1耶和華吩咐摩西講：Iâ-hô-hoa hoan-hù Mô͘-se kóng,

2你吩咐亞倫kā伊講，你點燈ê時，七盞燈lóng tio̍h照光燈台前。Lí hoan-hù A-lûn kā i kóng, Lí tiám teng ê sî, chhit-chóaⁿ teng lóng tio̍h chiò-kng teng-tâi chêng.

3亞倫照án-ni行，點燈照光tī燈台前，是照耶和華命令摩西ê。A-lûn chiàu án-ni kiâⁿ, tiám teng chiò-kng tī teng-tâi chêng, sī chiàu Iâ-hô-hoa bēng-lēng Mô͘-se ê.

4Chit-ê燈台ê做法，是用金phah-ê，連伊ê座kap伊ê花lóng是phah ê。摩西製造燈台，是照耶和華所指示ê款式。Chit ê teng-tâi ê chòe-hoat, sī ēng kim phah-ê, liân i ê chō kap i ê hoe lóng sī phah ê. Mô͘-se chè-chō teng-tâi, sī chiàu Iâ-hô-hoa só͘ chí-sī ê khoán-sit.

5耶和華吩咐摩西講：Iâ-hô-hoa hoan-hù Mô͘-se kóng,

6你tio̍h tùi以色列人ê中間揀出利未人，hō͘ in清氣。Lí tio̍h tùi Í-sek-lia̍t lâng ê tiong-kan kéng-chhut Lī-bī lâng, hō͘ in chheng-khì.

7Hō͘ in清氣tio̍h án-ni行；用除去罪ê水hiù tī in身軀；koh kah in用剃頭刀，剃thong身軀，洗衣服，清氣本身。Hō͘ in chheng-khì tio̍h án-ni kiâⁿ; ēng tû-khì chōe ê chúi hiù tī in seng-khu; koh kah in ēng thì-thâu-to, thì thong seng-khu, sóe i-ho̍k, chheng-khì pún-sin.

8後來in tio̍h 取一隻牛káng-á，kap伊ê素祭，就是調和油ê幼麵粉；你tio̍h另外取一隻牛káng-á做贖罪祭。Āu-lâi in tio̍h chhú chi̍t chiah gû-káng-á, kap i ê sò͘-chè, chiū-sī tiau-hô iû ê iù-mī-hún; lí tio̍h lēng-gōa chhú chi̍t chiah gû-káng-á chòe sio̍k-chōe-chè.

9你tio̍h chhōa利未人到會幕前，聚集以色列族ê全會。Lí tio̍h chhōa Lī-bī lâng kàu hōe-bō͘ chêng, chū-chi̍p Í-sek-lia̍t cho̍k ê choân-hōe.

10Koh chhōa利未人到耶和華ê面前；以色列人tio̍h按手tī利未人ê頂面。Koh chhōa Lī-bī lâng kàu Iâ-hô-hoa ê bīn-chêng; Í-sek-lia̍t lâng tio̍h hōaⁿ-chhiú tī Lī-bī lâng ê téng-bīn.

11亞倫tio̍h獻利未人tī耶和華ê面前，做以色列人ê搖祭，hō͘ in thang做服事耶和華ê工。A-lûn tio̍h hiàn Lī-bī lâng tī Iâ-hô-hoa ê bīn-chêng, chòe Í-sek-lia̍t lâng ê iô-chè, hō͘ in thang chòe ho̍k-sāi Iâ-hô-hoa ê kang.

12利未人tio̍h按手tī hiah-ê牛káng-á ê頭殼頂；你tio̍h獻一隻做贖罪祭，koh獻一隻做燒祭，hō͘耶和華，kā利未人贖罪。Lī-bī lâng tio̍h hōaⁿ-chhiú tī hiah ê gû-káng-á ê thâu-khak-téng; Lí tio̍h hiàn chi̍t-chiah chòe sio̍k-chōe-chè, koh hiàn chi̍t-chiah chòe sio-chè, hō͘ Iâ-hô-hoa, kā Lī-bī lâng sio̍k-chōe.

