1我疼耶和華，因為伊聽我ê聲，我ê懇求。Góa thiàⁿ Iâ-hô-hoa, In-ūi I thiaⁿ góa ê siaⁿ, góa ê khún-kiû.

2伊已經àⁿ耳孔聽我；　　所以我一世人beh求叫伊。I í-keng àⁿ hī-khang thiaⁿ góa; Só͘-í góa chi̍t-sì-lâng beh kiû-kiò I.

3死無ê索纏tio̍h我，　　陰間ê痛苦擒tio̍h我；　　我tú-tio̍h患難憂苦。Sí-bô ê soh tîⁿ-tio̍h góa, Im-kan ê thòng-khó͘ khîⁿ-tio̍h góa; Góa tú-tio̍h hoān-lān iu-khó͘.

4我就求叫耶和華ê名，講，　　耶和華ah，taⁿ求你救我ê性命。Góa chiū kiû-kiò Iâ-hô-hoa ê miâ, kóng, Iâ-hô-hoa ah, taⁿ kiû Lí kiù góa ê sìⁿ-miā.

5耶和華有恩惠，有公義；　　阮ê上帝有慈悲。Iâ-hô-hoa ū un-hūi, ū kong-gī; Goán ê Siōng-tè ū chû-pi.

6耶和華保護戇直ê人；　　我到tī卑微ê地位，伊就救我。Iâ-hô-hoa pó-hō͘ gōng-ti̍t ê lâng; Góa kàu tī pi-bî ê tōe-ūi, I chiū kiù góa.

7我ê神魂ah，tio̍h歸tī你安歇ê所在，　　因為耶和華用大恩款待你。Góa ê sîn-hûn ah, tio̍h kui tī lí an-hioh ê só͘-chāi, In-ūi Iâ-hô-hoa ēng tōa-un khoán-thāi lí.

8因為你救我ê性命免得死無；　　救我ê目睭免流目屎；　　救我ê腳免跋倒。In-ūi Lí kiù góa ê sìⁿ-miā bián-tit sí-bô; Kiù góa ê ba̍k-chiu bián lâu ba̍k-sái; Kiù góa ê kha bián poa̍h-tó.

9我beh tī耶和華ê面前，　　行tī活人ê地。Góa beh tī Iâ-hô-hoa ê bīn-chêng, Kiâⁿ tī oa̍h-lâng ê tōe.

10我信，所以講；　　我受極大ê困苦；Góa sìn, só͘-í kóng; Góa siū ke̍k-tōa ê khùn-khó͘;

11我bat著急來講，　　人lóng是虛假。Góa bat tio̍h-kip lâi kóng, Lâng lóng sī hu-ké.

12耶和華賞賜我一切ê大恩，　　我beh用甚麼報答伊？Iâ-hô-hoa siúⁿ-sù góa it-chhè ê tōa-un, Góa beh ēng sím-mi̍h pò-tap I?

13我beh捧起救恩ê杯，　　求叫耶和華ê名。Góa beh phâng-khí kiù-un ê poe, Kiû-kiò Iâ-hô-hoa ê miâ.

14我beh tī伊眾百姓ê面前，　　對耶和華謝我ê願。Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān.

15耶和華看伊聖ê百姓ê死，　　做真寶貝。Iâ-hô-hoa khòaⁿ I sèng ê peh-sìⁿ ê sí, Chòe chin pó-pòe.

16耶和華ah，我實在是你ê奴僕；　　我是你ê奴僕，是你女婢ê kiáⁿ；　　你已經tháu開綑縛我ê索。Iâ-hô-hoa ah, góa si̍t-chāi sī Lí ê lô͘-po̍k; Góa sī Lí ê lô͘-po̍k, sī Lí lú-pī ê kiáⁿ; Lí í-keng tháu-khui khún-pa̍k góa ê soh.

17我beh用感謝ê祭獻hō͘你；　　Koh beh求叫耶和華ê名。Góa beh ēng kám-siā ê chè hiàn hō͘ Lí; Koh beh kiû-kiò Iâ-hô-hoa ê miâ.

