1瘟疫了後，耶和華吩咐摩西kap祭司亞倫ê kiáⁿ Í-lī-a-sat講：Un-e̍k liáu-āu, Iâ-hô-hoa hoan-hù Mô͘-se kap chè-si A-lûn ê kiáⁿ Í-lī-a-sat kóng,

2Lín tio̍h將以色列全會ê眾人，照in ê宗族，見若以色列中，tùi二十歲以上，能出去交戰ê，tio̍h算in ê總額。Lín tio̍h chiong Í-sek-lia̍t choân-hōe ê chèng-lâng, chiàu in ê chong-cho̍k, kìⁿ-nā Í-sek-lia̍t tiong, tùi jī-cha̍p hè í-chiūⁿ, ōe chhut-khì kau-chiàn ê, tio̍h sǹg in ê chóng-gia̍h.

3摩西kap祭司Í-lī-a-sat，tī Mô͘-ap ê平洋，約旦河邊，耶利哥相對ê所在，對in講，Mô͘-se kap chè-si Í-lī-a-sat, tī Mô͘-ap ê pîⁿ-iûⁿ, Iok-tàn hô-piⁿ, Iâ-lī-ko saⁿ-tùi ê só͘-chāi, tùi in kóng,

4Tùi二十歲以上算伊，照耶和華吩咐摩西以及出埃及地ê以色列人。Tùi jī-cha̍p hè í-chiūⁿ sǹg-i, chiàu Iâ-hô-hoa hoan-hù Mô͘-se í-ki̍p chhut Ai-ki̍p tōe ê Í-sek-lia̍t lâng.

5以色列ê大kiáⁿ是Liû-piān；Liû-piān chiah-ê kiáⁿ；屬Hap-lo̍k ê，有Hap-lo̍k族；屬Hoat-lō͘ ê，有Hoat-lō͘族；Í-sek-lia̍t ê tōa-kiáⁿ sī Liû-piān; Liû-piān chiah ê kiáⁿ; sio̍k Hap-lo̍k ê, ū Hap-lo̍k cho̍k; sio̍k Hoat-lō͘ ê, ū Hoat-lō͘ cho̍k;

6屬Hi-su-lûn ê，有Hi-su-lûn族；屬Ka-bí ê，有Ka-bí族。sio̍k Hi-su-lûn ê, ū Hi-su-lûn cho̍k; sio̍k Ka-bí ê, ū Ka-bí cho̍k.

7Chiah-ê就是Liû-piân ê ta̍k族；其中受算ê，共四萬三千七百三十名。Chiah-ê chiū-sī Liû-piān ê ta̍k-cho̍k; kî-tiong siū-sǹg-ê, kiōng sì-bān saⁿ-chheng chhit-pah saⁿ-cha̍p miâ.

8Hoat-lō͘ ê kiáⁿ是Í-lī-ap；Hoat-lō͘ ê kiáⁿ sī Í-lī-ap;

9Í-lī-ap chiah-ê kiáⁿ是Nî-bó͘-lī、Tāi-tan、A-PÍ-lân；chit-ê Tāi-tan、A-PÍ-lân，就是tùi會中受揀ê；Khó-la̍h ê黨攻擊耶和華ê時，in也kap in攻擊摩西、亞倫。Í-lī-ap chiah ê kiáⁿ sī Nî-bó͘-lī, Tāi-tan, A-pí-lân; chit ê Tāi-tan, A-pí-lân, chiū-sī tùi hōe-tiong siū-kéng-ê; Khó-la̍h ê tóng kong-kek Iâ-hô-hoa ê sî, in iā kap in kong-kek Mô͘-se A-lûn.

10Hit時地開嘴吞in，kap Khó-la̍h；in hit黨lóng死；也有火燒死兩百五十人，用in做鑑戒。Hit-sî tōe khui-chhùi thun in, kap Khó-la̍h; in hit-tóng lóng sí; iā ū hé sio-sí nn̄g-pah gō͘-cha̍p lâng, ēng in chòe kàm-kài.

11總是Khó-la̍h chiah-ê kiáⁿ無死。Chóng-sī Khó-la̍h chiah ê kiáⁿ bô sí.

12西門chiah-ê kiáⁿ照家族；屬Nî-bó͘-lī ê，有Nî-bó͘-lī族；Se-biān chiah ê kiáⁿ chiàu ke-cho̍k; sio̍k Nî-bó͘-lī ê, ū Nî-bó͘-lī cho̍k;

13屬Ngá-bín ê，有Ngá-bín族；屬Ngá-kun ê，有Ngá-kun族；屬謝拉 ê，有謝拉族；屬掃羅ê，有掃羅族。sio̍k Ngá-bín ê, ū Ngá-bín cho̍k; sio̍k Ngá-kun ê, ū Ngá-kun cho̍k; sio̍k Siā-la̍h ê, ū Siā-la̍h cho̍k; sio̍k Sò-lô ê, ū Sò-lô cho̍k.

14Chiah-ê是西門ê ta̍k族，共兩萬兩千兩百名。Chiah-ê sī Se-biān ê ta̍k-cho̍k, kiōng nn̄g-bān nn̄g-chheng nn̄g-pah miâ.

15Ka-tek chiah-ê kiáⁿ，照家族；屬Sé-hun ê，有Sé-hun族；屬Hap-ki ê，有Hap-ki族；屬Su-nî ê，有Su-nî族；Ka-tek chiah ê kiáⁿ, chiàu ke-cho̍k; sio̍k Sé-hun ê, ū Sé-hun cho̍k; sio̍k Hap-ki ê, ū Hap-ki cho̍k; sio̍k Su-nî ê, ū Su-nî cho̍k;

16屬A-su-nî ê，有A-su-nî族；屬Í-lī ê，有Í-lī族；sio̍k A-su-nî ê, ū A-su-nî cho̍k; sio̍k Í-lī ê, ū Í-lī cho̍k;

17屬A-lu̍t ê，有A-lu̍t族；屬A-lia̍t-lī ê，有A-lia̍t-lī族。sio̍k A-lu̍t ê, ū A-lu̍t cho̍k; sio̍k A-lia̍t-lī ê, ū A-lia̍t-lī cho̍k.