13你tio̍h hō͘利未人khiā tī亞倫kap伊ê kiáⁿ ê面前，獻in做搖祭hō͘耶和華。Lí tio̍h hō͘ Lī-bī lâng khiā tī A-lûn kap i ê kiáⁿ ê bīn-chêng, hiàn in chòe iô-chè hō͘ Iâ-hô-hoa.

14Án-ni，你tio̍h tùi以色列人分別利未人，就利未人beh歸tī我。Án-ni, lí tio̍h tùi Í-sek-lia̍t lâng hun-piat Lī-bī lâng, chiū Lī-bī lâng beh kui tī Góa.

15Chit-tia̍p了後，利未人tio̍h入去做會幕ê工；你tio̍h hō͘ in清氣，獻in做搖祭。Chit-tia̍p liáu-āu Lī-bī lâng tio̍h ji̍p-khì chòe hōe-bō͘ ê kang; lí tio̍h hō͘ in chheng-khì, hiàn in chòe iô-chè.

16因為in是tùi以色列中完全歸我ê；我揀in屬tī我，來替一切頭胎ê，就是以色列人ê頭chiūⁿ-ê。In-ūi in sī tùi Í-sek-lia̍t tiong oân-choân kui Góa-ê; Góa kéng in sio̍k tī Góa, lâi thòe it-chhè thâu-the-ê, chiū-sī Í-sek-lia̍t lâng ê thâu-chiūⁿ-ê.

17因為以色列中一切頭chiūⁿ生ê，或是人，或是cheng-siⁿ，lóng是我ê。我tī埃及地phah死一切頭chiūⁿ生ê hit日，已經分別in做聖，歸tī我。In-ūi Í-sek-lia̍t tiong it-chhè thâu-chiūⁿ-siⁿ-ê, he̍k-sī lâng, he̍k-sī cheng-siⁿ, lóng sī Góa-ê. Góa tī Ai-ki̍p tōe phah-sí it-chhè thâu-chiūⁿ-siⁿ-ê hit-ji̍t, í-keng hun-piat in chòe-sèng, kui tī Góa.

18我揀利未人，替以色列人一切頭chiūⁿ生ê。Góa kéng Lī-bī lâng, thòe Í-sek-lia̍t lâng it-chhè thâu-chiūⁿ-siⁿ-ê.

19我tùi以色列人中，揀利未人，賞賜亞倫kap伊ê kiáⁿ孫，thang替以色列人做會幕ê差用，koh為以色列人贖罪；免得以色列人óa近聖所ê時，有災禍到以色列人ê中間。Góa tùi Í-sek-lia̍t lâng tiong, kéng Lī-bī lâng, siúⁿ-sù A-lûn kap i ê kiáⁿ-sun, thang thòe Í-sek-lia̍t lâng chòe hōe-bō͘ ê chhe-ēng, koh ūi Í-sek-lia̍t lâng sio̍k-chōe; bián-tit Í-sek-lia̍t lâng óa-kūn sèng-só͘ ê sî, ū chai-ē kàu Í-sek-lia̍t lâng ê tiong-kan.

20摩西、亞倫kap以色列人全會，就對利未人án-ni行；見若耶和華論起利未人所命令摩西ê，以色列人就對in án-ni行。Mô͘-se A-lûn kap Í-sek-lia̍t lâng choân-hōe, chiū tùi Lī-bī lâng án-ni kiâⁿ; kìⁿ-nā Iâ-hô-hoa lūn-khí Lī-bī lâng só͘ bēng-lēng Mô͘-se ê, Í-sek-lia̍t lâng chiū tùi in án-ni kiâⁿ.

