1所行完全，遵thàn耶和華律法ê， 　　Chit號人有福氣。Só͘ kiâⁿ oân-choân, chun-thàn Iâ-hô-hoa lu̍t-hoat ê, Chit-hō lâng ū hok-khì.

2遵守伊干證ê話，　　專心chhē伊ê，chit號人有福氣。Chun-siú I kan-chèng ê ōe, Choan-sim chhē I--ê, chit-hō lâng ū hok-khì.

3In無做不義ê事；　　In遵thàn伊ê道路。In bô chòe put-gī ê sū; In chun-thàn I ê tō-lō͘.

4你bat將你教示ê話吩咐阮；　　是ài阮慇勤遵守。Lí bat chiong Lí kà-sī ê ōe hoan-hù goán; Sī ài goán un-khûn chun-siú.

5願我ê趨向定tio̍h，　　來守你ê律例。Goān góa ê chhu-hiòng tiāⁿ-tio̍h, Lâi siú Lí ê lu̍t-lē.

6我對重你一切ê誡命，　　就不致見笑。Góa tùi-tiōng Lí it-chhè ê kài-bēng, Chiū put-tì kiàn-siàu.

7我學習你公義ê判斷，　　就beh用正直ê心感謝你。Góa ha̍k-si̍p Lí kong-gī ê phòaⁿ-toàn, Chiū beh ēng chèng-ti̍t ê sim kám-siā Lí.

8我beh守你ê律例；　　求你m̄-thang一盡放sak我。Góa beh siú Lí ê lu̍t-lē; Kiû Lí m̄-thang it-chīn pàng-sak góa.

9少年人tio̍h用甚麼來清氣伊ê所行？　　是tio̍h照你ê話來細膩行。Siàu-liân lâng tio̍h ēng sím-mi̍h lâi chheng-khì i ê só͘-kiâⁿ? Sī tio̍h chiàu Lí ê ōe lâi sòe-jī kiâⁿ.

10我專心chhē你；　　求你m̄-thang hō͘我迷路離開你ê誡命。Góa choan-sim chhē Lí; Kiû Lí m̄-thang hō͘ góa bê-lō͘ lī-khui Lí ê kài-bēng.

11我將你ê言語khǹg tī我ê心內，　　免得我得罪你。Góa chiong Lí ê giân-gú khǹg tī góa ê sim-lāi, Bián-tit góa tek-chōe Lí.

12耶和華ah，你是應該受o-ló-ê；　　求你將你ê律例教示我。Iâ-hô-hoa ah, Lí sī eng-kai siū o-ló--ê; Kiû Lí chiong Lí ê lu̍t-lē kà-sī góa.

13你所講一切ê判詞，　　我用嘴唇報揚伊。Lí só͘ kóng it-chhè ê phòaⁿ-sû, Góa ēng chhùi-tûn pò-iông--i.

14我歡喜你干證ê路，　　親像歡喜一切ê財物。Góa hoaⁿ-hí Lí kan-chèng ê lō͘, Chhin-chhiūⁿ hoaⁿ-hí it-chhè ê châi-bu̍t.

15我beh靜靜想你教示ê話，　　亦beh注重你ê道路。Góa beh chēng-chēng siūⁿ Lí kà-sī ê ōe, Ia̍h beh chù-tiōng Lí ê tō-lō͘.

16我beh tī你ê律例中家己快樂，　　我無bōe記得你ê話。Góa beh tī Lí ê lu̍t-lē-tiong ka-kī khoài-lo̍k, Góa bô bōe-kì-tit Lí ê ōe.

17求你用大恩款待你ê奴僕，hō͘我得tio̍h活；　　我就beh守你ê話。Kiû Lí ēng tōa-un khoán-thāi Lí ê lô͘-po̍k, hō͘ góa tit-tio̍h oa̍h; Góa chiū beh siú Lí ê ōe.

18求你開我ê目睭，　　Hō͘我看出你律法中ê奇妙。Kiû Lí khui góa ê ba̍k-chiu, Hō͘ góa khòaⁿ-chhut Lí lu̍t-hoat-tiong ê kî-biāu.

19我tī地上是做寄腳ê；　　求你m̄-thang對我隱密你ê誡命。Góa tī tōe-chiūⁿ sī chòe kià-kha--ê; Kiû Lí m̄-thang tùi góa ún-ba̍t Lí ê kài-bēng.

20我ê心爆裂，　　因為時常切切欣慕你ê判詞。Góa ê sim piak-li̍h, In-ūi sî-siông chhiat-chhiat him-bō͘ Lí ê phòaⁿ-sû.

21你責備驕傲受咒詛ê人，　　就是迷路離開你ê誡命ê人。Lí chek-pī kiau-ngō͘ siū chiù-chó͘ ê lâng, Chiū-sī bê-lō͘ lī-khui Lí ê kài-bēng ê lâng.

22求你kā我除去凌辱kap看輕，　　因為我守你干證ê話。Kiû Lí kā góa tû--khì lêng-jio̍k kap khòaⁿ-khin, In-ūi góa siú Lí kan-chèng ê ōe.

23貴族坐teh，lām-sám議論我；　　但是你ê奴僕靜靜想你ê律例。Kùi-cho̍k chē-teh, lām-sám gī-lūn góa; Nā-sī Lí ê lô͘-po̍k chēng-chēng siūⁿ Lí ê lu̍t-lē.

24你干證ê話是我所歡喜ê，　　是我ê謀士。Lí kan-chèng ê ōe sī góa só͘ hoaⁿ-hí--ê, Sī góa ê bô͘-sū.

25我ê性命kha̍h-tiâu tī土粉，　　求你，照你ê話，拯救我活。Góa ê sìⁿ-miā kha̍h-tiâu tī thô͘-hún, Kiû Lí, chiàu Lí ê ōe, chín-kiù góa oa̍h.

26我講起我所行ê路，你應我；　　求你將你ê律例教示我。Góa kóng-khí góa só͘ kiâⁿ ê lō͘, Lí ìn góa; Kiû Lí chiong Lí ê lu̍t-lē kà-sī góa.

