1Liû-piān ê kiáⁿ孫，kap Ka-tek ê kiáⁿ孫，in ê cheng-siⁿ極其chōe；in看見Ngá-siā ê地，kap Ki-lia̍t ê地，是thang飼cheng-siⁿ ê所在。Liû-piān ê kiáⁿ-sun, kap Ka-tek ê kiáⁿ-sun, in ê cheng-siⁿ ke̍k-kî chōe; in khòaⁿ-kìⁿ Ngá-siā ê tōe, kap Ki-lia̍t ê tōe, sī thang chhī cheng-siⁿ ê só͘-chāi.

2Ka-tek ê kiáⁿ孫，kap Liû-piān ê kiáⁿ孫，就來見摩西，kap祭司Í-lī-a-sat，以及會眾ê首領，kā in講：Ka-tek ê kiáⁿ-sun, kap Liû-piān ê kiáⁿ-sun, chiū lâi kìⁿ Mô͘-se, kap chè-si Í-lī-a-sat, í-ki̍p hōe-chiòng ê siú-léng, kā in kóng,

3A-tāi-lio̍k、Tí-pún、Ngá-siā、Lêng-la̍h、Hi-si̍t-pún、Í-lī-a-lī，Sī-pan、Nî-pho、Pí-ún，A-tāi-lio̍k, Tí-pún, Ngá-siā, Lêng-la̍h, Hi-si̍t-pún, Í-lī-a-lī, Sī-pan, Nî-pho, Pí-ún,

4就是耶和華tī以色列會眾ê面前所攻取ê地，是thang飼cheng-siⁿ ê地，你ê奴僕也有cheng-siⁿ。chiū-sī Iâ-hô-hoa tī Í-sek-lia̍t hōe-chiòng ê bīn-chêng só͘ kong-chhú ê tōe, sī thang chhī cheng-siⁿ ê tōe, lí ê lô͘-po̍k iā ū cheng-siⁿ.

5Koh講：阮若得tio̍h恩典tī你ê面前，求你用chit-ê地hō͘你ê奴僕做業，莫得chhōa阮過約旦河。Koh kóng, Goán nā tit-tio̍h un-tián tī lí ê bīn-chêng, kiû lí ēng chit ê tōe hō͘ lí ê lô͘-po̍k chòe-gia̍p, bo̍h-tit chhōa goán kè Iok-tàn hô.

6摩西對Ka-tek ê kiáⁿ孫kap Liû-piān ê kiáⁿ孫講：總無lín ê兄弟去爭戰，也lín坐tī-chia mah？Mô͘-se tùi Ka-tek ê kiáⁿ-sun kap Liû-piān ê kiáⁿ-sun kóng, Chóng bô lín ê hiaⁿ-tī khì cheng-chiàn, iā lín chē tī-chia mah?

7Lín啥事hō͘以色列人餒志，無ài過去入耶和華所賞賜in hit-ê地ah？Lín siáⁿ-sū hō͘ Í-sek-lia̍t lâng lóe-chì, bô ài kè-khì ji̍p Iâ-hô-hoa só͘ siúⁿ-sù in hit ê tōe ah?

8我前tùi Ka-te-su Pa-nî-a差lín ê老父去偷看hit-ê地，in也是án-ni行。Góa chêng tùi Ka-te-su Pa-nî-a chhe lín ê lāu-pē khì thau-khòaⁿ hit ê tōe, in iā sī án-ni kiâⁿ.

9因為in上去Í-si̍t-kok ê山谷，去看hit-ê地ê時，有hō͘以色列人餒志，m̄ ài入耶和華所賞賜in ê地。In-ūi in chiūⁿ-khì Í-si̍t-kok ê soaⁿ-kok, khì khòaⁿ hit ê tōe ê sî, ū hō͘ Í-sek-lia̍t lâng lóe-chì, m̄ ài ji̍p Iâ-hô-hoa só͘ siúⁿ-sù in ê tōe.

10當日耶和華ê受氣發出，就chiù-chōa講：Tng-ji̍t Iâ-hô-hoa ê siū-khì hoat-chhut, chiū chiù-chōa kóng,

11見若tùi埃及上來二十歲以上ê人，決斷bōe得tio̍h看見我對亞伯拉罕、以撒、雅各，chiù-chōa應允ê地；因為in無專心跟tè我。Kìⁿ-nā tùi Ai-ki̍p chiūⁿ-lâi jī-cha̍p hè í-siōng ê lâng, koat-toàn bōe tit-tio̍h khòaⁿ-kìⁿ Góa tùi A-pek-la̍h-hán, Í-sat, Ngá-kok, chiù-chōa èng-ún ê tōe; in-ūi in bô choan-sim kun-tè Góa.

12獨獨Ki-nî-sé族，Iâ-hu-nî ê kiáⁿ迦勒，kap Lùn ê kiáⁿ約書亞，thang看見，因為in專心tè耶和華。To̍k-to̍k Ki-nî-sé cho̍k, Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a, thang khòaⁿ-kìⁿ, in-ūi in choan-sim tè Iâ-hô-hoa.

