1耶和華tī Mô͘-ap ê平洋，約旦河邊，耶利哥對面，吩咐摩西講：Iâ-hô-hoa tī Mô͘-ap ê pîⁿ-iûⁿ, Iok-tàn hô-piⁿ, Iâ-lī-ko tùi-bīn, hoan-hù Mô͘-se kóng,

2你命令以色列人，tio̍h 對in所得tio̍h ê業，用城hō͘利未人khiā起；也tio̍h用城四圍ê郊野hō͘利未人。Lí bēng-lēng Í-sek-lia̍t lâng, tio̍h tùi in só͘ tit-tio̍h ê gia̍p, ēng siâⁿ hō͘ Lī-bī lâng khiā-khí; iā tio̍h ēng siâⁿ sì-ûi ê kau-iá hō͘ Lī-bī lâng.

3城beh hō͘ in khiā起；郊野beh做in ê牛、羊、財物，kap ta̍k樣cheng-siⁿ ê路用。Siâⁿ beh hō͘ in khiā-khí; kau-iá beh chòe in ê gû, iûⁿ, châi-bu̍t, kap ta̍k-iūⁿ cheng-siⁿ ê lō͘-ēng.

4Lín所hō͘利未人城外ê郊野，tùi城腳四圍量出一千肘。Lín só͘ hō͘ Lī-bī lâng siâⁿ-gōa ê kau-iá, tùi siâⁿ-kha sì-ûi niû-chhut chi̍t-chheng tiú.

5你tī城外量伊，東勢兩千肘，南勢兩千肘，西勢兩千肘，北勢兩千肘，城tī中央；這是beh hō͘ in做城ê郊野。Lí tī siâⁿ-gōa niû i, tang-sì nn̄g-chheng tiú, lâm-sì nn̄g-chheng tiú, sai-sì nn̄g-chheng tiú, pak-sì nn̄g-chheng tiú, siâⁿ tī tiong-ng; che sī beh hō͘ in chòe siâⁿ ê kau-iá.

6Lín所hō͘利未人hiah-ê城，其中tio̍h六個逃閃ê城；lín tio̍h設立伊，hō͘ thâi死人ê thang逃走tī-hia；chiah-ê以外，tio̍h koh hō͘ in四十二個城。Lín só͘ hō͘ Lī-bī lâng hiah ê siâⁿ, kî-tiong tio̍h la̍k ê tô-siám ê siâⁿ; lín tio̍h siat-li̍p i, hō͘ thâi-sí lâng-ê thang tô-cháu tī-hia; chiah-ê í-gōa, tio̍h koh hō͘ in sì-cha̍p-jī ê siâⁿ.

7Lín tio̍h hō͘利未人ê城，共四十八；城kap郊野，lóng tio̍h hō͘ in。Lín tio̍h hō͘ Lī-bī lâng ê siâⁿ, kiōng sì-cha̍p-poeh; siâⁿ kap kau-iá, lóng tio̍h hō͘ in.

8論到lín tùi以色列人ê產業中，所hō͘利未人ê城，tùi業chōe-ê，取 khah-chōe城，tùi業少ê，取少；各照所承接ê業撥出城hō͘利未人。Lūn-kàu lín tùi Í-sek-lia̍t lâng ê sán-gia̍p-tiong, só͘ hō͘ Lī-bī lâng ê siâⁿ, tùi gia̍p chōe-ê, chhú khah-chōe siâⁿ, tùi gia̍p chió-ê, chhú chió; kok chiàu só͘ sêng-chiap ê gia̍p poah-chhut siâⁿ hō͘ Lī-bī lâng.

9耶和華吩咐摩西講：Iâ-hô-hoa hoan-hù Mô͘-se kóng,

10你tio̍h吩咐以色列人，kā in講：Lín過約旦河，入迦南地，Lí tio̍h hoan-hù Í-sek-lia̍t lâng, kā in kóng, Lín kè Iok-tàn hô, ji̍p Ka-lâm tōe,

11就tio̍h撥撥出幾個城，hō͘ lín做逃閃ê城，hō͘錯誤thâi死人ê兇身thang逃走tī-hia。chiū tio̍h poah-chhut kúi ê siâⁿ, hō͘ lín chòe tô-siám ê siâⁿ, hō͘ chhò-gō͘ thâi-sí lâng ê hiong-sin thang tô-cháu tī-hia.

12Chiah-ê城thang hō͘ lín閃避hit-ê報仇ê人，hō͘ 兇身無致到死；thèng候伊khiā tī會眾ê面前受審判。Chiah ê siâⁿ thang hō͘ lín siám-pī hit ê pò-siû ê lâng, hō͘ hiong-sin bô tì-kàu sí; thèng-hāu i khiā tī hōe-chiòng ê bīn-chêng siū sím-phòaⁿ.

13Lín所撥出來ê城，tio̍h做lín六個逃閃ê城。Lín só͘ poah-chhut-lâi ê siâⁿ, tio̍h chòe lín la̍k ê tô-siám ê siâⁿ.

