1你若kap官長坐桌，Tio̍h注意hit-ê tī你面前ê；Lí nā kap koaⁿ-tiúⁿ chē-toh, Tio̍h chù-ì hit-ê tī lí bīn-chêng ê;

2你若是貪食ê人，就tio̍h用刀hē tī嚨喉。Lí nā sī tham-chia̍h ê lâng, Chiū tio̍h ēng to hē tī nâ-âu.

3M̄-thang tham伊ê好食物；因為是phiàn-人ê食物。M̄-thang tham i ê hó chia̍h-mi̍h; In-ūi sī phiàn-lâng ê chia̍h-mi̍h.

4M̄-thang拖磨來求好額；M̄-thang óa靠家己ê聰明。M̄-thang thoa-bôa lâi kiû hó-gia̍h; M̄-thang óa-khò ka-kī ê chhang-miâ.

5你kiám beh注目tī hit-ê空虛ê mah？因為錢財家己beh發翼，親像鷹鳥飛上天。Lí kiám beh chù-ba̍k tī hit ê khang-hu--ê mah? In-ūi chîⁿ-châi ka-kī beh hoat-si̍t, chhin-chhiūⁿ eng-chiáu pe chiūⁿ thiⁿ.

6M̄-thang食堅吝ê人ê飯，也m̄-thang貪伊ê好滋味。M̄-thang chia̍h kian-līn ê lâng ê pn̄g, Iā m̄-thang tham i ê hó chu-bī.

7因為伊ê心án-ni想，伊做人也án-ni；伊雖然對你講，請食，請lim，總是伊ê心無意向你。In-ūi i ê sim án-ni siūⁿ, i chòe lâng iā án-ni; I sui-jiân tùi lí kóng, Chhiáⁿ chia̍h, chhiáⁿ lim, Chóng-sī i ê sim bô ì-hiòng lí.

8就你所食hit-點á beh吐出來；所講ê好話歸tī空空。Chiū lí só͘ chia̍h hit-tiám-á beh thò͘--chhut-lâi; Só͘ kóng ê hó-ōe kui tī khang-khang.

9M̄-thang講話hō͘戇人聽，因為伊beh看輕你智慧ê話。M̄-thang kóng-ōe hō͘ gōng-lâng thiaⁿ, In-ūi i beh khòaⁿ-khin lí tì-hūi ê ōe.

10M̄-thang移徙早時所立ê地界，也m̄-thang深入無父ê kiáⁿ ê田地。M̄-thang î-sóa chá-sî só͘ li̍p ê tōe-kài, Iā m̄-thang chhim-ji̍p bô-pē ê kiáⁿ ê chhân-tōe.

11因為贖回in-ê，有大權能，伊beh對你來伸in ê冤。In-ūi sio̍k-hôe in ê, ū tōa koân-lêng, I beh tùi lí lâi sin in ê oan.

12Tio̍h專心ǹg tī教示，Àⁿ耳孔tī智慧ê話。Tio̍h choan-sim ǹg tī kà-sī, Àⁿ hī-khang tī tì-hūi ê ōe.

13Gín-ná m̄-thang無教督；你用箠phah伊bōe致到死。Gín-ná m̄-thang bô kàu-tok; Lí ēng chhê phah i bōe tì-kàu sí.

14你用箠phah伊，就thang救伊ê靈魂免落陰府。Lí ēng chhê phah i, Chiū thang kiù i ê lêng-hûn bián lo̍h im-hú.

15我ê kiáⁿ，你ê心若有智慧，我ê心的確真歡喜。Góa ê kiáⁿ, lí ê sim nā ū tì-hūi, Góa ê sim tek-khak chin hoaⁿ-hí.

16你ê嘴若講正直，我ê心腸也beh快樂。Lí ê chhùi nā kóng chèng-ti̍t, Góa ê sim-tn̂g iā beh khoài-lo̍k.

17你m̄-thang欣羨pháiⁿ人，獨獨tio̍h thong日敬畏耶和華。Lí m̄-thang him-soān pháiⁿ-lâng, to̍k-to̍k tio̍h thong-ji̍t kèng-ùi Iâ-hô-hoa.

18因為iáu有將來ê報應，你ê ǹg望也bōe會斷絕。In-ūi iáu ū chiong-lâi ê pò-èng, Lí ê ǹg-bāng iā bōe-ōe toān-choa̍t.

