1耶和華tī西奈山，對摩西講ê日，亞倫kap摩西ê世系親像下底。Iâ-hô-hoa tī Se-nái soaⁿ, tùi Mô͘-se kóng ê ji̍t, A-lûn kap Mô͘-se ê sè-hē chhin-chhiūⁿ ē-tóe.

2亞倫ê kiáⁿ ê名是chiah-ê；大kiáⁿ名叫Ná-tap，koh有A-PÍ-hō͘，Í-lī-a-sat，Í-tha-má。A-lûn ê kiáⁿ ê miâ sī chiah-ê; tōa-kiáⁿ miâ-kiò Ná-tap, koh ū A-pí-hō͘, Í-lī-a-sat, Í-tha-má.

3這是亞倫ê kiáⁿ ê名，lóng是受抹油做祭司ê；bat kā in行設立ê禮，來擔當祭司ê職份。Che sī A-lûn ê kiáⁿ ê miâ, lóng sī siū boah-iû chòe chè-si ê; bat kā in kiâⁿ siat-li̍p ê lé, lâi tam-tng chè-si ê chit-hūn.

4Ná-tap A-PÍ-hō͘ tī西奈ê曠野，tī耶和華ê面前，獻別號火ê時，就死tī耶和華ê面前；in也無kiáⁿ兒。Í-lī-a-sat Í-tha-má tī in老父亞倫ê面前，擔當祭司ê職份。Ná-tap A-pí-hō͘ tī Se-nái ê khòng-iá, tī Iâ-hô-hoa ê bīn-chêng, hiàn pa̍t-hō hé ê sî, chiū sí tī Iâ-hô-hoa ê bīn-chêng; in iā bô kiáⁿ-jî. Í-lī-a-sat Í-tha-má tī in lāu-pē A-lûn ê bīn-chêng, tam-tng chè-si ê chit-hūn.

5耶和華吩咐摩西講：Iâ-hô-hoa hoan-hù Mô͘-se kóng,

6你hō͘利未ê支派近前來，khiā tī祭司亞倫ê面前，thang服事伊。Lí hō͘ Lī-bī ê chi-phài kūn-chêng lâi, khiā tī chè-si A-lûn ê bīn-chêng, thang ho̍k-sāi i.

7In tio̍h守所吩咐亞倫ê，也tio̍h tī會幕前守所吩咐會眾ê，來辨理會幕ê事。In tio̍h siú só͘ hoan-hù A-lûn ê, iā tio̍h tī hōe-bō͘-chêng siú só͘ hoan-hù hōe-chiòng-ê, lâi pān-lí hōe-bō͘ ê sū.

8In tio̍h顧守會幕一切ê器具；也tio̍h守所吩咐以色列人ê，來辨理會幕ê事。In tio̍h kò͘-siú hōe-bō͘ it-chhè ê khì-kū; iā tio̍h siú só͘ hoan-hù Í-sek-lia̍t lâng ê, lâi pān-lí hōe-bō͘ ê sū.

9你tio̍h將利未人hō͘亞倫kap伊hiah-ê kiáⁿ；in是tùi以色列人ê中間揀出來完全hō͘伊ê。Lí tio̍h chiong Lī-bī lâng hō͘ A-lûn kap i hiah ê kiáⁿ; in sī tùi Í-sek-lia̍t lâng ê tiong-kan kéng-chhut-lâi oân-choân hō͘ i ê.

10你tio̍h分派亞倫kap伊hiah-ê kiáⁿ，in也tio̍h守in祭司ê職任；近óa來ê外人，的確hō͘伊死。Lí tio̍h hun-phài A-lûn kap i hiah ê kiáⁿ, in iā tio̍h siú in chè-si ê chit-jīm; kūn-óa-lâi ê gōa-lâng, tek-khak hō͘ i sí.

11耶和華吩咐摩西講：Iâ-hô-hoa hoan-hù Mô͘-se kóng,

12看ah，我本身tùi以色列人ê中間取利未人，替以色列人一切頭胎ê大kiáⁿ；利未人beh做我ê。Khòaⁿ ah, Góa pún-sin tùi Í-sek-lia̍t lâng ê tiong-kan chhú Lī-bī lâng, thòe Í-sek-lia̍t lâng it-chhè thâu-thai ê tōa-kiáⁿ; Lī-bī lâng beh chòe Góa-ê.

13因為一切ê大kiáⁿ lóng是我ê；我tī埃及地phah死一切ê大kiáⁿ hit日，就將以色列中一切ê大kiáⁿ，人kap cheng-siⁿ，lóng分別in做聖，歸tī我；in beh做我ê；我是耶和華。In-ūi it-chhè ê tōa-kiáⁿ lóng sī Góa-ê; Góa tī Ai-ki̍p tōe phah-sí it-chhè ê tōa-kiáⁿ hit-ji̍t, chiū chiong Í-sek-lia̍t-tiong it-chhè ê tōa-kiáⁿ, lâng kap cheng-siⁿ, lóng hun-piat in chòe-sèng, kui tī Góa; in beh chòe Góa-ê; Góa sī Iâ-hô-hoa.

14耶和華tī西奈ê曠野吩咐摩西講：Iâ-hô-hoa tī Se-nái ê khòng-iá hoan-hù Mô͘-se kóng,

15你tio̍h照利未人ê宗族、家口，點算in；見若滿月以上ê ta-po͘ gín-ná，你lóng tio̍h點算。Lí tio̍h chiàu Lī-bī lâng ê chong-cho̍k, ke-kháu, tiám-sǹg in; kìⁿ-nā móa-ge̍h í-chiūⁿ ê ta-po͘ gín-ná, lí lóng tio̍h tiám-sǹg.

16摩西就照耶和華ê話來點算in，照伊所受ê命令。Mô͘-se chiū chiàu Iâ-hô-hoa ê ōe lâi tiám-sǹg in, chiàu i só͘ siū ê bēng-lēng.

17利未chiah-ê kiáⁿ ê名，就是Kek-sūn，Ko-hat，Bí-la̍h-lī。Lī-bī chiah ê kiáⁿ ê miâ, chiū-sī Kek-sūn, Ko-hat, Bí-la̍h-lī.

18Kek-sūn ê kiáⁿ，照in ê家，是Li̍p-nî，Sī-múi。Kek-sūn ê kiáⁿ, chiàu in ê ke, sī Li̍p-nî, Sī-múi.

