1Lín tio̍h感謝耶和華，因為伊是好，　　因為伊ê慈愛永永tī-teh。Lín tio̍h kám-siā Iâ-hô-hoa, in-ūi I sī hó, In-ūi I ê chû-ài éng-éng tī-teh.

2耶和華所救贖ê tio̍h講這話，　　就是伊 tùi對敵手中所救贖ê；Iâ-hô-hoa só͘ kiù-sio̍k--ê tio̍h kóng che ōe, Chiū-sī I tùi tùi-te̍k chhiú-tiong só͘ kiù-sio̍k--ê;

3Tùi ta̍k國，tùi東tùi西，tùi南tùi pak，　　所聚集ê lóng tio̍h án-ni講。Tùi ta̍k-kok, tùi tang tùi sai, tùi lâm tùi pak, Só͘ chū-chi̍p--ê lóng tio̍h án-ni kóng.

4In tī曠野拋荒ê路漂流，　　Chhē無城thang khiā起。In tī khòng-iá pha-hng ê lō͘ phiau-liû, Chhē bô siâⁿ thang khiā-khí.

5也iau，也嘴乾，　　In ê心神暈去。Iā iau, iā chhùi-ta, In ê sim-sîn hūn--khì.

6In就tī苦難中哀求耶和華；　　伊tùi in ê患難中拯救in。In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong chín-kiù in.

7Koh chhōa in行直ê路，　　Hō͘ in去到thang khiā起ê城。Koh chhōa in kiâⁿ ti̍t ê lō͘, Hō͘ in khì kàu thang khiā-khí ê siâⁿ.

8為tio̍h耶和華ê慈愛kap祂對世間人所行ê奇事，　　願人lóng o-ló祂。Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I.

9因為伊hō͘迫切欣慕ê心得tio̍h知足；　　Hō͘ iau餓ê心得tio̍h好物到飽。In-ūi I hō͘ pek-chhiat him-bō͘ ê sim tit-tio̍h ti-chiok; Hō͘ iau-gō ê sim tit-tio̍h hó-mi̍h kàu pá.

10Hiah-ê坐tī烏暗死蔭中ê人，　　受困苦kap鐵鏈pé-縛ê人；Hiah-ê chē tī o͘-àm sí-ìm-tiong ê lâng, Siū khùn-khó͘ kap thih-liān pé-pa̍k ê lâng;

11是因為in悖逆上帝ê話，　　看輕至koânê ê旨意。Sī in-ūi in pōe-ge̍k Siōng-tè ê ōe, Khòaⁿ-khin Chì-koâiⁿ--ê ê chí-ì.

12所以伊用勞苦教乖in ê心；　　In跋倒，無人扶助。Só͘-í I ēng lô-khó͘ kà-koai in ê sim; In poa̍h-tó, bô lâng hû-chō͘.

13In就tī苦難中哀求耶和華，　　伊tùi in ê患難中牽救in。In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong khan-kiù in.

14伊tùi烏暗死蔭中chhōa in出來，　　Chhoah斷縛in ê索。I tùi o͘-àm sí-ìm-tiong chhōa in chhut--lâi, Chhoah-tn̄g pa̍k in ê soh.

15為tio̍h耶和華ê慈愛kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I.

16因為伊phah破同ê門，　　斬斷鐵ê門栱。In-ūi I phah-phòa tâng ê mn̂g, Chām-tn̄g thih ê mn̂g-kông.

17戇人因為in ê過失，　　Koh因為in ê罪惡，受苦楚。Gōng-lâng in-ūi in ê kè-sit, Koh in-ūi in ê chōe-ok, siū khó͘-chhó͘.

18In ê心厭惡ta̍k樣ê食物，　　就óa近死ê門。In ê sim iàm-ò͘ⁿ ta̍k-iūⁿ ê chia̍h-mi̍h, Chiū óa-kūn sí ê mn̂g.

19In就tī苦難中哀求耶和華；　　伊tùi in ê患難中牽救in。In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong khan-kiù in.

20伊出命令醫好in，　　救in脫離死無。I chhut bēng-lēng i-hó in, Kiù in thoat-lī sí-bô.

21為tio̍h耶和華ê慈愛，kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài, kap I tùi sè-kan lâng só͘ kiâⁿ ê kî-sū, Goān lâng lóng o-ló I.

22亦願in獻感謝ê祭，　　出歡喜ê聲講起伊ê所做。Ia̍h goān in hiàn kám-siā ê chè, Chhut hoaⁿ-hí ê siaⁿ kóng-khí I ê só͘-chòe.