19我ê kiáⁿ，你tio̍h聽，tio̍h有智慧；Koh引chhōa你ê心tī正直ê路。Góa ê kiáⁿ, lí tio̍h thiaⁿ, tio̍h ū tì-hūi; Koh ín-chhōa lí ê sim tī chèng-ti̍t ê lō͘.

20好lim酒ê，貪食肉ê，你m̄-thang kap伊往來，結交á做陣。Hò͘ⁿ lim-chiú ê, tham-chia̍h bah ê, Lí m̄-thang kap i óng-lâi, kiat-kau á chòe-tīn.

21因為好酒貪食ê，beh致到sòng-hiong；Ài睏ê beh致到穿破衫。In-ūi hò͘ⁿ-chiú tham-chia̍h-ê, beh tì-kàu sòng-hiong; Ài khùn-ê beh tì-kàu chhēng phòa-saⁿ.

22你tio̍h聽thàn生你ê老父；你ê老母老ê時，也m̄-thang看輕i。Lí tio̍h thiaⁿ-thàn siⁿ lí ê lāu-pē; Lí ê lāu-bú lāu ê sî, iā m̄-thang khòaⁿ-khin i.

23Tio̍h買真理，m̄-thang賣出；智慧、教示，kap明理，也tio̍h án-ni。Tio̍h bóe chin-lí, m̄-thang bōe-chhut; Tì-hūi, kà-sī, kap bêng-lí, iā tio̍h án-ni.

24義人ê老父beh大快樂；人生tio̍h智慧ê kiáⁿ beh因為伊來歡喜。Gī-lâng ê lāu-pē beh tōa khoài-lo̍k; Lâng siⁿ-tio̍h tì-hūi ê kiáⁿ beh in-ūi i lâi hoaⁿ-hí.

25你tio̍h hō͘你ê父母歡喜，Hō͘生你ê母快樂。Lí tio̍h hō͘ lí ê pē-bú hoaⁿ-hí, Hō͘ siⁿ lí ê bú khoài-lo̍k.

26我ê kiáⁿ，tio̍h將你ê心獻hō͘我，你ê目睭也tio̍h歡喜我hiah-ê路。Góa ê kiáⁿ, tio̍h chiong lí ê sim hiàn hō͘ góa, Lí ê ba̍k-chiu iā tio̍h hoaⁿ-hí góa hiah ê lō͘.

27因為娼妓是深坑，淫婦是狹ê井。In-ūi chhiong-ki sī chhim-khiⁿ, Îm-hū sī oe̍h ê chíⁿ.

28伊teh當等親像賊，Tī人ê中間加添詭詐ê人。I teh tng-tán chhin-chhiūⁿ chha̍t, Tī lâng ê tiong-kan ke-thiⁿ khúi-chà ê lâng.

29Chī-chūi有災厄？ 是誰有憂悶？ 是誰有相爭？ Chī-chūi有吐氣？ 是誰無緣故受傷？ Chī-chūi目睭紅霧？Chī-chūi ū chai-ē? chī-chūi ū iu-būn? chī-chūi ū saⁿ-chiⁿ? Chī-chūi ū thó͘-khùi? chī-chūi bô iân-kò͘ siū siong? Chī-chūi ba̍k-chiu âng-bū?

30就是hit號lim酒m̄知soah，四界chhē調和ê酒，hit號人。Chiū-sī hit-hō lim-chiú m̄-chai soah, Sì-kòe chhē tiau-hô ê chiú, hit-hō lâng.

31酒成做紅，Tī杯內成做色水；Lim了滑喉，你m̄-thang看伊。Chiú chiâⁿ-chòe âng, Tī poe-lāi chiâⁿ-chòe sek-chúi; Lim-liáu ku̍t-âu, lí m̄-thang khòaⁿ i.

32到尾親像蛇teh咬你，親像毒蛇teh螫你。Kàu-bé chhin-chhiūⁿ chôa teh kā lí, Chhin-chhiūⁿ to̍k-chôa teh chhioh lí.

33你ê目睭beh看奇異ê事，你ê心beh發出乖謬。Lí ê ba̍k-chiu beh khòaⁿ kî-īⁿ ê sū, Lí ê sim beh hoat-chhut koāi-biū.

34你beh親像倒tī海中，á是親像睏tī chûn-ûi-téng ê人。Lí beh chhin-chhiūⁿ tó tī hái-tiong, Á-sī chhin-chhiūⁿ khùn tī chûn-ûi-téng ê lâng.

