1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h命令以色列人hō͘一切患tio̍h thái-ko-ê，患tio̍h下痟症ê，kap因為死屍無清氣ê，lóng出去營外。Lí tio̍h bēng-lēng Í-sek-lia̍t lâng hō͘ it-chhè hoān-tio̍h thái-ko-ê, hoān-tio̍h hā-siau-chèng ê, kap in-ūi sí-si bô chheng-khì ê, lóng chhut-khì iâⁿ-gōa.

3無論男女lín lóng tio̍h hō͘ in出去，就是出去到營外，免得phah lâ-sâm in ê營盤，因為我khiā起tī in ê中間。Bô-lūn lâm-lú lín lóng tio̍h hō͘ in chhut-khì, chiū-sī chhut-khì kàu iâⁿ-gōa, bián-tit phah lâ-sâm in ê iâⁿ-pôaⁿ, in-ūi Góa khiā-khí tī in ê tiong-kan.

4以色列人照án-ni行，hō͘ in出去營外；耶和華án-ni吩咐摩西，以色列人就án-ni行。Í-sek-lia̍t lâng chiàu án-ni kiâⁿ, hō͘ in chhut-khì iâⁿ-gōa; Iâ-hô-hoa án-ni hoan-hù Mô͘-se, Í-sek-lia̍t lâng chiū án-ni kiâⁿ.

5耶和華吩咐摩西講：Iâ-hô-hoa hoan-hù Mô͘-se kóng,

6你tio̍h kā以色列人講：無論男女，若行人所行ê罪，致到干犯耶和華，hit人就有罪。Lí tio̍h kā Í-sek-lia̍t lâng kóng, Bô-lūn lâm-lú, nā kiâⁿ lâng só͘ kiâⁿ ê chōe, tì-kàu kan-hoān Iâ-hô-hoa, hit-lâng chiū ū chōe.

7In tio̍h認in所犯ê罪，照數額賠伊，另外加五份ê一份，歸hō͘伊所刻虧ê人。In tio̍h jīn in só͘ hoān ê chōe, chiàu siàu-gia̍h pê i, lēng-gōa ke gō͘-hūn ê chi̍t-hūn, kui hō͘ i só͘ khek-khui ê lâng.

8總是hit人若無親人thang領受因為罪所賠ê，就hit-ê因為罪所賠ê，tio̍h還hō͘耶和華，來歸祭司；論hit隻贖罪ê羊káng，就是用來kā伊贖罪ê，是算在外。Chóng-sī hit-lâng nā bô chhin-lâng thang niá-siū in-ūi chōe só͘ pê ê, chiū hit-ê in-ūi chōe só͘ pê ê, tio̍h hêng hō͘ Iâ-hô-hoa, lâi kui chè-si; lūn hit-chiah sio̍k-chōe ê iûⁿ-káng, chiū-sī ēng lâi kā i sio̍k-chōe-ê, sī sǹg chāi-gōa.

9以色列人一切ê聖物中，所奉hō͘祭司ê舉祭，lóng tio̍h歸hō͘祭司。Í-sek-lia̍t lâng it-chhè ê sèng-mi̍h tiong, só͘ hōng hō͘ chè-si ê kú-chè, lóng tio̍h kui hō͘ chè-si.

10見若人所分別做聖ê物，tio̍h歸hō͘祭司；人用甚麼hō͘祭司ê，lóng tio̍h歸tī伊。Kìⁿ-nā lâng só͘ hun-piat chòe-sèng ê mi̍h, tio̍h kui hō͘ chè-si; lâng ēng sím-mi̍h hō͘ chè-si ê, lóng tio̍h kui tī i.

11耶和華吩咐摩西講：Iâ-hô-hoa hoan-hù Mô͘-se kóng,

12你tio̍h吩咐以色列人對伊講，人ê bó͘若行錯得罪伊ê丈夫，Lí tio̍h hoan-hù Í-sek-lia̍t lâng tùi i kóng, Lâng ê bó͘ nā kiâⁿ-chhò tek-chōe i ê tiōng-hu,

13有人kap伊行淫，事情祕密，伊ê丈夫m̄知，也無露出；總是伊受phah lâ-sâm，也無人做干證，也無掠tio̍h伊，ū lâng kap i kiâⁿ-îm, sū-chêng pì-bi̍t, i ê tiōng-hu m̄-chai, iā bô lō͘-chhut; chóng-sī i siū phah lâ-sâm, iā bô lâng chòe kan-chèng, iā bô lia̍h-tio̍h i,

14伊ê丈夫生起僥疑ê心，僥疑伊ê bó͘，伊ê bó͘是phah lâ-sâm；á是伊ê丈夫生起僥疑ê心，僥疑伊ê bó͘，伊ê bó͘並無受phah lâ-sâm，i ê tiōng-hu siⁿ-khí giâu-gî ê sim, giâu-gî i ê bó͘, i ê bó͘ sī phah lâ-sâm; á-sī i ê tiōng-hu siⁿ-khí giâu-gî ê sim, giâu-gî i ê bó͘, i ê bó͘ pēng-bô siū phah lâ-sâm,

15hit-ê人tio̍h chhōa伊ê bó͘到祭司hia，也為tio̍h伊帶大麥ê麵粉i-hoat十份一做伊ê禮物，m̄-thang thîn油，也m̄-thang chham乳香，因為這是僥疑ê素祭，是記得ê素祭，hō͘人會記得罪。hit ê lâng tio̍h chhōa i ê bó͘ kàu chè-si hia, iā ūi-tio̍h i tòa tōa-be̍h ê mī-hún i-hoat cha̍p-hūn-chi̍t chòe i ê lé-mi̍h, m̄-thang thîn iû, iā m̄-thang chham jú-hiuⁿ, in-ūi che sī giâu-gî ê sò͘-chè, sī kì-tit ê sò͘-chè, hō͘ lâng ōe kì-tit chōe.