21Tùi án-ni，利未人清氣家己，除去罪，洗in ê衣服；亞倫將in獻做搖祭tī耶和華ê面前；亞倫koh為in贖罪來清氣伊n。Tùi án-ni Lī-bī lâng chheng-khì ka-kī, tû-khì chōe, sóe in ê i-ho̍k; A-lûn chiong in hiàn-chòe iô-chè tī Iâ-hô-hoa ê bīn-chêng; A-lûn koh ūi in sio̍k-chōe lâi chheng-khì in.

22然後利未人入去，tī亞倫kap伊ê kiáⁿ ê面前，tī會幕中做in ê工；耶和華論利未人來命令摩西ê，以色列人就án-ni對in行。Jiân-āu Lī-bī lâng ji̍p-khì, tī A-lûn kap i ê kiáⁿ ê bīn-chêng, tī hōe-bō͘ tiong chòe in ê kang; Iâ-hô-hoa lūn Lī-bī lâng lâi bēng-lēng Mô͘-se ê, Í-sek-lia̍t lâng chiū án-ni tùi in kiâⁿ.

23耶和華吩咐摩西講：Iâ-hô-hoa hoan-hù Mô͘-se kóng,

24論利未人是án-ni： tùi二十五歲以上，in tio̍h來會幕，做差用。Lūn Lī-bī lâng sī án-ni: tùi jī-cha̍p-gō͘ hè í-siōng, in tio̍h lâi hōe-bō͘, chòe chhe-ēng.

25到五十歲就停工，無koh做差用；Kàu gō͘-cha̍p hè chiū thêng-kang, bô koh chòe chhe-ēng;

26獨獨tio̍h tī會幕，kap in ê兄弟相kap伺候，守所交代ê，無koh做工；論到所交代利未人ê，你tio̍h 對in án-ni行。to̍k-to̍k tio̍h tī hōe-bō͘, kap in ê hiaⁿ-tī saⁿ-kap su-hāu, siú só͘ kau-tài ê, bô koh chòe kang; lūn-kàu só͘ kau-tài Lī-bī lâng-ê, lí tio̍h tùi in án-ni kiâⁿ.

1出埃及二年正月，耶和華tī西奈曠野，命令摩西講：Chhut Ai-ki̍p jī-nî chiaⁿ-ge̍h, Iâ-hô-hoa tī Se-nái khòng-iá, bēng-lēng Mô͘-se kóng,

2以色列人應該tī定tio̍h ê日期守Pôaⁿ過節；Í-sek-lia̍t lâng eng-kai tī tiāⁿ-tio̍h ê ji̍t-kî siú pôaⁿ-kè-choeh;

3tī本月十四日黃昏ê時，lín tio̍h tī所定tio̍h ê日守伊，照伊一切ê律例，一切ê法度來守伊。tī pún-ge̍h cha̍p-sì ji̍t hông-hun ê sî, lín tio̍h tī só͘ tiāⁿ-tio̍h ê ji̍t siú i, chiàu i it-chhè ê lu̍t-lē, it-chhè ê hoat-tō͘ lâi siú i.

4Tùi án-ni，摩西吩咐以色列人守Pôaⁿ過節。Tùi án-ni Mô͘-se hoan-hù Í-sek-lia̍t lâng siú pôaⁿ-kè-choeh.

5正月十四日黃昏ê時，in就tī西奈ê曠野，守Pôaⁿ過節；見若耶和華所命令摩西ê，以色列人lóng照án-ni行。Chiaⁿ-ge̍h cha̍p-sì ji̍t hông-hun ê sî, in chiū tī Se-nái ê khòng-iá, siú pôaⁿ-kè-choeh; kìⁿ-nā Iâ-hô-hoa só͘ bēng-lēng Mô͘-se ê, Í-sek-lia̍t lâng lóng chiàu án-ni kiâⁿ.

6有kúi-nā人hō͘人ê身屍bak lâ-sâm，bōe會tī hit日守Pôaⁿ過節；當hit日in到摩西、亞倫ê面前。Ū kúi-nā lâng hō͘ lâng ê sin-si bak lâ-sâm, bōe-ōe tī hit-ji̍t siú pôaⁿ-kè-choeh; tng hit-ji̍t in kàu Mô͘-se A-lûn ê bīn-chêng.

