1做kiáⁿ兒ê，lín tiàm-tī主tio̍h順thàn lín ê父母，因為這是應該ê。Chòe kiáⁿ-jî ê, lín tiàm-tī Chú tio̍h sūn-thàn lín ê pē-bú, in-ūi che sī eng-kai ê.

2Tio̍h尊敬你ê父母，(這是頭一條有kâⁿ應允ê誡) ，Tio̍h chun-kèng lí ê pē-bú, (che sī thâu chi̍t tiâu ū kâⁿ èng-ún ê kài),

3beh hō͘你興通，長歲壽tī世間。beh hō͘ lí heng-thong, tn̂g hè-siū tī sè-kan.

4做老父ê，lín m̄-thang激kiáⁿ兒ê受氣；獨獨tio̍h用主ê警戒kap教訓來培養in。Chòe lāu-pē ê, lín m̄ thang kek kiáⁿ-jî ê siū-khì; to̍k-to̍k tio̍h ēng Chú ê kéng-kài kap kàu-hùn lâi pôe-iúⁿ in.

5做奴僕ê，lín tio̍h驚惶ngia̍uh-ngia̍uh-chhoah，用誠實心順thàn照肉體做lín ê主人ê，親像teh順thàn基督；Chòe lô͘-po̍k ê, lín tio̍h kiaⁿ-hiâⁿ ngia̍uh-ngia̍uh-chhoah, ēng sêng-si̍t sim sūn-thàn chiàu jio̍k-thé chòe lín ê chú-lâng ê, chhin-chhiūⁿ teh sūn-thàn Ki-tok;

6莫得kan-ta tī目睭前慇勤，親像取hō͘人歡喜ê；就是tio̍h親像做基督ê奴僕，用實心來行上帝ê旨意；bo̍h-tit kan-ta tī ba̍k-chiu chêng un-khûn, chhin-chhiūⁿ chhú hō͘ lâng hoaⁿ-hí ê; chiū-sī tio̍h chhin-chhiūⁿ chòe Ki-tok ê lô͘-po̍k, ēng si̍t-sim lâi kiâⁿ Siōng-tè ê chí-ì;

7甘心做工，親像kā主做，m̄是kā人做；kam-sim chòe kang, chhin-chhiūⁿ kā Chú chòe, m̄ sī kā lâng chòe;

8因為知無論做奴僕á是自由ê，ta̍k人所行甚麼好，beh tùi主來受倒tńg。in-ūi chai bô lūn chòe lô͘-po̍k á-sī chū-iû ê, ta̍k lâng só͘ kiâⁿ sím-mi̍h hó, beh tùi Chú lâi siū tò-tńg.

9做主人ê，lín也tio̍h án-ni款待奴僕，莫得háng-hoah in；因為知in kap lín同一個主tī天裡，就是無用外貌取人ê。Chòe chú-lâng ê, lín iā tio̍h án-ni khoán-thāi lô͘-po̍k, bo̍h-tit háng-hoah in; in-ūi chai in kap lín tâng chi̍t ê Chú tī thiⁿ-ni̍h, chiū-sī bô ēng gōa-māu chhú lâng ê.

10結尾來講，lín tio̍h tiàm-tī主kap伊氣力ê權能來勇壯。Kiat-bé lâi kóng, lín tio̍h tiàm-tī Chú kap I khùi-la̍t ê koân-lêng lâi ióng-chòng.

11Tio̍h穿上帝全副ê戰甲，hō͘ lín能khiā在，來抵敵魔鬼chiah-ê詭計。Tio̍h chhēng Siōng-tè choân-hù ê chiàn-kah, hō͘ lín ōe khiā-chāi, lâi tí-te̍k Mô͘-kúi chiah ê khúi-kè.

12因為咱ê交戰m̄是抵敵血氣ê，就是抵敵chiah-ê辦政事ê，chiah-ê掌權ê，kap chit-ê暗世chiah-ê君王，以及天中pháiⁿ ê神類。In-ūi lán ê kau-chiàn m̄ sī tí-te̍k hiat-khì ê, chiū-sī tí-te̍k chiah ê pān chèng-sū ê, chiah ê chiáng-koân ê, kap chit ê àm sè chiah ê kun-ông, í-ki̍p thiⁿ-tiong pháiⁿ ê sîn-lūi.

