1Lín tio̍h o-ló耶和華。　　Lín tio̍h o-ló耶和華ê名；　　耶和華chiah-ê奴僕，tiàm tī耶和華ê厝，Lín tio̍h o-ló Iâ-hô-hoa. Lín tio̍h o-ló Iâ-hô-hoa ê miâ; Iâ-hô-hoa chiah ê lô͘-po̍k, tiàm tī Iâ-hô-hoa ê chhù,

2Tiàm tī咱ê上帝ê厝ê院內ê，　　Lín tio̍h o-ló伊。Tiàm tī lán ê Siōng-tè ê chhù ê īⁿ-lāi ê, Lín tio̍h o-ló I.

3Lín tio̍h o-ló耶和華，因為耶和華是好；　　Tio̍h唱歌o-ló伊ê名，因為這是真妙。Lín tio̍h o-ló Iâ-hô-hoa, in-ūi Iâ-hô-hoa sī hó; tio̍h chhiùⁿ-koa o-ló I ê miâ, in-ūi che sī chin biāu.

4因為耶和華揀雅各歸伊家己，　　揀以色列做家己特別ê百姓。In-ūi Iâ-hô-hoa kéng Ngá-kok kui I ka-kī, Kéng Í-sek-lia̍t chòe ka-kī te̍k-pia̍t ê peh-sìⁿ.

5我知耶和華做大，　　也知咱ê主pôaⁿ過lóng總ê神明。Góa chai Iâ-hô-hoa chòe tōa, Iā chai lán ê Chú pôaⁿ-kè lóng-chóng ê sîn-bêng.

6耶和華tī天頂，tī地上，tī海中，tī一切ê深淵，　　Lóng chhut-chāi伊ê意思來行。Iâ-hô-hoa tī thiⁿ-téng, tī tōe-chiūⁿ, tī hái-tiong, tī it-chhè ê chhim-ian, Lóng chhut-chāi I ê ì-sù lâi kiâⁿ.

7伊hō͘雲霧tùi地極chhèng起；　　為tio̍h hō͘創造sih-nà，Tùi伊ê庫房中帶風出來。I hō͘ hûn-bū tùi tōe-ke̍k chhèng-khí; Ūi-tio̍h hō͘ chhòng-chō sih-nà, Tùi I ê khò͘-pâng tiong tòa hong chhut-lâi.

8伊將埃及人kap cheng-siⁿ頭chiūⁿ-ê，　　Lóng kā in phah死。I chiong Ai-ki̍p lâng kap cheng-siⁿ thâu-chiūⁿ-ê, Lóng kā in phah-sí.

9埃及ah，伊行神跡奇事tī你ê中間，　　Tī法老kap伊ê眾人臣。Ai-ki̍p ah, I kiâⁿ sîn-jiah kî-sū tī lí ê tiong-kan, Tī Hoat-ló kap i ê chèng jîn-sîn.

10伊phah贏chōe-chōe邦國，　　Koh thâi死大權能ê王；I phah-iâⁿ chōe-chōe pang-kok, Koh thâi-sí tōa koân-lêng ê ông;

11就是A-mô͘-lī 王Se-hông，　　Kap Pa-san 王Go̍k，　　以及迦南ta̍k國。Chiū-sī A-mô͘-lī ông Se-hông, Kap Pa-san ông Go̍k, Í-ki̍p Ka-lâm ta̍k-kok.

12將in ê地做業，　　就是hō͘伊ê百姓以色列做業。Chiong in ê tōe chòe gia̍p, Chiū-sī hō͘ I ê peh-sìⁿ Í-sek-lia̍t chòe gia̍p.

13耶和華ah，你ê名流到永遠；　　耶和華ah，你thang記念ê名流到萬代。Iâ-hô-hoa ah, Lí ê miâ lâu kàu éng-oán; Iâ-hô-hoa ah, Lí thang kì-liām ê miâ lâu kàu bān-tāi.

14因為耶和華beh kā伊ê百姓伸冤；　　為tio̍h伊chiah-ê奴僕回心轉意。In-ūi Iâ-hô-hoa beh kā I ê peh-sìⁿ sin-oan; Ūi-tio̍h I chiah ê lô͘-po̍k hê-sim tńg-ì.

15外邦ê偶像是銀ê金ê，　　是人ê手所造ê。Gōa-pang ê ngó͘-siōng sī gûn--ê kim--ê, Sī lâng ê chhiú só͘ chō--ê.

16In有嘴，也bōe講話；　　有目睭，也bōe看；In ū chhùi, iā bōe kóng-ōe; Ū ba̍k-chiu, iā bōe khòaⁿ;

17In有耳孔，也bōe聽；　　嘴內也無喘氣。In ū hī-khang, iā bōe thiaⁿ; Chhùi-lāi iā bô chhoán-khùi.

18造in-ê，靠in-ê，　　Lóng beh親像in。Chō-in--ê khò-in--ê, Lóng beh chhin-chhiūⁿ in.

