1七月初一lín tio̍h有聖會，lóng m̄-thang做勞動ê工；這是lín pûn哨角ê日。Chhit-ge̍h chhoe-it lín tio̍h ū sèng-hōe, lóng m̄-thang chòe lô-tōng ê kang; che sī lín pûn sàu-kak ê ji̍t.

2Lín tio̍h獻芳芳ê燒祭hō͘耶和華，就是牛káng-á一隻，綿羊káng一隻，未滿年ê羊káng-á七隻，lóng tio̍h無瑕疵ê。Lín tio̍h hiàn phang-phang ê sio-chè hō͘ Iâ-hô-hoa, chiū-sī gû-káng-á chi̍t-chiah, mî-iûⁿ-káng chi̍t-chiah, bē-móa-nî ê iûⁿ-káng-á chhit-chiah, lóng tio̍h bô hâ-chhû-ê.

3In ê素祭，用調和油ê幼麵粉，為tio̍h一隻牛káng獻i-hoat十份三，為tio̍h一隻羊káng獻十份兩。In ê sò͘-chè, ēng tiau-hô iû ê iù-mī-hún, ūi-tio̍h chi̍t chiah gû-káng hiàn i-hoat cha̍p-hūn-saⁿ, ūi-tio̍h chi̍t-chiah iûⁿ-káng hiàn cha̍p-hūn-nn̄g.

4為tio̍h hit七隻羊á，ta̍k-chiah tio̍h獻十份一。Ūi-tio̍h hí chhit chiah iûⁿ-á, ta̍k-chiah tio̍h hiàn cha̍p-hūn-chi̍t.

5Koh獻一隻山羊káng做贖罪祭，kā lín贖罪。Koh hiàn chi̍t chiah soaⁿ-iûⁿ-káng chòe sio̍k-chōe-chè, kā lín sio̍k-chōe.

6Chiah-ê是ta̍k月初一ê燒祭，kap伊ê素祭，以及常常獻ê燒祭，kap in ê素祭，以及伊ê灌奠，各照伊ê例以外，lóng做芳芳ê火祭獻hō͘耶和華。Chiah-ê sī ta̍k-ge̍h chhoe-it ê sio-chè, kap i ê sò͘-chè, í-ki̍p siông-siông hiàn ê sio-chè, kap in ê sò͘-chè, í-ki̍p i ê koàn-tiān, kok chiàu i ê lē í-gōa, lóng chòe phang-phang ê hé-chè hiàn hō͘ Iâ-hô-hoa.

7七月初十日，lín tio̍h有聖會，tio̍h刻苦家己ê心，lóng m̄-thang做工。Chhit-ge̍h chhoe-cha̍p ji̍t, lín tio̍h ū sèng-hōe, tio̍h khek-khó͘ ka-kī ê sim, lóng m̄-thang chòe-kang.

8Lín tio̍h獻芳芳ê燒祭hō͘耶和華，就是牛káng-á一隻，綿羊káng一隻，未滿年ê羊káng-á七隻，lóng tio̍h無瑕疵ê。Lín tio̍h hiàn phang-phang ê sio-chè hō͘ Iâ-hô-hoa, chiū-sī gû-káng-á chi̍t-chiah, mî-iûⁿ-káng chi̍t-chiah, bē-móa-nî ê iûⁿ-káng-á chhit-chiah, lóng tio̍h bô hâ-chhû-ê.

9In ê素祭，用調和油ê幼麵粉，為tio̍h一隻牛káng獻十份三，為tio̍h一隻羊káng獻十份兩；In ê sò͘-chè, ēng tiau-hô iû ê iù-mī-hún, ūi-tio̍h chi̍t chiah gû-káng hiàn cha̍p-hūn-saⁿ, ūi-tio̍h chi̍t chiah iûⁿ-káng hiàn cha̍p-hūn-nn̄g;

10為tio̍h hit七隻羊á，ta̍k隻tio̍h獻十份一。ūi-tio̍h hí chhit-chiah iûⁿ-á, ta̍k-chiah tio̍h hiàn cha̍p-hūn-chi̍t.

11Koh獻一隻山羊káng做贖罪祭；這是tī贖罪祭，kap常常獻ê燒祭，kap in ê素祭，以及in ê灌奠以外。Koh hiàn chi̍t chiah soaⁿ-iûⁿ-káng chòe sio̍k-chōe-chè; che sī tī sio̍k-chōe-chè, kap siông-siông hiàn ê sio-chè, kap in ê sò͘-chè, í-ki̍p in ê koàn-tiān í-gōa.