13所以lín tio̍h用上帝全副ê戰甲，hō͘ lín tī風險ê日抵擋能tiâu，到lín已經做成lóng總ê事，也猶原khiā在。Só͘-í lín tio̍h ēng Siōng-tè choân-hù ê chiàn-kah, hō͘ lín tī hong-hiám ê ji̍t tí-tng ōe tiâu, kàu lín í-keng chòe-chiâⁿ lóng-chóng ê sū iā iû-goân khiā-chāi.

14所以tio̍h khiā khi在，用真實hâ腰，用義做護心鏡，Só͘-í tio̍h khiā khi chāi, ēng chin-si̍t hâ io, ēng gī chòe hō͘-sim-kiàⁿ,

15用和平福音ê備辦，穿tī腳裡；ēng hô-pêng hok-im ê pī-pān, chhēng tī kha-ni̍h;

16koh tio̍h giâ信ê藤牌，用chit-ê chiah會phah滅pháiⁿ-ê一切ê火箭。koh tio̍h giâ sìn ê tîn-pâi, ēng chit-ê chiah ōe phah-bia̍t pháiⁿ-ê it-chhè ê hé-chìⁿ.

17Koh領受拯救ê頭盔，以及神ê劍，就是上帝ê話；Koh niá-siū chín-kiù ê thâu-khoe, í-ki̍p Sîn ê kiàm, chiū-sī Siōng-tè ê ōe;

18用ta̍k樣ê祈禱kap懇求，時時tī聖神來祈禱，警醒tī chit-ê，為tio̍h lóng總ê聖徒懇求無厭倦；ēng ta̍k iūⁿ ê kî-tó kap khún-kiû, sî-sî tī Sèng Sîn lâi kî-tó, kéng-séng tī chit-ê, ūi-tio̍h lóng-chóng ê sèng-tô͘ khún-kiû bô ià-siān;

19也替我求，hō͘我會得開嘴好膽來講，hō͘人知福音ê奧妙，為tio̍h chit-ê我做掛鐵鏈ê欽差；iā thòe góa kiû, hō͘ góa ōe tit khui chhùi hó-táⁿ lâi kóng, hō͘ lâng chai hok-im ê ò-biāu, ūi-tio̍h chit-ê góa chòe kòa thih-liān ê khim-chhe;

20也tio̍h求hō͘我tī chit-ê奧妙會好膽，照我所應該講ê。iā tio̍h kiû hō͘ góa tī chit ê ò-biāu ōe hó-táⁿ, chiàu góa só͘ eng-kai kóng ê.

21獨獨beh hō͘ lín也知我ê事情kap我ê景況怎樣，有所疼ê兄弟Chhui-ki-kó͘，就是tiàm-tī主盡忠ê差用，伊beh hō͘ lín知lóng總ê事。To̍k-to̍k beh hō͘ lín iā chai góa ê sū-chêng kap góa ê kéng-hóng cháiⁿ-iūⁿ, ū só͘ thiàⁿ ê hiaⁿ-tī Chhui-ki-kó͘, chiū-sī tiàm-tī Chú chīn-tiong ê chhe-ēng, i beh hō͘ lín chai lóng-chóng ê sū.

22為tio̍h án-ni，我tiâu-tî差伊去就近lín，hō͘ lín知阮ê事，koh安慰lín ê心。Ūi-tio̍h án-ni góa tiâu-tî chhe i khì chiū-kūn lín, hō͘ lín chai goán ê sū, koh an-ùi lín ê sim.

23願平安kap仁愛含信，tùi父上帝kap主耶穌基督到tī眾兄弟。Goān pêng-an kap jîn-ài hâm sìn, tùi Pē Siōng-tè kap Chú Iâ-so͘ Ki-tok kàu tī chèng hiaⁿ-tī.

24Koh見若用bōe敗壞ê疼來疼咱ê主耶穌基督ê，願恩典kap in眾人saⁿ-kap tī-teh。Koh kìⁿ-nā ēng bōe pāi-hoāi ê thiàⁿ lâi thiàⁿ lán ê Chú Iâ-so͘ Ki-tok ê, goān un-tián kap in chèng lâng saⁿ-kap tī-teh.