16祭司tio̍h hō͘ hit-ê婦人人近óa來，hō͘伊khiā tī耶和華ê面前。Chè-si tio̍h hō͘ hit ê hū-jîn-lâng kūn-óa lâi, hō͘ i khiā tī Iâ-hô-hoa ê bīn-chêng.

17祭司tio̍h用聖ê水貯tī磁ê器具內，koh tùi會幕ê土腳the̍h一點á土粉，hē tī水中。Chè-si tio̍h ēng sèng ê chúi tóe tī hûi ê khì-kū-lāi, koh tùi hōe-bō͘ ê thô͘-kha the̍h chi̍t tiám-á thô͘-hún, hē tī chúi-tiong.

18祭司tio̍h hō͘ hit-ê婦人人khiā tī耶和華ê面前，phah散婦人人ê頭毛，將記得ê素祭，就是僥疑ê素祭，hē tī伊ê手中；祭司ê手tio̍h the̍h致到咒詛ê苦水。Chè-si tio̍h hō͘ hit ê hū-jîn-lâng khiā tī Iâ-hô-hoa ê bīn-chêng, phah-sòaⁿ hū-jîn-lâng ê thâu-mn̂g, chiong kì-tit ê sò͘-chè, chiū-sī giâu-gî ê sò͘-chè, hē tī i ê chhiú-tiong; chè-si ê chhiú tio̍h the̍h tì-kàu chiù-chó͘ ê khó͘-chúi.

19祭司tio̍h kah婦人人chiù-chōa，對伊講，若無人kap你行淫，你已經受丈夫ê約束，無行錯致到phah lâ-sâm，你就kap chit-ê咒詛ê苦水無干涉。Chè-si tio̍h kah hū-jîn-lâng chiù-chōa, tùi i kóng, Nā bô lâng kap lí kiâⁿ-îm, lí í-keng siū tiōng-hu ê iok-sok, bô kiâⁿ-chhò tì-kàu phah lâ-sâm, lí chiū kap chit ê chiù-chó͘ ê khó͘-chúi bô kan-sia̍p.

20總是你已經受丈夫ê約束，若有行錯受phah lâ-sâm，tī你ê丈夫以外有人kap你行淫；Chóng-sī lí í-keng siū tiōng-hu ê iok-sok, nā ū kiâⁿ-chhò siū phah lâ-sâm, tī lí ê tiōng-hu í-gōa ū lâng kap lí kiâⁿ-îm;

21祭司就hō͘婦人人用咒詛來chiù-chōa，祭司對婦人人講：耶和華hō͘你ê大腿爛，腹肚賬ê時，願耶和華hō͘你tī你ê百姓中成做咒詛，成做chiù-chōa ê話柄。chè-si chiū hō͘ hū-jîn-lâng ēng chiù-chó͘ lâi chiù-chōa, chè-si tùi hū-jîn-lâng kóng, Iâ-hô-hoa hō͘ lí ê tōa-thúi nōa, pak-tó͘ tiòng ê sî, goān Iâ-hô-hoa hō͘ lí tī lí ê peh-sìⁿ-tiong chiâⁿ-chòe chiù-chó͘, chiâⁿ-chòe chiù-chōa ê ōe-pìⁿ.

22Koh chit-ê致到咒詛ê水beh入你ê腸á內，hō͘你ê腹肚賬，大腿爛；婦人人tio̍h應講，A-bēng，A-bēng。Koh chit-ê tì-kàu chiù-chó͘ ê chúi beh ji̍p lí ê tn̂g-á-lāi, hō͘ lí ê pak-tó͘ tiòng, tōa-thúi nōa; hū-jîn-lâng tio̍h ìn kóng, A-bēng, A-bēng.

23祭司tio̍h寫chiah-ê咒詛ê話tī冊裡，用hiah-ê字抹入tī苦水裡。Chè-si tio̍h siá chiah ê chiù-chó͘ ê ōe tī chheh-ni̍h, ēng hiah ê jī boa̍h-ji̍p tī khó͘-chúi-ni̍h.

24Koh hō͘婦人人lim chit-ê咒詛ê苦水，致到咒詛ê水入伊ê內面成做苦。Koh hō͘ hū-jîn-lâng lim chit ê chiù-chó͘ ê khó͘-chúi, tì-kàu chiù-chó͘ ê chúi ji̍p i ê lāi-bīn chiâⁿ-chòe khó͘.

25祭司tio̍h tùi婦人人ê手the̍h僥疑ê素祭，搖hit-ê素祭tī耶和華ê面前，帶到壇前。Chè-si tio̍h tùi hū-jîn-lâng ê chhiú the̍h giâu-gî ê sò͘-chè, iô hit ê sò͘-chè tī Iâ-hô-hoa ê bīn-chêng, tòa kàu tôaⁿ-chêng.