19Ko-hat ê kiáⁿ，照in ê家，是Àm-lân，Í-su-hap，Hi-pek-lûn，O͘-siat。Ko-hat ê kiáⁿ, chiàu in ê ke, sī Àm-lân, Í-su-hap, Hi-pek-lûn, O͘-siat.

20Bí-la̍h-lī ê kiáⁿ，照in ê家，是Boa̍t-lī，Bó͘-sī。Chiah-ê照in ê宗族是利未人ê家口。Bí-la̍h-lī ê kiáⁿ, chiàu in ê ke, sī Boa̍t-lī, Bó͘-sī. Chiah-ê chiàu in ê chong-cho̍k sī Lī-bī lâng ê ke-kháu.

21屬Kek-sūn ê，有Li̍p-nî族ê家，Sī-múi族ê家；chiah-ê是Kek-sūn族ê家。Sio̍k Kek-sūn ê, ū Li̍p-nî cho̍k ê ke, Sī-múi cho̍k ê ke; chiah-ê sī Kek-sūn cho̍k ê ke.

22In計算ê，tùi滿月以上，照in hiah-ê ta-po͘ gín-ná ê數額，in所計算ê人，共有七千五百名。In kè-sǹg-ê, tùi móa-ge̍h í-chiūⁿ, chiàu in hiah ê ta-po͘ gín-ná ê siàu-gia̍h, in só͘ kè-sǹg ê lâng, kiōng ū chhit-chheng gō͘-pah miâ.

23Kek-sūn族hiah-ê家口，tio̍h紮營tī會幕後ê西勢。Kek-sūn cho̍k hiah ê ke-kháu, tio̍h chat-iâⁿ tī hōe-bō͘-āu ê sai-sì.

24La̍h-i-le̍k ê kiáⁿ Í-lī-ngá-sat做Kek-sūn人宗族ê首領。La̍h-i-le̍k ê kiáⁿ Í-lī-ngá-sat chòe Kek-sūn lâng chong-cho̍k ê siú-léng.

25Kek-sūn ê kiáⁿ孫，tī會幕中所tio̍h顧守ê，就是會幕，kap布棚，kap伊ê蓋，kap會幕ê門籬；Kek-sūn ê kiáⁿ-sun, tī hōe-bō͘-tiong só͘ tio̍h kò͘-siú-ê, chiū-sī hōe-bō͘, kap Pò͘-pîⁿ, kap i ê kòa, kap hōe-bō͘ ê mn̂g-lî;

26院ê布帷，kap院ê門籬，(院就是圍會幕kap壇ê) ，kap一切所用ê索。īⁿ ê pò͘-ûi, kap īⁿ ê mn̂g-lî, (īⁿ chiū-sī ûi hōe-bō͘ kap tôaⁿ-ê), kap it-chhè só͘ ēng ê soh.

27屬Ko-hat ê，有Àm-lân族ê家，Í-su-hap族ê家，Hi-pek-lûn族ê家，O͘-siat族ê家；chiah-ê是Ko-hat族ê家。Sio̍k Ko-hat ê, ū Àm-lân cho̍k ê ke, Í-su-hap cho̍k ê ke, Hi-pek-lûn cho̍k ê ke, O͘-siat cho̍k ê ke; chiah-ê sī Ko-hat cho̍k ê ke.

28照ta-po͘丁ê數額，tùi滿月以上，守聖所ê責成ê，共有八千六百名。Chiàu ta-po͘-teng ê siàu-gia̍h, tùi móa-ge̍h í-chiūⁿ, siú sèng-só͘ ê chek-sêng-ê, kiōng ū poeh-chheng la̍k-pah miâ.

29Ko-hat kiáⁿ孫hiah-ê家tio̍h紮營tī會幕邊ê南勢。Ko-hat kiáⁿ-sun hiah ê ke tio̍h chat-iâⁿ tī hōe-bō͘-piⁿ ê lâm-sì.

30O͘-siat ê kiáⁿ Í-lī-sat-hoán做Ko-hat宗族家口ê首領。O͘-siat ê kiáⁿ Í-lī-sat-hoán chòe Ko-hat chong-cho̍k ke-kháu ê siú-léng.

31In所tio̍h守ê是約櫃、桌、燈台，hiah-ê壇，kap聖所內in所用ê器具，以及門籬，kap一切做路用ê物。In só͘ tio̍h siú-ê sī iok-kūi, toh, teng-tâi, hiah ê tôaⁿ, kap sèng-só͘ lāi in só͘ ēng ê khì-kū, í-ki̍p mn̂g-lî, kap it-chhè chòe lō͘-ēng ê mi̍h.

32祭司亞倫ê kiáⁿ Í-lī-a-sat做利未人chiah-ê首領ê首領，tio̍h鑑察hiah-ê顧守聖所ê人。Chè-si A-lûn ê kiáⁿ Í-lī-a-sat chòe Lī-bī lâng chiah ê siú-léng ê siú-léng, tio̍h kàm-chhat hiah ê kò͘-siú sèng-só͘ ê lâng.

33屬Bí-la̍h-lī ê，有Boa̍t-lī族ê家，Bó͘-sī族ê家，chiah-ê是Bí-la̍h-lī hiah-ê家口。Sio̍k Bí-la̍h-lī ê, ū Boa̍t-lī cho̍k ê ke, Bó͘-sī cho̍k ê ke, chiah-ê sī Bí-la̍h-lī hiah ê ke-kháu.

34In計算ê，照in ta-po͘丁ê數額；tùi滿月以上ê，共有六千兩百名。In kè-sǹg ê, chiàu in ta-po͘-teng ê siàu-gia̍h; tùi móa-ge̍h í-chiūⁿ ê, kiōng ū la̍k-chheng nn̄g-pah miâ.

35A-PÍ-hāi ê kiáⁿ So͘-lia̍t做Bí-la̍h-lī宗族chiah-ê家ê首領；in tio̍h紮營tī會幕邊ê北勢。A-pí-hāi ê kiáⁿ So͘-lia̍t chòe Bí-la̍h-lī chong-cho̍k chiah ê ke ê siú-léng; in tio̍h chat-iâⁿ tī hōe-bō͘-piⁿ ê pak-sì.