18我beh tī伊眾百姓ê面前，　　對耶和華謝我ê願。Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān.

19Tī耶和華厝ê院內，　　Tī你耶路撒冷ê中間；　　Lín tio̍h o-ló耶和華。Tī Iâ-hô-hoa chhù ê īⁿ-lāi, Tī lí Iâ-lō͘-sat-léng ê tiong-kan; Lín tio̍h o-ló Iâ-hô-hoa.

1萬國ah，lín tio̍h o-ló耶和華；　　萬百姓ah，lín tio̍h稱呼伊。Ban-kok ah, lín tio̍h o-ló Iâ-hô-hoa; Bān peh-sìⁿ ah, lín tio̍h chheng-hō͘ I.

2因為伊對咱大施慈愛；　　耶和華ê誠實永遠tī-teh。　　Lín tio̍h o-ló耶和華。In-ūi I tùi lán tōa si chû-ài; Iâ-hô-hoa ê sêng-si̍t éng-oán tī-teh. Lín tio̍h o-ló Iâ-hô-hoa.

1Lín tio̍h感謝耶和華，因為伊是好；　　因為伊ê慈愛永遠tī-teh。Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh.

2願以色列講，　　伊ê慈愛永遠tī-teh。Goān Í-sek-lia̍t kóng, I ê chû-ài éng-oán tī-teh.

3願亞倫ê家講，　　伊ê慈愛永遠tī-teh。Goān A-lûn ê ke kóng, I ê chû-ài éng-oán tī-teh.

4願敬畏耶和華ê人講，　　伊ê慈愛永遠tī-teh。Goān kèng-ùi Iâ-hô-hoa ê lâng kóng, I ê chû-ài éng-oán tī-teh.

5我tī危急ê中間求叫耶和華；　　耶和華就應我，將我hē tī寬闊ê所在。Góa tī gûi-kip ê tiong-kan kiû-kiò Iâ-hô-hoa; Iâ-hô-hoa chiū ìn góa, chiong góa hē tī khoan-khoah ê só͘-chāi.

6有耶和華kap我tī-teh，我就無驚；　　人beh啥法得我ta-ôa？Ū Iâ-hô-hoa kap góa tī-teh, góa chiū bô kiaⁿ; Lâng beh siáⁿ hoat-tit góa ta-ôa?

7Tī hiah-ê幫贊我ê ê中間，有耶和華kap我tī-teh；　　所以我beh看見hiah-ê怨恨我ê人受報應。Tī hiah ê pang-chān góa--ê ê tiong-kan, ū Iâ-hô-hoa kap góa tī-teh; Só͘-í góa beh khòaⁿ-kìⁿ hiah ê oàn-hūn góa ê lâng siū pò-èng.

8Óa靠耶和華，　　比óa靠人khah好。Óa-khò Iâ-hô-hoa, Pí óa-khò lâng khah-hó.

9Óa靠耶和華，　　比óa靠王親khah好。Óa-khò Iâ-hô-hoa, Pí óa-khò ông-chhin khah-hó.

10萬百姓圍纍我；　　我óa靠耶和華ê名，beh剿滅in。Bān peh-sìⁿ ûi-lûi góa; Góa óa-khò Iâ-hô-hoa ê miâ, beh châu-bia̍t in.

11In圍我，困我；　　我óa靠耶和華ê名，beh剿滅in。In ûi--góa, khùn--góa; Góa óa-khò Iâ-hô-hoa ê miâ, beh châu-bia̍t in.

12In親像蜂圍我；　　親像燒刺phè ê火，受phah-hoa。　　我óa靠耶和華ê名beh剿滅in。In chhin-chhiūⁿ phang ûi góa; Chhin-chhiūⁿ sio chhì-phè ê hé, siū phah-hoa. Góa óa-khò Iâ-hô-hoa ê miâ beh châu-bia̍t in.

13你出力chhia我，beh hō͘我倒；　　總是耶和華幫贊我。Lí chhut-la̍t chhia góa, beh hō͘ góa tó; Chóng-sī Iâ-hô-hoa pang-chān góa.