26祭司tio̍h tùi素祭中the̍h出一把做記念，燒tī壇頂，然後hō͘婦人人lim chit-ê水。Chè-si tio̍h tùi sò͘-chè-tiong the̍h-chhut chi̍t-pé chòe kì-liām, sio tī tôaⁿ-téng, jiân-āu hō͘ hū-jîn-lâng lim chit ê chúi.

27已經hō͘婦人人lim hit-ê水，伊若受bak lâ-sâm得罪伊ê丈夫，chit-ê致到咒詛ê水beh入伊ê內面，成做苦；伊ê腹肚就beh蠱脹，大腿就beh爛，hit-ê婦人人就beh tī伊ê百姓中成做咒詛ê話柄。Í-keng hō͘ hū-jîn-lâng lim hit ê chúi, i nā siū bak lâ-sâm tek-chōe i ê tiōng-hu, chit-ê tì-kàu chiù-chó͘ ê chúi beh ji̍p i ê lāi-bīn, chiâⁿ-chòe khó͘; i ê pak-tó͘ chiū beh kó͘-tiòng, tōa-thúi chiū beh nōa, hit ê hū-jîn-lâng chiū beh tī i ê peh-sìⁿ-tiong chiâⁿ-chòe chiù-chó͘ ê ōe-pìⁿ.

28若婦人人無受phah lâ-sâm，實在是清氣，就免受災禍，koh beh懷孕。Nā hū-jîn-lâng bô siū phah lâ-sâm, si̍t-chāi sī chheng-khì, chiū bián siū chai-ē, koh beh hoâi-īn.

29Bó͘已經受丈夫ê約束，若有行錯bak-tio̍h lâ-sâm，這就是僥疑ê例。Bó͘ í-keng siū tiōng-hu ê iok-sok, nā ū kiâⁿ-chhò bak-tio̍h lâ-sâm, che chiū-sī giâu-gî ê lē.

30á是人生出僥疑ê心，來僥疑伊ê bó͘，就tio̍h hō͘伊ê bó͘ khiā tī耶和華ê面前，祭司就tio̍h kā伊盡chit-ê例來行。Á-sī lâng siⁿ-chhut giâu-gî ê sim, lâi giâu-gî i ê bó͘, chiū tio̍h hō͘ i ê bó͘ khiā tī Iâ-hô-hoa ê bīn-chêng, chè-si chiū tio̍h kā i chīn chit ê lē lâi kiâⁿ.

31Án-ni ta-po͘人就無罪，婦人人tio̍h擔當家己ê罪。Án-ni ta-po͘-lâng chiū bô chōe, hū-jîn-lâng tio̍h tam-tng ka-kī ê chōe.

1耶和華吩咐摩西講：<h3>Kui Chú ê Lâng</h3>Iâ-hô-hoa hoan-hù Mô͘-se kóng,

2你tio̍h吩咐以色列人kā in講：無論男女hē特別ê願，就是Ná-sè-jíⁿ人ê願，家己分別歸hō͘耶和華，Lí tio̍h hoan-hù Í-sek-lia̍t lâng kā in kóng, Bô-lūn lâm-lú hē te̍k-pia̍t ê goān, chiū-sī Ná-sè-jíⁿ lâng ê goān, ka-kī hun-piat kui hō͘ Iâ-hô-hoa,

3伊就tio̍h離開酒kap厚酒，也m̄-thang lim甚麼酒ê醋，kap厚酒ê醋，m̄-thang lim甚麼葡萄ê汁，也m̄-thang食生ê葡萄，kap乾ê葡萄。i chiū tio̍h lī-khui chiú kap kāu-chiú, iā m̄-thang lim sím-mi̍h chiú ê chhò͘, kap kāu-chiú ê chhò͘, m̄-thang lim sím-mi̍h phû-tô ê chiap, iā m̄-thang chia̍h chhiⁿ ê phû-tô, kap ta ê phû-tô.

4Tī一切家己分別ê日，見若葡萄樹所出ê，tùi核到皮，lóng m̄-thang食。Tī it-chhè ka-kī hun-piat ê ji̍t, kìⁿ-nā phû-tô-chhiū só͘ chhut ê, tùi hu̍t kàu phê, lóng m̄-thang chia̍h.

5Tī伊下願家己分別hiah-ê日，m̄-thang hō͘剃頭刀到伊ê頭殼；到伊家己分別歸hō͘耶和華ê日滿，伊tio̍h做聖，出在伊ê頭毛發長。Tī i hē-goān ka-kī hun-piat hiah ê ji̍t, m̄-thang hō͘ thì-thâu-to kàu i ê thâu-khak; kàu i ka-kī hun-piat kui hō͘ Iâ-hô-hoa ê ji̍t móa, i tio̍h chòe-sèng, chhut-chāi i ê thâu-mn̂g hoat-tn̂g.

6Tī伊家己分別歸耶和華hiah-ê日，m̄-thang óa近身屍。Tī i ka-kī hun-piat kui Iâ-hô-hoa hiah ê ji̍t, m̄-thang óa-kūn sin-si.