23坐船過海，　　tī大水中經營事業ê，Chē-chûn kè-hái, Tī tōa-chúi-tiong keng-êng sū-gia̍p--ê,

24In看見耶和華ê所做，　　Kap伊tī深淵所行ê奇事；In khòaⁿ-kìⁿ Iâ-hô-hoa ê só͘-chòe, Kap I tī chhim-ian só͘ kiâⁿ ê kî-sū;

25因為伊一下命令，狂風就起；　　海中ê湧就giâ起來；In-ūi I chi̍t-ē bēng-lēng, kông-hong chiū khí; Hái-tiong ê éng chiū giâ--khí-lâi;

26In上到穹蒼，落到海底；　　In因為危險，神魂就消散。In chiūⁿ kàu kiong-chhong, lo̍h kàu hái-tóe; In in-ūi gûi-hiám, sîn-hûn chiū siau-sòaⁿ.

27In顛顛倒倒，東倒西歪，親像酒醉ê人，　　In ê智慧無法可施。In tian-tian tó-tó, tang-tó sai-oai, chhin-chhiūⁿ chiú-chùi ê lâng, In ê tì-hūi bû-hoat khó-si.

28In就tī苦難中哀求耶和華，　　伊tùi in ê患難中chhōa in出來。In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong chhōa in chhut--lâi.

29伊hō͘狂風定，　　海湧就平靜。I hō͘ kông-hong tiāⁿ, Hái-éng chiū pêng-chēng.

30風定，湧靜，in就歡喜；　　伊就chhōa in到所ài去ê海口。Hong tiāⁿ, éng chēng, in chiū hoaⁿ-hí; I chiū chhōa in kàu só͘ ài khì ê hái-kháu.

31為tio̍h耶和華ê慈愛kap伊對世間人所行ê奇事，　　願人lóng o-ló伊。Ūi-tio̍h Iâ-hô-hoa ê chû-ài kap I tùi sè-kan-lâng só͘ kiâⁿ ê kî-sū, Goān lâng lóng o-ló I.

32願in tī百姓ê會中尊伊做高，　　tī長老ê座位o-ló伊。Goān in tī peh-sìⁿ ê hōe-tiong chun I chòe koâiⁿ, Tī tióng-ló ê chē-ūi o-ló I.

33伊hō͘江河變做曠野，　　Hō͘水泉變做乾燥ê地。I hō͘ kang-hô pìⁿ-chòe khòng-iá, Hō͘ chúi-chôaⁿ pìⁿ-chòe ta-sò ê tōe.

34伊hō͘肥地變鹹ê地，　　Lóng是因為khiā起tī-hia ê人ê罪惡。I hō͘ pûi-tōe pìⁿ kiâm ê tōe, Lóng sī in-ūi khiā-khí tī-hia ê lâng ê chōe-ok.

35伊hō͘曠野變做潭堀，　　Hō͘乾地變做水泉。I hō͘ khòng-iá pìⁿ-chòe thâm-khut, Hō͘ ta-tōe pìⁿ-chòe chúi-chôaⁿ.

36伊hō͘ iau餓ê人tiàm tī-hia，　　Hō͘ in能起造thang khiā起ê城；I hō͘ iau-gō ê lâng tiàm tī-hia, Hō͘ in ōe khí-chō thang khiā-khí ê siâⁿ;

37Koh種作田園，栽葡萄，　　得tio̍h所出ê土產。Koh chèng-choh chhân-hn̂g, chai phû-tô, Tit-tio̍h só͘ chhut ê thó͘-sán.

38伊koh賞賜福氣hō͘ in，hō͘ in生湠chōe-chōe，　　亦hō͘ in ê cheng-siⁿ無減少。I koh siúⁿ-sù hok-khì hō͘ in, hō͘ in siⁿ-thòaⁿ chōe-chōe, Ia̍h hō͘ in ê cheng-siⁿ bô kiám-chió.

39In koh因為暴虐、患難、憂苦，　　就減少koh卑下(kē)。In koh in-ūi pō-gio̍k, hoān-lān, iu-khó͘, Chiū kiám-chió koh pi-kē.

40伊hō͘貴族受看輕，　　Hō͘ in漂流tī拋荒無路ê所在。I hō͘ kùi-cho̍k siū khòaⁿ-khin, Hō͘ in phiau-liû tī pha-hng bô lō͘ ê só͘-chāi.

