1上崎á ê詩。1) 見若敬畏耶和華，行tī伊ê路ê，　　Hit號人有福氣。Chiūⁿ kiā-á ê si.1) Kìⁿ-nā kèng-ùi Iâ-hô-hoa, kiâⁿ tī I ê lō͘--ê, Hit-hō lâng ū hok-khì.

2你beh食你ê手tio̍h磨所得tio̍h-ê，　　你beh享福，事事興通。Lí beh chia̍h lí ê chhiú tio̍h-bôa só͘ tit-tio̍h--ê, Lí beh hióng-hok, sū-sū heng-thong.

3你ê bó͘ tī你ê厝ê房內，親像結chōe-chōe果子ê葡萄樹；　　你ê kiáⁿ兒圍纍你ê桌，親像橄欖栽。Lí ê bó͘ tī lí ê chhù ê pâng-lāi, chhin-chhiūⁿ kiat chōe-chōe ké-chí ê phû-tô-chhiū; Lí ê kiáⁿ-jî ûi-lûi lí ê toh, chhin-chhiūⁿ kaⁿ-ná-chai.

4看ah，敬畏耶和華ê人，　　的確beh án-ni得tio̍h福氣。Khòaⁿ ah, kèng-ùi Iâ-hô-hoa ê lâng, Tek-khak beh án-ni tit-tio̍h hok-khì.

5耶和華beh tùi錫安賜福你；　　你一生beh看見耶路撒冷ê福氣。Iâ-hô-hoa beh tùi Sek-an sù-hok lí; Lí it-seng beh khòaⁿ-kìⁿ Iâ-lō͘-sat-léng ê hok-khì.

6你beh看見你ê kiáⁿ ê kiáⁿ。　　願平安歸tī以色列。Lí beh khòaⁿ-kìⁿ lí ê kiáⁿ ê kiáⁿ. Goān pêng-an kui tī Í-sek-lia̍t.

1上崎á ê詩。1) 以色列tio̍h講，tùi我細漢ê時，　　In ta̍uh-ta̍uh苦楚我。Chiūⁿ kiā-á ê si.1) Í-sek-lia̍t tio̍h kóng, Tùi góa sòe-hàn ê sî, In ta̍uh-ta̍uh khó͘-chhó͘ góa.

2Tùi我細漢ê時in ta̍uh-ta̍uh苦楚我；　　總是in bē-bat khah贏我。Tùi góa sòe-hàn ê sî in ta̍uh-ta̍uh khó͘-chhó͘ góa; Chóng-sī in bē-bat khah-iâⁿ góa.

3Hōaⁿ犁ê人犁我ê ka-chiah-phiaⁿ，　　犁ê溝痕拖真長。Hōaⁿ-lôe ê lâng lôe góa ê ka-chiah-phiaⁿ, Lôe ê kau-hûn thoa chin-tn̂g.

4耶和華是公義ê；　　伊有斬斷pháiⁿ人ê索。Iâ-hô-hoa sī kong-gī--ê; I ū chām-tn̄g pháiⁿ-lâng ê soh.

5見若怨恨錫安ê，　　願in tú-tio̍h見笑退後。Kìⁿ-nā oàn-hūn Sek-an--ê, Goān in tú-tio̍h kiàn-siàu thè-āu.

6願in親像厝頂ê草，　　Bē大叢就枯焦；Goān in chhin-chhiūⁿ chhù-téng ê chháu, Bē tōa-châng chiū ko͘-tâ;

7割ê割無滿把，hâ-ê hâ無kui攬(lám)。Koah-ê koah bô móa-pé, Hâ-ê hâ bô kui-lám.

8過路ê人亦無講，　　願耶和華賜lín福氣；　　阮奉耶和華ê名，kā lín祝福。Kè-lō͘ ê lâng ia̍h bô kóng, Goān Iâ-hô-hoa sù lín hok-khì; Goán hōng Iâ-hô-hoa ê miâ, kā lín chiok-hok.

1上崎á ê詩。1) 耶和華ah，我tùi深淵求叫你，Chiūⁿ kiā-á ê si.1) Iâ-hô-hoa ah, góa tùi chhim-ian kiû-kiò Lí,

2主ah，求你聽我ê聲；　　願你àⁿ耳孔聽我懇求ê聲。Chú ah, kiû Lí thiaⁿ góa ê siaⁿ; Goān Lí àⁿ hī-khang thiaⁿ góa khún-kiû ê siaⁿ.

3主耶和華ah，你若究勘罪惡，　　Chī-chūi khiā-ōe-tiâu？Chú Iâ-hô-hoa ah, Lí nā kiù-khàm chōe-ok, Chī-chūi khiā-ōe-tiâu?

4總是你有赦免ê恩，　　Beh hō͘人敬畏你。Chóng-sī Lí ū sià-bián ê un, Beh hō͘ lâng kèng-ùi Lí.

5我thèng候耶和華，我ê心神teh thèng候；　　Tī伊ê話我有ǹg望。Góa thèng-hāu Iâ-hô-hoa, góa ê sim-sîn teh thèng-hāu; Tī I ê ōe góa ū ǹg-bāng.

6我ê心神thèng候主，　　比守更ê人thèng候天光khah切，　　比守更ê人thèng候天光khah切。Góa ê sim-sîn thèng-hāu Chú, Pí chiú-kiⁿ ê lâng thèng-hāu thiⁿ-kng khah-chhiat, Pí chiú-kiⁿ ê lâng thèng-hāu thiⁿ-kng khah-chhiat.

7以色列ah，你tio̍h ǹg望耶和華；　　因為tī耶和華有慈愛，　　Tī伊有豐盛ê救贖。Í-sek-lia̍t ah, lí tio̍h ǹg-bāng Iâ-hô-hoa; In-ūi tī Iâ-hô-hoa ū chû-ài, Tī I ū hong-sēng ê kiù-sio̍k.

8伊的確救贖以色列，　　脫離伊一切ê罪惡。I tek-khak kiù-sio̍k Í-sek-lia̍t, Thoat-lī i it-chhè ê chōe-ok.