1困苦ê人，極軟弱ê時，tī耶和華ê面前吐出苦情ê祈禱。1) 耶和華ah，求你聽我ê祈禱，　　Hō͘我求叫ê聲透到你ê面前。Khùn-khó͘ ê lâng, ke̍k loán-jio̍k ê sî, tī Iâ-hô-hoa ê bīn-chêng thò͘-chhut khó͘-chêng ê kî-tó.1) Iâ-hô-hoa ah, kiû Lí thiaⁿ góa ê kî-tó, Hō͘ góa kiû-kiò ê siaⁿ thàu kàu Lí ê bīn-chêng.

2我tī危急ê日，m̄-thang掩你ê面m̄看我；　　求你àⁿ耳孔聽我；我求叫ê日，求你緊緊應我。Góa tī gûi-kip ê ji̍t, m̄-thang ng Lí ê bīn m̄-khòaⁿ góa; kiû Lí àⁿ hī-khang thiaⁿ góa; Góa kiû-kiò ê ji̍t, kiû Lí kín-kín ìn--góa.

3因為我ê日子親像火薰消散，　　我ê骨受燒，親像火中ê柴。In-ūi góa ê ji̍t-chí chhin-chhiūⁿ hé-hun siau-sòaⁿ, Góa ê kut siū sio, chhin-chhiūⁿ hé-tiong ê chhâ.

4我ê心受傷，枯焦親像草；　　我lóng bōe顧得食。Góa ê sim siū-siong, ko͘-tâ chhin-chhiūⁿ chháu; Góa lóng bōe kò͘--tit chia̍h.

5因為我吐氣ê聲，　　我ê肉khi̍h tī骨裡。In-ūi góa thó͘-khùi ê siaⁿ, Góa ê bah khi̍h tī kut--nih.

6我親像曠野ê 鵜鶘鳥，　　亦親像拋荒ê所在ê暗光鳥。Góa chhin-chhiūⁿ khòng-iá ê thê-ô͘-chiáu, Ia̍h chhin-chhiūⁿ pha-hng ê só͘-chāi ê àm-kong-chiáu.

7我kui暝無睏；　　亦親像厝頂孤單ê雀鳥á。Góa kui-mî bô khùn; Ia̍h chhin-chhiūⁿ chhù-téng ko͘-toaⁿ ê chhek-chiáu-á.

8我ê對敵thong日褻瀆我；　　痛恨我ê人kí我來咒詛。Góa ê tùi-te̍k thong-ji̍t siat-to̍k góa; Thòng-hūn góa ê lâng kí góa lâi chiù-chó͘.

9我用火灰準飯食；　　所lim-ê有chham目屎。Góa ēng hé-hu chún pn̄g chia̍h; Só͘ lim--ê ū chham ba̍k-sái.

10這是因為你ê發性大受氣；　　因為你將我舉起，koh將我hiat落。Che sī in-ūi Lí ê hoat-sèng tōa siū-khì; In-ūi Lí chiong góa kú-khí, koh chiong góa hiat-lo̍h.

11我ê日子親像日影已經chhiâ，　　我亦親像草枯焦。Góa ê ji̍t-chí chhin-chhiūⁿ ji̍t-iáⁿ í-keng chhiâ, Góa ia̍h chhin-chhiūⁿ chháu ko͘-tâ.

12獨獨你耶和華永遠tī-teh；　　你hō͘人記念到萬代。To̍k-to̍k Lí Iâ-hô-hoa éng-oán tī-teh; Lí hō͘ lâng kì-liām kàu bān-tāi.

13你beh起來憐憫錫安，　　因為現在是可憐伊ê時；定tio̍h ê期已經到lah。Lí beh khí--lâi lîn-bín Sek-an, In-ūi hiān-chāi sī khó-lîn i ê sî; tiāⁿ-tio̍h ê kî í-keng kàu lah.

14你ê奴僕歡喜錫安ê石頭，　　可憐伊ê土粉。Lí ê lô͘-po̍k hoaⁿ-hí Sek-an ê chio̍h-thâu, Khó-lîn i ê thô͘-hún.

