1人ta̍uh-ta̍uh受責罰，猶原硬伊ê頷頸，伊beh忽然間敗壞，lóng無法度thang醫治。Lâng ta̍uh-ta̍uh siū chek-hoa̍t, iû-goân ngī i ê ām-kún, I beh hut-jiân-kan pāi-hoāi, lóng bô hoat-tō͘ thang i-tī.

2義人加添chōe-chōe ê時，百姓就快樂；pháiⁿ人掌權ê時，百姓就吐氣。Gī-lâng ke-thiⁿ chōe-chōe ê sî, peh-sìⁿ chiū khoài-lo̍k; Pháiⁿ-lâng chiáng-koân ê sî, peh-sìⁿ chiū thó͘-khùi.

3欣慕智慧ê，hō͘伊ê老父快樂；Kap妓女結交ê，花費伊ê錢財。Him-bō͘ tì-hūi ê, hō͘ i ê lāu-pē khoài-lo̍k; Kap kī-lú kiat-kau-ê, hoa-hùi i ê chîⁿ-châi.

4王照公平hō͘國堅固；Ài受pò͘賂就chhia倒伊。Ông chiàu kong-pêng hō͘ kok kian-kò͘; Ài siū pò͘-lō͘ chiū chhia-tó i.

5諂媚伊ê厝邊ê，就是設羅網纏伊ê腳。Thiám-mī i ê chhù-piⁿ ê, Chiū-sī siat lô-bāng tîⁿ i ê kha.

6Tī pháiⁿ人ê罪-中有羅網；獨獨義人唱歌歡喜。Tī pháiⁿ-lâng ê chōe-tiong ū lô-bāng; To̍k-to̍k gī-lâng chhiùⁿ-koa hoaⁿ-hí.

7義人chhâ-知sòng-hiong人ê案件；pháiⁿ人無明理，就m̄知。Gī-lâng chhâ-chai sòng-hiong lâng ê àn-kiāⁿ; Pháiⁿ-lâng bô bêng-lí, chiū m̄-chai.

8侮慢ê人攪擾城，親像放火燒；獨獨知識ê人hō͘受氣lóng soah。Bú-bān ê lâng kiáu-jiáu siâⁿ, chhin-chhiūⁿ pàng hé sio; To̍k-to̍k tì-sek ê lâng hō͘ siū-khì lóng soah.

9智慧ê人kap戇人相爭，或是受氣á是笑，lóng bōe能安靜。Tì-hūi ê lâng kap gōng-lâng saⁿ-chiⁿ, He̍k-sī siū-khì á-sī chhiò, lóng bōe-ōe an-chēng.

10Ài thâi人ê怨恨完全ê人；獨獨正直ê人beh ti̍h伊ê性命。Ài thâi lâng-ê oàn-hūn oân-choân ê lâng; To̍k-to̍k chèng-ti̍t ê lâng beh ti̍h i ê sìⁿ-miā.

11愚戇ê人有受氣就lóng顯出；但是知識ê人就約束hō͘伊soah。Gû-gōng ê lâng ū siū-khì chiū lóng hián-chhut; Nā-sī tì-sek ê lâng chiū iok-sok hō͘ i soah.

12掌權ê若聽thàn白賊話，伊ê人臣就lóng pháiⁿ。Chiáng-koân-ê nā thiaⁿ-thàn pe̍h-chha̍t ōe, I ê jîn-sîn chiū lóng pháiⁿ.

13Sòng-hiong ê人，kap暴虐ê人，相tú-tio̍h；耶和華照光in兩等號人ê目睭。Sòng-hiong ê lâng, kap pō-gio̍k ê lâng, saⁿ tú-tio̍h; Iâ-hô-hoa chiò-kng in nn̄g téng-hō lâng ê ba̍k-chiu.

14王照誠實判斷sòng-hiong人，伊ê座位beh永遠堅固。Ông chiàu sêng-si̍t phòaⁿ-toàn sòng-hiong lâng, I ê chō-ūi beh éng-oán kian-kò͘.

15柺á kap責備ōe加添智慧；放chhut-chāi伊ê gín-ná，ōe hō͘伊ê老母見笑。Koáiⁿ-á kap chek-pī ōe ke-thiⁿ tì-hūi; Pàng chhut-chāi i ê gín-ná, ōe hō͘ i ê lāu-bú kiàn-siàu.