36Bí-la̍h-lī ê kiáⁿ孫定tio̍h ê職份是守會幕ê板，伊ê栱，伊ê柱，伊ê座，kap一切ê器具，一切做路用ê物；Bí-la̍h-lī ê kiáⁿ-sun tiāⁿ-tio̍h ê chit-hūn sī siú hōe-bō͘ ê pán, i ê kông, i ê thiāu, i ê chō, kap it-chhè ê khì-kū, it-chhè chòe lō͘-ēng ê mi̍h;

37院四圍ê柱，伊ê座，伊所釘ê釘kap索。īⁿ sì-ûi ê thiāu, i ê chō, i só͘ tèng ê teng kap soh.

38Tī會幕前ê東勢，就是tī布棚前ǹg日出ê所在，紮營ê是摩西、亞倫，kap伊hiah-ê kiáⁿ；in守聖所ê責成，就是替以色列kiáⁿ孫ê責成；別人若近óa的確tio̍h hō͘伊死。Tī hōe-bō͘-chêng ê tang-sì, chiū-sī tī pò͘-pîⁿ-chêng ǹg ji̍t-chhut ê só͘-chāi, chat-iâⁿ-ê sī Mô͘-se A-lûn, kap i hiah ê kiáⁿ; in siú sèng-só͘ ê chek-sêng, chiū-sī thòe Í-sek-lia̍t kiáⁿ-sun ê chek-sêng; pa̍t-lâng nā kūn-óa tek-khak tio̍h hō͘ i sí.

39見若計算ê利未人，就是摩西、亞倫照耶和華ê命令所算ê，照in ê家，tùi滿月以上ê ta-po͘丁，共有兩萬兩千名。Kìⁿ-nā kè-sǹg ê Lī-bī lâng, chiū-sī Mô͘-se A-lûn chiàu Iâ-hô-hoa ê bēng-lēng só͘ sǹg-ê, chiàu in ê ke, tùi móa-ge̍h í-chiūⁿ ê ta-po͘-teng, kiōng ū nn̄g-bān nn̄g-chheng miâ.

40耶和華kā摩西講：你tio̍h tī以色列人ê中間點算tùi滿月以上見若頭胎ê ta-po͘丁，記in ê名額。Iâ-hô-hoa kā Mô͘-se kóng, Lí tio̍h tī Í-sek-lia̍t lâng ê tiong-kan tiám-sǹg tùi móa-ge̍h í-chiūⁿ kìⁿ-nā thâu-thai ê ta-po͘-teng, kì in ê miâ-gia̍h.

41我是耶和華，你tio̍h kā我取利未人，替以色列人所有ê頭chiūⁿ-kiáⁿ；也取利未人ê cheng-siⁿ，替以色列人所有頭水生ê cheng-siⁿ。Góa sī Iâ-hô-hoa, lí tio̍h kā Góa chhú Lī-bī lâng, thòe Í-sek-lia̍t lâng só͘ ū ê thâu-chiūⁿ-kiáⁿ; iā chhú Lī-bī lâng ê cheng-siⁿ, thòe Í-sek-lia̍t lâng só͘ ū thâu-chúi-siⁿ ê cheng-siⁿ.

42摩西就照耶和華所命令ê，算以色列人一切ê頭chiūⁿ-kiáⁿ。Mô͘-se chiū chiàu Iâ-hô-hoa só͘ bēng-lēng ê, sǹg Í-sek-lia̍t lâng it-chhè ê thâu-chiūⁿ-kiáⁿ.

43照人名ê數額，tùi滿月以上，見若頭chiūⁿ生ê ta-po͘丁計算ê，共有兩萬兩千兩百七十三名。Chiàu lâng-miâ ê siàu-gia̍h, tùi móa-ge̍h í-chiūⁿ, kìⁿ-nā thâu-chiūⁿ-siⁿ ê ta-po͘-teng kè-sǹg ê, kiōng ū nn̄g-bān nn̄g-chheng nn̄g-pah chhit-cha̍p-saⁿ miâ.

44耶和華吩咐摩西講：Iâ-hô-hoa hoan-hù Mô͘-se kóng,

45你tio̍h 取利未人替以色列人所有頭chiūⁿ生ê，也取利未人ê cheng-siⁿ替以色列ê cheng-siⁿ；就利未人beh屬我，我是耶和華。Lí tio̍h chhú Lī-bī lâng thòe Í-sek-lia̍t lâng só͘ ū thâu-chiūⁿ-siⁿ ê, iā chhú Lī-bī lâng ê cheng-siⁿ thòe Í-sek-lia̍t ê cheng-siⁿ; chiū Lī-bī lâng beh sio̍k Góa, Góa sī Iâ-hô-hoa.

46以色列人中頭chiūⁿ ê ta-po͘丁，比利未人khah-chōe兩百七十三個，你beh kā伊贖出來；Í-sek-lia̍t lâng tiong thâu-chiūⁿ ê ta-po͘-teng, pí Lī-bī lâng khah-chōe nn̄g-pah chhit-cha̍p-saⁿ ê, lí beh kā i sio̍k-chhut-lâi;

47就tio̍h照人丁，照聖所ê sià-khek-le̍k，ta̍k人取五 sià-khek-le̍k，(一sià-khek-le̍k是二十kùi-la̍h)chiū tio̍h chiàu jîn-teng, chiàu sèng-só͘ ê sià-khek-le̍k, ta̍k-lâng chhú gō͘ sià-khek-le̍k, (chi̍t sià-khek-le̍k sī jī-cha̍p kùi-la̍h)

48hiah-ê出額ê人所贖回ê銀，交代亞倫kap伊ê kiáⁿ。Hiah ê chhut-gia̍h ê lâng só͘ sio̍k-hôe ê gûn, kau-tài A-lûn kap i ê kiáⁿ.

49摩西就tùi hiah-ê受利未人所贖出額ê人，the̍h贖回ê銀。Mô͘-se chiū tùi hiah ê siū Lī-bī lâng só͘ sio̍k chhut-gia̍h ê lâng, the̍h sio̍k-hôe ê gûn.

50Tùi以色列人頭chiūⁿ生ê，所the̍h ê銀，照聖所ê sià-khek-le̍k，有一千三百六十五sià-khek-le̍k。Tùi Í-sek-lia̍t lâng thâu-chiūⁿ-siⁿ-ê, só͘ the̍h ê gûn, chiàu sèng-só͘ ê sià-khek-le̍k, ū chi̍t-chheng saⁿ-pah la̍k-cha̍p-gō͘ sià-khek-le̍k.