27求你hō͘我明白你教示ê路，　　我就靜靜想你ê奇事。Kiû Lí hō͘ góa bêng-pe̍k Lí kà-sī ê lō͘, Góa chiū chēng-chēng siūⁿ Lí ê kî-sū.

28我ê心神因為憂苦來消溶；　　求你，照你ê話，hō͘我勇健。Góa ê sim-sîn in-ūi iu-khó͘ lâi siau-iûⁿ; Kiû Lí, chiàu Lí ê ōe, hō͘ góa ióng-kiāⁿ.

29求你hō͘我離開奸詐ê路，　　將你ê律法恩賜我。Kiû Lí hō͘ góa lī-khui kan-chà ê lō͘, Chiong Lí ê lu̍t-hoat un-sù góa.

30我有揀信實ê路，　　將你ê判詞hē tī我ê面前。Góa ū kéng sìn-si̍t ê lō͘, Chiong Lí ê phòaⁿ-sû hē tī góa ê bīn-chêng.

31我戀慕你干證ê話；　　耶和華ah，求你m̄-thang hō͘我見笑。Góa loân-bō͘ Lí kan-chèng ê ōe; Iâ-hô-hoa ah, kiû Lí m̄-thang hō͘ góa kiàn-siàu.

32你開闊我ê心ê時，　　我就走tī你誡命ê路。Lí khui-khoah góa ê sim ê sî, Góa chiū cháu tī Lí kài-bēng ê lō͘.

33耶和華ah，求你將你律例ê路指示我；　　我beh徹底遵守。Iâ-hô-hoa ah, kiû Lí chiong Lí lu̍t-lē ê lō͘ chí-sī góa; Góa beh thiat-tí chun-siú.

34求你hō͘我智慧，我就守你ê律法；　　Koh beh專心執守。Kiû Lí hō͘ góa tì-hūi, góa chiū siú Lí ê lu̍t-hoat; Koh beh choan-sim chip-siú.

35求你hō͘我行你誡命ê路，　　因為chit-ê路是我所歡喜ê。Kiû Lí hō͘ góa kiâⁿ Lí kài-bēng ê lō͘, In-ūi chit ê lō͘ sī góa só͘ hoaⁿ-hí ê.

36求你hō͘我ê心ǹg你干證ê話，　　無ǹg不義ê錢財。Kiû Lí hō͘ góa ê sim ǹg Lí kan-chèng ê ōe, Bô ǹg put-gī ê chîⁿ-châi.

37求你hō͘我ê目睭oa̍t走，無看虛假；　　Koh hō͘我tī你ê路中來活。Kiû Lí hō͘ góa ê ba̍k-chiu oa̍t-cháu, bô khòaⁿ hu-ké; Koh hō͘ góa tī Lí ê lō͘-tiong lâi oa̍h.

38你ê奴僕敬畏你，　　求你為伊堅固你ê話。Lí ê lô͘-po̍k kèng-ùi Lí, Kiû Lí ūi i kian-kò͘ Lí ê ōe.

39求你hō͘我所kiaⁿ ê凌辱離開我；　　因為你ê判詞是好。Kiû Lí hō͘ góa só͘ kiaⁿ ê lêng-jio̍k lī-khui góa; In-ūi Lí ê phòaⁿ-sû sī hó.

40我欣慕你教示ê話；　　求你，tī你ê公義，hō͘我來活。Góa him-bō͘ Lí kà-sī ê ōe; Kiû Lí, tī Lí ê kong-gī, hō͘ góa lâi oa̍h.

41耶和華ah，願你照你ê話，　　Hō͘你ê慈愛，就是你ê救恩，臨到我。Iâ-hô-hoa ah, goān Lí chiàu Lí ê ōe, Hō͘ Lí ê chû-ài, chiū-sī Lí ê kiù-un, lîm-kàu góa.

42我就有ōe-thang應hit-ê凌辱我ê；　　因為我óa靠你ê話。Góa chiū ū ōe thang ìn hit ê lêng-jio̍k góa--ê; In-ūi góa óa-khò Lí ê ōe.

43求你hō͘真理ê話無一盡離開我ê嘴；　　因為我ǹg望你ê判斷。Kiû Lí hō͘ chin-lí ê ōe bô it-chīn lī-khui góa ê chhùi; In-ūi góa ǹg-bāng Lí ê phòaⁿ-toàn.

44我beh常常守你ê律法，　　直到永遠。Góa beh siông-siông siú Lí ê lu̍t-hoat, Ti̍t-kàu éng-oán.

45我beh行tī寬闊ê所在，　　因為我有講究你教示ê話。Góa beh kiâⁿ tī khoan-khoah ê só͘-chāi, In-ūi góa ū káng-kiù Lí kà-sī ê ōe.

46我亦beh tī君王ê面前講論你干證ê話，　　亦無致到見笑。Góa ia̍h beh tī kun-ông ê bīn-chêng káng-lūn Lí kan-chèng ê ōe, Ia̍h bô tì-kàu kiàn-siàu.

47我beh tī你ê誡命中家己快樂；　　Chiah-ê誡命平素是我所疼惜ê。Góa beh tī Lí ê kài-bēng-tiong ka-kī khoài-lo̍k; Chiah ê kài-bēng pêng-sò͘ sī góa só͘ thiàⁿ-sioh--ê.

48我疼惜你ê誡命，我beh對伊kia̍h起手；　　你ê律例我亦beh靜靜想伊。Góa thiàⁿ-sioh Lí ê kài-bēng, góa beh tùi i kia̍h-khí chhiú; Lí ê lu̍t-lē góa ia̍h beh chēng-chēng siūⁿ i.

49求你記得對你ê奴僕所應允ê話，　　因為你bat hō͘我有ǹg望。Kiû Lí kì-tit tùi Lí ê lô͘-po̍k só͘ èng-ún ê ōe, In-ūi Lí bat hō͘ góa ū ǹg-bāng.

