1利未ê曾孫，Ko-hat ê孫、Í-su-hap ê kiáⁿ Khó-la̍h，kap Liû-piān ê kiáⁿ孫中Í-lī-ap ê kiáⁿ Tāi-tan、A-PÍ-lân，kap Pí-le̍k ê kiáⁿ An，Lī-bī ê cheng-sun, Ko-hat ê sun, Í-su-hap ê kiáⁿ Khó-la̍h, kap Liû-piān ê kiáⁿ-sun-tiong Í-lī-ap ê kiáⁿ Tāi-tan, A-pí-lân, kap Pí-le̍k ê kiáⁿ An,

2結一黨，kap以色列中ê人，就是會中ê首領兩百五十人，是有名望受揀召赴會ê人，相kap起來tī摩西ê面前。kiat chi̍t-tóng, kap Í-sek-lia̍t tiong ê lâng, chiū-sī hōe-tiong ê siú-léng nn̄g-pah gō͘-cha̍p lâng, sī ū bêng-bōng siū kéng-tiàu hù-hōe ê lâng, saⁿ-kap khí-lâi tī Mô͘-se ê bīn-chêng.

3In聚集攻擊摩西、亞倫講：Lín僭權，全會ta̍k人lóng是聖，耶和華也tī in中間；lín啥事自高pôaⁿ過耶和華ê會眾ah？In chū-chi̍p kong-kek Mô͘-se A-lûn kóng, Lín chhiàm-koân, choân-hōe ta̍k-lâng lóng sī sèng, Iâ-hô-hoa iā tī in tiong-kan; lín siáⁿ-sū chū-ko pôaⁿ-kè Iâ-hô-hoa ê hōe-chiòng ah?

4摩西聽見chit-ê話就仆tī地裡，Mô͘-se thiaⁿ-kìⁿ chit ê ōe chiū phak tī tōe-ni̍h,

5對Khó-la̍h kap伊ê全黨ê人講：到明á早起，耶和華beh指示甚麼人是屬祂ê，甚麼人是聖，就beh hō͘ hit人親近祂；祂所揀選ê人beh hō͘ in親近祂。tùi Khó-la̍h kap i ê choân-tóng ê lâng kóng, Kàu bîn-á-chá-khí, Iâ-hô-hoa beh chí-sī sím-mi̍h lâng sī sio̍k I ê, sím-mi̍h lâng sī sèng, chiū beh hō͘ hit-lâng chhin-kūn I; I só͘ kéng-soán ê lâng beh hō͘ in chhin-kūn I.

6Lín tio̍h án-ni行；Khó-la̍h kap伊ê黨，tio̍h the̍h香爐；Lín tio̍h án-ni kiâⁿ; Khó-la̍h kap i ê tóng, tio̍h the̍h hiuⁿ-lô͘;

7明á日tī耶和華ê面前，用火貯tī Hit內面，hē香tī hit頂面；耶和華所揀ê人，伊beh做聖；lín利未ê kiáⁿ孫僭權lah。bîn-á-ji̍t tī Iâ-hô-hoa ê bīn-chêng, ēng hé tóe tī hí lāi-bīn, hē hiuⁿ tī hit téng-bīn; Iâ-hô-hoa só͘ kéng ê lâng, i beh chòe sèng; lín Lī-bī ê kiáⁿ-sun chhiàm-koân lah.

8摩西koh對Khó-la̍h講：利未ê kiáⁿ孫ah，lín tio̍h聽；Mô͘-se koh tùi Khó-la̍h kóng, Lī-bī ê kiáⁿ-sun ah, lín tio̍h thiaⁿ;

9以色列ê上帝，tùi以色列ê會中分別lín，hō͘ lín親近祂，辦耶和華會幕ê事，也khiā tī會眾ê面前來做in ê差用。Í-sek-lia̍t ê Siōng-tè, tùi Í-sek-lia̍t ê hōe-tiong hun-piat lín, hō͘ lín chhin-kūn I, pān Iâ-hô-hoa hōe-bō͘ ê sū, iā khiā tī hōe-chiòng ê bīn-chêng lâi chòe in ê chhe-ēng.

10祂koh hō͘你，kap你lóng總ê兄弟利未ê kiáⁿ孫，相kap親近祂，lín掠這做小khóa mah？Lín iáu-kú要求祭司ê職mah？I koh hō͘ lí, kap lí lóng-chóng ê hiaⁿ-tī Lī-bī ê kiáⁿ-sun, saⁿ-kap chhin-kūn I, lín lia̍h che chòe sió-khóa mah? Lín iáu-kú iau-kiû chè-si ê chit mah?

11所以你kap你ê黨聚集，是teh攻擊耶和華；亞倫是甚麼，lín竟然哀怨伊ah？Só͘-í lí kap lí ê tóng chū-chi̍p, sī teh kong-kek Iâ-hô-hoa; A-lûn sī sím-mi̍h, lín kéng-jiân ai-oàn i ah?