18Chiah-ê是Ka-tek kiáⁿ孫ê ta̍k族；in所計算ê，共四萬連五百名。Chiah-ê sī Ka-tek kiáⁿ-sun ê ta̍k-cho̍k; in só͘ kè-sǹg ê, kiōng sì-bān liân gō͘-pah miâ.

19猶大ê kiáⁿ，Jíⁿ kap Gô-lâm；chit-ê Jíⁿ kap Gô-lâm死tī迦南地。Iû-tāi ê kiáⁿ, Jíⁿ kap Gô-lâm; chit ê Jíⁿ kap Gô-lâm sí tī Ka-lâm tōe.

20猶大其餘chiah-ê kiáⁿ，照in ê家族；屬Sī-la̍h ê，有Sī-la̍h族；屬Hoat-le̍k-su ê，有Hoat-le̍k-su族；屬謝拉 ê，有謝拉族。Iû-tāi kî-û chiah ê kiáⁿ, chiàu in ê ke-cho̍k; sio̍k Sī-la̍h ê, ū Sī-la̍h cho̍k; sio̍k Hoat-le̍k-su ê, ū Hoat-le̍k-su cho̍k; sio̍k Siā-la̍h ê, ū Siā-la̍h cho̍k.

21Hoat-le̍k-su ê kiáⁿ；屬Hi-su-lûn ê，有Hi-su-lûn族；屬Hap-bó͘-le̍k ê，有Hap-bó͘-le̍k族。Hoat-le̍k-su ê kiáⁿ; sio̍k Hi-su-lûn ê, ū Hi-su-lûn cho̍k; sio̍k Hap-bó͘-le̍k ê, ū Hap-bó͘-le̍k cho̍k.

22Chiah-ê是猶大ê ta̍k族；in計算ê，共七萬六千五百名。Chiah-ê sī Iû-tāi ê ta̍k-cho̍k; in kè-sǹg ê, kiōng chhit-bān la̍k-chheng gō͘-pah miâ.

23Í-sat-ka ê kiáⁿ孫，照in ê宗族；屬Tô-la̍h ê，有Tô-la̍h族；屬Phó͘-óa ê，有Phó͘-óa族；Í-sat-ka ê kiáⁿ-sun, chiàu in ê chong-cho̍k; sio̍k Tô-la̍h ê, ū Tô-la̍h cho̍k; sio̍k Phó͘-óa ê, ū Phó͘-óa cho̍k;

24屬Ngá-su̍t ê，有Ngá-su̍t族；屬Sin-lûn ê，有Sin-lûn族。sio̍k Ngá-su̍t ê, ū Ngá-su̍t cho̍k; sio̍k Sin-lûn ê, ū Sin-lûn cho̍k.

25Chiah-ê是Í-sat-ka ê ta̍k族；in計算ê，共六萬四千三百名。Chiah-ê sī Í-sat-ka ê ta̍k-cho̍k; in kè-sǹg ê, kiōng la̍k-bān sì-chheng saⁿ-pah miâ.

26Se-pò͘-lûn ê kiáⁿ孫，照in ê宗族；屬Se-lia̍t ê，有Se-lia̍t族；屬Í-lûn ê，有Í-lûn族；屬Ngá-lī ê，有Ngá-lī族。Se-pò͘-lûn ê kiáⁿ-sun, chiàu in ê chong-cho̍k; sio̍k Se-lia̍t ê, ū Se-lia̍t cho̍k; sio̍k Í-lûn ê, ū Í-lûn cho̍k; sio̍k Ngá-lī ê, ū Ngá-lī cho̍k.

27Chiah-ê是Se-pò͘-lûn ê ta̍k族；in計算ê，共六萬連五百名。Chiah-ê sī Se-pò͘-lûn ê ta̍k-cho̍k; in kè-sǹg ê, kiōng la̍k-bān liân gō͘-pah miâ.

28約瑟ê kiáⁿ孫，照in ê宗族，有Má-ná-se，Í-hoat-liân。Iok-sek ê kiáⁿ-sun, chiàu in ê chong-cho̍k, ū Má-ná-se, Í-hoat-liân.

29Má-ná-se ê kiáⁿ孫；屬Má-kiat，有Má-kiat族；Má-kiat生Ki-lia̍t；屬Ki-lia̍t ê，有Ki-lia̍t族。Má-ná-se ê kiáⁿ-sun; sio̍k Má-kiat, ū Má-kiat cho̍k; Má-kiat siⁿ Ki-lia̍t; sio̍k Ki-lia̍t ê, ū Ki-lia̍t cho̍k.