50你ê話將我救活，　　我tī患難中tùi這得tio̍h安慰。Lí ê ōe chiong góa kiù-oa̍h, Góa tī hoān-lān-tiong tùi che tit-tio̍h an-ùi.

51驕傲ê人盡在侮慢我；　　總是我bē-bat偏離你ê律法。Kiau-ngō͘ ê lâng chīn-chāi bú-bān góa; Chóng-sī góa bē-bat phian-lī Lí ê lu̍t-hoat.

52耶和華ah，我記念你tùi早以來ê判詞，　　就家己得tio̍h安慰。Iâ-hô-hoa ah, góa kì-liām Lí tùi chá í-lâi ê phòaⁿ-sû, Chiū ka-kī tit-tio̍h an-ùi.

53我因為棄sak你ê律法ê pháiⁿ人，　　就大受氣，親像火to̍h。Góa in-ūi khì-sak Lí ê lu̍t-hoat ê pháiⁿ-lâng, Chiū tōa siū-khì, chhin-chhiūⁿ hé to̍h.

54我tī寄腳ê厝，　　平時用你ê律例做詩歌。Góa tī kià-kha ê chhù, Pêng-sî ēng Lí ê lu̍t-lē chòe si-koa.

55耶和華ah，我暝間記念你ê名，　　守你ê律法。Iâ-hô-hoa ah, góa mî-kan kì-liām Lí ê miâ, Siú Lí ê lu̍t-hoat.

56我得tio̍h án-ni，　　是因為我守你教示ê話。Góa tit-tio̍h án-ni, Sī in-ūi góa siú Lí kà-sī ê ōe.

57耶和華是我ê基業，　　我bat講，我beh守你ê話。Iâ-hô-hoa sī góa ê ki-gia̍p, Góa bat kóng, Góa beh siú Lí ê ōe.

58我bat專心求你ê恩，　　願你照你ê話憐憫我。Góa bat choan-sim kiû Lí ê un, Goān Lí chiàu Lí ê ōe lîn-bín góa.

59我深深想我所行ê路，　　就oa̍t-tńg腳ǹg你干證ê話。Góa chhim-chhim siūⁿ góa só͘ kiâⁿ ê lō͘, Chiū oa̍t-tńg kha ǹg Lí kan-chèng ê ōe.

60我守你ê誡命，　　趕緊無延chhiân。Góa siú Lí ê kài-bēng, Kóaⁿ-kín bô iân-chhiân.

61Pháiⁿ人ê索縛纏我；　　總是我無bōe記得你ê律法。Pháiⁿ-lâng ê soh pa̍k-tîⁿ góa; Chóng-sī góa bô bōe-kì-tit Lí ê lu̍t-hoat.

62我因為你公義ê判斷，　　半暝beh起來感謝你。Góa in-ūi Lí kong-gī ê phòaⁿ-toàn, Pòaⁿ-mî beh khí-lâi kám-siā Lí.

63見若敬畏你，kap守你ê教示ê人，　　我kap in做伴。Kìⁿ-nā kèng-ùi Lí, kap siú Lí ê kà-sī ê lâng, Góa kap in chòe-phōaⁿ.

64耶和華ah，你ê慈愛遍滿地面；　　求你將你ê律例教示我。Iâ-hô-hoa ah, Lí ê chû-ài piàn-móa tōe-bīn; Kiû Lí chiong Lí ê lu̍t-lē kà-sī góa.

65耶和華ah，你bat好款待你ê奴僕，　　是照你所講ê話。Iâ-hô-hoa ah, Lí bat hó khoán-thāi Lí ê lô͘-po̍k, Sī chiàu Lí só͘ kóng ê ōe.

66求你將好ê聰明kap知識，教示我；　　因為我信你ê誡命。Kiû Lí chiong hó ê chhang-miâ kap tì-sek, kà-sī góa; In-ūi góa sìn Lí ê kài-bēng.

67我bē受苦以前，有行迷路；　　總是我taⁿ守你ê話。Góa bē siū-khó͘ í-chêng, ū kiâⁿ bê-lō͘; Chóng-sī góa taⁿ siú Lí ê ōe.

68你是好，所行亦是好；　　求你將你ê律例教示我。Lí sī hó, só͘-kiâⁿ ia̍h sī hó; Kiû Lí chiong Lí ê lu̍t-lē kà-sī góa.

69驕傲ê人造作無影話，攻擊我；　　總是我beh專心守你ê教示。Kiau-ngō͘ ê lâng chō-chok bô-iáⁿ ōe, kong-kek góa; Chóng-sī góa beh choan-sim siú Lí ê kà-sī.

70In ê心鈍，親像油包密；　　總是我歡喜你ê律法。In ê sim tūn, chhin-chhiūⁿ iû pau-ba̍t; Chóng-sī góa hoaⁿ-hí Lí ê lu̍t-hoat.

71我有受苦，是做我ê利益；　　因為beh hō͘我學習你ê律例。Góa ū siū-khó͘, sī chòe góa ê lī-ek; In-ūi beh hō͘ góa ha̍k-si̍p Lí ê lu̍t-lē.

72你所講ê律法是做我ê利益；　　贏過千萬ê金銀。Lí só͘ kóng ê lu̍t-hoat sī chòe góa ê lī-ek; Iâⁿ-kè chheng-bān ê kim-gûn.

73你ê手創造我，chhiâⁿ-tî我；　　求你hō͘我智慧，thang學習你ê誡命。Lí ê chhiú chhòng-chō góa, chhiâⁿ-tî góa; Kiû Lí hō͘ góa tì-hūi, thang ha̍k-si̍p Lí ê kài-bēng.

74敬畏你ê人看見我就beh歡喜；　　因為tī你ê話，我有ǹg望。Kèng-ùi Lí ê lâng khòaⁿ-kìⁿ góa chiū beh hoaⁿ-hí; In-ūi tī Lí ê ōe, góa ū ǹg-bāng.

