1正月間，以色列人全會來到Sîm ê曠野，百姓就tiàm tī Ka-te-su。Bí-lī-àm死tī-hia，就埋葬tī-hia。Chiaⁿ-ge̍h-kan, Í-sek-lia̍t lâng choân-hōe lâi kàu Sîm ê khòng-iá, peh-sìⁿ chiū tiàm tī Ka-te-su. Bí-lī-àm sí tī-hia, chiū bâi-chòng tī-hia.

2會眾無水thang lim；in就聚集攻擊摩西、亞倫。Hōe-chiòng bô chúi thang lim; in chiū chū-chi̍p kong-kek Mô͘-se A-lûn.

3百姓就kap摩西計較講：前阮ê兄弟死tī耶和華ê面前，阮m̄值tio̍h hit時續死。Peh-sìⁿ chiū kap Mô͘-se kè-kàu kóng, Chêng goán ê hiaⁿ-tī sí tī Iâ-hô-hoa ê bīn-chêng, goán m̄-ta̍t-tio̍h hit-sî sòa sí.

4Lín啥事chhōa耶和華ê會眾到chit-ê曠野，hō͘阮kap阮ê cheng-siⁿ死tī-chia ah？Lín siáⁿ-sū chhōa Iâ-hô-hoa ê hōe-chiòng kàu chit ê khòng-iá, hō͘ goán kap goán ê cheng-siⁿ sí tī-chia ah?

5Lín啥事hō͘阮出埃及，chhōa阮到chit-ê pháiⁿ所在ah？無所在thang掖種，也無無花果，無葡萄，無石榴，koh無水thang lim。Lín siáⁿ-sū hō͘ goán chhut Ai-ki̍p, chhōa goán kàu chit ê pháiⁿ só͘-chāi ah? Bô só͘-chāi thang iā-chéng, iā bô bû-hoa-kó, bô phû-tô, bô sia̍h-liû, koh bô chúi thang lim.

6摩西、亞倫離開會眾到會幕門口，仆tī地裡；耶和華ê榮光對in顯現。Mô͘-se A-lûn lī-khui hōe-chiòng kàu hōe-bō͘ mn̂g-kháu, phak tī tōe-ni̍h; Iâ-hô-hoa ê êng-kng tùi in hián-hiān.

7耶和華吩咐摩西講：Iâ-hô-hoa hoan-hù Mô͘-se kóng,

8你tio̍h kia̍h柺á，你kap你ê兄亞倫招集會眾；tī in ê目睭前lín命令石磐出水，你為tio̍h百姓hō͘水tùi石磐出，hō͘會眾kap in ê cheng-siⁿ lim。Lí tio̍h kia̍h koáiⁿ-á, lí kap lí ê hiaⁿ A-lûn chio-chi̍p hōe-chiòng; tī in ê ba̍k-chiu-chêng lín bēng-lēng chio̍h-pôaⁿ chhut-chúi, lí ūi-tio̍h peh-sìⁿ hō͘ chúi tùi chio̍h-pôaⁿ chhut, hō͘ hōe-chiòng kap in ê cheng-siⁿ lim.

9摩西thàn命令，tī耶和華ê面前kia̍h柺á。Mô͘-se thàn bēng-lēng, tī Iâ-hô-hoa ê bīn-chêng kia̍h koáiⁿ-á.

10摩西、亞倫招集會眾到石磐前，摩西對in講，Lín chiah-ê悖逆ê人tio̍h聽ah，阮tio̍h hō͘水tùi chit-ê石磐流出來hō͘ lín mah？Mô͘-se A-lûn chio-chi̍p hōe-chiòng kàu chio̍h-pôaⁿ-chêng, Mô͘-se tùi in kóng, Lín chiah ê pōe-ge̍k ê lâng tio̍h thiaⁿ ah, goán tio̍h hō͘ chúi tùi chit ê chio̍h-pôaⁿ lâu-chhut-lâi hō͘ lín mah?

11摩西kia̍h起手，用柺á phah石磐兩下，就有chōe-chōe水流出，會眾kap in ê cheng-siⁿ lóng lim。Mô͘-se kia̍h-khí chhiú, ēng koáiⁿ-á phah chio̍h-pôaⁿ nn̄g-ē, chiū ū chōe-chōe chúi lâu-chhut, hōe-chiòng kap in ê cheng-siⁿ lóng lim.

12耶和華就對摩西、亞倫講：因為lín m̄信我，無tī以色列人ê目睭前尊敬我做聖，所以lín bōe得thang chhōa chiah-ê會眾入我所賜hō͘ in ê地。Iâ-hô-hoa chiū tùi Mô͘-se A-lûn kóng, In-ūi lín m̄ sìn Góa, bô tī Í-sek-lia̍t lâng ê ba̍k-chiu-chêng chun-kèng Góa chòe-sèng, só͘-í lín bōe-tit-thang chhōa chiah ê hōe-chiòng ji̍p Góa só͘ sù-hō͘ in ê tōe.

13Chiah-ê水名叫Bí-lī-pa ê水；是因為以色列人kap耶和華計較；耶和華就對in顯明家己做聖。Chiah ê chúi miâ kiò Bí-lī-pa ê chúi; sī in-ūi Í-sek-lia̍t lâng kap Iâ-hô-hoa kè-kàu; Iâ-hô-hoa chiū tùi in hián-bêng ka-kī chòe-sèng.