12摩西差人去叫Í-lī-ap ê kiáⁿ Tāi-tan、A-PÍ-lân；in講：阮m̄上去；Mô͘-se chhe lâng khì kiò Í-lī-ap ê kiáⁿ Tāi-tan, A-pí-lân; in kóng, Goán m̄ chiūⁿ-khì;

13你chhōa阮tùi常常流奶kap蜜ê地chiūⁿ來，beh tī曠野thâi死阮，這kiám是小khóa，你iáu-kú beh家己設立做人君來管轄阮mah？lí chhōa goán tùi siông-siông lâu lin kap bi̍t ê tōe chiūⁿ-lâi, beh tī khòng-iá thâi-sí goán, che kiám sī sió-khóa, lí iáu-kú beh ka-kī siat-li̍p chòe jîn-kun lâi koán-hat goán mah?

14Koh你無影chhōa阮到流奶kap蜜ê地，也無用田園，kap葡萄園，hō͘阮做業；總無你beh iah chiah-ê人ê目睭mah？阮無beh上去。Koh lí bô-iáⁿ chhōa goán kàu lâu lin kap bi̍t ê tōe, iā bô ēng chhân-hn̂g, kap phû-tô-hn̂g, hō͘ goán chòe gia̍p; chóng bô lí beh iah chiah ê lâng ê ba̍k-chiu mah? Goán bô beh chiūⁿ-khì.

15摩西受氣到極，對耶和華講：求你莫得監納in所獻ê；我並無牽 in一隻驢，也無害in一人。Mô͘-se siū-khì kàu-ke̍k, tùi Iâ-hô-hoa kóng, Kiû Lí bo̍h-tit kàm-la̍p in só͘ hiàn ê; góa pēng bô khan in chi̍t chiah lû, iā bô hāi in chi̍t-lâng.

16摩西對Khó-la̍h講：你kap你ê黨hiah-ê人，kap亞倫，明á日lóng tio̍h來khiā tī耶和華ê面前。Mô͘-se tùi Khó-la̍h kóng, Lí kap lí ê tóng hiah ê lâng, kap A-lûn, bîn-á-ji̍t lóng tio̍h lâi khiā tī Iâ-hô-hoa ê bīn-chêng.

17Lín ta̍k人帶伊ê香爐，共兩百五十個，hē香tī hit頂面，ta̍k人帶伊ê香爐到耶和華ê面前；你kap亞倫也各帶家己ê香爐。Lín ta̍k-lâng tòa i ê hiuⁿ-lô͘, kiōng nn̄g-pah gō͘-cha̍p ê, hē hiuⁿ tī hí téng-bīn, ta̍k-lâng tòa i ê hiuⁿ-lô͘ kàu Iâ-hô-hoa ê bīn-chêng; lí kap A-lûn iā kok tòa ka-kī ê hiuⁿ-lô͘.

18Tùi án-ni， in ta̍k人the̍h伊ê香爐，貯火tī hit內面，hē香tī hit頂面，kap摩西、亞倫khiā tī會幕門口。Tùi án-ni in ta̍k-lâng the̍h i ê hiuⁿ-lô͘, tóe hé tī hí lāi-bīn, hē hiuⁿ tī hit téng-bīn, kap Mô͘-se A-lûn khiā tī hōe-bō͘ mn̂g-kháu.

19Khó-la̍h招集會眾到會幕門口，攻擊in；耶和華ê榮光顯現tī會眾。Khó-la̍h chio-chi̍p hōe-chiòng kàu hōe-bō͘ mn̂g-kháu, kong-kek in; Iâ-hô-hoa ê êng-kng hián-hiān tī hōe-chiòng.

20耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

21Lín tio̍h離開chit-ê會中，我thang tī一目nih久ê中間剿滅in。Lín tio̍h lī-khui chit ê hōe-tiong, Góa thang tī chi̍t-ba̍k-nih-kú ê tiong-kan châu-bia̍t in.

22In就仆tī地裡，講：上帝ah，賞賜活命hō͘見若有肉體ê ê上帝ah，一人犯罪，你就beh受氣全會mah？In chiū phak tī tōe-ni̍h, kóng, Siōng-tè ah, siúⁿ-sù oa̍h-miā hō͘ kìⁿ-nā ū jio̍k-thé-ê ê Siōng-tè ah, chi̍t-lâng hoān-chōe, Lí chiū beh siū-khì choân-hōe mah?

23耶和華吩咐摩西講：Iâ-hô-hoa hoan-hù Mô͘-se kóng,

24你tio̍h吩咐會眾對in講，Lín tio̍h離開Khó-la̍h、Tāi-tan、A-PÍ-lân布棚ê四圍。Lí tio̍h hoan-hù hōe-chiòng tùi in kóng, Lín tio̍h lī-khui Khó-la̍h, Tāi-tan, A-pí-lân pò͘-pîⁿ ê sì-ûi.

25摩西起來去Tāi-tan、A-PÍ-lân hia，以色列ê長老也tè伊去。Mô͘-se khí-lâi khì Tāi-tan, A-pí-lân hia, Í-sek-lia̍t ê tiúⁿ-ló iā tè i khì.

26伊吩咐會眾講：Lín tio̍h離開chiah-ê pháiⁿ人ê布棚。in ê物件lóng m̄-thang摸，驚了lín也受滅tī in ê罪中。I hoan-hù hōe-chiòng kóng, Lín tio̍h lī-khui chiah ê pháiⁿ-lâng ê pò͘-pîⁿ. in ê mi̍h-kiāⁿ lóng m̄-thang bong, kiaⁿ-liáu lín iā siū bia̍t tī in ê chōe-tiong.

