1Tio̍h hō͘人記得應該降服辦政事ê，掌權ê，來順thān伊，常常便來行ta̍k項ê好事，Tio̍h hō͘ lâng kì-tit eng-kai hâng-ho̍k pān chèng-sū ê, chiáng-koân ê, lâi sūn-thān i, siông-siông piān lâi kiâⁿ ta̍k hāng ê hó sū,

2無譭謗，無相爭，tio̍h溫和，tùi眾人顯明ta̍k樣ê溫柔。bô húi-pòng, bô saⁿ-chiⁿ, tio̍h un-hô, tùi chèng lâng hián-bêng ta̍k iūⁿ ê un-jiû.

3因為咱前也是無知、悖逆，受迷惑，降服tī百般ê私慾kap快樂，活tī惡毒怨妒ê中間，是可惡ê，也大家相怨恨。In-ūi lán chêng iā sī bû-ti, pōe-ge̍k, siū bê-he̍k, hâng-ho̍k tī pah-poaⁿ ê su-io̍k kap khoài-lo̍k, oa̍h tī ok-to̍k oàn-tò͘ ê tiong-kan, sī khó-ò͘ⁿ ê, iā tāi-ke saⁿ oàn-hūn.

4但是咱ê救主上帝ê仁慈kap伊ê疼人顯明ê時，Nā-sī lán ê Kiù-chú Siōng-tè ê jîn-chû kap I ê thiàⁿ lâng hián-bêng ê sî,

5伊就救咱，m̄是tùi tī咱所行ê義，是照伊ê憐憫，tùi重頭生ê洗kap聖神ê換新，I chiū kiù lán, m̄ sī tùi tī lán só͘ kiâⁿ ê gī, sī chiàu I ê lîn-bín, tùi têng-thâu-siⁿ ê sóe kap Sèng Sîn ê ōaⁿ-sin,

6聖神就是伊對咱ê救主耶穌基督所大大降落tī咱ê；Sèng Sîn chiū-sī I tùi lán ê Kiù-chú Iâ-so͘ Ki-tok só͘ tōa-tōa kàng-lo̍h tī lán ê;

7hō͘咱tùi伊ê恩來稱做義ê，thang照永活ê ǹg望lāi成做後嗣。hō͘ lán tùi I ê un lâi chheng-chòe-gī ê, thang chiàu éng-oa̍h ê ǹg-bāng lāi chiâⁿ-chòe hō͘-sû.

8Chit-ê話是真實；koh論chiah-ê事我ài你硬硬干證伊，hō͘信上帝ê人致意做chiah-ê好ê事業。chiah-ê lóng是好，有利益人ê。Chit ê ōe sī chin-si̍t; koh lūn chiah ê sū góa ài lí ngī-ngī kan-chèng i, hō͘ sìn Siōng-tè ê lâng tì-ì chòe chiah ê hó ê sū-gia̍p. chiah-ê lóng sī hó, ū lī-ek lâng ê.

9總是你tio̍h閃避戇戇ê辯駁，世系ê談論、相爭，kap為tio̍h律法ê爭戰；因為chiah-ê是無利益，koh空空。Chóng-sī lí tio̍h siám-pī gōng-gōng ê piān-pok, sè-hē ê tâm-lūn, saⁿ-chiⁿ, kap ūi-tio̍h lu̍t-hoat ê cheng-chiàn; in-ūi chiah-ê sī bô lī-ek, koh khang-khang.

10結黨ê人，已經警戒伊一pái koh一pái，就tio̍h kù-chāi伊；Kiat-tóng ê lâng, í-keng kéng-kài i chi̍t pái koh chi̍t pái, chiū tio̍h kù-chāi i;

11因為知chit號人是悖謬，家己擬伊ê罪，猶原teh犯。in-ūi chai chit hō lâng sī pōe-biū, ka-kī gí i ê chōe, iû-goân teh hoān.

12我差A-thê-má á是Chhui-ki-kó͘去chhē你ê時，你tio̍h致意到Ni-ko-pho-li̍p來chhē我；因為我已經定tio̍h tī hia過冬天。Góa chhe A-thê-má á-sī Chhui-ki-kó͘ khì chhē lí ê sî, lí tio̍h tì-ì kàu Ni-ko-pho-li̍p lâi chhē góa; in-ūi góa í-keng tiāⁿ-tio̍h tī hia kè tang-thiⁿ.

13法律師Se-la̍p kap亞波羅，你tio̍h致意kā伊送行，hō͘ in無欠缺。Hoat-lu̍t-su Se-la̍p kap A-pho-lô, lí tio̍h tì-ì kā i sòng-hêng, hō͘ in bô khiàm-kheh.

