1摩西吩咐以色列ta̍k支派ê頭人，kā in講：耶和華所命令ê是án-ni。Mô͘-se hoan-hù Í-sek-lia̍t ta̍k chi-phài ê thâu-lâng, kā in kóng, Iâ-hô-hoa só͘ bēng-lēng-ê sī án-ni.

2人若對耶和華下願，á是chiù-chōa，用一個約家己約束，就m̄-thang吞食伊ê話，tio̍h照伊ê嘴所講出ê，一盡行伊。Lâng nā tùi Iâ-hô-hoa hē-goān, á-sī chiù-chōa, ēng chi̍t ê iok ka-kī iok-sok, chiū m̄-thang thun-chia̍h i ê ōe, tio̍h chiàu i ê chhùi só͘ kóng-chhut-ê, it-chīn kiâⁿ i.

3Cha-bó͘-gín-á少年iáu tī老父ê家ê時，若對耶和華下願，用約來家己約束，Cha-bó͘-gín-á siàu-liân iáu tī lāu-pē ê ke ê sî, nā tùi Iâ-hô-hoa hē-goān, ēng iok lâi ka-kī iok-sok,

4伊ê老父聽見伊所hē ê願，kap約束家己ê約，伊ê老父若靜靜無chhap伊，伊所hē chiah-ê願的確成立，伊所家己約束ê約，也的確成立。i ê lāu-pē thiaⁿ-kìⁿ i só͘ hē ê goān, kap iok-sok ka-kī ê iok, i ê lāu-pē nā chēng-chēng bô chhap i, i só͘ hē chiah ê goān tek-khak sêng-li̍p, i só͘ ka-kī iok-sok ê iok, iā tek-khak sêng-li̍p.

5總是老父聽見ê日，無允准伊，伊所hē chiah-ê願kap家己約束hiah-ê約，lóng無成立；耶和華也beh赦免伊，因為伊ê老父無允准。Chóng-sī lāu-pē thiaⁿ-kìⁿ ê ji̍t, bô ún-chún i, i só͘ hē chiah ê goān kap ka-kī iok-sok hiah ê iok, lóng bô sêng-li̍p; Iâ-hô-hoa iā beh sià-bián i, in-ūi i ê lāu-pē bô ún-chún.

6伊出嫁ê時，若已經有hē願，á是伊ê嘴隨便講出約束家己ê話tī伊ê身上；I chhut-kè ê sî, nā í-keng ū hē-goān, á-sī i ê chhùi sûi-piān kóng-chhut iok-sok ka-kī ê ōe tī i ê sin-chiūⁿ;

7伊ê丈夫若聽見，也tī聽見ê日靜靜無chhap伊，就伊所hē chiah-ê願，的確成立；伊家己約束ê約，也的確成立。i ê tiōng-hu nā thiaⁿ-kìⁿ, iā tī thiaⁿ-kìⁿ ê ji̍t chēng-chēng bô chhap i, chiū i só͘ hē chiah ê goān, tek-khak sêng-li̍p; i ka-kī iok-sok ê iok, iā tek-khak sêng-li̍p.

8總是伊ê丈夫聽見ê日，無允准伊，就廢無伊所hē ê願，kap伊ê嘴隨便講出約束家己ê話，耶和華也beh赦免伊。Chóng-sī i ê tiōng-hu thiaⁿ-kìⁿ ê ji̍t, bô ún-chún i, chiū hòe-bô i só͘ hē ê goān, kap i ê chhùi sûi-piān kóng-chhut iok-sok ka-kī ê ōe, Iâ-hô-hoa iā beh sià-bián i.

9守寡婦人人，á是受離出ê婦人人，所hē ê願，kap伊家己約束ê話，lóng beh成立tī伊ê身上。Chiú-kóaⁿ hū-jîn-lâng, á-sī siū lī-chhut ê hū-jîn-lâng, só͘ hē ê goān, kap i ka-kī iok-sok ê ōe, lóng beh sêng-li̍p tī i ê sin-chiūⁿ.

10婦人人若tī丈夫ê厝hē願，á是chiù-chōa，用約來約束家己，Hū-jîn-lâng nā tī tiōng-hu ê chhù hē-goān, á-sī chiù-chōa, ēng iok lâi iok-sok ka-kī,

11丈夫聽見，靜靜無chhap伊，也無m̄允准，伊所hē chiah-ê願lóng beh成立，也伊約束家己ê約也beh成立。tiōng-hu thiaⁿ-kìⁿ, chēng-chēng bô chhap i, iā bô m̄ ún-chún, i só͘ hē chiah ê goān lóng beh sêng-li̍p, iā i iok-sok ka-kī ê iok iā beh sêng-li̍p.

12總是丈夫聽見ê日，若kā伊廢無，見若伊ê嘴所出ê，或是所hē ê願，á是家己約ê，就lóng bōe成立；因為伊ê丈夫已經廢無伊；耶和華也beh赦免伊。Chóng-sī tiōng-hu thiaⁿ-kìⁿ ê ji̍t, nā kā i hòe-bô, kìⁿ-nā i ê chhùi só͘ chhut ê, he̍k-sī só͘ hē ê goān, á-sī ka-kī iok-ê, chiū lóng bōe sêng-li̍p; in-ūi i ê tiōng-hu í-keng hòe-bô i; Iâ-hô-hoa iā beh sià-bián i.