13耶和華對以色列人發受氣，hō͘ in tī曠野漂流四十年，thèng候hit代行pháiⁿ tī耶和華面前ê人lóng消滅。Iâ-hô-hoa tùi Í-sek-lia̍t lâng hoat siū-khì, hō͘ in tī khòng-iá phiau-liû sì-cha̍p nî, thèng-hāu hit-tāi kiâⁿ-pháiⁿ tī Iâ-hô-hoa bīn-chêng ê lâng lóng siau-bia̍t.

14看ah，lín起來續接lín ê老父，加添罪人ê數額，hō͘耶和華益發受氣以色列。Khòaⁿ ah, lín khí-lâi sòa-chiap lín ê lāu-pē, ke-thiⁿ chōe-jîn ê siàu-gia̍h, hō͘ Iâ-hô-hoa it-hoat siū-khì Í-sek-lia̍t.

15Lín若oat-倒tńg無tè伊，伊beh koh放sak in tī曠野，lín就是滅無chiah-ê眾百姓。Lín nā oat-tò-tńg bô tè I, I beh koh pàng-sak in tī khòng-iá, lín chiū-sī bia̍t-bô chiah ê chèng peh-sìⁿ.

16In óa近摩西講：阮beh tī-chia為阮ê cheng-siⁿ chhòng寮(tiâu)，為阮ê gín-á 起城；In óa-kūn Mô͘-se kóng, Goán beh tī-chia ūi goán ê cheng-siⁿ chhòng tiâu, ūi goán ê gín-á khí siâⁿ;

17總是阮本身beh帶軍去，行tī以色列人ê頭前，thèng候阮chhōa in到in ê地方；獨獨阮ê gín-ná，因為chit-ê地khiā起ê百姓ê緣故，beh tiàm tī堅固ê城內。chóng-sī goán pún-sin beh tòa kun-khì, kiâⁿ tī Í-sek-lia̍t lâng ê thâu-chêng, thèng-hāu goán chhōa in kàu in ê tōe-hng; to̍k-to̍k goán ê gín-ná, in-ūi chit ê tōe khiā-khí ê peh-sìⁿ ê iân-kò͘, beh tiàm tī kian-kò͘ ê siâⁿ-lāi.

18阮m̄ tò去阮厝，thèng候以色列人ta̍k-ê得tio̍h伊ê業。Goán m̄ tò-khì goán chhù, thèng-hāu Í-sek-lia̍t lâng ta̍k-ê tit-tio̍h i ê gia̍p.

19阮無beh kap in tī約旦河hit-pêng koh去ê地得tio̍h業；因為阮ê業是在tī約旦河東勢chit-pêng。Goán bô beh kap in tī Iok-tàn hô hit-pêng koh khì ê tōe tit-tio̍h gia̍p; in-ūi goán ê gia̍p sī chāi tī Iok-tàn hô tang-sì chit-pêng.

20摩西對in講，Lín若beh án-ni行，tī耶和華ê面前帶軍去出去交戰；Mô͘-se tùi in kóng, Lín nā beh án-ni kiâⁿ, tī Iâ-hô-hoa ê bīn-chêng tòa kun-khì chhut-khì kau-chiàn;

21lín所有帶軍去ê人，若tī耶和華ê面前過約旦河，thèng候伊tùi伊ê面前趕出伊ê對敵；lín só͘ ū tòa kun-khì ê lâng, nā tī Iâ-hô-hoa ê bīn-chêng kè Iok-tàn hô, thèng-hāu I tùi I ê bīn-chêng kóaⁿ-chhut I ê tùi-te̍k;

22hit-ê地已經hō͘耶和華khah贏，然後lín thang tò來；tī耶和華kap以色列ê面前，lín就無罪，chit-ê地beh tī耶和華ê面前hō͘ lín做業。hit ê tōe í-keng hō͘ Iâ-hô-hoa khah-iâⁿ, jiân-āu lín thang tò-lâi; tī Iâ-hô-hoa kap Í-sek-lia̍t ê bīn-chêng, lín chiū bô chōe, chit ê tōe beh tī Iâ-hô-hoa ê bīn-chêng hō͘ lín chòe-gia̍p.

23設使lín無án-ni行，就是得罪耶和華，tio̍h知lín ê罪beh追jip lín。Siat-sú lín bô án-ni kiâⁿ, chiū-sī tek-chōe Iâ-hô-hoa, tio̍h chai lín ê chōe beh tui-jip lín.

24Taⁿ tio̍h kā lín ê gín-ná 起城，kā lín ê羊群chhòng寮，照lín ê嘴所講ê，去行。Taⁿ tio̍h kā lín ê gín-ná khí siâⁿ, kā lín ê iûⁿ-kûn chhòng tiâu, chiàu lín ê chhùi só͘ kóng ê, khì kiâⁿ.

25Ka-tek ê kiáⁿ孫kap Liû-piān ê kiáⁿ孫對摩西講：你ê奴僕beh照我ê主所吩咐ê去行。Ka-tek ê kiáⁿ-sun kap Liû-piān ê kiáⁿ-sun tùi Mô͘-se kóng, Lí ê lô͘-po̍k beh chiàu góa ê chú só͘ hoan-hù-ê khì kiâⁿ.

26阮ê gín-á，阮ê bó͘，阮ê羊群，阮ê cheng-siⁿ，lóng beh留tī Ki-lia̍t chiah-ê城。Goán ê gín-á, goán ê bó͘, goán ê iûⁿ-kûn, goán ê cheng-siⁿ, lóng beh lâu tī Ki-lia̍t chiah ê siâⁿ.