14摩西對Ka-te-su差使者去見Í-tong王，講：你ê兄弟以色列án-ni講：你知阮所tú-tio̍h一切ê艱苦。Mô͘-se tùi Ka-te-su chhe sù-chiá khì kìⁿ Í-tong ông, kóng, Lí ê hiaⁿ-tī Í-sek-lia̍t án-ni kóng, Lí chai goán só͘ tú-tio̍h it-chhè ê kan-khó͘.

15阮ê列祖落去埃及，阮tòa tī埃及久久；埃及人pháiⁿ款待阮kap阮ê列祖。Goán ê lia̍t-chó͘ lo̍h-khì Ai-ki̍p, goán tòa tī Ai-ki̍p kú-kú; Ai-ki̍p lâng pháiⁿ khoán-thāi goán kap goán ê lia̍t-chó͘.

16阮哀求耶和華ê時，伊聽阮ê聲，差遣使者chhōa阮出埃及；taⁿ阮tī你極邊頭ê城Ka-te-su。Goán ai-kiû Iâ-hô-hoa ê sî, I thiaⁿ goán ê siaⁿ, chhe-khián sù-chiá chhōa goán chhut Ai-ki̍p; taⁿ goán tī lí ke̍k piⁿ-thâu ê siâⁿ Ka-te-su.

17求你容允阮經過你ê地，阮無beh tùi田園kap葡萄園經過，也無lim chiah-ê井ê水；獨獨行大路，無偏左偏右，直直經過你ê地界。Kiû lí iông-ún goán keng-kè lí ê tōe, goán bô beh tùi chhân-hn̂g kap phû-tô-hn̂g keng-kè, iā bô lim chiah ê chíⁿ ê chúi; to̍k-to̍k kiâⁿ tōa-lō͘, bô phian-chó phian-iū, ti̍t-ti̍t keng-kè lí ê tōe-kài.

18Í-tong王講：你m̄-thang tùi我chia經過，免得我kia̍h刀出來抵敵你。Í-tong ông kóng, Lí m̄-thang tùi góa chia keng-kè, bián-tit góa kia̍h to chhut-lâi tí-te̍k lí.

19以色列人kā伊講，阮beh tùi大路行去；設使阮kap cheng-siⁿ lim你ê水，阮beh還你價錢；准我步行過去，無chhap別項。Í-sek-lia̍t lâng kā i kóng, Goán beh tùi tōa-lō͘ kiâⁿ-khì; siat-sú goán kap cheng-siⁿ lim lí ê chúi, goán beh hêng lí kè-chîⁿ; chún góa pō͘-kiâⁿ kè-khì, bô chhap pa̍t-hāng.

20伊講：你m̄-thang經過。Í-tong王就chhōa chōe-chōe人出來，用剛硬ê手抵敵伊。I kóng, Lí m̄-thang keng-kè. Í-tong ông chiū chhōa chōe-chōe lâng chhut-lâi, ēng kong-ngī ê chhiú tí-te̍k i.

21Án-ni Í-tong m̄准以色列人tùi伊ê地界經過；以色列就oa̍t-tńg離開伊。Án-ni Í-tong m̄ chún Í-sek-lia̍t lâng tùi i ê tōe-kài keng-kè; Í-sek-lia̍t chiū oa̍t-tńg lī-khui i.

22In tùi Ka-te-su起身，以色列ê全會到Hô-jíⁿ山。In tùi Ka-te-su khí-sin, Í-sek-lia̍t ê choân-hōe kàu Hô-jíⁿ soaⁿ.

23耶和華tī óa近Í-tong邊界ê Hô-jíⁿ山，吩咐摩西、亞倫講：Iâ-hô-hoa tī óa-kūn Í-tong piⁿ-kài ê Hô-jíⁿ soaⁿ, hoan-hù Mô͘-se A-lûn kóng,

24亞倫beh tò祖，因為伊bōe得thang入我賞賜以色列人ê地，因為tī Bí-lī-pa ê水lín違逆我ê命令。A-lûn beh tò-chó͘, in-ūi i bōe-tit-thang ji̍p Góa siúⁿ-sù Í-sek-lia̍t lâng ê tōe, in-ūi tī Bí-lī-pa ê chúi lín ûi-ke̍h Góa ê bēng-lēng.

25你帶亞倫kap伊ê kiáⁿ Í-lī-a-sat chiūⁿ Hô-jíⁿ山，Lí tòa A-lûn kap i ê kiáⁿ Í-lī-a-sat chiūⁿ Hô-jíⁿ soaⁿ,

26thǹg亞倫ê衫，kā伊ê kiáⁿ Í-lī-a-sat穿；亞倫beh死tī-hia，tò去。thǹg A-lûn ê saⁿ, kā i ê kiáⁿ Í-lī-a-sat chhēng; A-lûn beh sí tī-hia, tò-khì.

27摩西照耶和華所命令ê行；in三人當會眾ê目睭前chiūⁿ Hô-jíⁿ山。Mô͘-se chiàu Iâ-hô-hoa só͘ bēng-lēng-ê kiâⁿ; in saⁿ-lâng tng hōe-chiòng ê ba̍k-chiu-chêng chiūⁿ Hô-jíⁿ soaⁿ.

