1我看見主khiā tī祭壇邊；祂講，你tio̍h phah柱斗，hō͘門碇振動；phah碎伊來傷tio̍h眾人ê頭殼；in所chhun ê人，我beh用刀thâi，無一個走能離；無一個能得tio̍h救。Góa khòaⁿ-kìⁿ Chú khiā tī chè-tôaⁿ-piⁿ; I kóng, Lí tio̍h phah thiāu-táu, hō͘ mn̂g-tēng tín-tāng; phah-chhùi i lâi siong-tio̍h chèng-lâng ê thâu-khak; in só͘ chhun ê lâng, Góa beh ēng to thâi, bô chi̍t-ê cháu ōe lī; bô chi̍t-ê ōe tit-tio̍h kiù.

2In雖然掘到陰間，我ê手beh tùi-hia掠in出來；雖然上到天，我beh tùi-hia掠in落來；In sui-jiân ku̍t kàu im-kan, Góa ê chhiú beh tùi-hia lia̍h in chhut-lâi; sui-jiân chiūⁿ kàu thiⁿ, Góa beh tùi-hia lia̍h in lo̍h--lâi;

3雖然bih tī迦密山頂，我beh chhiau-chhē，tùi-hia掠in出來；雖然閃避我ê目睭前，bih tī海底，我beh tùi-hia命令蛇，伊beh kā in；sui-jiân bih tī Ka-bi̍t soaⁿ-téng, Góa beh chhiau-chhē, tùi-hia lia̍h in chhut-lâi; sui-jiân siám-pī Góa ê ba̍k-chiu-chêng, bih tī hái-tóe, Góa beh tùi-hia bēng-lēng chôa, i beh kā in;

4雖然受掠tī對敵ê面前，我beh tùi-hia命令刀劍，伊beh thâi in；我beh注目看伊，是beh降災厄，m̄是beh降福氣。sui-jiân siū-lia̍h tī tùi-te̍k ê bīn-chêng, Góa beh tùi-hia bēng-lēng to-kiàm, i beh thâi in; Góa beh chù-ba̍k khòaⁿ i, sī beh kàng chai-ē, m̄-sī beh kàng hok-khì.

5因為主萬軍ê耶和華摸地，地就消溶；見若khiā起hit中間ê beh悲哀，全地beh親像大河漲起來，亦beh退低親像埃及河。In-ūi Chú bān-kun ê Iâ-hô-hoa bong tōe, tōe chiū siau-iûⁿ; kìⁿ-nā khiā-khí hit tiong-kan--ê beh pi-ai, choân-tōe beh chhin-chhiūⁿ Tōa-hô tiòng--khí-lâi, ia̍h beh thè-kē chhin-chhiūⁿ Ai-ki̍p hô.

6Tī天頂起祂ê房間，tī地上hē穹蒼ê地基，叫海水來piàⁿ tī地裡ê，祂ê名是耶和華。Tī thiⁿ-téng khí I ê pâng-keng, tī tōe-chiūⁿ hē kiong-chhong ê tōe-ki, kiò hái-chúi lâi piàⁿ tī tōe--nih-ê, I ê miâ sī Iâ-hô-hoa.

7耶和華講，以色列人ah，我kiám無看lín親像Kó͘-si̍t人mah？我kiám m̄是chhōa以色列人出埃及地，腓利士人出Ka-hui-thok，A-lân人出Kiat-jíⁿ mah？Iâ-hô-hoa kóng, Í-sek-lia̍t lâng ah, Góa kiám-bô khòaⁿ lín chhin-chhiūⁿ Kó͘-si̍t lâng mah? Góa kiám-m̄-sī chhōa Í-sek-lia̍t lâng chhut Ai-ki̍p tōe, Hui-lī-sū lâng chhut Ka-hui-thok, A-lân lâng chhut Kiat-jíⁿ mah?

8看ah，主耶和華注目看chit-ê有罪ê國，我beh tùi地上滅伊；總是無beh一盡滅雅各ê家。這是耶和華講ê。Khòaⁿ ah, Chú Iâ-hô-hoa chù-ba̍k khòaⁿ chit ê ū-chōe ê kok, Góa beh tùi tōe-chiūⁿ bia̍t--i; chóng-sī bô beh it-chīn bia̍t Ngá-kok ê ke. che sī Iâ-hô-hoa kóng--ê.