12七月十五日，lín tio̍h有聖會，lóng m̄-thang做勞動ê工；tio̍h七日久守節服事耶和華。Chhit-ge̍h cha̍p-gō͘ ji̍t, lín tio̍h ū sèng-hōe, lóng m̄-thang chòe lô-tōng ê kang; tio̍h chhit-ji̍t kú siú-choeh ho̍k-sāi Iâ-hô-hoa.

13Lín tio̍h獻燒祭做芳芳ê火祭hō͘耶和華，就是細隻ê牛káng-á十三隻，綿羊káng兩隻，未滿年ê羊á十四隻，lóng tio̍h無瑕疵ê。Lín tio̍h hiàn sio-chè chòe phang-phang ê hé-chè hō͘ Iâ-hô-hoa, chiū-sī sòe-chiah ê gû-káng-á cha̍p-saⁿ chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì chiah, lóng tio̍h bô hâ-chhû-ê.

14In ê素祭用調和油ê幼麵粉，為tio̍h chit十三隻牛káng，ta̍k隻牛káng獻十份三，為tio̍h兩隻綿羊káng，ta̍k隻綿羊káng獻十份兩，In ê sò͘-chè ēng tiau-hô iû ê iù-mī-hún, ūi-tio̍h chit cha̍p-saⁿ chiah gû-káng, ta̍k chiah gû-káng hiàn cha̍p-hūn-saⁿ, ūi-tio̍h nn̄g chiah mî-iûⁿ-káng, ta̍k chiah mî-iûⁿ-káng hiàn cha̍p-hūn-nn̄g,

15為tio̍h hit十四隻羊á，ta̍k隻羊á獻十份一。ūi-tio̍h hí cha̍p-sì chiah iûⁿ-á, ta̍k chiah iûⁿ-á hiàn cha̍p-hūn-chi̍t.

16也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。Iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

17第二日tio̍h獻細隻牛káng-á十二隻，綿羊káng兩隻，未滿年ê羊á十四隻，lóng tio̍h無瑕疵ê；Tē-jī ji̍t tio̍h hiàn sòe-chiah gû-káng-á cha̍p-jī chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì-chiah, lóng tio̍h bô hâ-chhû-ê;

18也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

19也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

20第三日tio̍h獻牛káng-á十一隻，綿羊káng兩隻，未滿年ê羊á十四隻，lóng tio̍h無瑕疵ê；Tē-saⁿ ji̍t tio̍h hiàn gû-káng-á cha̍p-it-chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì-chiah, lóng tio̍h bô hâ-chhû-ê;

21也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

22也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

23第四日tio̍h獻牛káng-á十隻，綿羊káng兩隻，未滿年ê羊á十四隻，lóng tio̍h無瑕疵ê；Tē-sì ji̍t tio̍h hiàn gû-káng-á cha̍p-chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì-chiah, lóng tio̍h bô hâ-chhû-ê;

24也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

25也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

26第五日tio̍h獻牛káng-á 九隻，綿羊káng兩隻，未滿年ê羊á十四隻，lóng tio̍h無瑕疵ê；Tē-gō͘ ji̍t tio̍h hiàn gû-káng-á káu-chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì-chiah, lóng tio̍h bô hâ-chhû-ê;

27也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

28也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

29第六日tio̍h獻牛káng-á八隻，綿羊káng兩隻，未滿年ê羊á十四隻，lóng tio̍h無瑕疵ê；Tē-la̍k ji̍t tio̍h hiàn gû-káng-á poeh-chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì-chiah, lóng tio̍h bô hâ-chhû-ê;

30也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

31也獻一隻山羊káng做贖罪祭；這是tī常常獻ê燒祭，kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè, kap i ê sò͘-chè, kap i ê koàn-tiān í-gōa.

32第七日tio̍h獻牛káng-á七隻，綿羊káng兩隻，未滿年ê羊á十四隻，lóng tio̍h無瑕疵ê；Tē-chhit ji̍t tio̍h hiàn gû-káng-á chhit-chiah, mî-iûⁿ-káng nn̄g-chiah, bē-móa-nî ê iûⁿ-á cha̍p-sì chiah, lóng tio̍h bô hâ-chhû-ê;

33也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

34也獻一隻山羊káng做贖罪祭；這是tī常常獻ê燒祭kap伊ê素祭，kap伊ê灌奠以外。iā hiàn chi̍t chiah soaⁿ-iûⁿ-káng chòe sio̍k-chōe-chè; che sī tī siông-siông hiàn ê sio-chè kap i ê sò͘-chè, kap i ê koàn-tiān í-gōa.

35第八日lín tio̍h有嚴肅-hōe，lóng m̄-thang做勞動ê工。Tē-poeh ji̍t lín tio̍h ū giâm-siok-hōe, lóng m̄-thang chòe lô-tōng ê kang.