27In就離開Khó-la̍h、Tāi-tan、A-PÍ-lân布棚ê四圍；Tāi-tan、A-PÍ-lân kap in ê bó͘，in ê kiáⁿ，in ê細kiáⁿ，lóng出來khiā tī in家己ê布棚門口。In chiū lī-khui Khó-la̍h, Tāi-tan, A-pí-lân pò͘-pîⁿ ê sì-ûi; Tāi-tan, A-pí-lân kap in ê bó͘, in ê kiáⁿ, in ê sòe-kiáⁿ, lóng chhut-lâi khiā tī in ka-kī ê pò͘-pîⁿ mn̂g-kháu.

28摩西講：耶和華差我行這一切ê事，lín tùi án-ni， thang知，因為我m̄是自專來行。Mô͘-se kóng, Iâ-hô-hoa chhe Góa kiâⁿ che it-chhè ê sū, lín tùi án-ni thang chai, in-ūi góa m̄-sī chū-choan lâi kiâⁿ.

29設使chiah-ê人死親像平常人死，in所tú-tio̍h親像平常人所tú-tio̍h，就耶和華無差我。Siat-sú chiah ê lâng sí chhin-chhiūⁿ pêng-siông lâng sí, in só͘ tú-tio̍h chhin-chhiūⁿ pêng-siông lâng só͘ tú-tio̍h, chiū Iâ-hô-hoa bô chhe góa.

30設使耶和華做一項新ê事，hō͘ 地開嘴，將in kap一切屬in-ê lóng吞落去，hō͘ in活活墮落陰間，lín就知chiah-ê人是藐視耶和華。Siat-sú Iâ-hô-hoa chòe chi̍t-hāng sin ê sū, hō͘ tōe khui-chhùi, chiong in kap it-chhè sio̍k in ê lóng thun-lo̍h-khì, hō͘ in oa̍h-oa̍h tūi-lo̍h im-kan, lín chiū chai chiah ê lâng sī biáu-sī Iâ-hô-hoa.

31Chiah-ê話伊tú-á講soah，in下面ê地就裂開。Chiah ê ōe i tú-á kóng soah, in ē-bīn ê tōe chiū li̍h-khui.

32地就開嘴，將in kap in ê家眷，以及一切屬Khó-la̍h ê人丁財物，lóng吞落去。Tōe chiū khui-chhùi, chiong in kap in ê ke-koàn, í-ki̍p it-chhè sio̍k Khó-la̍h ê jîn-teng châi-bu̍t, lóng thun-lo̍h-khì.

33Hiah-ê人kap一切屬in-ê，lóng活活落陰間；地就koh合óa tī in ê頂面，in就tùi會中滅無。Hiah ê lâng kap it-chhè sio̍k in ê, lóng oa̍h-oa̍h lo̍h im-kan; tōe chiū koh ha̍p-óa tī in ê téng-bīn, in chiū tùi hōe-tiong bia̍t-bô.

34Tī in四圍ê以色列人，聽見in喉叫，就lóng逃走講：驚了地也kā咱吞落去。Tī in sì-ûi ê Í-sek-lia̍t lâng, thiaⁿ-kìⁿ in âu-kiò, chiū lóng tô-cháu kóng, Kiaⁿ-liáu tōe iā kā lán thun-lo̍h-khì.

35Koh有火tùi耶和華hia出，吞滅hiah-ê獻香 ê兩百五十人。Koh ū hé tùi Iâ-hô-hoa hia chhut, thun-bia̍t hiah ê hiàn-hiuⁿ ê nn̄g-pah gō͘-cha̍p lâng.

36耶和華吩咐摩西講：Iâ-hô-hoa hoan-hù Mô͘-se kóng,

37你tio̍h吩咐祭司亞倫ê kiáⁿ Í-lī-a-sat，tùi火中拾hiah-ê香爐起來，phah散tī-hia ê火；因為hiah-ê香爐已經是聖。Lí tio̍h hoan-hù chè-si A-lûn ê kiáⁿ Í-lī-a-sat, tùi hé-tiong khioh hiah ê hiuⁿ-lô͘ khí-lâi, phah-sòaⁿ tī-hia ê hé; in-ūi hiah ê hiuⁿ-lô͘ í-keng sī sèng.

38用hiah-ê犯罪害家己ê性命ê人ê香爐，搥做kui片，來安祭壇；因為in獻tī耶和華ê面前，所以是聖ê，thang hō͘以色列人做鑑戒。Ēng hiah ê hoān-chōe hāi ka-kī ê sìⁿ-miā ê lâng ê hiuⁿ-lô͘, tûi chòe kui-phìⁿ, lâi an chè-tôaⁿ; in-ūi in hiàn tī Iâ-hô-hoa ê bīn-chêng, só͘-í sī sèng-ê, thang hō͘ Í-sek-lia̍t lâng chòe kàm-kài.