13見若所hē ê願，kap約束ê chiù-chōa，來刻苦家己，伊ê丈夫thang成立伊，伊ê丈夫也thang廢無伊。Kìⁿ-nā só͘ hē ê goān, kap iok-sok ê chiù-chōa, lâi khek-khó͘ ka-kī, i ê tiōng-hu thang sêng-li̍p i, i ê tiōng-hu iā thang hòe-bô i.

14總是伊ê丈夫日日靜靜無chhap伊，就成立伊所hē hiah-ê願，kap約束伊ê話，因為伊ê丈夫聽見ê日靜靜無chhap伊，伊就成立伊。Chóng-sī i ê tiōng-hu ji̍t-ji̍t chēng-chēng bô chhap i, chiū sêng-li̍p i só͘ hē hiah ê goān, kap iok-sok i ê ōe, in-ūi i ê tiōng-hu thiaⁿ-kìⁿ ê ji̍t chēng-chêng bô chhap i, i chiū sêng-li̍p i.

15總是丈夫聽見了後廢無伊，就伊tio̍h擔當婦人人ê罪。Chóng-sī tiōng-hu thiaⁿ-kìⁿ liáu-āu hòe-bô i, chiū i tio̍h tam-tng hū-jîn-lâng ê chōe.

16Chiah-ê是耶和華所命令摩西ê，論起丈夫對tī婦人人，老父對tī少年ê cha-bó͘-kiáⁿ tòa tī家內ê規例。Chiah-ê sī Iâ-hô-hoa só͘ bēng-lēng Mô͘-se ê, lūn-khí tiōng-hu tùi tī hū-jîn-lâng, lāu-pē tùi tī siàu-liân ê cha-bó͘-kiáⁿ tòa tī ke-lāi ê kui-lē.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h攻擊米甸人，替以色列人報仇；後來你beh tò祖。Lí tio̍h kong-kek Bí-tiân lâng, thòe Í-sek-lia̍t lâng pò-siû; āu-lâi lí beh tò-chó͘.

3摩西吩咐百姓講：Tio̍h tùi lín中間備辦人帶ke-si出去攻擊米甸，thang tī米甸人ê身上為耶和華報仇。Mô͘-se hoan-hù peh-sìⁿ kóng, Tio̍h tùi lín tiong-kan pī-pān lâng tòa ke-si chhut-khì kong-kek Bí-tiân, thang tī Bí-tiân lâng ê sin-chiūⁿ ūi Iâ-hô-hoa pò-siû.

4Tio̍h tùi以色列眾支派ê中間，ta̍k支派tio̍h差一千人去交戰。Tio̍h tùi Í-sek-lia̍t chèng chi-phài ê tiong-kan, ta̍k chi-phài tio̍h chhe chi̍t-chheng lâng khì kau-chiàn.

5就tùi以色列chiah-ê族中，ta̍k支派出一千人，共一萬兩千人，帶ke-si備辦交戰。Chiū tùi Í-sek-lia̍t chiah ê cho̍k-tiong, ta̍k chi-phài chhut chi̍t-chheng lâng, kiōng chi̍t-bān nn̄g-chheng lâng, tòa ke-si pī-pān kau-chiàn.

6摩西就差每支派一千人去交戰；in kap祭司Í-lī-a-sat ê kiáⁿ Hui-nî-hap去交戰；Hui-nî-hap手the̍h聖所ê器具，kap pûn大聲ê號頭。Mô͘-se chiū chhe múi chi-phài chi̍t-chheng lâng khì kau-chiàn; in kap chè-si Í-lī-a-sat ê kiáⁿ Hui-nî-hap khì kau-chiàn; Hui-nî-hap chhiú the̍h sèng-só͘ ê khì-kū, kap pûn tōa-siaⁿ ê hō-thâu.

7In照耶和華所命令摩西ê，kap米甸人交戰；一盡thâi死in ê ta-po͘丁。In chiàu Iâ-hô-hoa só͘ bēng-lēng Mô͘-se ê, kap Bí-tiân lâng kau-chiàn; it-chīn thâi-sí in ê ta-po͘-teng.

8Tī所thâi死ê人ê中間，也thâi死米甸chiah-ê王，就是Í-bí、Lī-kim、So͘-jíⁿ、Hō͘-jíⁿ、Lī-pa、米甸五個王；koh用刀thâi死Pí-jíⁿ ê kiáⁿ Pa-lân。Tī só͘ thâi-sí ê lâng ê tiong-kan, iā thâi-sí Bí-tiân chiah ê ông, chiū-sī Í-bí, Lī-kim, So͘-jíⁿ, Hō͘-jíⁿ, Lī-pa, Bí-tiân gō͘ ê ông; koh ēng to thâi-sí Pí-jíⁿ ê kiáⁿ Pa-lân.

9以色列人掠米甸ê婦人人，kap in ê gín-á，也將in一切ê cheng-siⁿ，一切羊群，kap一切ê財物lóng搶來，做搶物。Í-sek-lia̍t lâng lia̍h Bí-tiân ê hū-jîn-lâng, kap in ê gín-á, iā chiong in it-chhè ê cheng-siⁿ, it-chhè iûⁿ-kûn, kap it-chhè ê châi-bu̍t lóng chhiúⁿ lâi, chòe chhiúⁿ-mi̍h.