36Lín tio̍h獻燒祭做芳芳ê火祭hō͘耶和華，就是牛káng一隻，綿羊káng一隻，未滿年ê羊á七隻，無瑕疵ê；Lín tio̍h hiàn sio-chè chòe phang-phang ê hé-chè hō͘ Iâ-hô-hoa, chiū-sī gû-káng chi̍t-chiah, mî-iûⁿ-káng chi̍t-chiah, bē-móa-nî ê iûⁿ-á chhit-chiah, bô hâ-chhû-ê;

37也為tio̍h牛káng，羊káng，kap羊á，續獻伊ê素祭，伊ê灌奠，lóng照in ê數額，照hit-ê例；iā ūi-tio̍h gû-káng, iûⁿ-káng, kap iûⁿ-á, sòa hiàn i ê sò͘-chè, i ê koàn-tiān, lóng chiàu in ê siàu-gia̍h, chiàu hit ê lē;

38也獻一隻公ê山羊做贖罪祭；這是tī常常獻ê燒祭kap伊ê素祭，kap伊ê灌奠以外。iā hiàn chi̍t chiah kang ê soaⁿ-iûⁿ chòe sio̍k-chōe-chè; che sī tī siông-siông hiàn ê sio-chè kap i ê sò͘-chè, kap i ê koàn-tiān í-gōa.

39Tī lín chiah-ê節期，tio̍h用chiah-ê獻hō͘耶和華，lóng tī所hē ê願，kap甘心所獻ê以外，做lín ê燒祭、素祭、灌奠，kap平安祭。Tī lín chiah ê choeh-kî, tio̍h ēng chiah-ê hiàn hō͘ Iâ-hô-hoa, lóng tī só͘ hē ê goān, kap kam-sim só͘ hiàn-ê í-gōa, chòe lín ê sio-chè, sò͘-chè, koàn-tiān, kap pêng-an-chè.

40耶和華所命令摩西ê，摩西就照án-ni lóng kā以色列人講。Iâ-hô-hoa só͘ bēng-lēng Mô͘-se ê, Mô͘-se chiū chiàu án-ni lóng kā Í-sek-lia̍t lâng kóng.

1摩西吩咐以色列ta̍k支派ê頭人，kā in講：耶和華所命令ê是án-ni。Mô͘-se hoan-hù Í-sek-lia̍t ta̍k chi-phài ê thâu-lâng, kā in kóng, Iâ-hô-hoa só͘ bēng-lēng-ê sī án-ni.

2人若對耶和華下願，á是chiù-chōa，用一個約家己約束，就m̄-thang吞食伊ê話，tio̍h照伊ê嘴所講出ê，一盡行伊。Lâng nā tùi Iâ-hô-hoa hē-goān, á-sī chiù-chōa, ēng chi̍t ê iok ka-kī iok-sok, chiū m̄-thang thun-chia̍h i ê ōe, tio̍h chiàu i ê chhùi só͘ kóng-chhut-ê, it-chīn kiâⁿ i.

3Cha-bó͘-gín-á少年iáu tī老父ê家ê時，若對耶和華下願，用約來家己約束，Cha-bó͘-gín-á siàu-liân iáu tī lāu-pē ê ke ê sî, nā tùi Iâ-hô-hoa hē-goān, ēng iok lâi ka-kī iok-sok,

4伊ê老父聽見伊所hē ê願，kap約束家己ê約，伊ê老父若靜靜無chhap伊，伊所hē chiah-ê願的確成立，伊所家己約束ê約，也的確成立。i ê lāu-pē thiaⁿ-kìⁿ i só͘ hē ê goān, kap iok-sok ka-kī ê iok, i ê lāu-pē nā chēng-chēng bô chhap i, i só͘ hē chiah ê goān tek-khak sêng-li̍p, i só͘ ka-kī iok-sok ê iok, iā tek-khak sêng-li̍p.

5總是老父聽見ê日，無允准伊，伊所hē chiah-ê願kap家己約束hiah-ê約，lóng無成立；耶和華也beh赦免伊，因為伊ê老父無允准。Chóng-sī lāu-pē thiaⁿ-kìⁿ ê ji̍t, bô ún-chún i, i só͘ hē chiah ê goān kap ka-kī iok-sok hiah ê iok, lóng bô sêng-li̍p; Iâ-hô-hoa iā beh sià-bián i, in-ūi i ê lāu-pē bô ún-chún.