1基督耶穌ê奴僕保羅提摩太，phoe寄hō͘ khiā起腓立比，tiàm-tī基督耶穌，lóng總ê聖徒，kap chiah-ê監督以及執事；Ki-tok Iâ-so͘ ê lô͘-po̍k Pó-lô Thê-mô͘-thài phoe kià hō͘ khiā-khí Hui-li̍p-pí, tiàm-tī Ki-tok Iâ-so͘, lóng-chóng ê sèng-tô͘, kap chiah ê kam-tok í-ki̍p chip-sū;

2願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

3我見有siàu念lín，就感謝我ê上帝，Góa kìⁿ-ū siàu-liām lín, chiū kám-siā góa ê Siōng-tè,

4ta̍k pái為tio̍h lín眾人祈禱ê時，常常歡喜來祈禱，ta̍k pái ūi-tio̍h lín chèng lâng kî-tó ê sî, siông-siông hoaⁿ-hí lâi kî-tó,

5因為lín tùi頭一日到taⁿ，saⁿ-kap有份tī興起福音；in-ūi lín tùi thâu chi̍t ji̍t kàu taⁿ, saⁿ-kap ū hūn tī heng-khí hok-im;

6我也深信起頭做好ê工tī lín ê，beh成伊到tī耶穌基督ê日；góa iā chhim sìn khí-thâu chòe hó ê kang tī lín ê, beh chiâⁿ i kàu tī Iâ-so͘ Ki-tok ê ji̍t;

7koh我為tio̍h lín眾人有chit號心志是合宜，因為lín常常tī我ê心內，無論我tī鐵鏈中，以及辯明來堅固福音ê時，lín眾人kap我有份tī恩典。koh góa ūi-tio̍h lín chèng lâng ū chit hō sim-chì sī ha̍p-gî, in-ūi lín siông-siông tī góa ê sim-lāi, bô lūn góa tī thih-liān tiong, í-ki̍p piān-bêng lâi kian-kò͘ hok-im ê sî, lín chèng lâng kap góa ū hūn tī un-tián.

8因為上帝kā我做干證，我體基督耶穌ê心，有怎樣戀慕lín眾人。In-ūi Siōng-tè kā góa chòe kan-chèng, góa thé Ki-tok Iâ-so͘ ê sim, ū cháiⁿ-iūⁿ loân-bō͘ lín chèng lâng.

9Koh我所求ê就是hō͘ lín ê仁愛，tī智慧以及ta̍k樣ê曉悟，充滿又koh充滿，Koh góa só͘ kiû ê chiū-sī hō͘ lín ê jîn-ài, tī tì-hūi í-ki̍p ta̍k iūⁿ ê hiáu-ngō͘, chhiong-móa iū-koh chhiong-móa,

10致到lín會驗出hiah-ê khah好ê事，hō͘ lín純全無塞礙，到tī基督ê日；tì-kàu lín ōe giām-chhut hiah ê khah hó ê sū, hō͘ lín sûn-choân bô that-gāi, kàu tī Ki-tok ê ji̍t;

11用義ê果子滿滿，就是tùi耶穌基督有ê，beh hō͘上帝得tio̍h榮光o-ló。ēng gī ê ké-chí móa-móa, chiū-sī tùi Iâ-so͘ Ki-tok ū ê, beh hō͘ Siōng-tè tit-tio̍h êng-kng o-ló.

12兄弟ah，我ái lín知我所tú-tio̍h ê tāi-chì tú-tú是hō͘福音khah進步；Hiaⁿ-tī ah, góa ái lín chai góa só͘ tú-tio̍h ê tāi-chì tú-tú sī hō͘ hok-im khah chìn-pō͘;

13致到我ê掛鐵鏈tī基督來顯明tī全營，kap其餘ê眾人；tì-kàu góa ê kòa thih-liān tī Ki-tok lâi hián-bêng tī choân iâⁿ, kap kî-û ê chèng lâng;

14koh致到tiàm-tī主ê兄弟大半tùi我ê掛鐵鏈來深信，益發好膽無驚，來講上帝ê道理。koh tì-kàu tiàm-tī Chú ê hiaⁿ-tī tōa pòaⁿ tùi góa ê kòa thih-liān lâi chhim sìn, it-hoat hó-táⁿ bô kiaⁿ, lâi kóng Siōng-tè ê tō-lí.

