1Pa-lân看見耶和華歡喜賜福hō͘以色列，就無親像éng-pái去chhē法術，是面ǹg曠野。Pa-lân khòaⁿ-kìⁿ Iâ-hô-hoa hoaⁿ-hí sù-hok hō͘ Í-sek-lia̍t, chiū bô chhin-chhiūⁿ éng-pái khì chhē hoat-su̍t, sī bīn ǹg khòng-iá.

2Pa-lân kia̍h目，看見以色列人照支派khiā起，上帝ê神就臨到伊。Pa-lân kia̍h-ba̍k, khòaⁿ-kìⁿ Í-sek-lia̍t lâng chiàu chi-phài khiā-khí, Siōng-tè ê sîn chiū lîm-kàu i.

3伊就提起伊ê歌，講： Pí-jíⁿ ê kiáⁿ Pa-lân講： 目睭合teh ê人講；I chiū thê-khí i ê koa, kóng, Pí-jíⁿ ê kiáⁿ Pa-lân kóng, Ba̍k-chiu ha̍p-teh ê lâng kóng;

4聽見上帝ê話， 看見全能ê ê異象， 目睭thí開倒teh ê人講；Thiaⁿ-kìⁿ Siōng-tè ê ōe, Khòaⁿ-kìⁿ Choân-lêng-ê ê īⁿ-siōng, Ba̍k-chiu thí-khui tó-teh ê lâng kóng;

5雅各ah，你ê布棚怎樣hiah súi！ 以色列ah，你ê帳房怎樣hiah好看！Ngá-kok ah, lí ê pò͘-pîⁿ cháiⁿ-iūⁿ hiah súi! Í-sek-lia̍t ah, lí ê tiùⁿ-pâng cháiⁿ-iūⁿ hiah hó-khòaⁿ!

6親像相連續ê山谷， 親像河邊ê園， 親像耶和華所知ê沉香樹， 親像水邊ê柏香樹。Chhin-chhiūⁿ saⁿ-liân-sòa ê soaⁿ-kok, Chhin-chhiūⁿ hô-piⁿ ê hn̂g, Chhin-chhiūⁿ Iâ-hô-hoa só͘ chai ê tîm-hiuⁿ-chhiū, Chhin-chhiūⁿ chúi-piⁿ ê pek-hiuⁿ-chhiū.

7水beh tùi伊ê桶流出， 種子beh也tī chōe-chōe水ê所在， 伊ê王beh pôaⁿ過A-kah， 伊ê國beh興起。Chúi beh tùi i ê tháng lâu-chhut, Chéng-chí beh iā tī chōe-chōe chúi ê só͘-chāi, I ê ông beh pôaⁿ-kè A-kah, I ê kok beh heng-khí.

8上帝chhōa伊出埃及， 伊親像有野牛ê力； 伊beh吞食對敵ê國， at折in ê骨頭； 用箭射in，到thàng過。Siōng-tè chhōa i chhut Ai-ki̍p, I chhin-chhiūⁿ ū iá-gû ê la̍t; I beh thun-chia̍h tùi-te̍k ê kok, At-chi̍h in ê kut-thâu; Ēng chìⁿ siā in, kàu thàng-kè.

9伊撐腳，koh倒teh親像公ê獅， 也親像母ê獅； Chī-chūi敢惹tio̍h伊? 見若祝福你ê，願伊受祝福， 見若咒詛你ê，願伊受咒詛。I thìⁿ-kha, koh tó-teh chhin-chhiūⁿ kang ê sai, Iā chhin-chhiūⁿ bú ê sai; Chī-chūi káⁿ jiá-tio̍h i? Kìⁿ-nā chiok-hok lí ê, goān i siū chiok-hok, Kìⁿ-nā chiù-chó͘ lí ê, goān i siū chiù-chó͘.

10Pa-le̍k大受氣Pa-lân，就搭手；Pa-le̍k koh kā Pa-lân講：我叫你來咒詛我ê對敵，你竟然專專祝福in，到chit三pái。Pa-le̍k tōa siū-khì Pa-lân, chiū tah-chhiú; Pa-le̍k koh kā Pa-lân kóng, Góa kiò lí lâi chiù-chó͘ góa ê tùi-te̍k, lí kéng-jiân choan-choan chiok-hok in, kàu chí saⁿ-pái.

11Taⁿ你走去本所在，我本想beh hō͘你得tio̍h大尊貴，但是耶和華阻擋，hō͘你無得tio̍h尊貴。Taⁿ lí cháu-khì pún só͘-chāi, góa pún siūⁿ beh hō͘ lí tit-tio̍h tōa chun-kùi, nā-sī Iâ-hô-hoa chó͘-tòng, hō͘ lí bô tit-tio̍h chun-kùi.

12Pa-lân對Pa-le̍k講：我kiám無對你所差到我hia ê使者講：Pa-lân tùi Pa-le̍k kóng, Góa kiám bô tùi lí só͘ chhe kàu góa hia ê sù-chiá kóng,

13Pa-le̍k就若將伊滿厝ê金銀hō͘我，我也bōe得pôaⁿ過耶和華ê命令，pîn家己ê心來做好做pháiⁿ；耶和華所講ê，我就講伊。Pa-le̍k chiū nā chiong i móa-chhù ê kim-gûn hō͘ góa, góa iā bōe-tit pôaⁿ-kè Iâ-hô-hoa ê bēng-lēng, pîn ka-kī ê sim lâi chòe-hó chòe-pháiⁿ; Iâ-hô-hoa só͘ kóng-ê, góa chiū kóng i.

