1我ê kiáⁿ，你若為tio̍h厝邊做中保，替外人答應；Góa ê kiáⁿ, lí nā ūi-tio̍h chhù-piⁿ chòe tiong-pó, Thòe gōa-lâng tah-èng;

2你就hō͘嘴內ê話tauh-tio̍h，Hō͘嘴內ê話擒tio̍h。Lí chiū hō͘ chhùi-lāi ê ōe tauh--tio̍h, Hō͘ chhùi-lāi ê ōe khîⁿ--tio̍h.

3我ê kiáⁿ，你既然落tī厝邊ê手中，Taⁿ tio̍h án-ni行，來救家己。你tio̍h謙卑去懇求你ê厝邊。Góa ê kiáⁿ, lí kì-jiân lo̍h tī chhù-piⁿ ê chhiú-tiong, Taⁿ tio̍h án-ni kiâⁿ, lâi kiù ka-kī. Lí tio̍h khiam-pi khì khún-kiû lí ê chhù-piⁿ.

4M̄-thang hō͘你ê目睭睏去，M̄-thang hō͘你ê目睭皮放khoeh。M̄-thang hō͘ lí ê ba̍k-chiu khùn--khì, M̄-thang hō͘ lí ê ba̍k-chiu-phê pàng-khoeh.

5Tio̍h救家己，親像鹿脫離phah獵ê人ê手；親像鳥脫離掠鳥á ê人ê手。Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú; Chhin-chhiūⁿ chiáu thoat-lī lia̍h chiáu-á ê lâng ê chhiú.

6Pîn-tōaⁿ ê人ah，你tio̍h去看káu-hiā，想伊ê行做，thang得tio̍h智慧。Pîn-tōaⁿ ê lâng ah, lí tio̍h khì khòaⁿ káu-hiā, Siūⁿ i ê kiâⁿ-chòe, thang tit-tio̍h tì-hūi.

7伊無頭目，無kam-tok，無序大，I bô thâu-ba̍k, Bô kam(**kàm)-tok, bô sī-tōa,

8Iáu-kú tī夏天備辦伊ê食物，Tī收割ê時積聚伊ê米糧。Iáu-kú tī hē-thiⁿ pī-pān i ê chia̍h-mi̍h, Tī siu-koah ê sî chek-chū i ê bí-niû.

9Pîn-tōaⁿ人ah，你beh睏到tī時ah？你甚麼時睏醒起來ah？Pîn-tōaⁿ lâng ah, lí beh khùn kàu tī-sî ah? Lí sím-mi̍h sî khùn-chhíⁿ khí-lâi ah?

10Koh睏tiap-á久，koh眠tiap-á久，束手the tiap-á久；Koh khùn tiap-á-kú, koh bîn tiap-á-kú, Sok-chhiú the tiap-á-kú;

11你ê sòng-hiong beh親像賊來；你ê欠缺親像穿戰甲ê來。Lí ê sòng-hiong beh chhin-chhiūⁿ chha̍t lâi; Lí ê khiàm-kheh chhin-chhiūⁿ chhēng chiàn-kah--ê lâi.

12無hē-lo̍h ê pháiⁿ人，行做就用乖謬ê嘴，Bô hē-lo̍h ê pháiⁿ-lâng, Kiâⁿ-chòe chiū ēng koāi-biū ê chhùi,

13Nih目會意，用腳比意思，用指頭á指點。Nih-ba̍k hōe-ì, ēng kha pí ì-sù, Ēng chńg-thâu-á chí-tiám.

14心內乖僻，常常計謀pháiⁿ事；四界唆弄冤家。Sim-lāi koāi-phiah, siông-siông kè-bô͘ pháiⁿ-sū; Sì-kòe so-lōng oan-ke.

15所以伊ê災厄忽然臨到；伊beh忽然敗壞，無法thang醫治。Só͘-í i ê chai-ē hut-jiân lîm-kàu; I beh hut-jiân pāi-hoāi, bô hoat thang i-tī.