39祭司Í-lī-a-sat就the̍h hiah-ê人所獻ê銅爐，搥做kui片，來安祭壇，hō͘以色列人做鑑戒；Chè-si Í-lī-a-sat chiū the̍h hiah ê lâng só͘ hiàn ê tâng-lô͘, tûi chòe kui-phìⁿ, lâi an chè-tôaⁿ, hō͘ Í-sek-lia̍t lâng chòe kàm-kài;

40hō͘外面人，m̄是屬亞倫ê後裔ê，bōe-thang óa近耶和華來燒香，免得in親像Khó-la̍h kap伊ê黨；這是照耶和華託摩西所命令ê。hō͘ gōa-bīn lâng, m̄-sī sio̍k A-lûn ê hō͘-è ê, bōe thang óa-kūn Iâ-hô-hoa lâi sio-hiuⁿ, bián-tit in chhin-chhiūⁿ Khó-la̍h kap i ê tóng; che sī chiàu Iâ-hô-hoa thok Mô͘-se só͘ bēng-lēng ê.

41隔日以色列人全會lóng哀怨摩西、亞倫，講：Lín害死耶和華ê百姓。Keh-ji̍t Í-sek-lia̍t lâng choân-hōe lóng ai-oàn Mô͘-se A-lûn, kóng, Lín hāi-sí Iâ-hô-hoa ê peh-sìⁿ.

42會眾聚集攻擊摩西、亞倫ê時，ǹg會幕看，看ah，有雲蓋伊，耶和華ê榮光顯現。Hōe-chiòng chū-chi̍p kong-kek Mô͘-se A-lûn ê sî, ǹg hōe-bō͘ khòaⁿ, khòaⁿ ah, ū hûn khàm i, Iâ-hô-hoa ê êng-kng hián-hiān.

43摩西、亞倫就到會幕前。Mô͘-se A-lûn chiū kàu hōe-bō͘ chêng.

44耶和華吩咐摩西講：Iâ-hô-hoa hoan-hù Mô͘-se kóng,

45Lín tio̍h離開chit-ê會中，hō͘我thang tī一目nih久ê中間滅無in；in兩人就仆tī地裡。Lín tio̍h lī-khui chit ê hōe-tiong, hō͘ Góa thang tī chi̍t-ba̍k-nih-kú ê tiong-kan bia̍t-bô in; in nn̄g-lâng chiū phak tī tōe-ni̍h.

46摩西對亞倫講：The̍h hit-ê香爐，用壇頂ê火貯tī hit中間，hē香tī hit頂面，緊緊帶到會眾hia，kā in贖罪；因為有大受氣tùi耶和華出，瘟疫已經發作。Mô͘-se tùi A-lûn kóng, The̍h hit ê hiuⁿ-lô͘, ēng tôaⁿ-téng ê hé tóe tī hí tiong-kan, hē hiuⁿ tī hí téng-bīn, kín-kín tòa kàu hōe-chiòng hia, kā in sio̍k-chōe; in-ūi ū tōa siū-khì tùi Iâ-hô-hoa chhut, un-e̍k í-keng hoat-choh.

47亞倫照摩西所講ê the̍h來，走到會中；看ah，瘟疫已經發tī百姓中，伊就hē香，kā百姓贖罪。A-lûn chiàu Mô͘-se só͘-kóng-ê the̍h-lâi, cháu kàu hōe-tiong; khòaⁿ ah, un-e̍k í-keng hoat tī peh-sìⁿ-tiong, i chiū hē hiuⁿ, kā peh-sìⁿ sio̍k-chōe.

48伊khiā tī活人死人ê中間，瘟疫就soah。I khiā tī oa̍h-lâng sí-lâng ê tiong-kan, un-e̍k chiū soah.

49除去因為Khó-la̍h ê tāi-chì死ê以外，tú-tio̍h瘟疫死ê，共有一萬四千七百人。Tû-khì in-ūi Khó-la̍h ê tāi-chì sí-ê í-gōa, tú-tio̍h un-e̍k sí ê, kiōng ū chi̍t-bān sì-chheng chhit-pah lâng.

50亞倫tò來到摩西hia，到會幕門，瘟疫chiah soah。A-lûn tò-lâi kàu Mô͘-se hia, kàu hōe-bō͘ mn̂g, un-e̍k chiah soah.

1耶和華吩咐摩西講：Iâ-hô-hoa hoan-hù Mô͘-se kóng,

2你kā以色列人講：對in kia̍h柺á，ta̍k支派一支，就是對hiah-ê支派ê首領，共kia̍h十二支；你寫ta̍k人ê名tī伊ê柺á。Lí kā Í-sek-lia̍t lâng kóng, tùi in kia̍h koáiⁿ-á, ta̍k chi-phài chi̍t-ki, chiū-sī tùi hiah ê chi-phài ê siú-léng, kiōng kia̍h cha̍p-jī ki; lí siá ta̍k-lâng ê miâ tī i ê koáiⁿ-á.

3Tī利未hit支柺á tio̍h寫亞倫ê名；因為ta̍k支派ê頭人lóng有一支柺á。Tī Lī-bī hit-ki koáiⁿ-á tio̍h siá A-lûn ê miâ; in-ūi ta̍k chi-phài ê thâu-lâng lóng ū chi̍t ki koáiⁿ-á.

