1Lín tio̍h感謝耶和華，求叫伊ê名；　　Tī萬百姓ê中間報揚伊ê所做。Lín tio̍h kám-siā Iâ-hô-hoa, kiû-kiò I ê miâ; Tī bān peh-sìⁿ ê tiong-kan pò-iông I ê só͘-chòe.

2Tio̍h ǹg伊吟詩，ǹg伊唱歌o-ló，　　談論伊一切奇妙ê所行。Tio̍h ǹg I gîm-si, ǹg I chhiùⁿ-koa o-ló, Tâm-lūn I it-chhè kî-biāu ê só͘-kiâⁿ.

3Tio̍h因為伊ê聖名來誇口；　　Chhē耶和華ê人，心內tio̍h歡喜。Tio̍h in-ūi I ê sèng-miâ lâi khoa-kháu; Chhē Iâ-hô-hoa ê lâng, sim-lāi tio̍h hoaⁿ-hí.

4Tio̍h求耶和華kap伊ê權能；　　常常chhē見伊ê面。Tio̍h kiû Iâ-hô-hoa kap I ê koân-lêng; Siông-siông chhē-kìⁿ I ê bīn.

5伊ê奴僕亞伯拉罕ê後裔，　　伊所揀雅各ê kiáⁿ孫ah，　　Lín tio̍h siàu念伊所做奇妙ê事，　　Kap伊ê神跡，kap伊ê嘴判斷ê話。I ê lô͘-po̍k A-pek-la̍h-hán ê hō͘-è, I só͘ kéng Ngá-kok ê kiáⁿ-sun ah, Lín tio̍h siàu-liām I só͘-chòe kî-biāu ê sū, Kap I ê sîn-jiah, kap I ê chhùi phòaⁿ-toàn ê ōe.

7伊是耶和華，咱ê上帝；　　全地lóng有伊ê判斷。I sī Iâ-hô-hoa, lán ê Siōng-tè; Choân-tōe lóng ū I ê phòaⁿ-toàn.

8伊記念伊ê約，直到永遠；　　伊所吩咐ê話，直到千代；I kì-liām I ê iok, ti̍t-kàu éng-oán; I só͘ hoan-hù ê ōe, ti̍t-kàu chheng-tāi;

9就是kap亞伯拉罕所立ê約，　　對以撒所chiù ê chōa。Chiū-sī kap A-pek-la̍h-hán só͘ li̍p ê iok, Tùi Í-sat só͘ chiù ê chōa.

10伊koh將chit-ê約對雅各定tio̍h做律例；　　對以色列定tio̍h做永遠ê約。I koh chiong chit ê iok tùi Ngá-kok tiāⁿ-tio̍h chòe lu̍t-lē; Tùi Í-sek-lia̍t tiāⁿ-tio̍h chòe éng-oán ê iok.

11講，我beh將迦南地賞賜你，　　做你產業ê份額。Kóng, Góa beh chiong Ka-lâm tōe siúⁿ-sù lí, Chòe lí sán-gia̍p ê hūn-gia̍h.

12當時in ê人丁有限；　　數額少少，koh tī-hia做出外。Tng-sî in ê jîn-teng iú-hān; Siàu-gia̍h chió-chió, koh tī-hia chòe chhut-gōa.

13In tùi chit族行到hit族，　　Tùi chit國到別ê百姓。In tùi chit-cho̍k kiâⁿ kàu hit-cho̍k, Tùi chit-kok kàu pa̍t ê peh-sìⁿ.

14伊無容允甚麼人欺負in，　　為tio̍h in ê緣故譴責chiah-ê君王；I bô iông-ún sím-mi̍h lâng khi-hū in, Ūi-tio̍h in ê iân-kò͘ khiàn-chek chiah ê kun-ông;

15講，M̄-thang犯tio̍h我ê受抹油ê，　　亦m̄-thang pháiⁿ款待我ê先知。Kóng, M̄-thang hoān-tio̍h Góa ê siū boah-iû--ê, Ia̍h m̄-thang pháiⁿ khoán-thāi Góa ê sian-ti.

16伊命令飢荒降落tī hit-ê土地；　　將所óa靠ê米糧，一概斷絕。I bēng-lēng ki-hng kàng-lo̍h tī hit ê thó͘-tōe; Chiong só͘ óa-khò ê bí-niû, it-khài toān-choa̍t.