14看ah，taⁿ我beh tò去本族；你來，我kā你講，chiah-ê百姓日後beh怎樣款待你ê百姓。Khòaⁿ ah, taⁿ góa beh tò-khì pún-cho̍k; lí lâi, góa kā lí kóng, chiah ê peh-sìⁿ ji̍t-āu beh cháiⁿ-iūⁿ khoán-thāi lí ê peh-sìⁿ.

15伊就提起伊ê歌，講： Pí-jíⁿ ê kiáⁿ Pa-lân講： 目睭合teh ê人講；I chiū thê-khí i ê koa, kóng, Pí-jíⁿ ê kiáⁿ Pa-lân kóng, Ba̍k-chiu ha̍p-teh ê lâng kóng;

16聽見上帝ê話， 得tio̍h知至koân-ê ê知識， 看見全能ê ê異象， 目睭thí開，倒teh ê人講：Thiaⁿ-kìⁿ Siōng-tè ê ōe, Tit-tio̍h chai Chì-koâiⁿ-ê ê chai-bat, Khòaⁿ-kìⁿ Choân-lêng-ê ê īⁿ-siōng, Ba̍k-chiu thí-khui, tó-teh ê lâng kóng:

17我看伊，總是無tī現時， 我觀看伊，總是m̄是近近； 有一粒星beh tùi雅各出， 有一個權柄，beh tùi以色列興起， Beh phah破Mô͘-ap ê邊角， 毀壞擾亂ê人。Góa khòaⁿ i, chóng-sī bô tī hiān-sî, Góa koan-khòaⁿ i, chóng-sī m̄-sī kūn-kūn; Ū chi̍t lia̍p chhiⁿ beh tùi Ngá-kok chhut, Ū chi̍t ê koân-pèng, beh tùi Í-sek-lia̍t heng-khí, Beh phah-phòa Mô͘-ap ê piⁿ-kak, Húi-hoāi jiáu-loān ê lâng.

18Í-tong beh做業， Se-jíⁿ也beh做業，hō͘伊ê對敵， 以色列beh行tāi-chì勇敢。Í-tong beh chòe-gia̍p, Se-jíⁿ iā beh chòe-gia̍p, hō͘ i ê tùi-te̍k, Í-sek-lia̍t beh kiâⁿ tāi-chì ióng-kám.

19有一位掌權ê beh tùi雅各出， 伊beh剿滅城中所留ê。Ū chi̍t-ūi chiáng-koân-ê beh tùi Ngá-kok chhut, I beh châu-bia̍t siâⁿ-tiong só͘ lâu ê.

20伊koh看見A-má-le̍k，就提起伊ê歌，講： A-má-le̍k本做chiah-ê國ê頭， 總是伊ê結局beh永永滅無。I koh khòaⁿ-kìⁿ A-má-le̍k, chiū thê-khí i ê koa, kóng, A-má-le̍k pún chòe chiah ê kok ê thâu, Chóng-sī i ê kiat-kio̍k beh éng-éng bia̍t-bô.

21伊koh看Ki-nî人，就提起伊ê歌，講： 你khiā起ê所在是堅固， 你作siū tī山巖；I koh khòaⁿ Ki-nî lâng, chiū thê-khí i ê koa, kóng, Lí khiā-khí ê só͘-chāi sī kian-kò͘, Lí choh-siū tī soaⁿ-giâm;

22總是Ki-nî beh致到衰微， 直到hō͘亞述掠你去。Chóng-sī Ki-nî beh tì-kàu soe-bî, Ti̍t-kàu hō͘ A-su̍t lia̍h lí khì.

23伊koh提起歌，講： Ai-ah，上帝行chit-ê事ê時， Chī-chūi能得tio̍h活？I koh thê-khí koa, kóng, Ai-ah, Siōng-tè kiâⁿ chit ê sū ê sî, Chī-chūi ōe tit-tio̍h oa̍h?

24Beh有船tùi Ki-thê hia來， 苦楚亞述，苦楚Hi-pek； 伊也beh永永滅無。Beh ū chûn tùi Ki-thê hia lâi, Khó͘-chhó͘ A-su̍t, khó͘-chhó͘ Hi-pek; I iā beh éng-éng bia̍t-bô.

25Pa-lân就起來，tò去伊本所在；Pa-le̍k也行伊ê路。Pa-lân chiū khí-lâi, tò-khì i pún só͘-chāi; Pa-le̍k iā kiâⁿ i ê lō͘.

1以色列人tiàm tī Si̍p-têng，百姓就kap Mô͘-ap ê cha-bó͘-gín-á行淫亂。Í-sek-lia̍t lâng tiàm tī Si̍p-têng, peh-sìⁿ chiū kap Mô͘-ap ê cha-bó͘-gín-á kiâⁿ îm-loān.

2In獻祭in ê上帝，請百姓來赴，百姓食in ê祭物，續跪拜in ê上帝。In hiàn-chè in ê siōng-tè, chhiáⁿ peh-sìⁿ lâi hù, peh-sìⁿ chia̍h in ê chè-mi̍h, sòa kūi-pài in ê siōng-tè.