51摩西照耶和華ê話，將chiah-ê ê贖回ê銀，交代亞倫kap伊ê kiáⁿ，tú-tú親像耶和華所命令摩西ê。Mô͘-se chiàu Iâ-hô-hoa ê ōe, chiong chiah-ê ê sio̍k-hôe ê gûn, kau-tài A-lûn kap i ê kiáⁿ, tú-tú chhin-chhiūⁿ Iâ-hô-hoa só͘ bēng-lēng Mô͘-se ê.

1耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

2你tio̍h tùi利未人ê中間算Ko-hat kiáⁿ孫ê總額，照in ê家口、宗族。Lí tio̍h tùi Lī-bī lâng ê tiong-kan sǹg Ko-hat kiáⁿ-sun ê chóng-gia̍h, chiàu in ê ke-kháu, chong-cho̍k.

3Tùi三十歲以上，到五十歲，見若入來當職tī會幕內做工ê，lóng tio̍h算伊。Tùi saⁿ-cha̍p hè í-siōng, kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê, lóng tio̍h sǹg i.

4Ko-hat ê kiáⁿ孫tī會幕所做ê工，就是料理至聖ê物，記tī下底。Ko-hat ê kiáⁿ-sun tī hōe-bō͘ só͘ chòe ê kang, chiū-sī liāu-lí chì-sèng ê mi̍h, kì tī ē-tóe.

5營盤起身ê時，亞倫kap伊ê kiáⁿ tio̍h入去thǹg jia遮ê帳籬，用伊來遮蓋法櫃。Iâⁿ-pôaⁿ khí-sin ê sî, A-lûn kap i ê kiáⁿ tio̍h ji̍p-khì thǹg jia-cha̍h ê tiùⁿ-lî, ēng i lâi jia-khàm hoat-kūi.

6Koh用海狗皮蓋tī頂面，koh蓋專專藍色ê布；然後chiah穿伊ê扛3。Koh ēng hái-káu-phê khàm tī téng-bīn, koh khàm choan-choan lâm-sek ê pò͘; jiân-āu chiah chhng i ê kǹg.

7Koh用藍色ê布 chhu tī排列餅ê桌；將chiah-ê盤、匙、碗、灌奠ê杯，排tī hit頂面；tī-hia也tio̍h有常常排設ê餅。Koh ēng lâm-sek ê pò͘ chhu tī pâi-lia̍t piáⁿ ê toh; chiong chiah ê pôaⁿ, sî, óaⁿ, koàn-tiān ê poe, pâi tī hí téng-bīn; tī-hia iā tio̍h ū siông-siông pâi-siat ê piáⁿ.

8Tī hit頂面koh tio̍h罩朱紅色ê布，koh用海狗皮做蓋來蓋，chiah穿伊ê槓。Tī hí téng-bīn koh tio̍h tà chu-âng-sek ê pò͘, koh ēng hái-káu-phê chòe kòa lâi khàm, chiah chhng i ê kǹg.

9In tio̍h the̍h藍色布來蓋照光ê燈台，kap伊ê盞，伊ê剪，伊ê盤，kap一切做伊ê路用貯油 ê器具。In tio̍h the̍h lâm-sek pò͘ lâi khàm chiò-kng ê teng-tâi, kap i ê chóaⁿ, i ê chián, i ê pôaⁿ, kap it-chhè chòe i ê lō͘-ēng tóe iû ê khì-kū.

10Koh tio̍h將燈台，kap伊一切ê器具，包tī海狗皮ê蓋內，hē tī柴架頂。Koh tio̍h chiong teng-tâi, kap i it-chhè ê khì-kū, pau tī hái-káu-phê ê kòa-lāi, hē tī chhâ-kè-téng.

11Tī金壇頂in tio̍h chhu藍色ê布，用海狗皮做蓋來蓋，chiah穿伊ê槓。Tī kim-tôaⁿ-téng in tio̍h chhu lâm-sek ê pò͘, ēng hái-káu-phê chòe kòa lâi khàm, chiah chhng i ê kǹg.

12Koh tio̍h the̍h所用來服事ê器具，就是tī聖所用來服事ê，包tī藍色ê布，用海狗皮做蓋來蓋，hē tī柴架頂。Koh tio̍h the̍h só͘ ēng lâi ho̍k-sāi ê khì-kū, chiū-sī tī sèng-só͘ ēng lâi ho̍k-sāi-ê, pau tī lâm-sek ê pò͘, ēng hái-káu-phê chòe kòa lâi khàm, hē tī chhâ-kè-téng.

13In tio̍h收壇頂ê火灰，用紫色ê布chhu tī hit頂面。In tio̍h siu tôaⁿ-téng ê hé-hu, ēng chí-sek ê pò͘ chhu tī hí téng-bīn.

14Koh tio̍h用in做工所用一切ê器具，排tī頂面；就是火鼎、肉叉、托á、盤，一切屬tī壇ê器具，koh用海狗皮做蓋來罩伊，chiah穿伊ê槓。Koh tio̍h ēng in chòe-kang só͘ ēng it-chhè ê khì-kū, pâi tī téng-bīn; chiū-sī hé-tiáⁿ, bah-chhe, thuh-á, pôaⁿ, it-chhè sio̍k tī tôaⁿ ê khì-kū, koh ēng hái-káu-phê chòe kòa lâi tà i, chiah chhng i ê kǹg.

15營盤beh起身ê時，亞倫kap伊ê kiáⁿ將聖所，kap聖所一切ê器具蓋明白，然後Ko-hat ê kiáⁿ孫tio̍h來扛；獨獨m̄-thang摸聖ê物，免得in死；會幕內chiah-ê物件是Ko-hat ê kiáⁿ孫所tio̍h扛ê。Iâⁿ-pôaⁿ beh khí-sin ê sî, A-lûn kap i ê kiáⁿ chiong sèng-só͘, kap sèng-só͘ it-chhè ê khì-kū khàm bêng-pe̍k, jiân-āu Ko-hat ê kiáⁿ-sun tio̍h lâi kng; to̍k-to̍k m̄-thang bong sèng ê mi̍h, bián-tit in sí; hōe-bō͘-lāi chiah ê mi̍h-kiāⁿ sī Ko-hat ê kiáⁿ-sun só͘ tio̍h kng ê.