7伊ê老父，á是老母，á是兄弟，á是姊妹，死ê時，伊m̄-thang為tio̍h in hō͘家己無清氣；因為伊家己分別歸上帝ê憑據是tī伊ê頭殼。I ê lāu-pē, á-sī lāu-bú, á-sī hiaⁿ-tī, á-sī chí-bē, sí ê sî, i m̄-thang ūi-tio̍h in hō͘ ka-kī bô chheng-khì; in-ūi i ka-kī hun-piat kui Siōng-tè ê pîn-kù sī tī i ê thâu-khak.

8Tī伊家己分別hiah-ê日，伊是歸tī耶和華做聖。Tī i ka-kī hun-piat hiah ê ji̍t, i sī kui tī Iâ-hô-hoa chòe-sèng.

9若tī伊ê身邊忽然有人死，致到bak-tio̍h伊家己分別ê頭殼，就伊tio̍h tī家己清氣ê日剃頭，就是tī第七日剃伊。Nā tī i ê sin-piⁿ hut-jiân ū lâng sí, tì-kàu bak-tio̍h i ka-kī hun-piat ê thâu-khak, chiū i tio̍h tī ka-kī chheng-khì ê ji̍t thì-thâu, chiū-sī tī tē-chhit ji̍t thì i.

10第八日伊tio̍h用兩隻ka-chui，á是兩隻鴿á-kiáⁿ，帶到會幕門口，交代祭司。Tē-poeh ji̍t i tio̍h ēng nn̄g chiah ka-chui, á-sī nn̄g chiah chíⁿ-á-kiáⁿ, tòa kàu hōe-bō͘ mn̂g-kháu, kau-tài chè-si.

11祭司tio̍h獻一隻做贖罪祭，一隻做燒祭，kā伊贖罪；因為伊tùi身屍來有罪；koh tio̍h tī hit日hō͘伊ê頭殼做聖。Chè-si tio̍h hiàn chi̍t-chiah chòe sio̍k-chōe-chè, chi̍t-chiah chòe sio-chè, kā i sio̍k-chōe; in-ūi i tùi sin-si lâi ū chōe; koh tio̍h tī hit-ji̍t hō͘ i ê thâu-khak chòe-sèng.

12伊tio̍h koh用伊分別ê日，分別來歸耶和華，koh tio̍h牽一隻未滿年ê羊káng-á，做補過失ê祭；總是以前ê日無算數，因為伊ê家己分別已經受bak lâ-sâm。I tio̍h koh ēng i hun-piat ê ji̍t, hun-piat lâi kui Iâ-hô-hoa, koh tio̍h khan chi̍t chiah bē-móa-nî ê iûⁿ-káng-á, chòe pó͘-kè-sit ê chè; chóng-sī í-chêng ê ji̍t bô sǹg-siàu, in-ūi i ê ka-kī hun-piat í-keng siū bak lâ-sâm.

13Ná-sè-jíⁿ人家己分別ê日已經滿，hit-ê例就是án-ni；人tio̍h chhōa伊到會幕ê門口。Ná-sè-jíⁿ lâng ka-kī hun-piat ê ji̍t í-keng móa, hit ê lē chiū-sī án-ni; lâng tio̍h chhōa i kàu hōe-bō͘ ê mn̂g-kháu.

14伊tio̍h將伊ê禮物獻hō͘耶和華，就是一隻無瑕疵未滿年ê綿羊káng-á，做燒祭，一隻無瑕疵未滿年ê綿羊母á，做贖罪祭，kap一隻無瑕疵ê綿羊káng，做謝恩ê祭；I tio̍h chiong i ê lé-mi̍h hiàn hō͘ Iâ-hô-hoa, chiū-sī chi̍t-chiah bô hâ-chhû bē-móa-nî ê mî-iûⁿ-káng-á, chòe sio-chè, chi̍t-chiah bô hâ-chhû bē-móa-nî ê mî-iûⁿ-bú-á, chòe sio̍k-chōe chè, kap chi̍t-chiah bô hâ-chhû ê mî-iûⁿ-káng, chòe siā-un ê chè;

15koh一筐ê無酵餅，就是調和油幼麵粉做ê餅，kap抹油無酵ê薄餅，以及伊ê素祭，kap灌奠ê祭。koh chi̍t-kheng ê bô-kàⁿ piáⁿ, chiū-sī tiau-hô iû iù-mī-hún chòe ê piáⁿ, kap boah-iû bô-kàⁿ ê po̍h-piáⁿ, í-ki̍p i ê sò͘-chè, kap koàn-tiān ê chè.

16祭司tio̍h the̍h chiah-ê到耶和華ê面前，來獻hit人ê贖罪祭，kap燒祭。Chè-si tio̍h the̍h chiah-ê kàu Iâ-hô-hoa ê bīn-chêng, lâi hiàn hit-lâng ê sio̍k-chōe chè, kap sio-chè.

17伊也tio̍h將hit隻羊káng，kap hit筐無酵餅，獻hō͘耶和華做謝恩ê祭；祭司也tio̍h續獻伊ê素祭kap灌奠。I iā tio̍h chiong hit chiah iûⁿ-káng, kap hit kheng bô-kàⁿ piáⁿ, hiàn hō͘ Iâ-hô-hoa chòe siā-un ê chè; chè-si iā tio̍h sòa hiàn i ê sò͘-chè kap koàn-tiān.

