1上崎á ê詩；大衛所做ê。1) 人對我講，咱來去耶和華ê厝，　　我就歡喜。Chiūⁿ kiā-á ê si; Tāi-pi̍t só͘ chòe-ê.1) Lâng tùi góa kóng, Lán lâi khì Iâ-hô-hoa ê chhù, Góa chiū hoaⁿ-hí.

2耶路撒冷ah，　　阮ê腳khiā tī你ê門內。Iâ-lō͘-sat-léng ah, Goán ê kha khiā tī lí ê mn̂g-lāi.

3耶路撒冷受起造，　　親像連絡整齊ê城。Iâ-lō͘-sat-léng siū khí-chō, Chhin-chhiūⁿ liân-lo̍k chéng-chôe ê siâⁿ.

4Chiah-ê支派，就是耶和華ê支派，　　照以色列定tio̍h ê例，　　上去hia beh o-ló耶和華ê名。Chiah ê chi-phài, chiū-sī Iâ-hô-hoa ê chi-phài, Chiàu Í-sek-lia̍t tiāⁿ-tio̍h ê lē, Chiūⁿ-khì hia beh o-ló Iâ-hô-hoa ê miâ.

5因為tī-hia設立審判ê寶座，　　就是大衛ke ê寶座。In-ūi tī-hia siat-li̍p sím-phòaⁿ ê pó-chō, Chiū-sī Tāi-pi̍t ke ê pó-chō.

6Tio̍h替耶路撒冷求平安；　　見若疼你ê人的確安樂。Tio̍h thòe Iâ-lō͘-sat-léng kiû pêng-an; Kìⁿ-nā thiàⁿ lí ê lâng tek-khak an-lo̍k.

7願你城內平安，　　願你ê宮內安樂。Goān Lí siâⁿ-lāi pêng-an, Goān Lí ê kiong-lāi an-lo̍k.

8因為我ê兄弟kap同伴ê緣故，　　我beh講，願平安tī你ê內面。In-ūi góa ê hiaⁿ-tī kap tâng-phōaⁿ ê iân-kò͘, Góa beh kóng, Goān pêng-an tī lí ê lāi-bīn.

9因為耶和華咱ê上帝ê厝ê緣故，　　我beh替你求福氣。In-ūi Iâ-hô-hoa lán ê Siōng-tè ê chhù ê iân-kò͘, Góa beh thòe lí kiû hok-khì.

1上崎á ê詩。1) 坐tī天頂ê主ah，　　我kia̍h目ǹg你。Chiūⁿ kiā-á ê si.1) Chē tī thiⁿ-téng ê Chú ah, Góa kia̍h-ba̍k ǹg Lí.

2看ah，做奴僕ê ê目睭，怎樣ǹg主人ê手，　　做女婢-ê ê目睭，怎樣ǹg主母ê手，　　阮ê目睭亦照án-ni ǹg耶和華阮ê上帝；　　直直到伊憐憫阮。Khòaⁿ ah, chòe lô͘-po̍k--ê ê ba̍k-chiu, cháiⁿ-iūⁿ ǹg chú-lâng ê chhiú, Chòe lú-pī--ê ê ba̍k-chiu, cháiⁿ-iūⁿ ǹg chú-bú ê chhiú, Goán ê ba̍k-chiu ia̍h chiàu án-ni ǹg Iâ-hô-hoa goán ê Siōng-tè; Ti̍t-ti̍t kàu I lîn-bín goán.

3耶和華ah，可憐阮，可憐阮；　　因為阮hō͘人看輕，已經到極。Iâ-hô-hoa ah, khó-lîn goán, khó-lîn goán; In-ūi goán hō͘ lâng khòaⁿ-khin, í-keng kàu-ke̍k.

4阮ê心hō͘ hiah-ê lâ-êng ê人冷笑，　　Hō͘驕傲ê人看輕，已經到極。Goán ê sim hō͘ hiah ê lâ-êng ê lâng léng-chhiò, Hō͘ kiau-ngō͘ ê lâng khòaⁿ-khin, Í-keng kàu-ke̍k.

1上崎á ê詩；大衛所做。1) 以色列taⁿ tio̍h講，　　若m̄是耶和華贊阮，Chiūⁿ kiā-á ê si; Tāi-pi̍t só͘ chòe.1) Í-sek-lia̍t taⁿ tio̍h kóng, Nā m̄-sī Iâ-hô-hoa chān goán,

2若m̄是耶和華贊阮，　　Tī人起來攻擊阮，Nā m̄-sī Iâ-hô-hoa chān goán, Tī lâng khí-lâi kong-kek goán,

3Tī in對阮發受氣ê時，　　就將阮活活吞落去；Tī in tùi goán hoat siū-khì ê sî, Chiū chiong goán oa̍h-oa̍h thun--lo̍h-khì;

4Hit時chiah-ê水的確pôaⁿ過阮，　　河水的確淹密阮。Hit-sî chiah ê chúi tek-khak pôaⁿ-kè goán, Hô-chúi tek-khak im-ba̍t goán.

5凶狂ê水的確淹密阮。Hiong-kông ê chúi tek-khak im-ba̍t goán.

6願耶和華受o-ló，　　因為伊無將阮做食物，交hō͘ in pō͘-食。Goān Iâ-hô-hoa siū o-ló, In-ūi I bô chiong goán chòe chia̍h-mi̍h, kau hō͘ in pō͘-chia̍h.

7阮ê性命親像鳥á，脫離掠鳥-ê ê羅網；　　羅網破裂，阮就脫離。Goán ê sìⁿ-miā chhin-chhiūⁿ chiáu-á, thoat-lī lia̍h-chiáu--ê ê lô-bāng; Lô-bāng phòa-li̍h, goán chiū thoat-lī.

8阮得tio̍h幫贊，是靠耶和華ê名，　　伊是創造天地ê。Goán tit-tio̍h pang-chān, sī khò Iâ-hô-hoa ê miâ, I sī chhòng-chō thiⁿ-tōe--ê.