1無人追jip ê時，pháiⁿ人也teh走；獨獨義人好膽親像獅。Bô lâng tui-jip ê sî, pháiⁿ-lâng iā teh cháu; To̍k-to̍k gī-lâng hó-táⁿ chhin-chhiūⁿ sai.

2因為地方有罪過，人君就chōe-chōe；有明理kap知識ê人，國就會長長tī-teh。In-ūi tōe-hng ū chōe-kòa, jîn-kun chiū chōe-chōe; Ū bêng-lí kap chai-bat ê lâng, kok chiū ōe tn̂g-tn̂g tī-teh.

3Chhiah-人欺負sòng-hiong人，親像做大水ê雨sàu-無五穀。Chhiah-lâng khi-hū sòng-hiong lâng, Chhin-chhiūⁿ chòe tōa-chúi ê hō͘ sàu-bô ngó͘-kok.

4放sak律法ê o-ló pháiⁿ人；總是執守律法ê kap pháiⁿ人相爭。Pàng-sak lu̍t-hoat-ê o-ló pháiⁿ-lâng; Chóng-sī chip-siú lu̍t-hoat-ê kap pháiⁿ-lâng saⁿ-chiⁿ.

5Pháiⁿ人無明白公義，但是chhē求耶和華ê無m̄明白。Pháiⁿ-lâng bô bêng-pe̍k kong-gī, Nā-sī chhē-kiû Iâ-hô-hoa-ê bô m̄ bêng-pe̍k.

6Sòng-hiong來行正直，贏過行tāi-chì乖僻ê好額人。Sòng-hiong lâi kiâⁿ chèng-ti̍t, Iâⁿ-kè kiâⁿ tāi-chì koāi-phiah ê hó-gia̍h lâng.

7謹慎守律法ê，是智慧ê kiáⁿ；Kap貪食ê做伴，是凌辱tio̍h老父。Kín-sīn siú lu̍t-hoat ê, sī tì-hūi ê kiáⁿ; Kap tham-chia̍h-ê chòe-phōaⁿ, sī lêng-jio̍k-tio̍h lāu-pē.

8放重利來發財ê，是kā hit-ê憐憫sòng-hiong人ê積聚。Pàng tāng-lāi lâi hoat-châi ê, Sī kā hit ê lîn-bín sòng-hiong lâng-ê chek-chū.

9耳孔oa̍t走m̄聽律法ê，連伊ê祈禱也是可惡。Hī-khang oa̍t-cháu m̄-thiaⁿ lu̍t-hoat ê, Liân i ê kî-tó iā sī khó-ò͘ⁿ.

10迷惑正直人行pháiⁿ路ê，Beh跋落tī家己ê陷坑。獨獨完全ê人beh承接好ê業。Bê-he̍k chèng-ti̍t lâng kiâⁿ pháiⁿ-lō͘ ê, Beh poa̍h-lo̍h tī ka-kī ê hām-khiⁿ. To̍k-to̍k oân-choân ê lâng beh sêng-chiap hó ê gia̍p.

11好額人家己看做智慧，獨獨聰明ê sòng-hiong人看伊透-透。Hó-gia̍h lâng ka-kī khòaⁿ-chòe tì-hūi, To̍k-to̍k chhang-miâ ê sòng-hiong lâng khòaⁿ i thàu-thàu.

12義人得志有大榮光；pháiⁿ人興起，人就走去bih。Gī-lâng tek-chì ū tōa êng-kng; Pháiⁿ-lâng heng-khí, lâng chiū cháu khì bih.

13遮掩家己ê罪惡ê，bōe興通；獨獨認罪來改變ê，beh得tio̍h憐憫。Jia-iám ka-kī ê chōe-ok ê, bōe heng-thong; To̍k-to̍k jīn-chōe lâi kóe-pìⁿ-ê, beh tit-tio̍h lîn-bín.

14常常存驚畏ê，有福氣；硬伊ê心ê人beh陷落tī伊ê災厄。Siông-siông chûn kiaⁿ-ùi ê, ū hok-khì; Ngī i ê sim ê lâng beh hām-lo̍h tī i ê chai-ē.

15暴虐ê人君管轄sòng-hiong ê百姓，是親像hm̄-hm̄-哮ê sai，kap chhē-食ê熊。Pō-gio̍k ê jîn-kun koán-hat sòng-hiong ê peh-sìⁿ, Sī chhin-chhiūⁿ hm̄-hm̄-háu ê sai, kap chhē-chia̍h ê hîm.