75耶和華ah，我知你ê判斷是公義；　　你hō͘我受苦是對tī信實。Iâ-hô-hoa ah, góa chai Lí ê phòaⁿ-toàn sī kong-gī; Lí hō͘ góa siū-khó͘ sī tùi tī sìn-si̍t.

76求你用你ê慈愛安慰我；　　照你對你ê奴僕所講ê話。Kiû Lí ēng Lí ê chû-ài an-ùi góa; Chiàu Lí tùi Lí ê lô͘-po̍k só͘ kóng ê ōe.

77願你ê慈悲臨到我，hō͘我活；　　因為你ê律法是我所歡喜ê。Goān Lí ê chû-pi lîm-kàu góa, hō͘ góa oa̍h; In-ūi Lí ê lu̍t-hoat sī góa só͘ hoaⁿ-hí--ê.

78願驕傲ê人受見笑，因為in無理由枉屈我；　　總是我beh靜靜想你ê教示。Goān kiau-ngō͘ ê lâng siū kiàn-siàu, in-ūi in bô lí-iû óng-khut góa; Chóng-sī góa beh chēng-chēng siūⁿ Lí ê kà-sī.

79願敬畏你ê人歸向我；　　In就知你干證ê話。Goān kèng-ùi Lí ê lâng kui-ǹg góa; In chiū chai Lí kan-chèng ê ōe.

80願我ê心完全守你ê律例，　　Hō͘我不致見笑。Goān góa ê sim oân-choân siú Lí ê lu̍t-lē, Hō͘ góa put-tì kiàn-siàu.

81我ê心神欣慕你ê救恩到暈去；　　總是tī你ê話，我有ǹg望。Góa ê sim-sîn him-bō͘ Lí ê kiù-un kàu hūn--khì; Chóng-sī tī Lí ê ōe, góa ū ǹg-bāng.

82我因為ǹg望你ê話，目睭花，　　講，你甚麼時beh安慰我？Góa in-ūi ǹg-bāng Lí ê ōe, ba̍k-chiu hoe, Kóng, Lí sím-mi̍h sî beh an-ùi góa?

83因為我親像tī火薰中ê皮袋；　　總是我無bōe記得你ê律例。In-ūi góa chhin-chhiūⁿ tī hé-hun-tiong ê phê-tē; Chóng-sī góa bô bōe-kì-tit Lí ê lu̍t-lē.

84你ê奴僕ê日子有jōa-chōe ah？　　你beh tī時審判窘迫我ê人。Lí ê lô͘-po̍k ê ji̍t-chí ū jōa-chōe ah? Lí beh tī-sî sím-phòaⁿ khún-pek góa ê lâng.

85驕傲ê人，就是無thàn你ê律法-ê，　　掘陷坑，beh害我。Kiau-ngō͘ ê lâng, chiū-sī bô thàn Lí ê lu̍t-hoat--ê, Ku̍t hām-khiⁿ, beh hāi góa.

86你ê誡命一盡誠實；in無因端窘迫我；　　求你幫贊我。Lí ê kài-bēng it-chīn sêng-si̍t; in bô in-toaⁿ khún-pek góa; Kiû Lí pang-chān góa.

87In險險滅無我tī世間；　　總是我無放sak你ê教示。In hiám-hiám bia̍t-bô góa tī sè-kan; Chóng-sī góa bô pàng-sak Lí ê kà-sī.

88求你照你ê慈愛hō͘我活；　　我就beh守你ê嘴干證ê話。Kiû Lí chiàu Lí ê chû-ài hō͘ góa oa̍h; Góa chiū beh siú Lí ê chhùi kan-chèng ê ōe.

89耶和華ah，你ê話安定tī天裡，　　直到永遠。Iâ-hô-hoa ah, Lí ê ōe an-tiāⁿ tī thiⁿ--nih, Ti̍t-kàu éng-oán.

90你ê誠實船到萬代；　　你建立地，地就長長tī-teh。Lí ê sêng-si̍t chûn kàu bān-tāi; Lí kiàn-li̍p tōe, tōe chiū tn̂g-tn̂g tī--teh.

91照你ê定例，in到taⁿ iáu tī-teh；　　因為萬物lóng是你ê差用。Chiàu Lí ê tēng-lē, in kàu-taⁿ iáu tī--teh; In-ūi bān-mi̍h lóng sī Lí ê chhe-ēng.

92我若m̄是歡喜你ê律法，　　就早早tī我ê苦難中滅無lah。Góa nā m̄-sī hoaⁿ-hí Lí ê lu̍t-hoat, Chiū chá-chá tī góa ê khó͘-lān-tiong bia̍t-bô lah.

93我永永無bōe記得你ê教示；　　因為你用這hō͘我活。Góa éng-éng bô bōe-kì-tit Lí ê kà-sī; In-ūi Lí ēng che hō͘ góa oa̍h.

94我是你ê，求你救我；　　因為我chhē你ê教示。Góa sī Lí-ê, kiû Lí kiù góa; In-ūi góa chhē Lí ê kà-sī.

95Pháiⁿ人當等我，beh滅無我，　　總是我beh講究你干證ê話。Pháiⁿ-lâng tng-tán góa, beh bia̍t-bô góa, Chóng-sī góa beh káng-kiù Lí kan-chèng ê ōe.

96我看所有ê完全，lóng是有限；　　獨獨你ê命令極其開闊。Góa khòaⁿ só͘-ū ê oân-choân, lóng sī iú-hān; To̍k-to̍k Lí ê bēng-lēng ke̍k-kî khui-khoah.

97我疼惜你ê律法到怎樣ah！　　我thong日靜靜想。Góa thiàⁿ-sioh Lí ê lu̍t-hoat kàu cháiⁿ-iūⁿ ah! Góa thong-ji̍t chēng-chēng siūⁿ.

98你ê誡命常常kap我tī-teh，　　Hō͘我比我ê對敵khah有智慧。Lí ê kài-bēng siông-siông kap góa tī--teh, Hō͘ góa pí góa ê tùi-te̍k khah ū tì-hūi.