19以色列家ah，lín tio̍h o-ló耶和華；　　亞倫ê家ah，lín tio̍h o-ló耶和華；Í-sek-lia̍t-ke ah, lín tio̍h o-ló Iâ-hô-hoa; A-lûn ê ke ah, lín tio̍h o-ló Iâ-hô-hoa;

20利未ê家ah，lín tio̍h o-ló耶和華；　　敬畏耶和華ê人ah，lín tio̍h o-ló耶和華。Lī-bī ê ke ah, lín tio̍h o-ló Iâ-hô-hoa; Kèng-ùi Iâ-hô-hoa ê lâng ah, lín tio̍h o-ló Iâ-hô-hoa.

21耶和華khiā起tī耶路撒冷；　　願伊tùi錫安得tio̍h o-ló。　　Lín tio̍h o-ló耶和華。Iâ-hô-hoa khiā-khí tī Iâ-lō͘-sat-léng; Goān I tùi Sek-an tit-tio̍h o-ló. Lín tio̍h o-ló Iâ-hô-hoa.

1Lín tio̍h感謝耶和華，因為伊是好；　　因為伊ê慈愛永遠tī-teh。Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh.

2Lín tio̍h感謝chiah-ê上帝 ê上帝；　　因為伊ê慈愛永遠tī-teh。Lín tio̍h kám-siā chiah ê siōng-tè ê Siōng-tè; In-ūi I ê chû-ài éng-oán tī-teh.

3Lín tio̍h感謝萬主ê主；　　因為伊ê慈愛永遠tī-teh。Lín tio̍h kám-siā bān-chú ê Chú; In-ūi I ê chû-ài éng-oán tī-teh.

4感謝hit-ê家己行大奇事ê；　　因為伊ê慈愛永遠tī-teh。Kám-siā hit ê ka-kī kiâⁿ tōa kî-sū ê; In-ūi I ê chû-ài éng-oán tī-teh.

5感謝hit-ê用智慧創造天ê；　　因為伊ê慈愛永遠tī-teh。Kám-siā hit ê ēng tì-hūi chhòng-chō thiⁿ ê; In-ūi I ê chû-ài éng-oán tī-teh.

6感謝hit-ê鋪地tī水ê頂面ê；　　因為伊ê慈愛永遠tī-teh。Kám-siā hit ê pho͘ tōe tī chúi ê téng-bīn ê; In-ūi I ê chû-ài éng-oán tī-teh.

7感謝hit-ê創造大ê光體ê；　　因為伊ê慈愛永遠tī-teh。Kám-siā hit ê chhòng-chō tōa ê kng-thé ê; In-ūi I ê chû-ài éng-oán tī-teh.

8就是日頭來管日時；　　因為伊ê慈愛永遠tī-teh；Chiū-sī ji̍t-thâu lâi koán ji̍t--sî; In-ūi I ê chû-ài éng-oán tī-teh;

9月kap星管暝時；　　因為伊ê慈愛永遠tī-teh。Ge̍h kap chhiⁿ koán mî--sî; In-ūi I ê chû-ài éng-oán tī-teh.

10感謝hit-ê phah死埃及人ê大kiáⁿ ê；　　因為伊ê慈愛永遠tī-teh。Kám-siā hit ê phah-sí Ai-ki̍p lâng ê tōa-kiáⁿ ê; In-ūi I ê chû-ài éng-oán tī-teh.

11Chhōa以色列人tùi in中間出來ê；　　因為伊ê慈愛永遠tī-teh。Chhōa Í-sek-lia̍t lâng tùi in tiong-kan chhut-lâi ê; In-ūi I ê chû-ài éng-oán tī-teh.

12用大權能ê手kap伸出來ê手骨；　　因為伊ê慈愛永遠tī-teh。Ēng tōa koân-lêng ê chhiú kap chhun-chhut-lâi ê chhiú-kut; In-ūi I ê chû-ài éng-oán tī-teh.

13感謝hit-ê分開紅海ê；　　因為伊ê慈愛永遠tī-teh。Kám-siā hit ê pun-khui Âng-hái ê; In-ūi I ê chû-ài éng-oán tī-teh.

14也chhōa以色列tùi hit-ê中間經過ê；　　因為伊ê慈愛永遠tī-teh。Iā chhōa Í-sek-lia̍t tùi hit ê tiong-kan keng-kè ê; In-ūi I ê chû-ài éng-oán tī-teh.

15將法老kap伊ê軍兵hiat tī紅海ê；　　因為伊ê慈愛永遠tī-teh。Chiong Hoat-ló kap i ê kun-peng hiat tī Âng-hái ê; In-ūi I ê chû-ài éng-oán tī-teh.

16感謝hit-ê chhōa伊ê百姓行tī曠野ê；　　因為伊ê慈愛永遠tī-teh。Kám-siā hit ê chhōa I ê peh-sìⁿ kiâⁿ tī khòng-iá ê; In-ūi I ê chû-ài éng-oán tī-teh.

17感謝hit-ê phah死大君王ê；　　因為伊ê慈愛永遠tī-teh。Kám-siā hit ê phah-sí tōa kun-ông ê; In-ūi I ê chû-ài éng-oán tī-teh.