3以色列人kap Pa-le̍k-pí-jíⁿ連合；耶和華就對以色列人發受氣。Í-sek-lia̍t lâng kap Pa-le̍k-pí-jíⁿ liân-ha̍p; Iâ-hô-hoa chiū tùi Í-sek-lia̍t lâng hoat siū-khì.

4耶和華對摩西講：將百姓lóng總ê族長，當頭白日吊死tī耶和華ê面前，hō͘耶和華ê大受氣thang tùi以色列消無。Iâ-hô-hoa tùi Mô͘-se kóng, Chiong peh-sìⁿ lóng-chóng ê cho̍k-tiúⁿ, tng-thâu pe̍h-ji̍t tiàu-sí tī Iâ-hô-hoa ê bīn-chêng, hō͘ Iâ-hô-hoa ê tōa siū-khì thang tùi Í-sek-lia̍t siau-bô.

5摩西就對以色列ê審判官講：見若屬lín ê人，有kap Pa-le̍k-pí-jíⁿ連合ê lín tio̍h thâi死伊。Mô͘-se chiū tùi Í-sek-lia̍t ê sím-phòaⁿ-koaⁿ kóng, Kìⁿ-nā sio̍k lín ê lâng, ū kap Pa-le̍k-pí-jíⁿ liân-ha̍p-ê lín tio̍h thâi-sí i.

6摩西kap以色列會眾tú-á tī會幕門口teh哭ê時，忽然有以色列中一人，當in目睭前帶一個米甸ê婦人人到伊ê兄弟hia。Mô͘-se kap Í-sek-lia̍t hōe-chiòng tú-á tī hōe-bō͘ mn̂g-kháu teh-khàu ê sî, hut-jiân ū Í-sek-lia̍t tiong chi̍t-lâng, tng in ba̍k-chiu chêng tòa chi̍t ê Bí-tiân ê hū-jîn-lâng kàu i ê hiaⁿ-tī hia.

7祭司亞倫ê孫，Í-lī-a-sat ê kiáⁿ，Hui-nî-hap看見，就tùi會中起來，手裡 kia̍h鎗；Chè-si A-lûn ê sun, Í-lī-a-sat ê kiáⁿ, Hui-nî-hap khòaⁿ-kìⁿ, chiū tùi hōe-tiong khí-lâi, chhiú-ni̍h kia̍h chhiuⁿ;

8tè以色列人入亭á內，鑿死兩人，就是鑿透以色列人kap hit-ê婦人人ê腹肚；án-ni，tī以色列人ê中間瘟疫就soah。tè Í-sek-lia̍t lâng ji̍p têng-á-lāi, chha̍k-sí nn̄g-lâng, chiū-sī chha̍k-thàu Í-sek-lia̍t lâng kap hit ê hū-jîn-lâng ê pak-tó͘; án-ni, tī Í-sek-lia̍t lâng ê tiong-kan un-e̍k chiū soah.

9Hit時tú-tio̍h瘟疫死ê，兩萬四千人。Hit-sî tú-tio̍h un-e̍k sí-ê, nn̄g-bān sì-chheng lâng.

10耶和華吩咐摩西講：Iâ-hô-hoa hoan-hù Mô͘-se kóng,

11祭司亞倫ê孫，Í-lī-a-sat ê kiáⁿ，Hui-nî-hap hō͘我所發ê受氣消無tī以色列人，因為伊tī in中間，用我ê妒忌做妒忌，hō͘我tī妒忌中無滅無in。Chè-si A-lûn ê sun, Í-lī-a-sat ê kiáⁿ, Hui-nî-hap hō͘ Góa só͘ hoat ê siū-khì siau-bô tī Í-sek-lia̍t lâng, in-ūi i tī in tiong-kan, ēng Góa ê tò͘-khī chòe tò͘-khī, hō͘ Góa tī tò͘-khī-tiong bô bia̍t-bô in.

12所以你tio̍h講：看ah，我用我平安ê約賞賜伊；Só͘-í lí tio̍h kóng, Khòaⁿ ah, Góa ēng Góa pêng-an ê iok siúⁿ-sù i;

13beh做伊kap伊ê後裔永遠做祭司ê職ê約，因為伊為tio̍h伊ê上帝有妒忌ê心，koh為tio̍h以色列人贖罪。beh chòe i kap i ê hō͘-è éng-oán chòe chè-si ê chit ê iok, in-ūi i ūi-tio̍h i ê Siōng-tè ū tò͘-khī ê sim, koh ūi-tio̍h Í-sek-lia̍t lâng sio̍k-chōe.

14hit-ê受thâi ê以色列人，就是kap米甸ê婦人人相kap受鑿死ê，名叫Sim-lī，是Sat-lō͘ ê kiáⁿ，是西門支派中一族ê首領。Hit ê siū-thâi ê Í-sek-lia̍t lâng, chiū-sī kap Bí-tiân ê hū-jîn-lâng saⁿ-kap siū chha̍k-sí-ê, miâ-kiò Sim-lī, sī Sat-lō͘ ê kiáⁿ, sī Se-biān chi-phài-tiong chi̍t-cho̍k ê siú-léng.

