1上崎á ê詩；所羅門所做ê。1) 厝宅若m̄是耶和華起造，　　起造伊ê人就空空tio̍h磨；　　城池若m̄是耶和華顧守，　　就顧守ê人空空警醒。Chiūⁿ kiā-á ê si; Só͘-lô-bûn só͘ chòe-ê.1) Chhù-the̍h nā m̄-sī Iâ-hô-hoa khí-chō, Khí-chō i ê lâng chiū khang-khang tio̍h-bôa; Siâⁿ-tî nā m̄-sī Iâ-hô-hoa kò͘-siú, Chiū kò͘-siú ê lâng khang-khang kéng-séng.

2Lín早早起，òaⁿ-òaⁿ睏，　　食勞碌所得tio̍h ê飯，亦是空空；　　耶和華所疼ê人，伊beh hō͘伊好睏。Lín chá-chá khí, òaⁿ-òaⁿ khùn, Chia̍h lô-lo̍k só͘ tit-tio̍h ê pn̄g, ia̍h sī khang-khang; Iâ-hô-hoa só͘ thiàⁿ ê lâng, I beh hō͘ i hó-khùn.

3看ah，kiáⁿ兒是耶和華所賞賜ê產業；　　懷孕ê胎，是伊所hō͘伊ê報賞。Khòaⁿ ah, kiáⁿ-jî sī Iâ-hô-hoa só͘ siúⁿ-sù ê sán-gia̍p; Hoâi-īn ê thai, sī I só͘ hō͘ i ê pò-siúⁿ.

4少年ê時所生ê kiáⁿ，　　親像勇士手中ê箭。Siàu-liân ê sî só͘-siⁿ ê kiáⁿ, Chhin-chhiūⁿ ióng-sū chhiú-tiong ê chìⁿ.

5伊ê箭袋充滿ê人有福氣；　　In tī城-門口kap對敵講話，　　的確不致見笑。I ê chìⁿ-tē chhiong-móa ê lâng ū hok-khì; In tī siâⁿ-mn̂g-kháu kap tùi-te̍k kóng-ōe, Tek-khak put-tì kiàn-siàu.

1上崎á ê詩。1) 見若敬畏耶和華，行tī伊ê路ê，　　Hit號人有福氣。Chiūⁿ kiā-á ê si.1) Kìⁿ-nā kèng-ùi Iâ-hô-hoa, kiâⁿ tī I ê lō͘--ê, Hit-hō lâng ū hok-khì.

2你beh食你ê手tio̍h磨所得tio̍h-ê，　　你beh享福，事事興通。Lí beh chia̍h lí ê chhiú tio̍h-bôa só͘ tit-tio̍h--ê, Lí beh hióng-hok, sū-sū heng-thong.

3你ê bó͘ tī你ê厝ê房內，親像結chōe-chōe果子ê葡萄樹；　　你ê kiáⁿ兒圍纍你ê桌，親像橄欖栽。Lí ê bó͘ tī lí ê chhù ê pâng-lāi, chhin-chhiūⁿ kiat chōe-chōe ké-chí ê phû-tô-chhiū; Lí ê kiáⁿ-jî ûi-lûi lí ê toh, chhin-chhiūⁿ kaⁿ-ná-chai.

4看ah，敬畏耶和華ê人，　　的確beh án-ni得tio̍h福氣。Khòaⁿ ah, kèng-ùi Iâ-hô-hoa ê lâng, Tek-khak beh án-ni tit-tio̍h hok-khì.

5耶和華beh tùi錫安賜福你；　　你一生beh看見耶路撒冷ê福氣。Iâ-hô-hoa beh tùi Sek-an sù-hok lí; Lí it-seng beh khòaⁿ-kìⁿ Iâ-lō͘-sat-léng ê hok-khì.

6你beh看見你ê kiáⁿ ê kiáⁿ。　　願平安歸tī以色列。Lí beh khòaⁿ-kìⁿ lí ê kiáⁿ ê kiáⁿ. Goān pêng-an kui tī Í-sek-lia̍t.

1上崎á ê詩。1) 以色列tio̍h講，tùi我細漢ê時，　　In ta̍uh-ta̍uh苦楚我。Chiūⁿ kiā-á ê si.1) Í-sek-lia̍t tio̍h kóng, Tùi góa sòe-hàn ê sî, In ta̍uh-ta̍uh khó͘-chhó͘ góa.

2Tùi我細漢ê時in ta̍uh-ta̍uh苦楚我；　　總是in bē-bat khah贏我。Tùi góa sòe-hàn ê sî in ta̍uh-ta̍uh khó͘-chhó͘ góa; Chóng-sī in bē-bat khah-iâⁿ góa.

3Hōaⁿ犁ê人犁我ê ka-chiah-phiaⁿ，　　犁ê溝痕拖真長。Hōaⁿ-lôe ê lâng lôe góa ê ka-chiah-phiaⁿ, Lôe ê kau-hûn thoa chin-tn̂g.

4耶和華是公義ê；　　伊有斬斷pháiⁿ人ê索。Iâ-hô-hoa sī kong-gī--ê; I ū chām-tn̄g pháiⁿ-lâng ê soh.

5見若怨恨錫安ê，　　願in tú-tio̍h見笑退後。Kìⁿ-nā oàn-hūn Sek-an--ê, Goān in tú-tio̍h kiàn-siàu thè-āu.

6願in親像厝頂ê草，　　Bē大叢就枯焦；Goān in chhin-chhiūⁿ chhù-téng ê chháu, Bē tōa-châng chiū ko͘-tâ;

7割ê割無滿把，hâ-ê hâ無kui攬(lám)。Koah-ê koah bô móa-pé, Hâ-ê hâ bô kui-lám.

8過路ê人亦無講，　　願耶和華賜lín福氣；　　阮奉耶和華ê名，kā lín祝福。Kè-lō͘ ê lâng ia̍h bô kóng, Goān Iâ-hô-hoa sù lín hok-khì; Goán hōng Iâ-hô-hoa ê miâ, kā lín chiok-hok.