1以色列出埃及。　　雅各家離開言語bōe相通ê百姓；Í-sek-lia̍t chhut Ai-ki̍p. Ngá-kok-ke lī-khui giân-gú bōe siong-thong ê peh-sìⁿ;

2Hit時猶大做伊ê聖所，　　以色列做伊ê邦國。Hit-sî Iû-tāi chòe I ê sèng-só͘, Í-sek-lia̍t chòe I ê pang-kok.

3大海看見就逃走，約旦河亦流倒tńg。Tōa-hái khòaⁿ-kìⁿ chiū tô-cháu, Iok-tàn hô ia̍h lâu tò-tńg.

4大山 tiô跳親像羊káng；　　細山 tiô跳親像羊á-kiáⁿ。Tōa-soaⁿ tiô-thiàu chhin-chhiūⁿ iûⁿ-káng; Sòe-soaⁿ tiô-thiàu chhin-chhiūⁿ iûⁿ-á-kiáⁿ.

5大海ah，你為啥tāi-chì逃走？　　約旦ah，你為啥tāi-chì流倒tńg？Tōa-hái ah, lí ūi siáⁿ tāi-chì tô-cháu? Iok-tàn ah, lí ūi siáⁿ tāi-chì lâu tò-tńg?

6大山ah，你怎樣tiô跳親像羊káng？　　細山 ah，你怎樣tiô跳親像羊á-kiáⁿ？Tōa-soaⁿ ah, lí cháiⁿ-iūⁿ tiô-thiàu chhin-chhiūⁿ iûⁿ-káng? Sòe-soaⁿ ah, lí cháiⁿ-iūⁿ tiô-thiàu chhin-chhiūⁿ iûⁿ-á-kiáⁿ?

7地ah，你見tio̍h主ê面，　　見tio̍h雅各ê上帝ê面，就tio̍h ngia̍uh-ngia̍uh-chhoah。Tōe ah, lí kìⁿ-tio̍h Chú ê bīn, Kìⁿ-tio̍h Ngá-kok ê Siōng-tè ê bīn, chiū tio̍h ngia̍uh-ngia̍uh-chhoah.

8伊hō͘石磐變做水池，　　Hō͘ tēng石變做水泉。I hō͘ chio̍h-pôaⁿ pìⁿ-chòe chúi-tî, Hō͘ tēng-chio̍h pìⁿ-chòe chúi-chôaⁿ.

1耶和華ah，榮光莫得歸hō͘阮，莫得歸hō͘阮，　　Tio̍h因為你ê慈愛kap誠實，歸tī你ê名。Iâ-hô-hoa ah, êng-kng bo̍h-tit kui hō͘ goán, bo̍h-tit kui hō͘ goán, Tio̍h in-ūi Lí ê chû-ài kap sêng-si̍t, kui tī Lí ê miâ.

2Mih-sái tio̍h hō͘外邦人講，　　Taⁿ，in ê上帝tī toh落？Mih-sái tio̍h hō͘ gōa-pang-lâng kóng, Taⁿ, in ê Siōng-tè tī toh-lo̍h?

3總是阮ê上帝tī天頂；　　Lóng照伊所ài-ê行tāi-chì。Chóng-sī goán ê Siōng-tè tī thiⁿ-téng; Lóng chiàu I só͘-ài--ê kiâⁿ tāi-chì.

4In ê偶像是銀ê，金ê，　　是人ê手所造ê。In ê ngó͘-siōng sī gûn--ê, kim--ê, Sī lâng ê chhiú só͘ chō--ê.