7Hiah-ê人kā in講：阮因為hō͘人ê身屍bak lâ-sâm，啥事阻擋阮bōe-thang tī以色列中，tī所定tio̍h ê日期獻禮物hō͘耶和華ah？Hiah ê lâng kā in kóng, Goán in-ūi hō͘ lâng ê sin-si bak lâ-sâm, siáⁿ-sū chó͘-tòng goán bōe thang tī Í-sek-lia̍t tiong, tī só͘ tiāⁿ-tio̍h ê ji̍t-kî hiàn lé-mi̍h hō͘ Iâ-hô-hoa ah?

8摩西kā in講：Lín khiā-teh thèng候，我beh聽耶和華怎樣吩咐lín。Mô͘-se kā in kóng, Lín khiā-teh thèng-hāu, góa beh thiaⁿ Iâ-hô-hoa cháiⁿ-iūⁿ hoan-hù lín.

9耶和華吩咐摩西講：Iâ-hô-hoa hoan-hù Mô͘-se kóng,

10你tio̍h吩咐以色列人講：或是lín á是lín ê後裔ê中間，若有人hō͘身屍bak lâ-sâm，á是遠遠tī路裡，猶原tio̍h守耶和華ê Pôaⁿ過節。Lí tio̍h hoan-hù Í-sek-lia̍t lâng kóng, He̍k-sī lín á-sī lín ê hō͘-è ê tiong-kan, nā ū lâng hō͘ sin-si bak lâ-sâm, á-sī hn̄g-hn̄g tī lō͘-ni̍h, iû-goân tio̍h siú Iâ-hô-hoa ê pôaⁿ-kè-choeh.

11In tio̍h tī二月十四日黃昏ê時來守伊，chham無酵餅kap苦菜來食。In tio̍h tī jī-ge̍h cha̍p-sì ji̍t hông-hun ê sî lâi siú i, chham bô-kàⁿ piáⁿ kap khó͘-chhài lâi chia̍h.

12M̄-thang留一點á到隔早起，羊á ê骨一支也m̄-thang phah折；in tio̍h照Pôaⁿ過節chiah-ê律例來守伊。M̄-thang lâu chi̍t-tiám-á kàu keh chá-khí, iûⁿ-á ê kut chi̍t-ki iā m̄-thang phah-chi̍h; in tio̍h chiàu pôaⁿ-kè-choeh chiah ê lu̍t-lē lâi siú i.

13總是人若清氣也m̄是tī路中，若家己推辭m̄守Pôaⁿ過節，tio̍h tùi伊ê百姓中剪除hit-ê人，因為伊tī所定tio̍h ê日無獻禮物hō͘耶和華，hit人tio̍h擔當伊ê罪。Chóng-sī lâng nā chheng-khì iā m̄-sī tī lō͘-tiong, nā ka-kī the-sî m̄ siú pôaⁿ-kè-choeh, tio̍h tùi i ê peh-sìⁿ-tiong chián-tû hit ê lâng, in-ūi i tī só͘ tiāⁿ-tio̍h ê ji̍t bô hiàn lé-mi̍h hō͘ Iâ-hô-hoa, hit-lâng tio̍h tam-tng i ê chōe.

14若有外人寄腳tī lín中間，ài守耶和華ê Pôaⁿ過節，伊tio̍h照Pôaⁿ過節ê律例法度來行；出外人kap本地人tio̍h同一個律例來行。Nā ū gōa-lâng kià-kha tī lín tiong-kan, ài siú Iâ-hô-hoa ê pôaⁿ-kè-choeh, i tio̍h chiàu pôaⁿ-kè-choeh ê lu̍t-lē hoat-tō͘ lâi kiâⁿ; chhut-gōa lâng kap pún-tōe lâng tio̍h tâng chi̍t ê lu̍t-lē lâi kiâⁿ.