15Hit-ê受鑿死米甸ê婦人人名叫Ko-su-pí，是So͘-jíⁿ ê cha-bó͘-kiáⁿ；chit-ê So͘-jíⁿ是米甸ê百姓一族ê頭人。Hit ê siū chha̍k-sí Bí-tiân ê hū-jîn-lâng miâ-kiò Ko-su-pí, sī So͘-jíⁿ ê cha-bó͘-kiáⁿ; chit ê So͘-jíⁿ sī Bí-tiân ê peh-sìⁿ chi̍t-cho̍k ê thâu-lâng.

16耶和華吩咐摩西講：Iâ-hô-hoa hoan-hù Mô͘-se kóng,

17你tio̍h窘迫米甸人，koh phah in；Lí tio̍h khún-pek Bí-tiân lâng, koh phah in;

18因為in用詭譎ê計謀窘迫lín，tī Pí-jíⁿ ê事，kap in ê姊妹，米甸首領ê cha-bó͘-kiáⁿ，Ko-su-pí ê事，用詭譎ê計謀引誘lín；chit-ê Ko-su-pí，當瘟疫流行ê日，因為Pí-jíⁿ ê事已經受鑿死。in-ūi in ēng khúi-khiat ê kè-bô͘ khún-pek lín, tī Pí-jíⁿ ê sū, kap in ê chí-bē, Bí-tiân siú-léng ê cha-bó͘-kiáⁿ, Ko-su-pí ê sū, ēng khúi-khiat ê kè-bô͘ ín-iú lín; chit ê Ko-su-pí, tng un-e̍k liû-hêng ê ji̍t, in-ūi Pí-jíⁿ ê sū í-keng siū chha̍k-sí.

1瘟疫了後，耶和華吩咐摩西kap祭司亞倫ê kiáⁿ Í-lī-a-sat講：Un-e̍k liáu-āu, Iâ-hô-hoa hoan-hù Mô͘-se kap chè-si A-lûn ê kiáⁿ Í-lī-a-sat kóng,

2Lín tio̍h將以色列全會ê眾人，照in ê宗族，見若以色列中，tùi二十歲以上，能出去交戰ê，tio̍h算in ê總額。Lín tio̍h chiong Í-sek-lia̍t choân-hōe ê chèng-lâng, chiàu in ê chong-cho̍k, kìⁿ-nā Í-sek-lia̍t tiong, tùi jī-cha̍p hè í-chiūⁿ, ōe chhut-khì kau-chiàn ê, tio̍h sǹg in ê chóng-gia̍h.

3摩西kap祭司Í-lī-a-sat，tī Mô͘-ap ê平洋，約旦河邊，耶利哥相對ê所在，對in講，Mô͘-se kap chè-si Í-lī-a-sat, tī Mô͘-ap ê pîⁿ-iûⁿ, Iok-tàn hô-piⁿ, Iâ-lī-ko saⁿ-tùi ê só͘-chāi, tùi in kóng,

4Tùi二十歲以上算伊，照耶和華吩咐摩西以及出埃及地ê以色列人。Tùi jī-cha̍p hè í-chiūⁿ sǹg-i, chiàu Iâ-hô-hoa hoan-hù Mô͘-se í-ki̍p chhut Ai-ki̍p tōe ê Í-sek-lia̍t lâng.

5以色列ê大kiáⁿ是Liû-piān；Liû-piān chiah-ê kiáⁿ；屬Hap-lo̍k ê，有Hap-lo̍k族；屬Hoat-lō͘ ê，有Hoat-lō͘族；Í-sek-lia̍t ê tōa-kiáⁿ sī Liû-piān; Liû-piān chiah ê kiáⁿ; sio̍k Hap-lo̍k ê, ū Hap-lo̍k cho̍k; sio̍k Hoat-lō͘ ê, ū Hoat-lō͘ cho̍k;

6屬Hi-su-lûn ê，有Hi-su-lûn族；屬Ka-bí ê，有Ka-bí族。sio̍k Hi-su-lûn ê, ū Hi-su-lûn cho̍k; sio̍k Ka-bí ê, ū Ka-bí cho̍k.

7Chiah-ê就是Liû-piân ê ta̍k族；其中受算ê，共四萬三千七百三十名。Chiah-ê chiū-sī Liû-piān ê ta̍k-cho̍k; kî-tiong siū-sǹg-ê, kiōng sì-bān saⁿ-chheng chhit-pah saⁿ-cha̍p miâ.

8Hoat-lō͘ ê kiáⁿ是Í-lī-ap；Hoat-lō͘ ê kiáⁿ sī Í-lī-ap;

9Í-lī-ap chiah-ê kiáⁿ是Nî-bó͘-lī、Tāi-tan、A-PÍ-lân；chit-ê Tāi-tan、A-PÍ-lân，就是tùi會中受揀ê；Khó-la̍h ê黨攻擊耶和華ê時，in也kap in攻擊摩西、亞倫。Í-lī-ap chiah ê kiáⁿ sī Nî-bó͘-lī, Tāi-tan, A-pí-lân; chit ê Tāi-tan, A-pí-lân, chiū-sī tùi hōe-tiong siū-kéng-ê; Khó-la̍h ê tóng kong-kek Iâ-hô-hoa ê sî, in iā kap in kong-kek Mô͘-se A-lûn.