10Koh用火燒in所khiā起ê地，hiah-ê城，kap in所有ê營盤；Koh ēng hé sio in só͘ khiā-khí ê tōe, hiah ê siâⁿ, kap in só͘ ū ê iâⁿ-pôaⁿ;

11將一切所搶ê，所掠ê，人kap cheng-siⁿ，lóng帶來。chiong it-chhè só͘ chhiúⁿ ê, só͘ lia̍h ê, lâng kap cheng-siⁿ, lóng tòa-lâi.

12將所掠ê人，以及所搶所the̍h ê物，lóng帶到Mô͘-ap ê平洋，tī約旦河邊，kap耶利哥相對ê營盤，交hō͘摩西，kap祭司Í-lī-a-sat，kap以色列ê會眾。Chiong só͘ lia̍h ê lâng, í-ki̍p só͘ chhiúⁿ só͘ the̍h ê mi̍h, lóng tòa kàu Mô͘-ap ê pîⁿ-iûⁿ, tī Iok-tàn hô-piⁿ, kap Iâ-lī-ko saⁿ-tùi ê iâⁿ-pôaⁿ, kau hō͘ Mô͘-se, kap chè-si Í-lī-a-sat, kap Í-sek-lia̍t ê hōe-chiòng.

13摩西kap祭司Í-lī-a-sat kap會眾lóng總ê首領，出去營外迎接in。Mô͘-se kap chè-si Í-lī-a-sat kap hōe-chiòng lóng-chóng ê siú-léng, chhut-khì iâⁿ-gōa ngiâ-chih in.

14摩西受氣hiah-ê tùi交戰tò來ê軍長，千總，百總。Mô͘-se siū-khì hiah ê tùi kau-chiàn tò-lâi ê kun-tiúⁿ, chhian-chóng, peh-chóng.

15摩西對in講，Lín留 chiah-ê婦女iáu活teh mah？Mô͘-se tùi in kóng, Lín lâu chiah ê hū-lú iáu oa̍h-teh mah?

16看ah，in thàn Pa-lân ê計謀，hō͘以色列人tī Pí-jíⁿ ê事得罪耶和華，致到耶和華ê會眾tú-tio̍h瘟疫。Khòaⁿ ah, in thàn Pa-lân ê kè-bô͘, hō͘ Í-sek-lia̍t lâng tī Pí-jíⁿ ê sū tek-chōe Iâ-hô-hoa, tì-kàu Iâ-hô-hoa ê hōe-chiòng tú-tio̍h un-e̍k.

17Taⁿ tio̍h thâi死細kiáⁿ中lóng總ê ta-po͘-gín-á，也thâi死hiah-ê已經kap ta-po͘人同房ê婦人人。Taⁿ tio̍h thâi-sí sòe-kiáⁿ-tiong lóng-chóng ê ta-po͘-gín-á, iā thâi-sí hiah ê í-keng kap ta-po͘-lâng tâng-pâng ê hū-jîn-lâng.

18總是hiah-ê未kap ta-po͘人同房ê cha-bó͘-gín-á，lín thang為家己留in ê活命。Chóng-sī hiah ê bē kap ta-po͘-lâng tâng-pâng ê cha-bó͘-gín-á, lín thang ūi ka-kī lâu in ê oa̍h-miā.

19Lín tio̍h紮營tī營外七日久；見若thâi人ê，見若摸tio̍h受thâi-ê，tio̍h tī 第三日，第七日清氣家己，也tio̍h清氣lín所掠來ê人。Lín tio̍h chat-iâⁿ tī iâⁿ-gōa chhit-ji̍t kú; kìⁿ-nā thâi lâng ê, kìⁿ-nā bong-tio̍h siū-thâi-ê, tio̍h tī tē-saⁿ ji̍t, tē-chhit ji̍t chheng-khì ka-kī, iā tio̍h chheng-khì lín só͘ lia̍h-lâi ê lâng.

20論到所有ê衣服，á是皮做ê，á是山羊毛織ê，á是柴做ê物，lóng tio̍h清氣伊。Lūn-kàu só͘ ū ê i-ho̍k, á-sī phê-chòe-ê, á-sī soaⁿ-iûⁿ-mn̂g chit-ê, á-sī chhâ-chòe ê mi̍h, lóng tio̍h chheng-khì i.

21祭司Í-lī-a-sat對交戰tò來ê軍隊講：耶和華所命令摩西律法ê條例就是án-ni；Chè-si Í-lī-a-sat tùi kau-chiàn tò-lâi ê kun-tūi kóng, Iâ-hô-hoa só͘ bēng-lēng Mô͘-se lu̍t-hoat ê tiâu-lē chiū-sī án-ni;

22總是金、銀、銅、鐵、錫、鉛，chóng-sī kim, gûn, tâng, thih, siah, iân,

23見若能擋得火ê物，lín tio̍h hō͘伊經過火，就成做清氣；總是tio̍h koh用除去污穢ê水清氣伊；見若bōe擋得火ê物，lín tio̍h hō͘伊經過水。kìⁿ-nā ōe tòng-tit hé ê mi̍h, lín tio̍h hō͘ i keng-kè hé, chiū chiâⁿ-chòe chheng-khì; chóng-sī tio̍h koh ēng tû-khì ù-òe ê chúi chheng-khì i; kìⁿ-nā bōe tòng-tit hé ê mi̍h, lín tio̍h hō͘ i keng-kè chúi.