15起會幕hit日，有雲遮伊ê會幕，就是證據ê布棚；tùi ê-hng到早起，有親像火ê款式蓋tī會幕。Khí hōe-bō͘ hit-ji̍t, ū hûn jia i ê hōe-bō͘, chiū-sī chèng-kù ê pò͘-pîⁿ; tùi ê-hng kàu chá-khí, ū chhin-chhiūⁿ hé ê khoán-sit khàm tī hōe-bō͘.

16常常是án-ni；雲遮伊，暝時親像火ê款式。Siông-siông sī án-ni; hûn jia i, mî-sî chhin-chhiūⁿ hé ê khoán-sit.

17雲tùi布棚收chiūⁿ去，以色列人就起身；雲停ê所在，以色列人就紮營tī-hia。Hûn tùi pò͘-pîⁿ siu chiūⁿ-khì, Í-sek-lia̍t lâng chiū khí-sin; hûn thêng ê só͘-chāi, Í-sek-lia̍t lâng chiū chat-iâⁿ tī-hia.

18以色列人照耶和華ê命令起身，也照耶和華ê命令安營；雲停tī會幕頂ê時，in猶原安營tī-hia。Í-sek-lia̍t lâng chiàu Iâ-hô-hoa ê bēng-lēng khí-sin, iā chiàu Iâ-hô-hoa ê bēng-lēng an-iâⁿ; hûn thêng tī hōe-bō͘-téng ê sî, in iû-goân an-iâⁿ tī-hia.

19雲tī會幕頂停chōe-chōe日，以色列人就守耶和華所交代ê，無起身。Hûn tī hōe-bō͘-téng thêng chōe-chōe ji̍t, Í-sek-lia̍t lâng chiū siú Iâ-hô-hoa só͘ kau-tài ê, bô khí-sin.

20有時雲tī會幕頂kúi-nā日，in照耶和華ê命令猶原安營tī-hia，也照耶和華ê命令起身。Ū-sî hûn tī hōe-bō͘-téng kúi-nā ji̍t, in chiàu Iâ-hô-hoa ê bēng-lēng iû-goân an-iâⁿ tī-hia, iā chiàu Iâ-hô-hoa ê bēng-lēng khí-sin.

21有時雲遮teh tùi ê-hng到早起，早起時雲收上去，in就起身；無論日時暝時雲收上去，in就起身。Ū-sî hûn jia-teh tùi ê-hng kàu chá-khí, chá-khí sî hûn siu chiūⁿ-khì, in chiū khí-sin; bô-lūn ji̍t-sî mî-sî hûn siu chiūⁿ-khì, in chiū khí-sin.

22雲停tī會幕，無論是兩日，是一月日，是一年，以色列人猶原安營tī-hia，無起身；總是雲收chiūⁿ去，in就起身。Hûn thêng tī hōe-bō͘, bô-lūn sī nn̄g-ji̍t, sī chi̍t-ge̍h-ji̍t, sī chi̍t-nî, Í-sek-lia̍t lâng iû-goân an-iâⁿ tī-hia, bô khí-sin; chóng-sī hûn siu chiūⁿ-khì, in chiū khí-sin.

23In thàn耶和華ê命令安營，也thàn耶和華ê命令起身；in守耶和華所交代ê，lóng照耶和華託摩西所命令ê。In thàn Iâ-hô-hoa ê bēng-lēng an-iâⁿ, iā thàn Iâ-hô-hoa ê bēng-lēng khí-sin; in siú Iâ-hô-hoa só͘ kau-tài ê, lóng chiàu Iâ-hô-hoa thok Mô͘-se só͘ bēng-lēng ê.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h用銀phah兩支號頭，用phah ê法來做，hō͘你用來聚集會眾，也hō͘ ta̍k營起身。Lí tio̍h ēng gûn phah nn̄g ki hō-thâu, ēng phah ê hoat lâi chòe, hō͘ lí ēng lâi chū-chi̍p hōe-chiòng, iā hō͘ ta̍k-iâⁿ khí-sin.