28摩西thǹg亞倫ê衫，kā伊ê kiáⁿ Í-lī-a-sat穿；亞倫tī-hia死tī山頂；摩西kap Í-lī-a-sat落山。Mô͘-se thǹg A-lûn ê saⁿ, kā i ê kiáⁿ Í-lī-a-sat chhēng; A-lûn tī-hia sí tī soaⁿ-téng; Mô͘-se kap Í-lī-a-sat lo̍h-soaⁿ.

29會眾看見亞倫已經死，就為亞倫啼哭三十日；以色列全家也lóng án-ni。Hōe-chiòng khòaⁿ-kìⁿ A-lûn í-keng sí, chiū ūi A-lûn thî-khàu saⁿ-cha̍p ji̍t; Í-sek-lia̍t choân-ke iā lóng án-ni.

1Khiā起tī南方ê迦南人，A-la̍h-tek王，聽見以色列人tùi A-tha-lîm lō͘來，就kap以色列人交戰，掠in kúi-nā人。Khiā-khí tī lâm-hng ê Ka-lâm lâng, A-la̍h-tek ông, thiaⁿ-kìⁿ Í-sek-lia̍t lâng tùi A-tha-lîm lō͘ lâi, chiū kap Í-sek-lia̍t lâng kau-chiàn, lia̍h in kúi-nā lâng.

2以色列人對耶和華發願講：你若真正將chit-ê百姓交我ê手，我就一盡剿滅in ê城。Í-sek-lia̍t lâng tùi Iâ-hô-hoa hoat-goān kóng, Lí nā chin-chiàⁿ chiong chit ê peh-sìⁿ kau góa ê chhiú, góa chiū it-chīn châu-bia̍t in ê siâⁿ.

3耶和華聽以色列人ê聲，將迦南人交代in；in就一盡滅in，kap in ê城；hit所在ê名就叫Hô-jíⁿ-má。Iâ-hô-hoa thiaⁿ Í-sek-lia̍t lâng ê siaⁿ, chiong Ka-lâm lâng kau-tài in; in chiū it-chīn bia̍t in, kap in ê siâⁿ; hit só͘-chāi ê miâ chiū kiò Hô-jíⁿ-má.

4In tùi Hô-jíⁿ山起身，tùi紅海ê路去，beh se̍h Í-tong ê地；百姓為tio̍h所行ê路，心不止餒志。In tùi Hô-jíⁿ soaⁿ khí-sin, tùi Âng-hái ê lō͘ khì, beh se̍h Í-tong ê tōe; peh-sìⁿ ūi-tio̍h só͘ kiâⁿ ê lō͘, sim put-chí lóe-chì.

5就嫌上帝kap摩西講：Lín啥事chhōa阮出埃及，hō͘阮死tī chit-ê曠野ah？因為無餅，無水，阮ê心厭賤chit-ê清淡ê食物。Chiū hiâm Siōng-tè kap Mô͘-se kóng, Lín siáⁿ-sū chhōa goán chhut Ai-ki̍p, hō͘ goán sí tī chit ê khòng-iá ah? In-ūi bô piáⁿ, bô chúi, goán ê sim iàm-chiān chit ê chheng-tām ê chia̍h-mi̍h.

6耶和華就差火蛇入百姓ê中間，咬百姓；以色列人死chōe-chōe。Iâ-hô-hoa chiū chhe hé-chôa ji̍p peh-sìⁿ ê tiong-kan, kā peh-sìⁿ; Í-sek-lia̍t lâng sí chōe-chōe.

7百姓到摩西hia，講：阮有犯罪，因為阮有嫌耶和華kap你；請你求耶和華hō͘ chiah-ê蛇離開阮。摩西就替百姓求。Peh-sìⁿ kàu Mô͘-se hia, kóng, Goán ū hoān-chōe, in-ūi goán ū hiâm Iâ-hô-hoa kap lí; chhiáⁿ lí kiû Iâ-hô-hoa hō͘ chiah ê chôa lī-khui goán. Mô͘-se chiū thòe peh-sìⁿ kiû.

8耶和華對摩西講：你做一尾火蛇，kùi tī旗杆頂；見若hō͘伊咬tio̍h ê，一下看，就會活。Iâ-hô-hoa tùi Mô͘-se kóng, Lí chòe chi̍t-bé hé-chôa, kùi tī kî-koaⁿ-téng; kìⁿ-nā hō͘ i kā-tio̍h ê, chi̍t-ē khòaⁿ, chiū ōe oa̍h.

9摩西就做一尾銅蛇，kùi tī旗杆頂；見若hō͘蛇咬tio̍h-ê，一下看chit-ê銅蛇，就活。Mô͘-se chiū chòe chi̍t-bé tâng-chôa, kùi tī kî-koaⁿ-téng; kìⁿ-nā hō͘ chôa kā-tio̍h-ê, chi̍t-ē khòaⁿ chit ê tâng-chôa, chiū oa̍h.

10以色列人起身，紮營tī O-po̍k。Í-sek-lia̍t lâng khí-sin, chat-iâⁿ tī O-po̍k.

11Koh tùi O-po̍k起身，紮營tī Í-iâ-a-pa-lîm，就是ǹg日出ê所在，kap Mô͘-ap相對ê曠野。Koh tùi O-po̍k khí-sin, chat-iâⁿ tī Í-iâ-a-pa-lîm, chiū-sī ǹg ji̍t-chhut ê só͘-chāi, kap Mô͘-ap saⁿ-tùi ê khòng-iá.