16祭司亞倫ê kiáⁿ Í-lī-a-sat所tio̍h顧守ê，是點燈ê油，kap香料，kap常常獻ê素祭，kap抹ê油；也tio̍h顧守全會幕kap hit中間所有ê，kap聖所，kap聖所所有ê器具。Chè-si A-lûn ê kiáⁿ Í-lī-a-sat só͘ tio̍h kò͘-siú ê, sī tiám-teng ê iû, kap hiuⁿ-liāu, kap siông-siông hiàn ê sò͘-chè, kap boah ê iû; iā tio̍h kò͘-siú choân hōe-bō͘ kap hit tiong-kan só͘ ū ê, kap sèng-só͘, kap sèng-só͘ só͘-ū ê khì-kū.

17耶和華吩咐摩西、亞倫講：Iâ-hô-hoa hoan-hù Mô͘-se A-lûn kóng,

18Lín m̄-thang將Ko-hat人家族ê支派tùi利未人ê中間剪除去；Lín m̄-thang chiong Ko-hat lâng ke-cho̍k ê chi-phài tùi Lī-bī lâng ê tiong-kan chián-tû-khì;

19in óa近至聖ê物ê時，lín tio̍h kā in án-ni設法，hō͘ in能活，免得死；亞倫kap伊ê kiáⁿ tio̍h入去，派in ta̍k人所tio̍h做，所tio̍h扛ê。in óa-kūn chì-sèng ê mi̍h ê sî, lín tio̍h kā in án-ni siat-hoat, hō͘ in ōe oa̍h, bián-tit sí; A-lûn kap i ê kiáⁿ tio̍h ji̍p-khì, phài in ta̍k-lâng só͘ tio̍h chòe, só͘ tio̍h kng ê.

20獨獨in tiap-á久也m̄-thang入去看聖所，免得in死無。To̍k-to̍k in tiap-á-kú iā m̄-thang ji̍p-khì khòaⁿ sèng-só͘, bián-tit in sí-bô.

21耶和華吩咐摩西講：Iâ-hô-hoa hoan-hù Mô͘-se kóng,

22你tio̍h算Kek-sūn kiáⁿ孫ê總額，照in ê宗族、家口；Lí tio̍h sǹg Kek-sūn kiáⁿ-sun ê chóng-gia̍h, chiàu in ê chong-cho̍k, ke-kháu;

23tùi三十歲以上到五十歲，見若入來當職tī會幕內做工ê，lóng tio̍h算伊。tùi saⁿ-cha̍p hè í-siōng kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê, lóng tio̍h sǹg i.

24Kek-sūn人chiah-ê家ê工程，所tio̍h辨理，所tio̍h扛ê，就是chiah-ê。Kek-sūn lâng chiah ê ke ê kang-tiâⁿ, só͘ tio̍h pān-lí, só͘ tio̍h kng ê, chiū-sī chiah-ê.

25In tio̍h扛會幕hiah-ê帳幅，以及會幕，kap伊ê蓋，kap tī hit頂面海狗皮做ê蓋，kap會幕ê門籬；In tio̍h kng hōe-bō͘ hiah ê tiùⁿ-pak, í-ki̍p hōe-bō͘, kap i ê kòa, kap tī hí téng-bīn hái-káu-phê chòe ê kòa, kap hōe-bō͘ ê mn̂g-lî;

26院ê布帷；kap院門ê門籬，(院就是圍會幕kap壇ê，) 索á，kap所用ê器具，無論做甚麼路用ê，in lóng tio̍h料理。īⁿ ê pò͘-ûi; kap īⁿ-mn̂g ê mn̂g-lî, (īⁿ chiū-sī ûi hōe-bō͘ kap tôaⁿ ê,) soh-á, kap só͘ ēng ê khì-kū, bô-lūn chòe sím-mi̍h lō͘-ēng ê, in lóng tio̍h liāu-lí.

27Kek-sūn ê kiáⁿ孫tī in一切所扛ê物，所辦ê事，lóng tio̍h照亞倫kap伊ê kiáⁿ孫所命令ê來辦，in所應該扛ê，lín tio̍h派in顧守。Kek-sūn ê kiáⁿ-sun tī in it-chhè só͘ kng ê mi̍h, só͘ pān ê sū, lóng tio̍h chiàu A-lûn kap i ê kiáⁿ-sun só͘ bēng-lēng ê lâi pān, in só͘ eng-kai kng ê, lín tio̍h phài in kò͘-siú.

28這是Kek-sūn kiáⁿ孫chiah-ê家，tī會幕內所做ê工，in所顧守ê，tio̍h tī祭司亞倫ê kiáⁿ Í-tha-má ê手下。Che sī Kek-sūn kiáⁿ-sun chiah ê ke, tī hōe-bō͘-lāi só͘ chòe ê kang, in só͘ kò͘-siú ê, tio̍h tī chè-si A-lûn ê kiáⁿ Í-tha-má ê chhiú-ē.

29論到Bí-la̍h-lī ê kiáⁿ孫，你tio̍h照in ê家口、宗族，kā in點算。Lūn-kàu Bí-la̍h-lī ê kiáⁿ-sun, lí tio̍h chiàu in ê ke-kháu, chong-cho̍k, kā in tiám-sǹg.

30Tùi三十歲以上，到五十歲，見若入來當職tī會幕內做工ê，lóng tio̍h算伊。Tùi saⁿ-cha̍p hè í-siōng, kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê, lóng tio̍h sǹg i.

31In所擔當ê責成，照會幕chiah-ê工程，就是會幕ê板，kap伊ê栱，伊ê柱，伊ê座，In só͘ tam-tng ê chek-sêng, chiàu hōe-bō͘ chiah ê kang-tiâⁿ, chiū-sī hōe-bō͘ ê pán, kap i ê kông, i ê thiāu, i ê chō,

32院四圍ê柱，kap伊ê座；所釘ê釘，kap索á，kap一切所用ê器具；in擔當所扛ê器具，lín tio̍h照名指定tio̍h。īⁿ sì-ûi ê thiāu, kap i ê chō; só͘ tèng ê teng, kap soh-á, kap it-chhè só͘ ēng ê khì-kū; in tam-tng só͘ kng ê khì-kū, lín tio̍h chiàu-miâ chí tiāⁿ-tio̍h.