17伊tī in ê頭前差一人去；　　約瑟受bōe做奴僕；I tī in ê thâu-chêng chhe chi̍t-lâng khì; Iok-sek siū-bōe chòe lô͘-po̍k;

18人用腳銬傷伊ê腳，　　伊受鐵鏈綑縛；Lâng ēng kha-khàu siong i ê kha, I siū thih-liān khún-pa̍k;

19耶和華ê話試煉伊，　　直到伊所講ê應驗。Iâ-hô-hoa ê ōe chhì-liān i, Ti̍t-kàu I só͘ kóng--ê èng-giām.

20王差人kā伊tháu開，　　就是治理百姓ê，kā伊tháu放；Ông chhe lâng kā i tháu-khui, Chiū-sī tī-lí peh-sìⁿ--ê, kā i tháu-pàng;

21設立伊做王-ka ê主，　　管理伊一切所有ê，Siat-li̍p i chòe ông-ka ê chú, Koán-lí i it-chhè só͘-ū--ê,

22Thang隨意縛伊ê人臣，　　將智慧教示伊ê長老。Thang sûi-ì pa̍k i ê jîn-sîn, Chiong tì-hūi kà-sī i ê tióng-ló.

23以色列亦到埃及，　　雅各出外tī含ê地。Í-sek-lia̍t ia̍h kàu Ai-ki̍p, Ngá-kok chhut-gōa tī Hâm ê tōe.

24耶和華hō͘伊ê百姓生湠chōe-chōe；　　Hō͘ in比對敵khah強。Iâ-hô-hoa hō͘ i ê peh-sìⁿ siⁿ-thòaⁿ chōe-chōe; Hō͘ in pí tùi-te̍k khah-kiông.

25伊變換對敵ê心，怨恨伊ê百姓，　　續用詭譎ê計謀款待伊ê奴僕。I piàn-ōaⁿ tùi-te̍k ê sim, oàn-hūn I ê peh-sìⁿ, Sòa ēng khúi-khiat ê kè-bô͘ khoán-thāi I ê lô͘-po̍k.

26伊差伊ê奴僕摩西，　　Kap伊所揀ê亞倫。I chhe I ê lô͘-po̍k Mô͘-se, Kap I só͘ kéng ê A-lûn.

27In tī對敵ê中間行伊ê神跡，　　Tī含ê地行奇事。In tī tùi-te̍k ê tiong-kan kiâⁿ I ê sîn-jiah, Tī Hâm ê tōe kiâⁿ kî-sū.

28伊命令烏暗，就有烏暗；　　In無違逆伊ê話。I bēng-lēng o͘-àm, chiū ū o͘-àm; In bô ûi-ke̍h I ê ōe.

29伊hō͘ in ê水piàn血，　　Hō͘ in ê魚lóng死。I hō͘ in ê chúi piàn huih, Hō͘ in ê hî lóng sí.

30Tī in ê土地田蛙á生chōe-chōe，　　連in ê王ê密房亦有。Tī in ê thó͘-tōe chhân-kap-á siⁿ chōe-chōe, Liân in ê ông ê ba̍t-pâng ia̍h ū.

31伊一下出聲，胡蠅kui陣飛來，　　Koh有蝨母tī in ê境內滿四界。I chi̍t-ē chhut-siaⁿ, hô͘-sîn kui-tīn pe--lâi, Koh ū sat-bú tī in ê kéng-lāi móa sì-kòe.

32伊落雹hō͘ in做hō͘；　　Tī in ê土地降落焰火。I lo̍h-pha̍uh hō͘ in chòe hō͘; Tī in ê thó͘-tōe kàng-lo̍h iām-hé.

33伊亦phah in ê葡萄樹kap無花果樹，　　毀壞in境內ê樹木。I ia̍h phah in ê phû-tô-chhiū kap bû-hoa-kó chhiū, Húi-hoāi in kéng-lāi ê chhiū-ba̍k.

34伊一下出聲蝗蟲就來，　　草蜢bōe算得。I chi̍t-ē chhut-siaⁿ hông-thiông chiū lâi, Chháu-meh bōe-sǹg--tit.