12Tùi hia起身，紮營tī Sat-lia̍t ê山谷。Tùi hia khí-sin, chat-iâⁿ tī Sat-lia̍t ê soaⁿ-kok.

13Tùi-hia起身，紮營tī A-lùn ê hit-pêng，就是tī曠野，tùi A-mô͘-lī ê地界出來；因為A-lùn是Mô͘-ap ê交界，tī Mô͘-ap kap A-mô͘-lī ê中間。Tùi-hia khí-sin, chat-iâⁿ tī A-lùn ê hit-pêng, chiū-sī tī khòng-iá, tùi A-mô͘-lī ê tōe-kài chhut-lâi; in-ūi A-lùn sī Mô͘-ap ê kau-kài, tī Mô͘-ap kap A-mô͘-lī ê tiong-kan.

14所以耶和華交戰ê冊有講： So͘-hoat ê Oa-hap-pek， Kap A-lùn hiah-ê山谷；Só͘-í Iâ-hô-hoa kau-chiàn ê chheh ū kóng: So͘-hoat ê Oa-hap-pek, Kap A-lùn hiah ê soaⁿ-kok;

15以及chiah-ê山谷ê水泉， 就是ǹg A-jíⁿ khiā起ê所在， óa近Mô͘-ap ê境界。Í-ki̍p chiah ê soaⁿ-kok ê chúi-chôaⁿ, Chiū-sī ǹg A-jíⁿ khiā-khí ê só͘-chāi, Óa-kūn Mô͘-ap ê kéng-kài.

16In tùi hia到Pí-jíⁿ；這就是耶和華bat tùi摩西所講起ê井，講：你聚集百姓，我beh用水hō͘ in。In tùi hia kàu Pí-jíⁿ; che chiū-sī Iâ-hô-hoa bat tùi Mô͘-se só͘ kóng-khí ê chíⁿ, kóng, Lí chū-chi̍p peh-sìⁿ, Góa beh ēng chúi hō͘ in.

17Hit時以色列人唱歌講： 井ah，chhèng出來；lín tio̍h 對伊唱歌；Hit-sî Í-sek-lia̍t lâng chhiùⁿ-koa kóng, Chíⁿ ah, chhèng-chhut-lâi; lín tio̍h tùi i chhiùⁿ-koa;

18Chit-ê井是首領開伊， 百姓尊貴ê人， 用權柄，用in ê柺á掘ê。In tùi曠野去Má-tha-ná；Chit ê chíⁿ sī siú-léng khui i, Peh-sìⁿ chun-kùi ê lâng, Ēng koân-pèng, ēng in ê koáiⁿ-á ku̍t ê. In tùi khòng-iá khì Má-tha-ná;

19Tùi Má-tha-ná到Ná-ha̍p-lia̍t，tùi Ná-hap-lia̍t到Pa-boa̍t。Tùi Má-tha-ná kàu Ná-ha̍p-lia̍t, tùi Ná-hap-lia̍t kàu Pa-boa̍t.

20Tùi Pa-boa̍t到Mô͘-ap 地ê山谷，到hit-ê看落低，能看見曠野ê Pî-su-ka ê山尖。Tùi Pa-boa̍t kàu Mô͘-ap tōe ê soaⁿ-kok, kàu hit ê khòaⁿ lo̍h-kē, ōe khòaⁿ-kìⁿ khòng-iá ê Pî-su-ka ê soaⁿ-chiam.

21以色列人差使者去見A-mô͘-lī人ê王Se-hông，講：Í-sek-lia̍t lâng chhe sù-chiá khì kìⁿ A-mô͘-lī lâng ê ông Se-hông, kóng,

22求你容允我對你ê地經過；阮無偏tī田園，kap葡萄園；阮也無beh lim井裡 ê水；獨獨行大路，直直經過你ê地界。Kiû lí iông-ún góa tùi lí ê tōe keng-kè; goán bô phian tī chhân-hn̂g, kap phû-tô-hn̂g; goán iā bô beh lim chíⁿ-ni̍h ê chúi; to̍k-to̍k kiâⁿ tōa-lō͘, ti̍t-ti̍t keng-kè lí ê tōe-kài.

23Se-hông m̄准以色列人經過伊ê境界；Se-hông就聚集伊ê眾百姓，出來到曠野，beh抵敵以色列人，到Ngá-cha̍p；kap以色列人交戰。Se-hông m̄-chún Í-sek-lia̍t lâng keng-kè i ê kéng-kài; Se-hông chiū chū-chi̍p i ê chèng peh-sìⁿ, chhut-lâi kàu khòng-iá, beh tí-te̍k Í-sek-lia̍t lâng, kàu Ngá-cha̍p; kap Í-sek-lia̍t lâng kau-chiàn.

24以色列人用刀thâi伊，佔伊ê地，tùi A-lùn到Ngá-phok，直直到A-bûn人hia；因為A-bûn人ê地界真堅固。Í-sek-lia̍t lâng ēng to thâi i, chiàm i ê tōe, tùi A-lùn kàu Ngá-phok, ti̍t-ti̍t kàu A-bûn lâng hia; in-ūi A-bûn lâng ê tōe-kài chin kian-kò͘.