16pháiⁿ人加添ê時，罪過也加添；義人beh看見in失敗。Pháiⁿ-lâng ke-thiⁿ ê sî, chōe-kòa iā ke-thiⁿ; Gī-lâng beh khòaⁿ-kìⁿ in sit-pāi.

17教督你ê kiáⁿ，伊就beh hō͘你安心；伊也beh hō͘你ê心歡喜。Kàu-tok lí ê kiáⁿ, i chiū beh hō͘ lí an-sim; I iā beh hō͘ lí ê sim hoaⁿ-hí.

18若無默示異象，百姓就放縱；獨獨執守律法ê，就有福氣。Nā bô be̍k-sī īⁿ-siōng, peh-sìⁿ chiū hòng-chhiòng; To̍k-to̍k chip-siú lu̍t-hoat ê, chiū ū hok-khì.

19Kan-ta用話，奴僕m̄肯受教督；伊雖然明白，也無致意。Kan-ta ēng ōe, lô͘-po̍k m̄-khéng siū kàu-tok; I sui-jiân bêng-pe̍k, iā bô tì-ì.

20你看見趕緊講話ê人無？戇人比伊khah有thang ǹg望。Lí khòaⁿ-kìⁿ kóaⁿ-kín kóng-ōe ê lâng bô? Gōng-lâng pí i khah ū thang ǹg-bāng.

21人有奴僕tùi細漢款待伊過頭；chit-ê奴僕到路尾beh變做伊ê kiáⁿ。Lâng ū lô͘-po̍k tùi sòe-hàn khoán-thāi i kè-thâu; Chit ê lô͘-po̍k kàu lō͘-bé beh piàn-chòe i ê kiáⁿ.

22Ài受氣ê人起相爭，大受氣ê人chōe-chōe犯罪。Ài siū-khì ê lâng khí saⁿ-chiⁿ, Tōa siū-khì ê lâng chōe-chōe hoān-chōe.

23人ê驕傲beh hō͘伊降低；心謙卑ê人beh hō͘伊得tio̍h榮光。Lâng ê kiau-ngō͘ beh hō͘ i kàng-kē; Sim khiam-pi ê lâng beh hō͘ i tit-tio̍h êng-kng.

24Kap賊分贓ê人，是怨恨家己ê性命；伊聽見chiù-chōa ê話，也無講出。Kap chha̍t pun-chng ê lâng, sī oàn-hūn ka-kī ê sìⁿ-miā; I thiaⁿ-kìⁿ chiù-chōa ê ōe, iā bô kóng-chhut.

25驚畏人ê，就是設羅網；獨獨óa靠耶和華ê，beh得tio̍h安穩。Kiaⁿ-ùi lâng ê, chiū-sī siat lô-bāng; To̍k-to̍k óa-khò Iâ-hô-hoa ê, beh tit-tio̍h an-ún.

26Chōe-chōe人求掌權ê ê恩典；獨獨人ê受判斷是tùi耶和華。Chōe-chōe lâng kiû chiáng-koân-ê ê un-tián; To̍k-to̍k lâng ê siū phòaⁿ-toàn sī tùi Iâ-hô-hoa.

27無公道ê人，是義人所厭惡；行正直ê人，是pháiⁿ人所厭惡。Bô kong-tō ê lâng, sī gī-lâng só͘ iàm-ò͘ⁿ; Kiâⁿ chèng-ti̍t ê lâng, sī pháiⁿ-lâng só͘ iàm-ò͘ⁿ.

1Ngá-ki ê kiáⁿ A-kó͘-jíⁿ ê話，就是默示；chit-ê人對Í-thiat講，就是對Í-thiat kap O͘-kah講；Ngá-ki ê kiáⁿ A-kó͘-jíⁿ ê ōe, chiū-sī be̍k-sī; Chit ê lâng tùi Í-thiat kóng, chiū-sī tùi Í-thiat kap O͘-kah kóng;

2我比眾人khah蠢笨，也無有人ê聰明。Góa pí chèng-lâng khah chhún-pūn, Iā bô ū lâng ê chhang-miâ.

3我無學習智慧，也m̄-bat至聖ê ê知識。Góa bô ha̍k-si̍p tì-hūi, Iā m̄-bat Chì-sèng-ê ê chai-bat.