18Ná-sè-jíⁿ人tio̍h tī會幕門口剃家己分別ê頭，將家己分別ê頭毛，hē tī謝恩祭下面ê火頂。Ná-sè-jíⁿ lâng tio̍h tī hōe-bō͘ mn̂g-kháu thì ka-kī hun-piat ê thâu, chiong ka-kī hun-piat ê thâu-mn̂g, hē tī siā-un-chè ē-bīn ê hé-téng.

19Ná-sè-jíⁿ人剃伊家己分別ê頭毛了後，祭司就tio̍h 取已經煮ê羊káng一支前腿，koh tùi筐á內the̍h一個無酵餅，kap一個無酵ê薄餅，lóng hē tī伊ê手。Ná-sè-jíⁿ lâng thì i ka-kī hun-piat ê thâu-mn̂g liáu-āu, chè-si chiū tio̍h chhú í-keng chú ê iûⁿ-káng chi̍t ki chêng-thúi, koh tùi kheng-á-lāi the̍h chi̍t ê bô-kàⁿ piáⁿ, kap chi̍t ê bô-kàⁿ ê po̍h-piáⁿ, lóng hē tī i ê chhiú.

20祭司tio̍h the̍h chiah-ê做搖祭，搖tī耶和華ê面前；這kap所搖 ê胸，所舉ê腿，lóng做聖物，歸hō͘祭司；然後Ná-sè-jíⁿ人thang lim酒。Chè-si tio̍h the̍h chiah-ê chòe iô-chè, iô tī Iâ-hô-hoa ê bīn-chêng; che kap só͘ iô ê heng, só͘ kú ê thúi, lóng chòe sèng-mi̍h, kui hō͘ chè-si; jiân-āu Ná-sè-jíⁿ lâng thang lim-chiú.

21下願ê Ná-sè-jíⁿ人為tio̍h伊分別家己所獻ê禮物，kap伊以外所能得tio̍h-ê，獻hō͘耶和華，就是chit-ê例；伊án-ni下願就tio̍h照分別家己ê例來行。Hē-goān ê Ná-sè-jíⁿ lâng ūi-tio̍h i hun-piat ka-kī só͘ hiàn ê lé-mi̍h, kap i í-gōa só͘ ōe tit-tio̍h-ê, hiàn hō͘ Iâ-hô-hoa, chiū-sī chit ê lē; i án-ni hē-goān chiū tio̍h chiàu hun-piat ka-kī ê lē lâi kiâⁿ.

22耶和華吩咐摩西講：Iâ-hô-hoa hoan-hù Mô͘-se kóng,

23你tio̍h吩咐亞倫kap伊ê kiáⁿ講：Lín tio̍h án-ni kā以色列人祝福，對in講：Lí tio̍h hoan-hù A-lûn kap i ê kiáⁿ kóng, Lín tio̍h án-ni kā Í-sek-lia̍t lâng chiok-hok, tùi in kóng:

24願耶和華賜福你，保護你；Goān Iâ-hô-hoa sù-hok lí, pó-hō͘ lí;

25願耶和華hō͘伊ê面ê光照你，施恩hō͘你；Goān Iâ-hô-hoa hō͘ I ê bīn ê kng chiò lí, si-un hō͘ lí;

26願耶和華歡喜ê面看你，賞賜你平安。Goān Iâ-hô-hoa hoaⁿ-hí ê bīn khòaⁿ lí, siúⁿ-sù lí pêng-an.

27Án-ni in beh用我ê名hē tī以色列人ê頂面；我也beh賜福in。Án-ni in beh ēng Góa ê miâ hē tī Í-sek-lia̍t lâng ê téng-bīn; Góa iā beh sù-hok in.

1摩西起會幕明白，就用油抹伊，分別伊做聖；koh將其中ê器具kap壇，kap伊ê器具，lóng抹伊，分別伊做聖。Mô͘-se khí hōe-bō͘ bêng-pe̍k, chiū ēng iû boah i, hun-piat i chòe-sèng; koh chiong kî-tiong ê khì-kū kap tôaⁿ, kap i ê khì-kū, lóng boah i, hun-piat i chòe-sèng.

2Hit日以色列ê眾首領，就是in ta̍k族ê族長，lóng來奉獻；in就是ta̍k支派ê首領，管理hiah-ê計算ê人；Hit-ji̍t Í-sek-lia̍t ê chèng siú-léng, chiū-sī in ta̍k-cho̍k ê cho̍k-tiúⁿ, lóng lâi hōng-hiàn; in chiū-sī ta̍k chi-phài ê siú-léng, koán-lí hiah ê kè-sǹg ê lâng;

3in用in ê禮物送到耶和華ê面前，就是六張有遮蓋ê車，kap十二隻牛káng；每兩個首領一張車，ta̍k-ê首領一隻牛；in將chiah-ê lóng帶到會幕前。in ēng in ê lé-mi̍h sàng kàu Iâ-hô-hoa ê bīn-chêng, chiū-sī la̍k tiuⁿ ū jia-khàm ê chhia, kap cha̍p-jī chiah gû-káng; múi nn̄g ê siú-léng chi̍t tiuⁿ chhia, ta̍k ê siú-léng chi̍t chiah gû; in chiong chiah-ê lóng tòa kàu hōe-bō͘-chêng.