25以色列人取伊一切ê城，以色列人也khiā起A-mô͘-lī ê城，tī Hi-si̍t-pún，kap伊一切ê城。Í-sek-lia̍t lâng chhú i it-chhè ê siâⁿ, Í-sek-lia̍t lâng iā khiā-khí A-mô͘-lī ê siâⁿ, tī Hi-si̍t-pún, kap i it-chhè ê siâⁿ.

26Chit-ê Hi-si̍t-pún是A-mô͘-lī王Se-hông ê城；伊bat kap Mô͘-ap前ê王交戰，tùi伊ê手搶全地，直到A-lùn。Chit ê Hi-si̍t-pún sī A-mô͘-lī ông Se-hông ê siâⁿ; i bat kap Mô͘-ap chêng ê ông kau-chiàn, tùi i ê chhiú chhiúⁿ choân-tōe, ti̍t-kàu A-lùn.

27所以做詩ê人念，講： Lín tio̍h來Hi-si̍t-pún， 願Se-hông ê城得tio̍h起造，koh堅固；Só͘-í chòe-si ê lâng liām, kóng: Lín tio̍h lâi Hi-si̍t-pún, Goān Se-hông ê siâⁿ tit-tio̍h khí-chō, koh kian-kò͘;

28因為有火tùi Hi-si̍t-pún出， 有火燄tùi Se-hông ê城發， 燒毀Mô͘-ap ê A-jíⁿ， Kap A-lùn高ê所在ê主。In-ūi ū hé tùi Hi-si̍t-pún chhut, Ū hé-iām tùi Se-hông ê siâⁿ hoat, Sio-húi Mô͘-ap ê A-jíⁿ, Kap A-lùn koâiⁿ ê só͘-chāi ê chú.

29Mô͘-ap ah，你有災禍！ Ki-boa̍t ê百姓ah，lín滅無lah！ Hō͘伊ê ta-po͘丁做逃走ê， Cha-bó͘-kiáⁿ做受掠ê， 交hō͘ A-mô͘-lī王Se-hông。Mô͘-ap ah, lí ū chai-ē! Ki-boa̍t ê peh-sìⁿ ah, lín bia̍t-bô lah! Hō͘ i ê ta-po͘-teng chòe tô-cháu-ê, Cha-bó͘-kiáⁿ chòe siū-lia̍h-ê, Kau hō͘ A-mô͘-lī ông Se-hông.

30阮射in；Hi-si̍t-pún到Tí-pún一盡毀滅， 阮hō͘ 地拋荒，直到Lô-hoat， 就是到Bí-tí-pa。Goán siā-in; Hi-si̍t-pún kàu Tí-pún it-chīn húi bia̍t, Goán hō͘ tōe pha-hng, ti̍t-kàu Lô-hoat, Chiū-sī kàu Bí-tí-pa.

31Án-ni，以色列人就khiā起tī A-mô͘-lī人ê地。Án-ni, Í-sek-lia̍t lâng chiū khiā-khí tī A-mô͘-lī lâng ê tōe.

32摩西差人去偷看Ngá-siā，就取in hiah-ê鄉社，趕出khiā起hia ê A-mô͘-lī人。Mô͘-se chhe lâng khì thau-khòaⁿ Ngá-siā, chiū chhú in hiah ê hiuⁿ-siā, kóaⁿ-chhut khiā-khí hia ê A-mô͘-lī lâng.

33以色列oat tùi Pa-san ê路去；Pa-san王Go̍k，kap伊ê眾百姓，lóng出來抵敵in，tī Í-tek來kap in交戰。Í-sek-lia̍t oat tùi Pa-san ê lō͘ khì; Pa-san ông Go̍k, kap i ê chèng peh-sìⁿ, lóng chhut-lâi tí-te̍k in, tī Í-tek-lâi kap in kau-chiàn.

34耶和華對摩西講：m̄免驚in，因為我已經將伊kap伊ê眾百姓，伊ê地，lóng交tī你ê手；你tio̍h款待伊，親像你bat款待tiàm tī Hi-si̍t-pún ê A-mô͘-lī王Se-hông一樣。Iâ-hô-hoa tùi Mô͘-se kóng, M̄-bián kiaⁿ in, in-ūi Góa í-keng chiong i kap i ê chèng peh-sìⁿ, i ê tōe, lóng kau tī lí ê chhiú; lí tio̍h khoán-thāi i, chhin-chhiūⁿ lí bat khoán-thāi tiàm tī Hi-si̍t-pún ê A-mô͘-lī ông Se-hông chi̍t-iūⁿ.

35In就phah伊，kap伊hiah-ê kiáⁿ，以及伊ê眾百姓，無kā伊留一個，就得tio̍h伊ê地。In chiū phah i, kap i hiah ê kiáⁿ, í-ki̍p i ê chèng peh-sìⁿ, bô kā i lâu chi̍t-ê, chiū tit-tio̍h i ê tōe.

1以色列人起身，紮營tī Mô͘-ap ê平洋，tī約旦河外，耶利哥ê對面。Í-sek-lia̍t lâng khí-sin, chat-iâⁿ tī Mô͘-ap ê pîⁿ-iûⁿ, tī Iok-tàn hô-gōa, Iâ-lī-ko ê tùi-bīn.

2Se-phoat ê kiáⁿ Pa-le̍k看見以色列人tùi A-mô͘-lī人所行一切ê事。Se-phoat ê kiáⁿ Pa-le̍k khòaⁿ-kìⁿ Í-sek-lia̍t lâng tùi A-mô͘-lī lâng só͘ kiâⁿ it-chhè ê sū.