4Chī-chūi上天koh落來？ Chī-chūi聚集風tī手中心？ Chī-chūi包水tī衫á內？ Chī-chūi定tio̍h地ê四極？伊ê名叫甚麼，伊ê kiáⁿ名叫甚麼，你知mah？Chī-chūi chiūⁿ thiⁿ koh lo̍h--lâi? Chī-chūi chū-chi̍p hong tī chhiú-tiong-sim? Chī-chūi pau chúi tī saⁿ-á-lāi? Chī-chūi tiāⁿ-tio̍h tōe ê sì-ke̍k? I ê miâ kiò sím-mi̍h, I ê kiáⁿ miâ kiò sím-mi̍h, lí chai mah?

5上帝ê話，ta̍k句lóng是過鍛鍊ê，見若óa靠伊ê，祂就做in ê藤牌。Siōng-tè ê ōe, ta̍k-kù lóng sī kè thoàn-liān ê, Kìⁿ-nā óa-khò I ê, I chiū chòe in ê tîn-pâi.

6祂ê話，你m̄-thang加添；驚了祂責備你，你就顯明是講白賊ê。I ê ōe, lí m̄-thang ke-thiⁿ; Kiaⁿ-liáu I chek-pī lí, lí chiū hián-bêng sī kóng pe̍h-chha̍t ê.

7我求你兩件事；Tī我未死ê事先，m̄-thang無hō͘我。Góa kiû Lí nn̄g kiāⁿ sū; Tī góa bē sí ê tāi-seng, m̄-thang bô hō͘ góa.

8求你hō͘虛假kap白賊離開我遠遠；hō͘我無sòng-hiong也無好額；用所tio̍h用ê米糧hō͘我食；Kiû Lí hō͘ hu-ké kap pe̍h-chha̍t lī-khui góa hn̄g-hn̄g; Hō͘ góa bô sòng-hiong iā bô hó-gia̍h; Ēng só͘ tio̍h ēng ê bí-niû hō͘ góa chia̍h;

9驚了我飽足m̄認你；講耶和華是是誰？ Koh驚了我sòng-hiong就偷the̍h；致到褻瀆我ê上帝ê名。Kiaⁿ-liáu góa pá-chiok m̄-jīn Lí; kóng Iâ-hô-hoa sī chī-chūi? Koh kiaⁿ-liáu góa sòng-hiong chiū thau-the̍h; Tì-kàu siat-to̍k góa ê Siōng-tè ê miâ.

10M̄-thang對主人來講伊ê奴僕pháiⁿ話，驚了伊咒詛你，你就算做有罪。M̄-thang tùi chú-lâng lâi kóng i ê lô͘-po̍k pháiⁿ-ōe, Kiaⁿ-liáu i chiù-chó͘ lí, lí chiū sǹg-chòe ū chōe.

11有一-派ê人咒詛伊ê老父，也無kā伊ê老母祝福。Ū chi̍t-phài ê lâng chiù-chó͘ i ê lāu-pē, Iā bô kā i ê lāu-bú chiok-hok.

12有一-派ê人，家己看做清氣；總是無洗除伊ê污穢。Ū chi̍t-phài ê lâng, ka-kī khòaⁿ-chòe chheng-khì; Chóng-sī bô sóe-tû i ê ù-òe.

13有一-派ê人目睭-頭盡在高；目睭-皮也thí高-高。Ū chi̍t-phài ê lâng ba̍k-chiu-thâu chīn-chāi koâiⁿ; Ba̍k-chiu-phê iā thí koâiⁿ-koâiⁿ.

14有一派ê人伊ê牙親像劍，齒親像刀；Beh吞滅地面上困苦ê人，kap世間ê sòng-hiong人。Ū chi̍t-phài ê lâng i ê gê chhin-chhiūⁿ kiàm, khí chhin-chhiūⁿ to; Beh thun-bia̍t tōe-bīn-chiūⁿ khùn-khó͘ ê lâng, kap sè-kan ê sòng-hiong lâng.