27總是你ê奴僕，見若帶軍器ê，lóng beh照我ê主所講ê話，tī耶和華ê面前過去交戰。Chóng-sī lí ê lô͘-po̍k, kìⁿ-nā tòa kun-khì ê, lóng beh chiàu góa ê chú só͘ kóng ê ōe, tī Iâ-hô-hoa ê bīn-chêng kè-khì kau-chiàn.

28摩西就為tio̍h in吩咐祭司Í-lī-a-sat，kap Lùn ê kiáⁿ約書亞，kap以色列眾支派ê族長。Mô͘-se chiū ūi-tio̍h in hoan-hù chè-si Í-lī-a-sat, kap Lùn ê kiáⁿ Iok-su-a, kap Í-sek-lia̍t chèng chi-phài ê cho̍k-tiúⁿ.

29摩西對in講，Ka-tek ê kiáⁿ孫kap Liû-piān ê kiáⁿ孫，若kap lín過約旦河，ta̍k人kia̍h ke-si tī耶和華ê面前去交戰，hit-ê地hō͘ lín khah贏，lín就tio̍h用Ki-lia̍t地hō͘ in做業。Mô͘-se tùi in kóng, Ka-tek ê kiáⁿ-sun kap Liû-piān ê kiáⁿ-sun, nā kap lín kè Iok-tàn hô, ta̍k-lâng kia̍h ke-si tī Iâ-hô-hoa ê bīn-chêng khì kau-chiàn, hit ê tōe hō͘ lín khah-iâⁿ, lín chiū tio̍h ēng Ki-lia̍t tōe hō͘ in chòe gia̍p.

30設使in m̄帶軍器kap lín過去，in就tī迦南地tùi lín中間得tio̍h業。Siat-sú in m̄ tòa kun-khì kap lín kè-khì, in chiū tī Ka-lâm tōe tùi lín tiong-kan tit-tio̍h gia̍p.

31Ka-tek ê kiáⁿ孫kap Liû-piān ê kiáⁿ孫應講，耶和華對阮所講ê，你ê奴僕就án-ni行。Ka-tek ê kiáⁿ-sun kap Liû-piān ê kiáⁿ-sun ìn kóng, Iâ-hô-hoa tùi goán só͘ kóng-ê, Lí ê lô͘-po̍k chiū án-ni kiâⁿ.

32阮beh 帶軍器，tī耶和華ê面前過去入迦南地；獨獨約旦河外，阮所得tio̍h做業ê地，猶原歸阮。Goán beh tòa kun-khì, tī Iâ-hô-hoa ê bīn-chêng kè-khì ji̍p Ka-lâm tōe; to̍k-to̍k Iok-tàn hô-gōa, goán só͘ tit-tio̍h chòe gia̍p ê tōe, iû-goân kui goán.

33摩西就用A-mô͘-lī王Se-hông ê國，kap Pa-san王Go̍k ê國，hit-ê地kap伊境內chiah-ê城，就是四周圍chiah-ê城，lóng hō͘ Ka-tek ê kiáⁿ孫，kap Liû-piān ê kiáⁿ孫，以及約瑟ê kiáⁿ Má-ná-se ê半支派。Mô͘-se chiū ēng A-mô͘-lī ông Se-hông ê kok, kap Pa-san ông Go̍k ê kok, hit ê tōe kap i kéng-lāi chiah ê siâⁿ, chiū-sī sì-chiu-ûi chiah ê siâⁿ, lóng hō͘ Ka-tek ê kiáⁿ-sun, kap Liû-piān ê kiáⁿ-sun, í-ki̍p Iok-sek ê kiáⁿ Má-ná-se ê pòaⁿ-chi-phài.

34Ka-tek ê kiáⁿ孫起Tí-pún、A-tha-lio̍k、A-lô-jíⁿ，Ka-tek ê kiáⁿ-sun khí Tí-pún, A-tha-lio̍k, A-lô-jíⁿ,

35A-tha-lio̍k-sok-hoán、Ngá-siā、Iok-pí-hap，A-tha-lio̍k-sok-hoán, Ngá-siā, Iok-pí-hap,

36Pek-lêng-la̍h、Pek-hap-lân；lóng是堅固ê城；in koh 起羊寮。Pek-lêng-la̍h, Pek-hap-lân; lóng sī kian-kò͘ ê siâⁿ; in koh khí iûⁿ-tiâu.

37Liû-piān ê kiáⁿ孫起Hi-si̍t-pún、Í-lī-a-lī、Ki-lia̍t-têng，Liû-piān ê kiáⁿ-sun khí Hi-si̍t-pún, Í-lī-a-lī, Ki-lia̍t-têng,

38Nî-pho͘、Pa-le̍k-bián，(已經換in ê名，) koh起Se-pí-má；in所起chiah-ê城用新ê名號伊。Nî-pho͘, Pa-le̍k-bián, (í-keng ōaⁿ in ê miâ,) koh khí Se-pí-má; in só͘ khí chiah ê siâⁿ ēng sin ê miâ hō i.