3Pûn hiah-ê ê時，全會眾人tio̍h到你hia，聚集tī會幕門口。Pûn hiah-ê ê sî, choân-hōe chèng-lâng tio̍h kàu lí hia, chū-chi̍p tī hōe-bō͘ mn̂g-kháu.

4若kan-ta pûn一支，眾首領，就是以色列ê族長，tio̍h聚集到你hia。Nā kan-ta pûn chi̍t-ki, chèng siú-léng, chiū-sī Í-sek-lia̍t ê cho̍k-tiúⁿ, tio̍h chū-chi̍p kàu lí hia.

5Pûn大聲ê時，東pêng所安ê營lóng tio̍h起身。Pûn tōa-siaⁿ ê sî, tang-pêng só͘ an ê iâⁿ lóng tio̍h khí-sin.

6第二pái pûn大聲ê時，南pêng所安ê營tio̍h起身；in beh起身的確pûn大聲。Tē-jī pái pûn tōa-siaⁿ ê sî, lâm-pêng só͘ an ê iâⁿ tio̍h khí-sin; in beh khí-sin tek-khak pûn tōa-siaⁿ.

7若beh聚集會眾，lín tio̍h pûn號頭，總是m̄-thang pûn大聲。Nā beh chū-chi̍p hōe-chiòng, lín tio̍h pûn hō-thâu, chóng-sī m̄-thang pûn tōa-siaⁿ.

8亞倫ê kiáⁿ孫做祭司ê，tio̍h pûn hiah-ê號頭；這beh做lín代代永遠ê例。A-lûn ê kiáⁿ-sun chòe chè-si ê, tio̍h pûn hiah ê hō-thâu; che beh chòe lín tāi-tāi éng-oán ê lē.

9Lín tī本地kap欺壓lín ê對敵交戰，就tio̍h用號頭pûn大聲，就tī耶和華lín ê上帝ê面前得tio̍h記念，也beh得tio̍h救脫離lín ê對敵。Lín tī pún-tōe kap khi-ap lín ê tùi-te̍k kau-chiàn, chiū tio̍h ēng hō-thâu pûn tōa-siaⁿ, chiū tī Iâ-hô-hoa lín ê Siōng-tè ê bīn-chêng tit-tio̍h kì-liām, iā beh tit-tio̍h kiù thoat-lī lín ê tùi-te̍k.

10也tī lín快樂ê日，kap節期，kap月ê初一，是tī lín獻燒祭kap謝恩祭ê時，也tio̍h pûn號頭；這lóng beh tī lín ê上帝ê面前做記念；我是耶和華lín ê上帝。Iā tī lín khoài-lo̍k ê ji̍t, kap choeh-kî, kap ge̍h ê chhoe-it, sī tī lín hiàn sio-chè kap siā-un-chè ê sî, iā tio̍h pûn hō-thâu; che lóng beh tī lín ê Siōng-tè ê bīn-chêng chòe kì-liām; Góa sī Iâ-hô-hoa lín ê Siōng-tè.

11第二年二月二十日，雲tùi證據ê會幕收chiūⁿ去。Tē-jī nî jī-ge̍h jī-cha̍p ji̍t, hûn tùi chèng-kù ê hōe-bō͘ siu chiūⁿ-khì.

12以色列人就照in ê路站起身，離開西奈ê曠野；雲停tī Pa-lân ê曠野。Í-sek-lia̍t lâng chiū chiàu in ê lō͘-chām khí-sin, lī-khui Se-nái ê khòng-iá; hûn thêng tī Pa-lân ê khòng-iá.

13這是in照耶和華託摩西所命令ê，頭一pái起身。Che sī in chiàu Iâ-hô-hoa thok Mô͘-se só͘ bēng-lēng-ê, thâu-chi̍t-pái khí-sin.