9看ah，我beh出命令tī萬國中簸以色列家，親像用簸箕簸五穀，無一粒tēng-ê ka-la̍uh地。Khòaⁿ ah, Góa beh chhut bēng-lēng tī bān-kok-tiong pòa Í-sek-lia̍t-ke, chhin-chhiūⁿ ēng pòa-ki pòa gō͘-kak, bô chi̍t-lia̍p tēng--ê ka-la̍uh tōe.

10我ê百姓中間lóng總有罪ê人講，災厄bōe jip-tio̍h阮，亦bōe tú-tio̍h阮ê，in beh死tī刀下。Góa ê peh-sìⁿ tiong-kan lóng-chóng ū-chōe ê lâng kóng, Chai-ē bōe jip-tio̍h goán, ia̍h bōe tú-tio̍h goán-ê, in beh sí tī to-ē.

11到hit日，大衛已經倒ê布棚，我beh koh kā伊khiā起來，也beh補伊ê破隙，beh起伊hiah-ê倒壞ê，來建立伊，親像早時一樣；Kàu hit-ji̍t Tāi-pi̍t í-keng tó ê pò͘-pîⁿ, Góa beh koh kā i khiā--khí-lâi, iā beh pó͘ i ê phòa-khiah, beh khí i hiah ê tó-hoāi--ê, lâi kiàn-li̍p i, chhin-chhiūⁿ chá-sî chi̍t-iūⁿ;

12hō͘ in得tio̍h Í-tong iáu chhun-ê做業，亦得tio̍h hiah-ê用我ê名來稱ê外邦。這是行chit-ê事ê耶和華所講ê。hō͘ in tit-tio̍h Í-tong iáu chhun--ê chòe-gia̍p, ia̍h tit-tio̍h hiah ê ēng Góa ê miâ lâi chheng ê gōa-pang. Che sī kiâⁿ chit ê sū ê Iâ-hô-hoa só͘ kóng--ê.

13耶和華講，看ah，日子beh到，犁田ê beh jip-tio̍h收割ê，踏葡萄ê beh jip-tio̍h掖種ê；大山beh滴甜酒，小山beh流奶。Iâ-hô-hoa kóng, Khòaⁿ ah, ji̍t-chí beh kàu, lôe-chhân--ê beh jip-tio̍h siu-koah--ê, ta̍h phû-tô--ê beh jip-tio̍h iā-chéng--ê; tōa-soaⁿ beh tih tiⁿ-chiú, sió-soaⁿ beh lâu ni.

14我beh hō͘我ê百姓以色列受掠ê倒tńg來；in beh koh起荒廢ê城來khiā起，栽葡萄園，來lim伊ê酒，作園，來食伊ê果子。Góa beh hō͘ Góa ê peh-sìⁿ Í-sek-lia̍t siū-lia̍h--ê tò-tńg-lâi; in beh koh khí hong-hòe ê siâⁿ lâi khiā-khí, chai phû-tô-hn̂g, lâi lim i ê chiú, choh hn̂g, lâi chia̍h i ê ké-chí.

15我beh栽培in tī本土地；in無koh tú-tio̍h拔出tī我所hō͘ in ê地；這是耶和華你ê上帝講ê。Góa beh chai-pôe in tī pún thó͘-tōe; in bô koh tú-tio̍h pu̍ih-chhut tī Góa só͘ hō͘ in ê tōe; che sī Iâ-hô-hoa lí ê Siōng-tè kóng--ê.

1俄巴底亞所得tio̍h ê默示。 主耶和華論到Í-tong講：阮tùi耶和華hia聽見消息，也有使者奉差去列國，講，起來ah，咱tio̍h起來kap伊交戰。Gô-pa-tí-a só͘ tit-tio̍h ê be̍k-sī. Chú Iâ-hô-hoa lūn-kàu Í-tong kóng: Goán tùi Iâ-hô-hoa hia thiaⁿ-kìⁿ siau-sit, iā ū sù-chiá hōng-chhe khì lia̍t-kok, kóng, Khí--lâi ah, lán tio̍h khí-lâi kap i kau-chiàn.