99我比我lóng總ê先生khah通達；　　因為我靜靜想你干證ê話。Góa pí góa lóng-chóng ê sian-siⁿ khah thong-ta̍t; In-ūi góa chēng-chēng siūⁿ Lí kan-chèng ê ōe.

100我比老人khah明白，　　因為我守你ê教示。Góa pí lāu-lâng khah bêng-pe̍k, In-ūi góa siú Lí ê kà-sī.

101我禁我ê腳，一切ê pháiⁿ路無行；　　Hō͘我thang守你ê話。Góa kìm góa ê kha, it-chhè ê pháiⁿ-lō͘ bô kiâⁿ; Hō͘ góa thang siú Lí ê ōe.

102我無偏離你ê判斷；　　因為你有教示我。Góa bô phian-lī Lí ê phòaⁿ-toàn; In-ūi Lí ū kà-sī góa.

103你ê話tī我ê chiūⁿ-kiuⁿ到jōa甜！　　Tī我ê嘴，比蜜khah甜。Lí ê ōe tī góa ê chiūⁿ-kiuⁿ kàu jōa tiⁿ! Tī góa ê chhùi, pí bi̍t khah-tiⁿ.

104我tùi你ê教示得tio̍h明白；　　所以我怨恨一切ê斜路。Góa tùi Lí ê kà-sī tit-tio̍h bêng-pe̍k; Só͘-í góa oàn-hūn it-chhè ê siâ-lō͘.

105你ê話做我腳前ê燈，　　做我路上ê光。Lí ê ōe chòe góa kha-chêng ê teng, Chòe góa lō͘-chiūⁿ ê kng.

106你公義ê判斷，我bat chiù-chōa beh遵守；　　我決斷án-ni行。Lí kong-gī ê phòaⁿ-toàn, góa bat chiù-chōa beh chun-siú; Góa koat-toàn án-ni kiâⁿ.

107我受苦到極；　　耶和華ah，求你照你ê話hō͘我活。Góa siū-khó͘ kàu-ke̍k; Iâ-hô-hoa ah, kiû Lí chiàu Lí ê ōe hō͘ góa oa̍h.

108耶和華ah，求你監納我ê嘴所歡喜獻ê o-ló，　　Koh將你ê判詞教示我。Iâ-hô-hoa ah, kiû Lí kàm-la̍p góa ê chhùi só͘ hoaⁿ-hí hiàn ê o-ló, Koh chiong Lí ê phòaⁿ-sû kà-sī góa.

109我ê性命常常tú-tio̍h危險；　　Iáu-kú我無bōe記得你ê律法。Góa ê sìⁿ-miā siông-siông tú-tio̍h gûi-hiám; Iáu-kú góa bô bōe-kì-tit Lí ê lu̍t-hoat.

110Pháiⁿ人設羅網beh害我；　　總是我無偏離你ê教示。Pháiⁿ-lâng siat lô-bāng beh hāi góa; Chóng-sī góa bô phian-lī Lí ê kà-sī.

111我將你干證ê話，做永遠ê基業；　　因為這是我心內所歡喜ê。Góa chiong Lí kan-chèng ê ōe, chòe éng-oán ê ki-gia̍p; In-ūi che sī góa sim-lāi só͘ hoaⁿ-hí--ê.

112我hō͘我ê心專ǹg你ê律例；　　永遠遵thàn，直到路尾。Góa hō͘ góa ê sim choan ǹg Lí ê lu̍t-lē; Éng-oán chun-thàn, ti̍t-kàu lō͘-bé.

113兩樣心ê人是我所痛恨；　　獨獨你ê律法是我所疼惜。Nn̄g-iūⁿ sim ê lâng sī góa só͘ thòng-hūn; To̍k-to̍k Lí ê lu̍t-hoat sī góa só͘ thiàⁿ-sioh.

114你是我閃bih ê所在，koh是我ê藤牌；　　我tī你ê話有ǹg望。Lí sī góa siám-bih ê só͘-chāi, koh sī góa ê tîn-pâi; Góa tī Lí ê ōe ū ǹg-bāng.

115做pháiⁿ ê人ah，lín tio̍h離開我；　　Hō͘我thang守我ê上帝ê誡命。Chòe-pháiⁿ ê lâng ah, lín tio̍h lī-khui góa; Hō͘ góa thang siú góa ê Siōng-tè ê kài-bēng.

116求你照你ê話扶持我，hō͘我活；　　亦無hō͘我因為所ǹg望ê來見笑。Kiû Lí chiàu Lí ê ōe hû-chhî góa, hō͘ góa oa̍h; Ia̍h bô hō͘ góa in-ūi só͘ ǹg-bāng--ê lâi kiàn-siàu.

117求你扶持我，我就得救；　　我beh常常對重你ê律例。Kiû Lí hû-chhî góa, góa chiū tit-kiù; Góa beh siông-siông tùi-tiōng Lí ê lu̍t-lē.

118見若行叉路，離開你ê律例ê人，你看輕in；　　因為in ê詭詐是虛假。Kìⁿ-nā kiâⁿ chha-lō͘, lī-khui Lí ê lu̍t-lē ê lâng, Lí khòaⁿ-khin in; In-ūi in ê khúi-chà sī hu-ké.

119世間ê pháiⁿ人，你lóng kā in除去，親像渣滓；　　因為án-ni，我疼惜你干證ê話。Sè-kan ê pháiⁿ-lâng, Lí lóng kā in tû--khì, chhin-chhiūⁿ che-tái; In-ūi án-ni, góa thiàⁿ-sioh Lí kan-chèng ê ōe.

120我因為驚畏你，我ê肉就chhoah；　　你ê判斷亦hō͘我驚惶。Góa in-ūi kiaⁿ-ùi Lí, góa ê bah chiū chhoah; Lí ê phòaⁿ-toàn ia̍h hō͘ góa kiaⁿ-hiâⁿ.

