1約伯應耶和華講，Iok-pek ìn Iâ-hô-hoa kóng,

2我知你萬事lóng能，你ê旨意lóng bōe阻擋得。Góa chai Lí bān-sū lóng ōe. Lí ê chí-ì lóng bōe chó͘-tòng--tit.

3Chit-ê無知來蓋密所議論ê，是是誰 ah？所以我有講出我所無明ê，就是我所想bōe出ê奇妙，我所m̄知。Chit-ê bû-ti lâi khàm-ba̍t só͘ gī-lūn ê, sī chī-chūi ah? Só͘-í góa ū kóng-chhut góa só͘ bô bêng--ê, Chiū-sī góa só͘ siūⁿ-bōe-chhut ê kî-biāu, góa só͘ m̄-chai.

4求你聽，我beh講，我問你，你應我。Kiû Lí thiaⁿ, góa beh kóng, Góa mn̄g Lí, Lí ìn góa.

5我前耳孔聽見你，taⁿ我ê目睭看見你；Góa chêng hī-khang thiaⁿ-kìⁿ Lí, Taⁿ góa ê ba̍k-chiu khòaⁿ-kìⁿ Lí;

6所以我家己厭惡，tī塵埃kap火灰ê中間反悔。Só͘-í góa ka-kī iàm-ò͘ⁿ, Tī tîn-ai kap hé-hu ê tiong-kan hoán-hóe.

7耶和華對約伯講chiah-ê話以後，耶和華就對Thê-bān人Í-lī-hoat講，我ê受氣對你kap你兩個朋友發起來，因為lín議論我，無講合理ê話，親像我ê奴僕約伯所講ê。Iâ-hô-hoa tùi Iok-pek kóng chiah ê ōe í-āu, Iâ-hô-hoa chiū tùi Thê-bān lâng Í-lī-hoat kóng, Góa ê siū-khì tùi lí kap lí nn̄g ê pêng-iú hoat--khí-lâi, in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê.

8Taⁿ lín tio̍h為本身取七隻牛káng，七隻羊káng，到我ê奴僕約伯hia，為本身獻燒祭；我ê奴僕約伯beh替lín祈禱；因為我beh接納伊，免得我照lín ê愚戇來款待lín；因為lín議論我，無講合理ê話，親像我ê奴僕約伯所講ê。Taⁿ lín tio̍h ūi pún-sin chhú chhit chiah gû-káng, chhit chiah iûⁿ-káng, kàu Góa ê lô͘-po̍k Iok-pek hia, ūi pún-sin hiàn sio-chè; Góa ê lô͘-po̍k Iok-pek beh thòe lín kî-tó; in-ūi Góa beh chiap-la̍p i, bián-tit Góa chiàu lín ê gû-gōng lâi khoán-thāi lín; in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê.

9Tùi án-ni， Thê-bān人Í-lī-hoat，Su-a人Pí-le̍k-ta̍t，Ná-má人Só-hoat，照耶和華所命令in-ê去行；耶和華也接納約伯。Tùi án-ni Thê-bān lâng Í-lī-hoat, Su-a lâng Pí-le̍k-ta̍t, Ná-má lâng Só-hoat, chiàu Iâ-hô-hoa só͘ bēng-lēng in ê khì-kiâⁿ; Iâ-hô-hoa iā chiap-la̍p Iok-pek.

10約伯替伊ê朋友祈禱ê時，耶和華就hō͘伊ê景況復原；koh耶和華賞賜約伯比以前所有ê加倍。Iok-pek thòe i ê pêng-iú kî-tó ê sî, Iâ-hô-hoa chiū hō͘ i ê kéng-hóng ho̍k-goân; koh Iâ-hô-hoa siúⁿ-sù Iok-pek pí í-chêng só͘-ū-ê ka-pē.