4耶和華吩咐摩西講：Iâ-hô-hoa hoan-hù Mô͘-se kóng,

5你tio̍h 對in收來，thang做會幕ê路用；將hiah-ê hō͘利未人，各照in所做ê工。Lí tio̍h tùi in siu-lâi, thang chòe hōe-bō͘ ê lō͘-ēng; chiong hiah-ê hō͘ Lī-bī lâng, kok chiàu in só͘ chòe ê kang.

6Tùi án-ni，摩西就收車kap牛，交hō͘利未人。Tùi án-ni Mô͘-se chiū siu chhia kap gû, kau hō͘ Lī-bī lâng.

7將兩張車，四隻牛，交Kek-sūn ê kiáⁿ孫，照in所做ê工。Chiong nn̄g tiuⁿ chhia, sì chiah gû, kau Kek-sūn ê kiáⁿ-sun, chiàu in só͘ chòe ê kang.

8Koh將sì-tiuⁿ車，八chiah牛，交hō͘ Bí-la̍h-lī ê kiáⁿ孫，照in所做ê工；in lóng hō͘祭司亞倫ê kiáⁿ Í-tha-má管轄。Koh chiong sì-tiuⁿ chhia, poeh chiah gû, kau hō͘ Bí-la̍h-lī ê kiáⁿ-sun, chiàu in só͘ chòe ê kang; in lóng hō͘ chè-si A-lûn ê kiáⁿ Í-tha-má koán-hat.

9總是車kap牛無交hō͘ Ko-hat ê kiáⁿ孫，因為聖所ê工屬tī in，用肩頭扛伊。Chóng-sī chhia kap gû bô kau hō͘ Ko-hat ê kiáⁿ-sun, in-ūi sèng-só͘ ê kang sio̍k tī in, ēng keng-thâu kng i.

10用油抹壇ê日，首領lóng來，行獻壇ê禮；ta̍k-ê首領就tī壇前獻in ê禮物。Ēng iû boah tôaⁿ ê ji̍t, siú-léng lóng lâi, kiâⁿ hiàn-tôaⁿ ê lé; ta̍k ê siú-léng chiū tī tôaⁿ-chêng hiàn in ê lé-mi̍h.

11耶和華kā摩西講：chiah-ê首領獻禮物，ta̍k-ê tio̍h tī伊ê日來獻，來行獻壇ê禮。Iâ-hô-hoa kā Mô͘-se kóng, Chiah ê siú-léng hiàn lé-mi̍h, ta̍k-ê tio̍h tī i ê ji̍t lâi hiàn, lâi kiâⁿ hiàn-tôaⁿ ê lé.

12頭一日獻禮物ê，是屬猶大ê支派A-bí-ná-ta̍t ê kiáⁿ Ná-sūn；Thâu-chi̍t ji̍t hiàn lé-mi̍h ê, sī sio̍k Iû-tāi ê chi-phài A-bí-ná-ta̍t ê kiáⁿ Ná-sūn;

13伊ê禮物是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

14一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

15一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

16一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

17兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是A-bí-ná-ta̍t ê kiáⁿ Ná-sūn ê禮物。nn̄g chiah gû-káng, gō͘ chiah mî-iûⁿ káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un chè; chiah-ê sī A-bí-ná-ta̍t ê kiáⁿ Ná-sūn ê lé-mi̍h.

18第二日Í-sat-ka ê首領，So͘-ap ê kiáⁿ Ná-thán-gia̍p，來獻；Tē-jī ji̍t Í-sat-ka ê siú-léng, So͘-ap ê kiáⁿ Ná-thán-gia̍p, lâi hiàn;

19伊所獻ê禮物，就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i só͘ hiàn ê lé-mi̍h, chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

20一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

21一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

22一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

23兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Só͘-ap ê kiáⁿ Ná-thán-gia̍p ê禮物。nn̄g chiah gû-káng, gō͘ chiah mî-iûⁿ káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un chè; chiah-ê sī Só͘-ap ê kiáⁿ Ná-thán-gia̍p ê lé-mi̍h.

24第三日是Se-pò͘-lûn kiáⁿ孫ê首領，Hi-lûn ê kiáⁿ Í-lī-ap；Tē-saⁿ ji̍t sī Se-pò͘-lûn kiáⁿ-sun ê siú-léng, Hi-lûn ê kiáⁿ Í-lī-ap;

25伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

26一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

27一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

28一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

29兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Hi-lûn ê kiáⁿ Í-lī-ap ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Hi-lûn ê kiáⁿ Í-lī-ap ê lé-mi̍h.

30第四日是Liû-piān kiáⁿ孫ê首領，Si-tiu-jíⁿ ê kiáⁿ Í-lī-siok；Tē-sì ji̍t sī Liû-piān kiáⁿ-sun ê siú-léng, Si-tiu-jíⁿ ê kiáⁿ Í-lī-siok;

31伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k；chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k; chit nn̄g-ê tóe-móa tiau-hô iû ê iù-mī-hún, chòe sò͘-chè;

32一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

33一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

34一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

35兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Si-tiu-jíⁿ ê kiáⁿ Í-lī-siok ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Si-tiu-jíⁿ ê kiáⁿ Í-lī-siok ê lé-mi̍h.