30Chiah-ê是Ki-lia̍t ê kiáⁿ孫；屬I-í-siā ê，有I-í-siā族；屬Hi-le̍k ê，有Hi-le̍k族；Chiah-ê sī Ki-lia̍t ê kiáⁿ-sun; sio̍k I-í-siā ê, ū I-í-siā cho̍k; sio̍k Hi-le̍k ê, ū Hi-le̍k cho̍k;

31屬A-su-lia̍t ê，有A-su-lia̍t族；屬示劍ê，有示劍族；sio̍k A-su-lia̍t ê, ū A-su-lia̍t cho̍k; sio̍k Sī-kiàm ê, ū Sī-kiàm cho̍k;

32屬Sī-bí-tāi ê，有Sī-bí-tāi族；屬Hi-hut ê，有Hi-hut族；sio̍k Sī-bí-tāi ê, ū Sī-bí-tāi cho̍k; sio̍k Hi-hut ê, ū Hi-hut cho̍k;

33Hi-hut ê kiáⁿ Se-lô-hui-hap無kiáⁿ，只有cha-bó͘-kiáⁿ；Se-lô-hui-hap cha-bó͘-kiáⁿ ê名，就是Má-la̍h、挪亞、Hat-la̍h、Bi̍t-ka、Tek-sat。Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ; Se-lô-hui-hap cha-bó͘-kiáⁿ ê miâ, chiū-sī Má-la̍h, Ná-a, Hat-la̍h, Bi̍t-ka, Tek-sat.

34Chiah-ê是Má-ná-se ê ta̍k族；in計算ê，共五萬兩千七百名。chiah-ê sī Má-ná-se ê ta̍k-cho̍k; in kè-sǹg-ê, kiōng gō͘-bān nn̄g-chheng chhit-pah miâ.

35Chiah-ê是Í-hoat-liân ê kiáⁿ孫，照in ê宗族；屬Su-thê-la̍h ê，有Su-thê-la̍h族，屬Pí-kiat ê，有Pí-kiat族；屬Tha-hán ê，有Tha-hán族。Chiah-ê sī Í-hoat-liân ê kiáⁿ-sun, chiàu in ê chong-cho̍k; sio̍k Su-thê-la̍h ê, ū Su-thê-la̍h cho̍k, sio̍k Pí-kiat ê, ū Pí-kiat cho̍k; sio̍k Tha-hán ê, ū Tha-hán cho̍k.

36Chiah-ê是Su-thê-la̍h ê kiáⁿ孫；屬Í-lân ê，有Í-lân族。Chiah-ê sī Su-thê-la̍h ê kiáⁿ-sun; sio̍k Í-lân ê, ū Í-lân cho̍k.

37Chiah-ê是Í-hoat-liân kiáⁿ孫ê ta̍k族；in計算ê共三萬兩千五百名。照in ê宗族，chiah-ê是約瑟ê kiáⁿ孫。Chiah-ê sī Í-hoat-liân kiáⁿ-sun ê ta̍k-cho̍k; in kè-sǹg-ê kiōng saⁿ-bān nn̄g-chheng gō͘-pah miâ. Chiàu in ê chong-cho̍k, chiah-ê sī Iok-sek ê kiáⁿ-sun.

38便雅憫ê kiáⁿ孫，照in宗族；屬Pí-la̍h ê，有Pí-la̍h族；屬A-si̍t-pia̍t ê，有A-si̍t-pia̍t族；屬A-hi-lân ê，有A-hi-lân族；Piān-ngá-bín ê kiáⁿ-sun, chiàu in chong-cho̍k; sio̍k Pí-la̍h ê, ū Pí-la̍h cho̍k; sio̍k A-si̍t-pia̍t ê, ū A-si̍t-pia̍t cho̍k; sio̍k A-hi-lân ê, ū A-hi-lân cho̍k;

39屬Su-hoán ê，有Su-hoán族；屬Hō͘-hoán ê，有Hō͘-hoán族。sio̍k Su-hoán ê, ū Su-hoán cho̍k; sio̍k Hō͘-hoán ê, ū Hō͘-hoán cho̍k.

40Pí-la̍h ê kiáⁿ孫，是A-le̍k、Nái-bān；屬A-le̍k ê，有A-le̍k族；屬Nái-bān ê，有Nái-bān族。Pí-la̍h ê kiáⁿ-sun, sī A-le̍k, Nái-bān; sio̍k A-le̍k ê, ū A-le̍k cho̍k; sio̍k Nái-bān ê, ū Nái-bān cho̍k.

41照in ê宗族，chiah-ê是便雅憫ê kiáⁿ孫；in計算ê，共四萬五千六百名。Chiàu in ê chong-cho̍k, chiah-ê sī Piān-ngá-bín ê kiáⁿ-sun; in kè-sǹg-ê, kiōng sì-bān gō͘-chheng la̍k-pah miâ.

42Chiah-ê是Tàn ê kiáⁿ孫，照in ê宗族；屬Su-hâm ê，有Su-hâm族。照in ê宗族，chiah-ê是Tàn ê ta̍k族。Chiah-ê sī Tàn ê kiáⁿ-sun, chiàu in ê chong-cho̍k; sio̍k Su-hâm ê, ū Su-hâm cho̍k. Chiàu in ê chong-cho̍k, chiah-ê sī Tàn ê ta̍k-cho̍k.

43In計算ê，Su-hâm所有ê ta̍k族，共有六萬四千四百名。In kè-sǹg-ê, Su-hâm só͘ ū ê ta̍k-cho̍k, kiōng ū la̍k-bān sì-chheng sì-pah miâ.

44A-siat ê kiáⁿ孫，照in ê宗族；屬Im-ná ê，有Im-ná族；屬E̍k-si-úi ê，有E̍k-si-úi族；屬Pí-lī-a ê，有Pí-lī-a族。A-siat ê kiáⁿ-sun, chiàu in ê chong-cho̍k; sio̍k Im-ná ê, ū Im-ná cho̍k; sio̍k E̍k-si-úi ê, ū E̍k-si-úi cho̍k; sio̍k Pí-lī-a ê, ū Pí-lī-a cho̍k.

45Pí-lī-a ê kiáⁿ孫，屬Hi-piat ê，有Hi-piat族；屬Má-kiat ê，有Má-kiat族。Pí-lī-a ê kiáⁿ-sun, sio̍k Hi-piat ê, ū Hi-piat cho̍k; sio̍k Má-kiat ê, ū Má-kiat cho̍k.