35一盡食in ê土地ê菜蔬，　　Koh食in田園所出ê。It-chīn chia̍h in ê thó͘-tōe ê chhài-soe, Koh chia̍h in chhân-hn̂g só͘ chhut--ê.

36伊koh phah死in國內一切ê大kiáⁿ，　　就是in氣力ê起頭。I koh phah-sí in kok-lāi it-chhè ê tōa-kiáⁿ, Chiū-sī in khùi-la̍t ê khí-thâu.

37伊chhōa in出來，帶銀帶金；　　伊ê支派中，無一個軟弱ê人。I chhōa in chhut-lâi, tòa gûn tòa kim; I ê chi-phài tiong, bô chi̍t ê loán-jio̍k ê lâng.

38In出來ê時，埃及就歡喜，　　因為埃及bat為tio̍h in來驚。In chhut--lâi ê sî, Ai-ki̍p chiū hoaⁿ-hí, In-ūi Ai-ki̍p bat ūi-tio̍h in lâi kiaⁿ.

39伊起雲做布篷，　　暝時用火照光。I khí hûn chòe pò͘-phâng, Mî--sî ēng hé chiò-kng.

40In一下求，伊就hō͘鵪鶉飛來，　　Koh用天ê餅hō͘ in飽足。In chi̍t-ē kiû, I chiū hō͘ ian-chhun pe--lâi, Koh ēng thiⁿ ê piáⁿ hō͘ in pá-chiok.

41伊phah開石磐，水就chhèng出；　　Tī乾地水流親像河。I phah-khui chio̍h-pôaⁿ, chúi chiū chhèng-chhut; Tī ta-tōe chúi lâu chhin-chhiūⁿ hô.

42因為伊記念伊聖ê話，　　Kap伊ê奴僕亞伯拉罕。In-ūi I kì-liām I sèng ê ōe, Kap I ê lô͘-po̍k A-pek-la̍h-hán.

43伊 chhōa伊ê百姓大悅出來，　　Chhōa伊揀ê百姓唱歡喜ê歌出來。I chhōa I ê peh-sìⁿ tāi-ia̍t chhut-lâi, Chhōa I kéng ê peh-sìⁿ chhiùⁿ hoaⁿ-hí ê koa chhut--lâi.

44伊將列國ê地賞賜in，　　In就承接hiah-ê百姓tio̍h磨所得tio̍h-ê；I chiong lia̍t-kok ê tōe siúⁿ-sù in, In chiū sêng-chiap hiah ê peh-sìⁿ tio̍h-bôa só͘ tit-tio̍h--ê;

45Beh hō͘ in thàn伊ê律例，　　守伊ê法度。　　Lín tio̍h o-ló耶和華。Beh hō͘ in thàn I ê lu̍t-lē, Siú I ê hoat-tō͘. Lín tio̍h o-ló Iâ-hô-hoa.

1Lín tio̍h o-ló耶和華。　　Lín tio̍h感謝耶和華；因為伊是好；　　伊ê慈愛永遠tī-teh。Lín tio̍h o-ló Iâ-hô-hoa. Lín tio̍h kám-siā Iâ-hô-hoa; in-ūi I sī hó; I ê chû-ài éng-oán tī--teh.

2Chī-chūi能講起耶和華ê大權能？　　Chī-chūi能表明伊一切ê名聲？Chī-chūi ōe kóng-khí Iâ-hô-hoa ê tōa koân-lêng? Chī-chūi ōe piáu-bêng I it-chhè ê miâ-siaⁿ?

3見若遵守公平，常常行公義ê；　　Chit號人就有福氣。Kìⁿ-nā chun-siú kong-pêng, siông-siông kiâⁿ kong-gī--ê; Chit-hō lâng chiū ū hok-khì.

4耶和華ah，你用恩惠款待你ê百姓，求你亦用這記念我；　　用你ê救恩臨到我。Iâ-hô-hoa ah, Lí ēng un-hūi Khoán-thāi Lí ê peh-sìⁿ, kiû Lí ia̍h ēng che kì-liām góa; Ēng Lí ê kiù-un lîm-kàu góa.