24第七日tio̍h洗lín ê衫，lín就清氣；chiah thang入營。Tē-chhit ji̍t tio̍h sóe lín ê saⁿ, lín chiū chheng-khì; chiah thang ji̍p iâⁿ.

25耶和華吩咐摩西講：Iâ-hô-hoa hoan-hù Mô͘-se kóng,

26你kap祭司Í-lī-a-sat，kap會眾chiah-ê族長，tio̍h算所搶掠ê，無論人kap cheng-siⁿ ê數額。Lí kap chè-si Í-lī-a-sat, kap hōe-chiòng chiah ê cho̍k-tiúⁿ, tio̍h sǹg só͘ chhiúⁿ-lia̍h-ê, bô-lūn lâng kap cheng-siⁿ ê siàu-gia̍h.

27所搶來ê tio̍h分做兩份，一份hō͘出去交戰ê精兵，一份hō͘全會ê眾人。Só͘ chhiúⁿ-lâi-ê tio̍h pun chòe nn̄g-hūn, chi̍t-hūn hō͘ chhut-khì kau-chiàn ê cheng-peng, chi̍t-hūn hō͘ choân-hōe ê chèng-lâng.

28Tio̍h tùi出戰ê兵丁抽物來進貢耶和華；見若人、牛、驢、羊群，每五百抽一。Tio̍h tùi chhut-chiàn ê peng-teng thiu-mi̍h lâi chìn-kòng Iâ-hô-hoa; kìⁿ-nā lâng, gû, lû, iûⁿ-kûn, múi gō͘-pah thiu chi̍t.

29對in hit半ê中間，tio̍h抽出伊來hō͘祭司Í-lī-a-sat，做舉祭hō͘耶和華。Tùi in hit-pòaⁿ ê tiong-kan, tio̍h thiu-chhut-i lâi hō͘ chè-si Í-lī-a-sat, chòe kú-chè hō͘ Iâ-hô-hoa.

30Tùi以色列人hit一半ê中間，就是tùi人、牛、驢、羊群，lóng總ê cheng-siⁿ，每五十抽一，交hō͘顧守耶和華會幕ê責成ê利未人。Tùi Í-sek-lia̍t lâng hí chi̍t-pòaⁿ ê tiong-kan, chiū-sī tùi lâng, gû, lû, iûⁿ-kûn, lóng-chóng ê cheng-siⁿ, múi gō͘-cha̍p thiu chi̍t, kau-hō͘ kò͘-siú Iâ-hô-hoa hōe-bō͘ ê chek-sêng ê Lī-bī lâng.

31摩西就kap祭司Í-lī-a-sat，照耶和華所命令摩西ê來行。Mô͘-se chiū kap chè-si Í-lī-a-sat, chiàu Iâ-hô-hoa só͘ bēng-lēng Mô͘-se ê lâi kiâⁿ.

32所搶ê物，就是兵丁所搶用鎗ê，羊，六十七萬五千隻；Só͘ chhiúⁿ ê mi̍h, chiū-sī peng-teng só͘ chhiúⁿ ēng-chhun-ê, iûⁿ, la̍k-cha̍p-chhit bān gō͘-chheng chiah;

33牛，七萬兩千隻；gû, chhit-bān nn̄g-chheng chiah;

34驢，六萬一千隻；lû, la̍k-bān chi̍t-chheng chiah;

35人，三萬兩千，就是m̄-bat kap ta-po͘人同房ê cha-bó͘-gín-á。lâng, saⁿ-bān nn̄g-chheng, chiū-sī m̄-bat kap ta-po͘-lâng tâng-pâng ê cha-bó͘-gín-á.

36出去交戰ê人ê份額，就是in所得tio̍h ê hit半，共有羊，三十三萬七千五百隻。Chhut-khì kau-chiàn ê lâng ê hūn-gia̍h, chiū-sī in só͘ tit-tio̍h ê hit-pòaⁿ, kiōng ū iûⁿ, saⁿ-cha̍p-saⁿ bān chhit-chheng gō͘-pah chiah.

37對in中間抽來進貢耶和華ê 羊，六百七十五隻。Tùi in tiong-kan thiu lâi chìn-kòng Iâ-hô-hoa ê iûⁿ, la̍k-pah chhit-cha̍p-gō͘ chiah.

38牛，三萬六千隻；對in中間抽來進貢耶和華ê，七十二隻。Gû, saⁿ-bān la̍k-chheng chiah; tùi in tiong-kan thiu lâi chìn-kòng Iâ-hô-hoa ê, chhit-cha̍p-jī chiah.

39驢，三萬連五百隻；tùi hit中間抽來進貢耶和華ê，是六十一隻。Lû, saⁿ-bān liân gō͘-pah chiah; tùi hit tiong-kan thiu lâi chìn-kòng Iâ-hô-hoa ê, sī la̍k-cha̍p-it chiah.

40人一萬六千；tùi hit中間抽來進貢耶和華ê，是三十二個。Lâng chi̍t-bān la̍k-chheng; tùi hit tiong-kan thiu lâi chìn-kòng Iâ-hô-hoa ê, sī saⁿ-cha̍p-jī ê.