6伊出嫁ê時，若已經有hē願，á是伊ê嘴隨便講出約束家己ê話tī伊ê身上；I chhut-kè ê sî, nā í-keng ū hē-goān, á-sī i ê chhùi sûi-piān kóng-chhut iok-sok ka-kī ê ōe tī i ê sin-chiūⁿ;

7伊ê丈夫若聽見，也tī聽見ê日靜靜無chhap伊，就伊所hē chiah-ê願，的確成立；伊家己約束ê約，也的確成立。i ê tiōng-hu nā thiaⁿ-kìⁿ, iā tī thiaⁿ-kìⁿ ê ji̍t chēng-chēng bô chhap i, chiū i só͘ hē chiah ê goān, tek-khak sêng-li̍p; i ka-kī iok-sok ê iok, iā tek-khak sêng-li̍p.

8總是伊ê丈夫聽見ê日，無允准伊，就廢無伊所hē ê願，kap伊ê嘴隨便講出約束家己ê話，耶和華也beh赦免伊。Chóng-sī i ê tiōng-hu thiaⁿ-kìⁿ ê ji̍t, bô ún-chún i, chiū hòe-bô i só͘ hē ê goān, kap i ê chhùi sûi-piān kóng-chhut iok-sok ka-kī ê ōe, Iâ-hô-hoa iā beh sià-bián i.

9守寡婦人人，á是受離出ê婦人人，所hē ê願，kap伊家己約束ê話，lóng beh成立tī伊ê身上。Chiú-kóaⁿ hū-jîn-lâng, á-sī siū lī-chhut ê hū-jîn-lâng, só͘ hē ê goān, kap i ka-kī iok-sok ê ōe, lóng beh sêng-li̍p tī i ê sin-chiūⁿ.

10婦人人若tī丈夫ê厝hē願，á是chiù-chōa，用約來約束家己，Hū-jîn-lâng nā tī tiōng-hu ê chhù hē-goān, á-sī chiù-chōa, ēng iok lâi iok-sok ka-kī,

11丈夫聽見，靜靜無chhap伊，也無m̄允准，伊所hē chiah-ê願lóng beh成立，也伊約束家己ê約也beh成立。tiōng-hu thiaⁿ-kìⁿ, chēng-chēng bô chhap i, iā bô m̄ ún-chún, i só͘ hē chiah ê goān lóng beh sêng-li̍p, iā i iok-sok ka-kī ê iok iā beh sêng-li̍p.

12總是丈夫聽見ê日，若kā伊廢無，見若伊ê嘴所出ê，或是所hē ê願，á是家己約ê，就lóng bōe成立；因為伊ê丈夫已經廢無伊；耶和華也beh赦免伊。Chóng-sī tiōng-hu thiaⁿ-kìⁿ ê ji̍t, nā kā i hòe-bô, kìⁿ-nā i ê chhùi só͘ chhut ê, he̍k-sī só͘ hē ê goān, á-sī ka-kī iok-ê, chiū lóng bōe sêng-li̍p; in-ūi i ê tiōng-hu í-keng hòe-bô i; Iâ-hô-hoa iā beh sià-bián i.

13見若所hē ê願，kap約束ê chiù-chōa，來刻苦家己，伊ê丈夫thang成立伊，伊ê丈夫也thang廢無伊。Kìⁿ-nā só͘ hē ê goān, kap iok-sok ê chiù-chōa, lâi khek-khó͘ ka-kī, i ê tiōng-hu thang sêng-li̍p i, i ê tiōng-hu iā thang hòe-bô i.

14總是伊ê丈夫日日靜靜無chhap伊，就成立伊所hē hiah-ê願，kap約束伊ê話，因為伊ê丈夫聽見ê日靜靜無chhap伊，伊就成立伊。Chóng-sī i ê tiōng-hu ji̍t-ji̍t chēng-chēng bô chhap i, chiū sêng-li̍p i só͘ hē hiah ê goān, kap iok-sok i ê ōe, in-ūi i ê tiōng-hu thiaⁿ-kìⁿ ê ji̍t chēng-chêng bô chhap i, i chiū sêng-li̍p i.

15總是丈夫聽見了後廢無伊，就伊tio̍h擔當婦人人ê罪。Chóng-sī tiōng-hu thiaⁿ-kìⁿ liáu-āu hòe-bô i, chiū i tio̍h tam-tng hū-jîn-lâng ê chōe.

16Chiah-ê是耶和華所命令摩西ê，論起丈夫對tī婦人人，老父對tī少年ê cha-bó͘-kiáⁿ tòa tī家內ê規例。Chiah-ê sī Iâ-hô-hoa só͘ bēng-lēng Mô͘-se ê, lūn-khí tiōng-hu tùi tī hū-jîn-lâng, lāu-pē tùi tī siàu-liân ê cha-bó͘-kiáⁿ tòa tī ke-lāi ê kui-lē.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h攻擊米甸人，替以色列人報仇；後來你beh tò祖。Lí tio̍h kong-kek Bí-tiân lâng, thòe Í-sek-lia̍t lâng pò-siû; āu-lâi lí beh tò-chó͘.

3摩西吩咐百姓講：Tio̍h tùi lín中間備辦人帶ke-si出去攻擊米甸，thang tī米甸人ê身上為耶和華報仇。Mô͘-se hoan-hù peh-sìⁿ kóng, Tio̍h tùi lín tiong-kan pī-pān lâng tòa ke-si chhut-khì kong-kek Bí-tiân, thang tī Bí-tiân lâng ê sin-chiūⁿ ūi Iâ-hô-hoa pò-siû.

4Tio̍h tùi以色列眾支派ê中間，ta̍k支派tio̍h差一千人去交戰。Tio̍h tùi Í-sek-lia̍t chèng chi-phài ê tiong-kan, ta̍k chi-phài tio̍h chhe chi̍t-chheng lâng khì kau-chiàn.

5就tùi以色列chiah-ê族中，ta̍k支派出一千人，共一萬兩千人，帶ke-si備辦交戰。Chiū tùi Í-sek-lia̍t chiah ê cho̍k-tiong, ta̍k chi-phài chhut chi̍t-chheng lâng, kiōng chi̍t-bān nn̄g-chheng lâng, tòa ke-si pī-pān kau-chiàn.

6摩西就差每支派一千人去交戰；in kap祭司Í-lī-a-sat ê kiáⁿ Hui-nî-hap去交戰；Hui-nî-hap手the̍h聖所ê器具，kap pûn大聲ê號頭。Mô͘-se chiū chhe múi chi-phài chi̍t-chheng lâng khì kau-chiàn; in kap chè-si Í-lī-a-sat ê kiáⁿ Hui-nî-hap khì kau-chiàn; Hui-nî-hap chhiú the̍h sèng-só͘ ê khì-kū, kap pûn tōa-siaⁿ ê hō-thâu.

7In照耶和華所命令摩西ê，kap米甸人交戰；一盡thâi死in ê ta-po͘丁。In chiàu Iâ-hô-hoa só͘ bēng-lēng Mô͘-se ê, kap Bí-tiân lâng kau-chiàn; it-chīn thâi-sí in ê ta-po͘-teng.

8Tī所thâi死ê人ê中間，也thâi死米甸chiah-ê王，就是Í-bí、Lī-kim、So͘-jíⁿ、Hō͘-jíⁿ、Lī-pa、米甸五個王；koh用刀thâi死Pí-jíⁿ ê kiáⁿ Pa-lân。Tī só͘ thâi-sí ê lâng ê tiong-kan, iā thâi-sí Bí-tiân chiah ê ông, chiū-sī Í-bí, Lī-kim, So͘-jíⁿ, Hō͘-jíⁿ, Lī-pa, Bí-tiân gō͘ ê ông; koh ēng to thâi-sí Pí-jíⁿ ê kiáⁿ Pa-lân.

9以色列人掠米甸ê婦人人，kap in ê gín-á，也將in一切ê cheng-siⁿ，一切羊群，kap一切ê財物lóng搶來，做搶物。Í-sek-lia̍t lâng lia̍h Bí-tiân ê hū-jîn-lâng, kap in ê gín-á, iā chiong in it-chhè ê cheng-siⁿ, it-chhè iûⁿ-kûn, kap it-chhè ê châi-bu̍t lóng chhiúⁿ lâi, chòe chhiúⁿ-mi̍h.

10Koh用火燒in所khiā起ê地，hiah-ê城，kap in所有ê營盤；Koh ēng hé sio in só͘ khiā-khí ê tōe, hiah ê siâⁿ, kap in só͘ ū ê iâⁿ-pôaⁿ;

11將一切所搶ê，所掠ê，人kap cheng-siⁿ，lóng帶來。chiong it-chhè só͘ chhiúⁿ ê, só͘ lia̍h ê, lâng kap cheng-siⁿ, lóng tòa-lâi.

12將所掠ê人，以及所搶所the̍h ê物，lóng帶到Mô͘-ap ê平洋，tī約旦河邊，kap耶利哥相對ê營盤，交hō͘摩西，kap祭司Í-lī-a-sat，kap以色列ê會眾。Chiong só͘ lia̍h ê lâng, í-ki̍p só͘ chhiúⁿ só͘ the̍h ê mi̍h, lóng tòa kàu Mô͘-ap ê pîⁿ-iûⁿ, tī Iok-tàn hô-piⁿ, kap Iâ-lī-ko saⁿ-tùi ê iâⁿ-pôaⁿ, kau hō͘ Mô͘-se, kap chè-si Í-lī-a-sat, kap Í-sek-lia̍t ê hōe-chiòng.

13摩西kap祭司Í-lī-a-sat kap會眾lóng總ê首領，出去營外迎接in。Mô͘-se kap chè-si Í-lī-a-sat kap hōe-chiòng lóng-chóng ê siú-léng, chhut-khì iâⁿ-gōa ngiâ-chih in.

14摩西受氣hiah-ê tùi交戰tò來ê軍長，千總，百總。Mô͘-se siū-khì hiah ê tùi kau-chiàn tò-lâi ê kun-tiúⁿ, chhian-chóng, peh-chóng.

15摩西對in講，Lín留 chiah-ê婦女iáu活teh mah？Mô͘-se tùi in kóng, Lín lâu chiah ê hū-lú iáu oa̍h-teh mah?

16看ah，in thàn Pa-lân ê計謀，hō͘以色列人tī Pí-jíⁿ ê事得罪耶和華，致到耶和華ê會眾tú-tio̍h瘟疫。Khòaⁿ ah, in thàn Pa-lân ê kè-bô͘, hō͘ Í-sek-lia̍t lâng tī Pí-jíⁿ ê sū tek-chōe Iâ-hô-hoa, tì-kàu Iâ-hô-hoa ê hōe-chiòng tú-tio̍h un-e̍k.

17Taⁿ tio̍h thâi死細kiáⁿ中lóng總ê ta-po͘-gín-á，也thâi死hiah-ê已經kap ta-po͘人同房ê婦人人。Taⁿ tio̍h thâi-sí sòe-kiáⁿ-tiong lóng-chóng ê ta-po͘-gín-á, iā thâi-sí hiah ê í-keng kap ta-po͘-lâng tâng-pâng ê hū-jîn-lâng.

18總是hiah-ê未kap ta-po͘人同房ê cha-bó͘-gín-á，lín thang為家己留in ê活命。Chóng-sī hiah ê bē kap ta-po͘-lâng tâng-pâng ê cha-bó͘-gín-á, lín thang ūi ka-kī lâu in ê oa̍h-miā.

19Lín tio̍h紮營tī營外七日久；見若thâi人ê，見若摸tio̍h受thâi-ê，tio̍h tī 第三日，第七日清氣家己，也tio̍h清氣lín所掠來ê人。Lín tio̍h chat-iâⁿ tī iâⁿ-gōa chhit-ji̍t kú; kìⁿ-nā thâi lâng ê, kìⁿ-nā bong-tio̍h siū-thâi-ê, tio̍h tī tē-saⁿ ji̍t, tē-chhit ji̍t chheng-khì ka-kī, iā tio̍h chheng-khì lín só͘ lia̍h-lâi ê lâng.

20論到所有ê衣服，á是皮做ê，á是山羊毛織ê，á是柴做ê物，lóng tio̍h清氣伊。Lūn-kàu só͘ ū ê i-ho̍k, á-sī phê-chòe-ê, á-sī soaⁿ-iûⁿ-mn̂g chit-ê, á-sī chhâ-chòe ê mi̍h, lóng tio̍h chheng-khì i.

21祭司Í-lī-a-sat對交戰tò來ê軍隊講：耶和華所命令摩西律法ê條例就是án-ni；Chè-si Í-lī-a-sat tùi kau-chiàn tò-lâi ê kun-tūi kóng, Iâ-hô-hoa só͘ bēng-lēng Mô͘-se lu̍t-hoat ê tiâu-lē chiū-sī án-ni;

22總是金、銀、銅、鐵、錫、鉛，chóng-sī kim, gûn, tâng, thih, siah, iân,

23見若能擋得火ê物，lín tio̍h hō͘伊經過火，就成做清氣；總是tio̍h koh用除去污穢ê水清氣伊；見若bōe擋得火ê物，lín tio̍h hō͘伊經過水。kìⁿ-nā ōe tòng-tit hé ê mi̍h, lín tio̍h hō͘ i keng-kè hé, chiū chiâⁿ-chòe chheng-khì; chóng-sī tio̍h koh ēng tû-khì ù-òe ê chúi chheng-khì i; kìⁿ-nā bōe tòng-tit hé ê mi̍h, lín tio̍h hō͘ i keng-kè chúi.

24第七日tio̍h洗lín ê衫，lín就清氣；chiah thang入營。Tē-chhit ji̍t tio̍h sóe lín ê saⁿ, lín chiū chheng-khì; chiah thang ji̍p iâⁿ.

25耶和華吩咐摩西講：Iâ-hô-hoa hoan-hù Mô͘-se kóng,

26你kap祭司Í-lī-a-sat，kap會眾chiah-ê族長，tio̍h算所搶掠ê，無論人kap cheng-siⁿ ê數額。Lí kap chè-si Í-lī-a-sat, kap hōe-chiòng chiah ê cho̍k-tiúⁿ, tio̍h sǹg só͘ chhiúⁿ-lia̍h-ê, bô-lūn lâng kap cheng-siⁿ ê siàu-gia̍h.

27所搶來ê tio̍h分做兩份，一份hō͘出去交戰ê精兵，一份hō͘全會ê眾人。Só͘ chhiúⁿ-lâi-ê tio̍h pun chòe nn̄g-hūn, chi̍t-hūn hō͘ chhut-khì kau-chiàn ê cheng-peng, chi̍t-hūn hō͘ choân-hōe ê chèng-lâng.

28Tio̍h tùi出戰ê兵丁抽物來進貢耶和華；見若人、牛、驢、羊群，每五百抽一。Tio̍h tùi chhut-chiàn ê peng-teng thiu-mi̍h lâi chìn-kòng Iâ-hô-hoa; kìⁿ-nā lâng, gû, lû, iûⁿ-kûn, múi gō͘-pah thiu chi̍t.

29對in hit半ê中間，tio̍h抽出伊來hō͘祭司Í-lī-a-sat，做舉祭hō͘耶和華。Tùi in hit-pòaⁿ ê tiong-kan, tio̍h thiu-chhut-i lâi hō͘ chè-si Í-lī-a-sat, chòe kú-chè hō͘ Iâ-hô-hoa.

30Tùi以色列人hit一半ê中間，就是tùi人、牛、驢、羊群，lóng總ê cheng-siⁿ，每五十抽一，交hō͘顧守耶和華會幕ê責成ê利未人。Tùi Í-sek-lia̍t lâng hí chi̍t-pòaⁿ ê tiong-kan, chiū-sī tùi lâng, gû, lû, iûⁿ-kûn, lóng-chóng ê cheng-siⁿ, múi gō͘-cha̍p thiu chi̍t, kau-hō͘ kò͘-siú Iâ-hô-hoa hōe-bō͘ ê chek-sêng ê Lī-bī lâng.

31摩西就kap祭司Í-lī-a-sat，照耶和華所命令摩西ê來行。Mô͘-se chiū kap chè-si Í-lī-a-sat, chiàu Iâ-hô-hoa só͘ bēng-lēng Mô͘-se ê lâi kiâⁿ.

32所搶ê物，就是兵丁所搶用鎗ê，羊，六十七萬五千隻；Só͘ chhiúⁿ ê mi̍h, chiū-sī peng-teng só͘ chhiúⁿ ēng-chhun-ê, iûⁿ, la̍k-cha̍p-chhit bān gō͘-chheng chiah;

33牛，七萬兩千隻；gû, chhit-bān nn̄g-chheng chiah;

34驢，六萬一千隻；lû, la̍k-bān chi̍t-chheng chiah;

35人，三萬兩千，就是m̄-bat kap ta-po͘人同房ê cha-bó͘-gín-á。lâng, saⁿ-bān nn̄g-chheng, chiū-sī m̄-bat kap ta-po͘-lâng tâng-pâng ê cha-bó͘-gín-á.

36出去交戰ê人ê份額，就是in所得tio̍h ê hit半，共有羊，三十三萬七千五百隻。Chhut-khì kau-chiàn ê lâng ê hūn-gia̍h, chiū-sī in só͘ tit-tio̍h ê hit-pòaⁿ, kiōng ū iûⁿ, saⁿ-cha̍p-saⁿ bān chhit-chheng gō͘-pah chiah.

37對in中間抽來進貢耶和華ê 羊，六百七十五隻。Tùi in tiong-kan thiu lâi chìn-kòng Iâ-hô-hoa ê iûⁿ, la̍k-pah chhit-cha̍p-gō͘ chiah.

38牛，三萬六千隻；對in中間抽來進貢耶和華ê，七十二隻。Gû, saⁿ-bān la̍k-chheng chiah; tùi in tiong-kan thiu lâi chìn-kòng Iâ-hô-hoa ê, chhit-cha̍p-jī chiah.

39驢，三萬連五百隻；tùi hit中間抽來進貢耶和華ê，是六十一隻。Lû, saⁿ-bān liân gō͘-pah chiah; tùi hit tiong-kan thiu lâi chìn-kòng Iâ-hô-hoa ê, sī la̍k-cha̍p-it chiah.

40人一萬六千；tùi hit中間抽來進貢耶和華ê，是三十二個。Lâng chi̍t-bān la̍k-chheng; tùi hit tiong-kan thiu lâi chìn-kòng Iâ-hô-hoa ê, sī saⁿ-cha̍p-jī ê.