39Má-ná-se ê kiáⁿ Má-kiat，伊ê kiáⁿ孫去Ki-lia̍t，佔hit-ê地，趕出hit所在ê A-mô͘-lī人。Má-ná-se ê kiáⁿ Má-kiat, i ê kiáⁿ-sun khì Ki-lia̍t, chiàm hit ê tōe, kóaⁿ-chhut hit só͘-chāi ê A-mô͘-lī lâng.

40摩西將Ki-lia̍t hō͘ Má-ná-se ê kiáⁿ Má-kiat；伊就khiā tī-hia。Mô͘-se chiong Ki-lia̍t hō͘ Má-ná-se ê kiáⁿ Má-kiat; i chiū khiā tī-hia.

41Má-ná-se ê kiáⁿ Gāi-jíⁿ去佔hiah-ê鄉社，就稱伊做Hap-úi-te̍k-gāi-jíⁿ。Má-ná-se ê kiáⁿ Gāi-jíⁿ khì chiàm hiah ê hiuⁿ-siā, chiū chheng i chòe Hap-úi-te̍k-gāi-jíⁿ.

42Lô-pa去佔Ki-la̍p，kap Ki-la̍p chiah-ê鄉社；就照家己ê名稱伊做Lô-pa。Lô-pa khì chiàm Ki-la̍p, kap Ki-la̍p chiah ê hiuⁿ-siā; chiū chiàu ka-kī ê miâ chheng i chòe Lô-pa.

1以色列人照軍隊，tī摩西、亞倫ê手下，出埃及地所行ê路站，記tī下面。Í-sek-lia̍t lâng chiàu kun-tūi, tī Mô͘-se A-lûn ê chhiú-ē, chhut Ai-ki̍p tōe só͘ kiâⁿ ê lō͘-chām, kì tī ē-bīn.

2摩西照耶和華ê命令記載in起身行ê路站；in起身行ê路站就是án-ni。Mô͘-se chiàu Iâ-hô-hoa ê bēng-lēng kì-chài in khí-sin kiâⁿ ê lō͘-chām; in khí-sin kiâⁿ ê lō͘-chām chiū-sī án-ni.

3正月間，tī正月十五日，就是Pôaⁿ過節ê 第二日，以色列人tùi Lân-sek起身，tī埃及眾人ê目睭前，khò大權能ê手出去。Chiaⁿ-ge̍h-kan, tī chiaⁿ-ge̍h cha̍p-gō͘ ji̍t, chiū-sī pôaⁿ-kè-choeh ê tē-jī ji̍t, Í-sek-lia̍t lâng tùi Lân-sek khí-sin, tī Ai-ki̍p chèng-lâng ê ba̍k-chiu-chêng , khò tōa koân-lêng ê chhiú chhut-khì.

4hit時埃及人teh埋葬in lóng總ê大kiáⁿ，就是耶和華tī in中間所phah死ê；耶和華也譴責in hiah-ê上帝。Hit-sî Ai-ki̍p lâng teh bâi-chòng in lóng-chóng ê tōa-kiáⁿ, chiū-sī Iâ-hô-hoa tī in tiong-kan só͘ phah-sí-ê; Iâ-hô-hoa iā khiàn-chek in hiah ê siōng-tè.

5以色列人tùi Lân-sek起身，紮營tī So͘-kat。Í-sek-lia̍t lâng tùi Lân-sek khí-sin, chat-iâⁿ tī So͘-kat.

6Tùi So͘-kat起身，紮營tī近曠野ê Í-thóng。Tùi So͘-kat khí-sin, chat-iâⁿ tī kūn khòng-iá ê Í-thóng.

7對Í-thóng起身，oa̍t-tńg到Pí-hap-hi-lio̍k，就是tī Pa-le̍k-sé-hun ê對面，就紮營tī Bi̍t-toa̍t ê頭前。Tùi Í-thóng khí-sin, oa̍t-tńg kàu Pí-hap-hi-lio̍k, chiū-sī tī Pa-le̍k-sé-hun ê tùi-bīn, chiū chat-iâⁿ tī Bi̍t-toa̍t ê thâu-chêng.

8Tùi Hap-hi-lio̍k對面起身，經過海中到曠野；koh tī Í-thóng ê曠野行三日ê路站，就紮營tī Má-la̍h。Tùi Hap-hi-lio̍k tùi-bīn khí-sin, keng-kè hái-tiong kàu khòng-iá; koh tī Í-thóng ê khòng-iá kiâⁿ saⁿ-ji̍t ê lō͘-chām, chiū chat-iâⁿ tī Má-la̍h.

9In tùi Má-la̍h起身，來到Í-lîm；Í-lîm有十二條水泉，七十叢棗樹；就tī-hia紮營。In tùi Má-la̍h khí-sin, lâi kàu Í-lîm; Í-lîm ū cha̍p-jī tiâu chúi-chôaⁿ, chhit-cha̍p châng chó-chhiū; chiū tī-hia chat-iâⁿ.

10對Í-lîm起身，紮營tī紅海墘。Tùi Í-lîm khí-sin, chat-iâⁿ tī Âng-hái kîⁿ.

11Tùi紅海墘起身，紮營tī Sìn ê曠野。Tùi Âng-hái kîⁿ khí-sin, chat-iâⁿ tī Sìn ê khòng-iá.

12Tùi Sìn ê曠野起身，紮營tī Thoat-ka。Tùi Sìn ê khòng-iá khí-sin, chat-iâⁿ tī Thoat-ka.