16有六項是耶和華所怨恨，連祂ê心所厭惡ê，有七項；Ū la̍k-hāng sī Iâ-hô-hoa só͘ oàn-hūn, Liân I ê sim só͘ iàm-ò͘ⁿ--ê, ū chhit-hāng;

17就是驕傲ê目睭，講白賊ê舌，手thâi無罪ê人；Chiū-sī kiau-ngō͘ ê ba̍k-chiu, kóng pe̍h-chha̍t ê chi̍h, Chhiú thâi bô-chōe ê lâng;

18心圖謀pháiⁿ事，腳緊緊行陷害；Sim tô͘-bô͘ pháiⁿ-sū, Kha kín-kín kiâⁿ hām-hāi;

19講白賊ê假干證，Tī兄弟中唆弄冤家ê人。Kóng pe̍h-chha̍t ê ké kan-chèng, Tī hiaⁿ-tī tiong so-lōng oan-ke ê lâng.

20我ê kiáⁿ，tio̍h執守你ê老父ê命令，M̄-thang棄sak你ê老母ê教示。Góa ê kiáⁿ, tio̍h chip-siú lí ê lāu-pē ê bēng-lēng, M̄-thang khì-sak lí ê lāu-bú ê kà-sī.

21Tio̍h常常記tiâu tī你ê心，掛tī你ê頷頸。Tio̍h siông-siông kì-tiâu tī lí ê sim, Kòa tī lí ê ām-kún.

22你行路ê時就引chhōa你；你睏ê時就保守你；你睏醒就kap你談論。Lí kiâⁿ-lō͘ ê sî chiū ín-chhōa lí; Lí khùn ê sî chiū pó-siú lí; Lí khùn-chhíⁿ chiū kap lí tâm-lūn.

23因為命令是燈，教示是光；照法ê責備是活命ê路；In-ūi bēng-lēng sī teng, kà-sī sī kng; Chiàu-hoat ê chek-pī sī oa̍h-miā ê lō͘;

24會保守你無親近pháiⁿ ê婦人人，無聽妓女諂媚ê話。Ōe pó-siú lí bô chhin-kūn pháiⁿ ê hū-jîn-lâng, Bô thiaⁿ kī-lú thiám-mī ê ōe.

25你ê心內m̄-thang戀慕伊ê súi-瑟；也m̄-thang hō͘伊ê目睭-皮引誘。Lí ê sim-lāi m̄-thang loân-bō͘ i ê súi-sek; Iā m̄-thang hō͘ i ê ba̍k-chiu-phê ín-iú.

26因為妓女會hō͘人只有chhun一塊-餅；淫婦會7搶奪人寶貴ê活命。In-ūi kī-lú ōe hō͘ lâng chí-ū chhun chi̍t-tè-piáⁿ; Îm-hū ōe chhiúⁿ-toa̍t lâng pó-kùi ê oa̍h-miā.

27人kiám會抱火tī胸前，伊ê衫亦無to̍h去mah？Lâng kiám ōe phō hé tī heng-chêng, I ê saⁿ ia̍h bô to̍h--khì mah?

28人kiám會踏tī熱ê火炭，伊ê腳亦無燒tio̍h mah？Lâng kiám ōe ta̍h tī jia̍t ê hé-thòaⁿ, I ê kha ia̍h bô sio--tio̍h mah?

29親近厝邊ê bó͘-ê，亦是án-ni；見若摸伊ê，bōe免得受罪。Chhin-kūn chhù-piⁿ ê bó͘--ê, ia̍h sī án-ni; Kìⁿ-nā bong i ê, bōe bián-tit siū-chōe.

30賊因為iau偷the̍h物來止饑，人無看輕伊。Chha̍t in-ūi iau thau-the̍h mi̍h lâi chí-ki, Lâng bô khòaⁿ-khin i.

31設使hō͘人掠tio̍h，tio̍h賠七倍；Tio̍h將家內所有ê，lóng hō͘人。Siat-sú hō͘ lâng lia̍h-tio̍h, tio̍h pê chhit-pē; Tio̍h chiong ke-lāi só͘-ū--ê, lóng hō͘ lâng.

32Kap人ê bó͘行淫ê，就是無知識；行chit-ê事ê，beh損害家己ê性命。Kap lâng ê bó͘ kiâⁿ-îm--ê, chiū-sī bô tì-sek; Kiâⁿ chit ê sū--ê, beh sún-hāi ka-kī ê sìⁿ-miā.