14Tī約旦河外 tio̍h撥出三個城，tī迦南地也tio̍h撥出三個城，做逃閃ê城。Tī Iok-tàn hô-gōa tio̍h poah-chhut saⁿ ê siâⁿ, tī Ka-lâm tōe iā tio̍h poah-chhut saⁿ ê siâⁿ, chòe tô-siám ê siâⁿ.

15Chit六個城tio̍h hō͘以色列人，kap in中間ê出外人，kap寄腳ê，做逃閃ê路用；hō͘錯誤thâi人ê thang走去hia。Chit la̍k ê siâⁿ tio̍h hō͘ Í-sek-lia̍t lâng, kap in tiong-kan ê chhut-gōa lâng, kap kià-kha-ê, chòe tô-siám ê lō͘-ēng; hō͘ chhò-gō͘ thâi-lâng-ê thang cháu-khì hia.

16設使人用鐵器phah人，致到死，伊就是凶犯，凶犯的確tio̍h hō͘伊死。Siat-sú lâng ēng thih-khì phah lâng, tì-kàu sí, i chiū-sī hiong-hoān, hiong-hoān tek-khak tio̍h hō͘ i sí.

17伊ê手若用能hō͘人死ê石tìm人，致到人死，伊就是凶犯，凶犯的確tio̍h死。I ê chhiú nā ēng ōe hō͘ lâng sí ê chio̍h tìm lâng, tì-kàu lâng sí, i chiū-sī hiong-hoān, hiong-hoān tek-khak tio̍h sí.

18伊ê手若用能hō͘人死ê柴phah人，致到人死，伊就是凶犯，凶犯的確tio̍h死。I ê chhiú nā ēng ōe hō͘ lâng sí ê chhâ phah lâng, tì-kàu lâng sí, i chiū-sī hiong-hoān, hiong-hoān tek-khak tio̍h sí.

19報人命ê，本身tio̍h thâi死hit-ê凶犯；一下tú-tio̍h伊就tio̍h thâi伊。Pò jîn-bēng-ê, pún-sin tio̍h thâi-sí hit ê hiong-hoān; chi̍t-ē tú-tio̍h-i chiū tio̍h thâi i.

20人若怨恨hit人來kā伊chhia倒，á是bih-teh用物tìm伊，致到死；Lâng nā oàn-hūn hit-lâng lâi kā i chhia-tó, á-sī bih-teh ēng-mi̍h tìm i, tì-kàu sí;

21kiám-chhái因為挾份用手phah人致到死，就hit-ê phah人ê的確tio̍h死，因為伊真正是凶犯，報人命ê tú-tio̍h凶犯，就thâi死伊。kiám-chhái in-ūi hia̍p-hūn ēng chhiú phah lâng tì-kàu sí, chiū hit ê phah-lâng-ê tek-khak tio̍h sí, in-ūi i chin-chiàⁿ sī hiong-hoān, pò jîn-bēng-ê tú-tio̍h hiong-hoān, chiū thâi-sí i.

22設使人無挾份，忽然chhia伊，á是無bih-teh，用物tìm伊；Siat-sú lâng bô hia̍p-hūn, hut-jiân chhia i, á-sī bô bih-teh, ēng mi̍h tìm i;

23á是無看見ê時，用能phah死人ê石頭tìm-tio̍h伊，來致到死，kap伊本無冤仇，也無意思beh害伊，á-sī bô khòaⁿ-kìⁿ ê sî, ēng ōe-phah-sí lâng ê chio̍h-thâu tìm-tio̍h i, lâi tì-kàu sí, kap i pún bô oan-siû, iā bô ì-sù beh hāi i,

24會眾就tio̍h照hiah-ê法度，tī phah死人ê kap報人命ê ê中間審判伊。hōe-chiòng chiū tio̍h chiàu hiah ê hoat-tō͘, tī phah-sí-lâng-ê kap pò jîn-bēng-ê ê tiong-kan sím-phòaⁿ i.

25會眾tio̍h救hit-ê錯誤thâi人ê脫離報報人命ê ê手；會眾也tio̍h hō͘伊倒tńg 伊所走入逃閃ê城，伊tio̍h tiàm tī hit內面，thèng候到抹聖油ê祭司頭死。Hōe-chiòng tio̍h kiù hit ê chhò-gō͘ thâi-lâng-ê thoat-lī pò jîn-bēng-ê ê chhiú; hōe-chiòng iā tio̍h hō͘ i tò-tńg i só͘ cháu-ji̍p tô-siám ê siâⁿ, i tio̍h tiàm tī hí lāi-bīn, thèng-hāu kàu boah sèng-iû ê chè-si-thâu sí.

26總是錯誤thâi死人ê，無論怎樣，若出去伊所走入逃閃ê城ê境外，Chóng-sī chhò-gō͘ thâi-sí-lâng-ê, bô-lūn cháiⁿ-iūⁿ, nā chhut-khì i só͘ cháu-ji̍p tô-siám ê siâⁿ ê kéng-gōa,

27報人命ê若tī逃閃ê城ê境外tú-tio̍h伊，來thâi死hit-ê凶犯，報人命ê就無thâi死人ê罪。pò-jîn-bēng-ê nā tī tô-siám ê siâⁿ ê kéng-gōa tú-tio̍h i, lâi thâi-sí hit ê hiong-hoān, pò-jîn-bēng-ê chiū bô thâi-sí lâng ê chōe.

28因為伊應該tio̍h tiàm伊逃閃ê城，thèng候祭司頭死；祭司頭死了後，錯誤thâi人ê chiah thang tò去伊產業ê地。In-ūi i eng-kai tio̍h tiàm i tô-siám ê siâⁿ, thèng-hāu chè-si-thâu sí; chè-si-thâu sí liáu-āu, chhò-gō͘ thâi-lâng-ê chiah thang tò-khì i sán-gia̍p ê tōe.

29這tī lín一切khiā起ê所在beh做lín ta̍k世代ê法律。Che tī lín it-chhè khiā-khí ê só͘-chāi beh chòe lín ta̍k sè-tāi ê hoat-lu̍t.

30見若thâi死人，hit-ê凶犯tio̍h照kúi-nā ê干證ê人ê話來hō͘伊死；若只有一人做干證，就m̄-thang hō͘人死。Kìⁿ-nā thâi-sí lâng, hit ê hiong-hoān tio̍h chiàu kúi-nā ê kan-chèng ê lâng ê ōe lâi hō͘ i sí; nā chí-ū chi̍t-lâng chòe kan-chèng, chiū m̄-thang hō͘ lâng sí.

31Thâi死人犯tio̍h死罪ê，lín m̄-thang收贖回性命ê價錢；的確tio̍h hō͘伊死。Thâi-sí-lâng hoān-tio̍h sí-chōe ê, lín m̄-thang siu sio̍k-hôe sìⁿ-miā ê kè-chîⁿ; tek-khak tio̍h hō͘ i sí.

32Hit-ê走到逃閃ê城ê人，lín m̄-thang kā伊the̍h贖回ê價，hō͘伊tī祭司bē死ê事先，koh來tiàm本地。Hit ê cháu kàu tô-siám ê siâⁿ ê lâng, lín m̄-thang kā i the̍h sio̍k-hôe ê kè, hō͘ i tī chè-si bē sí ê tāi-seng, koh lâi tiàm pún-tōe.

33Án-ni，lín就無phah lâ-sâm lín所khiā起ê地；因為血是phah lâ-sâm地ê；若有血流tī地裡，設使m̄是流hit-ê thâi人ê ê血，hit-ê地就bōe得tio̍h清氣。Án-ni, lín chiū bô phah lâ-sâm lín só͘ khiā-khí ê tōe; in-ūi huih sī phah lâ-sâm tōe ê; nā ū huih lâu tī tōe-ni̍h, siat-sú m̄-sī lâu hit ê thâi-lâng-ê ê huih, hit ê tōe chiū bōe tit-tio̍h chheng-khì.

34Lín m̄-thang phah lâ-sâm lín所tiàm ê地，就是我tiàm tī hit中間ê地；因為我耶和華tiàm tī以色列人ê中間。Lín m̄-thang phah lâ-sâm lín só͘ tiàm ê tōe, chiū-sī Góa tiàm tī hit tiong-kan ê tōe; in-ūi Góa Iâ-hô-hoa tiàm tī Í-sek-lia̍t lâng ê tiong-kan.

1屬約瑟ê kiáⁿ孫chiah-ê家，Má-ná-se ê孫，Má-kiat ê kiáⁿ Ki-lia̍t ê kiáⁿ孫hiah-ê族長來到摩西kap以色列人chiah-ê族長chiah-ê首領ê面前，講：Sio̍k Iok-sek ê kiáⁿ-sun chiah ê ke, Má-ná-se ê sun, Má-kiat ê kiáⁿ Ki-lia̍t ê kiáⁿ-sun hiah ê cho̍k-tiúⁿ lâi kàu Mô͘-se kap Í-sek-lia̍t lâng chiah ê cho̍k-tiúⁿ chiah ê siú-léng ê bīn-chêng, kóng,

2耶和華bat命令我ê主liam-khau分地hō͘以色列人做業，我ê主也受tio̍h耶和華ê命令，將阮ê兄弟Se-lô-hui-hap ê產業分hō͘伊hiah-ê cha-bó͘-kiáⁿ。Iâ-hô-hoa bat bēng-lēng góa ê chú liam-khau pun-tōe hō͘ Í-sek-lia̍t lâng chòe-gia̍p, góa ê chú iā siū-tio̍h Iâ-hô-hoa ê bēng-lēng, chiong goán ê hiaⁿ-tī Se-lô-hui-hap ê sán-gia̍p pun hō͘ i hiah ê cha-bó͘-kiáⁿ.

3In若嫁以色列別支派ê人，in ê產業就tùi阮祖公所留ê產業撥過去，加添tī in所beh屬ê支派ê產業；án-ni就tùi阮liam-khau所得tio̍h ê業撥過去。In nā kè Í-sek-lia̍t pa̍t chi-phài ê lâng, in ê sán-gia̍p chiū tùi goán chó͘-kong só͘ lâu ê sán-gia̍p poah-kè-khì, ke-thiⁿ tī in só͘ beh sio̍k ê chi-phài ê sán-gia̍p; án-ni chiū tùi goán liam-khau só͘ tit-tio̍h ê gia̍p poah-kè-khì.

4到以色列人ê禧年，in ê產業就加添tī in所beh屬ê支派ê產業；án-ni，in ê產業就是tùi阮祖公支派ê產業撥過去。Kàu Í-sek-lia̍t lâng ê hi-liân, in ê sán-gia̍p chiū ke-thiⁿ tī in só͘ beh sio̍k ê chi-phài ê sán-gia̍p; án-ni, in ê sán-gia̍p chiū-sī tùi goán chó͘-kong chi-phài ê sán-gia̍p poah-kè-khì.

5摩西照耶和華ê話，命令以色列人講：約瑟kiáⁿ孫ê支派所講ê是tio̍h。Mô͘-se chiàu Iâ-hô-hoa ê ōe, bēng-lēng Í-sek-lia̍t lâng kóng, Iok-sek kiáⁿ-sun ê chi-phài só͘-kóng-ê sī tio̍h.

6論到Se-lô-hui-hap chiah-ê cha-bó͘-kiáⁿ，耶和華án-ni命令，講：In thang嫁in合意ê人，獨獨tio̍h嫁hō͘ in老父同宗支派ê人。Lūn-kàu Se-lô-hui-hap chiah ê cha-bó͘-kiáⁿ, Iâ-hô-hoa án-ni bēng-lēng, kóng, In thang kè in kah-ì ê lâng, to̍k-to̍k tio̍h kè hō͘ in lāu-pē tâng-chong chi-phài ê lâng.

7Án-ni，以色列人ê產業就無tùi chit支派歸到hit支派；因為以色列人tio̍h ta̍k-ê執守in祖公支派ê產業。Án-ni, Í-sek-lia̍t lâng ê sán-gia̍p chiū bô tùi chit chi-phài kui kàu hit chi-phài; in-ūi Í-sek-lia̍t lâng tio̍h ta̍k-ê chip-siú in chó͘-kong chi-phài ê sán-gia̍p.

8見若tī以色列支派中得tio̍h產業ê cha-bó͘-kiáⁿ，tio̍h做伊ê老父同宗支派ê人ê bó͘，thang hō͘以色列人ê支派ta̍k-ê執守in ê祖公ê產業。Kìⁿ-nā tī Í-sek-lia̍t chi-phài tiong tit-tio̍h sán-gia̍p ê cha-bó͘-kiáⁿ, tio̍h chòe i ê lāu-pē tâng-chong chi-phài ê lâng ê bó͘, thang hō͘ Í-sek-lia̍t lâng ê chi-phài ta̍k-ê chip-siú in ê chó͘-kong ê sán-gia̍p.

9Án-ni，in ê產業就無tùi chit支派歸到hit支派；因為以色列人ê支派，beh ta̍k-ê執守in ê產業。Án-ni, in ê sán-gia̍p chiū bô tùi chit chi-phài kui kàu hit chi-phài; in-ūi Í-sek-lia̍t lâng ê chi-phài, beh ta̍k-ê chip-siú in ê sán-gia̍p.

10耶和華án-ni吩咐摩西，Se-lô-hui-hap ê cha-bó͘-kiáⁿ就án-ni行。Iâ-hô-hoa án-ni hoan-hù Mô͘-se, Se-lô-hui-hap ê cha-bó͘-kiáⁿ chiū án-ni kiâⁿ.

11因為Se-lô-hui-hap ê cha-bó͘-kiáⁿ、Má-la̍h、Tek-sat、Hat-la̍h、Bi̍t-ka、挪亞，lóng 嫁in ê叔伯ê kiáⁿ。In-ūi Se-lô-hui-hap ê cha-bó͘-kiáⁿ, Má-la̍h, Tek-sat, Hat-la̍h, Bi̍t-ka, Ná-a, lóng kè in ê chek-peh ê kiáⁿ.

12In嫁tī約瑟ê kiáⁿ，Má-ná-se kiáⁿ孫hiah-ê家；就in ê產業猶原留tī in老父ê家ê支派。In kè tī Iok-sek ê kiáⁿ, Má-ná-se kiáⁿ-sun hiah ê ke; chiū in ê sán-gia̍p iû-goân lâu tī in lāu-pē ê ke ê chi-phài.

13Chiah-ê是耶和華tī Mô͘-ap平洋，約旦河邊，耶利哥對面，託摩西所吩咐以色列人ê命令、法度。Chiah-ê sī Iâ-hô-hoa tī Mô͘-ap pîⁿ-iûⁿ, Iok-tàn hô-piⁿ, Iâ-lī-ko tùi-bīn, thok Mô͘-se só͘ hoan-hù Í-sek-lia̍t lâng ê bēng-lēng, hoat-tō͘.

