1上崎á ê詩。1) 我tī危急中求叫耶和華，　　伊就應我。Chiūⁿ kiā-á ê si.1) Góa tī gûi-kip-tiong kiû-kiò Iâ-hô-hoa, I chiū ìn góa.

2耶和華ah，求你救我脫離白賊ê嘴唇，　　Kap詭詐ê舌。Iâ-hô-hoa ah, kiû Lí kiù góa thoat-lī pe̍h-chha̍t ê chhùi-tûn, Kap khúi-chà ê chi̍h.

3詭詐ê舌ah，主beh hō͘你甚麼ah？　　Beh用甚麼加添hō͘你ah？Khúi-chà ê chi̍h ah, Chú beh hō͘ lí sím-mi̍h ah? Beh ēng sím-mi̍h ke-thiⁿ hō͘ lí ah?

4就是勇猛ê人ê利箭，　　Kap lô-thêng柴ê熱炭。Chiū-sī ióng-béng ê lâng ê lāi-chìⁿ, Kap lô-thêng-chhâ ê jia̍t-thòaⁿ.

5我真慘ah，寄腳tī Bí-siat，　　khiā起tī Ki-ta̍t hiah-ê布棚ê中間。Góa chin chhám ah, kià-kha tī Bí-siat, Khiā-khí tī Ki-ta̍t hiah ê pò͘-pîⁿ ê tiong-kan.

6我kap hiah-ê怨恨和平ê人，　　久久相kap khiā起。Góa kap hiah ê oàn-hūn hô-pêng ê lâng, Kú-kú saⁿ-kap khiā-khí.

7我愛和平；　　總是我開嘴，in就beh爭戰。Góa ài hô-pêng; Chóng-sī góa khui-chhùi, in chiū beh cheng-chiàn.

1上崎á ê詩。1) 我beh kia̍h目ǹg山；　　我ê幫贊tùi toh落來？Chiūⁿ kiā-á ê si.1) Góa beh kia̍h-ba̍k ǹg soaⁿ; Góa ê pang-chān tùi toh-lo̍h lâi?

2我ê幫贊tùi耶和華來；　　伊是創造天地ê。Góa ê pang-chān tùi Iâ-hô-hoa lâi; I sī chhòng-chō thiⁿ tōe ê.

3伊無beh hō͘你ê腳搖choah；　　保守你ê的確無tuh眠。I bô beh hō͘ lí ê kha iô-choah; Pó-siú Lí-ê tek-khak bô tuh-bîn.

4看ah，保守以色列ê，　　也無tuh眠，也無睏去。Khòaⁿ ah, pó-siú Í-sek-lia̍t ê, Iā bô tuh-bîn, iā bô khùn--khì.

5保守你ê是耶和華；　　耶和華tī你ê chiàⁿ-pêng做你ê蔭影。Pó-siú lí--ê sī Iâ-hô-hoa; Iâ-hô-hoa tī lí ê chiàⁿ-pêng chòe lí ê ìm-ńg.

6日時太陽無傷你，　　暝時月亦bōe害你。Ji̍t--sî thài-iông bô siong lí, Mî--sî ge̍h ia̍h bōe hāi lí.

7耶和華beh保守你，免受一切ê災害；　　伊beh保守你ê性命。Iâ-hô-hoa beh pó-siú lí, bián siū it-chhè ê chai-hāi; I beh pó-siú lí ê sìⁿ-miā.

8你出，你入，耶和華beh保守你，　　Tùi chit時直到永遠。Lí chhut, lí ji̍p, Iâ-hô-hoa beh pó-siú lí, Tùi chit-sî ti̍t-kàu éng-oán.

1上崎á ê詩；大衛所做ê。1) 人對我講，咱來去耶和華ê厝，　　我就歡喜。Chiūⁿ kiā-á ê si; Tāi-pi̍t só͘ chòe-ê.1) Lâng tùi góa kóng, Lán lâi khì Iâ-hô-hoa ê chhù, Góa chiū hoaⁿ-hí.

2耶路撒冷ah，　　阮ê腳khiā tī你ê門內。Iâ-lō͘-sat-léng ah, Goán ê kha khiā tī lí ê mn̂g-lāi.

3耶路撒冷受起造，　　親像連絡整齊ê城。Iâ-lō͘-sat-léng siū khí-chō, Chhin-chhiūⁿ liân-lo̍k chéng-chôe ê siâⁿ.

4Chiah-ê支派，就是耶和華ê支派，　　照以色列定tio̍h ê例，　　上去hia beh o-ló耶和華ê名。Chiah ê chi-phài, chiū-sī Iâ-hô-hoa ê chi-phài, Chiàu Í-sek-lia̍t tiāⁿ-tio̍h ê lē, Chiūⁿ-khì hia beh o-ló Iâ-hô-hoa ê miâ.

5因為tī-hia設立審判ê寶座，　　就是大衛ke ê寶座。In-ūi tī-hia siat-li̍p sím-phòaⁿ ê pó-chō, Chiū-sī Tāi-pi̍t ke ê pó-chō.

6Tio̍h替耶路撒冷求平安；　　見若疼你ê人的確安樂。Tio̍h thòe Iâ-lō͘-sat-léng kiû pêng-an; Kìⁿ-nā thiàⁿ lí ê lâng tek-khak an-lo̍k.

7願你城內平安，　　願你ê宮內安樂。Goān Lí siâⁿ-lāi pêng-an, Goān Lí ê kiong-lāi an-lo̍k.

8因為我ê兄弟kap同伴ê緣故，　　我beh講，願平安tī你ê內面。In-ūi góa ê hiaⁿ-tī kap tâng-phōaⁿ ê iân-kò͘, Góa beh kóng, Goān pêng-an tī lí ê lāi-bīn.

9因為耶和華咱ê上帝ê厝ê緣故，　　我beh替你求福氣。In-ūi Iâ-hô-hoa lán ê Siōng-tè ê chhù ê iân-kò͘, Góa beh thòe lí kiû hok-khì.