41總是伊舉起sòng-hiong人，hō͘ in脫離苦難，　　Hō͘伊ê家族興旺親像羊群。Chóng-sī I kú-khí sòng-hiong lâng, hō͘ in thoat-lī khó͘-lān, Hō͘ i ê ka-cho̍k heng-ōng chhin-chhiūⁿ iûⁿ-kûn.

42正直ê人beh看見來歡喜；　　一切pháiⁿ人ê嘴beh塞密。Chèng-ti̍t ê lâng beh khòaⁿ-kìⁿ lâi hoaⁿ-hí; It-chhè pháiⁿ-lâng ê chhùi beh that-ba̍t.

43見若有智慧ê人beh關心chiah-ê tāi-chì，　　亦beh siàu念耶和華ê慈愛。Kìⁿ-nā ū tì-hūi ê lâng beh koan-sim chiah ê tāi-chì, Ia̍h beh siàu-liām Iâ-hô-hoa ê chû-ài.

1大衛ê詩歌。1) 上帝ah，我ê心自在；　　我beh吟詩，我ê心神beh唱歌o-ló。Tāi-pi̍t ê si-koa.1) Siōng-tè ah, góa ê sim chū-chāi; Góa beh gîm-si, góa ê sim-sîn beh chhiùⁿ-koa o-ló.

2琴ah，瑟ah，lín tio̍h精神起來；　　我本身beh真早精神起來。Khîm--ah, sek--ah, lín tio̍h cheng-sîn khí-lâi; Góa pún-sin beh chin-chá cheng-sîn khí--lâi.

3耶和華ah，我beh tī 萬百姓ê中間感謝你；　　Tī列邦ê中間唱歌o-ló你。Iâ-hô-hoa ah, góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

4因為你ê慈愛khah大天，　　你ê誠實到穹蒼。In-ūi Lí ê chû-ài khah-tōa thiⁿ, Lí ê sêng-si̍t kàu kiong-chhong.

5上帝ah，願你高大pôaⁿ過chiah-ê天；　　願你ê榮光pôaⁿ過全地。Siōng-tè ah, goān Lí koâiⁿ-tōa pôaⁿ-kè chiah ê thiⁿ; Goān Lí ê êng-kng pôaⁿ-kè choân-tōe.

6求你聽阮，用chiàⁿ手牽救阮；　　Thang hō͘你所疼ê人得tio̍h救。Kiû Lí thiaⁿ goán, ēng chiàⁿ-chhiú khan-kiù goán; Thang hō͘ Lí só͘ thiàⁿ ê lâng tit-tio̍h kiù.

7上帝已經chí伊ê聖潔來講，我beh大悅；　　我beh分開示劍，量Sò͘-kat ê山谷。Siōng-tè í-keng chí I ê sèng-kiat lâi kóng, Góa beh tāi-ia̍t; Góa beh pun-khui Sī-kiàm, niû Sò͘-kat ê soaⁿ-kok.

8Ki-lia̍t是我ê；Má-ná-se亦是我ê；　　Í-hoat-liân是我ê頭盔；　　猶大是我ê權柄。Ki-lia̍t sī Góa-ê; Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê koân-pèng.

9Mô͘-ap beh做我ê浴盆；　　我beh hiat我ê鞋tī Í-tong；　　我beh因為khah贏腓利士來大聲hoah。Mô͘-ap beh chòe Góa ê e̍k-phûn; Góa beh hiat góa ê ôe tī Í-tong; Góa beh in-ūi khah-iâⁿ Hui-lī-sū lâi tōa-siaⁿ hoah.

10Chī-chūi能chhōa我入堅固ê城？Chī-chūi chhōa我入Í-tong ê地？Chī-chūi ōe chhōa góa ji̍p kian-kò͘ ê siâⁿ? Chī-chūi chhōa góa ji̍p Í-tong ê tōe?

11上帝ah，你劍m̄是棄sak阮mah？　　上帝ah，你無kap阮ê軍兵相kap去。Siōng-tè ah, Lí kiàm m̄-sī khì-sak goán mah? Siōng-tè ah, Lí bô kap goán ê kun-peng saⁿ-kap khì.

12求你幫贊阮，攻擊對敵；　　因為人ê拯救是空空。Kiû Lí pang-chān goán, kong-kek tùi-te̍k; In-ūi lâng ê chín-kiù sī khang-khang.