35你beh講，人phah我，我無受傷，人kòng我，我m̄知；我tī時精神？我koh去chhē酒。Lí beh kóng, Lâng phah góa, góa bô siū-siong, Lâng kòng góa, góa m̄-chai; Góa tī-sî cheng-sîn? góa koh khì chhē chiú.

1莫得欣羨pháiⁿ人，也m̄-thang ài kap in做一堆。Bo̍h-tit him-soān pháiⁿ-lâng, Iā m̄-thang ài kap in chòe chi̍t-tui.

2因為in ê心圖謀強暴，In ê嘴談論殘害。In-ūi in ê sim tô͘-bô͘ kiông-pō, In ê chhùi tâm-lūn chân-hāi.

3厝tùi智慧來起造，Koh tùi聰明來建立。Chhù tùi tì-hūi lâi khí-chō, Koh tùi chhang-miâ lâi kiàn-li̍p.

4Koh tùi知識就hiah-ê房間，有ta̍k項寶貝kap súi ê財物滿滿。Koh tùi tì-sek chiū hiah ê pâng-keng, Ū ta̍k-hāng pó-pòe kap súi ê châi-bu̍t móa-móa.

5智慧ê人有大能力，有知識ê人加添氣力。Tì-hūi ê lâng ū tōa lêng-le̍k, Ū tì-sek ê lâng ke-thiⁿ khùi-la̍t.

6你beh交戰tio̍h用好ê計策，謀士chōe，就會得勝。Lí beh kau-chiàn tio̍h ēng hó ê kè-chhek, Bô͘-sū chōe, chiū ōe tek-sèng.

7智慧真高，戇人bōe能到；Tī城門伊無開嘴。Tì-hūi chin koâiⁿ, gōng-lâng bōe-ōe kàu; Tī siâⁿ-mn̂g i bô khui-chhùi.

8設計謀做pháiⁿ ê，人beh稱伊做惹災厄ê。Siat kè-bô͘ chòe pháiⁿ ê, Lâng beh chheng i chòe jiá chai-ē ê.

9戇人ê心想是罪惡，侮慢ê是人所厭惡。Gōng-lâng ê sim-siūⁿ sī chōe-ok, Bú-bān-ê sī lâng só͘ iàm-ò͘ⁿ.

10你tī患難ê日若替-siok，你ê氣力就少。Lí tī hoān-lān ê ji̍t nā thòe-siok, Lí ê khùi-la̍t chiū chió.

11人受拖到死地，你tio̍h救伊；人beh受thâi，你m̄-thang無救伊。Lâng siū thoa kàu sí-tōe, lí tio̍h kiù i; Lâng beh siū thâi, lí m̄-thang bô kiù i.

12你若講，看ah，chit-ê事阮m̄知，Hit-ê鑑察人ê心ê，kiám bōe忖度mah？保全你ê性命ê kiám m̄知？ 祂kiám無照ta̍k人所行ê報應ta̍k人mah？Lí nā kóng, Khòaⁿ ah, chit ê sū goán m̄-chai, Hit-ê kàm-chhat lâng ê sim ê, kiám bōe chhún-to̍k mah? Pó-choân lí ê sìⁿ-miā-ê kiám m̄-chai? I kiám bô chiàu ta̍k-lâng só͘-kiâⁿ-ê pò-èng ta̍k-lâng mah?

13我ê kiáⁿ，你tio̍h食蜜，因為是好；食蜜房所滴ê蜜就知甜。Góa ê kiáⁿ, lí tio̍h chia̍h bi̍t, in-ūi sī hó; Chia̍h bi̍t-pô͘ só͘ tih ê bi̍t chiū chai tiⁿ.

14tio̍h知智慧tī你ê心也是án-ni；你若chhē-tio̍h，將來beh有好-報；你ê ǹg望也無致到斷絕。Tio̍h chai tì-hūi tī lí ê sim iā sī án-ni; Lí nā chhē-tio̍h, chiong-lâi beh ū hó-pò; Lí ê ǹg-bāng iā bô tì-kàu toān-choa̍t.

15pháiⁿ人ah，m̄-thang bih teh攻擊義人ê家；M̄-thang敗壞i安歇ê所在。Pháiⁿ-lâng ah, m̄-thang bih teh kong-kek gī-lâng ê ke; M̄-thang pāi-hoāi i an-hioh ê só͘-chāi.