4你tio̍h將hiah-ê hē tī會幕內法櫃ê頭前，就是我kap lín相會ê所在。Lí tio̍h chiong hiah-ê hē tī hōe-bō͘-lāi hoat-kūi ê thâu-chêng, chiū-sī Góa kap lín siong-hōe ê só͘-chāi.

5我所揀hit人，伊ê柺á behpuh芽；án-ni我beh hō͘以色列人哀怨ê話，就是in所哀怨lín ê話，lóng soah，無koh hō͘我聽見。Góa só͘ kéng hit-lâng, i ê koáiⁿ-á beh puh-gê; án-ni Góa beh hō͘ Í-sek-lia̍t lâng ai-oàn ê ōe, chiū-sī in só͘ ai-oàn lín ê ōe, lóng soah, bô koh hō͘ Góa thiaⁿ-kìⁿ.

6摩西就kā以色列人講；in ê首領就用柺á交hō͘伊，照in ê支派一個首領一支，共十二支柺á；亞倫ê柺á也tī hiah-ê柺á ê中間。Mô͘-se chiū kā Í-sek-lia̍t lâng kóng; in ê siú-léng chiū ēng koáiⁿ-á kau hō͘ i, chiàu in ê chi-phài chi̍t ê siú-léng chi̍t-ki, kiōng cha̍p-jī ki koáiⁿ-á; A-lûn ê koáiⁿ-á iā tī hiah ê koáiⁿ-á ê tiong-kan.

7摩西就將hiah-ê柺á hē tī法櫃ê布棚內，tī耶和華ê面前。Mô͘-se chiū chiong hiah ê koáiⁿ-á hē tī hoat-kūi ê pò͘-pîⁿ-lāi, tī Iâ-hô-hoa ê bīn-chêng.

8明á日摩西入去法櫃ê布棚；看ah，屬利未ê家，亞倫ê柺á，已經puh芽，生花蕾，開花，結成杏仁。Bîn-á-ji̍t Mô͘-se ji̍p-khì hoat-kūi ê pò͘-pîⁿ; khòaⁿ ah, sio̍k Lī-bī ê ke, A-lûn ê koáiⁿ-á, í-keng puh-gê, siⁿ hoe-m̂, khui-hoe, kiat-chiâⁿ hēng-jîn.

9摩西tùi耶和華ê面前kia̍h hiah-ê柺á出來，到以色列ê眾人hia；in看見ta̍k人kia̍h in ê柺á。Mô͘-se tùi Iâ-hô-hoa ê bīn-chêng kia̍h hiah ê koáiⁿ-á chhut-lâi, kàu Í-sek-lia̍t ê chèng-lâng hia; in khòaⁿ-kìⁿ ta̍k-lâng kia̍h in ê koáiⁿ-á.

10耶和華對摩西講：用亞倫ê柺á猶原hē tī法櫃前，留teh，做chiah-ê悖逆ê人ê鑑戒；án-ni你就hō͘ in對我哀怨ê話soah，免得in死無。Iâ-hô-hoa tùi Mô͘-se kóng, Ēng A-lûn ê koáiⁿ-á iû-goân hē tī hoat-kūi chêng, lâu-teh, chòe chiah ê pōe-ge̍k ê lâng ê kàm-kài; án-ni lí chiū hō͘ in tùi Góa ai-oàn ê ōe soah, bián-tit in sí-bô.

11摩西án-ni行，是照耶和華所命令ê來行。Mô͘-se án-ni kiâⁿ, sī chiàu Iâ-hô-hoa só͘ bēng-lēng-ê lâi kiâⁿ.

12以色列人對摩西講：看ah，阮死lah，阮滅無lah，lóng滅無lah。Í-sek-lia̍t lâng tùi Mô͘-se kóng, Khòaⁿ ah, goán sí lah, goán bia̍t-bô lah, lóng bia̍t-bô lah.

13見若óa近，就是óa近耶和華ê會幕ê，lóng死；阮beh lóng總死mah？Kìⁿ-nā óa-kūn, chiū-sī óa-kūn Iâ-hô-hoa ê hōe-bō͘ ê, lóng sí; goán beh lóng-chóng sí mah?

1耶和華對亞倫講：你kap你chiah-ê kiáⁿ，kap你ê本族，tio̍h相kap擔當聖所ê罪；你kap你chiah-ê kiáⁿ也tio̍h擔當lín祭司職ê罪。Iâ-hô-hoa tùi A-lûn kóng, Lí kap lí chiah ê kiáⁿ, kap lí ê pún-cho̍k, tio̍h saⁿ-kap tam-tng sèng-só͘ ê chōe; lí kap lí chiah ê kiáⁿ iā tio̍h tam-tng lín chè-si-chit ê chōe.

2你tio̍h chhōa你ê兄弟利未ê支派，你ê祖公ê支派，進前來，hō͘ in kap你連合來伺候你；但是你kap你ê kiáⁿ，lóng tio̍h tī法櫃ê會幕前。Lí tio̍h chhōa lí ê hiaⁿ-tī Lī-bī ê chi-phài, lí ê chó͘-kong ê chi-phài, chìn-chêng lâi, hō͘ in kap lí liân-ha̍p lâi su-hāu lí; nā-sī lí kap lí ê kiáⁿ, lóng tio̍h tī hoat-kūi ê hōe-bō͘-chêng.