41摩西將進貢 ê物，就是歸hō͘耶和華ê舉祭，交hō͘祭司Í-lī-a-sat；是照耶和華所命令摩西ê。Mô͘-se chiong chìn-kòng ê mi̍h, chiū-sī kui hō͘ Iâ-hô-hoa ê kú-chè, kau hō͘ chè-si Í-lī-a-sat; sī chiàu Iâ-hô-hoa só͘ bēng-lēng Mô͘-se ê.

42以色列人所得tio̍h hit一半，就是摩西tùi交戰ê人分來hō͘ in ê，Í-sek-lia̍t lâng só͘ tit-tio̍h hit-chi̍t-pòaⁿ, chiū-sī Mô͘-se tùi kau-chiàn ê lâng pun lâi hō͘ in ê,

43(會眾hit一半有羊，三十三萬七千五百隻；(hōe-chiòng hit-chi̍t-pòaⁿ ū iûⁿ, saⁿ-cha̍p-saⁿ bān chhit-chheng gō͘-pah chiah;

44牛，三萬六千隻；gû, saⁿ-bān la̍k-chheng chiah;

45驢，三萬連五百隻；lû, saⁿ-bān liân gō͘-pah chiah;

46人，一萬六千個，)lâng, chi̍t-bān la̍k-chheng ê,)

47tùi以色列人ê一半，無論是人，是cheng-siⁿ，摩西每五十抽一，交hō͘顧守耶和華會幕ê責成ê利未人；是照耶和華所命令摩西ê。tùi Í-sek-lia̍t lâng ê chi̍t-pòaⁿ, bô-lūn sī lâng, sī cheng-siⁿ, Mô͘-se múi gō͘-cha̍p thiu chi̍t, kau-hō͘ kò͘-siú Iâ-hô-hoa hōe-bō͘ ê chek-sêng ê Lī-bī lâng; sī chiàu Iâ-hô-hoa só͘ bēng-lēng Mô͘-se ê.

48管理軍隊chiah-ê官，就是千總百總，lóng來就近摩西，Koán-lí kun-tūi chiah ê koaⁿ, chiū-sī chhian-chóng peh-chóng, lóng lâi chiū-kūn Mô͘-se,

49對摩西講：奴僕所管ê兵，已經點算總額，阮中間無減少一人。tùi Mô͘-se kóng, Lô͘-po̍k só͘ koán ê peng, í-keng tiám-sǹg chóng-gia̍h, goán tiong-kan bô kiám-chió chi̍t-lâng.

50Taⁿ阮將ta̍k人所得tio̍h ê金器、鍊á、手環，phah印á ê手指、耳鉤，蓋頷頸ê 珠鍊á，lóng 帶來做禮物獻hō͘耶和華，thang tī耶和華ê面前，為tio̍h阮本身贖罪。Taⁿ goán chiong ta̍k-lâng só͘ tit-tio̍h ê kim-khì, liān-á, chhiú-khoân, phah ìn-á ê chhiú-chí, hī-kau, kòa ām-kún ê chu-liān-á, lóng tòa-lâi chòe lé-mi̍h hiàn hō͘ Iâ-hô-hoa, thang tī Iâ-hô-hoa ê bīn-chêng, ūi-tio̍h goán pún-sin sio̍k-chōe.

51摩西kap祭司Í-lī-a-sat，就收in ê金，就是ta̍k樣phah好ê手飾。Mô͘-se kap chè-si Í-lī-a-sat, chiū siu in ê kim, chiū-sī ta̍k-iūⁿ phah hó ê chhiú-sek.

52千總百總所獻hō͘耶和華ê金，共有一萬六千七百五十sià-khek-le̍k。Chhian-chóng peh-chóng só͘ hiàn-hō͘ Iâ-hô-hoa ê kim, kiōng ū chi̍t-bān la̍k-chheng chhit-pah gō͘-cha̍p sià-khek-le̍k.

53因為ta̍k-ê兵丁lóng有為tio̍h家己搶財物。In-ūi ta̍k ê peng-teng lóng ū ūi-tio̍h ka-kī chhiúⁿ châi-bu̍t.

54摩西kap祭司Í-lī-a-sat收千總百總ê金，就帶入會幕，tī耶和華ê面前做以色列人ê記念。Mô͘-se kap chè-si Í-lī-a-sat siu chhian-chóng peh-chóng ê kim, chiū tòa-ji̍p hōe-bō͘, tī Iâ-hô-hoa ê bīn-chêng chòe Í-sek-lia̍t lâng ê kì-liām.

1Liû-piān ê kiáⁿ孫，kap Ka-tek ê kiáⁿ孫，in ê cheng-siⁿ極其chōe；in看見Ngá-siā ê地，kap Ki-lia̍t ê地，是thang飼cheng-siⁿ ê所在。Liû-piān ê kiáⁿ-sun, kap Ka-tek ê kiáⁿ-sun, in ê cheng-siⁿ ke̍k-kî chōe; in khòaⁿ-kìⁿ Ngá-siā ê tōe, kap Ki-lia̍t ê tōe, sī thang chhī cheng-siⁿ ê só͘-chāi.