16無知ê人君chōe-chōe行暴虐；怨恨貪財ê beh食長歲壽。Bû-ti ê jîn-kun chōe-chōe kiâⁿ pō-gio̍k; Oàn-hūn tham-châi-ê beh chia̍h tn̂g hè-siū.

17擔當thâi-人ê罪ê，Beh走入深坑，人m̄-thang阻擋i。Tam-tng thâi-lâng ê chōe ê, Beh cháu-ji̍p chhim-khiⁿ, lâng m̄-thang chó͘-tòng i.

18行tāi-chì正直ê，beh得tio̍h拯救；行tāi-chì彎曲ê，beh立刻跋倒。Kiâⁿ tāi-chì chèng-ti̍t ê, beh tit-tio̍h chín-kiù; Kiâⁿ tāi-chì oan-khiau ê, beh li̍p-khek poa̍h-tó.

19種作伊ê田園ê，beh有米糧夠額；交陪無hē-落ê人，beh極sòng-hiong。Chèng-choh i ê chhân-hn̂g ê, beh ū bí-niû kàu-gia̍h; Kau-pôe bô hē-lo̍h ê lâng, beh ke̍k sòng-hiong.

20信實ê人beh得tio̍h chōe-chōe福氣；想beh kín發財ê，bōe免得受刑罰。Sìn-si̍t ê lâng beh tit-tio̍h chōe-chōe hok-khì; Siūⁿ beh kín hoat-châi ê, bōe bián-tit siū hêng-hoa̍t.

21看情面ê，是m̄好；因為一塊á餅來犯法ê，也是m̄好。Khòaⁿ chêng-biān ê, sī m̄ hó; In-ūi chi̍t-tè-á piáⁿ lâi hoān-hoat-ê, iā sī m̄-hó.

22人pháiⁿ-ba̍k想beh kín發財ê；總是m̄知sòng-hiong beh臨到i。Lâng pháiⁿ-ba̍k siūⁿ beh kín hoat-châi ê; Chóng-sī m̄-chai sòng-hiong beh lîm-kàu i.

23責督人ê，後來得tio̍h人歡喜；Khah-chōe hit-ê用舌諂媚人ê。Chek-tok lâng ê, āu-lâi tit-tio̍h lâng hoaⁿ-hí; Khah-chōe hit ê ēng chi̍h thiám-mī lâng ê.

24偷the̍h老父á老母ê物，koh講，這m̄是chōe，chit號人是kap殘害ê人siâng-lūi。Thau-the̍h lāu-pē á lāu-bú ê mi̍h, koh kóng, Che m̄-sī chōe, Chit-hō lâng sī kap chân-hāi ê lâng siâng-lūi.

25貪心ê人起相爭；但是óa靠耶和華ê beh得tio̍h豐盛。Tham-sim ê lâng khí saⁿ-chiⁿ; Nā-sī óa-khò Iâ-hô-hoa ê, beh tit-tio̍h hong-sēng.

26óa靠家己ê心思ê，是戇ê人；照智慧來行ê，beh得tio̍h拯救。Óa-khò ka-kī ê sim-su ê, sī gōng ê lâng; Chiàu tì-hūi lâi kiâⁿ ê, beh tit-tio̍h chín-kiù.

27賑濟sòng-hiong ê，無致到欠缺；總是tìⁿ做無看見ê，beh chōe-chōe受咒詛。Chín-chè sòng-hiong ê, bô tì-kàu khiàm-kheh; Chóng-sī tìⁿ-chòe bô khòaⁿ-kìⁿ ê, beh chōe-chōe siū chiù-chó͘.

28pháiⁿ人興起，人就閃bih；In若敗無，義人就加添chōe-chōe。Pháiⁿ-lâng heng-khí, lâng chiū siám-bih; In nā pāi-bô, gī-lâng chiū ke-thiⁿ chōe-chōe.

1人ta̍uh-ta̍uh受責罰，猶原硬伊ê頷頸，伊beh忽然間敗壞，lóng無法度thang醫治。Lâng ta̍uh-ta̍uh siū chek-hoa̍t, iû-goân ngī i ê ām-kún, I beh hut-jiân-kan pāi-hoāi, lóng bô hoat-tō͘ thang i-tī.