14Koh咱chiah-ê人tio̍h學習做好ê事業，來備辦hiah-ê的確tio̍h ê所費，免得無結實。Koh lán chiah ê lâng tio̍h ha̍k-si̍p chòe hó ê sū-gia̍p, lâi pī-pān hiah ê tek-khak tio̍h ê só͘-hùi, bián-tit bô kiat-si̍t.

15Kap我tī-teh ê人lóng請安你。凡若tī信來疼阮ê人你tio̍h請安in。Kap góa tī-teh ê lâng lóng chhéng-an lí. Hoān-nā tī sìn lâi thiàⁿ goán ê lâng lí tio̍h chhéng-an in.

16願恩典kap lín眾人saⁿ-kap tī-teh。Goān un-tián kap lín chèng lâng saⁿ-kap tī-teh.3

1做基督耶穌ê囚犯，保羅，kap兄弟提摩太，phoe寄hō͘阮所疼同tio̍h磨ê腓利門，Chòe Ki-tok Iâ-so͘ ê siû-hoān, Pó-lô, kap hiaⁿ-tī Thê-mô͘-thài, phoe kià hō͘ goán só͘ thiàⁿ tâng tio̍h-bôa ê Hui-lī-bûn,

2kap姊妹A-hui-a，以及kap我同當兵e5A-ki-pò͘，kap聚集tī你ê家ê教會；kap chí-bē A-hui-a, í-ki̍p kap góa tâng tng peng ê A-ki-pò͘, kap chū-chi̍p tī lí ê ke ê kàu-hōe;

3願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

4我常常感謝我ê上帝，tī我祈禱ê中間siàu念你；Góa siông-siông kám-siā góa ê Siōng-tè, tī góa kî-tó ê tiong-kan siàu-liām lí;

5因為聽見你ê仁愛kap你所有ê信，就是ǹg主耶穌kap顯出tī眾聖徒ê；in-ūi thiaⁿ-kìⁿ lí ê jîn-ài kap lí só͘ ū ê sìn, chiū-sī ǹg Chú Iâ-so͘ kap hián-chhut tī chèng sèng-tô͘ ê;

6願你ê信ê相通有功效，thang深知lín中間萬項ê好，來歸tī基督。goān lí ê sìn ê siong-thong ū kong-hāu, thang chhim chai lín tiong-kan bān hāng ê hó, lâi kui tī Ki-tok.

7兄弟ah，我為tio̍h你ê仁愛大歡喜，大安慰；因為聖徒ê心對你得tio̍h安歇。Hiaⁿ-tī ah, góa ūi-tio̍h lí ê jîn-ài tōa hoaⁿ-hí, tōa an-ùi; in-ūi sèng-tô͘ ê sim tùi lí tit-tio̍h an-hioh.

8所以我雖然tī基督有thang好膽將所合宜行ê吩咐你，Só͘-í góa sui-jiân tī Ki-tok ū thang hó-táⁿ chiong só͘ ha̍p-gî kiâⁿ ê hoan-hù lí,

9獨獨因為相疼ê緣故，寧可求你；我就是年老ê保羅，現今也為tio̍h基督耶穌來受關監。to̍k-to̍k in-ūi saⁿ-thiàⁿ ê iân-kò͘, lêng-khó͘ kiû lí; góa chiū-sī nî lāu ê Pó-lô, hiān-kim iā ūi-tio̍h Ki-tok Iâ-so͘ lâi siū koaiⁿ-kaⁿ.

10我為tio̍h我ê kiáⁿ，就是我tī掛鐵鍊ê時所生ê，O-nî-se-bó͘，來求你；Góa ūi-tio̍h góa ê kiáⁿ, chiū-sī góa tī kòa thih-liān ê sî só͘ siⁿ ê, O-nî-se-bó͘, lâi kiû lí;

11伊前無利益你，現今就做你我ê利益；i chêng bô lī-ek lí, hiān-kim chiū chòe lí góa ê lī-ek;

12我有差伊koh tò去你hia；chit人就是我ê心腹。góa ū chhe i koh tò-khì lí hia; chit lâng chiū-sī góa ê sim-pak.

13我本ài留伊kap我tòa，thang tī我為tio̍h福音掛鐵鍊ê時，替你服事我。Góa pún ài lâu i kap góa tòa, thang tī góa ūi-tio̍h hok-im kòa thih-liān ê sî, thòe lí ho̍k-sāi góa.