10Hit時地開嘴吞in，kap Khó-la̍h；in hit黨lóng死；也有火燒死兩百五十人，用in做鑑戒。Hit-sî tōe khui-chhùi thun in, kap Khó-la̍h; in hit-tóng lóng sí; iā ū hé sio-sí nn̄g-pah gō͘-cha̍p lâng, ēng in chòe kàm-kài.

11總是Khó-la̍h chiah-ê kiáⁿ無死。Chóng-sī Khó-la̍h chiah ê kiáⁿ bô sí.

12西門chiah-ê kiáⁿ照家族；屬Nî-bó͘-lī ê，有Nî-bó͘-lī族；Se-biān chiah ê kiáⁿ chiàu ke-cho̍k; sio̍k Nî-bó͘-lī ê, ū Nî-bó͘-lī cho̍k;

13屬Ngá-bín ê，有Ngá-bín族；屬Ngá-kun ê，有Ngá-kun族；屬謝拉 ê，有謝拉族；屬掃羅ê，有掃羅族。sio̍k Ngá-bín ê, ū Ngá-bín cho̍k; sio̍k Ngá-kun ê, ū Ngá-kun cho̍k; sio̍k Siā-la̍h ê, ū Siā-la̍h cho̍k; sio̍k Sò-lô ê, ū Sò-lô cho̍k.

14Chiah-ê是西門ê ta̍k族，共兩萬兩千兩百名。Chiah-ê sī Se-biān ê ta̍k-cho̍k, kiōng nn̄g-bān nn̄g-chheng nn̄g-pah miâ.

15Ka-tek chiah-ê kiáⁿ，照家族；屬Sé-hun ê，有Sé-hun族；屬Hap-ki ê，有Hap-ki族；屬Su-nî ê，有Su-nî族；Ka-tek chiah ê kiáⁿ, chiàu ke-cho̍k; sio̍k Sé-hun ê, ū Sé-hun cho̍k; sio̍k Hap-ki ê, ū Hap-ki cho̍k; sio̍k Su-nî ê, ū Su-nî cho̍k;

16屬A-su-nî ê，有A-su-nî族；屬Í-lī ê，有Í-lī族；sio̍k A-su-nî ê, ū A-su-nî cho̍k; sio̍k Í-lī ê, ū Í-lī cho̍k;

17屬A-lu̍t ê，有A-lu̍t族；屬A-lia̍t-lī ê，有A-lia̍t-lī族。sio̍k A-lu̍t ê, ū A-lu̍t cho̍k; sio̍k A-lia̍t-lī ê, ū A-lia̍t-lī cho̍k.

18Chiah-ê是Ka-tek kiáⁿ孫ê ta̍k族；in所計算ê，共四萬連五百名。Chiah-ê sī Ka-tek kiáⁿ-sun ê ta̍k-cho̍k; in só͘ kè-sǹg ê, kiōng sì-bān liân gō͘-pah miâ.

19猶大ê kiáⁿ，Jíⁿ kap Gô-lâm；chit-ê Jíⁿ kap Gô-lâm死tī迦南地。Iû-tāi ê kiáⁿ, Jíⁿ kap Gô-lâm; chit ê Jíⁿ kap Gô-lâm sí tī Ka-lâm tōe.

20猶大其餘chiah-ê kiáⁿ，照in ê家族；屬Sī-la̍h ê，有Sī-la̍h族；屬Hoat-le̍k-su ê，有Hoat-le̍k-su族；屬謝拉 ê，有謝拉族。Iû-tāi kî-û chiah ê kiáⁿ, chiàu in ê ke-cho̍k; sio̍k Sī-la̍h ê, ū Sī-la̍h cho̍k; sio̍k Hoat-le̍k-su ê, ū Hoat-le̍k-su cho̍k; sio̍k Siā-la̍h ê, ū Siā-la̍h cho̍k.

21Hoat-le̍k-su ê kiáⁿ；屬Hi-su-lûn ê，有Hi-su-lûn族；屬Hap-bó͘-le̍k ê，有Hap-bó͘-le̍k族。Hoat-le̍k-su ê kiáⁿ; sio̍k Hi-su-lûn ê, ū Hi-su-lûn cho̍k; sio̍k Hap-bó͘-le̍k ê, ū Hap-bó͘-le̍k cho̍k.

22Chiah-ê是猶大ê ta̍k族；in計算ê，共七萬六千五百名。Chiah-ê sī Iû-tāi ê ta̍k-cho̍k; in kè-sǹg ê, kiōng chhit-bān la̍k-chheng gō͘-pah miâ.

23Í-sat-ka ê kiáⁿ孫，照in ê宗族；屬Tô-la̍h ê，有Tô-la̍h族；屬Phó͘-óa ê，有Phó͘-óa族；Í-sat-ka ê kiáⁿ-sun, chiàu in ê chong-cho̍k; sio̍k Tô-la̍h ê, ū Tô-la̍h cho̍k; sio̍k Phó͘-óa ê, ū Phó͘-óa cho̍k;

24屬Ngá-su̍t ê，有Ngá-su̍t族；屬Sin-lûn ê，有Sin-lûn族。sio̍k Ngá-su̍t ê, ū Ngá-su̍t cho̍k; sio̍k Sin-lûn ê, ū Sin-lûn cho̍k.