121我秉公行義；　　求你m̄-thang將我放hō͘壓制我ê人。Góa péng-kong kiâⁿ-gī; Kiû Lí m̄-thang chiong góa pàng hō͘ ap-chè góa ê lâng.

122求你保認你ê奴僕，thang得tio̍h好境遇；　　莫得hō͘驕傲ê人壓制我。Kiû Lí pó-jīn Lí ê lô͘-po̍k, thang tit-tio̍h hó kéng-gū; Bo̍h-tit hō͘ kiau-ngō͘ ê lâng ap-chè góa.

123我因為ǹg望你ê救恩，kap你公義ê話，　　致到目睭花。Góa in-ūi ǹg-bāng Lí ê kiù-un, kap Lí kong-gī ê ōe, Tì-kàu ba̍k-chiu hoe.

124求你照你ê慈愛款待你ê奴僕；　　將你ê律例教示我。Kiû Lí chiàu Lí ê chû-ài khoán-thāi Lí ê lô͘-po̍k; Chiong Lí ê lu̍t-lē kà-sī góa.

125我是你ê奴僕，求你hō͘我智慧；　　Hō͘我會知你干證ê話。Góa sī Lí ê lô͘-po̍k, kiû Lí hō͘ góa tì-hūi; Hō͘ góa ōe chai Lí kan-chèng ê ōe.

126現今當是耶和華行tāi-chì ê時；　　因為人廢無你ê律法。Hiān-kim tng sī Iâ-hô-hoa kiâⁿ tāi-chì ê sî; In-ūi lâng hòe-bô Lí ê lu̍t-hoat.

127所以我疼惜你ê誡命，　　贏過金，亦贏過好金。Só͘-í góa thiàⁿ-sioh Lí ê kài-bēng, Iâⁿ-kè kim, ia̍h iâⁿ-kè hó-kim.

128所以你一切ê教示，萬事，我lóng掠做正直；　　Koh我怨恨一切ê 斜路。Só͘-í Lí it-chhè ê kà-sī, bān-sū, góa lóng lia̍h-chòe chèng-ti̍t; Koh góa oàn-hūn it-chhè ê siâ-lō͘.

129你干證ê話是奇妙；　　所以我ê心謹慎執守。Lí kan-chèng ê ōe sī kî-biāu; Só͘-í góa ê sim kín-sīn chip-siú.

130你ê話一下開拆，就發出光，　　Hō͘戇人通達。Lí ê ōe chi̍t-ē khui-thiah, chiū hoat-chhut kng, Hō͘ gōng-lâng thong-ta̍t.

131我開嘴直直喘；　　因為我切切欣慕你ê誡命。Góa khui-chhùi ti̍t-ti̍t chhoán; In-ūi góa chhiat-chhiat him-bō͘ Lí ê kài-bēng.

132求你oa̍t-tńg ǹg我，憐憫我；　　親像你平常款待hiah-ê敬愛你ê名ê人。Kiû Lí oa̍t-tńg ǹg góa, lîn-bín góa; Chhin-chhiūⁿ Lí pêng-siông khoán-thāi hiah ê kèng-ài Lí ê miâ ê lâng.

133求你用你ê話hō͘我ê腳步穩當；　　莫容允甚麼罪惡管轄我。Kiû Lí ēng Lí ê ōe hō͘ góa ê kha-pō͘ ún-tàng; Bo̍h iông-ún sím-mi̍h chōe-ok koán-hat góa.

134求你救贖我，脫離人ê壓制，　　我就beh守你ê教示。Kiû Lí kiù-sio̍k góa, thoat-lī lâng ê ap-chè, Góa chiū beh siú Lí ê kà-sī.

135願你hō͘你ê面ê光照你ê奴僕；　　Koh將你ê律例教示我。Goān Lí hō͘ Lí ê bīn ê kng chiò Lí ê lô͘-po̍k; Koh chiong Lí ê lu̍t-lē kà-sī góa.

136我ê目屎親像溪水teh流；　　因為in無守你ê律法。Góa ê ba̍k-sái chhin-chhiūⁿ khoe-chúi teh lâu; In-ūi in bô siú Lí ê lu̍t-hoat.

137耶和華，你是公義ê；　　你ê判斷亦是正直ê。Iâ-hô-hoa, Lí sī kong-gī-ê; Lí ê phòaⁿ-toàn ia̍h sī chèng-ti̍t--ê.

138你所命令干證ê話，是照公義，　　極其誠實。Lí só͘ bēng-lēng kan-chèng ê ōe, sī chiàu kong-gī, Ke̍k-kî sêng-si̍t.

139我ê心熱，親像火燒滅我；　　因為我ê對敵bōe記得你ê話。Góa ê sim jia̍t, chhin-chhiūⁿ hé sio-bia̍t góa; In-ūi góa ê tùi-te̍k bōe-kì-tit Lí ê ōe.

140你ê話鍛鍊到真精；　　所以你ê奴僕真意愛。Lí ê ōe thoàn-liān kàu chin cheng; Só͘-í Lí ê lô͘-po̍k chin ì-ài.

141我卑微，hō͘人看輕，　　總是我無bōe記得你ê教示。Góa pi-bî, hō͘ lâng khòaⁿ-khin, Chóng-sī góa bô bōe-kì-tit Lí ê kà-sī.

142你ê公義是永遠ê公義；　　你ê律法是真實。Lí ê kong-gī sī éng-oán ê kong-gī; Lí ê lu̍t-hoat sī chin-si̍t.

143我tú-tio̍h患難憂苦；　　總是你ê誡命是我所歡喜ê。Góa tú-tio̍h hoān-lān iu-khó͘; Chóng-sī Lí ê kài-bēng sī góa só͘ hoaⁿ-hí--ê.

144你干證ê話永遠是公義；　　求你hō͘我智慧，我就會活。Lí kan-chèng ê ōe éng-oán sī kong-gī; Kiû Lí hō͘ góa tì-hūi, góa chiū ōe oa̍h.