15taⁿ人teh傳基督，有ê是出tī怨妒冤家，有ê是出tī好意思。Taⁿ lâng teh thoân Ki-tok, ū-ê sī chhut tī oàn-tò͘ oan-ke, ū-ê sī chhut tī hó ì-sù.

16Chiah-ê是出tī仁愛，因為知我是為tio̍h辯明福音來設立ê。Chiah-ê sī chhut tī jîn-ài, in-ūi chai góa sī ūi-tio̍h piān-bêng hok-im lâi siat-li̍p ê.

17Hiah-ê teh報揚基督是出tī結黨，m̄是實心； in ê意思是ài hō͘我tī鐵鏈中另外加添艱苦。Hiah-ê teh pò-iông Ki-tok sī chhut tī kiat-tóng, m̄ sī si̍t-sim; in ê ì-sù sī ài hō͘ góa tī thih-liān tiong lēng-gōa ke-thiⁿ kan-khó͘.

18Án-ni就怎樣？或是假，或是真，無論怎樣，kun-tú是傳基督； 我因為án-ni就歡喜，也beh歡喜。Án-ni chiū cháiⁿ-iūⁿ? He̍k-sī ké, he̍k-sī chin, bô lūn cháiⁿ-iūⁿ, kun-tú sī thoân Ki-tok; góa in-ūi án-ni chiū hoaⁿ-hí, iā beh hoaⁿ-hí.

19因為我知chit-ê事，tùi lín ê祈禱，以及耶穌基督ê神ê賞賜，beh致到我得tio̍h救，In-ūi góa chai chit ê sū, tùi lín ê kî-tó, í-ki̍p Iâ-so͘ Ki-tok ê Sîn ê siúⁿ-sù, beh tì-kàu góa tit-tio̍h kiù,

20照我所切切欣慕kap ǹg望ê，就是我無一項事見笑，凡事好膽，現今也照平常án-ni，或是tùi死或是tùi活，基督beh tī我ê身軀得tio̍h榮光。chiàu góa só͘ chhiat-chhiat him-bō͘ kap ǹg-bāng ê, chiū-sī góa bô chi̍t hāng sū kiàn-siàu, hoān sū hó-táⁿ, hiān-kim iā chiàu pêng-siông án-ni, he̍k-sī tùi sí he̍k-sī tùi oa̍h, Ki-tok beh tī góa ê seng-khu tit-tio̍h êng-kng.

21因為論到我，活就是基督，死就是利益。In-ūi lūn-kàu góa, oa̍h chiū-sī Ki-tok, sí chiū-sī lī-ek.

22設使活tī肉體，這是做我ê工ê果子，我也m̄知beh怎樣揀。Siat-sú oa̍h tī jio̍k-thé, che sī chòe góa ê kang ê ké-chí, góa iā m̄ chai beh cháiⁿ-iūⁿ kéng.

23我tī兩難ê中間，真ài tò去kap基督saⁿ-kap tī-teh，是不止khah好。Góa tī lióng-lân ê tiong-kan, chin ài tò-khì kap Ki-tok saⁿ-kap tī-teh, sī put-chí khah hó.

24總是猶原tòa tī肉體，為tio̍h lín ê緣故，是koh-khah要緊。Chóng-sī iû-goân tòa tī jio̍k-thé, ūi-tio̍h lín ê iân-kò͘, sī koh khah iàu-kín.