14總是未知你ê意思，我就m̄-ài做甚麼；是beh hō͘你ê好，m̄是出tī勉強，是出tī甘願。Chóng-sī bē chai lí ê ì-sù, góa chiū m̄ ài chòe sím-mi̍h; sī beh hō͘ lí ê hó, m̄ sī chhut tī bián-kióng, sī chhut tī kam-goān.

15因為伊暫時離開你，kiám-chhái是beh hō͘你thang永遠得tio̍h伊；In-ūi i chiām-sî lī-khui lí, kiám-chhái sī beh hō͘ lí thang éng-oán tit-tio̍h i;

16m̄是猶原做奴僕，是贏過奴僕，就是做所疼ê兄弟；我實在看伊做án-ni；何況伊是你家內ê人，koh是屬tī主ê，kiám無koh-khah疼伊mah?m̄ sī iû-goân chòe lô͘-po̍k, sī iâⁿ-kè lô͘-po̍k, chiū-sī chòe só͘ thiàⁿ ê hiaⁿ-tī; góa si̍t-chāi khòaⁿ i chòe án-ni; hô-hòng i sī lí ke-lāi ê lâng, koh sī sio̍k tī Chú ê, kiám bô koh khah thiàⁿ i mah?

17所以你若掠我做同伴，tio̍h接納伊，親像接納我。Só͘-í lí nā lia̍h góa chòe tâng-phōaⁿ, tio̍h chiap-la̍p i, chhin-chhiūⁿ chiap-la̍p góa.

18伊若有刻虧你，á是欠你甚麼，thang算我ê賬。I nā ū khek-khui lí, á-sī khiàm lí sím-mi̍h, thang sǹg góa ê siàu.

19我保羅親手寫，我beh坐額；免我kā你講，你所欠我ê，是你本身ê性命。Góa Pó-lô chhin-chhiú siá, góa beh chē-gia̍h; bián góa kā lí kóng, lí só͘ khiàm góa ê, sī lí pún-sin ê sìⁿ-miā.

20是lah，兄弟ah，hō͘我tī主對你得tio̍h歡喜；hō͘我ê心tī基督得tio̍h安歇。Sī lah, hiaⁿ-tī ah, hō͘ góa tī Chú tùi lí tit-tio̍h hoaⁿ-hí; hō͘ góa ê sim tī Ki-tok tit-tio̍h an-hioh.

21我已經深信你ê順thàn，就寫phoe hō͘你，因為知你所beh行ê，會過頭tī我所講ê。Góa í-keng chhim sìn lí ê sūn-thàn, chiū siá phoe hō͘ lí, in-ūi chai lí só͘ beh kiâⁿ ê, ōe kè-thâu tī góa só͘ kóng ê.

22Koh也tio̍h備辦所在hō͘我tòa；因為我ǹg望tùi lín ê祈禱，上帝beh將我賞賜lín。Koh iā tio̍h pī-pān só͘-chāi hō͘ góa tòa; in-ūi góa ǹg-bāng tùi lín ê kî-tó, Siōng-tè beh chiong góa siúⁿ-sù lín.

23Í-pa-hut，就是tī基督耶穌kap我做同關監ê，請安lí；Í-pa-hut, chiū-sī tī Ki-tok Iâ-so͘ kap góa chòe tâng koaiⁿ-kaⁿ ê, chhéng-an lí;

24kap我saⁿ-kap tio̍h磨ê馬可、A-lí-ta̍t-kó͘、Tí-má，路加也請安你。kap góa saⁿ-kap tio̍h-bôa ê Má-khó, A-lí-ta̍t-kó͘, Tí-má, Lō͘-ka iā chhéng-an lí.

25願咱ê主耶穌基督ê恩典kap lín ê神saⁿ-kap tī-teh。À-bēng。Goān lán ê Chú Iâ-so͘ Ki-tok ê un-tián kap lín ê sîn saⁿ-kap tī-teh. À-bēng.

1上帝tī在早已經託hiah-ê先知，用chōe-chōe段，chōe-chōe方法，kā列祖講；Siōng-tè tī chāi-chá í-keng thok hiah ê sian-ti, ēng chōe-chōe tōaⁿ, chōe-chōe hong-hoat, kā lia̍t-chó͘ kóng;

2taⁿ tī hiah-ê日ê路尾，託伊ê Kiáⁿ kā咱講；就是伊所設立做承接萬物ê後嗣，亦bat tùi伊來創造chiah-ê世界。taⁿ tī hiah ê ji̍t ê lō͘-bé, thok I ê Kiáⁿ kā lán kóng; chiū-sī I só͘ siat-li̍p chòe sêng-chiap bān mi̍h ê hō͘-sû, ia̍h bat tùi I lâi chhòng-chō chiah ê sè-kài.