2看ah，我hō͘你tī列國中做微細，hō͘人大大看輕。Khòaⁿ ah, Góa hō͘ lí tī lia̍t-kok-tiong chòe bî-sòe, hō͘ lâng tōa-tōa khòaⁿ-khin.

3Tiàm-tī石洞內，khiā起高ê所在ê ah，你ê心ê驕傲騙你，心內講，Chī-chūi能kā我降落地ah？Tiàm-tī chio̍h-tōng-lāi, khiā-khí koâiⁿ ê só͘-chāi-ê ah, lí ê sim ê kiau-ngō͘ phiàn lí, sim-lāi kóng, Chī-chūi ōe kā góa kàng-lo̍h tōe ah?

4你雖然升高親像鷹鳥，作siū tī星ê中間，我beh tùi-hia kā你降落；這是耶和華講ê。Lí sui-jiân seng-koâiⁿ chhin-chhiūⁿ eng-chiáu, choh-siū tī chhiⁿ ê tiong-kan, Góa beh tùi-hia kā lí kàng-lo̍h; che sī Iâ-hô-hoa kóng--ê.

5賊若來你hia，á是強盜暝時來，kiám m̄是偷到滿意nā-tiāⁿ？挽葡萄ê若來到你hia挽，kiám無iáu留幾粒á mah？你tú-tio̍h剪除到怎樣ah！Chha̍t nā lâi lí hia, á-sī kiông-tō mî--sî lâi, kiám m̄-sī thau kàu móa-ì nā-tiāⁿ? bán phû-tô--ê nā lâi kàu lí hia bán, kiám bô iáu lâu kúi-lia̍p-á mah? lí tú-tio̍h chián-tû kàu cháiⁿ-iūⁿ ah!

6以掃怎樣受chhiau-chhē ah！伊所khǹg ê寶物怎樣受查出ah！Í-sò cháiⁿ-iūⁿ siū chhiau-chhē ah! i só͘ khǹg ê pó-mi̍h cháiⁿ-iūⁿ siū chhâ-chhut ah!

7kap你結約ê lóng帶你到邊界；kap你和好ê欺騙你，khah贏你；食你ê米糧ê設活tauh tī你ê下面；伊ê心lóng無智識。Kap lí kiat-iok-ê lóng tòa lí kàu pian-kài; kap lí hô-hó--ê khi-phiàn lí, khah-iâⁿ lí; chia̍h lí ê bí-niû--ê siat oa̍h-tauh tī lí ê ē-bīn; i ê sim lóng bô tì-sek.

8耶和華講，到hit日我kiám無tùi Í-tong除滅智慧ê人，tùi以掃ê山除滅聰明ê人？Iâ-hô-hoa kóng, Kàu hit-ji̍t Góa kiám bô tùi Í-tong tû-bia̍t tì-hūi ê lâng, tùi Í-sò ê soaⁿ tû-bia̍t chhang-miâ ê lâng?

9Thê-bān ah，你ê勇士beh驚惶，致到tiàm以掃ê山，ta̍k人受thâi死剪除。Thê-bān ah, lí ê ióng-sū beh kiaⁿ-hiâⁿ, tì-kàu tiàm Í-sò ê soaⁿ, ta̍k-lâng siū thâi-sí chián-tû.

10因為你暴虐你ê兄弟雅各，你beh tú-tio̍h大大見笑；你亦beh永遠受剪除。In-ūi lí pō-gio̍k lí ê hiaⁿ-tī Ngá-kok, lí beh tú-tio̍h tōa-tōa kiàn-siàu; lí ia̍h beh éng-oán siū chián-tû.

11當你khiā tī邊頭ê日，外人搶伊ê財物，異邦人入伊ê城門，為耶路撒冷liam-khau，hit日你親像in中間ê一個。Tng lí khiā tī piⁿ--thâu ê ji̍t, gōa-lâng chhiúⁿ i ê châi-bu̍t, īⁿ-pang-lâng ji̍p i ê siâⁿ-mn̂g, ūi Iâ-lō͘-sat-léng liam-khau, hit-ji̍t lí chhin-chhiūⁿ in tiong-kan ê chi̍t-ê.