14耶和華是我ê氣力，是我ê詩歌；　　伊亦成做拯救我ê。Iâ-hô-hoa sī góa ê khùi-la̍t, sī góa ê si-koa; I ia̍h chiâⁿ-chòe chín-kiù góa ê.

15Tī義人ê布棚內有歡喜ê聲，拯救ê聲；　　耶和華ê chiàⁿ手施出大權能。Tī gī-lâng ê pò͘-pîⁿ-lāi ū hoaⁿ-hí ê siaⁿ, chín-kiù ê siaⁿ; Iâ-hô-hoa ê chiàⁿ-chhiú si-chhut tōa koân-lêng.

16耶和華ê chiàⁿ手kia̍h高；　　耶和華ê chiàⁿ手施出大權能。Iâ-hô-hoa ê chiàⁿ-chhiú kia̍h-koâiⁿ; Iâ-hô-hoa ê chiàⁿ-chhiú si-chhut tōa koân-lêng.

17我bōe致到死，iáu能活teh；　　續beh報揚耶和華ê所做。Góa bōe tì-kàu sí, iáu ōe oa̍h-teh; Sòa beh pò-iông Iâ-hô-hoa ê só͘-chòe.

18耶和華bat嚴嚴警戒我；　　總是未有將我交tī死無。Iâ-hô-hoa bat giâm-giâm kéng-kài góa; Chóng-sī bē ū chiong góa kau tī sí-bô.

19Tio̍h kā我開義ê門；　　我beh入去，感謝耶和華。Tio̍h kā góa khui gī ê mn̂g; Góa beh ji̍p--khì, kám-siā Iâ-hô-hoa.

20這是耶和華ê門，　　義ê人beh入去。Che sī Iâ-hô-hoa ê mn̂g, Gī ê lâng beh ji̍p--khì.

21我beh感謝你，因為你已經應我；　　Koh成做拯救我ê。Góa beh kám-siā Lí, in-ūi Lí í-keng ìn góa; Koh chiâⁿ-chòe chín-kiù góa--ê.

22師傅所棄sak ê石，　　已經成做厝角頭ê石。Sai-hū só͘ khì-sak ê chio̍h, Í-keng chiâⁿ-chòe chhù-kak-thâu ê chio̍h.

23這是耶和華所做ê，　　咱ê目睭看伊做奇怪。Che sī Iâ-hô-hoa só͘-chòe--ê, Lán ê ba̍k-chiu khòaⁿ i chòe kî-koài.

24這是耶和華所定tio̍h ê日；　　咱tī chit日ê中間beh歡喜快樂。Che sī Iâ-hô-hoa só͘ tiāⁿ-tio̍h ê ji̍t; Lán tī chit-ji̍t ê tiong-kan beh hoaⁿ-hí khoài-lo̍k.

25耶和華ah，taⁿ求你拯救；　　耶和華ah，taⁿ求你hō͘阮發達。Iâ-hô-hoa ah, taⁿ kiû Lí chín-kiù; Iâ-hô-hoa ah, taⁿ kiû Lí hō͘ goán hoat-ta̍t.

26奉耶和華ê名來ê，應該得tio̍h福氣；　　阮tùi耶和華ê厝kā lín祝福。Hōng Iâ-hô-hoa ê miâ lâi--ê, eng-kai tit-tio̍h hok-khì; Goán tùi Iâ-hô-hoa ê chhù kā lín chiok-hok.

27耶和華是上帝，伊ê光照阮；　　Tio̍h用索縛祭祀ê cheng-siⁿ到壇角。Iâ-hô-hoa sī Siōng-tè, I ê kng chiò goán; Tio̍h ēng soh pa̍k chè-sū ê cheng-siⁿ kàu tôaⁿ-kak.

28你是我ê上帝，我beh感謝你；　　你是我ê上帝，我beh尊你做高。Lí sī góa ê Siōng-tè, góa beh kám-siā Lí; Lí sī góa ê Siōng-tè, góa beh chun Lí chòe koâiⁿ.

29Lín tio̍h感謝耶和華，因為伊是好；　　因為伊ê慈愛永遠tī-teh。Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh.