1Lín chiah-ê kiáⁿ ah，tio̍h聽老父ê教示；Tio̍h注意來得tio̍h明理。Lín chiah ê kiáⁿ ah, tio̍h thiaⁿ lāu-pē ê kà-sī; Tio̍h chù-ì lâi tit-tio̍h bêng-lí.

2因為我用好ê道理hō͘ lín；M̄-thang棄sak我ê法度。In-ūi góa ēng hó ê tō-lí hō͘ lín; M̄-thang khì-sak góa ê hoat-tō͘.

3我是老父ê kiáⁿ；Tī老母ê面前做伊第一疼ê幼秀kiáⁿ。Góa sī lāu-pē ê kiáⁿ; Tī lāu-bú ê bīn-chêng chòe i tē-it thiàⁿ ê iù-siù kiáⁿ.

4老父教示我，kā我講，你ê心tio̍h記tiâu我ê話，遵守我ê命令，就得tio̍h活。Lāu-pē kà-sī góa, kā góa kóng, Lí ê sim tio̍h kì-tiâu góa ê ōe, Chun-siú góa ê bēng-lēng, chiū tit-tio̍h oa̍h.

5Tio̍h得tio̍h智慧，tio̍h得tio̍h聰明，M̄-thang bōe記得，m̄-thang離開我所講ê話。Tio̍h tit-tio̍h tì-hūi, tio̍h tit-tio̍h chhang-miâ, M̄-thang bōe kì-tit, m̄-thang lī-khui góa só͘ kóng ê ōe.

6M̄-thang棄sak智慧，伊beh保護你；Tio̍h疼伊，伊beh照顧你。M̄-thang khì-sak tì-hūi, i beh pó-hō͘ lí; Tio̍h thiàⁿ i, i beh chiàu-kò͘ lí.

7智慧是根本，tio̍h得tio̍h智慧；Tī你一切所得tio̍h ê中間，tio̍h得tio̍h聰明。Tì-hūi sī kun-pún, tio̍h tit-tio̍h tì-hūi; Tī lí it-chhè só͘ tit-tio̍h ê tiong-kan, tio̍h tit-tio̍h chhang-miâ.

8你若尊重伊，伊beh hō͘你升高；你若戀慕伊，伊就hō͘你榮光。Lí nā chun-tiōng i, i beh hō͘ lí seng-koâiⁿ; Lí nā loân-bō͘ i, i chiū hō͘ lí êng-kng.

9伊beh用súi ê帽戴tī你ê頭殼；將榮光ê冕旒hō͘你。I beh ēng súi ê bō tì tī lí ê thâu-khak; Chiong êng-kng ê bián-liû hō͘ lí.

10我ê kiáⁿ，tio̍h聽來接納我ê話，就beh食長歲壽。Góa ê kiáⁿ, tio̍h thiaⁿ lâi chiap-la̍p góa ê ōe, Chiū beh chia̍h tn̂g hè-siū.

11我已經指示你智慧ê路，引chhōa你行正直ê路徑。Góa í-keng chí-sī lí tì-hūi ê lō͘, Ín-chhōa lí kiâⁿ chèng-ti̍t ê lō͘-kèng.

12你行ê時，無致到阻礙；你走，亦無致到tio̍h-tak。Lí kiâⁿ ê sî, bô tì-kàu chó͘-gāi; Lí cháu, ia̍h bô tì-kàu tio̍h-tak.

13Tio̍h執守教示，m̄-thang放鬆；Tio̍h謹慎守伊，因為伊是你ê活命。Tio̍h chip-siú kà-sī, m̄-thang pàng-sang; Tio̍h kín-sīn siú i, in-ūi i sī lí ê oa̍h-miā.

14兇惡ê人ê路莫得入；pháiⁿ人ê路莫得行。Hiong-ok ê lâng ê lō͘ bo̍h-tit ji̍p; Pháiⁿ-lâng ê lō͘ bo̍h-tit kiâⁿ.

15Tio̍h閃避伊，m̄-thang tùi hia過；Tio̍h oa̍t走離開伊，進前去。Tio̍h siám-pī i, m̄-thang tùi hia kè; Tio̍h oa̍t-cháu lī-khui i, chìn-chêng khì.

16因為伊若無害人，就bōe睏得；若無hō͘人跋倒，就睏bōe落眠。In-ūi i nā bô hāi lâng, chiū bōe khùn-tit; Nā bô hō͘ lâng poa̍h-tó, chiū khùn bōe lo̍h-bîn.