46A-siat ê cha-bó͘-kiáⁿ名叫Se-la̍h。A-siat ê cha-bó͘-kiáⁿ miâ kiò Se-la̍h.

47Chiah-ê是A-siat kiáⁿ孫ê ta̍k族；in計算ê，共五萬三千四百名。Chiah-ê sī A-siat kiáⁿ-sun ê ta̍k-cho̍k; in kè-sǹg-ê, kiōng gō͘-bān saⁿ-chheng sì-pah miâ.

48Ná-hut-tha-lī ê kiáⁿ孫，照in ê宗族；屬Ngá-siat ê，有Ngá-siat族；屬Ko͘-nî ê，有Ko͘-nî族；Ná-hut-tha-lī ê kiáⁿ-sun, chiàu in ê chong-cho̍k; sio̍k Ngá-siat ê, ū Ngá-siat cho̍k; sio̍k Ko͘-nî ê, ū Ko͘-nî cho̍k;

49屬Iâ-sek ê，有Iâ-sek族；屬Sī-léng ê，有Sī-léng族。sio̍k Iâ-sek ê, ū Iâ-sek cho̍k; sio̍k Sī-léng ê, ū Sī-léng cho̍k.

50照in ê宗族，chiah-ê是Ná-hut-tha-lī ê ta̍k族；in計算ê，共四萬五千四百名。Chiàu in ê chong-cho̍k, chiah-ê sī Ná-hut-tha-lī ê ta̍k-cho̍k; in kè-sǹg-ê, kiōng sì-bān gō͘-chheng sì-pah miâ.

51Chiah-ê lóng是以色列kiáⁿ孫，in計算ê，共有六十萬連一千七百三十名。Chiah-ê lóng sī Í-sek-lia̍t kiáⁿ-sun, in kè-sǹg-ê, kiōng ū la̍k-cha̍p-bān liân chi̍t-chheng chhit-pah saⁿ-cha̍p miâ.

52耶和華吩咐摩西講：Iâ-hô-hoa hoan-hù Mô͘-se kóng,

53Hit-ê地tio̍h分hō͘ chiah-ê人做產業，照in ê名額。Hit ê tōe tio̍h pun hō͘ chiah ê lâng chòe sán-gia̍p, chiàu in ê miâ-gia̍h.

54人chōe-ê，tio̍h分hō͘ in khah-chōe業，人少ê，tio̍h分hō͘ in khah少；tio̍h照伊計算ê人額，用業分hō͘ ta̍k人。Lâng chōe-ê, tio̍h pun hō͘ in khah-chōe gia̍p, lâng chió-ê, tio̍h pun hō͘ in khah-chió; tio̍h chiàu i kè-sǹg ê lâng-gia̍h, ēng gia̍p pun hō͘ ta̍k-lâng.

55總是hit-ê地tio̍h liam-khau來分伊，ta̍k人照伊祖宗chiah-ê支派ê名，來承接chiah-ê業。Chóng-sī hit ê tōe tio̍h liam-khau lâi pun i, ta̍k-lâng chiàu i chó͘-chong chiah ê chi-phài ê miâ, lâi sêng-chiap chiah ê gia̍p.

56Tio̍h照所liam ê khau，看人額chōe，人額少，用產業分hō͘ in。Tio̍h chiàu só͘ liam ê khau, khòaⁿ lâng-gia̍h chōe, lâng-gia̍h chió, ēng sán-gia̍p pun hō͘ in.

57Chiah-ê就是利未人，照in ê宗族計算ê；屬Kek-sūn ê，有Kek-sūn族；屬Ko-hat ê，有Ko-hat族；屬Bí-la̍h-lī ê，有Bí-la̍h-lī族。Chiah-ê chiū-sī Lī-bī lâng, chiàu in ê chong-cho̍k kè-sǹg-ê; sio̍k Kek-sūn ê, ū Kek-sūn cho̍k; sio̍k Ko-hat ê, ū Ko-hat cho̍k; sio̍k Bí-la̍h-lī ê, ū Bí-la̍h-lī cho̍k.

58Chiah-ê是利未ê ta̍k族；有Li̍p-nî族、Hi-pek-lûn族、Má-lī族、Bó͘-sī族、Khó-la̍h族。Ko-hat生Àm-lân。Chiah-ê sī Lī-bī ê ta̍k-cho̍k; ū Li̍p-nî cho̍k, Hi-pek-lûn cho̍k, Má-lī cho̍k, Bó͘-sī cho̍k, Khó-la̍h cho̍k. Ko-hat siⁿ Àm-lân.

59Àm-lân ê bó͘名叫Iok-kî-pia̍t，是利未ê cha-bó͘-kiáⁿ；伊ê老母tī埃及tùi利未生ê；伊tùi Àm-lân生亞倫、摩西，kap in ê大姊Bí-lī-àm。Àm-lân ê bó͘ miâ-kiò Iok-kî-pia̍t, sī Lī-bī ê cha-bó͘-kiáⁿ; i ê lāu-bú tī Ai-ki̍p tùi Lī-bī siⁿ ê; i tùi Àm-lân siⁿ A-lûn, Mô͘-se, kap in ê tōa-chí Bí-lī-àm.

60Tùi亞倫生Ná-tap、A-PÍ-hō͘、Í-lī-a-sat、Í-tha-má。Tùi A-lûn siⁿ Ná-tap, A-pí-hō͘, Í-lī-a-sat, Í-tha-má.

61Ná-tap A-PÍ-hō͘ tī耶和華ê面前獻別號火ê時，就死。Ná-tap A-pí-hō͘ tī Iâ-hô-hoa ê bīn-chêng hiàn pa̍t-hō hé ê sî, chiū sí.