2義人加添chōe-chōe ê時，百姓就快樂；pháiⁿ人掌權ê時，百姓就吐氣。Gī-lâng ke-thiⁿ chōe-chōe ê sî, peh-sìⁿ chiū khoài-lo̍k; Pháiⁿ-lâng chiáng-koân ê sî, peh-sìⁿ chiū thó͘-khùi.

3欣慕智慧ê，hō͘伊ê老父快樂；Kap妓女結交ê，花費伊ê錢財。Him-bō͘ tì-hūi ê, hō͘ i ê lāu-pē khoài-lo̍k; Kap kī-lú kiat-kau-ê, hoa-hùi i ê chîⁿ-châi.

4王照公平hō͘國堅固；Ài受pò͘賂就chhia倒伊。Ông chiàu kong-pêng hō͘ kok kian-kò͘; Ài siū pò͘-lō͘ chiū chhia-tó i.

5諂媚伊ê厝邊ê，就是設羅網纏伊ê腳。Thiám-mī i ê chhù-piⁿ ê, Chiū-sī siat lô-bāng tîⁿ i ê kha.

6Tī pháiⁿ人ê罪-中有羅網；獨獨義人唱歌歡喜。Tī pháiⁿ-lâng ê chōe-tiong ū lô-bāng; To̍k-to̍k gī-lâng chhiùⁿ-koa hoaⁿ-hí.

7義人chhâ-知sòng-hiong人ê案件；pháiⁿ人無明理，就m̄知。Gī-lâng chhâ-chai sòng-hiong lâng ê àn-kiāⁿ; Pháiⁿ-lâng bô bêng-lí, chiū m̄-chai.

8侮慢ê人攪擾城，親像放火燒；獨獨知識ê人hō͘受氣lóng soah。Bú-bān ê lâng kiáu-jiáu siâⁿ, chhin-chhiūⁿ pàng hé sio; To̍k-to̍k tì-sek ê lâng hō͘ siū-khì lóng soah.

9智慧ê人kap戇人相爭，或是受氣á是笑，lóng bōe能安靜。Tì-hūi ê lâng kap gōng-lâng saⁿ-chiⁿ, He̍k-sī siū-khì á-sī chhiò, lóng bōe-ōe an-chēng.

10Ài thâi人ê怨恨完全ê人；獨獨正直ê人beh ti̍h伊ê性命。Ài thâi lâng-ê oàn-hūn oân-choân ê lâng; To̍k-to̍k chèng-ti̍t ê lâng beh ti̍h i ê sìⁿ-miā.

11愚戇ê人有受氣就lóng顯出；但是知識ê人就約束hō͘伊soah。Gû-gōng ê lâng ū siū-khì chiū lóng hián-chhut; Nā-sī tì-sek ê lâng chiū iok-sok hō͘ i soah.

12掌權ê若聽thàn白賊話，伊ê人臣就lóng pháiⁿ。Chiáng-koân-ê nā thiaⁿ-thàn pe̍h-chha̍t ōe, I ê jîn-sîn chiū lóng pháiⁿ.

13Sòng-hiong ê人，kap暴虐ê人，相tú-tio̍h；耶和華照光in兩等號人ê目睭。Sòng-hiong ê lâng, kap pō-gio̍k ê lâng, saⁿ tú-tio̍h; Iâ-hô-hoa chiò-kng in nn̄g téng-hō lâng ê ba̍k-chiu.

14王照誠實判斷sòng-hiong人，伊ê座位beh永遠堅固。Ông chiàu sêng-si̍t phòaⁿ-toàn sòng-hiong lâng, I ê chō-ūi beh éng-oán kian-kò͘.

15柺á kap責備ōe加添智慧；放chhut-chāi伊ê gín-ná，ōe hō͘伊ê老母見笑。Koáiⁿ-á kap chek-pī ōe ke-thiⁿ tì-hūi; Pàng chhut-chāi i ê gín-ná, ōe hō͘ i ê lāu-bú kiàn-siàu.

16pháiⁿ人加添ê時，罪過也加添；義人beh看見in失敗。Pháiⁿ-lâng ke-thiⁿ ê sî, chōe-kòa iā ke-thiⁿ; Gī-lâng beh khòaⁿ-kìⁿ in sit-pāi.