15列國就beh敬畏耶和華ê名；　　世上chiah-ê王lóng beh敬畏你ê榮光。Lia̍t-kok chiū beh kèng-ùi Iâ-hô-hoa ê miâ; Sè-chiūⁿ chiah ê ông lóng beh kèng-ùi Lí ê êng-kng.

16因為耶和華起造錫安，　　Tī伊榮光中顯現。In-ūi Iâ-hô-hoa khí-chō Sek-an, Tī I êng-kng-tiong hián-hiān.

17伊àⁿ落聽sòng-hiong人ê祈禱，　　無看輕in ê祈禱。I àⁿ-lo̍h thiaⁿ sòng-hiong lâng ê kî-tó, Bô khòaⁿ-khin in ê kî-tó.

18這beh為後代ê人記載，　　將來受造ê百姓beh o-ló耶和華。Che beh ūi āu-tāi ê lâng kì-chài, Chiong-lâi siū-chō ê peh-sìⁿ beh o-ló Iâ-hô-hoa.

19因為伊對伊至koânê聖所看落來，　　耶和華tùi天看落地；In-ūi I tùi I chì-koâiⁿ ê sèng-só͘ khòaⁿ--lo̍h-lâi, Iâ-hô-hoa tùi thiⁿ khòaⁿ lo̍h tōe;

20Beh聽囚犯ê吐氣；　　Beh tháu放擬定tio̍h死ê人。Beh thiaⁿ siû-hoān ê thó͘-khùi; Beh tháu-pàng gí tiāⁿ-tio̍h sí ê lâng.

21Hō͘人tī錫安傳播耶和華ê名；　　Tī耶路撒冷傳播 o-ló伊ê話。Hō͘ lâng tī Sek-an thoân-pò͘ Iâ-hô-hoa ê miâ; Tī Iâ-lō͘-sat-léng thoân-pò͘ o-ló I ê ōe.

22就是萬百姓kap列國，　　聚集服事耶和華ê時。Chiū-sī bān peh-sìⁿ kap lia̍t-kok, chū-chi̍p ho̍k-sāi Iâ-hô-hoa ê sî.

23伊hō͘我ê氣力半路衰lám；　　Hō͘我ê日子短少。I hō͘ góa ê khùi-la̍t pòaⁿ-lō͘ soe-lám; Hō͘ góa ê ji̍t-chí té-chió.

24我講，我ê上帝ah，m̄-thang tī我中年討我ê性命；　　你ê年歲萬世代bû-窮盡。Góa kóng, Góa ê Siōng-tè ah, m̄-thang tī góa tiong-liân thó góa ê sìⁿ-miā; Lí ê nî-hè bān sè-tāi bû-kiông-chīn.

25你起頭hē地ê地基；　　天亦是你ê手所造ê。Lí khí-thâu hē tōe ê tōe-ki; Thiⁿ ia̍h sī Lí ê chhiú só͘ chō--ê.

26In beh滅無，獨獨你久長tī-teh；　　In beh親像衫漸漸舊；　　你beh將in改換，親像改換相；in就變-換。In beh bia̍t-bô, to̍k-to̍k Lí kú-tn̂g tī-teh; In beh chhin-chhiūⁿ saⁿ chiām-chiām kū; Lí beh chiong in kóe-ōaⁿ, chhin-chhiūⁿ kóe-ōaⁿ saⁿ; in chiū piàn-ōaⁿ.

27獨獨你無變換，　　你ê歲壽無窮盡。To̍k-to̍k Lí bô piàn-ōaⁿ, Lí ê hè-siū bô kiông-chīn.

28你ê奴僕ê kiáⁿ孫beh長長tī-teh；　　In ê後裔beh khiā在tī你ê面前。Lí ê lô͘-po̍k ê kiáⁿ-sun beh tn̂g-tn̂g tī-teh; In ê hō͘-è beh khiā-chāi tī Lí ê bīn-chêng.