1摩西tī約旦外，tī曠野Só͘-hut對面ê A-la̍h-pa，就是tī Pa-lân、Tô-hut、拉班、Hap-sé-lio̍k、Tí-sat-hap ê中間，對以色列ê眾人所講ê話，記tī下底。Mô͘-se tī Iok-tàn gōa, tī khòng-iá Só͘-hut tùi-bīn ê A-la̍h-pa, chiū-sī tī Pa-lân, Tô-hut, La̍h-pan, Hap-sé-lio̍k, Tí-sat-hap ê tiong-kan, tùi Í-sek-lia̍t ê chèng-lâng só͘ kóng ê ōe, kì tī ē-tóe.

2Tùi Hô-lia̍t經過Se-jíⁿ山ê路到Ka-te-su Pa-nî-a，有十一日ê路站。Tùi Hô-lia̍t keng-kè Se-jíⁿ soaⁿ ê lō͘ kàu Ka-te-su Pa-nî-a, ū cha̍p-it ji̍t ê lō͘-chām.

3Tī第四十年，十一月初一日，摩西照耶和華一切所命令伊ê，lóng kā以色列人講。Tī tē sì-cha̍p nî, cha̍p-it ge̍h chhoe-it ji̍t, Mô͘-se chiàu Iâ-hô-hoa it-chhè só͘ bēng-lēng i ê, lóng kā Í-sek-lia̍t lâng kóng.

4Hit時伊已經phah贏khiā起tī Hi-si̍t-pún ê A-mô͘-lī王Se-hông，kap khiā起tī Í-tek-lâi，A-su-tha-lio̍k ê Pa-san王Go̍k；Hit-sî i í-keng phah-iâⁿ khiā-khí tī Hi-si̍t-pún ê A-mô͘-lī ông Se-hông, kap khiā-khí tī Í-tek-lâi, A-su-tha-lio̍k ê Pa-san ông Go̍k;

5摩西tī約旦外ê Mô͘-ap地，起頭傳chit-ê律法講：Mô͘-se tī Iok-tàn gōa ê Mô͘-ap tōe, khí-thâu thoân chit ê lu̍t-hoat kóng,

6耶和華咱ê上帝tī Hô-lia̍t吩咐咱講：Lín khiā起chit-ê山已經久lah；Iâ-hô-hoa lán ê Siōng-tè tī Hô-lia̍t hoan-hù lán kóng, Lín khiā-khí chit ê soaⁿ í-keng kú lah;

7tio̍h起身oa̍t-tńg到A-mô͘-lī人ê山地，kap近óa hia ê ta̍k所在，tī A-la̍h-pa，tī山地，tī平洋，tī南方，沿海一帶，迦南人ê地，kap黎巴嫩，koh到大河，就是Pek-la̍h河。tio̍h khí-sin oa̍t-tńg kàu A-mô͘-lī lâng ê soaⁿ-tōe, kap kūn-óa hia ê ta̍k só͘-chāi, tī A-la̍h-pa, tī soaⁿ-tōe, tī pîⁿ-iûⁿ, tī lâm-hng, iân-hái it-tài, Ka-lâm lâng ê tōe, kap Lī-pa-lùn, koh kàu tōa-hô, chiū-sī Pek-la̍h hô.

8Taⁿ我用chit-ê地排列tī lín ê面前，lín tio̍h入去得tio̍h伊來做業，就是耶和華對lín ê祖，亞伯拉罕、以撒、雅各，chiù-chōa beh賞賜in kap in ê後裔ê地。Taⁿ Góa ēng chit ê tōe pâi-lia̍t tī lín ê bīn-chêng, lín tio̍h ji̍p-khì tit-tio̍h i lâi chòe gia̍p, chiū-sī Iâ-hô-hoa tùi lín ê chó͘, A-pek-la̍h-hán, Í-sat, Ngá-kok, chiù-chōa beh siúⁿ-sù in kap in ê hō͘-è ê tōe.

9Hit時我kā lín講：Lín ê責成，我家己一個擔當bōe起。Hit-sî góa kā lín kóng, Lín ê chek-sêng, góa ka-kī chi̍t-ê tam-tng bōe khí.

10耶和華lín ê上帝hō͘ lín加添chōe-chōe，看ah，lín今á日親像天頂ê星hiah-chōe。Iâ-hô-hoa lín ê Siōng-tè hō͘ lín ke-thiⁿ chōe-chōe, khòaⁿ ah, lín kin-á-ji̍t chhin-chhiūⁿ thiⁿ-téng ê chhiⁿ hiah-chōe.

11願耶和華lín列祖ê上帝，hō͘ lín比現今加千倍chōe，也照伊所應允lín ê賜福lín。Goān Iâ-hô-hoa lín lia̍t-chó͘ ê Siōng-tè, hō͘ lín pí hiān-kim ke chheng-pē chōe, iā chiàu I só͘ èng-ún lín-ê sù-hok lín.