33伊beh受傷-hāi kap凌辱；伊ê見笑bōe會/能洗除。I beh siū siong-hāi kap lêng-jio̍k; I ê kiàn-siàu bōe-ōe sóe-tû.

34因為妒忌就是人ê大受氣；報仇ê時的確無寬容。In-ūi tò͘-khī chiū-sī lâng ê tōa siū-khì; Pò-siû ê sî tek-khak bô khoan-iông.

35用銀贖罪，伊也m̄-ti̍h；你雖然送chōe-chōe禮物，伊也m̄放你soah。Ēng gûn sio̍k-chōe, i iā m̄-ti̍h; Lí sui-jiân sàng chōe-chōe lé-mi̍h, i iā m̄ pàng lí soah.

1我ê kiáⁿ，你tio̍h保守我ê話，心內khǹg我ê命令。Góa ê kiáⁿ, lí tio̍h pó-siú góa ê ōe, Sim-lāi khǹg góa ê bēng-lēng.

2保守我ê命令就得tio̍h活；保守我ê教示，親像保守目睭仁。Pó-siú góa ê bēng-lēng chiū tit-tio̍h oa̍h; Pó-siú góa ê kà-sī, chhin-chhiūⁿ pó-siú ba̍k-chiu-jîn.

3縛tī你ê指頭á，刻tī你ê心碑。Pa̍k tī lí ê chńg-thâu-á, Khek tī lí ê sim-pi.

4Tio̍h對智慧講，你是我ê姊妹，Tio̍h叫聰明做你ê親人。Tio̍h tùi tì-hūi kóng, Lí sī góa ê chí-bē, Tio̍h kiò chhang-miâ chòe lí ê chhin-lâng.

5伊會保護你閃避淫婦，閃-pī講諂媚ōe ê妓女。I ōe pó-hō͘ lí siám-pī îm-hū, Siám-pī kóng thiám-mī ōe ê kī-lú.

6我bat khiā tī我ê厝ê窗á，Tùi我ê窗á-chí看出-去。Góa bat khiā tī góa ê chhù ê thang-á, Tùi góa ê thang-á-chí khòaⁿ chhut-khì.

7看見愚戇人ê內面，後生-ke ê中間，明明看見有一個無知ê少年人，Khòaⁿ-kìⁿ gû-gōng lâng ê lāi-bīn, hāu-siⁿ-ke ê tiong-kan, Bêng-bêng khòaⁿ-kìⁿ ū chi̍t-ê bû-ti ê siàu-liân lâng,

8Tùi街路經過，近淫婦ê厝角，行hit條透到伊ê厝ê路；Tùi ke-lō͘ keng-kè, kūn îm-hū ê chhù-kak, Kiâⁿ hit-tiâu thàu-kàu i ê chhù ê lō͘;

9Tī黃昏，tī ê-hng，Tī暝時ê烏暗。Tī hông-hun, tī ê-hng, Tī mî--sî ê o͘-àm.

10看ah，有一個婦人人tú-tio̍h伊，是妓女ê打扮，有káu-koài ê心思。Khòaⁿ ah, ū chi̍t ê hū-jîn-lâng tú-tio̍h i, Sī kī-lú ê táⁿ-pān, ū káu-koài ê sim-su.

11Chit-ê婦人人gâu嚷，無受約束；伊ê腳無tòa厝。Chit ê hū-jîn-lâng gâu-jióng, bô siū iok-sok; I ê kha bô tòa chhù.

12有時tī街路裡，有時tī開闊ê所在；有時tī ta̍k ê巷口teh當等。Ū-sî tī ke-lō͘--nih, ū-sî tī khui-khoah ê só͘-chāi; Ū-sî tī ta̍k ê hāng-kháu teh tng-tán.

13擒hit-ê少年人，kap伊chim嘴；無見笑ê面色，對伊講，Khîⁿ hit ê siàu-liân lâng, kap i chim-chhùi; Bô kiàn-siàu ê bīn-sek, tùi i kóng,

14我chia有平安祭；今á日有謝我ê願。Góa chia ū pêng-an-chè; Kin-á-ji̍t ū siā góa ê goān.