16因為義人跋倒七pái ōe koh起來；pháiⁿ人受災難就倒壞。In-ūi gī-lâng poa̍h-tó chhit-pái ōe koh khí-lâi; Pháiⁿ-lâng siū chai-lān chiū tó-hoāi.

17你ê對敵跋倒，你莫得歡喜；伊倒壞，你ê心莫得快樂。Lí ê tùi-te̍k poa̍h-tó, lí bo̍h-tit hoaⁿ-hí; I tó-hoāi, lí ê sim bo̍h-tit khoài-lo̍k.

18驚了耶和華看見，就無歡喜，就hō͘伊ê siū-去離開hit-ê人。Kiaⁿ-liáu Iâ-hô-hoa khòaⁿ-kìⁿ, chiū bô hoaⁿ-hí, Chiū hō͘ I ê siū-khì lī-khui hit-ê lâng.

19M̄-thang為tio̍h做pháiⁿ ê人來bōe khat得，也莫得欣羨pháiⁿ人。M̄-thang ūi-tio̍h chòe-pháiⁿ ê lâng lâi bōe khat-tit, Iā bo̍h-tit him-siān pháiⁿ-lâng.

20因為pháiⁿ人無好尾景，pháiⁿ人ê燈beh hoa去。In-ūi pháiⁿ-lâng bô hó bé-kéng, Pháiⁿ-lâng ê teng beh hoa--khì.

21我ê kiáⁿ ah，你tio̍h敬畏耶和華kap君王，莫得kap反覆ê人結交。Góa ê kiáⁿ ah, lí tio̍h kèng-ùi Iâ-hô-hoa kap kun-ông, Bo̍h-tit kap hoán-hok ê lâng kiat-kau.

22因為in ê災害忽然起，In ê年歲ê絕，是誰會知？In-ūi in ê chai-hāi hut-jiân khí, In ê nî-hè ê choa̍t, chī-chūi ōe chai?

23下面所記ê也是智慧人ê話。審判ê時看人ê情面是m̄好。Ē-bīn só͘ kì-ê iā-sī tì-hūi lâng ê ōe. Sím-phòaⁿ ê sî khòaⁿ lâng ê chêng-biān sī m̄-hó.

24Tùi pháiⁿ人講，你是公義，chit-ê人萬百姓beh咒詛i，列邦beh厭惡i。Tùi pháiⁿ-lâng kóng, Lí sī kong-gī, Chit ê lâng bān peh-sìⁿ beh chiù-chó͘ i, lia̍t-pang beh iàm-ò͘ⁿ i.

25責備pháiⁿ人ê beh得tio̍h歡喜，好話ê祝福也beh臨到伊。Chek-pī pháiⁿ-lâng-ê beh tit-tio̍h hoaⁿ-hí, Hó-ōe ê chiok-hok iā beh lîm-kàu i.

26用合宜ê話應答ê，親像用嘴kā人chim。Ēng ha̍p-gî ê ōe ìn-tap ê, Chhin-chhiūⁿ ēng chhùi kā lâng chim.

27你tio̍h事先備辦gōa-頭ê事，田園料理清楚， Chiah thang起厝。Lí tio̍h tāi-seng pī-pān gōa-thâu ê sū, Chhân-hn̂g liāu-lí chheng-chhó, Chiah thang khí-chhù.

28M̄-thang無緣故做干證來攻擊厝邊；你kiám beh用嘴唇來欺騙人？M̄-thang bô iân-kò͘ chòe kan-chèng lâi kong-kek chhù-piⁿ; Lí kiám beh ēng chhùi-tûn lâi khi-phiàn lâng?

29M̄-thang講伊怎樣款待我，我也án-ni款待伊；我beh照hit人所行ê來報伊。M̄-thang kóng i cháiⁿ-iūⁿ khoán-thāi góa, góa iā án-ni khoán-thāi i; Góa beh chiàu hit lâng só͘ kiâⁿ ê lâi pò i.

30我經過pîn-tōaⁿ ê人ê田，無知ê人ê葡萄園。Góa keng-kè pîn-tōaⁿ ê lâng ê chhân, Bû-ti ê lâng ê phû-tô-hn̂g.

31看見刺phè遍遍發，草刺遮蓋地面；石牆也倒落去。Khòaⁿ-kìⁿ chhì-phè piàn-piàn hoat, Chháu-chhì jia-khàm tōe-bīn; Chio̍h-chhiûⁿ iā tó--lo̍h-khì.