62In中間一月日以外，計算ê ta-po͘丁，共兩萬三千；因為in tī以色列人中無算在內，因為tī以色列人中無用產業hō͘ in。In tiong-kan chi̍t-ge̍h-ji̍t í-gōa, kè-sǹg ê ta-po͘-teng, kiōng nn̄g-bān saⁿ-chheng; in-ūi in tī Í-sek-lia̍t lâng tiong bô sǹg chāi-lāi, in-ūi tī Í-sek-lia̍t lâng tiong bô ēng sán-gia̍p hō͘ in.

63Chiah-ê就是hō͘摩西kap祭司Í-lī-a-sat所算過ê；in tī Mô͘-ap平洋，kap耶利哥相對ê約旦河邊，點算以色列人。Chiah-ê chiū-sī hō͘ Mô͘-se kap chè-si Í-lī-a-sat só͘ sǹg-kè ê; in tī Mô͘-ap pîⁿ-iûⁿ, kap Iâ-lī-ko saⁿ-tùi ê Iok-tàn hô-piⁿ, tiám-sǹg Í-sek-lia̍t lâng.

64前摩西kap祭司亞倫tī西奈ê曠野算以色列人，hit時所算ê，taⁿ無一個tī-teh。Chêng Mô͘-se kap chè-si A-lûn tī Se-nái ê khòng-iá sǹg Í-sek-lia̍t lâng, hit-sî só͘ sǹg-ê, taⁿ bô chi̍t-ê tī-teh.

65因為耶和華論到in bat講：In的確tio̍h死tī曠野；所以除Iâ-hu-nî ê kiáⁿ迦勒，kap Lùn ê kiáⁿ約書亞以外，hiah-ê人無留一人tī-teh。In-ūi Iâ-hô-hoa lūn-kàu in bat kóng, In tek-khak tio̍h sí tī khòng-iá; só͘-í tû Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a í-gōa, hiah ê lâng bô lâu chi̍t-lâng tī-teh.

1屬約瑟ê kiáⁿ Má-ná-se ê族，有Má-ná-se ê玄孫，Má-kiat ê曾孫，Ki-lia̍t ê孫，Hi-hut ê kiáⁿ，Se-lô-hui-hap ê cha-bó͘-kiáⁿ，名叫Má-la̍h、挪亞、Hat-la̍h、Bi̍t-ka、Tek-sat；Sio̍k Iok-sek ê kiáⁿ Má-ná-se ê cho̍k, ū Má-ná-se ê goân-sun, Má-kiat ê cheng-sun, Ki-lia̍t ê sun, Hi-hut ê kiáⁿ, Se-lô-hui-hap ê cha-bó͘-kiáⁿ, miâ-kiò Má-la̍h, Ná-a, Hat-la̍h, Bi̍t-ka, Tek-sat;

2in進前來，khiā tī會幕門口，tī摩西kap祭司亞倫、Í-lī-a-sat，以及眾首領，kap會眾ê面前，講：in chìn-chêng lâi, khiā tī hōe-bō͘ mn̂g-kháu, tī Mô͘-se kap chè-si A-lûn, Í-lī-a-sat, í-ki̍p chèng siú-léng, kap hōe-chiòng ê bīn-chêng, kóng,

3阮老父死tī曠野，伊m̄是tī Khó-la̍h ê黨內，同黨聚集攻擊耶和華；是tī家己ê罪中死；伊也無kiáⁿ。Goán lāu-pē sí tī khòng-iá, i m̄-sī tī Khó-la̍h ê tóng-lāi, tâng-tóng chū-chi̍p kong-kek Iâ-hô-hoa; sī tī ka-kī ê chōe-tiong sí; i iā bô kiáⁿ.

4啥事因為阮老父無kiáⁿ，就將伊ê名tùi伊ê族中除去ah？請tī阮老父ê兄弟中分業hō͘阮。Siáⁿ-sū in-ūi goán lāu-pē bô kiáⁿ, chiū chiong i ê miâ tùi i ê cho̍k-tiong tû-khì ah? Chhiáⁿ tī goán lāu-pē ê hiaⁿ-tī tiong pun gia̍p hō͘ goán.

5摩西就將in ê案件排列tī耶和華ê面前。Mô͘-se chiū chiong in ê àn-kiāⁿ pâi-lia̍t tī Iâ-hô-hoa ê bīn-chêng.

6耶和華吩咐摩西講：Iâ-hô-hoa hoan-hù Mô͘-se kóng,

7Se-lô-hui-hap ê cha-bó͘-kiáⁿ所講ê有情理；你的確tio̍h tī in老父ê兄弟中，分地hō͘ in做業，tio̍h將in老父ê產業歸hō͘ in。Se-lô-hui-hap ê cha-bó͘-kiáⁿ só͘-kóng-ê ū chêng-lí; lí tek-khak tio̍h tī in lāu-pē ê hiaⁿ-tī tiong, pun tōe hō͘ in chòe-gia̍p, tio̍h chiong in lāu-pē ê sán-gia̍p kui hō͘ in.

8你也tio̍h吩咐以色列人講：人若死無kiáⁿ，就tio̍h將伊ê產業歸hō͘伊ê cha-bó͘-kiáⁿ。Lí iā tio̍h hoan-hù Í-sek-lia̍t lâng kóng, Lâng nā sí bô kiáⁿ, chiū tio̍h chiong i ê sán-gia̍p kui hō͘ i ê cha-bó͘-kiáⁿ.

9伊若無cha-bó͘-kiáⁿ，就tio̍h將伊ê業hō͘伊ê兄弟。I nā bô cha-bó͘-kiáⁿ, chiū tio̍h chiong i ê gia̍p hō͘ i ê hiaⁿ-tī.