2Ka-tek ê kiáⁿ孫，kap Liû-piān ê kiáⁿ孫，就來見摩西，kap祭司Í-lī-a-sat，以及會眾ê首領，kā in講：Ka-tek ê kiáⁿ-sun, kap Liû-piān ê kiáⁿ-sun, chiū lâi kìⁿ Mô͘-se, kap chè-si Í-lī-a-sat, í-ki̍p hōe-chiòng ê siú-léng, kā in kóng,

3A-tāi-lio̍k、Tí-pún、Ngá-siā、Lêng-la̍h、Hi-si̍t-pún、Í-lī-a-lī，Sī-pan、Nî-pho、Pí-ún，A-tāi-lio̍k, Tí-pún, Ngá-siā, Lêng-la̍h, Hi-si̍t-pún, Í-lī-a-lī, Sī-pan, Nî-pho, Pí-ún,

4就是耶和華tī以色列會眾ê面前所攻取ê地，是thang飼cheng-siⁿ ê地，你ê奴僕也有cheng-siⁿ。chiū-sī Iâ-hô-hoa tī Í-sek-lia̍t hōe-chiòng ê bīn-chêng só͘ kong-chhú ê tōe, sī thang chhī cheng-siⁿ ê tōe, lí ê lô͘-po̍k iā ū cheng-siⁿ.

5Koh講：阮若得tio̍h恩典tī你ê面前，求你用chit-ê地hō͘你ê奴僕做業，莫得chhōa阮過約旦河。Koh kóng, Goán nā tit-tio̍h un-tián tī lí ê bīn-chêng, kiû lí ēng chit ê tōe hō͘ lí ê lô͘-po̍k chòe-gia̍p, bo̍h-tit chhōa goán kè Iok-tàn hô.

6摩西對Ka-tek ê kiáⁿ孫kap Liû-piān ê kiáⁿ孫講：總無lín ê兄弟去爭戰，也lín坐tī-chia mah？Mô͘-se tùi Ka-tek ê kiáⁿ-sun kap Liû-piān ê kiáⁿ-sun kóng, Chóng bô lín ê hiaⁿ-tī khì cheng-chiàn, iā lín chē tī-chia mah?

7Lín啥事hō͘以色列人餒志，無ài過去入耶和華所賞賜in hit-ê地ah？Lín siáⁿ-sū hō͘ Í-sek-lia̍t lâng lóe-chì, bô ài kè-khì ji̍p Iâ-hô-hoa só͘ siúⁿ-sù in hit ê tōe ah?

8我前tùi Ka-te-su Pa-nî-a差lín ê老父去偷看hit-ê地，in也是án-ni行。Góa chêng tùi Ka-te-su Pa-nî-a chhe lín ê lāu-pē khì thau-khòaⁿ hit ê tōe, in iā sī án-ni kiâⁿ.

9因為in上去Í-si̍t-kok ê山谷，去看hit-ê地ê時，有hō͘以色列人餒志，m̄ ài入耶和華所賞賜in ê地。In-ūi in chiūⁿ-khì Í-si̍t-kok ê soaⁿ-kok, khì khòaⁿ hit ê tōe ê sî, ū hō͘ Í-sek-lia̍t lâng lóe-chì, m̄ ài ji̍p Iâ-hô-hoa só͘ siúⁿ-sù in ê tōe.

10當日耶和華ê受氣發出，就chiù-chōa講：Tng-ji̍t Iâ-hô-hoa ê siū-khì hoat-chhut, chiū chiù-chōa kóng,

11見若tùi埃及上來二十歲以上ê人，決斷bōe得tio̍h看見我對亞伯拉罕、以撒、雅各，chiù-chōa應允ê地；因為in無專心跟tè我。Kìⁿ-nā tùi Ai-ki̍p chiūⁿ-lâi jī-cha̍p hè í-siōng ê lâng, koat-toàn bōe tit-tio̍h khòaⁿ-kìⁿ Góa tùi A-pek-la̍h-hán, Í-sat, Ngá-kok, chiù-chōa èng-ún ê tōe; in-ūi in bô choan-sim kun-tè Góa.

12獨獨Ki-nî-sé族，Iâ-hu-nî ê kiáⁿ迦勒，kap Lùn ê kiáⁿ約書亞，thang看見，因為in專心tè耶和華。To̍k-to̍k Ki-nî-sé cho̍k, Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a, thang khòaⁿ-kìⁿ, in-ūi in choan-sim tè Iâ-hô-hoa.

13耶和華對以色列人發受氣，hō͘ in tī曠野漂流四十年，thèng候hit代行pháiⁿ tī耶和華面前ê人lóng消滅。Iâ-hô-hoa tùi Í-sek-lia̍t lâng hoat siū-khì, hō͘ in tī khòng-iá phiau-liû sì-cha̍p nî, thèng-hāu hit-tāi kiâⁿ-pháiⁿ tī Iâ-hô-hoa bīn-chêng ê lâng lóng siau-bia̍t.

14看ah，lín起來續接lín ê老父，加添罪人ê數額，hō͘耶和華益發受氣以色列。Khòaⁿ ah, lín khí-lâi sòa-chiap lín ê lāu-pē, ke-thiⁿ chōe-jîn ê siàu-gia̍h, hō͘ Iâ-hô-hoa it-hoat siū-khì Í-sek-lia̍t.

15Lín若oat-倒tńg無tè伊，伊beh koh放sak in tī曠野，lín就是滅無chiah-ê眾百姓。Lín nā oat-tò-tńg bô tè I, I beh koh pàng-sak in tī khòng-iá, lín chiū-sī bia̍t-bô chiah ê chèng peh-sìⁿ.