11Hit時伊ê眾兄弟、姊妹，kap以前相識ê人lóng來見伊，tī伊ê厝相kap食，為tio̍h耶和華所降落tī伊一切ê災厄，lóng悲傷來安慰伊；ta̍k人送伊一塊銀，ta̍k人送伊一個金環。Hit-sî i ê chèng hiaⁿ-tī, chí-bē, kap í-chêng saⁿ-bat ê lâng lóng lâi kìⁿ i, tī i ê chhù saⁿ-kap chia̍h, ūi-tio̍h Iâ-hô-hoa só͘ kàng-lo̍h tī i it-chhè ê chai-ē, lóng pi-siong lâi an-ùi i; ta̍k-lâng sàng i chi̍t-tè gûn, ta̍k-lâng sàng i chi̍t-ê kim-khoân.

12Án-ni耶和華賜福約伯ê尾景贏過伊ê起頭；伊有羊一萬四千，駱駝六千，牛一千對，驢母一千。Án-ni Iâ-hô-hoa sù-hok Iok-pek ê bé-kéng iâⁿ-kè i ê khí-thâu; i ū iûⁿ chi̍t-bān sì-chheng, lo̍k-tô la̍k chheng, gû chi̍t-chheng tùi, lû-bú chi̍t-chheng.

13伊也有七個kiáⁿ，三個cha-bó͘-kiáⁿ。I iā ū chhit ê kiáⁿ, saⁿ ê cha-bó͘-kiáⁿ.

14伊kā大cha-bó͘-kiáⁿ名叫Iâ-bí-má，第二個名叫Ki-sé-a，第三個名叫Ki-liân-hap-phok。I kā tōa cha-bó͘-kiáⁿ miâ-kiò Iâ-bí-má, tē-jī-ê miâ-kiò Ki-sé-a, tē-saⁿ-ê miâ-kiò Ki-liân-hap-phok.

15Thong hit所在ê婦女，chhē無親像約伯ê cha-bó͘-kiáⁿ hiah-nih súi；in ê老父hō͘ in tī兄弟中得tio̍h產業。Thong hit só͘-chāi ê hū-lú, chhē bô chhin-chhiūⁿ Iok-pek ê cha-bó͘-kiáⁿ hiah--nih súi; in ê lāu-pē hō͘ in tī hiaⁿ-tī tiong tit-tio̍h sán-gia̍p.

16Chit-tia̍p以後，約伯koh食一百四十歲，得tio̍h看見伊ê kiáⁿ，伊ê孫，到四代。Chit-tia̍p í-āu Iok-pek koh chia̍h chi̍t-pah sì-cha̍p hè, tit-tio̍h khòaⁿ-kìⁿ i ê kiáⁿ, i ê sun, kàu sì-tāi.

17Án-ni約伯年歲老，日子滿，就死。Án-ni Iok-pek nî-hè lāu, ji̍t-chí móa, chiū sí.

1無行pháiⁿ人ê計謀，　　無khiā罪人ê路，　　無坐侮慢ê人ê位，chit號人有福氣。Bô kiâⁿ pháiⁿ-lâng ê kè-bô͘, Bô khiā chōe-jîn ê lō͘, Bô chē bú-bān ê lâng ê ūi, chit-hō lâng ū hok-khì.

2伊所歡喜ê就是耶和華ê律法；　　暝日三思ê，也是伊ê律法；I só͘ hoaⁿ-hí--ê chiū-sī Iâ-hô-hoa ê lu̍t-hoat; Mî-ji̍t sàm-su--ê, iā sī I ê lu̍t-hoat;

3伊beh親像樹栽tī溪邊，　　照時結果子，　　伊ê葉也bōe乾去；　　伊所做ê一盡興通。I beh chhin-chhiūⁿ chhiū chai tī khoe-piⁿ, Chiàu-sî kiat ké-chí, I ê hio̍h iā bōe ta--khì; I só͘ chòe--ê it-chīn heng-thong.

4Pháiⁿ人m̄是án-ni；　　是親像粗糠hō͘風吹散。Pháiⁿ-lâng m̄-sī án-ni; Sī chhin-chhiūⁿ chho͘-khng hō͘ hong chhe-sòaⁿ.