10伊若無兄弟，就tio̍h將伊ê業hō͘伊ê老父ê兄弟。I nā bô hiaⁿ-tī, chiū tio̍h chiong i ê gia̍p hō͘ i ê lāu-pē ê hiaⁿ-tī.

11伊ê老父若無兄弟，就tio̍h將伊ê業hō͘伊ê族中至親ê，伊就得tio̍h做業；這beh做以色列人斷定tio̍h ê例；是照耶和華所吩咐摩西ê。I ê lāu-pē nā bô hiaⁿ-tī, chiū tio̍h chiong i ê gia̍p hō͘ i ê cho̍k-tiong chì-chhin ê, i chiū tit-tio̍h chòe-gia̍p; che beh chòe Í-sek-lia̍t lâng toàn tiāⁿ-tio̍h ê lē; sī chiàu Iâ-hô-hoa só͘ hoan-hù Mô͘-se ê.

12耶和華對摩西講：你上chit-ê A-pa-lîm ê山，看我賞賜以色列人ê地。Iâ-hô-hoa tùi Mô͘-se kóng, Lí chiūⁿ chit ê A-pa-lîm ê soaⁿ, khòaⁿ Góa siúⁿ-sù Í-sek-lia̍t lâng ê tōe.

13看了後你也beh tò祖；親像你ê兄亞倫tò去一樣。Khòaⁿ liáu-āu lí iā beh tò-chó͘; chhin-chhiūⁿ lí ê hiaⁿ A-lûn tò-khì chi̍t-iūⁿ.

14因為lín tī Sîm ê曠野，當會眾計較ê時，違背我ê話，無tī chhèng出水ê所在，會眾ê面前，尊我做聖。(chit-ê水就是tī Sîm ê曠野，Ka-te-su ê Bí-lī-pa ê水。)In-ūi lín tī Sîm ê khòng-iá, tng hōe-chiòng kè-kàu ê sî, ûi-pōe Góa ê ōe, bô tī chhèng-chhut chúi ê só͘-chāi, hōe-chiòng ê bīn-chêng, chun Góa chòe-sèng. (Chit ê chúi chiū-sī tī Sîm ê khòng-iá, Ka-te-su ê Bí-lī-pa ê chúi.)

15摩西對耶和華講：賞賜活命hō͘見若有肉體ê ê上帝耶和華ah，Mô͘-se tùi Iâ-hô-hoa kóng, Siúⁿ-sù oa̍h-miā hō͘ kìⁿ-nā ū jio̍k-thé-ê ê Siōng-tè Iâ-hô-hoa ah,

16願你設立一人來治理會眾，goān Lí siat-li̍p chi̍t-lâng lâi tī-lí hōe-chiòng,

17thang tī in ê面前出去，也tī in ê面前入來，thang chhōa in出去，也chhōa in入來，免得耶和華ê會眾親像無牧者ê羊群一般。thang tī in ê bīn-chêng chhut-khì, iā tī in ê bīn-chêng ji̍p-lâi, thang chhōa in chhut-khì, iā chhōa in ji̍p-lâi, bián-tit Iâ-hô-hoa ê hōe-chiòng chhin-chhiūⁿ bô bo̍k-chiá ê iûⁿ-kûn chi̍t-poaⁿ.

18耶和華對摩西講：Lùn ê kiáⁿ約書亞，伊ê心內有聖神，你chhōa伊來，按手tī伊ê頂面；Iâ-hô-hoa tùi Mô͘-se kóng, Lùn ê kiáⁿ Iok-su-a, i ê sim-lāi ū sèng-sîn, lí chhōa i lâi, hōaⁿ-chhiú tī i ê téng-bīn;

19hō͘伊khiā tī祭司Í-lī-a-sat kap全會ê面前，用職任命令伊。hō͘ i khiā tī chè-si Í-lī-a-sat kap choân-hōe ê bīn-chêng, ēng chit-jīm bēng-lēng i.

20Koh對你ê榮光分hō͘伊，hō͘以色列ê全會lóng聽thàn伊。Koh tùi lí ê êng-kng pun hō͘ i, hō͘ Í-sek-lia̍t ê choân-hōe lóng thiaⁿ-thàn i.

21伊tio̍h khiā tī祭司Í-lī-a-sat ê面前，Í-lī-a-sat tio̍h照O͘-lêng ê判斷，tī耶和華ê面前，替伊求問；伊kap以色列全會ê眾人lóng tio̍h照伊ê命令來出，照伊ê命令來入。I tio̍h khiā tī chè-si Í-lī-a-sat ê bīn-chêng, Í-lī-a-sat tio̍h chiàu O͘-lêng ê phòaⁿ-toàn, tī Iâ-hô-hoa ê bīn-chêng, thòe i kiû-mn̄g; i kap Í-sek-lia̍t choân-hōe ê chèng-lâng lóng tio̍h chiàu i ê bēng-lēng lâi chhut, chiàu i ê bēng-lēng lâi ji̍p.

22摩西就照耶和華所命令伊ê來行；伊chhōa約書亞來，hō͘伊khiā tī祭司Í-lī-a-sat kap全會ê面前，Mô͘-se chiū chiàu Iâ-hô-hoa só͘ bēng-lēng i-ê lâi kiâⁿ; i chhōa Iok-su-a lâi, hō͘ i khiā tī chè-si Í-lī-a-sat kap choân-hōe ê bīn-chêng,

23按手tī伊ê頂面，用命令交託伊；是照耶和華託摩西所講ê話。hōaⁿ-chhiú tī i ê téng-bīn, ēng bēng-lēng kau-thok i; sī chiàu Iâ-hô-hoa thok Mô͘-se só͘ kóng ê ōe.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h命令以色列人講：我ê禮物，就是獻hō͘我做芳芳chiah-ê火祭ê食物，lín tio̍h照日期謹慎獻hō͘我。Lí tio̍h bēng-lēng Í-sek-lia̍t lâng kóng, Góa ê lé-mi̍h, chiū-sī hiàn-hō͘ Góa chòe phang-phang chiah ê hé-chè ê chia̍h-mi̍h, lín tio̍h chiàu ji̍t-kî kín-sīn hiàn hō͘ Góa.