17教督你ê kiáⁿ，伊就beh hō͘你安心；伊也beh hō͘你ê心歡喜。Kàu-tok lí ê kiáⁿ, i chiū beh hō͘ lí an-sim; I iā beh hō͘ lí ê sim hoaⁿ-hí.

18若無默示異象，百姓就放縱；獨獨執守律法ê，就有福氣。Nā bô be̍k-sī īⁿ-siōng, peh-sìⁿ chiū hòng-chhiòng; To̍k-to̍k chip-siú lu̍t-hoat ê, chiū ū hok-khì.

19Kan-ta用話，奴僕m̄肯受教督；伊雖然明白，也無致意。Kan-ta ēng ōe, lô͘-po̍k m̄-khéng siū kàu-tok; I sui-jiân bêng-pe̍k, iā bô tì-ì.

20你看見趕緊講話ê人無？戇人比伊khah有thang ǹg望。Lí khòaⁿ-kìⁿ kóaⁿ-kín kóng-ōe ê lâng bô? Gōng-lâng pí i khah ū thang ǹg-bāng.

21人有奴僕tùi細漢款待伊過頭；chit-ê奴僕到路尾beh變做伊ê kiáⁿ。Lâng ū lô͘-po̍k tùi sòe-hàn khoán-thāi i kè-thâu; Chit ê lô͘-po̍k kàu lō͘-bé beh piàn-chòe i ê kiáⁿ.

22Ài受氣ê人起相爭，大受氣ê人chōe-chōe犯罪。Ài siū-khì ê lâng khí saⁿ-chiⁿ, Tōa siū-khì ê lâng chōe-chōe hoān-chōe.

23人ê驕傲beh hō͘伊降低；心謙卑ê人beh hō͘伊得tio̍h榮光。Lâng ê kiau-ngō͘ beh hō͘ i kàng-kē; Sim khiam-pi ê lâng beh hō͘ i tit-tio̍h êng-kng.

24Kap賊分贓ê人，是怨恨家己ê性命；伊聽見chiù-chōa ê話，也無講出。Kap chha̍t pun-chng ê lâng, sī oàn-hūn ka-kī ê sìⁿ-miā; I thiaⁿ-kìⁿ chiù-chōa ê ōe, iā bô kóng-chhut.

25驚畏人ê，就是設羅網；獨獨óa靠耶和華ê，beh得tio̍h安穩。Kiaⁿ-ùi lâng ê, chiū-sī siat lô-bāng; To̍k-to̍k óa-khò Iâ-hô-hoa ê, beh tit-tio̍h an-ún.

26Chōe-chōe人求掌權ê ê恩典；獨獨人ê受判斷是tùi耶和華。Chōe-chōe lâng kiû chiáng-koân-ê ê un-tián; To̍k-to̍k lâng ê siū phòaⁿ-toàn sī tùi Iâ-hô-hoa.

27無公道ê人，是義人所厭惡；行正直ê人，是pháiⁿ人所厭惡。Bô kong-tō ê lâng, sī gī-lâng só͘ iàm-ò͘ⁿ; Kiâⁿ chèng-ti̍t ê lâng, sī pháiⁿ-lâng só͘ iàm-ò͘ⁿ.

1Ngá-ki ê kiáⁿ A-kó͘-jíⁿ ê話，就是默示；chit-ê人對Í-thiat講，就是對Í-thiat kap O͘-kah講；Ngá-ki ê kiáⁿ A-kó͘-jíⁿ ê ōe, chiū-sī be̍k-sī; Chit ê lâng tùi Í-thiat kóng, chiū-sī tùi Í-thiat kap O͘-kah kóng;

2我比眾人khah蠢笨，也無有人ê聰明。Góa pí chèng-lâng khah chhún-pūn, Iā bô ū lâng ê chhang-miâ.

3我無學習智慧，也m̄-bat至聖ê ê知識。Góa bô ha̍k-si̍p tì-hūi, Iā m̄-bat Chì-sèng-ê ê chai-bat.

4Chī-chūi上天koh落來？ Chī-chūi聚集風tī手中心？ Chī-chūi包水tī衫á內？ Chī-chūi定tio̍h地ê四極？伊ê名叫甚麼，伊ê kiáⁿ名叫甚麼，你知mah？Chī-chūi chiūⁿ thiⁿ koh lo̍h--lâi? Chī-chūi chū-chi̍p hong tī chhiú-tiong-sim? Chī-chūi pau chúi tī saⁿ-á-lāi? Chī-chūi tiāⁿ-tio̍h tōe ê sì-ke̍k? I ê miâ kiò sím-mi̍h, I ê kiáⁿ miâ kiò sím-mi̍h, lí chai mah?