17因為in tùi兇惡得tio̍h食餅；Tùi強暴得tio̍h lim酒。In-ūi in tùi hiong-ok tit-tio̍h chia̍h-piáⁿ; Tùi kiông-pō tit-tio̍h lim-chiú.

18獨獨義人ê路，親像透早ê光，Ná照ná光，到日中晝。To̍k-to̍k gī-lâng ê lō͘, chhin-chhiūⁿ thàu-chá ê kng, Ná-chiò ná-kng, kàu ji̍t-tiong-tàu.

19pháiⁿ人ê路，親像烏暗；In tio̍h-tak m̄知甚麼緣故。Pháiⁿ-lâng ê lō͘, chhin-chhiūⁿ o͘-àm; In tio̍h-tak m̄-chai sím-mi̍h iân-kò͘.

20我ê kiáⁿ tio̍h注意聽我ê話，Àⁿ耳孔聽我所講ê。Góa ê kiáⁿ tio̍h chù-ì thiaⁿ góa ê ōe, Àⁿ hī-khang thiaⁿ góa só͘ kóng--ê.

21M̄-thang hō͘伊離開你ê目睭，Tio̍h記tiâu tī你ê心內。M̄-thang hō͘ i lī-khui lí ê ba̍k-chiu, Tio̍h kì-tiâu tī lí ê sim-lāi.

22因為chhē-tio̍h伊ê人，就得tio̍h活命；Koh thong身軀得tio̍h勇健。In-ūi chhē-tio̍h i ê lâng, chiū tit-tio̍h oa̍h-miā; Koh thong seng-khu tit-tio̍h ióng-kiāⁿ.

23你tio̍h盡力保守你ê心。因為伊是活命ê根源。Lí tio̍h chīn-la̍t pó-siú lí ê sim. In-ūi i sī oa̍h-miā ê kun-goân.

24你ê嘴tio̍h除去邪癖；你ê嘴唇tio̍h離開橫逆。Lí ê chhùi tio̍h tû-khì siâ-phiah; Lí ê chhùi-tûn tio̍h lī-khui hêng-ge̍k.

25你ê目睭tio̍h看直直；你ê目睭tio̍h看頭前。Lí ê ba̍k-chiu tio̍h khòaⁿ ti̍t-ti̍t; Lí ê ba̍k-chiu tio̍h khòaⁿ thâu-chêng.

26Tio̍h siu-pîⁿ你ê腳ê路；Tio̍h堅固你lóng總ê路途。Tio̍h siu-pîⁿ lí ê kha ê lō͘; Tio̍h kian-kò͘ lí lóng-chóng ê lō͘-tô͘.

27M̄-thang偏左偏右；Tio̍h hō͘你ê腳離開pháiⁿ。M̄-thang phian-chó phian-iū; Tio̍h hō͘ lí ê kha lī-khui pháiⁿ.

1我ê kiáⁿ，tio̍h留心tī我ê智慧；Àⁿ耳孔聽我ê聰明ê話。Góa ê kiáⁿ, tio̍h liû-sim tī góa ê tì-hūi; Àⁿ hī-khang thiaⁿ góa ê chhang-miâ ê ōe.

2為tio̍h beh hō͘你執守計畫，嘴唇保存知識。Ūi-tio̍h beh hō͘ lí chip-siú kè-e̍k, Chhùi-tûn pó-chûn chai-bat.

3因為淫婦ê嘴唇滴落甜蜜；伊ê嘴比油khah滑。In-ūi îm-hū ê chhùi-tûn tih-lo̍h tiⁿ-bi̍t; I ê chhùi pí iû khah ku̍t.

4到尾就苦親像in-tîn；利親像雙面ê劍。Kàu-bé chiū khó͘ chhin-chhiūⁿ in-tîn; Lāi chhin-chhiūⁿ siang-bīn ê kiàm.

5伊ê腳落到死地；伊ê腳步踏tio̍h陰府。I ê kha lo̍h kàu sí-tōe; I ê kha-pō͘ ta̍h-tio̍h im-hú.

6致到活命平坦ê路伊chhē bōe tio̍h；伊ê路無定tio̍h，伊也m̄知。Tì-kàu oa̍h-miā pîⁿ-tháⁿ ê lō͘ i chhē bōe tio̍h; I ê lō͘ bô tiāⁿ-tio̍h, i iā m̄-chai.

7我chiah-ê kiáⁿ ah，taⁿ tio̍h聽thàn我；M̄-thang離開我所講ê話。Góa chiah ê kiáⁿ ah, taⁿ tio̍h thiaⁿ-thàn góa; M̄-thang lī-khui góa só͘ kóng ê ōe.