3Koh tio̍h kā in講：Lín tio̍h獻hō͘耶和華ê火祭，就是無瑕疵未滿年ê羊káng-á，ta̍k日兩隻，做久長獻ê燒祭。Koh tio̍h kā in kóng, Lín tio̍h hiàn hō͘ Iâ-hô-hoa ê hé-chè, chiū-sī bô hâ-chhû bē-móa-nî ê iûⁿ-káng-á, ta̍k-ji̍t nn̄g-chiah, chòe kú-tn̂g hiàn ê sio-chè.

4早起時tio̍h獻羊á一隻，黃昏ê時tio̍h獻羊á一隻。Chá-khí-sî tio̍h hiàn iûⁿ-á chi̍t-chiah, hông-hun ê sî tio̍h hiàn iûⁿ-á chi̍t-chiah.

5Koh tio̍h獻幼麵粉i-hoat十份一，kap調和khoeh好ê油一him四份一做素祭。Koh tio̍h hiàn iù-mī-hún i-hoat cha̍p-hūn-chi̍t, kap tiau-hô khoeh-hó ê iû chi̍t-him sì-hūn-chi̍t chòe sò͘-chè.

6這是tī西奈山所定tio̍h做常常獻ê燒祭，就是獻hō͘耶和華做芳芳ê火祭。Che sī tī Se-nái soaⁿ só͘ tiāⁿ-tio̍h chòe siông-siông hiàn ê sio-chè, chiū-sī hiàn hō͘ Iâ-hô-hoa chòe phang-phang ê hé-chè.

7為tio̍h chit一隻羊á，tio̍h續獻灌奠ê酒，一him四份ê一份；tī聖所中，你tio̍h將厚ê酒獻hō͘耶和華做灌奠。Ūi-tio̍h chí chi̍t chiah iûⁿ-á, tio̍h sòa hiàn koàn-tiān ê chiú, chi̍t-him sì-hūn ê chi̍t-hūn; tī sèng-só͘ tiong, lí tio̍h chiong kāu ê chiú hiàn hō͘ Iâ-hô-hoa chòe koàn-tiān.

8Ê-hng時，tio̍h獻第二隻羊á，親像早起時ê素祭，也親像伊ê灌奠，獻伊hō͘耶和華做芳芳ê火祭。Ê-hng sî, tio̍h hiàn tē-jī chiah iûⁿ-á, chhin-chhiūⁿ chá-khí-sî ê sò͘-chè, iā chhin-chhiūⁿ i ê koàn-tiān, hiàn i hō͘ Iâ-hô-hoa chòe phang-phang ê hé-chè.

9Koh tī安歇日tio̍h獻兩隻無瑕疵未滿年ê羊káng-á，也用調和油ê幼麵粉i-hoat十份ê兩份，做素祭，kap伊ê灌奠。Koh tī an-hioh-ji̍t tio̍h hiàn nn̄g-chiah bô hâ-chhû bē-móa-nî ê iûⁿ-káng-á, iā ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè, kap i ê koàn-tiān.

10這是ta̍k-ê安歇日ê燒祭，hit-ê常常獻ê燒祭，kap伊ê灌奠以外。Che sī ta̍k ê an-hioh-ji̍t ê sio-chè, hit ê siông-siông hiàn ê sio-chè, kap i ê koàn-tiān í-gōa.

11Ta̍k月ê初一，lín tio̍h獻燒祭hō͘耶和華，就是牛káng-á兩隻，綿羊káng一隻，無瑕疵未滿年ê羊káng-á七隻。Ta̍k-ge̍h ê chhoe-it, lín tio̍h hiàn sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chi̍t-chiah, bô hâ-chhû bē-móa-nî ê iûⁿ-káng-á chhit-chiah.

12為 ta̍k隻牛káng-á，tio̍h用調和油ê幼麵粉i-hoat十份ê三份，做素祭；為hit隻羊káng，也tio̍h用調和油ê幼麵粉i-hoat十份ê兩份，做素祭。Ūi ta̍k chiah gû-káng-á, tio̍h ēng tiau-hô iû ê iù-mī-hún i-hoat cha̍p-hūn ê saⁿ-hūn, chòe sò͘-chè; ūi hit chiah iûⁿ-káng, iā tio̍h ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè.

13為tio̍h ta̍k隻羊á tio̍h用調和油ê幼麵粉十份ê一份，做素祭，kap芳芳ê燒祭；是獻hō͘耶和華ê火祭。Ūi-tio̍h ta̍k chiah iûⁿ-á tio̍h ēng tiau-hô iû ê iù-mī-hún cha̍p-hūn ê chi̍t-hūn, chòe sò͘-chè, kap phang-phang ê sio-chè; sī hiàn hō͘ Iâ-hô-hoa ê hé-chè.

14伊ê灌奠tio̍h用酒，為tio̍h一隻牛káng-á用半him，為tio̍h一隻羊káng用一him ê三份一，為tio̍h一隻羊á就用一him ê四份一；這是ta̍k月ê燒祭，一年ê中間，ta̍k月tio̍h án-ni。I ê koàn-tiān tio̍h ēng chiú, ūi-tio̍h chi̍t chiah gû-káng-á ēng pòaⁿ-him, ūi-tio̍h chi̍t chiah iûⁿ-káng ēng chi̍t-him ê saⁿ-hūn-chi̍t, ūi-tio̍h chi̍t chiah iûⁿ-á chiū ēng chi̍t-him ê sì-hūn-chi̍t; che sī ta̍k-ge̍h ê sio-chè, chi̍t-nî ê tiong-kan, ta̍k-ge̍h tio̍h án-ni.