3In tio̍h做你ê差用，也tio̍h做布棚ê差用；獨獨m̄-thang近聖所ê器具kap壇，免得in kap lín lóng死。In tio̍h chòe lí ê chhe-ēng, iā tio̍h chòe Pò͘-pîⁿ ê chhe-ēng; to̍k-to̍k m̄-thang kūn sèng-só͘ ê khì-kū kap tôaⁿ, bián-tit in kap lín lóng sí.

4In tio̍h kap你連合，也tio̍h做會幕ê差用，料理布棚lóng總ê工；獨獨外面人m̄-thang óa近lín。In tio̍h kap lí liân-ha̍p, iā tio̍h chòe hōe-bō͘ ê chhe-ēng, liāu-lí Pò͘-pîⁿ lóng-chóng ê kang; to̍k-to̍k gōa-bīn lâng m̄-thang óa-kūn lín.

5Lín tio̍h做聖所ê差用，kap壇ê差用，免得受氣koh到tī以色列人。Lín tio̍h chòe sèng-só͘ ê chhe-ēng, kap tôaⁿ ê chhe-ēng, bián-tit siū-khì koh kàu tī Í-sek-lia̍t lâng.

6我，看ah，我bat tùi以色列人ê中間揀lín ê兄弟利未人來賞賜lín，kap 歸耶和華，來料理會幕ê工。Góa, khòaⁿ ah, Góa bat tùi Í-sek-lia̍t lâng ê tiong-kan kéng lín ê hiaⁿ-tī Lī-bī lâng lâi siúⁿ-sù lín, kap kui Iâ-hô-hoa, lâi liāu-lí hōe-bō͘ ê kang.

7所以你kap你ê kiáⁿ tio̍h相kap守祭司ê chit，料理壇kap帳籬內一切ê工；lín tio̍h án-ni服務；我已經賞賜你祭司ê職任ê工，親像送物；見若外面人近óa-ê，的確hō͘伊死。Só͘-í lí kap lí ê kiáⁿ tio̍h saⁿ-kap siú chè-si ê chit, liāu-lí tôaⁿ kap tiùⁿ-lî-lāi it-chhè ê kang; lín tio̍h án-ni ho̍k-bū; Góa í-keng siúⁿ-sù lí chè-si ê chit-jīm ê kang, chhin-chhiūⁿ sàng mi̍h; kìⁿ-nā gōa-bīn lâng kūn-óa-ê, tek-khak hō͘ i sí.

8耶和華koh kā亞倫講：我，看ah，我已經用獻hō͘我ê舉祭，就是以色列人分別做聖ê物，交你守伊；因為你受抹油，chiah-ê物歸你kap你ê kiáⁿ孫，做永遠ê份額。Iâ-hô-hoa koh kā A-lûn kóng, Góa, khòaⁿ ah, Góa í-keng ēng hiàn hō͘ Góa ê kú-chè, chiū-sī Í-sek-lia̍t lâng hun-piat chòe-sèng ê mi̍h, kau lí siú i; in-ūi lí siū boah-iû, chiah ê mi̍h kui lí kap lí ê kiáⁿ-sun, chòe éng-oán ê hūn-gia̍h.

9無經過火，至聖ê物ê中間，屬tī你ê是chiah-ê：見若in ê禮物，in ê素祭，in ê贖罪祭，in ê補過失祭，in所獻hō͘我ê，lóng做至聖，歸hō͘你kap你ê kiáⁿ孫。Bô keng-kè hé, chì-sèng ê mi̍h ê tiong-kan, sio̍k tī lí-ê sī chiah-ê: kìⁿ-nā in ê lé-mi̍h, in ê sò͘-chè, in ê sio̍k-chōe-chè, in ê pó͘-kè-sit-chè, in só͘ hiàn hō͘ Góa ê, lóng chòe chì-sèng, kui hō͘ lí kap lí ê kiáⁿ-sun.

10你tio̍h看chiah-ê做至聖來食伊；見若ta-po͘丁lóng thang食；你tio̍h掠chit-ê物做聖。Lí tio̍h khòaⁿ chiah-ê chòe chì-sèng lâi chia̍h i; kìⁿ-nā ta-po͘-teng lóng thang chia̍h; lí tio̍h lia̍h chit ê mi̍h chòe-sèng.

11Chiah-ê也是你ê，禮物ê舉祭，以及以色列人所獻ê搖祭，我lóng賞賜你，kap你ê kiáⁿ，cha-bó͘-kiáⁿ，做永遠ê份額；見若tī你家中清氣ê人lóng thang食。Chiah-ê iā sī lí ê, lé-mi̍h ê kú-chè, í-ki̍p Í-sek-lia̍t lâng só͘ hiàn ê iô-chè, Góa lóng siúⁿ-sù lí, kap lí ê kiáⁿ, cha-bó͘-kiáⁿ, chòe éng-oán ê hūn-gia̍h; kìⁿ-nā tī lí ke-tiong chheng-khì ê lâng lóng thang chia̍h.