8你ê路tio̍h離開伊遠遠；M̄-thang行近伊ê門口。Lí ê lō͘ tio̍h lī-khui i hn̄g-hn̄g; M̄-thang kiâⁿ-kūn i ê mn̂g-kháu.

9驚了你將家己ê榮光hō͘別人；將你ê歲壽hō͘殘忍ê人。Kiaⁿ-liáu lí chiong ka-kī ê êng-kng hō͘ pa̍t-lâng; Chiong lí ê hè-siū hō͘ chân-jím ê lâng.

10驚了外人得tio̍h你ê錢財滿滿；你tio̍h磨得tio̍h-ê歸tī外人ê家。Kiaⁿ-liáu gōa-lâng tit-tio̍h lí ê chîⁿ-châi móa-móa; Lí tio̍h-bôa tit-tio̍h-ê kui tī gōa-lâng ê ke.

11到尾你ê肉體衰敗；你就悲哀吐氣。Kàu-bé lí ê jio̍k-thé soe-pāi; Lí chiū pi-ai thó͘-khùi.

12就講，害ah，我怎樣怨恨教示；心內藐視責備；Chiū kóng, Hāi ah, góa cháiⁿ-iūⁿ oàn-hūn kà-sī; Sim-lāi biáu-sī chek-pī;

13亦無聽thàn我ê先生ê話；Koh無àⁿ耳孔聽hiah-ê教示我ê人；Ia̍h bô thiaⁿ-thàn góa ê sian-siⁿ ê ōe; Koh bô àⁿ hī-khang thiaⁿ hiah-ê kà-sī góa ê lâng;

14我tī會眾kap大會中，險險陷落tī ta̍k號ê pháiⁿ。Góa tī hōe-chèng kap tāi-hōe tiong, Hiám-hiám hām-lo̍h tī ta̍k-hō ê pháiⁿ.

15你tio̍h lim家己水池內ê水；Lim家己井內所出ê水。Lí tio̍h lim ka-kī chúi-tî-lāi ê chúi; Lim ka-kī chíⁿ-lāi só͘ chhut ê chúi.

16你ê水泉kiám thang滿出外面？你ê溪水kiám thang流tī街路？Lí ê chúi-chôaⁿ kiám thang móa--chhut gōa-bīn? Lí ê khoe-chúi kiám thang lâu tī ke-lō͘?

17獨獨歸你一人；M̄-thang kap別人相kap用。To̍k-to̍k kui lí chi̍t-lâng; M̄-thang kap pa̍t-lâng saⁿ-kap ēng.

18Tio̍h hō͘你ê水泉得tio̍h福氣；Tio̍h歡喜你少年ê時所娶ê bó͘。Tio̍h hō͘ lí ê chúi-chôaⁿ tit-tio̍h hok-khì; Tio̍h hoaⁿ-hí lí siàu-liân ê sî só͘ chhōa ê bó͘.

19祂親像thang疼ê鹿母，thang歡喜ê鹿母；祂ê胸前hō͘你時時知足；祂ê愛情hō͘你常常戀慕。I chhin-chhiūⁿ thang thiàⁿ ê lo̍k-bú, thang hoaⁿ-hí ê lo̍k-bú; I ê heng-chêng hō͘ lí sî-sî ti-chiok; I ê ài-chêng hō͘ lí siông-siông loân-bō͘.

20我ê kiáⁿ，你啥事戀慕淫婦？啥事抱妓女ê胸前？Góa ê kiáⁿ, lí siáⁿ-sū loân-bō͘ îm-hū? Siáⁿ-sū phō kī-lú ê heng-chêng?

21因為人所行ê路lóng tī耶和華ê目睭前；祂也修平人一切ê路。In-ūi lâng só͘ kiâⁿ ê lō͘ lóng tī Iâ-hô-hoa ê ba̍k-chiu-chêng; I iā siu-pîⁿ lâng it-chhè ê lō͘.

22pháiⁿ人beh hō͘家己ê罪過擒-tio̍h；伊beh hō͘伊罪惡ê索縛teh。Pháiⁿ-lâng beh hō͘ ka-kī ê chōe-kòa khîⁿ-tio̍h; I beh hō͘ i chōe-ok ê soh pa̍k-teh.

23I因為欠缺教示beh致到死無；Koh因為愚戇到極，beh行叉路。I in-ūi khiàm-kheh kà-sī beh tì-kàu sí-bô; Koh in-ūi gû-gōng kàu-ke̍k, beh kiâⁿ chha-lō͘.