13Tùi Thoat-ka起身，紮營tī A-lio̍k。Tùi Thoat-ka khí-sin, chat-iâⁿ tī A-lio̍k.

14Tùi A-lio̍k起身，紮營tī Lī-hui-tèng；tī-hia無水thang hō͘百姓lim。Tùi A-lio̍k khí-sin, chat-iâⁿ tī Lī-hui-tèng; tī-hia bô chúi thang hō͘ peh-sìⁿ lim.

15Tùi Lī-hui-tèng起身，紮營tī西奈ê曠野。Tùi Lī-hui-tèng khí-sin, chat-iâⁿ tī Se-nái ê khòng-iá.

16Tùi西奈ê曠野起身，紮營tī Ki-phok-lô-hap-tha-óa。Tùi Se-nái ê khòng-iá khí-sin, chat-iâⁿ tī Ki-phok-lô-hap-tha-óa.

17Tùi Ki-phok-lô-hap-tha-óa起身，紮營tī Hap-sé-lio̍k。Tùi Ki-phok-lô-hap-tha-óa khí-sin, chat-iâⁿ tī Hap-sé-lio̍k.

18Tùi Hap-sé-lio̍k起身，紮營tī Lī-thê-má。Tùi Hap-sé-lio̍k khí-sin, chat-iâⁿ tī Lī-thê-má.

19Tùi Lī-thê-má起身，紮營tī Lîm-bûn-Phàⁿ-lia̍t。Tùi Lī-thê-má khí-sin, chat-iâⁿ tī Lîm-bûn-phàⁿ-lia̍t.

20Tùi Lîm-bûn-Phàⁿ-lia̍t起身，紮營tī Li̍p-ná。Tùi Lîm-bûn-phàⁿ-lia̍t khí-sin, chat-iâⁿ tī Li̍p-ná.

21Tùi Li̍p-ná起身，紮營tī Le̍k-sat。Tùi Li̍p-ná khí-sin, chat-iâⁿ tī Le̍k-sat.

22Tùi Le̍k-sat起身，紮營tī Ki-hi-la̍h-tha。Tùi Le̍k-sat khí-sin, chat-iâⁿ tī Ki-hi-la̍h-tha.

23Tùi Ki-hi-la̍h-tha起身，紮營tī Sa-húi山。Tùi Ki-hi-la̍h-tha khí-sin, chat-iâⁿ tī Sa-húi soaⁿ.

24Tùi Sa-húi山起身，紮營tī Hap-la̍h-tāi。Tùi Sa-húi soaⁿ khí-sin, chat-iâⁿ tī Hap-la̍h-tāi.

25Tùi Hap-la̍h-tāi起身，紮營tī Má-kiat-hi-lio̍k。Tùi Hap-la̍h-tāi khí-sin, chat-iâⁿ tī Má-kiat-hi-lio̍k.

26Tùi Má-kiat-hi-lio̍k起身，紮營tī Tha-hap。Tùi Má-kiat-hi-lio̍k khí-sin, chat-iâⁿ tī Tha-hap.

27Tùi Tha-hap起身，紮營tī Tha-la̍h。Tùi Tha-hap khí-sin, chat-iâⁿ tī Tha-la̍h.

28Tùi Tha-la̍h起身，紮營tī Bi̍t-ka。Tùi Tha-la̍h khí-sin, chat-iâⁿ tī Bi̍t-ka.

29Tùi Bi̍t-ka起身，紮營tī Hap-mô͘-ná。Tùi Bi̍t-ka khí-sin, chat-iâⁿ tī Hap-mô͘-ná.

30Tùi Hap-mô͘-ná起身，紮營ti7Mou5-se-lio̍k。Tùi Hap-mô͘-ná khí-sin, chat-iâⁿ tī Mô͘-se-lio̍k.

31Tùi Mô͘-se-lio̍k起身，紮營ti7Pi2-nî-a-kan。Tùi Mô͘-se-lio̍k khí-sin, chat-iâⁿ tī Pí-nî-a-kan.

32Tùi Pí-nî-a-kan起身，紮營tī Hat-hap-ki̍p-kah。Tùi Pí-nî-a-kan khí-sin, chat-iâⁿ tī Hat-hap-ki̍p-kah.

33Tùi Hat-hap-ki̍p-kah起身，紮營tī Iok-pa-tha。Tùi Hat-hap-ki̍p-kah khí-sin, chat-iâⁿ tī Iok-pa-tha.

34Tùi Iok-pa-tha起身，紮營tī A-phok-ná。Tùi Iok-pa-tha khí-sin, chat-iâⁿ tī A-phok-ná.

35Tùi A-phok-ná起身，紮營tī Í-sûn-ka-pia̍t。Tùi A-phok-ná khí-sin, chat-iâⁿ tī Í-sûn-ka-pia̍t.

36對Í-sûn-ka-pia̍t起身，紮營tī Sîm ê曠野，就是Ka-te-su。Tùi Í-sûn-ka-pia̍t khí-sin, chat-iâⁿ tī Sîm ê khòng-iá, chiū-sī Ka-te-su.

37Tùi Ka-te-su起身，紮營tī Hô-jíⁿ山，Í-tong 地ê邊界。Tùi Ka-te-su khí-sin, chat-iâⁿ tī Hô-jíⁿ soaⁿ, Í-tong tōe ê piⁿ-kài.

38以色列人出埃及地ê四十年，五月初一日，祭司亞倫遵thàn耶和華ê命令，上Hô-jíⁿ山，就死tī-hia。Í-sek-lia̍t lâng chhut Ai-ki̍p tōe ê sì-cha̍p nî, gō͘-ge̍h chhoe-it ji̍t, chè-si A-lûn chun-thàn Iâ-hô-hoa ê bēng-lēng, chiūⁿ Hô-jíⁿ soaⁿ, chiū sí tī-hia.

39亞倫死tī Hô-jíⁿ山ê時，一百二十三歲。A-lûn sí tī Hô-jíⁿ soaⁿ ê sî, chi̍t-pah jī-cha̍p-saⁿ hè.

40Khiā起tī迦南地南方ê迦南人A-la̍h-tek王聽見以色列人來lah。Khiā-khí tī Ka-lâm tōe lâm-hng ê Ka-lâm lâng A-la̍h-tek ông thiaⁿ-kìⁿ Í-sek-lia̍t lâng lâi lah.

41以色列人tùi Hô-jíⁿ山起身，紮營tī Sat-mô͘-ná。Í-sek-lia̍t lâng tùi Hô-jíⁿ soaⁿ khí-sin, chat-iâⁿ tī Sat-mô͘-ná.

42Tùi Sat-mô͘-ná起身，紮營tī Phó͘-lùn。Tùi Sat-mô͘-ná khí-sin, chat-iâⁿ tī Phó͘-lùn.

43Tùi Phó͘-lùn起身，紮營tī O-pek。Tùi Phó͘-lùn khí-sin, chat-iâⁿ tī O-pek.

44Tùi O-pek起身，紮營tī Í-iâ-a-pa-lîm，Mô͘-ap ê邊界。Tùi O-pek khí-sin, chat-iâⁿ tī Í-iâ-a-pa-lîm, Mô͘-ap ê piⁿ-kài.

45對Í-ìn起身，紮營tī Tí-pún-ka-tek。Tùi Í-ìn khí-sin, chat-iâⁿ tī Tí-pún-ka-tek.

46Tùi Tí-pún-ka-tek起身，紮營tī A-bûn-te-pí-la̍h-thài-im。Tùi Tí-pún-ka-tek khí-sin, chat-iâⁿ tī A-bûn-te-pí-la̍h-thài-im.

47Tùi A-bûn-te-pí-la̍h-thài-im起身，紮營tī Nî-pho對面ê A-pa-lîm山。Tùi A-bûn-te-pí-la̍h-thài-im khí-sin, chat-iâⁿ tī Nî-pho tùi-bīn ê A-pa-lîm soaⁿ.

48Tùi A-pa-lîm山起身，紮營tī Mô͘-ap ê平洋，約旦河邊，耶利哥對面。Tùi A-pa-lîm soaⁿ khí-sin, chat-iâⁿ tī Mô͘-ap ê pîⁿ-iûⁿ, Iok-tàn hô-piⁿ, Iâ-lī-ko tùi-bīn.

49In紮營tī約旦ê河邊，tùi Pek-iâ-se-boa̍t到A-pek-si̍p-têng，tī Mô͘-ap平洋。In chat-iâⁿ tī Iok-tàn ê hô-piⁿ, tùi Pek-iâ-se-boa̍t kàu A-pek-si̍p-têng, tī Mô͘-ap pîⁿ-iûⁿ.

50耶和華tī Mô͘-ap平洋，約旦河邊，耶利哥對面，吩咐摩西講：Iâ-hô-hoa tī Mô͘-ap pîⁿ-iûⁿ, Iok-tàn hô-piⁿ, Iâ-lī-ko tùi-bīn, hoan-hù Mô͘-se kóng,

51你tio̍h吩咐以色列人kā in講：Lín過約旦河入迦南地ê時，Lí tio̍h hoan-hù Í-sek-lia̍t lâng kā in kóng, Lín kè Iok-tàn hô ji̍p Ka-lâm tōe ê sî,

52就tio̍h tùi lín面前趕出hia所有khiā起ê百姓，毀滅in一切phah成ê石像，koh毀滅in一切羊鑄ê偶像，koh拆毀in一切ê山頭壇。chiū tio̍h tùi lín bīn-chêng kóaⁿ-chhut hia só͘ ū khiā-khí ê peh-sìⁿ, húi-bia̍t in it-chhè phah-chiâⁿ ê chio̍h-siōng, koh húi-bia̍t in it-chhè iûⁿ-chù ê ngó͘-siōng, koh thiah-húi in it-chhè ê soaⁿ-thâu-tôaⁿ.

53Lín tio̍h佔hit所在，也tio̍h khiā起tī-hia，因為我將hit所在賞賜lín做業。Lín tio̍h chiàm hit só͘-chāi, iā tio̍h khiā-khí tī-hia, in-ūi Góa chiong hit só͘-chāi siúⁿ-sù lín chòe-gia̍p.