12Lín ê重擔，lín ê責成，kap lín ê冤家，我家己一個thái-thó擔當能起ah？Lín ê tāng-tàⁿ, lín ê chek-sêng, kap lín ê oan-ke, góa ka-kī chi̍t-ê thái-thó tam-tng ōe khí ah?

13Lín tio̍h照ta̍k支派揀有智慧，有見識，有名望ê人，我設立in做lín ê首領。Lín tio̍h chiàu ta̍k chi-phài kéng ū tì-hūi, ū kiàn-sek, ū bêng-bōng ê lâng, góa siat-li̍p in chòe lín ê siú-léng.

14Lín應我講：你所講ê是好，thang行伊。Lín ìn góa kóng, Lí só͘-kóng-ê sī hó, thang kiâⁿ-i.

15我就將lín ta̍k支派ê首領，就是有智慧，有名望ê人，設立in做首領，就是千總、百總、五十夫長、十夫長，kap 有司，照lín ê支派，來管理lín。Góa chiū chiong lín ta̍k chi-phài ê siú-léng, chiū-sī ū tì-hūi, ū bêng-bōng ê lâng, siat-li̍p in chòe siú-léng, chiū-sī chhian-chóng, peh-chóng, ngó͘-si̍p-hu-tióng, si̍p-hu-tióng, kap iú-si, chiàu lín ê chi-phài, lâi koán-lí lín.

16當時我命令lín ê審判官講：Lín tī lín兄弟中審判，或是人kap伊ê兄弟，á是kap in中間ê出外人，有相告，tio̍h照公道判斷；Tng-sî góa bēng-lēng lín ê sím-phòaⁿ-koaⁿ kóng, Lín tī lín hiaⁿ-tī tiong sím-phòaⁿ, he̍k-sī lâng kap i ê hiaⁿ-tī, á-sī kap in tiong-kan ê chhut-gōa lâng, ū saⁿ-kò, tio̍h chiàu kong-tō phòaⁿ-toàn;

17審判ê時，m̄-thang看人ê外貌，弱kap強平平tio̍h聽伊；m̄-thang驚畏人；因為審判屬tī上帝；lín oh解決ê事，hō͘伊到我chia，我就判斷伊。sím-phòaⁿ ê sî, m̄-thang khòaⁿ lâng ê gōa-māu, jio̍k kap kiông pîⁿ-pîⁿ tio̍h thiaⁿ i; m̄-thang kiaⁿ-ùi lâng; in-ūi sím-phòaⁿ sio̍k tī Siōng-tè; lín oh kái-koat ê sū, hō͘ i kàu góa chia, góa chiū phòaⁿ-toàn i.

18Hit時我將lín所應該行ê事lóng命令lín。Hit-sî góa chiong lín só͘ eng-kai kiâⁿ ê sū lóng bēng-lēng lín.

19咱照耶和華咱ê上帝所命令咱ê，tùi Hô-lia̍t起身，經過lín所看見hit-ê大koh thang驚ê曠野，路tùi A-mô͘-lī人ê山地；咱就到Ka-te-su Pa-nî-a。Lán chiàu Iâ-hô-hoa lán ê Siōng-tè só͘ bēng-lēng lán ê, tùi Hô-lia̍t khí-sin, keng-kè lín só͘ khòaⁿ-kìⁿ hit ê tōa koh thang kiaⁿ ê khòng-iá, lō͘ tùi A-mô͘-lī lâng ê soaⁿ-tōe; lán chiū kàu Ka-te-su Pa-nî-a.

20我對lín講，Lín已經到耶和華咱ê上帝賞賜咱A-mô͘-lī人ê山地。Góa tùi lín kóng, Lín í-keng kàu Iâ-hô-hoa lán ê Siōng-tè siúⁿ-sù lán A-mô͘-lī lâng ê soaⁿ-tōe.

21看ah，耶和華lín ê上帝，已經將hit-ê地排列tī你ê面前；你tio̍h照耶和華你ê列祖ê上帝所對你講ê，上去來得tio̍h伊做業；莫得驚，莫得忍。Khòaⁿ ah, Iâ-hô-hoa lín ê Siōng-tè, í-keng chiong hit ê tōe pâi-lia̍t tī lí ê bīn-chêng; lí tio̍h chiàu Iâ-hô-hoa lí ê lia̍t-chó͘ ê Siōng-tè só͘ tùi lí kóng ê, chiūⁿ-khì lâi tit-tio̍h i chòe-gia̍p; bo̍h-tit kiaⁿ, bo̍h-tit lún.

22Hit時lín lóng就近我來講：咱tio̍h差人事先去，kā咱偷看hit-ê地，回覆咱，看咱tio̍h tùi甚麼路上去，甚麼城入去。Hit-sî lín lóng chiū-kūn góa lâi kóng, Lán tio̍h chhe lâng tāi-seng khì, kā lán thau-khòaⁿ hit ê tōe, hê-hok lán, khòaⁿ lán tio̍h tùi sím-mi̍h lō͘ chiūⁿ-khì, sím-mi̍h siâⁿ ji̍p-khì.

23這話我看做好；我就tùi lín中間揀十二人，每支派一人；Che ōe góa khòaⁿ chòe-hó; góa chiū tùi lín tiong-kan kéng cha̍p-jī lâng, múi chi-phài chi̍t lâng;

24in就oa̍t-tńg身上山地去，到Í-si̍t-kok ê山谷，偷看伊。in chiū oa̍t-tńg-sin chiūⁿ soaⁿ-tōe khì, kàu Í-si̍t-kok ê soaⁿ-kok, thau-khòaⁿ i.

25In手裡the̍h hit所在ê果子，帶來到咱hia，回覆咱講：耶和華咱ê上帝所賞賜咱ê，是好ê土地。In chhiú-ni̍h the̍h hit só͘-chāi ê ké-chí, tòa lâi kàu lán hia, hê-hok lán kóng, Iâ-hô-hoa lán ê Siōng-tè só͘ siúⁿ-sù lán-ê, sī hó ê thó͘-tōe.

26總是lín m̄肯上去，背耶和華lín ê上帝ê命令；Chóng-sī lín m̄-khéng chiūⁿ-khì, pōe Iâ-hô-hoa lín ê Siōng-tè ê bēng-lēng;

27koh tī lín ê布棚內哀怨講：因為耶和華怨恨咱，所以chhōa咱出埃及地，beh將咱交tī A-mô͘-lī人ê手，剿滅咱。koh tī lín ê pò͘-pîⁿ-lāi ai-oàn kóng, In-ūi Iâ-hô-hoa oàn-hūn lán, só͘-í chhōa lán chhut Ai-ki̍p tōe, beh chiong lán kau tī A-mô͘-lī lâng ê chhiú, châu-bia̍t lán.

28咱beh上去toh落ah？咱ê兄弟hō͘咱失志，講：Hia ê百姓比咱khah大khah lò，城闊大koh堅固，高到抵天；koh阮tī-hia看見A-la̍p族ê人。Lán beh chiūⁿ-khì toh-lo̍h ah? Lán ê hiaⁿ-tī hō͘ lán sit-chì, kóng, Hia ê peh-sìⁿ pí lán khah tōa khah lò, siâⁿ khoah-tōa koh kian-kò͘, koâiⁿ kàu tú-thiⁿ; koh goán tī-hia khòaⁿ-kìⁿ A-la̍p cho̍k ê lâng.

29我就對lín講，莫得忍，莫得驚in。Góa chiū tùi lín kóng, Bo̍h-tit lún, bo̍h-tit kiaⁿ in.

30行tī lín ê面前ê耶和華lín ê上帝，beh替lín交戰，親像伊tī埃及為tio̍h lín來行tī lín目睭前一切ê事；Kiâⁿ tī lín ê bīn-chêng ê Iâ-hô-hoa lín ê Siōng-tè, beh thòe lín kau-chiàn, chhin-chhiūⁿ I tī Ai-ki̍p ūi-tio̍h lín lâi kiâⁿ tī lín ba̍k-chiu-chêng it-chhè ê sū;

31koh親像伊行tī曠野，tī-hia你看見耶和華你ê上帝tī你一切所行ê路有怎樣iāng你，親像人iāng伊ê kiáⁿ一樣，到lín到tī chit-ê所在。koh chhin-chhiūⁿ I kiâⁿ tī khòng-iá, tī-hia lí khòaⁿ-kìⁿ Iâ-hô-hoa lí ê Siōng-tè tī lí it-chhè só͘ kiâⁿ ê lō͘ ū cháiⁿ-iūⁿ iāng lí, chhin-chhiūⁿ lâng iāng i ê kiáⁿ chi̍t-iūⁿ, kàu lín kàu tī chit ê só͘-chāi.

32總是lín tī chit-ê事m̄信耶和華lín ê上帝；Chóng-sī lín tī chit ê sū m̄-sìn Iâ-hô-hoa lín ê Siōng-tè;

33伊tī路裡，tī lín ê頭前teh行，kā lín chhē安營ê所在；暝時用火，日時用雲，指示lín所tio̍h行ê路。I tī lō͘-ni̍h, tī lín ê thâu-chêng teh kiâⁿ, kā lín chhē an-iâⁿ ê só͘-chāi; mî-sî ēng hé, ji̍t-sî ēng hûn, chí-sī lín só͘ tio̍h kiâⁿ ê lō͘.