18thâi死有名聲ê王ê；　　因為伊ê慈愛永遠tī-teh。Thâi-sí ū miâ-siaⁿ ê ông ê; In-ūi I ê chû-ài éng-oán tī-teh.

19thâi死A-mô͘-lī 王Se-hông；　　因為伊ê慈愛永遠tī-teh。Thâi-sí A-mô͘-lī ông Se-hông; In-ūi I ê chû-ài éng-oán tī-teh.

20Koh thâi死Pa-san 王Go̍k；　　因為伊ê慈愛永遠tī-teh。Koh thâi-sí Pa-san ông Go̍k; In-ūi I ê chû-ài éng-oán tī-teh.

21將in ê地賞賜做業；　　因為伊ê慈愛永遠tī-teh。Chiong in ê tōe siúⁿ-sù chòe gia̍p; In-ūi I ê chû-ài éng-oán tī-teh.

22就是賞賜伊ê奴僕以色列做業；　　因為伊ê慈愛永遠tī-teh。Chiū-sī siúⁿ-sù I ê lô͘-po̍k Í-sek-lia̍t chòe gia̍p; In-ūi I ê chû-ài éng-oán tī-teh.

23伊siàu念咱tī卑微ê位；　　因為伊ê慈愛永遠tī-teh。I siàu-liām lán tī pi-bî ê ūi; In-ūi I ê chû-ài éng-oán tī-teh.

24拯救咱脫離咱ê對敵；　　因為伊ê慈愛永遠tī-teh。Chín-kiù lán thoat-lī lán ê tùi-te̍k; In-ūi I ê chû-ài éng-oán tī-teh.

25I賞賜米糧hō͘見有血氣ê；　　因為伊ê慈愛永遠tī-teh。I siúⁿ-sù bí-niû hō͘ kìⁿ ū hiat-khì ê; In-ūi I ê chû-ài éng-oán tī-teh.

26Lín tio̍h感謝天頂ê上帝；　　因為伊ê慈愛永遠tī-teh。Lín tio̍h kám-siā thiⁿ-téng ê Siōng-tè; In-ūi I ê chû-ài éng-oán tī-teh.

1阮bat坐tī巴比倫ê河邊，　　一下想tio̍h錫安，目屎就流。Goán bat chē tī Pa-pí-lûn ê hô-piⁿ, Chi̍t-ē siūⁿ-tio̍h Sek-an, ba̍k-sái chiū lâu.

2阮將阮ê琴，吊tī hit位ê柳樹。Goán chiong goán ê khîm, Tiàu tī hit-ūi ê liú-chhiū.

3因為tī-hia掠阮ê，ài阮唱歌，　　搶阮ê ài阮快樂，　　講，Lín tio̍h kā阮唱一首錫安ê歌。In-ūi tī-hia lia̍h-goán--ê, ài goán chhiùⁿ-koa, Chhiúⁿ-goán--ê ài goán khoài-lo̍k, Kóng, Lín tio̍h kā goán chhiùⁿ chi̍t siú Sek-an ê koa.

4阮tī外邦，　　Thái-thó ōe唱耶和華ê歌？Goán tī gōa-pang, Thái-thó ōe chhiùⁿ Iâ-hô-hoa ê koa?

5耶路撒冷ah，我若bōe記得你，　　願我ê chiàⁿ手失落伊ê本事。Iâ-lō͘-sat-léng ah, góa nā bōe-kì-tit lí, Goān góa ê chiàⁿ-chhiú sit-lo̍h i ê pún-sū.

6我若bōe記得你，　　若無看耶路撒冷khah過頭tī我所第一歡喜ê，　　願我ê舌連tī我ê chiūⁿ-kiuⁿ。Góa nā bōe-kì-tit lí, Nā bô khòaⁿ Iâ-lō͘-sat-léng khah kè-thâu tī góa só͘ tē-it hoaⁿ-hí ê, Goān góa ê chi̍h liâm tī góa ê chiūⁿ-kiuⁿ.

7耶路撒冷tú-tio̍h患難ê時，　　Í-tong人講，拆毀伊，拆毀伊，　　直直拆到地基；　　耶和華ah，求你記得hit日。Iâ-lō͘-sat-léng tú-tio̍h hoān-lān ê sî, Í-tong lâng kóng, Thiah-húi i, thiah-húi i, Ti̍t-ti̍t thiah kàu tōe-ki; Iâ-hô-hoa ah, kiû Lí kì-tit hit-ji̍t.

8Teh-beh受滅ê巴比倫城ah，　　報應你親像你款待阮ê，　　Hit號人有福氣。Teh-beh siū bia̍t ê Pa-pí-lûn siâⁿ ah, Pò-èng lí chhin-chhiūⁿ lí khoán-thāi goán ê, Hit-hō lâng ū hok-khì.

9掠你ê嬰á，siak tī石磐ê，　　Hit號人有福氣。Lia̍h lí ê eⁿ-á, siak tī chio̍h-pôaⁿ ê, Hit-hō lâng ū hok-khì.