5Hō͘我看見你揀ê百姓ê福氣，　　歡喜你ê國ê快樂，　　Kap你ê產業相kap榮光。Hō͘ góa khòaⁿ-kìⁿ Lí kéng ê peh-sìⁿ ê hok-khì, Hoaⁿ-hí Lí ê kok ê khoài-lo̍k, Kap Lí ê sán-gia̍p saⁿ-kap êng-kng.

6阮kap阮ê祖公平平犯罪，　　阮作孽，行pháiⁿ。Goán kap goán ê chó͘-kong pîⁿ-pîⁿ hoān-chōe, Goán chok-gia̍t, kiâⁿ pháiⁿ.

7阮ê祖公tī埃及無明白你ê奇事；　　無記念你豐盛ê慈愛；　　反tńg tī hit-ê海，就是tī紅海，行悖逆。Goán ê chó͘-kong tī Ai-ki̍p bô bêng-pe̍k Lí ê kî-sū; Bô kì-liām Lí hong-sēng ê chû-ài; Hoán-tńg tī hit ê hái, chiū-sī tī Âng-hái, kiâⁿ pōe-ge̍k.

8但是伊因為家己ê名拯救in，　　為tio̍h beh顯明伊ê大權能。Nā-sī I in-ūi ka-kī ê miâ chín-kiù in, Ūi-tio̍h beh hián-bêng I ê tōa koân-lêng.

9Koh hoah紅海，海就ta；　　伊chhōa in經過深ê所在，ná親像經過曠野。Koh hoah Âng-hái, hái chiū ta; I chhōa in keng-kè chhim ê só͘-chāi, ná chhin-chhiūⁿ keng-kè khòng-iá.

10伊救in脫離怨恨in ê人ê手，　　Tùi對敵ê手中救贖in。I kiù in thoat-lī oàn-hūn in ê lâng ê chhiú, Tùi tùi-te̍k ê chhiú-tiong kiù-sio̍k in.

11水淹密in ê對敵；　　In就無留一個。Chúi im-ba̍t in ê tùi-te̍k; In chiū bô lâu chi̍t-ê.

12Hit-tia̍p in chiah信伊ê話；　　唱歌o-ló伊。Hit-tia̍p in chiah sìn I ê ōe; Chhiùⁿ-koa o-ló I.

13In快快bōe記得伊ê所做；　　無thèng候伊ê指教；In khoài-khoài bōe-kì-tit I ê só͘-chòe; Bô thèng-hāu I ê chí-kàu;

14反tńg tī曠野大起貪食；　　Tī拋荒ê所在chhì上帝。Hoán-tńg tī khòng-iá tōa khí tham-chia̍h; Tī pha-hng ê só͘-chāi chhì Siōng-tè.

15伊將in所求ê hō͘-in，　　總是hō͘ in ê神魂衰lám。I chiong in só͘ kiû--ê hō͘--in, Chóng-sī hō͘ in ê sîn-hûn soe-lám.

16In koh tī營中怨妒摩西，　　Kap耶和華ê聖ê亞倫。In koh tī iâⁿ-tiong oàn-tò͘ Mô͘-se, Kap Iâ-hô-hoa ê sèng ê A-lûn.

17地就開，吞Tāi-tan，　　掩密A-pí-lân ê黨。Tōe chiū khui, thun Tāi-tan, Iám-ba̍t A-pí-lân ê tóng.

18有火 tī in ê黨中發起，　　有火燄燒滅hiah-ê pháiⁿ人。Ū hé tī in ê tóng-tiong hoat-khí, Ū hé-iām sio-bia̍t hiah ê pháiⁿ-lâng.

19In tī Hô-lia̍t造牛á，　　仆拜所鑄ê像。In tī Hô-lia̍t chō gû-á, Phak-pài só͘ chù ê siōng.

20Án-ni將in ê榮光，　　換做食草ê牛á siōng。Án-ni chiong in ê êng-kng, Ōaⁿ chòe chia̍h-chháu ê gû-á siōng.

21Bōe記得救in ê上帝，　　Bat行大ê tāi-chì tī埃及-ê；Bōe-kì-tit kiù in ê Siōng-tè, Bat kiâⁿ tōa ê tāi-chì tī Ai-ki̍p--ê;

22行奇事tī含ê地，　　行thang驚ê事tī紅海。Kiâⁿ kî-sū tī Hâm ê tōe, Kiâⁿ thang kiaⁿ ê sū tī Âng-hái.