5所以tī審判，pháiⁿ人khiā-bōe-tiâu；　　罪人tī義人ê會中，亦是án-ni。Só͘-í tī sím-phòaⁿ, pháiⁿ-lâng khiā-bōe-tiâu; Chōe-jîn tī gī-lâng ê hōe-tiong, ia̍h sī án-ni.

6因為耶和華知義人ê路，　　若是pháiⁿ人ê路會滅無。In-ūi Iâ-hô-hoa chai gī-lâng ê lō͘, Nā-sī pháiⁿ-lâng ê lō͘ ōe bia̍t-bô.

1列邦啥事喧嘩，　　眾百姓啥事計謀空空ê事？Lia̍t-pang siáⁿ-sū soan-hoa, Chèng peh-sìⁿ siáⁿ-sū kè-bô͘ khang-khang ê sū?

2世上ê君王khiā起來，　　掌權柄ê相kap議論，　　Beh抵敵耶和華，也抵敵伊ê受抹油ê。Sè-chiūⁿ ê kun-ông khiā--khí-lâi, Chiáng koân-pèng--ê saⁿ-kap gī-lūn, Beh tí-te̍k Iâ-hô-hoa, iā tí-te̍k I ê siū boah-iû--ê.

3講，咱tio̍h chhoah斷in ê綑縛，　　Hiat-ka̍k in ê索。Kóng, Lán tio̍h chhoah-tn̄g in ê khún-pa̍k, Hiat-ka̍k in ê soh.

4坐tī天頂ê beh笑，　　主beh藐視in。Chē tī thiⁿ-téng--ê beh chhiò, Chú beh biáu-sī in.

5Hit時伊beh tī伊ê受氣中來對伊講，　　Tī伊ê大受氣來hō͘ in驚。Hit-sî I beh tī I ê siū-khì-tiong lâi tùi i kóng, Tī I ê tōa siū-khì lâi hō͘ in kiaⁿ.

6主講，我已經設立我ê王，　　Tī錫安，我ê聖山。Chú kóng, Góa í-keng siat-li̍p Góa ê ông, Tī Sek-an, Góa ê sèng-soaⁿ.

7我beh傳聖旨，　　耶和華bat kā我講，你是我ê kiáⁿ，　　我今á日生你。Góa beh thoân sèng-chí, Iâ-hô-hoa bat kā góa kóng, Lí sī Góa ê kiáⁿ, Góa kin-á-ji̍t siⁿ lí.

8你求我，我就將列邦hō͘你做基業；　　將地ê極頭hō͘你做產業。Lí kiû Góa, Góa chiū chiong lia̍t-pang hō͘ lí chòe ki-gia̍p; Chiong tōe ê ke̍k-thâu hō͘ lí chòe sán-gia̍p.

9你beh用鐵柺phah破in；　　Beh kòng碎in親像燒磁人ê磁器。Lí beh ēng thih-koáiⁿ phah-phòa in; Beh kòng-chhùi in chhin-chhiūⁿ sio-hûi lâng ê hûi-khì.

10Taⁿ lín列王tio̍h有智慧；　　Lín世上ê審判官tio̍h受警戒。Taⁿ lín lia̍t-ông tio̍h ū tì-hūi; Lín sè-chiūⁿ ê sím-phòaⁿ-koaⁿ tio̍h siū kéng-kài.

11Tio̍h用敬畏來服事耶和華，　　Tio̍h用驚惶來歡喜。Tio̍h ēng kèng-ùi lâi ho̍k-sāi Iâ-hô-hoa, Tio̍h ēng kiaⁿ-hiâⁿ lâi hoaⁿ-hí.

12Tio̍h用嘴chim聖Kiáⁿ，驚了伊受氣，lín就滅無tī路中。　　因為伊ê受氣beh緊緊發出。　　凡若óa靠伊ê，lóng是有福氣ê人。Tio̍h ēng chhùi chim Sèng Kiáⁿ, kiaⁿ-liáu I siū-khì, lín chiū bia̍t-bô tī lō͘-tiong. In-ūi I ê siū-khì beh kín-kín hoat-chhut. Hoān-nā óa-khò I--ê, lóng sī ū hok-khì ê lâng.