54Lín tio̍h照ta̍k家liam-khau承接hit-ê地；人chōe-ê，tio̍h分產業khah-chōe hō͘ in，人少ê tio̍h分產業khah-少hō͘ in；看人liam-tio̍h甚麼所在，hit所在就歸伊；照lín祖公ê支派lín tio̍h承接伊。Lín tio̍h chiàu ta̍k-ke liam-khau sêng-chiap hit ê tōe; lâng chōe-ê, tio̍h pun sán-gia̍p khah-chōe hō͘ in, lâng chió-ê tio̍h pun sán-gia̍p khah-chió hō͘ in; khòaⁿ lâng liam-tio̍h sím-mi̍h só͘-chāi, hit só͘-chāi chiū kui i; chiàu lín chó͘-kong ê chi-phài lín tio̍h sêng-chiap i.

55設使lín無趕出hit所在khiā起ê百姓，就lín所容允伊tiàm-teh ê百姓，beh做lín目睭中ê刺，hia̍p下ê草刺；in也beh tī lín所khiā起ê地窘迫lín。Siat-sú lín bô kóaⁿ-chhut hit só͘-chāi khiā-khí ê peh-sìⁿ, chiū lín só͘ iông-ún i tiàm-teh ê peh-sìⁿ, beh chòe lín ba̍k-chiu-tiong ê chhì, hia̍p-ē ê chháu-chhì; in iā beh tī lín só͘ khiā-khí ê tōe khún-pek lín.

56Koh我beh款待lín，親像我bat想beh款待in ê。Koh Góa beh khoán-thāi lín, chhin-chhiūⁿ Góa bat siūⁿ beh khoán-thāi in ê.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h命令以色列人kā in講：Lín到迦南地ê時，就是歸hō͘ lín做業ê迦南，照伊四境ê地；Lí tio̍h bēng-lēng Í-sek-lia̍t lâng kā in kóng, Lín kàu Ka-lâm tōe ê sî, chiū-sī kui hō͘ lín chòe-gia̍p ê Ka-lâm, chiàu i sì-kéng ê tōe;

3lín ê南方tio̍h tùi Sîm ê曠野沿Í-tong ê邊界，lín ê南界tio̍h tùi鹽海東勢ê極頭。lín ê lâm-hng tio̍h tùi Sîm ê khòng-iá iân Í-tong ê piⁿ-kài, lín ê lâm-kài tio̍h tùi Iâm-hái tang-sì ê ke̍k-thâu.

4Lín ê界tio̍h到A-khek-la̍h-piⁿ ê山坪ê南勢，續到Sîm，直直thàng到Ka-te-su-pa-nî-a ê南pêng；koh thàng到Hap-sat-a-ta̍t，續到Ap-bûn。Lín ê kài tio̍h kàu A-khek-la̍h-piⁿ ê soaⁿ-phiâⁿ ê lâm-sì, sòa-kàu Sîm, ti̍t-ti̍t thàng-kàu Ka-te-su-pa-nî-a ê lâm-pêng; koh thàng-kàu Hap-sat-a-ta̍t, sòa-kàu Ap-bûn.

5Chit-ê境界tùi Ap-bûn oat到埃及ê溪，thàng到海為止。Chit ê kéng-kài tio̍h tùi Ap-bûn oat-kàu Ai-ki̍p ê khoe, thàng-kàu hái ûi-chí.

6西pêng tio̍h用大海做界；這就是lín西勢ê界。Sai-pêng tio̍h ēng tōa-hái chòe kài; che chiū-sī lín sai-sì ê kài.

7Lín北勢ê界tio̍h tùi大海，劃到Hô-jíⁿ山。Lín pak-sì ê kài tio̍h tùi tōa-hái, u̍ih-kàu Hô-jíⁿ soaⁿ.

8Tùi Hô-jíⁿ山劃到Hap-má ê路口，thàng到Se-ta̍t-ta̍t。Tùi Hô-jíⁿ soaⁿ u̍ih-kàu Hap-má ê lō͘-kháu, thàng-kàu Se-ta̍t-ta̍t.

9Koh thàng到Se-húi-lûn，直到Hap-sat-í-lân為止，這beh做lín 北勢ê界。Koh thàng-kàu Se-húi-lûn, ti̍t-kàu Hap-sat-í-lân ûi-chí, che beh chòe lín pak-sì ê kài.

10Lín tio̍h tùi Hap-sat-í-lân，劃到Sī-hoan做lín東勢ê界。Lín tio̍h tùi Hap-sat-í-lân, u̍ih-kàu Sī-hoan chòe lín tang-sì ê kài.

11Chit-ê界tio̍h tui3Si7-hoan落去到A-iân東勢ê Lī-pí-la̍h，koh落去到Ki-nî-lia̍t湖ê東勢。Chit ê kài tio̍h tùi Sī-hoan lo̍h-khì kàu A-iân tang-sì ê Lī-pí-la̍h, koh lo̍h-khì kàu Ki-nî-lia̍t ô͘ ê tang-sì.

12Chit-ê界tio̍h落去到約旦河，thàng到鹽海為止；chit四圍ê界內beh做lín ê地。Chit ê kài tio̍h lo̍h-khì kàu Iok-tàn hô, thàng-kàu Iâm-hái ûi-chí; chit sì-ûi ê kài-lāi beh chòe lín ê tōe.