15所以我出來迎接你，懇切chhē見你ê面，tú好tú-tio̍h你。Só͘-í góa chhut-lâi ngiâ-chih lí, Khún-chhiat chhē-kìⁿ lí ê bīn, tú-hó tú-tio̍h lí.

16我已經用繡花ê毯á，Kap埃及ê線所織有花chōa ê布，chhu tī我ê眠床。Góa í-keng ēng siù-hoe ê thán-á, Kap Ai-ki̍p ê sòaⁿ só͘ chit ū hoe-chōa ê pò͘, chhu tī góa ê bîn-chhn̂g.

17我koh用沒藥、沉香、肉桂，Hiù我ê床。Góa koh ēng bu̍t-io̍h, tîm-hiuⁿ, jio̍k-kùi, Hiù góa ê chhn̂g.

18來ah，咱thang享受愛情到滿意，直到天光，咱thang相kap戀愛快樂。Lâi ah, lán thang hióng-siū ài-chêng kàu móa-ì, ti̍t-kàu thiⁿ-kng, Lán thang saⁿ-kap loân-ài khoài-lo̍k.

19因為ta-po͘人無tī厝裡，出去行遠路。In-ūi ta-po͘-lâng bô tī chhù--ni̍h, Chhut-khì kiâⁿ hn̄g-lō͘.

20伊手帶銀袋；到月圓chiah tò來。I chhiú tòa gûn-tē; Kàu ge̍h-îⁿ chiah tò-lâi.

21淫婦用chōe-chōe奇巧ê話引誘伊，用諂媚ê嘴逼伊相kap去。Îm-hū ēng chōe-chōe kî-khiáu ê ōe ín-iú i, Ēng thiám-mī ê chhùi pek i saⁿ-kap khì.

22伊liâm-piⁿ tè伊去，親像牛khan去thâi；Koh親像戇人帶鎖鏈，去受刑罰。I liâm-piⁿ tè i khì, Chhin-chhiūⁿ gû khan khì thâi; Koh chhin-chhiūⁿ gōng-lâng tòa só-liān, khì siū hêng-hoa̍t.

23到箭射-入伊ê肝，親像鳥á緊緊入羅網，也m̄知這是關係伊ê性命。Kàu chìⁿ siā-ji̍p i ê koaⁿ, Chhin-chhiūⁿ chiáu-á kín-kín ji̍p lô-bāng, Iā m̄-chai che sī koan-hē i ê sìⁿ-miā.

24chiah-ê kiáⁿ ah，taⁿ tio̍h聽thàn我。留心聽我所講ê話。Chiah ê kiáⁿ ah, taⁿ tio̍h thiaⁿ-thàn góa. Liû-sim thiaⁿ góa só͘ kóng ê ōe.

25你ê心m̄-thang意向伊ê路，M̄-thang迷tī伊ê路。Lí ê sim m̄-thang ì-hiòng i ê lō͘, M̄-thang bê tī i ê lō͘.

26因為伊hō͘ chōe-chōe人受傷倒落去；Koh真chōe人hō͘伊thâi死。In-ūi i hō͘ chōe-chōe lâng siū-siong tó--lo̍h-khì; Koh chin-chōe lâng hō͘ i thâi-sí.

27伊ê厝是做陰府ê路，Chhōa到死-無ê厝宅。I ê chhù sī chòe im-hú ê lō͘, Chhōa kàu sí-bô ê chhù-the̍h.

1智慧kiám無teh叫？聰明kiám無出聲？Tì-hūi kiám bô teh kiò? Chhang-miâ kiám bô chhut-siaⁿ?

2伊tī路邊高地ê頂面，Tī十字路口teh khiā。I tī lō͘-piⁿ koâiⁿ-tōe ê téng-bīn, Tī si̍p-jī-lō͘-kháu teh khiā.

3Tī城門邊，tī城門口，Tī城出入ê所在，大聲叫講，Tī siâⁿ-mn̂g piⁿ, tī siâⁿ-mn̂g kháu, Tī siâⁿ chhut-ji̍p ê só͘-chāi, tōa-siaⁿ kiò kóng,

4眾人ah，我叫lín，我ǹg世間人出聲。Chèng-lâng ah, góa kiò lín, Góa ǹg sè-kan lâng chhut-siaⁿ.