32我看了就留心想，我看了就受教示。Góa khòaⁿ-liáu chiū liû-sim siūⁿ, Góa khòaⁿ-liáu chiū siū kà-sī.

33Koh睏tiap-á久，koh眠tiap-á久，束手the tiap-á久；Koh khùn tiap-á-kú, koh bîn tiap-á-kú, Sok-chhiú the tiap-á-kú;

34你ê sòng-hiong beh親像賊來，你ê欠缺親像穿戰甲ê來。Lí ê sòng-hiong beh chhin-chhiūⁿ chha̍t lâi, Lí ê khiàm-kheh chhin-chhiūⁿ chhēng chiàn-kah-ê lâi.

1以下也是所羅門ê箴言，是猶大王 Hi-se-ka ê人所chhau ê。Í-ē iā sī Só͘-lô-bûn ê chim-giân, sī Iû-tāi ông Hi-se-ka ê lâng só͘ chhau ê.

2將tāi-chì秘密，是上帝ê榮光；將tāi-chì查明，是君王ê榮光。Chiong tāi-chì pì-ba̍t, sī Siōng-tè ê êng-kng; Chiong tāi-chì chhâ-bêng, sī kun-ông ê êng-kng.

3天ê高，地ê厚，君王ê心也查bōe出。Thiⁿ ê koâiⁿ, tōe ê kāu, Kun-ông ê sim iā chhâ-bōe-chhut.

4除去銀ê渣滓，chiah有器具thang hō͘鍛鍊ê人用；Tû-khì gûn ê che-tái, Chiah ū khì-kū thang hō͘ thoàn-liān ê lâng ēng;

5除去王ê面前ê pháiⁿ人，伊ê國位是tùi公義來堅固。Tû-khì ông ê bīn-chêng ê pháiⁿ-lâng, I ê kok-ūi sī tùi kong-gī lâi kian-kò͘.

6Tī王ê面前m̄-thang家己尊大，也m̄-thang khiā tī大人ê位。Tī ông ê bīn-chêng m̄-thang ka-kī chun tōa, Iā m̄-thang khiā tī tāi-jîn ê ūi.

7khah好有人對你講，請你上來chia，M̄-thang tī你所見王親ê面前，叫你落去。Khah-hó ū lâng tùi lí kóng, Chhiáⁿ lí chiūⁿ-lâi chia, M̄-thang tī lí só͘ kìⁿ ông-chhin ê bīn-chêng, Kiò lí lo̍h-khì.

8M̄-thang緊緊出去kap人冤家，免得到尾受你ê厝邊凌辱ê時，你m̄知beh怎樣做。M̄-thang kín-kín chhut-khì kap lâng oan-ke, Bián-tit kàu-bé siū lí ê chhù-piⁿ lêng-jio̍k ê sî, Lí m̄-chai beh cháiⁿ-iūⁿ chòe.

9你kap厝邊計較，tio̍h kap伊本身分會；M̄-thang露出別人祕密ê事；Lí kap chhù-piⁿ kè-kàu, tio̍h kap i pún-sin hun-hē; M̄-thang lō͘-chhut pa̍t-lâng pì-bi̍t ê sū;

10驚了聽見ê人會罵你，你ê臭名就oh得脫離。Kiaⁿ-liáu thiaⁿ-kìⁿ ê lâng ōe mē lí, Lí ê chhàu-miâ chiū oh-tit thoat-lī.

11講話合宜，親像金ê蘋果hē tī銀ê籃á。Kóng-ōe ha̍p-gî, Chhin-chhiūⁿ kim ê pîn-kó hē tī gûn ê nâ-á.

12智慧ê人ê責備，tī順thàn ê人ê耳孔，親像金ê耳鉤kap好金ê守-瑟。Tì-hūi ê lâng ê chek-pī, tī sūn-thàn ê lâng ê hī-khang, Chhin-chhiūⁿ kim ê hī-kau kap hó-kim ê siú-sek.

13忠信ê使者對tī差伊ê，親像收割ê時有sng-seh ê涼冷；因為伊hō͘主人ê心看-活。Tiong-sìn ê sù-chiá tùi-tī chhe i ê, Chhin-chhiūⁿ siu-koah ê sî ū sng-seh ê liâng-léng; In-ūi i hō͘ chú-lâng ê sim khòaⁿ-oa̍h.