12當你ê兄弟ê日，就是伊tú-tio̍h患難ê日，你m̄應該khiā-teh看；猶大人受滅ê日，你m̄應該為tio̍h án-ni來歡喜；in tú-tio̍h災難ê日，你m̄應該講大話。Tng lí ê hiaⁿ-tī ê ji̍t, chiū-sī i tú-tio̍h hoān-lān ê ji̍t, lí m̄ eng-kai khiā-teh khòaⁿ; Iû-tāi lâng siū-bia̍t ê ji̍t, lí m̄ eng-kai ūi-tio̍h án-ni lâi hoaⁿ-hí; in tú-tio̍h chai-lān ê ji̍t, lí m̄ eng-kai kóng tōa-ōe.

13我ê百姓tú-tio̍h災厄ê日，你m̄應該入伊ê門；in tú-tio̍h災厄ê日，你m̄應該看in teh受苦；in tú-tio̍h災厄ê日，你m̄應該摸tio̍h in ê財物。Góa ê peh-sìⁿ tú-tio̍h chai-ē ê ji̍t, lí m̄ eng-kai ji̍p i ê mn̂g; in tú-tio̍h chai-ē ê ji̍t, lí m̄ eng-kai khòaⁿ in teh siū-khó͘; in tú-tio̍h chai-ē ê ji̍t, lí m̄ eng-kai bong-tio̍h in ê châi-bu̍t.

14你m̄應該khiā tī雙叉路，遮(cha̍h)in中間逃走ê人；in tú-tio̍h災難ê日，你m̄應該將in chhun ê人交付對敵。Lí m̄ eng-kai khiā tī siang-chhe lō͘, cha̍h in tiong-kan tô-cháu ê lâng; in tú-tio̍h chai-lān ê ji̍t, lí m̄ eng-kai chiong in chhun ê lâng kau-hù tùi-te̍k.

15因為耶和華辨理萬國ê日近lah；照你所行ê，也beh án-ni行tī你；你所做ê，beh歸tī你ê頭殼。In-ūi Iâ-hô-hoa pān-lí bān-kok ê ji̍t kūn--lah; chiàu lí só͘ kiâⁿ--ê, iā beh án-ni kiâⁿ tī lí; lí só͘ chòe--ê, beh kui tī lí ê thâu-khak.

16因為親像lín tī我ê聖山bat lim，萬國也beh親像án-ni長長lim，亦lim也吞落去，in就beh歸tī無。In-ūi chhin-chhiūⁿ lín tī Góa ê sèng-soaⁿ bat lim, bān-kok iā beh chhin-chhiūⁿ án-ni tn̂g-tn̂g lim, ia̍h lim iā thun--lo̍h-khì, in chiū beh kui tī bô.

17Tī錫安山beh有逃脫ê人，亦beh成做聖；雅各家beh得tio̍h伊本有ê業。Tī Sek-an soaⁿ beh ū tô-thoat ê lâng, ia̍h beh chiâⁿ-chòe sèng; Ngá-kok-ke beh tit-tio̍h i pún ū ê gia̍p.

18雅各家beh成做火，約瑟家beh成做火燄，以掃ê家beh做稻稿，火beh燒來滅伊；以掃ê家beh無留一個；因為耶和華有講伊。Ngá-kok-ke beh chiâⁿ-chòe hé, Iok-sek ke beh chiâⁿ-chòe hé-iām, Í-sò ê ke beh chòe tiū-kó, hé beh sio lâi bia̍t i; Í-sò ê ke beh bô lâu chi̍t-ê; in-ūi Iâ-hô-hoa ū kóng i.

19南方ê人beh得tio̍h以掃ê山，平洋ê人beh得tio̍h腓利士，亦beh得tio̍h Í-hoat-liân ê田，kap撒馬利亞ê田；便雅憫人beh得tio̍h Ki-lia̍t。Lâm-hng ê lâng beh tit-tio̍h Í-sò ê soaⁿ, pîⁿ-iûⁿ ê lâng beh tit-tio̍h Hui-lī-sū, ia̍h beh tit-tio̍h Í-hoat-liân ê chhân, kap Sat-má-lī-a ê chhân; Piān-ngá-bín lâng beh tit-tio̍h Ki-lia̍t.