33這是Bí-la̍h-lī kiáⁿ孫chiah-ê家ê工，就是in tī會幕內所做ê工，lóng tī祭司亞倫ê kiáⁿ Í-tha-má ê手下。Che sī Bí-la̍h-lī kiáⁿ-sun chiah ê ke ê kang, chiū-sī in tī hōe-bō͘-lāi só͘ chòe ê kang, lóng tī chè-si A-lûn ê kiáⁿ Í-tha-má ê chhiú-ē.

34摩西、亞倫kap會眾chiah-ê首領，將Ko-hat ê kiáⁿ孫照in ê宗族、家口；Mô͘-se A-lûn kap hōe-chiòng chiah ê siú-léng, chiong Ko-hat ê kiáⁿ-sun chiàu in ê chong-cho̍k, ke-kháu;

35tùi三十歲以上到五十歲，見若入來當職tī會幕內做工ê，lóng計算伊。tùi saⁿ-cha̍p hè í-siōng kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê, lóng kè-sǹg i.

36照in ê家口計算ê，共有兩千七百五十名。Chiàu in ê ke-kháu kè-sǹg ê, kiōng ū nn̄g-chheng chhit-pah gō͘-cha̍p miâ.

37這是Ko-hat族chiah-ê家計算ê，是見若tī會幕內做工ê，就是摩西、亞倫，照耶和華託摩西所命令點算ê。Che sī Ko-hat cho̍k chiah ê ke kè-sǹg ê, sī kìⁿ-nā tī hōe-bō͘-lāi chòe-kang-ê, chiū-sī Mô͘-se A-lûn, chiàu Iâ-hô-hoa thok Mô͘-se só͘ bēng-lēng tiám-sǹg ê.

38Kek-sūn ê kiáⁿ孫計算ê，照in ê家口、宗族，Kek-sūn ê kiáⁿ-sun kè-sǹg-ê, chiàu in ê ke-kháu, chong-cho̍k,

39tùi三十歲以上到五十歲，見若入來當職tī會幕內做工ê；tùi saⁿ-cha̍p hè í-siōng kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê;

40其中計算ê，照in ê家口，宗族，共有兩千六百三十名。kî-tiong kè-sǹg-ê, chiàu in ê ke-kháu, chong-cho̍k, kiōng ū nn̄g-chheng la̍k-pah saⁿ-cha̍p miâ.

41這是Kek-sūn kiáⁿ孫chiah-ê家計算ê；是見若tī會幕內做工ê，就是摩西、亞倫照耶和華所命令來點算ê。Che sī Kek-sūn kiáⁿ-sun chiah ê ke kè-sǹg ê; sī kìⁿ-nā tī hōe-bō͘-lāi chòe-kang-ê, chiū-sī Mô͘-se A-lûn chiàu Iâ-hô-hoa só͘ bēng-lēng lâi tiám-sǹg ê.

42Bí-la̍h-lī kiáⁿ孫chiah-ê家，計算ê，照in ê家口，in ê宗族，Bí-la̍h-lī kiáⁿ-sun chiah ê ke, kè-sǹg-ê, chiàu in ê ke-kháu, in ê chong-cho̍k,

43tùi三十歲以上到五十歲，見若入來當職tī會幕內做工ê；tùi saⁿ-cha̍p hè í-siōng kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe-kang-ê;

44其中計算ê，照in ê家口，共有三千兩百名。kî-tiong kè-sǹg-ê, chiàu in ê ke-kháu, kiōng ū saⁿ-chheng nn̄g-pah miâ.

45這是Bí-la̍h-lī kiáⁿ孫chiah-ê家計算ê；就是摩西、亞倫照耶和華託摩西所命令點算ê。Che sī Bí-la̍h-lī kiáⁿ-sun chiah ê ke kè-sǹg-ê; chiū-sī Mô͘-se A-lûn chiàu Iâ-hô-hoa thok Mô͘-se só͘ bēng-lēng tiám-sǹg ê.

46見若計算ê利未人，就是摩西、亞倫，kap以色列chiah-ê首領，照in ê家口，in ê宗族，所點算ê，Kìⁿ-nā kè-sǹg ê Lī-bī lâng, chiū-sī Mô͘-se, A-lûn, kap Í-sek-lia̍t chiah ê siú-léng, chiàu in ê ke-kháu, in ê chong-cho̍k, só͘ tiám-sǹg-ê,

47tùi三十歲以上到五十歲，見若入來當職tī會幕內做扛物ê工 ê；tùi saⁿ-cha̍p hè í-siōng kàu gō͘-cha̍p hè, kìⁿ-nā ji̍p-lâi tng-chit tī hōe-bō͘-lāi chòe kng-mi̍h ê kang ê;

48其中計算ê共有八千五百八十名。kî-tiong kè-sǹg-ê kiōng ū poeh-chheng gō͘-pah poeh-cha̍p miâ.

49In hō͘摩西點算，照耶和華所命令ê，ta̍k人照伊所辦ê事，照伊所扛ê物；in án-ni hō͘伊點算，是照耶和華所命令摩西ê。In hō͘ Mô͘-se tiám-sǹg, chiàu Iâ-hô-hoa só͘ bēng-lēng-ê, ta̍k-lâng chiàu i só͘ pān ê sū, chiàu i só͘ kng ê mi̍h; in án-ni hō͘ i tiám-sǹg, sī chiàu Iâ-hô-hoa só͘ bēng-lēng Mô͘-se ê.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h命令以色列人hō͘一切患tio̍h thái-ko-ê，患tio̍h下痟症ê，kap因為死屍無清氣ê，lóng出去營外。Lí tio̍h bēng-lēng Í-sek-lia̍t lâng hō͘ it-chhè hoān-tio̍h thái-ko-ê, hoān-tio̍h hā-siau-chèng ê, kap in-ūi sí-si bô chheng-khì ê, lóng chhut-khì iâⁿ-gōa.