3Mô͘-ap真驚hit-ê百姓，因為in真chōe；Mô͘-ap因為以色列百姓，心就著急。Mô͘-ap chin kiaⁿ hit ê peh-sìⁿ, in-ūi in chin-chōe; Mô͘-ap in-ūi Í-sek-lia̍t peh-sìⁿ, sim chiū tio̍h-kip.

4Mô͘-ap kā米甸ê長老講：Taⁿ chit群ê人beh一盡食咱四圍所有ê，親像牛食田裡ê草一般；hit時Se-phoat ê kiáⁿ Pa-le̍k做Mô͘-ap王。Mô͘-ap kā Bí-tiân ê tiúⁿ-ló kóng, Taⁿ chit-kûn ê lâng beh it-chīn chia̍h lán sì-ûi só͘ ū ê, chhin-chhiūⁿ gû chia̍h chhân-ni̍h ê chháu chi̍t-poaⁿ; hit-sî Se-phoat ê kiáⁿ Pa-le̍k chòe Mô͘-ap ông.

5伊差使者去大河邊ê Pî-toa̍t，到Pí-jíⁿ ê kiáⁿ Pa-lân ê本所在叫伊來，講：看ah，有一個百姓tùi埃及出來；看ah，in遮滿地面，也khiā起tī我ê對面。I chhe sù-chiá khì Tōa-hô-piⁿ ê Pî-toa̍t, kàu Pí-jíⁿ ê kiáⁿ Pa-lân ê pún só͘-chāi kiò i lâi, kóng, Khòaⁿ ah, ū chi̍t ê peh-sìⁿ tùi Ai-ki̍p chhut-lâi; khòaⁿ ah, in jia-móa tōe-bīn, iā khiā-khí tī góa ê tùi-bīn.

6Taⁿ請你來，kā我咒詛chit-ê百姓，因為in比我khah強；kiám-chhái我會phah來khah贏in，趕in出chit-ê所在；因為我知你所祝福ê，就得tio̍h福氣，你所咒詛ê，就受咒詛。Taⁿ chhiáⁿ lí lâi, kā góa chiù-chó͘ chit ê peh-sìⁿ, in-ūi in pí góa khah-kiông; kiám-chhái góa ōe phah lâi khah-iâⁿ in, kóaⁿ in chhut chit ê só͘-chāi; in-ūi góa chai lí só͘ chiok-hok ê , chiū tit-tio̍h hok-khì, lí só͘ chiù-chó͘ ê, chiū siū chiù-chó͘.

7Mô͘-ap長老kap米甸ê長老，就起身，手帶卜卦ê禮，去到Pa-lân hia，將Pa-le̍k ê話kā伊講。Mô͘-ap tiúⁿ-ló kap Bí-tiân ê tiúⁿ-ló, chiū khí-sin, chhiú tòa pok-kòa ê lé, khì kàu Pa-lân hia, chiong Pa-le̍k ê ōe kā i kóng.

8伊對in講，今暝lín歇chia；照耶和華所吩咐我ê，我beh回復lín。Mô͘-ap ê首領就歇tī Pa-lân hia。I tùi in kóng, Kim-mî lín hioh chia; chiàu Iâ-hô-hoa só͘ hoan-hù góa ê, góa beh hê-hok lín. Mô͘-ap ê siú-léng chiū hioh tī Pa-lân hia.

9上帝臨到Pa-lân，問伊講：kap你tòa hiah-ê人是是誰？Siōng-tè lîm-kàu Pa-lân, mn̄g i kóng, Kap lí tòa hiah ê lâng sī chī-chūi?

10Pa-lân應上帝講：是Mô͘-ap王Se-phoat ê kiáⁿ差人到我chia，講：Pa-lân ìn Siōng-tè kóng, Sī Mô͘-ap ông Se-phoat ê kiáⁿ chhe lâng kàu góa chia, kóng,

11看ah，有百姓tùi埃及來，遮滿地面；請你來kā我咒詛in，kiám-chhái我能thâi贏in，趕in出去。Khòaⁿ ah, ū peh-sìⁿ tùi Ai-ki̍p lâi, jia-móa tōe-bīn; chhiáⁿ lí lâi kā góa chiù-chó͘ in, kiám-chhái góa ōe thâi-iâⁿ in, kóaⁿ in chhut-khì.

12上帝對Pa-lân講：你m̄-thang kap in去，也m̄-thang咒詛chit-ê百姓；因為in是得tio̍h福氣ê。Siōng-tè tùi Pa-lân kóng, Lí m̄-thang kap in khì, iā m̄-thang chiù-chó͘ chit ê peh-sìⁿ; in-ūi in sī tit-tio̍h hok-khì-ê.

13Pa-lân清早起來，對Pa-le̍k ê首領講：Lín tò去lín ê所在，因為耶和華m̄准我kap lín去。Pa-lân chheng-chá khí-lâi, tùi Pa-le̍k ê siú-léng kóng, Lín tò-khì lín ê só͘-chāi, in-ūi Iâ-hô-hoa m̄-chún góa kap lín khì.

14Mô͘-ap ê首領就起來，tò去Pa-le̍k hia，講：Pa-lân m̄肯kap阮來。Mô͘-ap ê siú-léng chiū khí-lâi, tò-khì Pa-le̍k hia, kóng, Pa-lân m̄-khéng kap goán lâi.