5上帝ê話，ta̍k句lóng是過鍛鍊ê，見若óa靠伊ê，祂就做in ê藤牌。Siōng-tè ê ōe, ta̍k-kù lóng sī kè thoàn-liān ê, Kìⁿ-nā óa-khò I ê, I chiū chòe in ê tîn-pâi.

6祂ê話，你m̄-thang加添；驚了祂責備你，你就顯明是講白賊ê。I ê ōe, lí m̄-thang ke-thiⁿ; Kiaⁿ-liáu I chek-pī lí, lí chiū hián-bêng sī kóng pe̍h-chha̍t ê.

7我求你兩件事；Tī我未死ê事先，m̄-thang無hō͘我。Góa kiû Lí nn̄g kiāⁿ sū; Tī góa bē sí ê tāi-seng, m̄-thang bô hō͘ góa.

8求你hō͘虛假kap白賊離開我遠遠；hō͘我無sòng-hiong也無好額；用所tio̍h用ê米糧hō͘我食；Kiû Lí hō͘ hu-ké kap pe̍h-chha̍t lī-khui góa hn̄g-hn̄g; Hō͘ góa bô sòng-hiong iā bô hó-gia̍h; Ēng só͘ tio̍h ēng ê bí-niû hō͘ góa chia̍h;

9驚了我飽足m̄認你；講耶和華是是誰？ Koh驚了我sòng-hiong就偷the̍h；致到褻瀆我ê上帝ê名。Kiaⁿ-liáu góa pá-chiok m̄-jīn Lí; kóng Iâ-hô-hoa sī chī-chūi? Koh kiaⁿ-liáu góa sòng-hiong chiū thau-the̍h; Tì-kàu siat-to̍k góa ê Siōng-tè ê miâ.

10M̄-thang對主人來講伊ê奴僕pháiⁿ話，驚了伊咒詛你，你就算做有罪。M̄-thang tùi chú-lâng lâi kóng i ê lô͘-po̍k pháiⁿ-ōe, Kiaⁿ-liáu i chiù-chó͘ lí, lí chiū sǹg-chòe ū chōe.

11有一-派ê人咒詛伊ê老父，也無kā伊ê老母祝福。Ū chi̍t-phài ê lâng chiù-chó͘ i ê lāu-pē, Iā bô kā i ê lāu-bú chiok-hok.

12有一-派ê人，家己看做清氣；總是無洗除伊ê污穢。Ū chi̍t-phài ê lâng, ka-kī khòaⁿ-chòe chheng-khì; Chóng-sī bô sóe-tû i ê ù-òe.

13有一-派ê人目睭-頭盡在高；目睭-皮也thí高-高。Ū chi̍t-phài ê lâng ba̍k-chiu-thâu chīn-chāi koâiⁿ; Ba̍k-chiu-phê iā thí koâiⁿ-koâiⁿ.

14有一派ê人伊ê牙親像劍，齒親像刀；Beh吞滅地面上困苦ê人，kap世間ê sòng-hiong人。Ū chi̍t-phài ê lâng i ê gê chhin-chhiūⁿ kiàm, khí chhin-chhiūⁿ to; Beh thun-bia̍t tōe-bīn-chiūⁿ khùn-khó͘ ê lâng, kap sè-kan ê sòng-hiong lâng.

15Gô͘-khî有兩個cha-bó͘-kiáⁿ，常常講，hō͘我，hō͘我。有三項無知足ê；連hit號無講夠額ê有四項；Gô͘-khî ū nn̄g ê cha-bó͘-kiáⁿ, siông-siông kóng, Hō͘ góa, hō͘ góa. Ū saⁿ-hāng bô ti-chiok ê; Liân hit-hō bô kóng kàu-gia̍h-ê ū sì-hāng;

16就是陰府，kap bōe懷孕ê石-thai；無夠額水ê地，kap無講，夠額ê火。Chiū-sī im-hú, kap bōe hoâi-īn ê chio̍h-thai; Bô kàu-gia̍h chúi ê tōe, kap bô kóng, Kàu-gia̍h ê hé.