13阮óa靠上帝，做成大tāi-chì；　　因為thún踏阮ê對敵ê，就是伊。Goán óa-khò Siōng-tè, chòe-chiâⁿ tōa tāi-chì; In-ūi thún-ta̍h goán ê tùi-te̍k--ê, chiū-sī I.

1大衛ê詩；交hō͘樂官。1) 我所o-ló ê上帝ah，求你莫得靜靜；Tāi-pi̍t ê si; kau hō͘ Ga̍k-koaⁿ.1) Góa só͘ o-ló ê Siōng-tè ah, kiû Lí bo̍h-tit chēng-chēng;

2因為pháiⁿ人ê嘴，kap奸詐ê嘴，in已經thí開攻擊我；　　In用白賊ê舌對我講話。In-ūi pháiⁿ-lâng ê chhùi, kap kan-chà ê chhùi, in í-keng thí-khui kong-kek góa; In ēng pe̍h-chha̍t ê chi̍h tùi góa kóng-ōe.

3In用怨恨ê話包圍我；　　Koh無因端來攻擊我。In ēng oàn-hūn ê ōe pau-ûi góa; Koh bô in-toaⁿ lâi kong-kek góa.

4我疼in，in反tńg做我ê對敵；　　獨獨我專務祈禱。Góa thiàⁿ--in, in hoán-tńg chòe góa ê tùi-te̍k; To̍k-to̍k góa choan-bū kî-tó.

5In對我用pháiⁿ報好，　　用怨恨報仁愛。In tùi góa ēng pháiⁿ pò hó, Ēng oàn-hūn pò jîn-ài.

6願你派一個pháiⁿ人管轄伊，　　派一個對敵khiā tī伊ê chiàⁿ-pêng。Goān Lí phài chi̍t ê pháiⁿ-lâng koán-hat i, Phài chi̍t ê tùi-te̍k khiā tī i ê chiàⁿ-pêng.

7伊受審判ê時，願伊出來受定罪；　　願伊ê祈禱變做罪過。I siū sím-phòaⁿ ê sî, goān i chhut-lâi siū tēng-chōe; Goān i ê kî-tó pìⁿ-chòe chōe-kòa.

8願伊ê日子短少；　　願別人得tio̍h伊ê職。Goān i ê ji̍t-chí té-chió; Goān pa̍t-lâng tit-tio̍h i ê chit.

9願伊ê kiáⁿ兒做孤兒，　　伊ê bó͘做寡婦。Goān i ê kiáⁿ-jî chòe ko͘-jî, I ê bó͘ chòe kóaⁿ-hū.

10願伊ê kiáⁿ兒四界去求乞；　　Tùi in拋荒ê所在出來討食。Goān i ê kiáⁿ-jî sì-kòe khì kiû-khit; Tùi in pha-hng ê só͘-chāi chhut-lâi thó-chia̍h.

11願債主用計智取伊一切所有ê；　　願生份人搶伊tio̍h-bòa所得tio̍h-ê。Goān chè-chú ēng kè-tì chhú i it-chhè só͘-ū--ê; Goān siⁿ-hūn-lâng chhiúⁿ i tio̍h-bòa só͘ tit-tio̍h--ê.

12願無人接續施恩hō͘伊；　　願無人可憐伊ê孤兒。Goān bô lâng chiap-sio̍k si-un hō͘ i; Goān bô lâng khó-lîn i ê ko͘-jî.

13願伊ê後裔斷絕，　　In ê名字受擦滅，無傳tī 下代。Goān i ê hō͘-è toān-choa̍t, In ê miâ-jī siū chhat-bia̍t, bô thoân tī ē-tāi.

14願伊ê祖公ê罪惡hō͘耶和華記得；　　願伊ê老母ê罪過無得tio̍h擦消。Goān i ê chó͘-kong ê chōe-ok hō͘ Iâ-hô-hoa kì-tit; Goān i ê lāu-bú ê chē-kòa bô tit-tio̍h chhat-siau.

15願hiah-ê罪惡常常tī耶和華ê面前，　　致到伊滅in ê名tī世間。Goān hiah ê chōe-ok siông-siông tī Iâ-hô-hoa ê bīn-chêng, Tì-kàu I bia̍t in ê miâ tī sè-kan.

16因為伊無想tio̍h beh行憐憫；　　反tńg窘迫hit-ê sòng-hiong困苦ê人，　　Beh害死hiah-ê傷心ê人。In-ūi i bô siūⁿ-tio̍h beh kiâⁿ lîn-bín; Hoán-tńg khún-pek hit ê sòng-hiong khùn-khó͘ ê lâng, Beh hāi-sí hiah ê siong-sim ê lâng.