12Siōng好ê油，燒n̄g好ê酒，燒n̄g好ê五穀，就是in起頭熟獻hō͘耶和華ê，我lóng賞賜你。Siōng-hó ê iû, siōng-hó ê chiú, siōng-hó ê gō͘-kak, chiū-sī in khí-thâu-se̍k hiàn hō͘ Iâ-hô-hoa ê, Góa lóng siúⁿ-sù lí.

13In ê地起頭熟 ê物，所獻hō͘耶和華ê，lóng歸hō͘你；你家內清氣ê人lóng thang食。In ê tōe khí-thâu-se̍k ê mi̍h, só͘ hiàn hō͘ Iâ-hô-hoa ê, lóng kui hō͘ lí; lí ke-lāi chheng-khì ê lâng lóng thang chia̍h.

14以色列中見若受分別獻盡ê，lóng tio̍h歸hō͘你。Í-sek-lia̍t tiong kìⁿ-nā siū hun-piat hiàn-chīn ê, lóng tio̍h kui hō͘ lí.

15見若有肉體頭chiūⁿ生ê，無論人á是cheng-siⁿ，in所獻hō͘耶和華ê，lóng歸tī你；獨獨人頭chiūⁿ生ê你tio̍h屬伊；無清氣ê cheng-siⁿ頭chiūⁿ生ê，你也tio̍h屬伊。Kìⁿ-nā ū jio̍k-thé thâu-chiūⁿ-siⁿ-ê, bô-lūn lâng á-sī cheng-siⁿ, in só͘ hiàn hō͘ Iâ-hô-hoa ê, lóng kui tī lí; to̍k-to̍k lâng thâu-chiūⁿ-siⁿ-ê lí tio̍h sio̍k i; bô chheng-khì ê cheng-siⁿ thâu-chiūⁿ-siⁿ-ê, lí iā tio̍h sio̍k i.

16Tī滿月以外所tio̍h屬ê，tio̍h照理所kó͘ ê kè，照聖所ê sià-khek-le̍k，用銀gō͘ sià-khek-le̍k贖回伊；一sià-khek-le̍k是二十kùi-la̍h。Tī móa-ge̍h í-gōa só͘ tio̍h sio̍k ê, tio̍h chiàu lí só͘ kó͘ ê kè, chiàu sèng-só͘ ê sià-khek-le̍k, ēng gûn gō͘ sià-khek-le̍k sio̍k-hôe i; chi̍t sià-khek-le̍k sī jī-cha̍p kùi-la̍h.

17獨獨頭chiūⁿ生ê牛，頭chiūⁿ生ê綿羊，頭chiūⁿ生ê山羊，你m̄-thang贖；這是聖，tio̍h hiù伊ê血tī壇裡，tio̍h燒伊ê油做火祭，做芳芳獻hō͘耶和華。To̍k-to̍k thâu-chiūⁿ-siⁿ ê gû, thâu-chiūⁿ-siⁿ ê mî-iûⁿ, thâu-chiūⁿ-siⁿ ê soaⁿ-iûⁿ, lí m̄-thang sio̍k; che sī sèng, tio̍h hiù i ê huih tī tôaⁿ-ni̍h, tio̍h sio i ê iû chòe hé-chè, chòe phang-phang hiàn hō͘ Iâ-hô-hoa.

18hiah-ê肉歸tī你，親像所搖 ê胸kap正腿歸tī你一樣。Hiah ê bah kui tī lí, chhin-chhiūⁿ só͘ iô ê heng kap chiàⁿ-thúi kui tī lí chi̍t-iūⁿ.

19見若聖物ê舉祭，是以色列人獻hō͘耶和華ê，我lóng賞賜你，kap你ê kiáⁿ，cha-bó͘-kiáⁿ，做永遠得tio̍h ê份額；這是hō͘你kap你ê後裔，tī耶和華ê面前，做永遠bōe廢ê約。Kìⁿ-nā sèng-mi̍h ê kú-chè, sī Í-sek-lia̍t lâng hiàn hō͘ Iâ-hô-hoa ê, Góa lóng siúⁿ-sù lí, kap lí ê kiáⁿ, cha-bó͘-kiáⁿ, chòe éng-oán tit-tio̍h ê hūn-gia̍h; che sī hō͘ lí kap lí ê hō͘-è, tī Iâ-hô-hoa ê bīn-chêng, chòe éng-oán bōe-hòe ê iok.

20耶和華對亞倫講：你tī in ê地方m̄-thang有產業，tī in ê中間也m̄-thang有份額；tī以色列人中我就是你ê份額，是你ê產業。Iâ-hô-hoa tùi A-lûn kóng, Lí tī in ê tōe-hng m̄-thang ū sán-gia̍p, tī in ê tiong-kan iā m̄-thang ū hūn-gia̍h; tī Í-sek-lia̍t lâng tiong Góa chiū-sī lí ê hūn-gia̍h, sī lí ê sán-gia̍p.

21看ah，tī以色列中所抽ê十份一，我已經賞賜利未ê kiáⁿ孫做業；因為in所做ê工是會幕ê工，所以賞賜in，來報答in ê tio̍h磨。Khòaⁿ ah, tī Í-sek-lia̍t tiong só͘ thiu ê cha̍p-hūn-chi̍t, Góa í-keng siúⁿ-sù Lī-bī ê kiáⁿ-sun chòe gia̍p; in-ūi in só͘ chòe ê kang sī hōe-bō͘ ê kang, só͘-í siúⁿ-sù in, lâi pò-tap in ê tio̍h-bôa.