5In有嘴，亦bōe講話；　　有目睭，亦bōe看；In ū chhùi, ia̍h bōe kóng-ōe; Ū ba̍k-chiu, ia̍h bōe khòaⁿ;

6In有耳孔，亦bōe聽；　　有鼻孔，亦bōe鼻；In ū hī-khang, ia̍h bōe thiaⁿ; Ū phīⁿ-khang, ia̍h bōe phīⁿ;

7In有手，亦bōe the̍h；　　有腳，亦bōe行；　　In亦無用in ê嚨喉出聲。In ū chhiú, ia̍h bōe the̍h; Ū kha, ia̍h bōe kiâⁿ; In ia̍h bô ēng in ê nâ-âu chhut-siaⁿ.

8造in-ê，靠in-ê，　　Lóng beh親像in。Chō in ê, khò in ê, Lóng beh chhin-chhiūⁿ in.

9以色列ah，你tio̍h óa靠耶和華；　　伊是in ê幫贊，in ê藤牌。Í-sek-lia̍t ah, lí tio̍h óa-khò Iâ-hô-hoa; I sī in ê pang-chān, in ê tîn-pâi.

10亞倫ê家ah，lín tio̍h óa靠耶和華；　　伊是in ê幫贊，in ê藤牌。A-lûn ê ke ah, lín tio̍h óa-khò Iâ-hô-hoa; I sī in ê pang-chān, in ê tîn-pâi.

11Lín敬畏耶和華ê，tio̍h óa靠耶和華；　　伊是in ê幫贊，in ê藤牌。Lín kèng-ùi Iâ-hô-hoa--ê, tio̍h óa-khò Iâ-hô-hoa; I sī in ê pang-chān, in ê tîn-pâi.

12耶和華平時siàu念阮，伊beh賜福氣；　　Beh賜福氣hō͘以色列ê家；　　Beh賜福氣hō͘亞倫ê家。Iâ-hô-hoa pêng-sî siàu-liām goán, I beh sù hok-khì; Beh sù hok-khì hō͘ Í-sek-lia̍t ê ke; Beh sù hok-khì hō͘ A-lûn ê ke.

13見若敬畏耶和華ê人，　　無論大細，伊beh賜福氣hō͘ in。Kìⁿ-nā kèng-ùi Iâ-hô-hoa ê lâng, Bô-lūn tōa-sòe, I beh sù hok-khì hō͘ in.

14願耶和華加添lín，　　加添lín kap lín ê kiáⁿ孫。Goān Iâ-hô-hoa ke-thiⁿ lín, Ke-thiⁿ lín kap lín ê kiáⁿ-sun.

15創造天地ê耶和華，　　賞賜福氣hō͘ lín。Chhòng-chō thiⁿ tōe ê Iâ-hô-hoa, Siúⁿ-sù hok-khì hō͘ lín.

16天是耶和華ê天，　　地是伊hō͘世間人ê。Thiⁿ sī Iâ-hô-hoa ê thiⁿ, Tōe sī I hō͘ sè-kan-lâng--ê.

17死人bōe能o-ló耶和華；　　落到靜靜ê所在ê，亦lóng bōe能。Sí-lâng bōe-ōe o-ló Iâ-hô-hoa; Lo̍h kàu chēng-chēng ê só͘-chāi--ê, ia̍h lóng bōe-ōe.

18總是阮beh o-ló耶和華，　　Tùi chit時到永遠。　　Lín tio̍h o-ló耶和華。Chóng-sī goán beh o-ló Iâ-hô-hoa, Tùi chit-sî kàu éng-oán. Lín tio̍h o-ló Iâ-hô-hoa.

1我疼耶和華，因為伊聽我ê聲，我ê懇求。Góa thiàⁿ Iâ-hô-hoa, In-ūi I thiaⁿ góa ê siaⁿ, góa ê khún-kiû.

2伊已經àⁿ耳孔聽我；　　所以我一世人beh求叫伊。I í-keng àⁿ hī-khang thiaⁿ góa; Só͘-í góa chi̍t-sì-lâng beh kiû-kiò I.