145耶和華ah，我專心求叫你，求你應我；　　我beh謹慎守你ê律例。Iâ-hô-hoa ah, góa choan-sim kiû-kiò Lí, kiû Lí ìn góa; Góa beh kín-sīn siú Lí ê lu̍t-lē.

146我對你求叫，求你救我；　　我就beh守你干證ê話。Góa tùi Lí kiû-kiò, kiû Lí kiù góa; Góa chiū beh siú Lí kan-chèng ê ōe.

147我thàn天 bē光求叫你；　　Tī你ê話我有ǹg望。Góa thàn thiⁿ bē kng kiû-kiò Lí; Tī Lí ê ōe góa ū ǹg-bāng.

148暝時，更iáu未深，我ê目睭已經nih開；　　因為beh靜靜想你ê話。Mî--sî, kiⁿ iáu-bē chhim, góa ê ba̍k-chiu í-keng nih-khui; In-ūi beh chēng-chēng siūⁿ Lí ê ōe.

149求你照你ê慈愛，聽我ê聲；　　耶和華ah，求你將你ê判斷，hō͘我能活。Kiû Lí chiàu Lí ê chû-ài, thiaⁿ góa ê siaⁿ; Iâ-hô-hoa ah, kiû Lí chiong Lí ê phòaⁿ-toàn, hō͘ góa ōe oa̍h.

150慣練行pháiⁿ ê人逼óa來；　　In離開你ê律法遠遠。Koàn-liān kiâⁿ-pháiⁿ ê lâng pek-óa lâi; In lī-khui Lí ê lu̍t-hoat hn̄g-hn̄g.

151耶和華ah，你是近近；　　你ê誡命lóng是真實。Iâ-hô-hoa ah, Lí sī kūn-kūn; Lí ê kài-bēng lóng sī chin-si̍t.

152我講究你干證ê話，早早已經知，　　是你立定到永遠ê。Góa káng-kiù Lí kan-chèng ê ōe, chá-chá í-keng chai, Sī Lí li̍p-tiāⁿ kàu éng-oán--ê.

153求你看顧我ê苦難，來牽救goa；　　因為我無bōe記得你ê律法。Kiû Lí khòaⁿ-kò͘ góa ê khó͘-lān, lâi khan-kiù góa; In-ūi góa bô bōe-kì-tit Lí ê lu̍t-hoat.

154求你kā我伸冤，救贖我；　　照你ê話hō͘我活。Kiû Lí kā góa sin-oan, kiù-sio̍k góa; Chiàu Lí ê ōe hō͘ góa oa̍h.

155救恩離開pháiⁿ人遠遠；　　因為in無chhē你ê律例。Kiù-un lī-khui pháiⁿ-lâng hn̄g-hn̄g; In-ūi in bô chhē Lí ê lu̍t-lē.

156耶和華ah，你ê慈悲是大；　　求你照你ê判斷hō͘我活。Iâ-hô-hoa ah, Lí ê chû-pi sī tōa; Kiû Lí chiàu Lí ê phòaⁿ-toàn hō͘ góa oa̍h.

157窘迫我ê，抵敵我ê，真chōe，　　總是我無偏離你干證ê話。Khún-pek góa ê, tí-te̍k góa ê, chin-chōe, Chóng-sī góa bô phian-lī Lí kan-chèng ê ōe.

158我看見奸惡ê人，就真厭惡；　　因為in無守你ê話。Góa khòaⁿ-kìⁿ kan-ok ê lâng, chiū chin iàm-ò͘ⁿ; In-ūi in bô siú Lí ê ōe.

159你看我怎樣疼惜你ê教示；　　耶和華ah，求你照你ê慈愛hō͘我活。Lí khòaⁿ góa cháiⁿ-iūⁿ thiàⁿ-sioh Lí ê kà-sī; Iâ-hô-hoa ah, kiû Lí chiàu Lí ê chû-ài hō͘ góa oa̍h.

160你ê話ê總根頭是真實；　　你一切公義ê判斷是永遠tī-teh。Lí ê ōe ê chóng-kun-thâu sī chin-si̍t; Lí it-chhè kong-gī ê phòaⁿ-toàn sī éng-oán tī-teh.

161貴族無因端窘迫我；　　總是我ê心驚畏你ê話。Kùi-cho̍k bô in-toaⁿ khún-pek góa; Chóng-sī góa ê sim kiaⁿ-ùi Lí ê ōe.

162我歡喜你ê話，　　親像人得tio̍h chōe-chōe thâi贏ê物。Góa hoaⁿ-hí Lí ê ōe, Chhin-chhiūⁿ lâng tit-tio̍h chōe-chōe thâi-iâⁿ ê mi̍h.

163白賊話是我所痛恨，所厭賤ê；　　你ê律法是我所疼惜-ê。Pe̍h-chha̍t-ōe sī góa só͘ thòng-hūn, só͘ iàm-chiān--ê; Lí ê lu̍t-hoat sī góa só͘ thiàⁿ-sioh--ê.

164我因為你公義ê判斷，　　Ta̍k日七pái o-ló你。Góa in-ūi Lí kong-gī ê phòaⁿ-toàn, Ta̍k-ji̍t chhit-pái o-ló Lí.

165疼惜你ê律法ê人有大平安，　　無一項能纏絆in ê腳。Thiàⁿ-sioh Lí ê lu̍t-hoat ê lâng ū tōa pêng-an, Bô chi̍t-hāng ōe tîⁿ-pòaⁿ in ê kha.

166耶和華ah，我有teh ǹg望你ê救恩，　　有行你ê誡命。Iâ-hô-hoa ah, góa ū teh ǹg-bāng Lí ê kiù-un, Ū kiâⁿ Lí ê kài-bēng.

167我ê心有守你干證ê話，　　Chiah-ê話，我盡在意愛。Góa ê sim ū siú Lí kan-chèng ê ōe, chiah ê ōe, góa chīn-chāi ì-ài.

168我有守你ê教示，kap你干證ê話；　　因為我一切所行ê，lóng tī你ê面前。Góa ū siú Lí ê kà-sī, kap Lí kan-chèng ê ōe; In-ūi góa it-chhè só͘ kiâⁿ--ê, lóng tī Lí ê bīn-chêng.

169耶和華ah，願我求叫ê聲透到你ê面前；　　求你照你ê話，賞賜我智慧。Iâ-hô-hoa ah, goān góa kiû-kiò ê siaⁿ thàu-kàu Lí ê bīn-chêng; Kiû Lí chiàu Lí ê ōe, siúⁿ-sù góa tì-hūi.

170願我懇求ê話到你ê面前；　　求你照你ê話牽救我。Goān góa khún-kiû ê ōe kàu Lí ê bīn-chêng; Kiû Lí chiàu Lí ê ōe khan-kiù góa.

171願我ê嘴唇發出o-ló ê話，　　因為你將你ê律例教示我。Goān góa ê chhùi-tûn hoat-chhut o-ló ê ōe, In-ūi Lí chiong Lí ê lu̍t-lē kà-sī góa.

172願我ê舌唱歌o-ló你ê話；　　因為你一切ê誡命lóng是公義。Goān góa ê chi̍h chhiùⁿ-koa o-ló Lí ê ōe; In-ūi Lí it-chhè ê kài-bēng lóng sī kong-gī.

173願你伸手幫贊我；　　因為我有揀你ê教示。Goān Lí chhun-chhiú pang-chān góa; In-ūi góa ū kéng Lí ê kà-sī.

174耶和華ah，我切切欣慕你ê救恩；　　你ê律法亦是我所歡喜ê。Iâ-hô-hoa ah, góa chhiat-chhiat him-bō͘ Lí ê kiù-un; Lí ê lu̍t-hoat ia̍h sī góa só͘ hoaⁿ-hí--ê.

175願我活teh，我ê神魂就beh o-ló你；　　願你ê判斷幫贊我。Goān góa oa̍h--teh, góa ê sîn-hûn chiū beh o-ló Lí; Goān Lí ê phòaⁿ-toàn pang-chān góa.

176我迷路親像phah-m̄見ê羊；求你chhē你ê奴僕；　　因為我無bōe記得你ê誡命。Góa bê-lō͘ chhin-chhiūⁿ phah-m̄-kìⁿ ê iûⁿ; kiû Lí chhē Lí ê lô͘-po̍k; In-ūi góa bô bōe-kì-tit Lí ê kài-bēng.

1上崎á ê詩。1) 我tī危急中求叫耶和華，　　伊就應我。Chiūⁿ kiā-á ê si.1) Góa tī gûi-kip-tiong kiû-kiò Iâ-hô-hoa, I chiū ìn góa.

2耶和華ah，求你救我脫離白賊ê嘴唇，　　Kap詭詐ê舌。Iâ-hô-hoa ah, kiû Lí kiù góa thoat-lī pe̍h-chha̍t ê chhùi-tûn, Kap khúi-chà ê chi̍h.

3詭詐ê舌ah，主beh hō͘你甚麼ah？　　Beh用甚麼加添hō͘你ah？Khúi-chà ê chi̍h ah, Chú beh hō͘ lí sím-mi̍h ah? Beh ēng sím-mi̍h ke-thiⁿ hō͘ lí ah?

4就是勇猛ê人ê利箭，　　Kap lô-thêng柴ê熱炭。Chiū-sī ióng-béng ê lâng ê lāi-chìⁿ, Kap lô-thêng-chhâ ê jia̍t-thòaⁿ.

5我真慘ah，寄腳tī Bí-siat，　　khiā起tī Ki-ta̍t hiah-ê布棚ê中間。Góa chin chhám ah, kià-kha tī Bí-siat, Khiā-khí tī Ki-ta̍t hiah ê pò͘-pîⁿ ê tiong-kan.

6我kap hiah-ê怨恨和平ê人，　　久久相kap khiā起。Góa kap hiah ê oàn-hūn hô-pêng ê lâng, Kú-kú saⁿ-kap khiā-khí.

7我愛和平；　　總是我開嘴，in就beh爭戰。Góa ài hô-pêng; Chóng-sī góa khui-chhùi, in chiū beh cheng-chiàn.

1上崎á ê詩。1) 我beh kia̍h目ǹg山；　　我ê幫贊tùi toh落來？Chiūⁿ kiā-á ê si.1) Góa beh kia̍h-ba̍k ǹg soaⁿ; Góa ê pang-chān tùi toh-lo̍h lâi?

2我ê幫贊tùi耶和華來；　　伊是創造天地ê。Góa ê pang-chān tùi Iâ-hô-hoa lâi; I sī chhòng-chō thiⁿ tōe ê.

3伊無beh hō͘你ê腳搖choah；　　保守你ê的確無tuh眠。I bô beh hō͘ lí ê kha iô-choah; Pó-siú Lí-ê tek-khak bô tuh-bîn.

4看ah，保守以色列ê，　　也無tuh眠，也無睏去。Khòaⁿ ah, pó-siú Í-sek-lia̍t ê, Iā bô tuh-bîn, iā bô khùn--khì.

5保守你ê是耶和華；　　耶和華tī你ê chiàⁿ-pêng做你ê蔭影。Pó-siú lí--ê sī Iâ-hô-hoa; Iâ-hô-hoa tī lí ê chiàⁿ-pêng chòe lí ê ìm-ńg.

6日時太陽無傷你，　　暝時月亦bōe害你。Ji̍t--sî thài-iông bô siong lí, Mî--sî ge̍h ia̍h bōe hāi lí.

7耶和華beh保守你，免受一切ê災害；　　伊beh保守你ê性命。Iâ-hô-hoa beh pó-siú lí, bián siū it-chhè ê chai-hāi; I beh pó-siú lí ê sìⁿ-miā.

8你出，你入，耶和華beh保守你，　　Tùi chit時直到永遠。Lí chhut, lí ji̍p, Iâ-hô-hoa beh pó-siú lí, Tùi chit-sî ti̍t-kàu éng-oán.