3無論男女lín lóng tio̍h hō͘ in出去，就是出去到營外，免得phah lâ-sâm in ê營盤，因為我khiā起tī in ê中間。Bô-lūn lâm-lú lín lóng tio̍h hō͘ in chhut-khì, chiū-sī chhut-khì kàu iâⁿ-gōa, bián-tit phah lâ-sâm in ê iâⁿ-pôaⁿ, in-ūi Góa khiā-khí tī in ê tiong-kan.

4以色列人照án-ni行，hō͘ in出去營外；耶和華án-ni吩咐摩西，以色列人就án-ni行。Í-sek-lia̍t lâng chiàu án-ni kiâⁿ, hō͘ in chhut-khì iâⁿ-gōa; Iâ-hô-hoa án-ni hoan-hù Mô͘-se, Í-sek-lia̍t lâng chiū án-ni kiâⁿ.

5耶和華吩咐摩西講：Iâ-hô-hoa hoan-hù Mô͘-se kóng,

6你tio̍h kā以色列人講：無論男女，若行人所行ê罪，致到干犯耶和華，hit人就有罪。Lí tio̍h kā Í-sek-lia̍t lâng kóng, Bô-lūn lâm-lú, nā kiâⁿ lâng só͘ kiâⁿ ê chōe, tì-kàu kan-hoān Iâ-hô-hoa, hit-lâng chiū ū chōe.

7In tio̍h認in所犯ê罪，照數額賠伊，另外加五份ê一份，歸hō͘伊所刻虧ê人。In tio̍h jīn in só͘ hoān ê chōe, chiàu siàu-gia̍h pê i, lēng-gōa ke gō͘-hūn ê chi̍t-hūn, kui hō͘ i só͘ khek-khui ê lâng.

8總是hit人若無親人thang領受因為罪所賠ê，就hit-ê因為罪所賠ê，tio̍h還hō͘耶和華，來歸祭司；論hit隻贖罪ê羊káng，就是用來kā伊贖罪ê，是算在外。Chóng-sī hit-lâng nā bô chhin-lâng thang niá-siū in-ūi chōe só͘ pê ê, chiū hit-ê in-ūi chōe só͘ pê ê, tio̍h hêng hō͘ Iâ-hô-hoa, lâi kui chè-si; lūn hit-chiah sio̍k-chōe ê iûⁿ-káng, chiū-sī ēng lâi kā i sio̍k-chōe-ê, sī sǹg chāi-gōa.

9以色列人一切ê聖物中，所奉hō͘祭司ê舉祭，lóng tio̍h歸hō͘祭司。Í-sek-lia̍t lâng it-chhè ê sèng-mi̍h tiong, só͘ hōng hō͘ chè-si ê kú-chè, lóng tio̍h kui hō͘ chè-si.

10見若人所分別做聖ê物，tio̍h歸hō͘祭司；人用甚麼hō͘祭司ê，lóng tio̍h歸tī伊。Kìⁿ-nā lâng só͘ hun-piat chòe-sèng ê mi̍h, tio̍h kui hō͘ chè-si; lâng ēng sím-mi̍h hō͘ chè-si ê, lóng tio̍h kui tī i.

11耶和華吩咐摩西講：Iâ-hô-hoa hoan-hù Mô͘-se kóng,

12你tio̍h吩咐以色列人對伊講，人ê bó͘若行錯得罪伊ê丈夫，Lí tio̍h hoan-hù Í-sek-lia̍t lâng tùi i kóng, Lâng ê bó͘ nā kiâⁿ-chhò tek-chōe i ê tiōng-hu,

13有人kap伊行淫，事情祕密，伊ê丈夫m̄知，也無露出；總是伊受phah lâ-sâm，也無人做干證，也無掠tio̍h伊，ū lâng kap i kiâⁿ-îm, sū-chêng pì-bi̍t, i ê tiōng-hu m̄-chai, iā bô lō͘-chhut; chóng-sī i siū phah lâ-sâm, iā bô lâng chòe kan-chèng, iā bô lia̍h-tio̍h i,

14伊ê丈夫生起僥疑ê心，僥疑伊ê bó͘，伊ê bó͘是phah lâ-sâm；á是伊ê丈夫生起僥疑ê心，僥疑伊ê bó͘，伊ê bó͘並無受phah lâ-sâm，i ê tiōng-hu siⁿ-khí giâu-gî ê sim, giâu-gî i ê bó͘, i ê bó͘ sī phah lâ-sâm; á-sī i ê tiōng-hu siⁿ-khí giâu-gî ê sim, giâu-gî i ê bó͘, i ê bó͘ pēng-bô siū phah lâ-sâm,

15hit-ê人tio̍h chhōa伊ê bó͘到祭司hia，也為tio̍h伊帶大麥ê麵粉i-hoat十份一做伊ê禮物，m̄-thang thîn油，也m̄-thang chham乳香，因為這是僥疑ê素祭，是記得ê素祭，hō͘人會記得罪。hit ê lâng tio̍h chhōa i ê bó͘ kàu chè-si hia, iā ūi-tio̍h i tòa tōa-be̍h ê mī-hún i-hoat cha̍p-hūn-chi̍t chòe i ê lé-mi̍h, m̄-thang thîn iû, iā m̄-thang chham jú-hiuⁿ, in-ūi che sī giâu-gî ê sò͘-chè, sī kì-tit ê sò͘-chè, hō͘ lâng ōe kì-tit chōe.

16祭司tio̍h hō͘ hit-ê婦人人近óa來，hō͘伊khiā tī耶和華ê面前。Chè-si tio̍h hō͘ hit ê hū-jîn-lâng kūn-óa lâi, hō͘ i khiā tī Iâ-hô-hoa ê bīn-chêng.

17祭司tio̍h用聖ê水貯tī磁ê器具內，koh tùi會幕ê土腳the̍h一點á土粉，hē tī水中。Chè-si tio̍h ēng sèng ê chúi tóe tī hûi ê khì-kū-lāi, koh tùi hōe-bō͘ ê thô͘-kha the̍h chi̍t tiám-á thô͘-hún, hē tī chúi-tiong.

18祭司tio̍h hō͘ hit-ê婦人人khiā tī耶和華ê面前，phah散婦人人ê頭毛，將記得ê素祭，就是僥疑ê素祭，hē tī伊ê手中；祭司ê手tio̍h the̍h致到咒詛ê苦水。Chè-si tio̍h hō͘ hit ê hū-jîn-lâng khiā tī Iâ-hô-hoa ê bīn-chêng, phah-sòaⁿ hū-jîn-lâng ê thâu-mn̂g, chiong kì-tit ê sò͘-chè, chiū-sī giâu-gî ê sò͘-chè, hē tī i ê chhiú-tiong; chè-si ê chhiú tio̍h the̍h tì-kàu chiù-chó͘ ê khó͘-chúi.