25我已經深信chit-ê，就知我beh猶原tī-teh，也kap lín眾人saⁿ-kap tī-teh，致到lín ê信得tio̍h進步koh歡喜；Góa í-keng chhim sìn chit-ê, chiū chai góa beh iû-goân tī-teh, iā kap lín chèng lâng saⁿ-kap tī-teh, tì-kàu lín ê sìn tit-tio̍h chìn-pō͘ koh hoaⁿ-hí;

26hō͘ lín tī基督耶穌ê誇口，為tio̍h我會ná充滿，是tùi我kap lín koh tī-teh。hō͘ lín tī Ki-tok Iâ-so͘ ê khoa-kháu ūi-tio̍h góa ōe ná chhiong-móa, sī tùi góa kap lín koh tī-teh.

27獨獨lín行tāi-chì tio̍h合tī基督ê福音； hō͘我kiám-chhái來見tio̍h lín，á是離開lín，會聽見lín ê tāi-chì，就是lín tī一個神khiā在，用一心為tio̍h福音ê信saⁿ-kap出力；To̍k-to̍k lín kiâⁿ tāi-chì tio̍h ha̍p tī Ki-tok ê hok-im; hō͘ góa kiám-chhái lâi kìⁿ-tio̍h lín, á-sī lī-khui lín, ōe thiaⁿ-kìⁿ lín ê tāi-chì, chiū-sī lín tī chi̍t ê sîn khiā-chāi, ēng chi̍t sim ūi-tio̍h hok-im ê sìn saⁿ-kap chhut-la̍t;

28凡tāi-chì無hō͘對敵phah驚； 這是做in滅無ê憑據，也是做lín得救ê憑據； lóng是tùi上帝。hoān tāi-chì bô hō͘ tùi-te̍k phah-kiaⁿ; che sī chòe in bia̍t-bô ê pîn-kù, iā sī chòe lín tit kiù ê pîn-kù; lóng sī tùi Siōng-tè.

29因為已經賞賜lín為tio̍h基督，m̄-nā信靠伊，koh為tio̍h伊受苦；In-ūi í-keng siúⁿ-sù lín ūi-tio̍h Ki-tok, m̄ nā sìn-khò I, koh ūi-tio̍h I siū khó͘;

30lín出力交戰，kap前所看見我ê，現今所聽見我ê相同。lín chhut-la̍t kau-chiàn, kap chêng só͘ khòaⁿ-kìⁿ góa ê, hiān-kim só͘ thiaⁿ-kìⁿ góa ê, saⁿ-tâng.

1所以若tī基督有甚麼勸勉，á是甚麼仁愛ê安慰，á是有聖神ê甚麼交通，á是有甚麼慈悲憐憫，Só͘-í nā tī Ki-tok ū sím-mi̍h khoàn-bián, á-sī sím-mi̍h jîn-ài ê an-ùi, á-sī ū Sèng Sîn ê sím-mi̍h kau-thong, á-sī ū sím-mi̍h chû-pi lîn-bín,

2lín tio̍h hō͘我ê歡喜充滿，就是同心志，同仁愛，心神和合，心志專一；lín tio̍h hō͘ góa ê hoaⁿ-hí chhiong-móa, chiū-sī tâng sim-chì, tâng jîn-ài, sim-sîn hô-ha̍p, sim-chì choan-it;

3凡事莫得為tio̍h結黨，á是為tio̍h空空ê榮光，來做； 獨獨大家用謙遜ê心看別人khah贏tī本身。hoān sū bo̍h-tit ūi-tio̍h kiat-tóng, á-sī ūi-tio̍h khang-khang ê êng-kng, lâi chòe; to̍k-to̍k tāi-ke ēng khiam-sùn ê sim khòaⁿ pa̍t lâng khah-iâⁿ tī pún-sin.

4Lín ta̍k人莫得顧家己ê事，也tio̍h顧別人ê事。Lín ta̍k lâng bo̍h-tit kò͘ ka-kī ê sū, iā tio̍h kò͘ pa̍t lâng ê sū.