5講，戇直ê人ah，lín tio̍h ōe曉得通達ê你；愚戇ê人ah，lín心內tio̍h明白。Kóng, Gōng-ti̍t ê lâng ah, lín tio̍h ōe hiáu-tit thong-ta̍t ê lí; Gû-gōng ê lâng ah, lín sim-lāi tio̍h bêng-pe̍k.

6Lín tio̍h聽，因為我beh講極好ê事；我beh開嘴論正直ê事。Lín tio̍h thiaⁿ, in-ūi góa beh kóng ke̍k-hó ê sū; Góa beh khui-chhùi lūn chèng-ti̍t ê sū.

7我ê嘴beh講出真實；我ê嘴唇怨恨pháiⁿ-tāi。Góa ê chhùi beh kóng-chhut chin-si̍t; Góa ê chhùi-tûn oàn-hūn pháiⁿ-tāi.

8我所講ê話，lóng是公義；其中無彎曲乖謬。Góa só͘ kóng ê ōe, lóng sī kong-gī; Kî-tiong bô oan-khiau koāi-biū.

9這ōe明理ê人lóng ōe會曉得，得tio̍h知識ê人lóng掠做正直。Che ōe bêng-lí ê lâng lóng ōe hiáu-tit, Tit-tio̍h tì-sek ê lâng lóng lia̍h-chòe chèng-ti̍t.

10Lín tio̍h承受我ê教示，khah好得tio̍h白銀；得tio̍h知識，khah好得tio̍h黃金。Lín tio̍h sêng-siū góa ê kà-sī, khah-hó tit-tio̍h pe̍h-gûn; Tit-tio̍h tì-sek, khah-hó tit-tio̍h n̂g-kim.

11因為智慧比紅寶石khah好；一切所欣慕ê，lóng bōe kap伊比得。In-ūi tì-hūi pí âng-pó-chio̍h khah-hó; It-chhè só͘ him-bō͘--ê, lóng bōe kap i pí-tit.

12我智慧用通達做khiā起ê所在；Koh chhē-tio̍h知識kap計畫。Góa tì-hūi ēng thong-ta̍t chòe khiā-khí ê só͘-chāi; Koh chhē-tio̍h tì-sek kap kè-e̍k.

13敬畏耶和華在tī怨恨pháiⁿ-tāi；hit號驕傲，lām-sám，kap pháiⁿ路，以及乖謬ê嘴，lóng是我所怨恨。Kèng-ùi Iâ-hô-hoa chāi-tī oàn-hūn pháiⁿ-tāi; Hit-hō kiau-ngō͘, lām-sám, kap pháiⁿ-lō͘, Í-ki̍p koāi-biū ê chhùi, lóng sī góa só͘ oàn-hūn.

14我有計畫kap真ê知識；我就是聰明，我有能力。Góa ū kè-e̍k kap chin ê tì-sek; Góa chiū-sī chhang-miâ, góa ū lêng-le̍k.

15帝王tùi我來坐位；人君tùi我定tio̍h公平ê法。Tè-ông tùi góa lâi chē-ūi; Jîn-kun tùi góa tiāⁿ-tio̍h kong-pêng ê hoat.

16王親kap貴族，世上一切ê審判司，lóng是tùi我來掌權。Ông-chhin kap kùi-cho̍k, sè-chiūⁿ it-chhè ê sím-phòaⁿ-si, Lóng sī tùi góa lâi chiáng-koân.

17疼我ê，我也疼伊；懇切chhē我ê，beh chhē-tio̍h。Thiàⁿ góa--ê, góa iā thiàⁿ i; Khún-chhiat chhē góa--ê, beh chhē-tio̍h.

18好額尊貴在tī我，久長ê富有kap公義也在tī我。Hó-gia̍h chun-kùi chāi-tī góa, Kú-tn̂g ê pù-ū kap kong-gī iā chāi-tī góa.

19我ê果子khah好黃金，贏過好金；我ê出色贏過紋銀。Góa ê ké-chí khah-hó n̂g-kim, iâⁿ-kè hó-kim; Góa ê chhut-sek iâⁿ-kè bûn-gûn.

20我行tī公義ê路；行tī公平chiah-ê路中。Góa kiâⁿ tī kong-gī ê lō͘; Kiâⁿ tī kong-pêng chiah ê lō͘-tiong.