16In óa近摩西講：阮beh tī-chia為阮ê cheng-siⁿ chhòng寮(tiâu)，為阮ê gín-á 起城；In óa-kūn Mô͘-se kóng, Goán beh tī-chia ūi goán ê cheng-siⁿ chhòng tiâu, ūi goán ê gín-á khí siâⁿ;

17總是阮本身beh帶軍去，行tī以色列人ê頭前，thèng候阮chhōa in到in ê地方；獨獨阮ê gín-ná，因為chit-ê地khiā起ê百姓ê緣故，beh tiàm tī堅固ê城內。chóng-sī goán pún-sin beh tòa kun-khì, kiâⁿ tī Í-sek-lia̍t lâng ê thâu-chêng, thèng-hāu goán chhōa in kàu in ê tōe-hng; to̍k-to̍k goán ê gín-ná, in-ūi chit ê tōe khiā-khí ê peh-sìⁿ ê iân-kò͘, beh tiàm tī kian-kò͘ ê siâⁿ-lāi.

18阮m̄ tò去阮厝，thèng候以色列人ta̍k-ê得tio̍h伊ê業。Goán m̄ tò-khì goán chhù, thèng-hāu Í-sek-lia̍t lâng ta̍k-ê tit-tio̍h i ê gia̍p.

19阮無beh kap in tī約旦河hit-pêng koh去ê地得tio̍h業；因為阮ê業是在tī約旦河東勢chit-pêng。Goán bô beh kap in tī Iok-tàn hô hit-pêng koh khì ê tōe tit-tio̍h gia̍p; in-ūi goán ê gia̍p sī chāi tī Iok-tàn hô tang-sì chit-pêng.

20摩西對in講，Lín若beh án-ni行，tī耶和華ê面前帶軍去出去交戰；Mô͘-se tùi in kóng, Lín nā beh án-ni kiâⁿ, tī Iâ-hô-hoa ê bīn-chêng tòa kun-khì chhut-khì kau-chiàn;

21lín所有帶軍去ê人，若tī耶和華ê面前過約旦河，thèng候伊tùi伊ê面前趕出伊ê對敵；lín só͘ ū tòa kun-khì ê lâng, nā tī Iâ-hô-hoa ê bīn-chêng kè Iok-tàn hô, thèng-hāu I tùi I ê bīn-chêng kóaⁿ-chhut I ê tùi-te̍k;

22hit-ê地已經hō͘耶和華khah贏，然後lín thang tò來；tī耶和華kap以色列ê面前，lín就無罪，chit-ê地beh tī耶和華ê面前hō͘ lín做業。hit ê tōe í-keng hō͘ Iâ-hô-hoa khah-iâⁿ, jiân-āu lín thang tò-lâi; tī Iâ-hô-hoa kap Í-sek-lia̍t ê bīn-chêng, lín chiū bô chōe, chit ê tōe beh tī Iâ-hô-hoa ê bīn-chêng hō͘ lín chòe-gia̍p.

23設使lín無án-ni行，就是得罪耶和華，tio̍h知lín ê罪beh追jip lín。Siat-sú lín bô án-ni kiâⁿ, chiū-sī tek-chōe Iâ-hô-hoa, tio̍h chai lín ê chōe beh tui-jip lín.

24Taⁿ tio̍h kā lín ê gín-ná 起城，kā lín ê羊群chhòng寮，照lín ê嘴所講ê，去行。Taⁿ tio̍h kā lín ê gín-ná khí siâⁿ, kā lín ê iûⁿ-kûn chhòng tiâu, chiàu lín ê chhùi só͘ kóng ê, khì kiâⁿ.

25Ka-tek ê kiáⁿ孫kap Liû-piān ê kiáⁿ孫對摩西講：你ê奴僕beh照我ê主所吩咐ê去行。Ka-tek ê kiáⁿ-sun kap Liû-piān ê kiáⁿ-sun tùi Mô͘-se kóng, Lí ê lô͘-po̍k beh chiàu góa ê chú só͘ hoan-hù-ê khì kiâⁿ.

26阮ê gín-á，阮ê bó͘，阮ê羊群，阮ê cheng-siⁿ，lóng beh留tī Ki-lia̍t chiah-ê城。Goán ê gín-á, goán ê bó͘, goán ê iûⁿ-kûn, goán ê cheng-siⁿ, lóng beh lâu tī Ki-lia̍t chiah ê siâⁿ.

27總是你ê奴僕，見若帶軍器ê，lóng beh照我ê主所講ê話，tī耶和華ê面前過去交戰。Chóng-sī lí ê lô͘-po̍k, kìⁿ-nā tòa kun-khì ê, lóng beh chiàu góa ê chú só͘ kóng ê ōe, tī Iâ-hô-hoa ê bīn-chêng kè-khì kau-chiàn.

28摩西就為tio̍h in吩咐祭司Í-lī-a-sat，kap Lùn ê kiáⁿ約書亞，kap以色列眾支派ê族長。Mô͘-se chiū ūi-tio̍h in hoan-hù chè-si Í-lī-a-sat, kap Lùn ê kiáⁿ Iok-su-a, kap Í-sek-lia̍t chèng chi-phài ê cho̍k-tiúⁿ.