1我ê kiáⁿ，你若為tio̍h厝邊做中保，替外人答應；Góa ê kiáⁿ, lí nā ūi-tio̍h chhù-piⁿ chòe tiong-pó, Thòe gōa-lâng tah-èng;

2你就hō͘嘴內ê話tauh-tio̍h，Hō͘嘴內ê話擒tio̍h。Lí chiū hō͘ chhùi-lāi ê ōe tauh--tio̍h, Hō͘ chhùi-lāi ê ōe khîⁿ--tio̍h.

3我ê kiáⁿ，你既然落tī厝邊ê手中，Taⁿ tio̍h án-ni行，來救家己。你tio̍h謙卑去懇求你ê厝邊。Góa ê kiáⁿ, lí kì-jiân lo̍h tī chhù-piⁿ ê chhiú-tiong, Taⁿ tio̍h án-ni kiâⁿ, lâi kiù ka-kī. Lí tio̍h khiam-pi khì khún-kiû lí ê chhù-piⁿ.

4M̄-thang hō͘你ê目睭睏去，M̄-thang hō͘你ê目睭皮放khoeh。M̄-thang hō͘ lí ê ba̍k-chiu khùn--khì, M̄-thang hō͘ lí ê ba̍k-chiu-phê pàng-khoeh.

5Tio̍h救家己，親像鹿脫離phah獵ê人ê手；親像鳥脫離掠鳥á ê人ê手。Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú; Chhin-chhiūⁿ chiáu thoat-lī lia̍h chiáu-á ê lâng ê chhiú.

6Pîn-tōaⁿ ê人ah，你tio̍h去看káu-hiā，想伊ê行做，thang得tio̍h智慧。Pîn-tōaⁿ ê lâng ah, lí tio̍h khì khòaⁿ káu-hiā, Siūⁿ i ê kiâⁿ-chòe, thang tit-tio̍h tì-hūi.

7伊無頭目，無kam-tok，無序大，I bô thâu-ba̍k, Bô kam(**kàm)-tok, bô sī-tōa,

8Iáu-kú tī夏天備辦伊ê食物，Tī收割ê時積聚伊ê米糧。Iáu-kú tī hē-thiⁿ pī-pān i ê chia̍h-mi̍h, Tī siu-koah ê sî chek-chū i ê bí-niû.

9Pîn-tōaⁿ人ah，你beh睏到tī時ah？你甚麼時睏醒起來ah？Pîn-tōaⁿ lâng ah, lí beh khùn kàu tī-sî ah? Lí sím-mi̍h sî khùn-chhíⁿ khí-lâi ah?

10Koh睏tiap-á久，koh眠tiap-á久，束手the tiap-á久；Koh khùn tiap-á-kú, koh bîn tiap-á-kú, Sok-chhiú the tiap-á-kú;

11你ê sòng-hiong beh親像賊來；你ê欠缺親像穿戰甲ê來。Lí ê sòng-hiong beh chhin-chhiūⁿ chha̍t lâi; Lí ê khiàm-kheh chhin-chhiūⁿ chhēng chiàn-kah--ê lâi.

12無hē-lo̍h ê pháiⁿ人，行做就用乖謬ê嘴，Bô hē-lo̍h ê pháiⁿ-lâng, Kiâⁿ-chòe chiū ēng koāi-biū ê chhùi,

13Nih目會意，用腳比意思，用指頭á指點。Nih-ba̍k hōe-ì, ēng kha pí ì-sù, Ēng chńg-thâu-á chí-tiám.

14心內乖僻，常常計謀pháiⁿ事；四界唆弄冤家。Sim-lāi koāi-phiah, siông-siông kè-bô͘ pháiⁿ-sū; Sì-kòe so-lōng oan-ke.

15所以伊ê災厄忽然臨到；伊beh忽然敗壞，無法thang醫治。Só͘-í i ê chai-ē hut-jiân lîm-kàu; I beh hut-jiân pāi-hoāi, bô hoat thang i-tī.

16有六項是耶和華所怨恨，連祂ê心所厭惡ê，有七項；Ū la̍k-hāng sī Iâ-hô-hoa só͘ oàn-hūn, Liân I ê sim só͘ iàm-ò͘ⁿ--ê, ū chhit-hāng;

17就是驕傲ê目睭，講白賊ê舌，手thâi無罪ê人；Chiū-sī kiau-ngō͘ ê ba̍k-chiu, kóng pe̍h-chha̍t ê chi̍h, Chhiú thâi bô-chōe ê lâng;

18心圖謀pháiⁿ事，腳緊緊行陷害；Sim tô͘-bô͘ pháiⁿ-sū, Kha kín-kín kiâⁿ hām-hāi;

19講白賊ê假干證，Tī兄弟中唆弄冤家ê人。Kóng pe̍h-chha̍t ê ké kan-chèng, Tī hiaⁿ-tī tiong so-lōng oan-ke ê lâng.