1大衛ê詩。1) 我ê心神ah，你tio̍h o-ló耶和華；　　凡若tī我內面ê，亦tio̍h o-ló伊ê聖名。Tāi-pi̍t ê si.1) Góa ê sim-sîn ah, lí tio̍h o-ló Iâ-hô-hoa; Hoān-nā tī góa lāi-bīn--ê, ia̍h tio̍h o-ló I ê sèng-miâ.

2我ê心神ah，你tio̍h o-ló耶和華；　　M̄-thang bōe記得伊一切ê恩惠；Góa ê sim-sîn ah, lí tio̍h o-ló Iâ-hô-hoa; M̄-thang bōe-kì-tit I it-chhè ê un-hūi;

3伊赦免你lóng總ê罪；　　醫好你lóng總ê病；I sià-bián lí lóng-chóng ê chōe; I-hó lí lóng-chóng ê pīⁿ;

4伊救贖你ê性命脫離死無；　　用仁愛kap慈悲做你ê冕旒；I kiù-sio̍k lí ê sìⁿ-miā thoat-lī sí-bô; Ēng jîn-ài kap chû-pi chòe lí ê bián-liû;

5用好物足你ê心願；　　Hō͘你復到少年親像鷹鳥。Ēng hó-mi̍h chiok lí ê sim-goān; Hō͘ lí ho̍k-tò siàu-liân chhin-chhiūⁿ eng-chiáu.

6耶和華行公義，　　為tio̍h一切受冤屈ê人伸冤。Iâ-hô-hoa kiâⁿ kong-gī, Ūi-tio̍h it-chhè siū un-khut ê lâng sin-oan.

7用伊ê道路指示摩西，　　用伊ê行做指示以色列人。Ēng I ê tō-lō͘ chí-sī Mô͘-se, Ēng I ê kiâⁿ-chòe chí-sī Í-sek-lia̍t lâng.

8耶和華有憐憫，有恩典；　　無快快受氣，koh有豐盛ê慈愛。Iâ-hô-hoa ū lîn-bín, ū un-tián; Bô khoài-khoài siū-khì, koh ū hong-sēng ê chû-ài.

9伊無長長責備，　　亦無永遠khǹg受氣。I bô tn̂g-tn̂g chek-pī, Ia̍h bô éng-oán khǹg siū-khì.

10伊無照咱ê罪過款待咱，　　亦無照咱ê罪惡報應咱。I bô chiàu lán ê chōe-kòa khoán-thāi lán, Ia̍h bô chiàu lán ê chōe-ok pò-èng lán.

11因為天離開地hiah-nih高，　　伊ê慈愛對敬畏伊ê人亦是hiah-nih大。In-ūi thiⁿ lī-khui tōe hiah--nih koâiⁿ, I ê chû-ài tùi kèng-ùi I ê lâng ia̍h sī hiah--nih tōa.

12東離開西有jōa遠，　　伊hō͘咱ê罪過離開咱亦是hiah遠。Tang lī-khui sai ū jōa-hn̄g, I hō͘ lán ê chōe-kòa lī-khui lán ia̍h sī hiah hn̄g.

13老父怎樣憐憫伊ê kiáⁿ兒，　　耶和華憐憫敬畏伊ê人亦是án-ni。Lāu-pē cháiⁿ-iūⁿ lîn-bín i ê kiáⁿ-jî, Iâ-hô-hoa lîn-bín kèng-ùi I ê lâng ia̍h sī án-ni.

14因為伊知咱ê體質，　　Siàu念咱是土粉。In-ūi I chai lán ê thé-chit, Siàu-liām lán sī thô͘-hún.

15論到人，伊ê日子親像草，　　伊ê興旺親像山裡ê花。Lūn-kàu lâng, i ê ji̍t-chí chhin-chhiūⁿ chháu, I ê heng-ōng chhin-chhiūⁿ soaⁿ--nih ê hoe.