36第五日是西門kiáⁿ孫ê首領，So͘-lī-sa-tāi ê kiáⁿ Sī-lō͘-bia̍t；Tē-gō͘ ji̍t sī Se-biān kiáⁿ-sun ê siú-léng, So͘-lī-sa-tāi ê kiáⁿ Sī-lō͘-bia̍t;

37伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k；chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k; chit nn̄g-ê tóe-móa tiau-hô iû ê iù-mī-hún, chòe sò͘-chè;

38一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

39一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

40一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

41兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是So͘-lī-sa-tāi ê kiáⁿ Sī-lō͘-bia̍t ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī So͘-lī-sa-tāi ê kiáⁿ Sī-lō͘-bia̍t ê lé-mi̍h.

42第六日是Ka-tek kiáⁿ孫ê首領，Tiu-jíⁿ ê kiáⁿ Í-lī-ngá-sat；Tē-la̍k ji̍t sī Ka-tek kiáⁿ-sun ê siú-léng, Tiu-jíⁿ ê kiáⁿ Í-lī-ngá-sat;

43伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k；chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k; chit nn̄g-ê tóe-móa tiau-hô iû ê iù-mī-hún, chòe sò͘-chè;

44一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

45一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

46一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

47兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Tiu-jíⁿ ê kiáⁿ Í-lī-ngá-sat ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Tiu-jíⁿ ê kiáⁿ Í-lī-ngá-sat ê lé-mi̍h.

48第七日是Í-hoat-liân kiáⁿ孫ê首領，A-bí-hut ê kiáⁿ Í-lī-sa-má；Tē-chhit ji̍t sī Í-hoat-liân kiáⁿ-sun ê siú-léng, A-bí-hut ê kiáⁿ Í-lī-sa-má;

49伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

50一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

51一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t-chiah bē-móa-nî ê iûⁿ-káng-á, chòe sio-chè;

52一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

53兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是A-bí-hut ê kiáⁿ Í-lī-sa-má ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī A-bí-hut ê kiáⁿ Í-lī-sa-má ê lé-mi̍h.

54第八日是Má-ná-se kiáⁿ孫ê首領，Pí-tāi-siok ê kiáⁿ Ka-má-lia̍t；Tē-poeh ji̍t sī Má-ná-se kiáⁿ-sun ê siú-léng, Pí-tāi-siok ê kiáⁿ Ka-má-lia̍t;

55伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k；chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k; chit nn̄g-ê tóe-móa tiau-hô iû ê iù-mī-hún, chòe sò͘-chè;

56一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

57一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

58一隻山羊káng做贖罪祭；chi̍t chiah soaⁿ-iûⁿ-káng chòe sio̍k-chōe-chè;

59兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Pí-tāi-siok ê kiáⁿ Ka-má-lia̍t ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Pí-tāi-siok ê kiáⁿ Ka-má-lia̍t ê lé-mi̍h.

60第九日是便雅憫kiáⁿ孫ê首領，Ki-to-nî ê kiáⁿ A-pí-tàn；Tē-káu ji̍t sī Piān-ngá-bín kiáⁿ-sun ê siú-léng, Ki-to-nî ê kiáⁿ A-pí-tàn;

61伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k；chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k; chit nn̄g-ê tóe-móa tiau-hô iû ê iù-mī-hún, chòe sò͘-chè;

62一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

63一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

64一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

65兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Ki-to-nî ê kiáⁿ A-pí-tàn ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Ki-to-nî ê kiáⁿ A-pí-tàn ê lé-mi̍h.

66第十日是Tàn kiáⁿ孫ê首領，A-bí-sa-tāi ê kiáⁿ A-hi-í-siā；Tē-cha̍p ji̍t sī Tàn kiáⁿ-sun ê siú-léng, A-bí-sa-tāi ê kiáⁿ A-hi-í-siā;

67伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

68一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

69一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

70一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

71兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是A-bí-sa-tāi ê kiáⁿ A-hi-í-siā ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī A-bí-sa-tāi ê kiáⁿ A-hi-í-siā ê lé-mi̍h.

72第十一日是A-siat kiáⁿ孫ê首領，Gô-lân ê kiáⁿ phàⁿ-hiat；Tē-cha̍p-it ji̍t sī A-siat kiáⁿ-sun ê siú-léng, Gô-lân ê kiáⁿ Phàⁿ-hiat;

73伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

74一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

75一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

76一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

77兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Gô-lân ê kiáⁿ Phàⁿ-kiat ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Gô-lân ê kiáⁿ Phàⁿ-kiat ê lé-mi̍h.