15Koh tio̍h用一隻山羊káng做贖罪祭，獻hō͘耶和華；tio̍h tī常常獻ê燒祭，kap伊ê灌奠，以外來獻伊。Koh tio̍h ēng chi̍t chiah soaⁿ-iûⁿ-káng chòe sio̍k-chōe-chè, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê koàn-tiān, í-gōa lâi hiàn i.

16正月十四日是耶和華ê Pôaⁿ過節。Chiaⁿ-ge̍h cha̍p-sì ji̍t sī Iâ-hô-hoa ê pôaⁿ-kè-choeh.

17Chit月十五日是節筵；tio̍h食無酵餅七日久。Chit-ge̍h cha̍p-gō͘ ji̍t sī choeh-iân; tio̍h chia̍h bô-kàⁿ-piáⁿ chhit-ji̍t kú.

18Tī伊ê頭一日tio̍h有聖會，lóng m̄-thang做勞動ê工。Tī i ê thâu-chi̍t ji̍t tio̍h ū sèng-hōe, lóng m̄-thang chòe lô-tōng ê kang.

19你tio̍h獻火祭做燒祭hō͘耶和華，就是牛káng-á兩隻，綿羊káng一隻，未滿年ê羊káng-á七隻；lín lóng tio̍h用無瑕疵ê。Lí tio̍h hiàn hé-chè chòe sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chi̍t-chiah, bē-móa-nî ê iûⁿ-káng-á chhit-chiah; lín lóng tio̍h ēng bô hâ-chhû ê.

20In ê素祭，用調和油ê幼麵粉，為tio̍h一隻牛káng獻十份三，為tio̍h一隻羊káng獻十份兩。In ê sò͘-chè, ēng tiau-hô iû ê iù-mī-hún, ūi-tio̍h chi̍t chiah gû-káng hiàn cha̍p-hūn-saⁿ, ūi-tio̍h chi̍t chiah iûⁿ-káng hiàn cha̍p-hūn-nn̄g.

21為tio̍h hit七隻羊á，ta̍k隻tio̍h獻十份一。Ūi-tio̍h hí chhit chiah iûⁿ-á, ta̍k chiah tio̍h hiàn cha̍p-hūn-chi̍t.

22Koh獻一隻山羊káng做贖罪祭，kā lín贖罪。Koh hiàn chi̍t chiah soaⁿ-iûⁿ-káng chòe sio̍k-chōe-chè, kā lín sio̍k-chōe.

23Lín獻chiah-ê，tio̍h tī早起時ê燒祭，就是常常獻ê燒祭以外。Lín hiàn chiah-ê, tio̍h tī chá-khí-sî ê sio-chè, chiū-sī siông-siông hiàn ê sio-chè í-gōa.

24連連七日久，ta̍k日照chit-ê例，用芳芳ê火祭ê食物，獻hō͘耶和華；tio̍h tī常常獻ê燒祭，kap伊ê灌奠，以外來獻。Liân-liân chhit-ji̍t kú, ta̍k-ji̍t chiàu chit ê lē, ēng phang-phang ê hé-chè ê chia̍h-mi̍h, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê koàn-tiān, í-gōa lâi hiàn.

25第七日lín tio̍h有聖會，lóng m̄-thang做甚麼勞動ê工5。Tē-chhit ji̍t lín tio̍h ū sèng-hōe, lóng m̄-thang chòe sím-mi̍h lô-tōng ê kâng.

26七個七日節，起頭熟ê土產，lín獻新ê素祭hō͘耶和華ê日，tio̍h有聖會，lóng m̄-thang做勞動ê工。Chhit ê chhit ji̍t choeh, khí-thâu-se̍k ê thó͘-sán, lín hiàn sin ê sò͘-chè hō͘ Iâ-hô-hoa ê ji̍t, tio̍h ū sèng-hōe, lóng m̄-thang chòe lô-tōng ê kang.

27Lín tio̍h獻芳芳ê燒祭hō͘耶和華，就是牛káng-á兩隻，綿羊káng-á一隻，未滿年ê羊káng-á七隻。Lín tio̍h hiàn phang-phang ê sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng-á chi̍t-chiah, bē-móa-nî ê iûⁿ-káng-á chhit-chiah.

28In ê素祭，用調和油ê幼麵粉，為tio̍h一隻牛káng獻十份三，為tio̍h一隻羊káng獻十份兩。In ê sò͘-chè, ēng tiau-hô iû ê iù-mī-hún, ūi-tio̍h chi̍t chiah gû-káng hiàn cha̍p-hūn-saⁿ, ūi-tio̍h chi̍t chiah iûⁿ-káng hiàn cha̍p-hūn-nn̄g.

29為tio̍h hit七隻羊á，ta̍k-chiah tio̍h獻十份一。Ūi-tio̍h hí chhit chiah iûⁿ-á, ta̍k-chiah tio̍h hiàn cha̍p-hūn-chi̍t.

30Koh獻一隻山羊káng，kā lín贖罪。Koh hiàn chi̍t chiah soaⁿ-iûⁿ-káng, kā lín sio̍k-chōe.

31Lín tio̍h獻chiah-ê，kap伊ê灌奠，tī常常獻ê燒祭kap伊ê素祭以外，lín lóng tio̍h用無瑕疵ê。Lín tio̍h hiàn chiah-ê, kap i ê koàn-tiān, tī siông-siông hiàn ê sio-chè kap i ê sò͘-chè í-gōa, lín lóng tio̍h ēng bô hâ-chhû-ê.