34耶和華聽見chiah-ê話ê聲，就受氣，chiù-chōa講：Iâ-hô-hoa thiaⁿ-kìⁿ chiah ê ōe ê siaⁿ, chiū siū-khì, chiù-chōa kóng,

35Chit-ê pháiⁿ世代ê人決斷無一個能看見我chiù-chōa賞賜lín列祖ê好地；Chit ê pháiⁿ sè-tāi ê lâng koat-toàn bô chi̍t-ê ōe khòaⁿ-kìⁿ Góa chiù-chōa siúⁿ-sù lín lia̍t-chó͘ ê hó-tōe;

36只有Iâ-hu-年 ê kiáⁿ迦勒beh得tio̍h看見；koh我beh用伊所踏tio̍h ê地賞賜伊，kap伊ê kiáⁿ孫；因為伊專心tè耶和華。chí-ū Iâ-hu-nî ê kiáⁿ Ka-le̍k beh tit-tio̍h khòaⁿ-kìⁿ; koh Góa beh ēng i só͘ ta̍h-tio̍h ê tōe siúⁿ-sù i, kap i ê kiáⁿ-sun; in-ūi i choan-sim tè Iâ-hô-hoa.

37耶和華為tio̍h lín ê緣故也受氣我，講：你也bōe得tio̍h入hit-ê所在；Iâ-hô-hoa ūi-tio̍h lín ê iân-kò͘ iā siū-khì góa, kóng, Lí iā bōe tit-tio̍h ji̍p hit ê só͘-chāi;

38跟隨你ê，Lùn ê kiáⁿ約書亞，伊beh入去hia；你tio̍h勇壯伊ê心志，因為伊beh hō͘以色列人承接hit-ê所在；kun-sûi lí ê, Lùn ê kiáⁿ Iok-su-a, i beh ji̍p-khì hia; lí tio̍h ióng-chòng i ê sim-chì, in-ūi i beh hō͘ Í-sek-lia̍t lâng sêng-chiap hit ê só͘-chāi;

39koh lín ê gín-ná，就是lín所講beh受掠ê，kap今á日lín hiah-ê bōe曉好pháiⁿ ê kiáⁿ兒，beh入去hia；我beh將hit所在hō͘ in，in beh得tio̍h做業；koh lín ê gín-ná, chiū-sī lín só͘ kóng beh siū-lia̍h-ê, kap kin-á-ji̍t lín hiah-ê bōe hiáu hó-pháiⁿ ê kiáⁿ-jî, beh ji̍p-khì hia; Góa beh chiong hit só͘-chāi hō͘ in, in beh tit-tio̍h chòe-gia̍p;

40論到lín，lín tio̍h oa̍t倒tńg起身，tùi紅海ê路去曠野。lūn-kàu lín, lín tio̍h oa̍t-tò-tńg khí-sin, tùi Âng-hái ê lō͘ khì khòng-iá.

41Hit時lín應我講：阮得罪耶和華；taⁿ阮beh照耶和華阮ê上帝一切所命令ê，上去交戰。Tùi hit-tia̍p，lín ta̍k人帶軍器，隨便上去山地。Hit-sî lín ìn góa kóng, Goán tek-chōe Iâ-hô-hoa; taⁿ goán beh chiàu Iâ-hô-hoa goán ê Siōng-tè it-chhè só͘ bēng-lēng ê, chiūⁿ-khì kau-chiàn. Tùi hit-tia̍p lín ta̍k-lâng tòa kun-khì, sûi-piān chiūⁿ-khì soaⁿ-tōe.

42耶和華kā我講：你tio̍h kā in講：M̄-thang上去，也m̄-thang交戰；因為我無tī lín中間，驚了lín thâi輸對敵。Iâ-hô-hoa kā góa kóng, Lí tio̍h kā in kóng, M̄-thang chiūⁿ-khì, iā m̄-thang kau-chiàn; in-ūi Góa bô tī lín tiong-kan, kiaⁿ-liáu lín thâi-su tùi-te̍k.

43我就kā lín講；總是lín m̄聽thàn，悖逆耶和華ê命令，自專上去山地。Góa chiū kā lín kóng; chóng-sī lín m̄ thiaⁿ-thàn, pōe-ge̍k Iâ-hô-hoa ê bēng-lēng, chū-choan chiūⁿ-khì soaⁿ-tōe.

44Tiàm tī山裡ê A-mô͘-lī人就出來攻擊lín，親像蜂追趕lín一般，tī Se-jíⁿ thâi贏lín，直到Hô-jíⁿ-má。Tiàm tī soaⁿ-ni̍h ê A-mô͘-lī lâng chiū chhut-lâi kong-kek lín, chhin-chhiūⁿ phang tui-kóaⁿ lín chi̍t-poaⁿ, tī Se-jíⁿ thâi-iâⁿ lín, ti̍t-kàu Hô-jíⁿ-má.

45Lín就倒tńg來，tī耶和華ê面前啼哭；總是耶和華m̄聽lín ê聲，也m̄ àⁿ耳孔ǹg lín。Lín chiū tò-tńg lâi, tī Iâ-hô-hoa ê bīn-chêng thî-khàu; chóng-sī Iâ-hô-hoa m̄-thiaⁿ lín ê siaⁿ, iā m̄ àⁿ hī-khang ǹg lín.

46Lín就tiàm tī Ka-te-su chōe-chōe日，照lín tiàm tī-hia ê日。Lín chiū tiàm tī Ka-te-su chōe-chōe ji̍t, chiàu lín tiàm tī-hia ê ji̍t.