15Gô͘-khî有兩個cha-bó͘-kiáⁿ，常常講，hō͘我，hō͘我。有三項無知足ê；連hit號無講夠額ê有四項；Gô͘-khî ū nn̄g ê cha-bó͘-kiáⁿ, siông-siông kóng, Hō͘ góa, hō͘ góa. Ū saⁿ-hāng bô ti-chiok ê; Liân hit-hō bô kóng kàu-gia̍h-ê ū sì-hāng;

16就是陰府，kap bōe懷孕ê石-thai；無夠額水ê地，kap無講，夠額ê火。Chiū-sī im-hú, kap bōe hoâi-īn ê chio̍h-thai; Bô kàu-gia̍h chúi ê tōe, kap bô kóng, Kàu-gia̍h ê hé.

17戲弄老父，看輕m̄聽thàn老母ê話，hit號人ê目睭beh hō͘山谷中ê烏鴉teh出來。 Hō͘鷹á-kiáⁿ所食。Hì-lāng lāu-pē, Khòaⁿ-khin m̄-thiaⁿ-thàn lāu-bú ê ōe, Hit-hō lâng ê ba̍k-chiu beh hō͘ soaⁿ-kok-tiong ê o͘-a teh--chhut-lâi. Hō͘ eng-á-kiáⁿ só͘ chia̍h.

18我所想bōe出ê奇妙，有三項；連我所m̄知ê有四項。Góa só͘ siūⁿ-bōe-chhut ê kî-biāu, ū saⁿ-hāng; Liân góa só͘ m̄-chai-ê ū sì-hāng.

19就是鷹鳥tī空中ê路；蛇tī石磐-téng ê路；存tī海中ê路；Lâm kap lú交合ê路。Chiū-sī eng-chiáu tī khong-tiong ê lō͘; Chôa tī chio̍h-pôaⁿ-téng ê lō͘; Chûn tī hái-tiong ê lō͘; Lâm kap lú kau-ha̍p ê lō͘.

20淫婦ê路也是án-ni，伊食了拭伊ê嘴；就講，我無行pháiⁿ。Îm-hū ê lō͘ iā sī án-ni, I chia̍h-liáu chhit i ê chhùi; Chiū kóng, Góa bô kiâⁿ pháiⁿ.

21為tio̍h三項地搖choah，連擔當bōe起ê有四項。Ūi-tio̍h saⁿ-hāng tōe iô-choah, Liân tam-tng bōe-khí-ê ū sì-hāng.

22就是奴僕做王。戇人食夠額；Chiū-sī lô͘-po̍k chòe ông. Gōng-lâng chia̍h kàu-gia̍h;

23無人-iân ê女子出嫁；女婢續接主母。Bô lâng-iân ê lú-chú chhut-kè; Lú-pī sòa-chiap chú-bú.

24地面上有sì-項微細ê物，總是極知識。Tōe-bīn-chiūⁿ ū sì-hāng bî-sòe ê mi̍h, Chóng-sī ke̍k tì-sek.

25Káu-hiā是無力ê種類，總是tī夏天ê時備辦米糧。Káu-hiā sī bô-la̍t ê chéng-lūi, Chóng-sī tī hē-thiⁿ ê sî pī-pān bí-niû.

26Sa-hoan是軟弱ê種類，總是tī石磐-中起厝。Sa-hoan sī loán-jio̍k ê chéng-lūi, Chóng-sī tī chio̍h-pôaⁿ-tiong khí-chhù.

27草蜢無君王，總是lóng會分隊出去。Chháu-meh bô kun-ông, Chóng-sī lóng ōe hun-tūi chhut-khì.

28Siān-人用手擒，總是tiàm tī王宮。Siān-lâng ēng chhiú khîⁿ, Chóng-sī tiàm tī ông-kiong.

29步行威風ê有三項，連行踏威風ê有四項。Pō͘-kiâⁿ ui-hong-ê ū saⁿ-hāng, Liân kiâⁿ-ta̍h ui-hong-ê ū sì-hāng.

30Sai，就是野獸中第一猛ê，無為tio̍h別物來閃避。Sai, chiū-sī iá-siù tiong tē-it béng ê, Bô ūi-tio̍h pa̍t-mi̍h lâi siám-pī.

31La̍h-káu，kap公ê山羊；以及無人抵敵ê君王。La̍h-káu, kap kang ê soaⁿ-iûⁿ; Í-ki̍p bô lâng tí-te̍k ê kun-ông.

32你若自高戇戇做，á是存pháiⁿ念頭；tio̍h用手掩嘴。Lí nā chū-ko gōng-gōng chòe, Á-sī chûn pháiⁿ liām-thâu; tio̍h ēng chhiú ng chhùi.