14照in ê軍隊做頭起身ê，是猶大族ê營ê大旗；軍隊ê統領是A-bí-ná-ta̍t ê kiáⁿ Ná-sūn。Chiàu in ê kun-tūi chòe-thâu khí-sin ê, sī Iû-tāi cho̍k ê iâⁿ ê tōa-kî; kun-tūi ê thóng-léng sī A-bí-ná-ta̍t ê kiáⁿ Ná-sūn.

15Í-sat-ka支派軍隊ê統領是So͘-ap ê kiáⁿ Ná-thán-gia̍p。Í-sat-ka chi-phài kun-tūi ê thóng-léng sī So͘-ap ê kiáⁿ Ná-thán-gia̍p.

16Se-pò͘-lûn ê支派軍隊ê統領是Hi-lûn ê kiáⁿ Í-lī-ap。Se-pò͘-lûn ê chi-phài kun-tūi ê thóng-léng sī Hi-lûn ê kiáⁿ Í-lī-ap.

17會幕就拆起來；扛會幕ê，Kek-sūn ê kiáⁿ孫kap Bí-la̍h-lī ê kiáⁿ孫起身行。Hōe-bō͘ chiū thiah-khí-lâi; kng hōe-bō͘-ê, Kek-sūn ê kiáⁿ-sun kap Bí-la̍h-lī ê kiáⁿ-sun khí-sin kiâⁿ.

18照伊ê軍隊，Liû-piān營ê大旗起身；伊ê軍隊ê統領是Sī-tiu-jíⁿ ê kiáⁿ Í-lī-siok。Chiàu i ê kun-tūi, Liû-piān iâⁿ ê tōa-kî khí-sin; i ê kun-tūi ê thóng-léng sī Sī-tiu-jíⁿ ê kiáⁿ Í-lī-siok.

19西門支派軍隊ê統領是So͘-lī-sa-tāi ê kiáⁿ Sī-lō͘-bia̍t。Se-biān chi-phài kun-tūi ê thóng-léng sī So͘-lī-sa-tāi ê kiáⁿ Sī-lō͘-bia̍t.

20Ka-tek支派軍隊ê統領是Tiu-jíⁿ ê kiáⁿ Í-lī-ngá-sat。Ka-tek chi-phài kun-tūi ê thóng-léng sī Tiu-jíⁿ ê kiáⁿ Í-lī-ngá-sat.

21Ko-hat人扛聖物ê起身行；in bē到ê事先，hiah-ê人會幕已經搭好。Ko-hat lâng kng sèng-mi̍h-ê khí-sin kiâⁿ; in bē kàu ê tāi-seng, hiah ê lâng hōe-bō͘ í-keng tah hó.

22照伊ê軍隊，Í-hoat-liân營ê大旗起身；伊ê軍隊ê統領是A-bí-hut ê kiáⁿ Í-lī-sa-má。Chiàu i ê kun-tūi, Í-hoat-liân iâⁿ ê tōa-kî khí-sin; i ê kun-tūi ê thóng-léng sī A-bí-hut ê kiáⁿ Í-lī-sa-má.

23Má-ná-se支派軍隊ê統領是Pí-tāi-siok ê kiáⁿ Ka-má-lia̍t。Má-ná-se chi-phài kun-tūi ê thóng-léng sī Pí-tāi-siok ê kiáⁿ Ka-má-lia̍t.

24便雅憫支派軍隊ê統領是Ki-to-nî ê kiáⁿ A-pí-tàn。Piān-ngá-bín chi-phài kun-tūi ê thóng-léng sī Ki-to-nî ê kiáⁿ A-pí-tàn.

25做chiah-ê營ê路尾隊ê，是Tàn ê營ê大旗，照伊ê軍隊起身；伊ê軍隊ê統領是A-bí-sa-tāi ê kiáⁿ A-hi-í-siā。Chòe chiah ê iâⁿ ê lō͘-bé tūi ê, sī Tàn ê iâⁿ ê tōa-kî, chiàu i ê kun-tūi khí-sin; i ê kun-tūi ê thóng-léng sī A-bí-sa-tāi ê kiáⁿ A-hi-í-siā.