41摩西將進貢 ê物，就是歸hō͘耶和華ê舉祭，交hō͘祭司Í-lī-a-sat；是照耶和華所命令摩西ê。Mô͘-se chiong chìn-kòng ê mi̍h, chiū-sī kui hō͘ Iâ-hô-hoa ê kú-chè, kau hō͘ chè-si Í-lī-a-sat; sī chiàu Iâ-hô-hoa só͘ bēng-lēng Mô͘-se ê.

42以色列人所得tio̍h hit一半，就是摩西tùi交戰ê人分來hō͘ in ê，Í-sek-lia̍t lâng só͘ tit-tio̍h hit-chi̍t-pòaⁿ, chiū-sī Mô͘-se tùi kau-chiàn ê lâng pun lâi hō͘ in ê,

43(會眾hit一半有羊，三十三萬七千五百隻；(hōe-chiòng hit-chi̍t-pòaⁿ ū iûⁿ, saⁿ-cha̍p-saⁿ bān chhit-chheng gō͘-pah chiah;

44牛，三萬六千隻；gû, saⁿ-bān la̍k-chheng chiah;

45驢，三萬連五百隻；lû, saⁿ-bān liân gō͘-pah chiah;

46人，一萬六千個，)lâng, chi̍t-bān la̍k-chheng ê,)

47tùi以色列人ê一半，無論是人，是cheng-siⁿ，摩西每五十抽一，交hō͘顧守耶和華會幕ê責成ê利未人；是照耶和華所命令摩西ê。tùi Í-sek-lia̍t lâng ê chi̍t-pòaⁿ, bô-lūn sī lâng, sī cheng-siⁿ, Mô͘-se múi gō͘-cha̍p thiu chi̍t, kau-hō͘ kò͘-siú Iâ-hô-hoa hōe-bō͘ ê chek-sêng ê Lī-bī lâng; sī chiàu Iâ-hô-hoa só͘ bēng-lēng Mô͘-se ê.

48管理軍隊chiah-ê官，就是千總百總，lóng來就近摩西，Koán-lí kun-tūi chiah ê koaⁿ, chiū-sī chhian-chóng peh-chóng, lóng lâi chiū-kūn Mô͘-se,

49對摩西講：奴僕所管ê兵，已經點算總額，阮中間無減少一人。tùi Mô͘-se kóng, Lô͘-po̍k só͘ koán ê peng, í-keng tiám-sǹg chóng-gia̍h, goán tiong-kan bô kiám-chió chi̍t-lâng.

50Taⁿ阮將ta̍k人所得tio̍h ê金器、鍊á、手環，phah印á ê手指、耳鉤，蓋頷頸ê 珠鍊á，lóng 帶來做禮物獻hō͘耶和華，thang tī耶和華ê面前，為tio̍h阮本身贖罪。Taⁿ goán chiong ta̍k-lâng só͘ tit-tio̍h ê kim-khì, liān-á, chhiú-khoân, phah ìn-á ê chhiú-chí, hī-kau, kòa ām-kún ê chu-liān-á, lóng tòa-lâi chòe lé-mi̍h hiàn hō͘ Iâ-hô-hoa, thang tī Iâ-hô-hoa ê bīn-chêng, ūi-tio̍h goán pún-sin sio̍k-chōe.

51摩西kap祭司Í-lī-a-sat，就收in ê金，就是ta̍k樣phah好ê手飾。Mô͘-se kap chè-si Í-lī-a-sat, chiū siu in ê kim, chiū-sī ta̍k-iūⁿ phah hó ê chhiú-sek.

52千總百總所獻hō͘耶和華ê金，共有一萬六千七百五十sià-khek-le̍k。Chhian-chóng peh-chóng só͘ hiàn-hō͘ Iâ-hô-hoa ê kim, kiōng ū chi̍t-bān la̍k-chheng chhit-pah gō͘-cha̍p sià-khek-le̍k.

53因為ta̍k-ê兵丁lóng有為tio̍h家己搶財物。In-ūi ta̍k ê peng-teng lóng ū ūi-tio̍h ka-kī chhiúⁿ châi-bu̍t.

54摩西kap祭司Í-lī-a-sat收千總百總ê金，就帶入會幕，tī耶和華ê面前做以色列人ê記念。Mô͘-se kap chè-si Í-lī-a-sat siu chhian-chóng peh-chóng ê kim, chiū tòa-ji̍p hōe-bō͘, tī Iâ-hô-hoa ê bīn-chêng chòe Í-sek-lia̍t lâng ê kì-liām.