22Tùi taⁿ以後，以色列人m̄-thang óa近會幕，免得in擔當罪來死。Tùi taⁿ í-āu, Í-sek-lia̍t lâng m̄-thang óa-kūn hōe-bō͘, bián-tit in tam-tng chōe lâi sí.

23獨獨利未人tio̍h做會幕ê工，擔當in ê罪；這beh做lín ta̍k世代永遠ê例；in tī以色列人ê中間m̄-thang有產業。To̍k-to̍k Lī-bī lâng tio̍h chòe hōe-bō͘ ê kang, tam-tng in ê chōe; che beh chòe lín ta̍k sè-tāi éng-oán ê lē; in tī Í-sek-lia̍t lâng ê tiong-kan m̄-thang ū sán-gia̍p.

24因為以色列人所抽ê十份一，所獻hō͘耶和華做舉祭ê，我已經賞賜利未人做業；所以我對in講，in tī以色列人ê中間m̄-thang有產業。In-ūi Í-sek-lia̍t lâng só͘ thiu ê cha̍p-hūn-chi̍t, só͘ hiàn hō͘ Iâ-hô-hoa chòe kú-chè ê, Góa í-keng siúⁿ-sù Lī-bī lâng chòe-gia̍p; só͘-í Góa tùi in kóng, in tī Í-sek-lia̍t lâng ê tiong-kan m̄-thang ū sán-gia̍p.

25耶和華吩咐摩西講：Iâ-hô-hoa hoan-hù Mô͘-se kóng,

26你tio̍h吩咐利未人kā in講：Lín tùi以色列人ê中間抽十份一，就是我hō͘ lín做業ê；hit時lín tio̍h tùi hit-ê十份一個中間koh抽十份一，做舉祭，獻hō͘耶和華。Lí tio̍h hoan-hù Lī-bī lâng kā in kóng, Lín tùi Í-sek-lia̍t lâng ê tiong-kan thiu cha̍p-hūn-chi̍t, chiū-sī Góa hō͘ lín chòe gia̍p ê; hit-sî lín tio̍h tùi hit ê cha̍p-hūn-chi̍t ê tiong-kan koh thiu cha̍p-hūn-chi̍t, chòe kú-chè, hiàn hō͘ Iâ-hô-hoa.

27你ê舉祭beh kā lín算做五穀場ê 麥，kap滿tī葡萄窟ê酒。Lí ê kú-chè beh kā lín sǹg chòe gō͘-kak-tiûⁿ ê be̍h, kap móa tī phû-tô-khut ê chiú.

28Án-ni，lín tùi以色列中所得tio̍h ê十份一，tio̍h tùi hit-ê獻舉祭hō͘耶和華；lín tio̍h tùi hit-ê，用耶和華ê舉祭hō͘祭司亞倫。Án-ni, lín tùi Í-sek-lia̍t tiong só͘ tit-tio̍h ê cha̍p-hūn-chi̍t, tio̍h tùi hit-ê hiàn kú-chè hō͘ Iâ-hô-hoa; lín tio̍h tùi hit-ê, ēng Iâ-hô-hoa ê kú-chè hō͘ chè-si A-lûn.

29Lín所得tio̍h一切ê禮物，tio̍h tùi hit中間，將第一好ê，就是分別做聖ê份額，獻hiah-ê舉祭hō͘耶和華。Lín só͘ tit-tio̍h it-chhè ê lé-mi̍h, tio̍h tùi hit tiong-kan, chiong tē-it hó-ê, chiū-sī hun-piat chòe-sèng ê hūn-gia̍h, hiàn hiah ê kú-chè hō͘ Iâ-hô-hoa.

30所以你tio̍h對in講，Lín已經tùi hit中間舉起hit-ê至好ê，這就是kā利未人算做五穀場ê五穀，也親像酒窟ê酒。Só͘-í lí tio̍h tùi in kóng, Lín í-keng tùi hit tiong-kan kú-khí hit ê chì-hó-ê, che chiū-sī kā Lī-bī lâng sǹg chòe gō͘-kak-tiûⁿ ê ngó͘-kok, iā chhin-chhiūⁿ chiú-khut ê chiú.

31Lín kap lín ê家眷，ta̍k所在thang食伊；這是lín ê工錢，是報答lín tī會幕內所做ê工。Lín kap lín ê ke-koàn, ta̍k só͘-chāi thang chia̍h i; che sī lín ê kang-chîⁿ, sī pò-tap lín tī hōe-bō͘-lāi só͘ chòe ê kang.

32Lín已經tùi hit中間舉起hit-ê至好ê，就無因為án-ni來犯罪；lín m̄-thang phah lâ-sâm以色列人ê聖物，免得lín死無。Lín í-keng tùi hit tiong-kan kú-khí hit ê chì-hó-ê, chiū bô in-ūi án-ni lâi hoān-chōe; lín m̄-thang phah lâ-sâm Í-sek-lia̍t lâng ê sèng-mi̍h, bián-tit lín sí-bô.