17戲弄老父，看輕m̄聽thàn老母ê話，hit號人ê目睭beh hō͘山谷中ê烏鴉teh出來。 Hō͘鷹á-kiáⁿ所食。Hì-lāng lāu-pē, Khòaⁿ-khin m̄-thiaⁿ-thàn lāu-bú ê ōe, Hit-hō lâng ê ba̍k-chiu beh hō͘ soaⁿ-kok-tiong ê o͘-a teh--chhut-lâi. Hō͘ eng-á-kiáⁿ só͘ chia̍h.

18我所想bōe出ê奇妙，有三項；連我所m̄知ê有四項。Góa só͘ siūⁿ-bōe-chhut ê kî-biāu, ū saⁿ-hāng; Liân góa só͘ m̄-chai-ê ū sì-hāng.

19就是鷹鳥tī空中ê路；蛇tī石磐-téng ê路；存tī海中ê路；Lâm kap lú交合ê路。Chiū-sī eng-chiáu tī khong-tiong ê lō͘; Chôa tī chio̍h-pôaⁿ-téng ê lō͘; Chûn tī hái-tiong ê lō͘; Lâm kap lú kau-ha̍p ê lō͘.

20淫婦ê路也是án-ni，伊食了拭伊ê嘴；就講，我無行pháiⁿ。Îm-hū ê lō͘ iā sī án-ni, I chia̍h-liáu chhit i ê chhùi; Chiū kóng, Góa bô kiâⁿ pháiⁿ.

21為tio̍h三項地搖choah，連擔當bōe起ê有四項。Ūi-tio̍h saⁿ-hāng tōe iô-choah, Liân tam-tng bōe-khí-ê ū sì-hāng.

22就是奴僕做王。戇人食夠額；Chiū-sī lô͘-po̍k chòe ông. Gōng-lâng chia̍h kàu-gia̍h;

23無人-iân ê女子出嫁；女婢續接主母。Bô lâng-iân ê lú-chú chhut-kè; Lú-pī sòa-chiap chú-bú.

24地面上有sì-項微細ê物，總是極知識。Tōe-bīn-chiūⁿ ū sì-hāng bî-sòe ê mi̍h, Chóng-sī ke̍k tì-sek.

25Káu-hiā是無力ê種類，總是tī夏天ê時備辦米糧。Káu-hiā sī bô-la̍t ê chéng-lūi, Chóng-sī tī hē-thiⁿ ê sî pī-pān bí-niû.

26Sa-hoan是軟弱ê種類，總是tī石磐-中起厝。Sa-hoan sī loán-jio̍k ê chéng-lūi, Chóng-sī tī chio̍h-pôaⁿ-tiong khí-chhù.

27草蜢無君王，總是lóng會分隊出去。Chháu-meh bô kun-ông, Chóng-sī lóng ōe hun-tūi chhut-khì.

28Siān-人用手擒，總是tiàm tī王宮。Siān-lâng ēng chhiú khîⁿ, Chóng-sī tiàm tī ông-kiong.

29步行威風ê有三項，連行踏威風ê有四項。Pō͘-kiâⁿ ui-hong-ê ū saⁿ-hāng, Liân kiâⁿ-ta̍h ui-hong-ê ū sì-hāng.

30Sai，就是野獸中第一猛ê，無為tio̍h別物來閃避。Sai, chiū-sī iá-siù tiong tē-it béng ê, Bô ūi-tio̍h pa̍t-mi̍h lâi siám-pī.

31La̍h-káu，kap公ê山羊；以及無人抵敵ê君王。La̍h-káu, kap kang ê soaⁿ-iûⁿ; Í-ki̍p bô lâng tí-te̍k ê kun-ông.

32你若自高戇戇做，á是存pháiⁿ念頭；tio̍h用手掩嘴。Lí nā chū-ko gōng-gōng chòe, Á-sī chûn pháiⁿ liām-thâu; tio̍h ēng chhiú ng chhùi.

33Phah牛-leng ōe成ni-iû，Phah-tio̍h phīⁿ ōe出-血；親像án-ni激受氣能起相爭。Phah gû-leng ōe chiâⁿ ni-iû, Phah-tio̍h phīⁿ ōe chhut-huih; Chhin-chhiūⁿ án-ni kek siū-khì ōe khí saⁿ-chiⁿ.