1大衛ê詩，交hō͘樂官。1) 耶和華ah，你已經鑑察我，bat我。Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, Lí í-keng kàm-chhat góa, bat góa.

2我坐落去，我peh起來，你lóng知；　　你tùi遠遠知我ê念頭。Góa chē--lo̍h-khì, góa peh--khí-lâi, Lí lóng chai; Lí tùi hn̄g-hn̄g chai góa ê liām-thâu.

3我行路，我倒tī眠床，你lóng詳細知；　　我一切所行ê，你也深知。Góa kiâⁿ-lō͘, góa tó tī bîn-chhn̂g, Lí lóng siông-sè chai; Góa it-chhè só͘-kiâⁿ--ê, Lí iā chhim-chai.

4耶和華ah，我ê嘴所講ê話，　　你無一句m̄知。Iâ-hô-hoa ah, góa ê chhùi só͘ kóng ê ōe, Lí bô chi̍t-kù m̄-chai.

5你tī我ê前後圍我，　　按手tī我ê頂面。Lí tī góa ê chêng-āu ûi góa, Hōaⁿ-chhiú tī góa ê téng-bīn.

6Chit款ê知識奇妙，我bōe能測度；　　真高，我bōe能到。Chit khoán ê chai-bat kî-biāu, góa bōe-ōe chhek-to̍k; Chin-koâiⁿ, góa bōe-ōe kàu.

7我beh去toh落，閃避你ê神？　　我beh走去toh落，閃避你ê面？Góa beh khì toh-lo̍h, siám-pī Lí ê sîn? Góa beh cháu-khì toh-lo̍h, siám-pī Lí ê bīn?

8我若上天，你tī-hia；　　我若睏tī陰間，你亦tī-hia。Góa nā chiūⁿ thiⁿ, Lí tī-hia; Góa nā khùn tī im-kan, Lí ia̍h tī-hia.

9我若thí開清早ê翼，　　飛到海ê極頭來khiā起；Góa nā thí-khui chheng-chá ê si̍t, Pe kàu hái ê ke̍k-thâu lâi khiā-khí;

10就若tī-hia，你ê手亦beh引chhōa我，　　你ê chiàⁿ手亦beh 牽我。Chiū nā tī-hia, Lí ê chhiú ia̍h beh ín-chhōa góa, Lí ê chiàⁿ-chhiú ia̍h beh khan góa.

11我若講，烏暗beh遮蓋我，　　Koh四圍ê光beh變做暗暝；Góa nā kóng, O͘-àm beh jia-khàm góa, Koh sì-ûi ê kng beh pìⁿ-chòe àm-mî;

12就烏暗亦bōe能遮蓋我，hō͘你無看見；　　烏暗暝親像日時發光。　　烏暗kap光明，在你看lóng是一樣。Chiū o͘-àm ia̍h bōe-ōe jia-khàm góa, hō͘ Lí bô khòaⁿ-kìⁿ; O͘-àm mî chhin-chhiūⁿ ji̍t--sî hoat-kng. O͘-àm kap kng-bêng, chāi Lí khòaⁿ lóng sī chi̍t-iūⁿ.

13因為我ê臟腑，是你所創造ê；　　我tī老母ê腹肚內，你有庇佑我。In-ūi góa ê chōng-hú, sī Lí só͘ chhòng-chō--ê; Góa tī lāu-bú ê pak-tó͘-lāi, Lí ū pì-iū góa.

14我beh感謝你，因為我受造奇妙thang驚；　　你ê所做奇妙；這是我ê心深知ê。Góa beh kám-siā Lí, in-ūi góa siū-chō kî-biāu thang kiaⁿ; Lí ê só͘-chòe kî-biāu; Che sī góa ê sim chhim chai--ê.

15我tī暗中受造，　　Tī地ê真底受連絡，　　Hit時我ê形體無隱瞞tī你。Góa tī àm-tiong siū-chō, Tī tōe ê chin-tóe siū liân-lo̍k, Hit-sî góa ê hêng-thé bô ún-môa tī Lí.

16我bē成形ê體質，　　你ê目睭已經看見，　　所定tio̍h ê日，iáu未有一日，　　Lóng記tī你ê冊。Góa bē chiâⁿ-hêng ê thé-chit, Lí ê ba̍k-chiu í-keng khòaⁿ-kìⁿ, Só͘ tiāⁿ-tio̍h ê ji̍t, iáu-bē ū chi̍t-ji̍t, Lóng kì tī Lí ê chheh.

17上帝ah，你ê意思對tī我，到chiah寶貝！　　Hit-ê數額，到chiah chōe！Siōng-tè ah, Lí ê ì-sù tùi tī góa, kàu chiah pó-pòe! Hit ê siàu-gia̍h, kàu chiah chōe!