23所以伊講beh滅無in，　　若m̄是有伊所揀ê摩西，當決裂ê時，khiā伊ê面前，　　挽回伊ê受氣，驚了伊滅無in。Só͘-í I kóng beh bia̍t-bô in, Nā m̄-sī ū I só͘ kéng ê Mô͘-se, tng koat-lia̍t ê sî, khiā I ê bīn-chêng, Bán-hôe I ê siū-khì, kiaⁿ-liáu I bia̍t-bô in.

24In koh看輕hit-ê好ê地，　　M̄信伊ê話。In koh khòaⁿ-khin hit ê hó ê tōe, M̄-sìn I ê ōe.

25Tī in布棚內發出怨恨ê話，　　M̄聽耶和華ê聲。Tī in pò͘-pîⁿ-lāi hoat-chhut oàn-hūn ê ōe, M̄-thiaⁿ Iâ-hô-hoa ê siaⁿ.

26所以伊對in kia̍h起手chiù-chōa，　　Beh hō͘ in死tī曠野。Só͘-í I tùi in kia̍h-khí chhiú chiù-chōa, Beh hō͘ in sí tī khòng-iá.

27Hō͘ in ê後裔死tī列國ê中間，　　四散tī ta̍k所在。Hō͘ in ê hō͘-è sí tī lia̍t-kok ê tiong-kan, Sì-sòaⁿ tī ta̍k só͘-chāi.

28In koh kap Pa-le̍k-pí-jíⁿ連合，　　食祭獻死ê ê物。In koh kap Pa-le̍k-pí-jíⁿ liân-ha̍p, Chia̍h chè-hiàn sí--ê ê mi̍h.

29In án-ni行，惹伊ê受氣；　　就有瘟疫流行tī in中間。In án-ni kiâⁿ, jiá I ê siū-khì; Chiū ū un-e̍k liû-hêng tī in tiong-kan.

30Hit時Hui-nî-hap起來，行刑罰；　　瘟疫chiah soah。Hit-sî Hui-nî-hap khí--lâi, kiâⁿ hêng-hoa̍t; Un-e̍k chiah soah.

31Chit-ê就kā伊算做義，　　世世代代，直到永遠。Chit-ê chiū kā i sǹg-chòe gī, Sè-sè tāi-tāi, ti̍t kàu éng-oán.

32In tī Bí-lī-pa ê水，koh hō͘耶和華受氣，　　甚至摩西為tio̍h in ê緣故也受虧損；In tī Bí-lī-pa ê chúi, koh hō͘ Iâ-hô-hoa siū-khì, Sīm-chì Mô͘-se ūi-tio̍h in ê iân-kò͘ iā siū khui-sún;

33是因為in忤逆伊ê神，　　致到摩西講出躁性ê話。Sī in-ūi in ngó͘-ge̍k I ê sîn, Tì-kàu Mô͘-se kóng-chhut sò-sèng ê ōe.

34耶和華吩咐in剿滅hiah-ê百姓；　　In無聽thàn。Iâ-hô-hoa hoan-hù in châu-bia̍t hiah ê peh-sìⁿ; In bô thiaⁿ-thàn.

35反tńg kap外邦人混雜，　　學in ê所做；Hoán-tńg kap gōa-pang lâng hūn-cha̍p, O̍h in ê só͘-chòe;

36服事in ê偶像，　　這是成做害in ê活tauh。Ho̍k-sāi in ê ngó͘-siōng, Che sī chiâⁿ-chòe hāi in ê oa̍h-tauh.

37將in ê kiáⁿ cha-bó͘-kiáⁿ祭祀鬼神，Chiong in ê kiáⁿ cha-bó͘-kiáⁿ chè-sū kúi-sîn,

38流無罪ê人ê血，就是in ê kiáⁿ cha-bó͘-kiáⁿ ê血，　　將in祭祀迦南ê偶像；　　Hit-ê地就hō͘血phah lâ-sâm。Lâu bô-chōe ê lâng ê huih, chiū-sī in ê kiáⁿ cha-bó͘-kiáⁿ ê huih, chiong in chè-sū Ka-lâm ê ngó͘-siōng; Hit ê tōe chiū hō͘ huih phah lâ-sâm.