14無影送物來誇口ê，是親像有風有雲也無落雨。Bô-iáⁿ sàng mi̍h lâi khoa-kháu ê, Sī chhin-chhiūⁿ ū hong ū hûn iā bô lo̍h-hō͘.

15長長吞忍，就官長也受i苦勸；溫柔ê嘴舌ōe at折骨頭。Tn̂g-tn̂g thun-lún, chiū koaⁿ-tiúⁿ iā siū i khó͘-khǹg; Un-jiû ê chhùi-chi̍h ōe at-chi̍h kut-thâu.

16你有得tio̍h蜜無？食夠額就好；驚了你食過額就吐出-來。Lí ū tit-tio̍h bi̍t bô? chia̍h kàu-gia̍h chiū hó; Kiaⁿ-liáu lí chia̍h kè-gia̍h chiū thò͘--chhut-lâi.

17你ê腳m̄-thang chia̍p-chia̍p去厝邊ê家，驚了伊厭賤你，恨神你。Lí ê kha m̄-thang chia̍p-chia̍p khì chhù-piⁿ ê ke, Kiaⁿ-liáu i iàm-chiān lí, gīn-sîn lí.

18Lām-sám干證陷害厝邊ê人，就是親像槌kap刀kap利箭。Lām-sám kan-chèng hām-hāi chhù-piⁿ ê lâng, Chiū-sī chhin-chhiūⁿ thûi kap to kap lāi-chìⁿ.

19患難ê時，óa靠無忠信ê人，親像pháiⁿ ê嘴齒，thu̍t-lûn ê腳。Hoān-lān ê sî, óa-khò bô tiong-sìn ê lâng, Chhin-chhiūⁿ pháiⁿ ê chhùi-khí, thu̍t-lûn ê kha.

20Tùi傷心ê人唱歌，親像冬天ê時thǹg衫，koh親像piàⁿ-醋tī kiⁿ ê頂面。Tùi siong-sim ê lâng chhiùⁿ-koa, Chhin-chhiūⁿ tang-thiⁿ ê sî thǹg-saⁿ, koh chhin-chhiūⁿ piàⁿ-chhò͘ tī kiⁿ ê téng-bīn.

21你ê對敵若iau，tio̍h用米糧hō͘伊食；嘴乾，tio̍h用水hō͘伊lim；Lí ê tùi-te̍k nā iau, tio̍h ēng bí-niû hō͘ i chia̍h; Chhùi-ta, tio̍h ēng chúi hō͘ i lim;

22因為你是用熱熱ê火炭疊tī伊ê頭殼頂；耶和華也beh報賞你。In-ūi lí sī ēng jia̍t-jia̍t ê hé-thòaⁿ thia̍p tī i ê thâu-khak-téng; Iâ-hô-hoa iā beh pò-siúⁿ lí.

23北風ōe致到落雨；譭謗人ê舌ōe致到人變面。Pak-hong ōe tì-kàu lo̍h hō͘; Húi-pòng lâng ê chi̍h ōe tì-kàu lâng pìⁿ-bīn.

24寧可tiàm tī厝頂ê角頭，莫得kap吵鬧ê婦人人相kap tòa tī寬闊ê厝。Lêng-khó͘ tiàm tī chhù-téng ê kak-thâu, Bo̍h-tit kap chháu-nāu ê hū-jîn-lâng saⁿ-kap tòa tī khoan-khoah ê chhù.

25有好siau-si̍t tùi遠遠來，親像用冷水hō͘嘴乾ê人lim。Ū hó siau-sit tùi hn̄g-hn̄g lâi, Chhin-chhiūⁿ ēng léng-chúi hō͘ chhùi-ta ê lâng lim.

26義人tī pháiⁿ人ê面前退讓，親像踏-lô ê水泉，phah lâ-sâm ê井。Gī-lâng tī pháiⁿ-lâng ê bīn-chêng thè-niū, Chhin-chhiūⁿ ta̍h-lô ê chúi-chôaⁿ, phah lâ-sâm ê chíⁿ.

27食蜜chōe-chōe是m̄好；人求家己ê榮光bōe-算得榮光。Chia̍h bi̍t chōe-chōe sī m̄-hó; Lâng kiû ka-kī ê êng-kng bōe-sǹg-tit êng-kng.

28人無約束家己ê心，是親像毀壞ê城無牆。Lâng bô iok-sok ka-kī ê sim, Sī chhin-chhiūⁿ húi-hoāi ê siâⁿ bô chhiûⁿ.