18我若beh算伊，妣海沙khah-chōe；　　我睏精神ê時，猶原kap你相kap tī-teh。Góa nā beh sǹg--i, pí hái-soa khah-chōe; Góa khùn cheng-sîn ê sî, iû-goân kap Lí saⁿ-kap tī-teh.

19上帝ah，你的確beh剿滅pháiⁿ人；　　所以lín chiah-ê ài hō͘人流血ê，tio̍h離開我去。Siōng-tè ah, Lí tek-khak beh châu-bia̍t pháiⁿ-lâng; Só͘-í lín chiah ê ài hō͘ lâng lâu-huih--ê, tio̍h lī-khui góa khì.

20因為in講pháiⁿ話，抵觸你；　　你ê對敵亦lām-sám稱你ê名。In-ūi in kóng pháiⁿ-ōe, tú-tak Lí; Lí ê tùi-te̍k ia̍h lām-sám chheng Lí ê miâ.

21耶和華ah，怨恨你ê，我kiám無怨恨in mah？　　起來攻擊你ê，我kiám無厭賤in mah？Iâ-hô-hoa ah, oàn-hūn Lí--ê, góa kiám bô oàn-hūn in mah? Khí-lâi kong-kek Lí--ê, góa kiám bô iàm-chiān in mah?

22我盡在怨恨in，掠in做我ê對敵。Góa chīn-chāi oàn-hūn in, lia̍h in chòe góa ê tùi-te̍k.

23上帝ah，求你鑑察我，知我ê心思；　　試驗我，知我ê意思。Siōng-tè ah, kiû Lí kàm-chhat góa, chai góa ê sim-su; Chhì-giām góa, chai góa ê ì-sù.

24看我有甚麼pháiⁿ所行無，　　Chhōa我行永活ê路。Khòaⁿ góa ū sím-mi̍h pháiⁿ só͘-kiâⁿ bô, Chhōa góa kiâⁿ éng-oa̍h ê lō͘.

1大衛ê詩，交hō͘樂官。1) 耶和華ah，求你救我脫離pháiⁿ人；　　保護我脫離強惡 ê人。Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, kiû Lí kiù góa thoat-lī pháiⁿ-lâng; Pó-hō͘ góa thoat-lī kiông-ok ê lâng.

2In ê心內圖謀奸惡，　　常常聚集ài交戰。In ê sim-lāi tô͘-bô͘ kan-ok, Siông-siông chū-chi̍p ài kau-chiàn.

3In hō͘ in ê舌內親像蛇；　　嘴唇下有毒蛇ê毒。[Sè-la̍h]In hō͘ in ê chi̍h lāi chhin-chhiūⁿ chôa; Chhùi-tûn-ē ū to̍k-chôa ê to̍k. [sè-la̍h

4耶和華ah，求你保守我脫離pháiⁿ人ê手；　　保護我脫離強惡 ê人；　　In想beh chhia hō͘我跋倒。Iâ-hô-hoa ah, kiû Lí pó-siú góa thoat-lī pháiⁿ-lâng ê chhiú; Pó-hō͘ góa thoat-lī kiông-ok ê lâng; In siūⁿ beh chhia hō͘ góa poa̍h-tó.

5驕傲ê人為我暗靜張活tauh kap索；　　In tī路邊an羅網，設環套，beh害我。[Sè-la̍h]Kiau-ngō͘ ê lâng ūi góa àm-chīⁿ tiuⁿ oa̍h-tauh kap soh; In tī lō͘-piⁿ an lô-bāng, Siat khoân-thò, beh hāi góa. [sè-la̍h

6我bat對耶和華講，你是我ê上帝；　　耶和華ah，求你àⁿ耳孔聽我懇求ê聲。Góa bat tùi Iâ-hô-hoa kóng, Lí sī góa ê Siōng-tè; Iâ-hô-hoa ah, kiû Lí àⁿ hī-khang thiaⁿ góa khún-kiû ê siaⁿ.

7主耶和華，我救恩ê力ah，　　Tī交戰ê日，你jia遮我ê頭殼。Chú Iâ-hô-hoa, góa kiù-un ê la̍t ah, Tī kau-chiàn ê ji̍t, Lí jia-cha̍h góa ê thâu-khak.

8耶和華ah，求你m̄-thang照pháiⁿ人ê所ài；　　M̄-thang成in ê計謀，驚了in自高。[Sè-la̍h]Iâ-hô-hoa ah, kiû Lí m̄-thang chiàu pháiⁿ-lâng ê só͘ ài; M̄-thang chiâⁿ in ê kè-bô͘, kiaⁿ-liáu in chū-ko. [sè-la̍h

9論到hiah-ê圍困我ê人ê頭，　　願in嘴唇ê奸惡淹密in家己；Lūn-kàu hiah-ê ûi-khùn góa ê lâng ê thâu, Goān in chhùi-tûn ê kan-ok im-ba̍t in ka-kī;

10願熱熱ê火炭落tī in ê身上；　　願in受hiat tī hé-nih，　　Hiat tī深坑內，bōe koh起來。Goān jia̍t-jia̍t ê hé-thòaⁿ lo̍h tī in ê sin-chiūⁿ; Goān in siū hiat tī hé--nih, Hiat tī chhim-khiⁿ-lāi, bōe koh khí-lâi.