25Chiah-ê是Í-sat-ka ê ta̍k族；in計算ê，共六萬四千三百名。Chiah-ê sī Í-sat-ka ê ta̍k-cho̍k; in kè-sǹg ê, kiōng la̍k-bān sì-chheng saⁿ-pah miâ.

26Se-pò͘-lûn ê kiáⁿ孫，照in ê宗族；屬Se-lia̍t ê，有Se-lia̍t族；屬Í-lûn ê，有Í-lûn族；屬Ngá-lī ê，有Ngá-lī族。Se-pò͘-lûn ê kiáⁿ-sun, chiàu in ê chong-cho̍k; sio̍k Se-lia̍t ê, ū Se-lia̍t cho̍k; sio̍k Í-lûn ê, ū Í-lûn cho̍k; sio̍k Ngá-lī ê, ū Ngá-lī cho̍k.

27Chiah-ê是Se-pò͘-lûn ê ta̍k族；in計算ê，共六萬連五百名。Chiah-ê sī Se-pò͘-lûn ê ta̍k-cho̍k; in kè-sǹg ê, kiōng la̍k-bān liân gō͘-pah miâ.

28約瑟ê kiáⁿ孫，照in ê宗族，有Má-ná-se，Í-hoat-liân。Iok-sek ê kiáⁿ-sun, chiàu in ê chong-cho̍k, ū Má-ná-se, Í-hoat-liân.

29Má-ná-se ê kiáⁿ孫；屬Má-kiat，有Má-kiat族；Má-kiat生Ki-lia̍t；屬Ki-lia̍t ê，有Ki-lia̍t族。Má-ná-se ê kiáⁿ-sun; sio̍k Má-kiat, ū Má-kiat cho̍k; Má-kiat siⁿ Ki-lia̍t; sio̍k Ki-lia̍t ê, ū Ki-lia̍t cho̍k.

30Chiah-ê是Ki-lia̍t ê kiáⁿ孫；屬I-í-siā ê，有I-í-siā族；屬Hi-le̍k ê，有Hi-le̍k族；Chiah-ê sī Ki-lia̍t ê kiáⁿ-sun; sio̍k I-í-siā ê, ū I-í-siā cho̍k; sio̍k Hi-le̍k ê, ū Hi-le̍k cho̍k;

31屬A-su-lia̍t ê，有A-su-lia̍t族；屬示劍ê，有示劍族；sio̍k A-su-lia̍t ê, ū A-su-lia̍t cho̍k; sio̍k Sī-kiàm ê, ū Sī-kiàm cho̍k;

32屬Sī-bí-tāi ê，有Sī-bí-tāi族；屬Hi-hut ê，有Hi-hut族；sio̍k Sī-bí-tāi ê, ū Sī-bí-tāi cho̍k; sio̍k Hi-hut ê, ū Hi-hut cho̍k;

33Hi-hut ê kiáⁿ Se-lô-hui-hap無kiáⁿ，只有cha-bó͘-kiáⁿ；Se-lô-hui-hap cha-bó͘-kiáⁿ ê名，就是Má-la̍h、挪亞、Hat-la̍h、Bi̍t-ka、Tek-sat。Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ; Se-lô-hui-hap cha-bó͘-kiáⁿ ê miâ, chiū-sī Má-la̍h, Ná-a, Hat-la̍h, Bi̍t-ka, Tek-sat.

34Chiah-ê是Má-ná-se ê ta̍k族；in計算ê，共五萬兩千七百名。chiah-ê sī Má-ná-se ê ta̍k-cho̍k; in kè-sǹg-ê, kiōng gō͘-bān nn̄g-chheng chhit-pah miâ.

35Chiah-ê是Í-hoat-liân ê kiáⁿ孫，照in ê宗族；屬Su-thê-la̍h ê，有Su-thê-la̍h族，屬Pí-kiat ê，有Pí-kiat族；屬Tha-hán ê，有Tha-hán族。Chiah-ê sī Í-hoat-liân ê kiáⁿ-sun, chiàu in ê chong-cho̍k; sio̍k Su-thê-la̍h ê, ū Su-thê-la̍h cho̍k, sio̍k Pí-kiat ê, ū Pí-kiat cho̍k; sio̍k Tha-hán ê, ū Tha-hán cho̍k.

36Chiah-ê是Su-thê-la̍h ê kiáⁿ孫；屬Í-lân ê，有Í-lân族。Chiah-ê sī Su-thê-la̍h ê kiáⁿ-sun; sio̍k Í-lân ê, ū Í-lân cho̍k.

37Chiah-ê是Í-hoat-liân kiáⁿ孫ê ta̍k族；in計算ê共三萬兩千五百名。照in ê宗族，chiah-ê是約瑟ê kiáⁿ孫。Chiah-ê sī Í-hoat-liân kiáⁿ-sun ê ta̍k-cho̍k; in kè-sǹg-ê kiōng saⁿ-bān nn̄g-chheng gō͘-pah miâ. Chiàu in ê chong-cho̍k, chiah-ê sī Iok-sek ê kiáⁿ-sun.