5Lín tio̍h有基督耶穌ê心做心；Lín tio̍h ū Ki-tok Iâ-so͘ ê sim chòe sim;

6伊本有上帝ê形狀，無掠kap上帝平等做所tio̍h執守ê，I pún ū Siōng-tè ê hêng-chōng, bô lia̍h kap Siōng-tè pîⁿ téng chòe só͘ tio̍h chip-siú ê,

7反tńg piàⁿ空家己，取奴僕ê形狀，成做人ê樣相；hoán-tńg piàⁿ-khang ka-kī, chhú lô͘-po̍k ê hêng-chōng, chiâⁿ-chòe lâng ê iūⁿ-siùⁿ;

8已經有親像人ê款式，就屈家己，順服到tī死，甚至死tī十字架。í-keng ū chhin-chhiūⁿ lâng ê khoán-sit, chiū khut ka-kī, sūn-ho̍k kàu tī sí, sīm-chì sí tī si̍p-jī-kè.

9所以上帝高升伊極高，賞賜伊hit-ê名，pôaⁿ過tī萬名ê頂面ê；Só͘-í Siōng-tè ko-seng I ke̍k koâiⁿ, siúⁿ-sù I hit ê miâ, pôaⁿ-kè tī bān miâ ê téng-bīn ê;

10hō͘見若tī天，tī地，kap tī地下ê，tī耶穌ê名，無一個腳頭u m̄跪拜，hō͘ kìⁿ-nā tī thiⁿ, tī tōe, kap tī tōe-ē ê, tī Iâ-so͘ ê miâ, bô chi̍t ê kha-thâu-u m̄ kūi-pài,

11無一個嘴m̄稱呼耶穌基督做主，來歸榮光父上帝。bô chi̍t ê chhùi m̄ chheng-ho͘ Iâ-so͘ Ki-tok chòe Chú, lâi kui êng-kng Pē Siōng-tè.

12所以，我所疼ê兄弟ah，親像lín bat常常順thàn，m̄-nā tī我kap lín tī-teh ê時，就現今我無kap lín tī-teh，益發tio̍h用驚惶ngia̍uh-ngia̍uh-chhoah，來做成lín家己ê得救；Só͘-í, góa só͘ thiàⁿ ê hiaⁿ-tī ah, chhin-chhiūⁿ lín bat siông-siông sūn-thàn, m̄ nā tī góa kap lín tī-teh ê sî, chiū hiān-kim góa bô kap lín tī-teh, it-hoat tio̍h ēng kiaⁿ-hiâⁿ ngia̍uh-ngia̍uh-chhoah, lâi chòe-chiâⁿ lín ka-kī ê tit kiù;

13因為lín有hit-ê意願，有hit-ê所行，lóng是tùi上帝為tio̍h伊ê好意來行tī lín心內。in-ūi lín ū hit ê ì-goān, ū hit ê só͘ kiâⁿ, lóng sī tùi Siōng-tè ūi-tio̍h I ê hó-ì lâi kiâⁿ tī lín sim-lāi.

14Lín凡事莫得nga̍uh-nga̍u念，莫得爭辯；Lín hoān sū bo̍h-tit nga̍uh-nga̍uh-liām, bo̍h-tit cheng-piān;

15chiah hō͘ lín無thang嫌，真實無假，做上帝ê kiáⁿ兒，無瑕疵tī邪癖橫逆ê世界； lín tī in中間出現，親像照光tī世間ê，顯明活命ê道理；chiah hō͘ lín bô thang hiâm, chin-si̍t bô ké, chòe Siōng-tè ê kiáⁿ-jî, bô hâ-chhû tī siâ-phiah hêng-ge̍k ê sè-kài; lín tī in tiong-kan chhut-hiān, chhin-chhiūⁿ chiò-kng tī sè-kan ê, hián-bêng oa̍h-miā ê tō-lí;

16hō͘我到tī基督ê日有thang誇口，因為我m̄是空空跑走，也m̄是空空tio̍h磨。hō͘ góa kàu tī Ki-tok ê ji̍t ū thang khoa-kháu, in-ūi góa m̄ sī khang-khang pháu-cháu, iā m̄ sī khang-khang tio̍h-bôa.

17就若用lín ê信做祭物來服事，我做灌奠tī hit頂面，我是歡喜，也kap lín眾人saⁿ-kap歡喜；Chiū nā ēng lín ê sìn chòe chè-mi̍h lâi ho̍k-sāi, góa chòe koàn-tiān tī hit téng-bīn, góa sī hoaⁿ-hí, iā kap lín chèng lâng saⁿ-kap hoaⁿ-hí;

18lín也tio̍h án-ni歡喜，續kap我saⁿ-kap歡喜。lín iā tio̍h án-ni hoaⁿ-hí, sòa kap góa saⁿ-kap hoaⁿ-hí.