78第十二日是Ná-hut-tha-lī kiáⁿ孫ê首領，Í-lâm ê kiáⁿ A-hi-la̍h；Tē-cha̍p-jī ji̍t sī Ná-hut-tha-lī kiáⁿ-sun ê siú-léng, Í-lâm ê kiáⁿ A-hi-la̍h;

79伊ê禮物就是一個銀盤，重一百三十sià-khek-le̍k，一個銀碗，重七十sià-khek-le̍k，lóng是照聖所ê sià-khek-le̍k，chit兩個貯滿調和油ê幼麵粉，做素祭；i ê lé-mi̍h chiū-sī chi̍t ê gûn-pôaⁿ, tāng chi̍t-pah saⁿ-cha̍p sià-khek-le̍k, chi̍t ê gûn-óaⁿ, tāng chhit-cha̍p sià-khek-le̍k, lóng sī chiàu sèng-só͘ ê sià-khek-le̍k, chit nn̄g-ê tóe-móa tiau-hô iû ê iù-mī-hún, chòe sò͘-chè;

80一個金au，重十sià-khek-le̍k，貯香滿滿；chi̍t ê kim-au, tāng cha̍p sià-khek-le̍k, tóe hiuⁿ móa-móa;

81一隻牛káng-á，一隻綿羊káng，一隻未滿年ê羊káng-á，做燒祭；chi̍t chiah gû-káng-á, chi̍t chiah mî-iûⁿ-káng, chi̍t chiah bē-móa-nî ê iûⁿ-káng-á, chòe sio-chè;

82一隻山羊káng，做贖罪祭；chi̍t chiah soaⁿ-iûⁿ-káng, chòe sio̍k-chōe-chè;

83兩隻牛káng，五隻綿羊káng，五隻山羊káng，五隻未滿年ê羊káng-á，做謝恩祭；chiah-ê是Í-lâm ê kiáⁿ A-hi-la̍h ê禮物。nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, gō͘ chiah bē-móa-nî ê iûⁿ-káng-á, chòe siā-un-chè; chiah-ê sī Í-lâm ê kiáⁿ A-hi-la̍h ê lé-mi̍h.

84用油抹壇ê日，以色列chiah-ê首領，伊tio̍h行獻壇ê禮所獻ê，就是銀盤十二個，銀碗十二個，金au十二個；Ēng iû boah-tôaⁿ ê ji̍t, Í-sek-lia̍t chiah ê siú-léng, i tio̍h kiâⁿ hiàn-tôaⁿ ê lé só͘ hiàn-ê, chiū-sī gûn-pôaⁿ cha̍p-jī ê, gûn-óaⁿ cha̍p-jī ê, kim-au cha̍p-jī ê;

85ta̍k-ê銀盤 重一百三十sià-khek-le̍k，ta̍k-ê碗重七十sià-khek-le̍k；一切器具ê銀，照聖所ê sià-khek-le̍k，共有兩千四百sià-khek-le̍k；ta̍k ê gûn-pôaⁿ tāng chi̍t-pah saⁿ-cha̍p sià-khek-le̍k, ta̍k ê óaⁿ tāng chhit-cha̍p sià-khek-le̍k; it-chhè khì-kū ê gûn, chiàu sèng-só͘ ê sià-khek-le̍k, kiōng ū nn̄g-chheng sì-pah sià-khek-le̍k;

86十二個金au 貯香滿滿，照聖所ê sià-khek-le̍k，ta̍k-ê au 重十sià-khek-le̍k；chiah-ê au ê金，重共一百二十sià-khek-le̍k；cha̍p-jī ê kim-au tóe hiuⁿ móa-móa, chiàu sèng-só͘ ê sià-khek-le̍k, ta̍k ê au tāng cha̍p sià-khek-le̍k; chiah ê au ê kim, tāng kiōng chi̍t-pah jī-cha̍p sià-khek-le̍k;

87做燒祭ê cheng-siⁿ，共牛káng十二隻，羊káng十二隻，未滿年ê羊káng-á十二隻，kap同獻ê素祭做贖罪祭 ê山羊káng十二隻；chòe sio-chè ê cheng-siⁿ, kiōng gû-káng cha̍p-jī chiah, iûⁿ-káng cha̍p-jī chiah, bē-móa-nî ê iûⁿ-káng-á cha̍p-jī chiah, kap tâng hiàn ê sò͘-chè chòe sio̍k-chōe-chè ê soaⁿ-iûⁿ-káng cha̍p-jī chiah;

88做謝恩祭ê cheng-siⁿ，共牛káng二十四隻，綿羊káng六十隻，山羊káng六十隻，未滿年ê羊káng-á六十隻；chiah-ê就是用油抹壇了後，為tio̍h行獻壇ê禮所獻ê。chòe siā-un-chè ê cheng-siⁿ, kiōng gû-káng jī-cha̍p-sì chiah, mî-iûⁿ-káng la̍k-cha̍p chiah, soaⁿ-iûⁿ-káng la̍k-cha̍p chiah, bē-móa-nî ê iûⁿ-káng-á la̍k-cha̍p chiah; chiah-ê chiū-sī ēng iû boah-tôaⁿ liáu-āu, ūi-tio̍h kiâⁿ hiàn-tôaⁿ ê lé só͘ hiàn-ê.

89摩西入會幕，beh kap耶和華講話ê時，聽見法櫃施恩所ê頂面，兩個ki-lō͘-peng ê中間，kap伊講話ê聲，就是耶和華kap伊講。Mô͘-se ji̍p hōe-bō͘, beh kap Iâ-hô-hoa kóng ōe ê sî, thiaⁿ-kìⁿ hoat-kūi si-un-só͘ ê téng-bīn, nn̄g ê ki-lō͘-peng ê tiong-kan, kap i kóng-ōe ê Siaⁿ, chiū-sī Iâ-hô-hoa kap i kóng.