38便雅憫ê kiáⁿ孫，照in宗族；屬Pí-la̍h ê，有Pí-la̍h族；屬A-si̍t-pia̍t ê，有A-si̍t-pia̍t族；屬A-hi-lân ê，有A-hi-lân族；Piān-ngá-bín ê kiáⁿ-sun, chiàu in chong-cho̍k; sio̍k Pí-la̍h ê, ū Pí-la̍h cho̍k; sio̍k A-si̍t-pia̍t ê, ū A-si̍t-pia̍t cho̍k; sio̍k A-hi-lân ê, ū A-hi-lân cho̍k;

39屬Su-hoán ê，有Su-hoán族；屬Hō͘-hoán ê，有Hō͘-hoán族。sio̍k Su-hoán ê, ū Su-hoán cho̍k; sio̍k Hō͘-hoán ê, ū Hō͘-hoán cho̍k.

40Pí-la̍h ê kiáⁿ孫，是A-le̍k、Nái-bān；屬A-le̍k ê，有A-le̍k族；屬Nái-bān ê，有Nái-bān族。Pí-la̍h ê kiáⁿ-sun, sī A-le̍k, Nái-bān; sio̍k A-le̍k ê, ū A-le̍k cho̍k; sio̍k Nái-bān ê, ū Nái-bān cho̍k.

41照in ê宗族，chiah-ê是便雅憫ê kiáⁿ孫；in計算ê，共四萬五千六百名。Chiàu in ê chong-cho̍k, chiah-ê sī Piān-ngá-bín ê kiáⁿ-sun; in kè-sǹg-ê, kiōng sì-bān gō͘-chheng la̍k-pah miâ.

42Chiah-ê是Tàn ê kiáⁿ孫，照in ê宗族；屬Su-hâm ê，有Su-hâm族。照in ê宗族，chiah-ê是Tàn ê ta̍k族。Chiah-ê sī Tàn ê kiáⁿ-sun, chiàu in ê chong-cho̍k; sio̍k Su-hâm ê, ū Su-hâm cho̍k. Chiàu in ê chong-cho̍k, chiah-ê sī Tàn ê ta̍k-cho̍k.

43In計算ê，Su-hâm所有ê ta̍k族，共有六萬四千四百名。In kè-sǹg-ê, Su-hâm só͘ ū ê ta̍k-cho̍k, kiōng ū la̍k-bān sì-chheng sì-pah miâ.

44A-siat ê kiáⁿ孫，照in ê宗族；屬Im-ná ê，有Im-ná族；屬E̍k-si-úi ê，有E̍k-si-úi族；屬Pí-lī-a ê，有Pí-lī-a族。A-siat ê kiáⁿ-sun, chiàu in ê chong-cho̍k; sio̍k Im-ná ê, ū Im-ná cho̍k; sio̍k E̍k-si-úi ê, ū E̍k-si-úi cho̍k; sio̍k Pí-lī-a ê, ū Pí-lī-a cho̍k.

45Pí-lī-a ê kiáⁿ孫，屬Hi-piat ê，有Hi-piat族；屬Má-kiat ê，有Má-kiat族。Pí-lī-a ê kiáⁿ-sun, sio̍k Hi-piat ê, ū Hi-piat cho̍k; sio̍k Má-kiat ê, ū Má-kiat cho̍k.

46A-siat ê cha-bó͘-kiáⁿ名叫Se-la̍h。A-siat ê cha-bó͘-kiáⁿ miâ kiò Se-la̍h.

47Chiah-ê是A-siat kiáⁿ孫ê ta̍k族；in計算ê，共五萬三千四百名。Chiah-ê sī A-siat kiáⁿ-sun ê ta̍k-cho̍k; in kè-sǹg-ê, kiōng gō͘-bān saⁿ-chheng sì-pah miâ.

48Ná-hut-tha-lī ê kiáⁿ孫，照in ê宗族；屬Ngá-siat ê，有Ngá-siat族；屬Ko͘-nî ê，有Ko͘-nî族；Ná-hut-tha-lī ê kiáⁿ-sun, chiàu in ê chong-cho̍k; sio̍k Ngá-siat ê, ū Ngá-siat cho̍k; sio̍k Ko͘-nî ê, ū Ko͘-nî cho̍k;

49屬Iâ-sek ê，有Iâ-sek族；屬Sī-léng ê，有Sī-léng族。sio̍k Iâ-sek ê, ū Iâ-sek cho̍k; sio̍k Sī-léng ê, ū Sī-léng cho̍k.

50照in ê宗族，chiah-ê是Ná-hut-tha-lī ê ta̍k族；in計算ê，共四萬五千四百名。Chiàu in ê chong-cho̍k, chiah-ê sī Ná-hut-tha-lī ê ta̍k-cho̍k; in kè-sǹg-ê, kiōng sì-bān gō͘-chheng sì-pah miâ.

51Chiah-ê lóng是以色列kiáⁿ孫，in計算ê，共有六十萬連一千七百三十名。Chiah-ê lóng sī Í-sek-lia̍t kiáⁿ-sun, in kè-sǹg-ê, kiōng ū la̍k-cha̍p-bān liân chi̍t-chheng chhit-pah saⁿ-cha̍p miâ.

52耶和華吩咐摩西講：Iâ-hô-hoa hoan-hù Mô͘-se kóng,

53Hit-ê地tio̍h分hō͘ chiah-ê人做產業，照in ê名額。Hit ê tōe tio̍h pun hō͘ chiah ê lâng chòe sán-gia̍p, chiàu in ê miâ-gia̍h.