19祭司tio̍h kah婦人人chiù-chōa，對伊講，若無人kap你行淫，你已經受丈夫ê約束，無行錯致到phah lâ-sâm，你就kap chit-ê咒詛ê苦水無干涉。Chè-si tio̍h kah hū-jîn-lâng chiù-chōa, tùi i kóng, Nā bô lâng kap lí kiâⁿ-îm, lí í-keng siū tiōng-hu ê iok-sok, bô kiâⁿ-chhò tì-kàu phah lâ-sâm, lí chiū kap chit ê chiù-chó͘ ê khó͘-chúi bô kan-sia̍p.

20總是你已經受丈夫ê約束，若有行錯受phah lâ-sâm，tī你ê丈夫以外有人kap你行淫；Chóng-sī lí í-keng siū tiōng-hu ê iok-sok, nā ū kiâⁿ-chhò siū phah lâ-sâm, tī lí ê tiōng-hu í-gōa ū lâng kap lí kiâⁿ-îm;

21祭司就hō͘婦人人用咒詛來chiù-chōa，祭司對婦人人講：耶和華hō͘你ê大腿爛，腹肚賬ê時，願耶和華hō͘你tī你ê百姓中成做咒詛，成做chiù-chōa ê話柄。chè-si chiū hō͘ hū-jîn-lâng ēng chiù-chó͘ lâi chiù-chōa, chè-si tùi hū-jîn-lâng kóng, Iâ-hô-hoa hō͘ lí ê tōa-thúi nōa, pak-tó͘ tiòng ê sî, goān Iâ-hô-hoa hō͘ lí tī lí ê peh-sìⁿ-tiong chiâⁿ-chòe chiù-chó͘, chiâⁿ-chòe chiù-chōa ê ōe-pìⁿ.

22Koh chit-ê致到咒詛ê水beh入你ê腸á內，hō͘你ê腹肚賬，大腿爛；婦人人tio̍h應講，A-bēng，A-bēng。Koh chit-ê tì-kàu chiù-chó͘ ê chúi beh ji̍p lí ê tn̂g-á-lāi, hō͘ lí ê pak-tó͘ tiòng, tōa-thúi nōa; hū-jîn-lâng tio̍h ìn kóng, A-bēng, A-bēng.

23祭司tio̍h寫chiah-ê咒詛ê話tī冊裡，用hiah-ê字抹入tī苦水裡。Chè-si tio̍h siá chiah ê chiù-chó͘ ê ōe tī chheh-ni̍h, ēng hiah ê jī boa̍h-ji̍p tī khó͘-chúi-ni̍h.

24Koh hō͘婦人人lim chit-ê咒詛ê苦水，致到咒詛ê水入伊ê內面成做苦。Koh hō͘ hū-jîn-lâng lim chit ê chiù-chó͘ ê khó͘-chúi, tì-kàu chiù-chó͘ ê chúi ji̍p i ê lāi-bīn chiâⁿ-chòe khó͘.

25祭司tio̍h tùi婦人人ê手the̍h僥疑ê素祭，搖hit-ê素祭tī耶和華ê面前，帶到壇前。Chè-si tio̍h tùi hū-jîn-lâng ê chhiú the̍h giâu-gî ê sò͘-chè, iô hit ê sò͘-chè tī Iâ-hô-hoa ê bīn-chêng, tòa kàu tôaⁿ-chêng.

26祭司tio̍h tùi素祭中the̍h出一把做記念，燒tī壇頂，然後hō͘婦人人lim chit-ê水。Chè-si tio̍h tùi sò͘-chè-tiong the̍h-chhut chi̍t-pé chòe kì-liām, sio tī tôaⁿ-téng, jiân-āu hō͘ hū-jîn-lâng lim chit ê chúi.

27已經hō͘婦人人lim hit-ê水，伊若受bak lâ-sâm得罪伊ê丈夫，chit-ê致到咒詛ê水beh入伊ê內面，成做苦；伊ê腹肚就beh蠱脹，大腿就beh爛，hit-ê婦人人就beh tī伊ê百姓中成做咒詛ê話柄。Í-keng hō͘ hū-jîn-lâng lim hit ê chúi, i nā siū bak lâ-sâm tek-chōe i ê tiōng-hu, chit-ê tì-kàu chiù-chó͘ ê chúi beh ji̍p i ê lāi-bīn, chiâⁿ-chòe khó͘; i ê pak-tó͘ chiū beh kó͘-tiòng, tōa-thúi chiū beh nōa, hit ê hū-jîn-lâng chiū beh tī i ê peh-sìⁿ-tiong chiâⁿ-chòe chiù-chó͘ ê ōe-pìⁿ.

28若婦人人無受phah lâ-sâm，實在是清氣，就免受災禍，koh beh懷孕。Nā hū-jîn-lâng bô siū phah lâ-sâm, si̍t-chāi sī chheng-khì, chiū bián siū chai-ē, koh beh hoâi-īn.

29Bó͘已經受丈夫ê約束，若有行錯bak-tio̍h lâ-sâm，這就是僥疑ê例。Bó͘ í-keng siū tiōng-hu ê iok-sok, nā ū kiâⁿ-chhò bak-tio̍h lâ-sâm, che chiū-sī giâu-gî ê lē.

30á是人生出僥疑ê心，來僥疑伊ê bó͘，就tio̍h hō͘伊ê bó͘ khiā tī耶和華ê面前，祭司就tio̍h kā伊盡chit-ê例來行。Á-sī lâng siⁿ-chhut giâu-gî ê sim, lâi giâu-gî i ê bó͘, chiū tio̍h hō͘ i ê bó͘ khiā tī Iâ-hô-hoa ê bīn-chêng, chè-si chiū tio̍h kā i chīn chit ê lē lâi kiâⁿ.

31Án-ni ta-po͘人就無罪，婦人人tio̍h擔當家己ê罪。Án-ni ta-po͘-lâng chiū bô chōe, hū-jîn-lâng tio̍h tam-tng ka-kī ê chōe.