16經過風一下吹，就無去；　　伊ê原位bōe koh認得。Keng-kè hong chi̍t-ē chhe, chiū bô--khì; I ê goân-ūi bōe koh jīn--tit.

17總是耶和華ê慈愛歸tī敬畏伊ê人，tùi永遠到永遠；　　伊ê公義也歸tī kiáⁿ-kiáⁿ孫孫；Chóng-sī Iâ-hô-hoa ê chû-ài kui tī kèng-ùi I ê lâng, tùi éng-oán kàu éng-oán; I ê kong-gī iā kui tī kiáⁿ-kiáⁿ sun-sun;

18就是hiah-ê遵守伊ê約，　　記念伊ê教示來遵thàn ê人。Chiū-sī hiah ê chun-siú I ê iok, Kì-liām I ê kà-sī lâi chun-thàn ê lâng.

19耶和華tī天頂設立伊ê寶座，　　伊ê國權管轄萬項有。Iâ-hô-hoa tī thiⁿ-téng siat-li̍p I ê pó-chō, I ê kok-koân koán-hat bān-hāng-ū.

20Lín chiah-ê有大權能ê天使ah，　　聽伊ê聲，成伊ê命令ê，　　Lóng tio̍h o-ló耶和華。Lín chiah ê ū tōa koân-lêng ê thiⁿ-sài ah, Thiaⁿ I ê siaⁿ, chiâⁿ I ê bēng-lēng ê, Lóng tio̍h o-ló Iâ-hô-hoa.

21Lín chiah-ê做伊ê眾軍兵，做伊ê差使，行伊所歡喜ê，　　Lóng tio̍h o-ló耶和華。Lín chiah ê chòe I ê chèng kun-peng, chòe I ê chhe-sài, kiâⁿ I só͘ hoaⁿ-hí--ê, Lóng tio̍h o-ló Iâ-hô-hoa.

22Lín一切受伊創造ê，tī伊所管理ê ta̍k位，　　Lóng tio̍h o-ló耶和華。　　我ê心神ah，你tio̍h o-ló耶和華。Lín it-chhè siū I chhòng-chō--ê, tī I só͘ koán-lí ê ta̍k-ūi, Lóng tio̍h o-ló Iâ-hô-hoa. Góa ê sim-sîn ah, lí tio̍h o-ló Iâ-hô-hoa.

1我ê心神ah，你tio̍h o-ló耶和華。　　耶和華我ê上帝ah，你是至大；　　你用尊榮威嚴做衫來穿。Góa ê sim-sîn ah, lí tio̍h o-ló Iâ-hô-hoa. Iâ-hô-hoa góa ê Siōng-tè ah, Lí sī chì-tōa; Lí ēng chun-êng ui-giâm chòe-saⁿ lâi chhēng.

2你穿光明親像外衫；　　thí開天親像帳幅。Lí chhēng kng-bêng chhin-chhiūⁿ gōa-saⁿ; Thí-khui thiⁿ chhin-chhiūⁿ tiùⁿ-pak.

3伊tī水中安置伊樓閣ê通楹，　　用雲做伊ê車，　　用風ê翼來行；I tī chúi-tiong an-tì I lâu-koh ê thong-îⁿ, Ēng hûn chòe I ê chhia, Ēng hong ê si̍t lâi kiâⁿ;

4用風做伊ê使者，　　用焰火做伊ê差用；Ēng hong chòe I ê sù-chiá, Ēng iām-hé chòe I ê chhe-ēng;

5將地hē tī伊ê地基頂，　　Hō͘伊永永無搖choah。Chiong tōe hē tī i ê tōe-ki téng, Hō͘ i éng-éng bô iô-choah.

6你用深淵親像衣裳遮蓋地面；　　Chiah-ê水淹過山嶺。Lí ēng chhim-ian chhin-chhiūⁿ i-chiûⁿ jia-khàm tōe-bīn; Chiah ê chúi im-kè soaⁿ-niá.