17伊ài咒詛，咒詛就到tī伊；　　伊m̄-ài祝福，祝福就離開伊遠遠。I ài chiù-chó͘, chiù-chó͘ chiū kàu tī i; I m̄-ài chiok-hok, chiok-hok chiū lī-khui i hn̄g-hn̄g.

18伊用咒詛做衫來穿；　　咒詛就親像水入伊ê腹內，　　親像油入伊ê骨。I ēng chiù-chó͘ chòe saⁿ lâi chhēng; chiù-chó͘ chiū chhin-chhiūⁿ chúi ji̍p i ê pak-lāi, Chhin-chhiūⁿ iû ji̍p i ê kut.

19願chit-ê咒詛做伊穿tī身軀ê衣服，　　做伊常常hâ ê腰帶。Goān chit ê chiù-chó͘ chòe i chhēng tī sin-khu ê i-ho̍k, Chòe i siông-siông hâ ê io-tòa.

20這就是我ê對敵，kap用pháiⁿ話攻擊我ê神魂ê人，　　Tùi耶和華hia所受ê報應。Che chiū-sī góa ê tùi-te̍k, kap ēng pháiⁿ-ōe kong-kek góa ê sîn-hûn ê lâng, Tùi Iâ-hô-hoa hia só͘ siū ê pò-èng.

21主耶和華ah，求你因為你ê名好款待我；　　因為你ê慈愛真好，求你牽救我。Chú Iâ-hô-hoa ah, kiû Lí in-ūi Lí ê miâ hó khoán-thāi góa; In-ūi Lí ê chû-ài chin-hó, kiû Lí khan-kiù góa.

22因為我sòng-hiong、困苦，　　我ê內心受傷。In-ūi góa sòng-hiong, khùn-khó͘, Góa ê lāi-sim siū-siong.

23我ê歲壽親像日影漸漸chhiâ；　　我親像草蜢受趕出。Góa ê hè-siū chhin-chhiūⁿ ji̍t-iáⁿ chiām-chiām chhiâ; Góa chhin-chhiūⁿ chháu-meh siū kóaⁿ-chhut.

24我因為禁食，腳頭u痠軟；　　我ê肉消瘦，無潤澤。Góa in-ūi kìm-chia̍h, kha-thâu-u sng-nńg; Góa ê bah siau-sán, bô lūn-te̍k.

25我受in ê譭謗；　　In看見我，就搖頭。Góa siū in ê húi-pòng; In khòaⁿ-kìⁿ góa, chiū iô-thâu.

26耶和華我ê上帝ah，求你幫贊我；　　照你ê慈愛拯救我；Iâ-hô-hoa góa ê Siōng-tè ah, kiû Lí pang-chān góa; Chiàu Lí ê chû-ài chín-kiù góa;

27Hō͘ in知這是出tī你ê手；　　是你耶和華所行ê事。Hō͘ in chai che sī chhut tī Lí ê chhiú; Sī Lí Iâ-hô-hoa só͘ kiâⁿ ê sū.

28Chhut-cchai7 in咒詛，求你賜福；　　In起來ê時，beh tú-tio̍h見笑，你ê奴僕beh歡喜。Chhut-chāi in chiù-chó͘, kiû Lí sù-hok; In khí--lâi ê sî, beh tú-tio̍h kiàn-siàu, Lí ê lô͘-po̍k beh hoaⁿ-hí.

29願我ê對敵用凌辱做衫穿；　　願in用in ê見笑做袍，moa身軀。Goān góa ê tùi-te̍k ēng lêng-jio̍k chòe-saⁿ chhēng; Goān in ēng in ê kiàn-siàu chòe phàu, moa sin-khu.

30我beh用我ê嘴大大感謝耶和華；　　我beh tī眾人ê中間o-ló伊。Góa beh ēng góa ê chhùi tōa-tōa kám-siā Iâ-hô-hoa; Góa beh tī chèng-lâng ê tiong-kan o-ló I.

31因為伊beh khiā tī sòng-hiong人ê chiàⁿ-pêng，　　Beh救伊脫離審判伊ê性命ê人。In-ūi I beh khiā tī sòng-hiong lâng ê chiàⁿ-pêng, Beh kiù i thoat-lī sím-phòaⁿ i ê sìⁿ-miā ê lâng.