1大衛ê詩。1) 耶和華對我ê主講，你坐我ê右pêng，　　Thèng候我hō͘你ê對敵做你ê腳踏。Tāi-pi̍t ê si.1) Iâ-hô-hoa tùi góa ê chú kóng, Lí chē Góa ê iū-pêng, Thèng-hāu Góa hō͘ lí ê tùi-te̍k chòe Lí ê kha-ta̍h.

2耶和華beh tùi錫安伸出你有能力ê柺；　　你tio̍h tī你對敵ê中間掌權。Iâ-hô-hoa beh tùi Sek-an chhun-chhut lí ū lêng-le̍k ê koáiⁿ; Lí tio̍h tī lí tùi-te̍k ê tiong-kan chiáng-koân.

3你出軍ê日，你ê百姓beh用聖潔ê裝飾做衫，甘心獻家己；　　你ê壯丁歸óa你，親像早起時所結ê露水。Lí chhut-kun ê ji̍t, lí ê peh-sìⁿ beh ēng sèng-kiat ê chng-thāⁿ chòe saⁿ, kam-sim hiàn ka-kī; Lí ê chòng-teng kui-óa lí, chhin-chhiūⁿ chá-khí-sî só͘ kiat ê lō͘-chúi.

4耶和華已經chiù-chōa，的確無退悔，講，　　你永遠做祭司，照Be̍k-ki-sé-tek ê班列。Iâ-hô-hoa í-keng chiù-chōa, tek-khak bô thè-hóe, kóng, Lí éng-oán chòe chè-si, Chiàu Be̍k-ki-sé-tek ê pan-lia̍t.

5Tī你chiàⁿ-pêng ê主，　　當伊受氣ê日，beh phah敗列王。Tī lí chiàⁿ-pêng ê Chú, Tng I siū-khì ê ji̍t, beh phah-pāi lia̍t-ông.

6伊beh tī列邦中來審判，伊beh hō͘身屍遍滿ta̍k所在；　　伊beh tī chōe-chōe國phah破對敵ê頭殼。I beh tī lia̍t-pang-tiong lâi sím-phòaⁿ, I beh hō͘ sin-si piàn-móa ta̍k só͘-chāi; I beh tī chōe-chōe kok phah-phòa tùi-te̍k ê thâu-khak.

7伊beh lim路邊ê溪水；　　因為án-ni，伊beh kia̍h起頭。I beh lim lō͘-piⁿ ê khoe-chúi; In-ūi án-ni, i beh kia̍h-khí thâu.

1Lín tio̍h o-ló耶和華。　　Tī正直人ê會中，kap公會中，　　我beh專心感謝耶和華。Lín tio̍h o-ló Iâ-hô-hoa. Tī chèng-ti̍t lâng ê hōe-tiong, kap kong-hōe tiong, Góa beh choan-sim kám-siā Iâ-hô-hoa.

2耶和華ê所做真大，　　凡若歡喜伊所做ê，lóng beh查考伊。Iâ-hô-hoa ê só͘ chòe chin-tōa, Hoān-nā hoaⁿ-hí I só͘ chòe--ê, lóng beh chhâ-khó i.

3伊所行ê是尊貴威嚴；　　伊ê義永永tī-teh。I só͘ kiâⁿ--ê sī chun-kùi ui-giâm; I ê gī éng-éng tī-teh.

4伊行奇事，hō͘人記念；　　耶和華有恩惠，有憐憫。I kiâⁿ kî-sū, hō͘ lâng kì-liām; Iâ-hô-hoa ū un-hūi, ū lîn-bín.

5伊賞賜米糧hō͘敬畏伊ê人；　　伊beh永遠記念伊ê約。I siúⁿ-sù bí-niû hō͘ kèng-ùi I ê lâng; I beh éng-oán kì-liām I ê iok.

6伊將伊大權能ê所做顯明tī伊ê百姓；　　將列邦ê業賞賜in。I chiong I tōa koân-lêng ê só͘-chòe hián-bêng tī I ê peh-sìⁿ; Chiong lia̍t-pang ê gia̍p siúⁿ-sù in.