39Án-ni in hō͘家己ê所做phah lâ-sâm，　　Tī in ê所行犯tio̍h淫行。Án-ni in hō͘ ka-kī ê só͘-chòe phah lâ-sâm, Tī in ê só͘-kiâⁿ hoān-tio̍h îm-hēng.

40所以耶和華ê受氣對伊ê百姓發出，　　厭惡伊ê產業。Só͘-í Iâ-hô-hoa ê siū-khì tùi I ê peh-sìⁿ hoat-chhut, Iàm-ò͘ⁿ I ê sán-gia̍p.

41將in交代外邦人ê手；　　怨恨in ê人就管轄in。Chiong in kau-tài gōa-pang lâng ê chhiú; Oàn-hūn in ê lâng chiū koán-hat in.

42In ê對敵也壓制in，　　In就屈服tī對敵ê手下。In ê tùi-te̍k iā ap-chè in, In chiū khut-ho̍k tī tùi-te̍k ê chhiú-ē.

43伊chōe-chōe pái拯救in；　　總是in tī in ê計謀中悖逆伊；　　因為家己ê罪惡降做卑賤。I chōe-chōe pái chín-kiù in; Chóng-sī in tī in ê kè-bô͘-tiong pōe-ge̍k I; In-ūi ka-kī ê chōe-ok kàng-chòe pi-chiān.

44Iáu-kú伊聽見in ai-叫ê時，　　就體貼in ê危急；Iáu-kú I thiaⁿ-kìⁿ in ai-kiò ê sî, chiū thé-thiap in ê gûi-kip;

45為tio̍h in來記念伊ê約，　　照伊豐盛ê慈愛回心轉(tńg)意。Ūi-tio̍h in lâi kì-liām I ê iok, Chiàu I hong-sēng ê chû-ài hôe-sim tńg-ì.

46伊也hō͘ in tī lóng總掠in ê人ê面前，　　得tio̍h憐憫。I iā hō͘ in tī lóng-chóng lia̍h in ê lâng ê bīn-chêng, Tit-tio̍h lîn-bín.

47耶和華阮ê上帝ah，求你拯救阮，　　Tùi外邦中聚集阮；　　Thang hō͘阮祝謝你ê聖名，　　掠你ê受o-ló做大悅。Iâ-hô-hoa goán ê Siōng-tè ah, kiû Lí chín-kiù goán, Tùi gōa-pang-tiong chū-chi̍p goán; Thang hō͘ goán chiok-siā Lí ê sèng-miâ, Lia̍h Lí ê siū o-ló chòe tāi-ia̍t.

48Tio̍h o-ló耶和華，以色列ê上帝，　　Tùi永遠到永遠。　　願眾百姓lóng講，A-bēng。　　Lín tio̍h o-ló耶和華。Tio̍h o-ló Iâ-hô-hoa, Í-sek-lia̍t ê Siōng-tè, Tùi éng-oán kàu éng-oán. Goān chèng peh-sìⁿ lóng kóng, A-bēng. Lín tio̍h o-ló Iâ-hô-hoa.

1Lín tio̍h感謝耶和華，因為伊是好，　　因為伊ê慈愛永永tī-teh。Lín tio̍h kám-siā Iâ-hô-hoa, in-ūi I sī hó, In-ūi I ê chû-ài éng-éng tī-teh.

2耶和華所救贖ê tio̍h講這話，　　就是伊 tùi對敵手中所救贖ê；Iâ-hô-hoa só͘ kiù-sio̍k--ê tio̍h kóng che ōe, Chiū-sī I tùi tùi-te̍k chhiú-tiong só͘ kiù-sio̍k--ê;

3Tùi ta̍k國，tùi東tùi西，tùi南tùi pak，　　所聚集ê lóng tio̍h án-ni講。Tùi ta̍k-kok, tùi tang tùi sai, tùi lâm tùi pak, Só͘ chū-chi̍p--ê lóng tio̍h án-ni kóng.

4In tī曠野拋荒ê路漂流，　　Chhē無城thang khiā起。In tī khòng-iá pha-hng ê lō͘ phiau-liû, Chhē bô siâⁿ thang khiā-khí.

5也iau，也嘴乾，　　In ê心神暈去。Iā iau, iā chhùi-ta, In ê sim-sîn hūn--khì.