33Phah牛-leng ōe成ni-iû，Phah-tio̍h phīⁿ ōe出-血；親像án-ni激受氣能起相爭。Phah gû-leng ōe chiâⁿ ni-iû, Phah-tio̍h phīⁿ ōe chhut-huih; Chhin-chhiūⁿ án-ni kek siū-khì ōe khí saⁿ-chiⁿ.

1Má-sat 王 Lī-bō͘-i-le̍k ê話，就是伊ê老母所教示ê。Má-sat ông Lī-bō͘-i-le̍k ê ōe, chiū-sī i ê lāu-bú só͘ kà-sī ê.

2我ê kiáⁿ ah，tio̍h怎樣？我親生ê kiáⁿ ah，tio̍h怎樣？我下願得tio̍h ê kiáⁿ ah，tio̍h怎樣ah？Góa ê kiáⁿ ah, tio̍h cháiⁿ-iūⁿ? góa chhin-siⁿ ê kiáⁿ ah, tio̍h cháiⁿ-iūⁿ? Góa hē-goān tit-tio̍h ê kiáⁿ ah, tio̍h cháiⁿ-iūⁿ ah?

3M̄-thang將你ê精力hō͘婦人人，你ê所行m̄-thang thàn hiah-ê敗壞王ê。M̄-thang chiong lí ê cheng-le̍k hō͘ hū-jîn-lâng, Lí ê só͘ kiâⁿ m̄-thang thàn hiah ê pāi-hoāi ông ê.

4Lī-bō͘-i-le̍k ah，lim酒m̄是王所合宜，m̄是王所合宜；王親講，厚酒tī toh落？也是無合宜。Lī-bō͘-i-le̍k ah, lim-chiú m̄-sī ông só͘ ha̍p-gî, m̄-sī ông só͘ ha̍p-gî; Ông-chhin kóng, Kāu-chiú tī toh-lo̍h? iā sī bô ha̍p-gî.

5驚了in lim落去就bōe記得律法；偏斷一切受苦ê人ê案件。Kiaⁿ-liáu in lim--lo̍h-khì chiū bōe-kì-tit lu̍t-hoat; Phian-toàn it-chhè siū-khó͘ ê lâng ê àn-kiāⁿ.

6厚酒tio̍h hō͘ beh死ê人，酒tio̍h hō͘ khó͘-心ê人；Kāu-chiú tio̍h hō͘ beh sí ê lâng, Chiú tio̍h hō͘ khó͘-sim ê lâng;

7hō͘伊lim-了bōe記得伊ê sòng-hiong；無koh記得伊ê艱苦。Hō͘ i lim-liáu bōe-kì-tit i ê sòng-hiong; Bô koh kì-tit i ê kan-khó͘.

8你tio̍h為tio̍h啞口ê來開嘴；為tio̍h一切無依óa-ê，來伸in ê冤。Lí tio̍h ūi-tio̍h é-káu-ê lâi khui-chhùi; Ūi-tio̍h it-chhè bô i-óa--ê, lâi sin in ê oan.

9你tio̍h開嘴照公義判斷；為tio̍h困苦kap sòng-hiong-ê伸冤。Lí tio̍h khui-chhùi chiàu kong-gī phòaⁿ-toàn; Ūi-tio̍h khùn-khó͘ kap sòng-hiong-ê sin-oan.

10有châi-tek ê婦人人是誰 ōe chhē-tio̍h ah？伊ê kà-直大大贏過寶石。Ū châi-tek ê hū-jîn-lâng chī-chūi ōe chhē-tio̍h ah? I ê kà-ti̍t tōa-tōa iâⁿ-kè pó-chio̍h.

11伊ê丈夫ê心óa靠伊，Lóng無欠缺財利。I ê tiōng-hu ê sim óa-khò i, Lóng bô khiàm-kheh châi-lī.

12I一世人ê日，Hō͘丈夫有利益無損害。I chi̍t-sì-lâng ê ji̍t, Hō͘ tiōng-hu ū lī-ek bô sún-hāi.

13伊chhē綿羊ê門kap iù-môa，甘心用手做工。I chhē mî-iûⁿ ê mn̂g kap iù-môa, Kam-sim ēng chhiú chòe kang.