3死無ê索纏tio̍h我，　　陰間ê痛苦擒tio̍h我；　　我tú-tio̍h患難憂苦。Sí-bô ê soh tîⁿ-tio̍h góa, Im-kan ê thòng-khó͘ khîⁿ-tio̍h góa; Góa tú-tio̍h hoān-lān iu-khó͘.

4我就求叫耶和華ê名，講，　　耶和華ah，taⁿ求你救我ê性命。Góa chiū kiû-kiò Iâ-hô-hoa ê miâ, kóng, Iâ-hô-hoa ah, taⁿ kiû Lí kiù góa ê sìⁿ-miā.

5耶和華有恩惠，有公義；　　阮ê上帝有慈悲。Iâ-hô-hoa ū un-hūi, ū kong-gī; Goán ê Siōng-tè ū chû-pi.

6耶和華保護戇直ê人；　　我到tī卑微ê地位，伊就救我。Iâ-hô-hoa pó-hō͘ gōng-ti̍t ê lâng; Góa kàu tī pi-bî ê tōe-ūi, I chiū kiù góa.

7我ê神魂ah，tio̍h歸tī你安歇ê所在，　　因為耶和華用大恩款待你。Góa ê sîn-hûn ah, tio̍h kui tī lí an-hioh ê só͘-chāi, In-ūi Iâ-hô-hoa ēng tōa-un khoán-thāi lí.

8因為你救我ê性命免得死無；　　救我ê目睭免流目屎；　　救我ê腳免跋倒。In-ūi Lí kiù góa ê sìⁿ-miā bián-tit sí-bô; Kiù góa ê ba̍k-chiu bián lâu ba̍k-sái; Kiù góa ê kha bián poa̍h-tó.

9我beh tī耶和華ê面前，　　行tī活人ê地。Góa beh tī Iâ-hô-hoa ê bīn-chêng, Kiâⁿ tī oa̍h-lâng ê tōe.

10我信，所以講；　　我受極大ê困苦；Góa sìn, só͘-í kóng; Góa siū ke̍k-tōa ê khùn-khó͘;

11我bat著急來講，　　人lóng是虛假。Góa bat tio̍h-kip lâi kóng, Lâng lóng sī hu-ké.

12耶和華賞賜我一切ê大恩，　　我beh用甚麼報答伊？Iâ-hô-hoa siúⁿ-sù góa it-chhè ê tōa-un, Góa beh ēng sím-mi̍h pò-tap I?

13我beh捧起救恩ê杯，　　求叫耶和華ê名。Góa beh phâng-khí kiù-un ê poe, Kiû-kiò Iâ-hô-hoa ê miâ.

14我beh tī伊眾百姓ê面前，　　對耶和華謝我ê願。Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān.

15耶和華看伊聖ê百姓ê死，　　做真寶貝。Iâ-hô-hoa khòaⁿ I sèng ê peh-sìⁿ ê sí, Chòe chin pó-pòe.

16耶和華ah，我實在是你ê奴僕；　　我是你ê奴僕，是你女婢ê kiáⁿ；　　你已經tháu開綑縛我ê索。Iâ-hô-hoa ah, góa si̍t-chāi sī Lí ê lô͘-po̍k; Góa sī Lí ê lô͘-po̍k, sī Lí lú-pī ê kiáⁿ; Lí í-keng tháu-khui khún-pa̍k góa ê soh.

17我beh用感謝ê祭獻hō͘你；　　Koh beh求叫耶和華ê名。Góa beh ēng kám-siā ê chè hiàn hō͘ Lí; Koh beh kiû-kiò Iâ-hô-hoa ê miâ.

18我beh tī伊眾百姓ê面前，　　對耶和華謝我ê願。Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān.

19Tī耶和華厝ê院內，　　Tī你耶路撒冷ê中間；　　Lín tio̍h o-ló耶和華。Tī Iâ-hô-hoa chhù ê īⁿ-lāi, Tī lí Iâ-lō͘-sat-léng ê tiong-kan; Lín tio̍h o-ló Iâ-hô-hoa.