7你一下hoah，水就緊緊走；　　你ê雷一下tân，水就緊緊流；Lí chi̍t-ē hoah, chúi chiū kín-kín cháu; Lí ê lûi chi̍t-ē tân, chúi chiū kín-kín lâu;

8Chhèng到山頭，落到山谷，　　歸tī你kā in定tio̍h ê所在。Chhèng kàu soaⁿ-thâu, lo̍h kàu soaⁿ-kok, Kui tī Lí kā in tiāⁿ-tio̍h ê só͘-chāi.

9你定tio̍h界限hō͘水bōe能pôaⁿ過，　　無koh 倒tńg來遮蓋地面。Lí tiāⁿ-tio̍h kài-hān hō͘ chúi bōe-ōe pôaⁿ-kè, Bô koh tò-tńg-lâi jia-khàm tōe-bīn.

10Hō͘水泉chhèng出tī山谷，　　流tī山中；Hō͘ chúi-chôaⁿ chhèng-chhut tī soaⁿ-kok, Lâu tī soaⁿ-tiong;

11Hō͘山裡ê走獸lóng有thang lim，　　野驢得tio̍h 止嘴乾。Hō͘ soaⁿ--nih ê cháu-siù lóng ū thang lim, Iá-lû tit-tio̍h chí chhùi-ta.

12天中ê飛鳥歇tī水邊，　　哮tī樹枝téng。Thiⁿ-tiong ê pe-chiáu hioh tī chúi-piⁿ, Háu tī chhiū-ki téng.

13伊tùi伊ê樓閣中灌ak山嶺，　　Tùi你所做ê效果地就充足。I tùi I ê lâu-koh-tiong koàn-ak soaⁿ-niá, Tùi Lí só͘ chòe ê hāu-kó tōe chiū chhiong-chiok.

14伊hō͘草發生，hō͘ cheng-siⁿ thang食，　　也有菜蔬做人ê路用，hō͘食物tùi地裡出。I hō͘ chháu hoat-siⁿ, hō͘ cheng-siⁿ thang chia̍h, Iā ū chhài-soe chòe lâng ê lō͘-ēng, Hō͘ chia̍h-mi̍h tùi tōe--nih chhut.

15Koh有酒hō͘人ê心歡喜，　　有油潤澤人ê面，　　有食物補養人ê心力。Koh ū chiú hō͘ lâng ê sim hoaⁿ-hí, Ū iû lūn-te̍k lâng ê bīn, Ū chia̍h-mi̍h pó͘-ióng lâng ê sim-la̍t.

16耶和華ê樹lóng得tio̍h充足ê潤澤；　　就是伊所知黎巴嫩ê柏香樹。Iâ-hô-hoa ê chhiū lóng tit-tio̍h chhiong-chiok ê lūn-te̍k; Chiū-sī I só͘ chai Lī-pa-lùn ê pek-hiuⁿ-chhiū.

17飛鳥作siū tī hit內面；　　鶴khiā起tī松樹ê中間。Pe-chiáu choh-siū tī hit lāi-bīn; Ho̍h khiā-khí tī siông-chhiū ê tiong-kan.

18高山是hō͘野山羊tiàm，　　石磐是沙番閃bih ê所在。Koâiⁿ-soaⁿ sī hō͘ iá-soaⁿ-iûⁿ tiàm, Chio̍h-pôaⁿ sī sa-hoan siám-bih ê só͘-chāi.

19伊用月來定tio̍h時節；　　日頭也知thang落。I ēng ge̍h lâi tiāⁿ-tio̍h sî-choeh; Ji̍t-thâu iā chai thang lo̍h.

20你hō͘伊暗，就做暝時；　　Hit時樹林內ê百獸就lóng爬出來。Lí hō͘ i àm, chiū chòe mî--sî; Hit-sî chhiū-nâ-lāi ê pah-siù chiū lóng pê--chhut-lâi.

21獅á-thûn哮，beh jiàu物食，　　Tùi上帝討in ê食物。Sai-á-thûn háu, beh jiàu mi̍h-chia̍h, Tùi Siōng-tè thó in ê chia̍h-mi̍h.