13摩西命令以色列人講：這是照lín所liam-khau做teh-beh續接業ê地，耶和華所命令hō͘九個支派koh半支派ê。Mô͘-se bēng-lēng Í-sek-lia̍t lâng kóng, Che sī chiàu lín só͘ liam-khau chòe teh-beh sòa-chiap gia̍p ê tōe, Iâ-hô-hoa só͘ bēng-lēng hō͘ káu ê chi-phài koh pòaⁿ-chi-phài ê.

14因為Liû-piān kiáⁿ孫ê支派照in ê宗族，koh Ka-tek kiáⁿ孫ê支派照in ê宗族，已經得tio̍h產業；Má-ná-se半支派也得tio̍h；In-ūi Liû-piān kiáⁿ-sun ê chi-phài chiàu in ê chong-cho̍k, koh Ka-tek kiáⁿ-sun ê chi-phài chiàu in ê chong-cho̍k, í-keng tit-tio̍h sán-gia̍p; Má-ná-se pòaⁿ-chi-phài iā tit-tio̍h;

15chit兩支派，koh半支派，已經tī約旦外，耶利哥ê東勢，ǹg日出ê所在得tio̍h業。chit nn̄g chi-phài, koh pòaⁿ-chi-phài, í-keng tī Iok-tàn gōa, Iâ-lī-ko ê tang-sì, ǹg ji̍t chhut ê só͘-chāi tit-tio̍h gia̍p.

16耶和華koh吩咐摩西講：Iâ-hô-hoa koh hoan-hù Mô͘-se kóng,

17Beh kā lín分地做業ê人ê名字記tī下底；是祭司Í-lī-a-sat，kap Lùn ê kiáⁿ約書亞。Beh kā lín pun tōe chòe-gia̍p ê lâng ê miâ-jī kì tī ē-tóe; sī chè-si Í-lī-a-sat, kap Lùn ê kiáⁿ Iok-su-a.

18Lín tio̍h tùi ta̍k支派揀一個首領，分hit-ê地做業。Lín tio̍h tùi ta̍k chi-phài kéng chi̍t-ê siú-léng, pun hit ê tōe chòe-gia̍p.

19Chiah-ê人ê名記tī下底；猶大ê支派，有Iâ-hu-nî ê kiáⁿ迦勒。Chiah ê lâng ê miâ kì tī ē-tóe; Iû-tāi ê chi-phài, ū Iâ-hu-nî ê kiáⁿ Ka-le̍k.

20西門kiáⁿ孫ê支派，有A-bí-hut ê kiáⁿ Sī-bó͘-lī。Se-biān kiáⁿ-sun ê chi-phài, ū A-bí-hut ê kiáⁿ Sī-bó͘-lī.

21便雅憫ê支派，有Ki-su-lûn ê kiáⁿ Í-lī-ta̍t。Piān-ngá-bín ê chi-phài, ū Ki-su-lûn ê kiáⁿ Í-lī-ta̍t.

22Tàn ê kiáⁿ孫ê支派，有首領，Iok-lī ê kiáⁿ Pò͘-ki。Tàn ê kiáⁿ-sun ê chi-phài, ū siú-léng, Iok-lī ê kiáⁿ Pò͘-ki.

23約瑟ê kiáⁿ孫，Má-ná-se kiáⁿ孫ê支派，有首領，Í-hut ê kiáⁿ Hàn-liap；Iok-sek ê kiáⁿ-sun, Má-ná-se kiáⁿ-sun ê chi-phài, ū siú-léng, Í-hut ê kiáⁿ Hàn-liap;

24Í-hoat-liân kiáⁿ孫ê支派，有首領，Li̍p-hut-tàn ê kiáⁿ Ki-bó͘-lī。Í-hoat-liân kiáⁿ-sun ê chi-phài, ū siú-léng, S[L]i̍p-hut-tàn ê kiáⁿ Ki-bó͘-lī.

25Se-pò͘-lûn kiáⁿ孫ê支派，有首領，Phàⁿ-la̍p ê kiáⁿ I-lī-sat-hoan。Se-pò͘-lûn kiáⁿ-sun ê chi-phài, ū siú-léng, Phàⁿ-la̍p ê kiáⁿ I-lī-sat-hoan.

26Í-sat-ka kiáⁿ孫ê支派，有首領，A-sàn ê kiáⁿ Phàⁿ-thiah。Í-sat-ka kiáⁿ-sun ê chi-phài, ū siú-léng, A-sàn ê kiáⁿ Phàⁿ-thiah.

27A-siat kiáⁿ孫ê支派，有首領，Sī-lô-bí ê kiáⁿ A-hi-hut。A-siat kiáⁿ-sun ê chi-phài, ū siú-léng, Sī-lô-bí ê kiáⁿ A-hi-hut.

28Ná-hut-tha-lī kiáⁿ孫ê支派，有首領，A-bí-hut ê kiáⁿ Pí-tāi-hek。Ná-hut-tha-lī kiáⁿ-sun ê chi-phài, ū siú-léng, A-bí-hut ê kiáⁿ Pí-tāi-hek.

29Chiah-ê人就是耶和華所命令tī迦南地將產業分hō͘以色列人ê。Chiah ê lâng chiū-sī Iâ-hô-hoa só͘ bēng-lēng tī Ka-lâm tōe chiong sán-gia̍p pun hō͘ Í-sek-lia̍t lâng ê.