54人chōe-ê，tio̍h分hō͘ in khah-chōe業，人少ê，tio̍h分hō͘ in khah少；tio̍h照伊計算ê人額，用業分hō͘ ta̍k人。Lâng chōe-ê, tio̍h pun hō͘ in khah-chōe gia̍p, lâng chió-ê, tio̍h pun hō͘ in khah-chió; tio̍h chiàu i kè-sǹg ê lâng-gia̍h, ēng gia̍p pun hō͘ ta̍k-lâng.

55總是hit-ê地tio̍h liam-khau來分伊，ta̍k人照伊祖宗chiah-ê支派ê名，來承接chiah-ê業。Chóng-sī hit ê tōe tio̍h liam-khau lâi pun i, ta̍k-lâng chiàu i chó͘-chong chiah ê chi-phài ê miâ, lâi sêng-chiap chiah ê gia̍p.

56Tio̍h照所liam ê khau，看人額chōe，人額少，用產業分hō͘ in。Tio̍h chiàu só͘ liam ê khau, khòaⁿ lâng-gia̍h chōe, lâng-gia̍h chió, ēng sán-gia̍p pun hō͘ in.

57Chiah-ê就是利未人，照in ê宗族計算ê；屬Kek-sūn ê，有Kek-sūn族；屬Ko-hat ê，有Ko-hat族；屬Bí-la̍h-lī ê，有Bí-la̍h-lī族。Chiah-ê chiū-sī Lī-bī lâng, chiàu in ê chong-cho̍k kè-sǹg-ê; sio̍k Kek-sūn ê, ū Kek-sūn cho̍k; sio̍k Ko-hat ê, ū Ko-hat cho̍k; sio̍k Bí-la̍h-lī ê, ū Bí-la̍h-lī cho̍k.

58Chiah-ê是利未ê ta̍k族；有Li̍p-nî族、Hi-pek-lûn族、Má-lī族、Bó͘-sī族、Khó-la̍h族。Ko-hat生Àm-lân。Chiah-ê sī Lī-bī ê ta̍k-cho̍k; ū Li̍p-nî cho̍k, Hi-pek-lûn cho̍k, Má-lī cho̍k, Bó͘-sī cho̍k, Khó-la̍h cho̍k. Ko-hat siⁿ Àm-lân.

59Àm-lân ê bó͘名叫Iok-kî-pia̍t，是利未ê cha-bó͘-kiáⁿ；伊ê老母tī埃及tùi利未生ê；伊tùi Àm-lân生亞倫、摩西，kap in ê大姊Bí-lī-àm。Àm-lân ê bó͘ miâ-kiò Iok-kî-pia̍t, sī Lī-bī ê cha-bó͘-kiáⁿ; i ê lāu-bú tī Ai-ki̍p tùi Lī-bī siⁿ ê; i tùi Àm-lân siⁿ A-lûn, Mô͘-se, kap in ê tōa-chí Bí-lī-àm.

60Tùi亞倫生Ná-tap、A-PÍ-hō͘、Í-lī-a-sat、Í-tha-má。Tùi A-lûn siⁿ Ná-tap, A-pí-hō͘, Í-lī-a-sat, Í-tha-má.

61Ná-tap A-PÍ-hō͘ tī耶和華ê面前獻別號火ê時，就死。Ná-tap A-pí-hō͘ tī Iâ-hô-hoa ê bīn-chêng hiàn pa̍t-hō hé ê sî, chiū sí.

62In中間一月日以外，計算ê ta-po͘丁，共兩萬三千；因為in tī以色列人中無算在內，因為tī以色列人中無用產業hō͘ in。In tiong-kan chi̍t-ge̍h-ji̍t í-gōa, kè-sǹg ê ta-po͘-teng, kiōng nn̄g-bān saⁿ-chheng; in-ūi in tī Í-sek-lia̍t lâng tiong bô sǹg chāi-lāi, in-ūi tī Í-sek-lia̍t lâng tiong bô ēng sán-gia̍p hō͘ in.

63Chiah-ê就是hō͘摩西kap祭司Í-lī-a-sat所算過ê；in tī Mô͘-ap平洋，kap耶利哥相對ê約旦河邊，點算以色列人。Chiah-ê chiū-sī hō͘ Mô͘-se kap chè-si Í-lī-a-sat só͘ sǹg-kè ê; in tī Mô͘-ap pîⁿ-iûⁿ, kap Iâ-lī-ko saⁿ-tùi ê Iok-tàn hô-piⁿ, tiám-sǹg Í-sek-lia̍t lâng.

64前摩西kap祭司亞倫tī西奈ê曠野算以色列人，hit時所算ê，taⁿ無一個tī-teh。Chêng Mô͘-se kap chè-si A-lûn tī Se-nái ê khòng-iá sǹg Í-sek-lia̍t lâng, hit-sî só͘ sǹg-ê, taⁿ bô chi̍t-ê tī-teh.

65因為耶和華論到in bat講：In的確tio̍h死tī曠野；所以除Iâ-hu-nî ê kiáⁿ迦勒，kap Lùn ê kiáⁿ約書亞以外，hiah-ê人無留一人tī-teh。In-ūi Iâ-hô-hoa lūn-kàu in bat kóng, In tek-khak tio̍h sí tī khòng-iá; só͘-í tû Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a í-gōa, hiah ê lâng bô lâu chi̍t-lâng tī-teh.