幕看，看ah，有雲蓋伊，耶和華ê榮光顯現。Hōe-chiòng chū-chi̍p kong-kek Mô͘-se A-lûn ê sî, ǹg hōe-bō͘ khòaⁿ, khòaⁿ ah, ū hûn khàm i, Iâ-hô-hoa ê êng-kng hián-hiān.

43摩西、亞倫就到會幕前。Mô͘-se A-lûn chiū kàu hōe-bō͘ chêng.

44耶和華吩咐摩西講：Iâ-hô-hoa hoan-hù Mô͘-se kóng,

45Lín tio̍h離開chit-ê會中，hō͘我thang tī一目nih久ê中間滅無in；in兩人就仆tī地裡。Lín tio̍h lī-khui chit ê hōe-tiong, hō͘ Góa thang tī chi̍t-ba̍k-nih-kú ê tiong-kan bia̍t-bô in; in nn̄g-lâng chiū phak tī tōe-ni̍h.

46摩西對亞倫講：The̍h hit-ê香爐，用壇頂ê火貯tī hit中間，hē香tī hit頂面，緊緊帶到會眾hia，kā in贖罪；因為有大受氣tùi耶和華出，瘟疫已經發作。Mô͘-se tùi A-lûn kóng, The̍h hit ê hiuⁿ-lô͘, ēng tôaⁿ-téng ê hé tóe tī hí tiong-kan, hē hiuⁿ tī hí téng-bīn, kín-kín tòa kàu hōe-chiòng hia, kā in sio̍k-chōe; in-ūi ū tōa siū-khì tùi Iâ-hô-hoa chhut, un-e̍k í-keng hoat-choh.

47亞倫照摩西所講ê the̍h來，走到會中；看ah，瘟疫已經發tī百姓中，伊就hē香，kā百姓贖罪。A-lûn chiàu Mô͘-se só͘-kóng-ê the̍h-lâi, cháu kàu hōe-tiong; khòaⁿ ah, un-e̍k í-keng hoat tī peh-sìⁿ-tiong, i chiū hē hiuⁿ, kā peh-sìⁿ sio̍k-chōe.

48伊khiā tī活人死人ê中間，瘟疫就soah。I khiā tī oa̍h-lâng sí-lâng ê tiong-kan, un-e̍k chiū soah.

49除去因為Khó-la̍h ê tāi-chì死ê以外，tú-tio̍h瘟疫死ê，共有一萬四千七百人。Tû-khì in-ūi Khó-la̍h ê tāi-chì sí-ê í-gōa, tú-tio̍h un-e̍k sí ê, kiōng ū chi̍t-bān sì-chheng chhit-pah lâng.

50亞倫tò來到摩西hia，到會幕門，瘟疫chiah soah。A-lûn tò-lâi kàu Mô͘-se hia, kàu hōe-bō͘ mn̂g, un-e̍k chiah soah.