14伊親像seng-lí船，Tùi遠遠運伊ê米糧來。I chhin-chhiūⁿ seng-lí chûn, Tùi hn̄g-hn̄g ūn i ê bí-niû lâi.

15天bē kng，i就起-來，用食物分hō͘家內ê人；將應該做ê工分派女婢。Thiⁿ bē kng, i chiū khí-lâi, Ēng chia̍h-mi̍h pun hō͘ ke-lāi ê lâng; Chiong eng-kai chòe ê kang hun-phài lú-pī.

16伊chim-chiok看田園，就買伊；用伊ê手所thàn-ê，來栽種葡萄園。I chim-chiok khòaⁿ chhân-hn̂g, chiū bóe i; Ēng i ê chhiú só͘-thàn-ê, lâi chai-chèng phû-tô-hn̂g.

17伊用氣力hâ腰，Hō͘手骨giám硬。I ēng khùi-la̍t hâ-io, Hō͘ chhiú-kut giám-ngī.

18伊知所經營ê有利益；伊ê燈thong暝無hoa。I chai só͘ keng-êng-ê ū lī-ek; I ê teng thong-mî bô hoa.

19伊ê手the̍h a̍k-á，伊ê手-心岸pháng-chhia。I ê chhiú the̍h a̍k-á, I ê chhiú-sim hōaⁿ pháng-chhia.

20伊出手賑濟艱苦人；伸手幫贊sòng-hiong人。I chhut-chhiú chín-chè kan-khó͘ lâng; Chhun-chhiú pang-chān sòng-hiong lâng.

21伊無因為落雪，為家內ê人掛慮；因為全家lóng穿朱紅ê衣服。I bô in-ūi lo̍h-seh, ūi ke-lāi ê lâng khòa-lū; In-ūi choân-ke lóng chhēng chu-âng ê i-ho̍k.

22伊為家己做súi ê毯á；伊所穿ê就是幼苧布kap紫色ê布。I ūi ka-kī chòe súi ê thán-á; I só͘ chhēng-ê chiū-sī iù-tōe-pò͘ kap chí-sek ê pò͘.

23伊ê丈夫tī城門口人人bat伊；因為伊kap本地ê長老相kap坐。I ê tiōng-hu tī siâⁿ-mn̂g-kháu lâng-lâng bat i; In-ūi i kap pún-tōe ê tióng-ló saⁿ-kap chē.

24伊做幼苧布ê衣裳去賣；Koh將腰帶賣hō͘ seng-lí人。I chòe iù-tōe-pò͘ ê i-chiûⁿ khì bōe; Koh chiong io-tòa bōe hō͘ seng-lí lâng.

25氣力kap威儀是伊ê衣服；伊想tio̍h將來ê景況，就歡喜笑。Khùi-la̍t kap ui-gî sī i ê i-ho̍k; I siūⁿ-tio̍h chiong-lâi ê kéng-hóng, chiū hoaⁿ-hí chhiò.

26I開嘴就講知識ê話；伊ê舌有仁慈ê教示。I khui-chhùi chiū kóng tì-sek ê ōe; I ê chi̍h ū jîn-chû ê kà-sī.

27伊chim-chiok看家內ê事，無食閒飯。I chim-chiok khòaⁿ ke-lāi ê sū, Bô chia̍h êng- pn̄g.

28伊ê kiáⁿ兒起來稱伊有福氣；伊ê丈夫也o-ló伊，I ê kiáⁿ-jî khí-lâi chheng i ū hok-khì; I ê tiōng-hu iā o-ló i,

29講，Cha-bó͘-kiáⁿ好德行ê chōe-chōe，獨獨你kài第一ê。Kóng, Cha-bó͘-kiáⁿ hó tek-hēng--ê chōe-chōe, To̍k-to̍k lí kài-tē-it ê.

30好人才是虛假ê，súi也是空空；獨獨敬畏耶和華ê婦人人beh得tio̍h o-ló。Hó jîn-châi sī hu-ké ê, súi iā sī khang-khang; To̍k-to̍k kèng-ùi Iâ-hô-hoa ê hū-jîn-lâng beh tit-tio̍h o-ló.

31伊ê手所做ê效果kui i；伊ê工tī城門beh o-ló伊。I ê chhiú só͘ chòe ê hāu-kó kui i; I ê kang tī siâⁿ-mn̂g beh o-ló i.