1大衛ê詩，交hō͘樂官，調用Bō͘-la̍h-piān。1) 我beh全心感謝耶和華；　　我beh報揚你一切奇妙ê所做。Tāi-pi̍t ê si, kau hō͘ Ga̍k-koaⁿ, tiāu, ēng Bō͘-la̍h-piān.1) Góa beh choân-sim kám-siā Iâ-hô-hoa; Góa beh pò-iông Lí it-chhè kî-biāu ê só͘-chòe.

2我beh在tī你歡喜快樂；　　至koânê ah，我beh o-ló你ê名。Góa beh chāi-tī Lí hoaⁿ-hí khoài-lo̍k; Chì-koâiⁿ--ê ah, góa beh o-ló Lí ê miâ.

3我ê對敵oa̍t-tńg身退去ê時，　　就tī你ê面前跋倒滅無。Góa ê tùi-te̍k oa̍t-tńg-sin thè--khì ê sî, Chiū tī Lí ê bīn-chêng poa̍h-tó bia̍t-bô.

4你已經替我伸冤，替我辯明；　　你坐tī寶座，照公義審判。Lí í-keng thòe góa sin-oan, thòe góa piān-bêng; Lí chē tī pó-chō, chiàu kong-gī sím-phòaⁿ.

5你有責備列邦，你有滅無pháiⁿ人，　　你有擦滅in ê名到永遠。Lí ū chek-pī lia̍t-pang, Lí ū bia̍t-bô pháiⁿ-lâng, Lí ū chhat-bia̍t in ê miâ kàu éng-oán.

6對敵到結局，受荒廢到永遠；　　你毀壞in ê城；連in ê記念亦無去。Tùi-te̍k kàu kiat-kio̍k, siū hong-hòe kàu éng-oán; Lí húi-hoāi in ê siâⁿ; Liân in ê kì-liām ia̍h bô--khì.

7獨獨耶和華坐位到永遠；　　伊已經ūi審判，安置伊ê寶座。To̍k-to̍k Iâ-hô-hoa chē-ūi kàu éng-oán; I í-keng ūi sím-phòaⁿ, an-tì I ê pó-chō.

8伊beh照公義審判世界，　　照正直判斷眾百姓。I beh chiàu kong-gī sím-phòaⁿ sè-kài, Chiàu chèng-ti̍t phòaⁿ-toàn chèng peh-sìⁿ.

9耶和華koh beh做受壓迫ê人ê高台，　　Tī患難ê時ê高台。Iâ-hô-hoa koh beh chòe siū ap-pek ê lâng ê koâiⁿ-tâi, Tī hoān-lān ê sî ê koâiⁿ-tâi.

10Bat你ê名ê人beh óa靠你；　　因為，耶和華，你bē-bat棄sak chhē你ê人。Bat Lí ê miâ ê lâng beh óa-khò Lí; In-ūi, Iâ-hô-hoa, Lí bē-bat khì-sak chhē Lí ê lâng.

11Tio̍h o-ló khiā起錫安ê耶和華，　　將伊所行ê報揚tī眾百姓ê中間。Tio̍h o-ló khiā-khí Sek-an ê Iâ-hô-hoa, Chiong I só͘ kiâⁿ--ê pò-iông tī chèng peh-sìⁿ ê tiong-kan.

12因為hit-ê查辦命案ê記得in；　　無bōe記得困苦人ê哀求。In-ūi hit ê cha-pān bēng-àn--ê kì-tit in; Bô bōe kì-tit khùn-khó͘ lâng ê ai-kiû.

13耶和華ah，求你憐憫我；　　你是tùi死門救我起來ê，　　Tio̍h鑑察hiah-ê怨恨我ê人所hō͘我tú-tio̍h ê苦難。Iâ-hô-hoa ah, kiû Lí lîn-bín góa; Lí sī tùi sí-mn̂g kiù góa khí--lâi--ê, Tio̍h kàm-chhat hiah ê oàn-hūn góa ê lâng só͘ hō͘ góa tú-tio̍h ê khó͘-lān.

14Thang hō͘我講起你一切ê好名聲；　　我beh tī錫安城ê門，　　為tio̍h你ê救恩來歡喜。Thang hō͘ góa kóng-khí Lí it-chhè ê hó miâ-siaⁿ; Góa beh tī Sek-an siâⁿ ê mn̂g, Ūi-tio̍h Lí ê kiù-un lâi hoaⁿ-hí.

15列邦陷落tī in所開ê陷坑；　　In ê腳纏tī in暗靜設ê羅網。Lia̍t-pang hām-lo̍h tī in só͘ khui ê hām-khiⁿ; In ê kha tîⁿ tī in àm-chīⁿ siat ê lô-bāng.