26A-siat支派軍隊ê統領是Gô-lân ê kiáⁿ Phàⁿ-kiat。A-siat chi-phài kun-tūi ê thóng-léng sī Gô-lân ê kiáⁿ Phàⁿ-kiat.

27Ná-hut-tha-lī支派軍隊ê統領是Í-lâm ê kiáⁿ A-hi-la̍h。Ná-hut-tha-lī chi-phài kun-tūi ê thóng-léng sī Í-lâm ê kiáⁿ A-hi-la̍h.

28以色列人照伊ê軍隊起身，伊ê隊伍就是án-ni。Í-sek-lia̍t lâng chiàu i ê kun-tūi khí-sin, i ê tūi-ngó͘ chiū-sī án-ni.

29摩西對伊ê外戚米甸人Liû-jíⁿ ê kiáⁿ Hô-pa講：阮beh去耶和華所bat講：我用伊賞賜lín ê地，請你kap阮來去，阮beh好款待你；因為耶和華已經應允賜福氣hō͘以色列人。Mô͘-se tùi i ê gōa-chhek Bí-tiân lâng Liû-jíⁿ ê kiáⁿ Hô-pa kóng, Goán beh khì Iâ-hô-hoa só͘ bat kóng, Góa ēng i siúⁿ-sù lín ê tōe, chhiáⁿ lí kap goán lâi-khì, goán beh hó khoán-thāi lí; in-ūi Iâ-hô-hoa í-keng èng-ún sù hok-khì hō͘ Í-sek-lia̍t lâng.

30伊應講，我m̄去，我beh tò去我ê本地本族hia。I ìn kóng, Góa m̄ khì, góa beh tò-khì góa ê pún-tōe pún-cho̍k hia.

31摩西講：求你m̄-thang離開阮，因為你知阮tī曠野tio̍h怎樣紮營；你thang做阮ê目睭。Mô͘-se kóng, Kiû lí m̄-thang lī-khui goán, in-ūi lí chai goán tī khòng-iá tio̍h cháiⁿ-iūⁿ chat-iâⁿ; lí thang chòe goán ê ba̍k-chiu.

32你若beh kap阮去，見若耶和華所hō͘阮ê福氣，阮也的確án-ni hō͘你。Lí nā beh kap goán khì, kìⁿ-nā Iâ-hô-hoa só͘ hō͘ goán ê hok-khì, goán iā tek-khak án-ni hō͘ lí.

33In離開耶和華ê山，起身行三日ê路站；耶和華ê約櫃tī頭前行三日ê路站，kā in chhē安歇ê所在。In lī-khui Iâ-hô-hoa ê soaⁿ, khí-sin kiâⁿ saⁿ-ji̍t ê lō͘-chām; Iâ-hô-hoa ê iok-kūi tī thâu-chêng kiâⁿ saⁿ-ji̍t ê lō͘-chām, kā in chhē an-hioh ê só͘-chāi.

34In撤營起身，日時耶和華ê雲tī in ê頂面。In thiat-iâⁿ khí-sin, ji̍t-sî Iâ-hô-hoa ê hûn tī in ê téng-bīn.

35約櫃起身ê時，摩西就講：耶和華ah，求你起來；願你ê對敵四散；願怨恨你ê人tī你ê面前逃走。Iok-kūi khí-sin ê sî, Mô͘-se chiū kóng, Iâ-hô-hoa ah, kiû Lí khí-lâi; goān Lí ê tùi-te̍k sì-sòaⁿ; goān oàn-hūn Lí ê lâng tī Lí ê bīn-chêng tô-cháu.

36約櫃停ê時，伊就講：耶和華ah，求你tò來到以色列千千萬萬人ê中間。Iok-kūi thêng ê sî, i chiū kóng, Iâ-hô-hoa ah, kiû Lí tò-lâi kàu Í-sek-lia̍t chheng-chheng bān-bān lâng ê tiong-kan.