22日頭一下出，in就走去bih，　　倒tī in ê洞內。Ji̍t-thâu chi̍t-ē chhut, in chiū cháu--khì bih, Tó tī in ê tōng-lāi.

23人出去做工，　　Tio̍h磨到ê-hng時。Lâng chhut-khì chòe-kang, Tio̍h-bôa kàu ê-hng-sî.

24耶和華ah，你所造ê怎樣hiah chōe！　　lóng是你用智慧造成ê；　　遍地滿滿你ê富有。Iâ-hô-hoa ah, Lí só͘ chō--ê cháiⁿ-iūⁿ hiah chōe! Lóng sī Lí ēng tì-hūi chō-chiâⁿ--ê; Piàn-tōe móa-móa Lí ê pù-ū.

25Hia有海，大koh闊，　　其中有算bōe了ê動物，　　大細ê活物lóng有。Hia ū hái, tōa koh khoah, Kî-tiong ū sǹg-bōe-liáu ê tōng-bu̍t, Tōa-sòe ê oa̍h-mi̍h lóng ū.

26Tī-hia有船teh行；　　有你所創造ê大魚游來游去。Tī-hia ū chûn teh kiâⁿ; Ū Lí só͘ chhòng-chō ê tōa-hî iû-lâi iû-khì.

27Chiah-ê lóng teh thèng候你，　　Thang照時hō͘ in食物。Chiah-ê lóng teh thèng-hāu Lí, Thang chiàu-sî hō͘ in chia̍h-mi̍h.

28你hō͘ in，in就拾起來；　　你thí開你ê手，in得tio̍h好物到飽。Lí hō͘ in, in chiū khioh--khí-lâi; Lí thí-khui Lí ê chhiú, in tit-tio̍h hó-mi̍h kàu-pá.

29你掩你ê面，in就掛慮；　　你將in ê氣收回，in就死無，來歸tī土粉。Lí ng Lí ê bīn, in chiū khòa-lū; Lí chiong in ê khùi siu-hôe, in chiū sí-bô, Lâi kui tī thô͘-hún.

30你發出你ê神，in就受創造；　　你hō͘地面換做新。Lí hoat-chhut Lí ê sîn, in chiū siū chhòng-chō; Lí hō͘ tōe-bīn ōaⁿ chòe sin.

31願耶和華ê榮光永遠tī-teh；　　願耶和華為tio̍h伊所造ê來歡喜。Goān Iâ-hô-hoa ê êng-kng éng-oán tī-teh; Goān Iâ-hô-hoa ūi-tio̍h I só͘-chō--ê lâi hoaⁿ-hí.

32伊看地，地就振動；　　伊摸山，山就出煙。I khòaⁿ tōe, tōe chiū tín-tāng; I bong soaⁿ, soaⁿ chiū chhut-ian.

33我beh一世人ǹg耶和華吟詩；　　我iáu活ê時beh ǹg我ê上帝唱歌o-ló。Góa beh chi̍t-sì-lâng ǹg Iâ-hô-hoa gîm-si; Góa iáu oa̍h ê sî beh ǹg góa ê Siōng-tè chhiùⁿ-koa o-ló.

34願伊掠我ê靜靜想做合意；　　我beh因為耶和華歡喜。Goān I lia̍h góa ê chēng-chēng-siūⁿ chòe ha̍h-ì; Góa beh in-ūi Iâ-hô-hoa hoaⁿ-hí.

35願罪人tùi世上消滅，　　願pháiⁿ人lóng無去；　　我ê心神ah，tio̍h o-ló耶和華；　　Lín tio̍h o-ló耶和華。Goān chōe-jîn tùi sè-chiūⁿ siau-bia̍t, Goān pháiⁿ-lâng lóng bô--khì; Góa ê sim-sîn ah, tio̍h o-ló Iâ-hô-hoa; Lín tio̍h o-ló Iâ-hô-hoa.