16耶和華已經顯明家己，伊已經行審判；　　Pháiⁿ人hō͘家己ê手所做ê纏tio̍h。[Hi-kai-un, Sè-la̍h]Iâ-hô-hoa í-keng hián-bêng ka-kī, I í-keng kiâⁿ sím-phòaⁿ; Pháiⁿ lâng hō͘ ka-kī ê chhiú só͘ chòe--ê tîⁿ--tio̍h. [Hi-kai-un. Sè-la̍h

17Pháiⁿ人beh歸tī陰府，　　Bōe記得上帝ê列邦亦beh án-ni。Pháiⁿ-lâng beh kui tī im-hú, Bōe kì--tit Siōng-tè ê lia̍t-pang ia̍h beh án-ni.

18因為sòng-hiong人的確無永遠hō͘上帝bōe記得，　　困苦ê人ê ǹg望，的確bōe永永無去。In-ūi sòng-hiong-lâng tek-khak bô éng-oán hō͘ Siōng-tè bōe kì-tit, Khùn-khó͘ ê lâng ê ǹg-bāng, tek-khak bōe éng-éng bô--khì.

19耶和華ah，求你起來，m̄-thang容允人khah贏；　　願列邦tī你ê面前受審判。Iâ-hô-hoa ah, kiû Lí khí--lâi, m̄-thang iông-ún lâng khah-iâⁿ; Goān lia̍t-pang tī Lí ê bīn-chêng siū sím-phòaⁿ.

20耶和華ah，求你hō͘ in驚惶；　　願列邦知家己不過是人nā-tiāⁿ。[Sè-la̍h]Iâ-hô-hoa ah, kiû Lí hō͘ in kiaⁿ-hiâⁿ; Goān lia̍t-pang chai ka-kī put-kò sī lâng nā-tiāⁿ. [Sè-la̍h

1耶和華ah，你啥事遠遠teh khiā？　　Tī患難ê時，你啥事tiàm密？Iâ-hô-hoa ah, Lí siáⁿ-sū hn̄g-hn̄g teh khiā? Tī hoān-lān ê sî, Lí siáⁿ-sū tiàm-ba̍t?

2Pháiⁿ人tī驕傲ê中間，追jip困苦ê人真緊急，　　願in陷落tī家己所設ê計謀。Pháiⁿ-lâng tī kiau-ngō͘ ê tiong-kan, tui-jip khùn-khó͘ ê lâng chin kín-kip, Goān in hām-lo̍h tī ka-kī só͘ siat ê kè-bô͘.

3Pháiⁿ人誇口伊ê心所ài，　　貪心ê棄sak耶和華，koh侮慢伊。Pháiⁿ-lâng khoa-kháu i ê sim só͘ ài, Tham--sim--ê khì-sak Iâ-hô-hoa, koh bú-bān I.

4Pháiⁿ人面tài驕傲，講，伊無beh究勘；　　伊所想ê lóng掠做無上帝。Pháiⁿ-lâng bīn tài kiau-ngō͘, kóng, I bô-beh kiù-khàm; I só͘ siūⁿ--ê lóng lia̍h-chòe bô Siōng-tè.

5見若伊所行ê常常穩當；　　你ê審判pôaⁿ過伊ê gán-kài；　　論到伊一切ê對敵，伊lóng藐視in。Kìⁿ-nā i só͘ kiâⁿ--ê siông-siông ún-tàng; Lí ê sím-phòaⁿ pôaⁿ-kè i ê gán-kài; Lūn-kàu i it-chhè ê tùi-te̍k, i lóng biáu-sī in.

6伊心內講，我的確bōe搖choah，代代bōe tú-tio̍h災難。I sim-lāi kóng, Góa tek-khak bōe iô-choah, Tāi-tāi bōe tú-tio̍h chai-lān.

7伊ê嘴滿滿咒罵，奸詐，欺壓；　　伊ê舌下惡毒，虛假。I ê chhùi móa-móa chiù-mē, kan-chà, khi-ap; I ê chi̍h-ē ok-to̍k, hu-ké.

8伊tī鄉村埋伏ê所在坐teh；　　伊tī隱密ê所在害死無罪ê人，　　伊ê目睭暗靜直直siòng無依óa ê人。I tī hiuⁿ-chhng bâi-ho̍k ê só͘-chāi chē-teh; I tī ún-ba̍t ê só͘-chāi hāi-sí bô chōe ê lâng, I ê ba̍k-chiu àm-chīⁿ ti̍t-ti̍t siòng bô i-óa ê lâng.

9伊埋伏tī暗靜ê所在，親像獅bih tī伊ê穴；　　伊埋伏beh掠sòng-hiong人；　　用網圍sòng-hiong人，來掠tio̍h伊。I bâi-ho̍k tī àm-chīⁿ ê só͘-chāi, chhin-chhiūⁿ sai bih tī i ê hia̍t; I bâi-ho̍k beh lia̍h sòng-hiong lâng; Ēng bāng ûi sòng-hiong lâng, lâi lia̍h--tio̍h i.

10伊屈身仆teh，　　無依óa ê人就倒tī伊jiáu-gê-ê下面。I khut-sin phak--teh, Bô i-óa ê lâng chiū tó tī i jiáu-gê--ê ē-bīn.