20我ê kiáⁿ，tio̍h執守你ê老父ê命令，M̄-thang棄sak你ê老母ê教示。Góa ê kiáⁿ, tio̍h chip-siú lí ê lāu-pē ê bēng-lēng, M̄-thang khì-sak lí ê lāu-bú ê kà-sī.

21Tio̍h常常記tiâu tī你ê心，掛tī你ê頷頸。Tio̍h siông-siông kì-tiâu tī lí ê sim, Kòa tī lí ê ām-kún.

22你行路ê時就引chhōa你；你睏ê時就保守你；你睏醒就kap你談論。Lí kiâⁿ-lō͘ ê sî chiū ín-chhōa lí; Lí khùn ê sî chiū pó-siú lí; Lí khùn-chhíⁿ chiū kap lí tâm-lūn.

23因為命令是燈，教示是光；照法ê責備是活命ê路；In-ūi bēng-lēng sī teng, kà-sī sī kng; Chiàu-hoat ê chek-pī sī oa̍h-miā ê lō͘;

24會保守你無親近pháiⁿ ê婦人人，無聽妓女諂媚ê話。Ōe pó-siú lí bô chhin-kūn pháiⁿ ê hū-jîn-lâng, Bô thiaⁿ kī-lú thiám-mī ê ōe.

25你ê心內m̄-thang戀慕伊ê súi-瑟；也m̄-thang hō͘伊ê目睭-皮引誘。Lí ê sim-lāi m̄-thang loân-bō͘ i ê súi-sek; Iā m̄-thang hō͘ i ê ba̍k-chiu-phê ín-iú.

26因為妓女會hō͘人只有chhun一塊-餅；淫婦會7搶奪人寶貴ê活命。In-ūi kī-lú ōe hō͘ lâng chí-ū chhun chi̍t-tè-piáⁿ; Îm-hū ōe chhiúⁿ-toa̍t lâng pó-kùi ê oa̍h-miā.

27人kiám會抱火tī胸前，伊ê衫亦無to̍h去mah？Lâng kiám ōe phō hé tī heng-chêng, I ê saⁿ ia̍h bô to̍h--khì mah?

28人kiám會踏tī熱ê火炭，伊ê腳亦無燒tio̍h mah？Lâng kiám ōe ta̍h tī jia̍t ê hé-thòaⁿ, I ê kha ia̍h bô sio--tio̍h mah?

29親近厝邊ê bó͘-ê，亦是án-ni；見若摸伊ê，bōe免得受罪。Chhin-kūn chhù-piⁿ ê bó͘--ê, ia̍h sī án-ni; Kìⁿ-nā bong i ê, bōe bián-tit siū-chōe.

30賊因為iau偷the̍h物來止饑，人無看輕伊。Chha̍t in-ūi iau thau-the̍h mi̍h lâi chí-ki, Lâng bô khòaⁿ-khin i.

31設使hō͘人掠tio̍h，tio̍h賠七倍；Tio̍h將家內所有ê，lóng hō͘人。Siat-sú hō͘ lâng lia̍h-tio̍h, tio̍h pê chhit-pē; Tio̍h chiong ke-lāi só͘-ū--ê, lóng hō͘ lâng.

32Kap人ê bó͘行淫ê，就是無知識；行chit-ê事ê，beh損害家己ê性命。Kap lâng ê bó͘ kiâⁿ-îm--ê, chiū-sī bô tì-sek; Kiâⁿ chit ê sū--ê, beh sún-hāi ka-kī ê sìⁿ-miā.

33伊beh受傷-hāi kap凌辱；伊ê見笑bōe會/能洗除。I beh siū siong-hāi kap lêng-jio̍k; I ê kiàn-siàu bōe-ōe sóe-tû.

34因為妒忌就是人ê大受氣；報仇ê時的確無寬容。In-ūi tò͘-khī chiū-sī lâng ê tōa siū-khì; Pò-siû ê sî tek-khak bô khoan-iông.

35用銀贖罪，伊也m̄-ti̍h；你雖然送chōe-chōe禮物，伊也m̄放你soah。Ēng gûn sio̍k-chōe, i iā m̄-ti̍h; Lí sui-jiân sàng chōe-chōe lé-mi̍h, i iā m̄ pàng lí soah.