20以色列軍隊chiah-ê受掠ê beh得tio̍h屬迦南人ê地，直到Sat-le̍k-hoat；tiàm-tī Se-hoat-la̍h受掠ê耶路撒冷人beh得tio̍h南方ê城。Í-sek-lia̍t kun-tūi chiah-ê siū-lia̍h--ê beh tit-tio̍h sio̍k Ka-lâm lâng ê tōe, ti̍t-kàu Sat-le̍k-hoat; tiàm-tī Se-hoat-la̍h siū-lia̍h ê Iâ-lō͘-sat-léng lâng beh tit-tio̍h Lâm-hng ê siâⁿ.

21Beh有chiah-ê拯救ê上錫安山，來審判以掃ê山；國度就歸耶和華。Beh ū chiah-ê chín-kiù--ê chiūⁿ Sek-an soaⁿ, lâi sím-phòaⁿ Í-sò ê soaⁿ; kok-tō͘ chiū kui Iâ-hô-hoa.

1耶和華ê話臨到A-bí-thài ê kiáⁿ約拿講，Iâ-hô-hoa ê ōe lîm-kàu A-bí-thài ê kiáⁿ Iok-ná kóng,

2你起來去尼尼微hit-ê大城，出聲警戒in；因為in ê罪惡透到我面前。Lí khí-lâi khì Nî-nî-bî hit ê tōa-siâⁿ, chhut-siaⁿ kéng-kài in; in-ūi in ê chōe-ok thàu-kàu Góa bīn-chêng.

3但是約拿起來，ài走去Tha-si，閃避耶和華；落去Iok-phàⁿ，tú-tio̍h一隻船beh去Tha-si；伊就hō͘伊船稅，搭hit隻船beh kap in去Tha-si，閃避耶和華。Nā-sī Iok-ná khí-lâi, ài-cháu khì Tha-si, siám-pī Iâ-hô-hoa; lo̍h-khì Iok-phàⁿ, tú-tio̍h chi̍t chiah chûn beh khì Tha-si; i chiū hō͘ i chûn-sè, tah hit chiah chûn beh kap in khì Tha-si, siám-pī Iâ-hô-hoa.

4總是耶和華hō͘海khí大風，海中風湧真透，致到船beh破。Chóng-sī Iâ-hô-hoa hō͘ hái khí tōa-hong, hái-tiong hong-éng chin-thàu, tì-kàu chûn beh phòa.

5水手真驚，ta̍k人哀求伊ê上帝；in用船內ê貨物hiat落海，因為beh hō͘船khah輕；獨獨約拿已經落船肚底，倒teh好睏。Chúi-siú chin kiaⁿ, ta̍k-lâng ai-kiû i ê siōng-tè; in ēng chûn-lāi ê hè-mi̍h hiat-lo̍h hái, in-ūi beh hō͘ chûn khah-khin; to̍k-to̍k Iok-ná í-keng lo̍h chûn-tó͘-tóe, tó-teh hó-khùn.

6舵工(tāi-kong)到伊hia，對伊講，你chit-ê好睏ê人ah，啥事án-ni？起來，求叫你ê上帝；kiám-chhái上帝看顧咱，hō͘咱免滅無。Tāi-kong kàu i hia, tùi i kóng, Lí chit-ê hó-khùn ê lâng ah, siáⁿ-sū án-ni? khí-lâi, kiû-kiò lí ê siōng-tè; kiám-chhái Siōng-tè khòaⁿ-kò͘ lán, hō͘ lán bián bia̍t-bô.

7In相kap講，來ah，咱來liam-khau，看咱tú-tio̍h chit-ê災厄，是因為甚麼人ê緣故。In saⁿ-kap kóng, Lâi ah, lán lâi liam-khau, khòaⁿ lán tú-tio̍h chit ê chai-ē, sī in-ūi sím-mi̍h lâng ê iân-kò͘.