6In就tī苦難中哀求耶和華；　　伊tùi in ê患難中拯救in。In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong chín-kiù in.

7Koh chhōa in行直ê路，　　Hō͘ in去到thang khiā起ê城。Koh chhōa in kiâⁿ ti̍t ê lō͘, Hō͘ in khì kàu thang khiā-khí ê siâⁿ.

8為tio̍h耶和華ê慈愛kap祂對世間人所行ê奇事，　　願人lóng o-ló祂。Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I.

9因為伊hō͘迫切欣慕ê心得tio̍h知足；　　Hō͘ iau餓ê心得tio̍h好物到飽。In-ūi I hō͘ pek-chhiat him-bō͘ ê sim tit-tio̍h ti-chiok; Hō͘ iau-gō ê sim tit-tio̍h hó-mi̍h kàu pá.

10Hiah-ê坐tī烏暗死蔭中ê人，　　受困苦kap鐵鏈pé-縛ê人；Hiah-ê chē tī o͘-àm sí-ìm-tiong ê lâng, Siū khùn-khó͘ kap thih-liān pé-pa̍k ê lâng;

11是因為in悖逆上帝ê話，　　看輕至koânê ê旨意。Sī in-ūi in pōe-ge̍k Siōng-tè ê ōe, Khòaⁿ-khin Chì-koâiⁿ--ê ê chí-ì.

12所以伊用勞苦教乖in ê心；　　In跋倒，無人扶助。Só͘-í I ēng lô-khó͘ kà-koai in ê sim; In poa̍h-tó, bô lâng hû-chō͘.

13In就tī苦難中哀求耶和華，　　伊tùi in ê患難中牽救in。In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong khan-kiù in.

14伊tùi烏暗死蔭中chhōa in出來，　　Chhoah斷縛in ê索。I tùi o͘-àm sí-ìm-tiong chhōa in chhut--lâi, Chhoah-tn̄g pa̍k in ê soh.

15為tio̍h耶和華ê慈愛kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I.

16因為伊phah破同ê門，　　斬斷鐵ê門栱。In-ūi I phah-phòa tâng ê mn̂g, Chām-tn̄g thih ê mn̂g-kông.

17戇人因為in ê過失，　　Koh因為in ê罪惡，受苦楚。Gōng-lâng in-ūi in ê kè-sit, Koh in-ūi in ê chōe-ok, siū khó͘-chhó͘.

18In ê心厭惡ta̍k樣ê食物，　　就óa近死ê門。In ê sim iàm-ò͘ⁿ ta̍k-iūⁿ ê chia̍h-mi̍h, Chiū óa-kūn sí ê mn̂g.

19In就tī苦難中哀求耶和華；　　伊tùi in ê患難中牽救in。In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong khan-kiù in.

20伊出命令醫好in，　　救in脫離死無。I chhut bēng-lēng i-hó in, Kiù in thoat-lī sí-bô.

21為tio̍h耶和華ê慈愛，kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài, kap I tùi sè-kan lâng só͘ kiâⁿ ê kî-sū, Goān lâng lóng o-ló I.

22亦願in獻感謝ê祭，　　出歡喜ê聲講起伊ê所做。Ia̍h goān in hiàn kám-siā ê chè, Chhut hoaⁿ-hí ê siaⁿ kóng-khí I ê só͘-chòe.

23坐船過海，　　tī大水中經營事業ê，Chē-chûn kè-hái, Tī tōa-chúi-tiong keng-êng sū-gia̍p--ê,

24In看見耶和華ê所做，　　Kap伊tī深淵所行ê奇事；In khòaⁿ-kìⁿ Iâ-hô-hoa ê só͘-chòe, Kap I tī chhim-ian só͘ kiâⁿ ê kî-sū;

25因為伊一下命令，狂風就起；　　海中ê湧就giâ起來；In-ūi I chi̍t-ē bēng-lēng, kông-hong chiū khí; Hái-tiong ê éng chiū giâ--khí-lâi;

26In上到穹蒼，落到海底；　　In因為危險，神魂就消散。In chiūⁿ kàu kiong-chhong, lo̍h kàu hái-tóe; In in-ūi gûi-hiám, sîn-hûn chiū siau-sòaⁿ.

