1大衛ê詩，交hō͘樂官；調用第八。1) 耶和華ah，求你拯救；因為虔誠ê人絕lah；　　世間人ê中間，忠信ê人無lah。Tāi-pi̍t ê si, kau hō͘ Ga̍k-koaⁿ; tiāu, ēng tē poeh.1) Iâ-hô-hoa ah, kiû Lí chín-kiù; In-ūi khiân-sêng ê lâng choa̍t--lah; sè-kan-lâng ê tiong-kan, tiong-sìn ê lâng bô--lah.

2人人kap厝邊講白賊；　　用諂媚ê嘴唇，kap兩樣ê心來講話。Lâng-lâng kap chhù-piⁿ kóng pe̍h-chha̍t; Ēng thiám-mī ê chhùi-tûn, kap nn̄g-iūⁿ ê sim lâi kóng-ōe.

3耶和華beh割斷諂媚ê嘴唇，以及講大話ê舌。Iâ-hô-hoa beh koah-tn̄g thiám-mī ê chhùi-tûn, Í-ki̍p kóng tōa-ōe ê chi̍h.

4In bat講，阮beh用舌來khah贏；　　阮ê嘴唇是阮ê；是誰會做阮ê主ah？In bat kóng, Goán beh ēng chi̍h lâi khah-iâⁿ; Goán ê chhùi-tûn sī goán ê; chī-chūi ōe chòe goán ê chú ah?

5耶和華講，因為困苦ê人ê冤枉，kap sòng-hiong人ê吐氣， 我taⁿ beh起來，安置伊tī伊所切切欣慕穩當ê所在。Iâ-hô-hoa kóng, In-ūi khùn-khó͘ ê lâng ê oan-óng, kap sòng-hiong lâng ê thó͘-khùi, Góa taⁿ beh khí--lâi, an-tì i tī i só͘ chhiat-chhiat him-bō͘ ún-tàng ê só͘-chāi.

6耶和華ê話是純全清氣ê話； 親像銀tī土ê爐鍛鍊，鍛過七pái。Iâ-hô-hoa ê ōe sī sûn-choân chheng-khì ê ōe; Chhin-chhiūⁿ gûn tī thô͘ ê lô͘ thoàn-liān, Thoàn-kè chhit-pái.

7耶和華ah，你beh保護in， Beh庇佑in，永遠脫離chit世代ê人。Iâ-hô-hoa ah, Lí beh pó-hō͘ in, Beh pì-iū in, éng-oán thoat-lī chit sè-tāi ê lâng.

8不重用人高升tī世間人ê中間， 就pháiⁿ人ta̍k所在teh行遊。Put-tiòng-iōng lâng ko-seng tī sè-kan-lâng ê tiong-kan, Chiū pháiⁿ-lâng ta̍k só͘-chāi teh kiâⁿ-iû.

1大衛ê詩，交hō͘樂官。1) 耶和華ah，你bōe記得我，beh jōa久ah？到永遠mah？　　你掩面m̄看我，beh jōa久ah？Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, Lí bōe-kì-tit góa, beh jōa-kú ah? kàu éng-oán mah? Lí ng bīn m̄ khòaⁿ góa, beh jōa-kú ah?

2我ê心神想來想去，我ê心thong日憂苦，beh到jōa久ah？　　我ê對敵高升贏過我beh到jōa久ah？Góa ê sim-sîn siūⁿ-lâi siūⁿ-khì, góa ê sim thong-ji̍t iu-khó͘, beh kàu jōa-kú ah? Góa ê tùi-te̍k ko-seng iâⁿ-kè góa beh kàu jōa-kú ah?

3耶和華我ê上帝ah，求你看顧我，聽我；　　Hō͘我ê目睭光明；驚了我睏到死；Iâ-hô-hoa góa ê Siōng-tè ah, kiû Lí khòaⁿ-kò͘ góa, thiaⁿ góa; Hō͘ góa ê ba̍k-chiu kng-bêng; kiaⁿ-liáu góa khùn kàu sí;

4驚了我ê對敵講，我khah贏伊；　　驚了我ê仇讎tī我搖choah ê時來歡喜。Kiaⁿ-liáu góa ê tùi-te̍k kóng, Góa khah-iâⁿ i; Kiaⁿ-liáu góa ê kiû-siû tī góa iô-choah ê sî lâi hoaⁿ-hí.

5總是我óa靠你ê慈愛；　　我ê心因為你ê拯救來快樂。Chóng-sī góa óa-khò Lí ê chû-ài; Góa ê sim in-ūi Lí ê chín-kiù lâi khoài-lo̍k.

6我beh唱歌o-ló耶和華；　　因為伊用大恩款待我。Góa beh chhiùⁿ-koa o-ló Iâ-hô-hoa; In-ūi I ēng tōa-un khoán-thāi góa.

1大衛ê詩，交hō͘樂官。1) 戇人心內講，無有上帝。　　In thàn邪惡，行可惡ê事；　　無一人行好。Tāi-pi̍t ê si, kau hō͘ Ga̍k-koaⁿ.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê sū; Bô chi̍t-lâng kiâⁿ-hó.

2耶和華tùi天àⁿ落看世間人，　　Beh看有明理ê，　　有chhē求上帝ê á無。Iâ-hô-hoa tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí--ê, Ū chhē-kiû Siōng-tè--ê á-bô.

3In lóng歪chhoa̍h，一概變做污穢；　　無人行好，連一個亦無。In lóng oai-chhoa̍h, it-khài piàn-chòe ù-òe; Bô lâng kiâⁿ-hó, liân chi̍t-ê ia̍h bô.

4做pháiⁿ ê人kiám lóng bōe曉得mah？　　In吞食我ê百姓親像食餅，　　亦無求叫耶和華。Chòe-pháiⁿ ê lâng kiám lóng bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h piáⁿ, Ia̍h bô kiû-kiò Iâ-hô-hoa.

5In tī-hia大大驚惶；　　因為上帝tī義人ê族類中。In tī-hia tōa-tōa kiaⁿ-hiâⁿ; In-ūi Siōng-tè tī gī-lâng ê cho̍k-lūi-tiong.

6Lín hō͘ sòng-hiong人ê計謀變做見笑，　　總是耶和華做伊逃閃ê所在。Lín hō͘ sòng-hiong lâng ê kè-bô͘ pìⁿ-chòe kiàn-siàu, Chóng-sī Iâ-hô-hoa chòe i tô-siám ê só͘-chāi.

7願以色列ê拯救tùi錫安出！　　耶和華救伊受掠ê百姓倒tńg來，　　Hit時雅各beh快樂，以色列beh歡喜。Goān Í-sek-lia̍t ê chín-kiù tùi Sek-an chhut! Iâ-hô-hoa kiù I siū-lia̍h ê peh-sìⁿ tò-tńg-lâi, Hit-sî Ngá-kok beh khoài-lo̍k, Í-sek-lia̍t beh hoaⁿ-hí.