3伊是上帝ê榮耀所發出ê光，是上帝本質ê真象，伊用伊權能ê話teh扶載萬物，已經成清潔罪ê事，就坐tī極高ê天頂，大威嚴ê ê大pêng；I sī Siōng-tè ê êng-iāu só͘ hoat-chhut ê kng, sī Siōng-tè pún-chit ê chin siōng, I ēng I koân-lêng ê ōe teh hû-chài bān mi̍h, í-keng chiâⁿ chheng-kiat chōe ê sū, chiū chē tī ke̍k koâiⁿ ê thiⁿ-téng, tōa ui-giâm ê ê tōa pêng;

4成做比chiah-ê天使khah大，合tī伊所承接ê名，比in khah尊貴。chiâⁿ-chòe pí chiah ê thiⁿ-sài khah tōa, ha̍p tī I só͘ sêng-chiap ê miâ, pí in khah chun-kùi.

5因為上帝kiám bat tùi甚麼天使講: 你就是我ê Kiáⁿ，我今á日生你？koh講， 我beh做伊ê父，伊beh做我ê Kiáⁿ。In-ūi Siōng-tè kiám bat tùi sím-mi̍h thiⁿ-sài kóng: Lí chiū-sī góa ê Kiáⁿ, Góa kin-á-ji̍t siⁿ lí?koh kóng, Góa beh chòe I ê Pē, I beh chòe góa ê Kiáⁿ.

6到伊koh chhōa大Kiáⁿ入世間ê時，就講，上帝chiah-ê天使lóng tio̍h拜伊。Kàu I koh chhōa tōa Kiáⁿ ji̍p sè-kan ê sî, chiū kóng, Siōng-tè chiah ê thiⁿ-sài lóng tio̍h pài I.

7論到天使就講: Hō͘伊ê天使做風，伊ê差用做火燄:Lūn-kàu thiⁿ-sài chiū kóng: Hō͘ I ê thiⁿ-sài chòe hong, I ê chhe-ēng chòe hé-iām:

8但是論到Kiáⁿ就講， 上帝ah，你ê座位代代tī-teh， 你ê 國權柄是正直ê權柄。nā-sī lūn-kàu Kiáⁿ chiū kóng, Siōng-tè ah, lí ê chō-ūi tāi-tāi tī-teh, Lí ê kok koân-pèng sī chèng-ti̍t ê koân-pèng.

9你ài公義，怨恨不法； 所以上帝，你ê上帝，用歡喜ê油抹你， 贏過你chiah-ê同伴。Lí ài kong-gī, oàn-hūn put-hoat; Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

10Koh講， 主ah，起頭ê時，你hē地ê地基， Chiah-ê天亦是你ê手所造ê:Koh kóng, Chú ah, khí-thâu ê sî, lí hē tōe ê tōe-ki, Chiah ê thiⁿ ia̍h sī lí ê chhiú só͘ chō ê:

11In beh滅無；獨獨你久長tī-teh: In lóng beh親像衣服漸漸舊；In beh bia̍t-bô; to̍k-to̍k lí kú-tn̂g tī-teh: In lóng beh chhin-chhiūⁿ i-ho̍k chiām-chiām kū;

12你beh將in捲起來，親像外衫， 親像衣服，in就beh變換: 獨獨你原在是án-ni，你ê歲壽無窮盡。Lí beh chiong in kńg-khí-lâi, chhin-chhiūⁿ gōa-saⁿ, Chhin-chhiūⁿ i-ho̍k, in chiū beh piàn-ōaⁿ: To̍k-to̍k lí goân-chāi sī án-ni, lí ê hè-siū bô kiông-chīn.

13上帝bat tùi tá-lo̍h一個天使講， 坐我ê大pêng， thèng候我hē你ê對敵做你ê腳踏椅？Siōng-tè bat tùi tá-lo̍h chi̍t ê thiⁿ-sài kóng, Chē góa ê tōa pêng, Thèng-hāu góa hē lí ê tùi-te̍k chòe lí ê kha-ta̍h-í?

14In kiám m̄是lóng做差用ê神，奉差來服事teh-beh得救ê人mah？In kiám m̄ sī lóng chòe chhe-ēng ê sîn, hōng-chhe lâi ho̍k-sāi teh-beh tit kiù ê lâng mah?