27In顛顛倒倒，東倒西歪，親像酒醉ê人，　　In ê智慧無法可施。In tian-tian tó-tó, tang-tó sai-oai, chhin-chhiūⁿ chiú-chùi ê lâng, In ê tì-hūi bû-hoat khó-si.

28In就tī苦難中哀求耶和華，　　伊tùi in ê患難中chhōa in出來。In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong chhōa in chhut--lâi.

29伊hō͘狂風定，　　海湧就平靜。I hō͘ kông-hong tiāⁿ, Hái-éng chiū pêng-chēng.

30風定，湧靜，in就歡喜；　　伊就chhōa in到所ài去ê海口。Hong tiāⁿ, éng chēng, in chiū hoaⁿ-hí; I chiū chhōa in kàu só͘ ài khì ê hái-kháu.

31為tio̍h耶和華ê慈愛kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài kap I tùi sè-kan-lâng só͘ kiâⁿ ê kî-sū, Goān lâng lóng o-ló I.

32願in tī百姓ê會中尊伊做高，　　tī長老ê座位o-ló伊。Goān in tī peh-sìⁿ ê hōe-tiong chun I chòe koâiⁿ, Tī tióng-ló ê chē-ūi o-ló I.

33伊hō͘江河變做曠野，　　Hō͘水泉變做乾燥ê地。I hō͘ kang-hô pìⁿ-chòe khòng-iá, Hō͘ chúi-chôaⁿ pìⁿ-chòe ta-sò ê tōe.

34伊hō͘肥地變鹹ê地，　　Lóng是因為khiā起tī-hia ê人ê罪惡。I hō͘ pûi-tōe pìⁿ kiâm ê tōe, Lóng sī in-ūi khiā-khí tī-hia ê lâng ê chōe-ok.

35伊hō͘曠野變做潭堀，　　Hō͘乾地變做水泉。I hō͘ khòng-iá pìⁿ-chòe thâm-khut, Hō͘ ta-tōe pìⁿ-chòe chúi-chôaⁿ.

36伊hō͘ iau餓ê人tiàm tī-hia，　　Hō͘ in能起造thang khiā起ê城；I hō͘ iau-gō ê lâng tiàm tī-hia, Hō͘ in ōe khí-chō thang khiā-khí ê siâⁿ;

37Koh種作田園，栽葡萄，　　得tio̍h所出ê土產。Koh chèng-choh chhân-hn̂g, chai phû-tô, Tit-tio̍h só͘ chhut ê thó͘-sán.

38伊koh賞賜福氣hō͘ in，hō͘ in生湠chōe-chōe，　　亦hō͘ in ê cheng-siⁿ無減少。I koh siúⁿ-sù hok-khì hō͘ in, hō͘ in siⁿ-thòaⁿ chōe-chōe, Ia̍h hō͘ in ê cheng-siⁿ bô kiám-chió.

39In koh因為暴虐、患難、憂苦，　　就減少koh卑下(kē)。In koh in-ūi pō-gio̍k, hoān-lān, iu-khó͘, Chiū kiám-chió koh pi-kē.

40伊hō͘貴族受看輕，　　Hō͘ in漂流tī拋荒無路ê所在。I hō͘ kùi-cho̍k siū khòaⁿ-khin, Hō͘ in phiau-liû tī pha-hng bô lō͘ ê só͘-chāi.

41總是伊舉起sòng-hiong人，hō͘ in脫離苦難，　　Hō͘伊ê家族興旺親像羊群。Chóng-sī I kú-khí sòng-hiong lâng, hō͘ in thoat-lī khó͘-lān, Hō͘ i ê ka-cho̍k heng-ōng chhin-chhiūⁿ iûⁿ-kûn.

42正直ê人beh看見來歡喜；　　一切pháiⁿ人ê嘴beh塞密。Chèng-ti̍t ê lâng beh khòaⁿ-kìⁿ lâi hoaⁿ-hí; It-chhè pháiⁿ-lâng ê chhùi beh that-ba̍t.

43見若有智慧ê人beh關心chiah-ê tāi-chì，　　亦beh siàu念耶和華ê慈愛。Kìⁿ-nā ū tì-hūi ê lâng beh koan-sim chiah ê tāi-chì, Ia̍h beh siàu-liām Iâ-hô-hoa ê chû-ài.