8Tùi án-ni，in liam-khau，就liam-tio̍h約拿。In對伊講，請你kā阮講，咱tú-tio̍h chit-ê災厄，是in-為甚麼人ê緣故；你做甚麼事業？你tùi toh-lo̍h來？你ê本所在tī toh-lo̍h？你屬甚麼族？Tùi án-ni in liam-khau, chiū liam-tio̍h Iok-ná. In tùi i kóng, Chhiáⁿ lí kā goán kóng, lán tú-tio̍h chit ê chai-ē, sī in-ūi sím-mi̍h lâng ê iân-kò͘; lí chòe sím-mi̍h sū-gia̍p? Lí tùi toh-lo̍h lâi? Lí ê pún só͘-chāi tī toh-lo̍h? Lí sio̍k sím-mi̍h cho̍k?

9伊應講，我是希伯來人；我敬畏天頂ê上帝耶和華，創造大海kap乾地ê。I ìn kóng, Góa sī Hi-pek-lâi lâng; góa kèng-ùi thiⁿ-téng ê Siōng-tè Iâ-hô-hoa, chhòng-chō tōa-hái kap ta-tōe--ê.

10Hiah-ê人就大驚，對伊講，你所做ê是甚麼事ah？因為hiah-ê人知伊閃避耶和華，是伊已經kā in講lah。Hiah ê lâng chiū tōa-kiaⁿ, tùi i kóng, Lí só͘ chòe--ê sī sím-mi̍h sū ah? In-ūi hiah ê lâng chai i siám-pī Iâ-hô-hoa, sī i í-keng kā in kóng lah.

11In kā伊講，阮tio̍h怎樣款待你，hō͘海平定？因為海湧ná起ná大。In kā i kóng, Goán tio̍h cháiⁿ-iūⁿ khoán-thāi lí, hō͘ hái pîⁿ-tiāⁿ? in-ūi hái-éng ná-khí ná-tōa.

12伊kā in講，Lín掠我hiat落海，海就平定；因為我知lín tú-tio̍h chit-ê大風是為tio̍h我ê緣故。I kā in kóng, Lín lia̍h góa hiat--lo̍h hái, hái chiū pîⁿ-tiāⁿ; in-ūi góa chai lín tú-tio̍h chit ê tōa-hong sī ūi-tio̍h góa ê iân-kò͘.

13但是hiah-ê人盡力划槳，ài óa近山；總是bōe能；因為海湧ná起ná大。Nā-sī hiah ê lâng chīn-la̍t kò-chiúⁿ, ài óa-kūn soaⁿ; chóng-sī bōe-ōe; in-ūi hái-éng ná-khí ná-tōa.

14Tùi án-ni，in求叫耶和華講，耶和華ah，阮切切求你，莫得因為chit人ê性命，hō͘阮死無；莫得用無罪ê血歸tī阮；因為耶和華你是照家己ê意思來行。Tùi án-ni in kiû-kiò Iâ-hô-hoa kóng, Iâ-hô-hoa ah, goán chhiat-chhiat kiû Lí, bo̍h-tit in-ūi chit-lâng ê sìⁿ-miā, hō͘ goán sí-bô; bo̍h-tit ēng bô-chōe ê huih kui tī goán; in-ūi Iâ-hô-hoa Lí sī chiàu ka-kī ê ì-sù lâi kiâⁿ.

15In就掠約拿hiat落海；海ê大湧就平定。In chiū lia̍h Iok-ná hiat-lo̍h hái; hái ê tōa-éng chiū pêng-tiāⁿ.

16Hiah-ê人就大大敬畏耶和華，獻祭hō͘耶和華，koh下願。Hiah ê lâng chiū tōa-tōa kèng-ùi Iâ-hô-hoa, hiàn-chè hō͘ Iâ-hô-hoa, koh hē-goān.

17耶和華備辦大魚吞約拿；約拿tī魚腹肚內三日三暝。Iâ-hô-hoa pī-pān tōa-hî thun Iok-ná; Iok-ná tī hî pak-tó͘-lāi saⁿ-ji̍t saⁿ-mî.