29摩西對in講，Ka-tek ê kiáⁿ孫kap Liû-piān ê kiáⁿ孫，若kap lín過約旦河，ta̍k人kia̍h ke-si tī耶和華ê面前去交戰，hit-ê地hō͘ lín khah贏，lín就tio̍h用Ki-lia̍t地hō͘ in做業。Mô͘-se tùi in kóng, Ka-tek ê kiáⁿ-sun kap Liû-piān ê kiáⁿ-sun, nā kap lín kè Iok-tàn hô, ta̍k-lâng kia̍h ke-si tī Iâ-hô-hoa ê bīn-chêng khì kau-chiàn, hit ê tōe hō͘ lín khah-iâⁿ, lín chiū tio̍h ēng Ki-lia̍t tōe hō͘ in chòe gia̍p.

30設使in m̄帶軍器kap lín過去，in就tī迦南地tùi lín中間得tio̍h業。Siat-sú in m̄ tòa kun-khì kap lín kè-khì, in chiū tī Ka-lâm tōe tùi lín tiong-kan tit-tio̍h gia̍p.

31Ka-tek ê kiáⁿ孫kap Liû-piān ê kiáⁿ孫應講，耶和華對阮所講ê，你ê奴僕就án-ni行。Ka-tek ê kiáⁿ-sun kap Liû-piān ê kiáⁿ-sun ìn kóng, Iâ-hô-hoa tùi goán só͘ kóng-ê, Lí ê lô͘-po̍k chiū án-ni kiâⁿ.

32阮beh 帶軍器，tī耶和華ê面前過去入迦南地；獨獨約旦河外，阮所得tio̍h做業ê地，猶原歸阮。Goán beh tòa kun-khì, tī Iâ-hô-hoa ê bīn-chêng kè-khì ji̍p Ka-lâm tōe; to̍k-to̍k Iok-tàn hô-gōa, goán só͘ tit-tio̍h chòe gia̍p ê tōe, iû-goân kui goán.

33摩西就用A-mô͘-lī王Se-hông ê國，kap Pa-san王Go̍k ê國，hit-ê地kap伊境內chiah-ê城，就是四周圍chiah-ê城，lóng hō͘ Ka-tek ê kiáⁿ孫，kap Liû-piān ê kiáⁿ孫，以及約瑟ê kiáⁿ Má-ná-se ê半支派。Mô͘-se chiū ēng A-mô͘-lī ông Se-hông ê kok, kap Pa-san ông Go̍k ê kok, hit ê tōe kap i kéng-lāi chiah ê siâⁿ, chiū-sī sì-chiu-ûi chiah ê siâⁿ, lóng hō͘ Ka-tek ê kiáⁿ-sun, kap Liû-piān ê kiáⁿ-sun, í-ki̍p Iok-sek ê kiáⁿ Má-ná-se ê pòaⁿ-chi-phài.

34Ka-tek ê kiáⁿ孫起Tí-pún、A-tha-lio̍k、A-lô-jíⁿ，Ka-tek ê kiáⁿ-sun khí Tí-pún, A-tha-lio̍k, A-lô-jíⁿ,

35A-tha-lio̍k-sok-hoán、Ngá-siā、Iok-pí-hap，A-tha-lio̍k-sok-hoán, Ngá-siā, Iok-pí-hap,

36Pek-lêng-la̍h、Pek-hap-lân；lóng是堅固ê城；in koh 起羊寮。Pek-lêng-la̍h, Pek-hap-lân; lóng sī kian-kò͘ ê siâⁿ; in koh khí iûⁿ-tiâu.

37Liû-piān ê kiáⁿ孫起Hi-si̍t-pún、Í-lī-a-lī、Ki-lia̍t-têng，Liû-piān ê kiáⁿ-sun khí Hi-si̍t-pún, Í-lī-a-lī, Ki-lia̍t-têng,

38Nî-pho͘、Pa-le̍k-bián，(已經換in ê名，) koh起Se-pí-má；in所起chiah-ê城用新ê名號伊。Nî-pho͘, Pa-le̍k-bián, (í-keng ōaⁿ in ê miâ,) koh khí Se-pí-má; in só͘ khí chiah ê siâⁿ ēng sin ê miâ hō i.

39Má-ná-se ê kiáⁿ Má-kiat，伊ê kiáⁿ孫去Ki-lia̍t，佔hit-ê地，趕出hit所在ê A-mô͘-lī人。Má-ná-se ê kiáⁿ Má-kiat, i ê kiáⁿ-sun khì Ki-lia̍t, chiàm hit ê tōe, kóaⁿ-chhut hit só͘-chāi ê A-mô͘-lī lâng.

40摩西將Ki-lia̍t hō͘ Má-ná-se ê kiáⁿ Má-kiat；伊就khiā tī-hia。Mô͘-se chiong Ki-lia̍t hō͘ Má-ná-se ê kiáⁿ Má-kiat; i chiū khiā tī-hia.

41Má-ná-se ê kiáⁿ Gāi-jíⁿ去佔hiah-ê鄉社，就稱伊做Hap-úi-te̍k-gāi-jíⁿ。Má-ná-se ê kiáⁿ Gāi-jíⁿ khì chiàm hiah ê hiuⁿ-siā, chiū chheng i chòe Hap-úi-te̍k-gāi-jíⁿ.

42Lô-pa去佔Ki-la̍p，kap Ki-la̍p chiah-ê鄉社；就照家己ê名稱伊做Lô-pa。Lô-pa khì chiàm Ki-la̍p, kap Ki-la̍p chiah ê hiuⁿ-siā; chiū chiàu ka-kī ê miâ chheng i chòe Lô-pa.