11講pháiⁿ話ê人tī地上的確khiā-bōe-tiâu；　　災厄的確追jip強暴ê人，將in打倒。Kóng pháiⁿ-ōe ê lâng tī tōe-chiūⁿ tek-khak khiā-bōe-tiâu; Chai-ē tek-khak tui-jip kiông-pō ê lâng, chiong in táⁿ-tó.

12我知耶和華beh為困苦ê人伸冤，　　Beh為sòng-hiong人辯明冤屈。Góa chai Iâ-hô-hoa beh ūi khùn-khó͘ ê lâng sin-oan, Beh ūi sòng-hiong lâng piān-bêng un-khut.

13義人的確beh感謝你ê名；　　正直人beh khiā起你ê面前。Gī-lâng tek-khak beh kám-siā Lí ê miâ; Chèng-ti̍t lâng beh khiā-khí Lí ê bīn-chêng.

1大衛ê詩。1) 耶和華ah，我bat求叫你；　　求你緊緊臨到我；　　我求叫你ê時，　　願你àⁿ耳孔聽我ê聲。Tāi-pi̍t ê si.1) Iâ-hô-hoa ah, góa bat kiû-kiò Lí; Kiû Lí kín-kín lîm-kàu góa; Góa kiû-kiò Lí ê sî, Goān Lí àⁿ hī-khang thiaⁿ góa ê siaⁿ.

2願我ê祈禱，親像香，排tī你ê面前；　　願我ê kia̍h起手，親像ê-hng時ê祭祀。Goān góa ê kî-tó, chhin-chhiūⁿ hiuⁿ, pâi tī Lí ê bīn-chêng; Goān góa ê kia̍h-khí chhiú, chhin-chhiūⁿ ê-hng-sî ê chè-sū.

3耶和華ah，求你顧守我ê嘴；　　把守我嘴唇ê門。Iâ-hô-hoa ah, kiû Lí kò͘-siú góa ê chhùi; Pé-siú góa chhùi-tûn ê mn̂g.

4求你無hō͘我ê心偏ǹg邪惡，　　致到我kap作孽ê人同行pháiⁿ-tāi；　　亦無hō͘我食in ê好物。Kiû Lí bô hō͘ góa ê sim phian-ǹg siâ-ok, Tì-kàu góa kap chok-gia̍t ê lâng tâng-kiâⁿ pháiⁿ-tāi; Ia̍h bô hō͘ góa chia̍h in ê hó-mi̍h.

5義人phah我，我算做仁慈；　　伊責備我，我算做頭殼頂抹油；　　我ê頭殼無beh oa̍t-siám；　　當in行pháiⁿ ê時，我猶原beh祈禱。Gī-lâng phah góa, góa sǹg-chòe jîn-chû; I chek-pī góa, góa sǹg-chòe thâu-khak-téng boah-iû; Góa ê thâu-khak bô beh oa̍t-siám; Tng in kiâⁿ-pháiⁿ ê sî, góa iû-goân beh kî-tó.

6In ê審判官受hiat落山崁；　　In beh聽我ê話，因為這話是甜。In ê sím-phòaⁿ-koaⁿ siū hiat-lo̍h soaⁿ-khàm; In beh thiaⁿ góa ê ōe, in-ūi che ōe sī tiⁿ.

7阮ê骨頭四散tī墓邊；　　親像人作田，犁開hit-ê土。Goán ê kut-thâu sì-sòaⁿ tī bōng-piⁿ; Chhin-chhiūⁿ lâng choh-chhân, lôe-khui hit ê thô͘.

8主耶和華ah，我ê目睭ǹg你；　　我óa靠你，求你m̄-thang放sak我ê神魂無依óa。Chú Iâ-hô-hoa ah, góa ê ba̍k-chiu ǹg Lí; Góa óa-khò Lí, kiû Lí m̄-thang pàng-sak góa ê sîn-hûn bô i-óa.

9求你保護我脫離in為tio̍h我張ê活tauh，　　Kap行pháiⁿ ê人ê環套。Kiû Lí pó-hō͘ góa thoat-lī in ūi-tio̍h góa tiuⁿ ê oa̍h-tauh, Kap kiâⁿ-pháiⁿ ê lâng ê khoân-thò.

10願pháiⁿ人陷落tī in ê羅網；　　總是我得tio̍h脫離。Goān pháiⁿ-lâng hām-lo̍h tī in ê lô-bāng; Chóng-sī góa tit-tio̍h thoat-lī.