21Hō͘疼我ê人承受貨財；也充滿in ê府庫。Hō͘ thiàⁿ góa ê lâng sêng-siū hè-châi; Iā chhiong-móa in ê hú-khò͘.

22Tī耶和華造化ê起頭，Tī極起頭創造ê事先，我是I所有。Tī Iâ-hô-hoa chō-hòa ê khí-thâu, Tī ke̍k khí-thâu chhòng-chō ê tāi-seng, góa sī I só͘ ū.

23Tùi永遠，tùi極起頭，未有世界ê事先，我已經受設立。Tùi éng-oán, tùi ke̍k khí-thâu, Bē ū sè-kài ê tāi-seng, góa í-keng siū siat-li̍p.

24未有深淵，未有chōe-chōe水ê水泉，已經生我。Bē ū chhim-ian, bē ū chōe-chōe chúi ê chúi-chôaⁿ, Í-keng siⁿ góa.

25大山未定tio̍h，小山未有ê事先，已經生我。Tōa-soaⁿ bē tiāⁿ-tio̍h, sió-soaⁿ bē ū ê tāi-seng, Í-keng siⁿ góa.

26耶和華iáu未創造大地kap田野，以及地上土粉ê原質。Iâ-hô-hoa iáu-bē chhòng-chō tōa-tōe kap chhân-iá, Í-ki̍p tōe-chiūⁿ thô͘-hún ê goân-chit.

27祂建立chiah-ê天；設圓環tī深淵ê頂面；I kiàn-li̍p chiah ê thiⁿ; Siat îⁿ-khoân tī chhim-ian ê téng-bīn;

28頂面安置穹蒼；堅固深淵ê水泉；Téng-bīn an-tì kiong-chhong; Kian-kò͘ chhim-ian ê chúi-chôaⁿ;

29Kā海定tio̍h界限；Hō͘水無pôaⁿ過伊ê命令；定tio̍h大地ê根基，我kap伊tī-teh。Kā hái tiāⁿ-tio̍h kài-hān; Hō͘ chúi bô pôaⁿ-kè I ê bēng-lēng; Tiāⁿ-tio̍h tōa-tōe ê kun-ki, góa kap I tī-teh.

30hit時我tī-hia做師傅-頭；日日hō͘伊歡喜，常常tī伊面前快樂；Hit-sî góa tī-hia chòe sai-hū-thâu; Ji̍t-ji̍t hō͘ I hoaⁿ-hí, Siông-siông tī I bīn-chêng khoài-lo̍k;

31Tī thang khiā起ê地快樂；也kap世間人相kap歡喜。Tī thang khiā-khí ê tōe khoài-lo̍k; Iā kap sè-kan lâng saⁿ-kap hoaⁿ-hí.

32Lín chiah-ê kiáⁿ，taⁿ tio̍h聽thàn我；因為執守我ê道路ê，就有福氣。Lín chiah ê kiáⁿ, taⁿ tio̍h thiaⁿ-thàn góa; In-ūi chip-siú góa ê tō-lō͘--ê, chiū ū hok-khì.

33Tio̍h聽教示，就得tio̍h智慧，M̄-thang棄絕i。Tio̍h thiaⁿ kà-sī, chiū tit-tio̍h tì-hūi, M̄-thang khì-choa̍t i.

34聽thàn我，日日tī我ê門口teh等，Tī我ê門khiā-邊thèng候ê，hit號人有福氣。Thiaⁿ-thàn góa, ji̍t-ji̍t tī góa ê mn̂g-kháu teh tán, Tī góa ê mn̂g-khiā-piⁿ thèng-hāu ê, Hit-hō lâng ū hok-khì.

35因為chhē-tio̍h我ê，就chhē-tio̍h活命；也beh tùi耶和華得tio̍h恩惠。In-ūi chhē-tio̍h góa--ê, chiū chhē-tio̍h oa̍h-miā; Iā beh tùi Iâ-hô-hoa tit-tio̍h un-hūi.

36得罪我ê，是hāi家己ê性命；怨恨我ê，lóng是家己取死。Tek-chōe góa--ê, sī hāi ka-kī ê sìⁿ-miā; Oàn-hūn góa--ê, lóng sī ka-kī chhú sí.