15Pa-le̍k koh差首領，比前khah-chōe，khah尊貴ê。Pa-le̍k koh chhe siú-léng, pí chêng khah-chōe, khah chun-kùi-ê.

16In到Pa-lân hia，對伊講，Se-phoat ê kiáⁿ Pa-le̍k án-ni講：求你m̄-thang hō͘甚麼tāi-chì阻擋你無來我chia。In kàu Pa-lân hia, tùi i kóng, Se-phoat ê kiáⁿ Pa-le̍k án-ni kóng, Kiû lí m̄-thang hō͘ sím-mi̍h tāi-chì chó͘-tòng lí bô lâi góa chia.

17因為我beh hō͘你得tio̍h極大ê尊貴；見若你對我講甚麼，我beh照án-ni行；所以請你來，kā我咒詛chit-ê百姓。In-ūi góa beh hō͘ lí tit-tio̍h ke̍k-tōa ê chun-kùi; kìⁿ-nā lí tùi góa kóng sím-mi̍h, góa beh chiàu án-ni kiâⁿ; só͘-í chhiáⁿ lí lâi, kā góa chiù-chó͘ chit ê peh-sìⁿ.

18Pa-lân對Pa-le̍k chiah-ê人臣講：Pa-le̍k就若用滿厝ê金銀hō͘我，我也m̄敢pôaⁿ過我ê上帝ê命令，來加減行。Pa-lân tùi Pa-le̍k chiah ê jîn-sîn kóng, Pa-le̍k chiū nā ēng móa-chhù ê kim-gûn hō͘ góa, góa iā m̄-káⁿ pôaⁿ-kè góa ê Siōng-tè ê bēng-lēng, lâi ke-kiám kiâⁿ.

19請lín今暝koh歇chia，thèng候我知耶和華koh kā我講甚麼。Chhiáⁿ lín kim-mî koh hioh chia, thèng-hāu góa chai Iâ-hô-hoa koh kā góa kóng sím-mi̍h.

20Hit暝上帝臨到Pa-lân hia講：chiah-ê人若來叫你，你就起來kap伊去；總是我所beh kā你講ê，你tio̍h遵thàn。Hit-mî Siōng-tè lîm-kàu Pa-lân hia kóng, Chiah ê lâng nā lâi kiò lí, lí chiū khí-lâi kap i khì; chóng-sī Góa só͘ beh kā lí kóng ê, lí tio̍h chun-thàn.

21Pa-lân早起起來，備辦驢；kap Mô͘-ap ê首領相kap去。Pa-lân chá-khí khí-lâi, pī-pān lû; kap Mô͘-ap ê siú-léng saⁿ-kap khì.

22上帝，因為伊去，就受氣；耶和華ê使者khiā tī路裡來抵敵伊；伊騎驢，兩個奴僕跟tè伊。Siōng-tè, in-ūi i khì, chiū siū-khì; Iâ-hô-hoa ê sù-chiá khiā tī lō͘-ni̍h lâi tí-te̍k i; i khiâ lû, nn̄g ê lô͘-po̍k kun-tè i.

23驢看見耶和華ê使者khiā tī路裡，手裡拔刀；驢就tùi路裡閃入園；Pa-lân就phah驢beh hō͘伊歸原路。Lû khòaⁿ-kìⁿ Iâ-hô-hoa ê sù-chiá khiā tī lō͘-ni̍h, chhiú-ni̍h pu̍ih to; lû chiū tùi lō͘-ni̍h siám ji̍p hn̂g; Pa-lân chiū phah lû beh hō͘ i kui goân-lō͘.

24耶和華ê使者就khiā tī葡萄園ê 狹路，chit-pêng有牆，hit-pêng也有牆。Iâ-hô-hoa ê sù-chiá chiū khiā tī phû-tô-hn̂g ê oe̍h-lō͘, chit-pêng ū chhiûⁿ, hit-pêng iā ū chhiûⁿ.

25驢看見耶和華ê使者，就閃óa hit-ê牆，khoeh Pa-lân ê腳tī牆裡；Pa-lân就koh phah伊。Lû khòaⁿ-kìⁿ Iâ-hô-hoa ê sù-chiá, chiū siám-óa hit ê chhiûⁿ, khoeh Pa-lân ê kha tī chhiûⁿ-ni̍h; Pa-lân chiū koh phah i.

26耶和華ê使者koh進前去，khiā tī狹狹ê所在，雙pêng無路thang oat。Iâ-hô-hoa ê sù-chiá koh chìn-chêng khì, khiā tī oe̍h-oe̍h ê só͘-chāi, siang-pêng bô lō͘ thang oat.

27驢看見耶和華ê使者，就仆tī Pa-lân ê下底，Pa-lân發受氣，用柺á phah驢。Lû khòaⁿ-kìⁿ Iâ-hô-hoa ê sù-chiá, chiū phak tī Pa-lân ê ē-tóe, Pa-lân hoat siū-khì, ēng koáiⁿ-á phah lû.

28耶和華開驢ê嘴，驢對Pa-lân講：我對你做甚麼，你竟然phah我chit三pái ah？Iâ-hô-hoa khui lû ê chhùi, lû tùi Pa-lân kóng, Góa tùi lí chòe sím-mi̍h, lí kéng-jiân phah góa chí saⁿ-pái ah?