19但是我tiàm-tī主耶穌ǹg望緊緊差提摩太去就近lín，hō͘我知lín ê事，來安我ê心。Nā-sī góa tiàm-tī Chú Iâ-so͘ ǹg-bāng kín-kín chhe Thê-mô͘-thài khì chiū-kūn lín, hō͘ góa chai lín ê sū, lâi an góa ê sim.

20因為我無別個同心ê人，真正掛慮lín ê tāi-chì ê。In-ūi góa bô pa̍t ê tâng-sim ê lâng, chin-chiàⁿ khòa-lū lín ê tāi-chì ê.

21因為眾人lóng是圖謀家己ê事，m̄是圖謀耶穌基督ê事。In-ūi chèng lâng lóng sī tô͘-bô͘ ka-kī ê sū, m̄ sī tô͘-bô͘ Iâ-so͘ Ki-tok ê sū.

22但是提摩太ê經驗lín知，就是kap我saⁿ-kap tio̍h磨來興起福音，親像kiáⁿ tùi老父án-ni。Nā-sī Thê-mô͘-thài ê keng-giām lín chai, chiū-sī kap góa saⁿ-kap tio̍h-bôa lâi heng-khí hok-im, chhin-chhiūⁿ kiáⁿ tùi lāu-pē án-ni.

23所以我看我ê tāi-chì怎樣，ǹg望liâm-piⁿ差伊去。Só͘-í góa khòaⁿ góa ê tāi-chì cháiⁿ-iūⁿ, ǹg-bāng liâm-piⁿ chhe i khì.

24總是我tiàm-tī主深信本身也beh緊緊到。Chóng-sī góa tiàm-tī Chú chhim sìn pún-sin iā beh kín-kín kàu.

25但是我想要緊tio̍h差Í-pa-hut-thê就近lín，伊就是我ê兄弟，同做工ê，同當兵ê，也是lín ê使者，供給我所欠用ê；Nā-sī góa siūⁿ iàu-kín tio̍h chhe Í-pa-hut-thê chiū-kūn lín, i chiū-sī góa ê hiaⁿ-tī, tâng chòe kang ê, tâng tng-peng ê, iā sī lín ê sù-chiá, kiong-kip góa só͘ khiàm-ēng ê;

26因為伊戀慕lín眾人，來慘慼，是lín bat聽見伊破病；in-ūi i loân-bō͘ lín chèng lâng, lâi chhám-chhoeh, sī lín bat thiaⁿ-kìⁿ i phòa-pīⁿ;

27伊果然有破病到險險死； 但是上帝憐憫伊，m̄-nā憐憫伊，也憐憫我，免得我tī憂悶中加添憂悶。i kó-jiân ū phòa-pīⁿ kàu hiám-hiám sí; nā-sī Siōng-tè lîn-bín i, m̄ nā lîn-bín i, iā lîn-bín góa, bián-tit góa tī iu-būn tiong ke-thiⁿ iu-būn.

28所以我koh-khah致意差伊，hō͘ lín koh看見伊，來歡喜，我就khah無憂悶。Só͘-í góa koh khah tì-ì chhe i, hō͘ lín koh khòaⁿ-kìⁿ i, lâi hoaⁿ-hí, góa chiū khah bô iu-būn.

29所以lín tiàm-tī主tio̍h歡歡喜喜接納伊，也tio̍h尊重親像chit號ê人。Só͘-í lín tiàm-tī Chú tio̍h hoaⁿ-hoaⁿ hí-hí chiap-la̍p i, iā tio̍h chun-tiōng chhin-chhiūⁿ chit hō ê lâng.

30因為伊為tio̍h做基督ê工險險死，家己拚命，beh補lín服事我所無夠ê。In-ūi i ūi-tio̍h chòe Ki-tok ê kang hiám-hiám sí, ka-kī piàⁿ-miā, beh pó͘ lín ho̍k-sāi góa só͘ bô kàu ê.