11伊心內講，上帝bōe記得；　　掩伊ê面；永遠無看見。I sim-lāi kóng, Siōng-tè bōe-kì-tit; Ng I ê bīn; éng-oán bô khòaⁿ-kìⁿ.

12耶和華ah，求你起來；上帝ah，kia̍h起你ê手；　　M̄-thang bōe記得sòng-hiong人。Iâ-hô-hoa ah, kiû Lí khí--lâi; Siōng-tè ah, kia̍h-khí Lí ê chhiú; M̄-thang bōe kì-tit sòng-hiong-lâng.

13Pháiⁿ人啥事藐視上帝，　　心內講，你無beh根究？Pháiⁿ-lâng siáⁿ-sū biáu-sī Siōng-tè, Sim-lāi kóng, Lí bô beh kun-kiù?

14你已經看見；　　因為惡毒怨妒，你lóng鑑察，　　Beh用你ê手報應；　　無依óa ê人，將本身交代你；　　你是幫贊無父ê kiáⁿ-ê。Lí í-keng khòaⁿ-kìⁿ; in-ūi ok-to̍k oàn-tò͘, Lí lóng kàm-chhat, beh ēng Lí ê chhiú pò-èng; Bô i-óa ê lâng, chiong pún-sin kau-tài Lí; Lí sī pang-chān bô pē ê kiáⁿ--ê.

15願你phah折pháiⁿ人ê手骨；　　論到惡人，願你根究伊ê pháiⁿ到徹底。Goān Lí phah-chi̍h pháiⁿ-lâng ê chhiú-kut; Lūn-kàu ok-lâng, goān Lí kun-kiù i ê pháiⁿ kàu thiat-tí.

16耶和華做王，tùi永遠到永遠；　　列邦人tùi伊ê地lóng滅無。Iâ-hô-hoa chòe ông, tùi éng-oán kàu éng-oán; Lia̍t-pang-lâng tùi I ê tōe lóng bia̍t-bô.

17耶和華ah，謙卑ê人ê心願，你已經聽見；　　你beh備辦in ê心，你beh àⁿ耳孔來聽。Iâ-hô-hoa ah, khiam-pi ê lâng ê sim-goān, Lí í-keng thiaⁿ-kìⁿ; Lí beh pī-pān in ê sim, Lí beh àⁿ hī-khang lâi thiaⁿ.

18Beh替無父ê kiáⁿ，以及受壓迫ê人，伸冤。　　Hō͘世間人無koh háng-hoah人。Beh thòe bô pē ê kiáⁿ, í-ki̍p siū ap-pek ê lâng, sin-oan. Hō͘ sè-kan-lâng bô koh háng-hoah lâng.

1大衛ê詩，交hō͘樂官。1) 我是óa靠耶和華；　　Lín啥事tùi我ê神魂講，　　你tio̍h親像鳥，飛去lín ê山。Tāi-pi̍t ê si, kau hō͘ Ga̍k-koaⁿ.1) Góa sī óa-khò Iâ-hô-hoa; Lín siáⁿ-sū tùi góa ê sîn-hûn kóng, Lí tio̍h chhin-chhiūⁿ chiáu, pe--khì lín ê soaⁿ.

2看ah，pháiⁿ人張弓，　　安in ê箭tī弓絃，　　Beh暗靜射心內正直ê人。Khòaⁿ ah, pháiⁿ-lâng tiuⁿ keng, An in ê chìⁿ tī keng-hiân, Beh àm-chīⁿ siā sim-lāi chèng-ti̍t ê lâng.

3地基若倒壞，　　義人iáu會做甚麼？Tōe-ki nā tó-hoāi, Gī-lâng iáu ōe chòe sím-mi̍h?

4耶和華tī伊ê聖殿，　　耶和華ê寶座tī天裡；　　伊ê目睭teh看，伊ê目睭鑑察世間人。Iâ-hô-hoa tī I ê sèng-tiān, Iâ-hô-hoa ê pó-chō tī thiⁿ--nih; I ê ba̍k-chiu teh khòaⁿ, I ê ba̍k-chiu kàm-chhat sè-kan-lâng.

5耶和華試驗義人，　　獨獨pháiⁿ人kap ài強暴ê，伊ê心怨恨伊。Iâ-hô-hoa chhì-giām gī-lâng, to̍k-to̍k pháiⁿ-lâng kap ài kiông-pō--ê, I ê sim oàn-hūn i.

6伊beh將羅網拋tī pháiⁿ人ê身上；　　有火燄、琉磺，kap熱熱ê風，做in杯中ê份額。I beh chiong lô-bāng pha tī pháiⁿ-lâng ê sin-chiūⁿ; Ū hé-iām, jiû-n̂g, kap jia̍t-jia̍t ê hong, chòe in poe-tiong ê hūn-gia̍h.

7因為耶和華是公義；伊歡喜公義。　　正直ê人beh見tio̍h伊ê面。In-ūi Iâ-hô-hoa sī kong-gī; I hoaⁿ-hí kong-gī, Chèng-ti̍t ê lâng beh kìⁿ-tio̍h I ê bīn.