7伊ê手所做是誠實公平；　　伊ê教示lóng是確實。I ê chhiú só͘-chòe sī sêng-si̍t kong-pêng; I ê kà-sī lóng sī khak-si̍t.

8是永世代堅固ê，　　是照誠實正直設立ê。Sī éng sè-tāi kian-kò͘--ê, Sī chiàu sêng-si̍t chèng-ti̍t siat-li̍p--ê.

9伊ǹg伊ê百姓施行救贖；　　伊定tio̍h伊ê約，直到永遠；　　伊ê名是聖，thang驚畏。I ǹg I ê peh-sìⁿ si-hêng kiù-sio̍k; I tiāⁿ-tio̍h I ê iok, ti̍t-kàu éng-oán; I ê miâ sī sèng, thang kiaⁿ-ùi.

10敬畏耶和華是智慧ê根本；　　見若照án-ni行ê，chiah有聰明；　　耶和華ê名聲直到永遠。Kèng-ùi Iâ-hô-hoa sī tì-hūi ê kun-pún; Kìⁿ-nā chiàu án-ni kiâⁿ-ê, chiah ū chhang-miâ; Iâ-hô-hoa ê miâ-siaⁿ ti̍t-kàu éng-oán.

1Lín tio̍h o-ló耶和華。　　敬畏耶和華，大歡喜伊ê命令ê，　　Chit號人有福氣。Lín tio̍h o-ló Iâ-hô-hoa. Kèng-ùi Iâ-hô-hoa, tōa hoaⁿ-hí I ê bēng-lēng--ê, Chit-hō lâng ū hok-khì.

2伊ê後裔tī世間的確強盛；　　正直ê人ê後代，的確beh得tio̍h福氣。I ê hō͘-è tī sè-kan tek-khak kiông-sēng; Chèng-ti̍t ê lâng ê āu-tāi, tek-khak beh tit-tio̍h hok-khì.

3伊ê家內有貨物，有錢財；　　伊ê公義船到永遠。I ê ke-lāi ū hè-mi̍h, ū chîⁿ-châi; I ê kong-gī chûn kàu éng-oán.

4正直ê人tī烏暗ê中間，有光為tio̍h伊發現；　　伊有恩惠，有憐憫，有公義。Chèng-ti̍t ê lâng tī o͘-àm ê tiong-kan, ū kng ūi-tio̍h i hoat-hiān; I ū un-hūi, ū lîn-bín, ū kong-gī.

5施恩來借人ê，有福氣；　　伊受審判ê時，beh訴明家己ê事。Si-un lâi chioh lâng--ê, ū hok-khì; I siū sím-phòaⁿ ê sî, beh sò͘-bêng ka-kī ê sū.

6伊永永無搖choah；　　義人受記念，直到永遠。I éng-éng bô iô-choah; Gī-lâng siū kì-liām, ti̍t-kàu éng-oán.

7伊m̄驚pháiⁿ消息；　　伊ê心堅固，óa靠耶和華。I m̄-kiaⁿ pháiⁿ siau-sit; I ê sim kian-kò͘, óa-khò Iâ-hô-hoa.

8伊ê心自在，lóng無驚惶，　　直到伊看見伊ê對敵受報應。I ê sim chū-chāi, lóng bô kiaⁿ-hiâⁿ, Ti̍t-kàu i khòaⁿ-kìⁿ i ê tùi-te̍k siū pò-èng.

9伊大捨施，伊賑濟sòng-hiong人；　　伊ê仁義存到永遠；　　伊ê角得tio̍h舉起，有榮光。I tōa siá-si, i chín-chè sòng-hiong lâng; I ê jîn-gī chûn kàu éng-oán; I ê kak tit-tio̍h kú-khí, ū êng-kng.

10Pháiⁿ人看了bōe-khat得，　　的確咬牙切齒，來消滅；　　Pháiⁿ人ê心願beh歸tī無。Pháiⁿ-lâng khòaⁿ-liáu bōe-khat-tit, Tek-khak kā-gê chhiat-chhí, lâi siau-bia̍t; Pháiⁿ-lâng ê sim-goān beh kui tī bô.