29Pa-lân對驢講：因為你戲弄我；我恨手裡無刀；有，就kā你thâi死。Pa-lân tùi lû kóng, In-ūi lí hì-lāng góa; góa hūn chhiú-ni̍h bô to; ū, chiū kā lí thâi-sí.

30驢對Pa-lân講：我kiám m̄是你ê驢，你一生所騎ê mah？我平素bat對你án-ni行mah？Pa-lân講：無。Lû tùi Pa-lân kóng, Góa kiám m̄-sī lí ê lû, lí it-seng só͘ khiâ-ê mah? góa pêng-sò͘ bat tùi lí án-ni kiâⁿ mah? Pa-lân kóng, Bô.

31Hit時耶和華開Pa-lân ê目睭，伊就看見耶和華ê使者khiā tī路裡，手拔刀；Pa-lân就àⁿ頭仆tī地裡。Hit-sî Iâ-hô-hoa khui Pa-lân ê ba̍k-chiu, i chiū khòaⁿ-kìⁿ Iâ-hô-hoa ê sù-chiá khiā tī lō͘-ni̍h, chhiú pu̍ih to; Pa-lân chiū àⁿ-thâu phak tī tōe-ni̍h.

32耶和華ê使者對伊講，你啥事chit三pái phah你ê驢ah？看ah，我出來抵敵你，因為你tī我ê面前所行ê，是悖逆。Iâ-hô-hoa ê sù-chiá tùi i kóng, Lí siáⁿ-sū chí saⁿ-pái phah lí ê lû ah? Khòaⁿ ah, góa chhut-lâi tí-te̍k lí, in-ūi lí tī góa ê bīn-chêng só͘ kiâⁿ ê, sī pōe-ge̍k.

33驢看見我，就閃避我chit三pái；設使驢無閃避我，我已經thâi死你，hō͘驢活teh。Lû khòaⁿ-kìⁿ góa, chiū siám-pī góa chí saⁿ-pái; siat-sú lû bô siám-pī góa, góa í-keng thâi-sí lí, hō͘ lû oa̍h-teh.

34Pa-lân tùi耶和華ê使者講：我有犯罪lah，我m̄知你khiā tī路裡阻擋我；你若無歡喜我去，我就倒tńg去。Pa-lân tùi Iâ-hô-hoa ê sù-chiá kóng, Góa ū hoān-chōe lah, góa m̄-chai lí khiā tī lō͘-ni̍h chó͘-tòng góa; lí nā bô hoaⁿ-hí góa khì, góa chiū tò-tńg-khì.

35耶和華ê使者對Pa-lân講：你kap chiah-ê人去；總是你只有thang講我所beh對你講ê。Pa-lân就kap Pa-le̍k ê首領相kap去。Iâ-hô-hoa ê sù-chiá tùi Pa-lân kóng, Lí kap chiah ê lâng khì; chóng-sī lí chí-ū thang kóng góa só͘ beh tùi lí kóng-ê. Pa-lân chiū kap Pa-le̍k ê siú-léng saⁿ-kap khì.

36Pa-le̍k聽見Pa-lân來，就去Mô͘-ap城迎接伊；chit-ê城是tī邊界ê極頭，tī A-lùn ê邊頭。Pa-le̍k thiaⁿ-kìⁿ Pa-lân lâi, chiū khì Mô͘-ap siâⁿ ngiâ-chih i; chit ê siâⁿ sī tī piⁿ-kài ê ke̍k-thâu, tī A-lùn ê piⁿ-thâu.

37Pa-le̍k對Pa-lân講：我kiám m̄是切切差人到你hia去叫你mah？你啥事無來我chia ah？我kiám無真正能hō͘你尊貴mah？Pa-le̍k tùi Pa-lân kóng, Góa kiám m̄-sī chhiat-chhiat chhe lâng kàu lí hia khì kiò lí mah? Lí siáⁿ-sū bô lâi góa chia ah? góa kiám bô chin-chiàⁿ ōe hō͘ lí chun-kùi mah?

38Pa-lân應Pa-le̍k講：我taⁿ來到你chia，我kiám有權能講甚麼ah？上帝用甚麼話交代我，我就講。Pa-lân ìn Pa-le̍k kóng, Góa taⁿ lâi kàu lí chia, góa kiám ū koân ōe kóng sím-mi̍h ah? Siōng-tè ēng sím-mi̍h ōe kau-tài góa, góa chiū kóng i.

39Pa-lân kap Pa-le̍k相kap行，來到Ki-lia̍t-ô͘-só。Pa-lân kap Pa-le̍k saⁿ-kap kiâⁿ, lâi kàu Ki-lia̍t-ô͘-só.

40Pa-le̍k thâi牛羊獻祭，就送hō͘ Pa-lân以及kap伊tī-teh ê首領。Pa-le̍k thâi gû-iûⁿ hiàn-chè, chiū sàng hō͘ Pa-lân í-ki̍p kap i tī-teh ê siú-léng.

41到隔早起，Pa-le̍k chhōa Pa-lân到Pa-le̍k ê高位；Pa-lân tùi hia看以色列百姓極頭ê所在。Kàu keh chá-khí, Pa-le̍k chhōa Pa-lân kàu Pa-le̍k ê koâiⁿ-ūi; Pa-lân tùi hia khòaⁿ Í-sek-lia̍t peh-sìⁿ ke̍k-thâu ê só͘-chāi.