1大衛ê詩。1) 耶和華ah，求你聽我ê祈禱，àⁿ耳孔聽我ê懇求；　　照你ê信實，照你ê公義，來應我。Tāi-pi̍t ê si.1) Iâ-hô-hoa ah, kiû Lí thiaⁿ góa ê kî-tó, àⁿ hī-khang thiaⁿ góa ê khún-kiû; Chiàu Lí ê sìn-si̍t, chiàu Lí ê kong-gī, lâi ìn góa.

2求你莫得審問你ê奴僕，　　因為tī你ê面前，活teh ê人，無一個稱做義。Kiû Lí bo̍h-tit sím-mn̄g Lí ê lô͘-po̍k, In-ūi tī Lí ê bīn-chêng, oa̍h-teh ê lâng, bô chi̍t-ê chheng-chòe-gī.

3對敵窘迫我，　　將我ê性命，phah倒tī地裡；　　Hō͘我tiàm tī烏暗ê所在，親像死久久ê人一樣。Tùi-te̍k khún-pek góa, Chiong góa ê sìⁿ-miā, phah-tó tī tōe--nih; Hō͘ góa tiàm tī o͘-àm ê só͘-chāi, chhin-chhiūⁿ sí kú-kú ê lâng chi̍t-iūⁿ.

4所以我ê神魂tī我ê內面暈去；　　我ê心tī我ê內面悽凊。Só͘-í góa ê sîn-hûn tī góa ê lāi-bīn hūn-khì; Góa ê sim tī góa ê lāi-bīn chhiⁿ-chhìn.

5我記得古早ê日；　　Siàu念你一切ê所行；　　靜靜想你ê手ê所做。Góa kì-tit kó͘-chá ê ji̍t; Siàu-liām Lí it-chhè ê só͘-kiâⁿ; Chēng-chēng siūⁿ Lí ê chhiú ê só͘-chòe.

6我ǹg你kia̍h起手，　　我ê心欣慕你，親像炕旱ê地一樣。[Sè-la̍h]Góa ǹg Lí kia̍h-khí chhiú, Góa ê sim him-bō͘ Lí, chhin-chhiūⁿ khòng-hān ê tōe chi̍t-iūⁿ. [sè-la̍h

7耶和華ah，求你緊緊應我；　　我ê心神廢了了；M̄-thang對我掩面；免得我親像落墓ê人。Iâ-hô-hoa ah, kiû Lí kín-kín ìn góa; Góa ê sim-sîn hùi-liáu-liáu; M̄-thang tùi góa ng bīn; Bián-tit góa chhin-chhiūⁿ lo̍h-bōng ê lâng.

8求你hō͘我早起時聽見你慈愛ê聲，　　因為我óa靠你；　　求你hō͘我知應該行ê路。　　因為我ê心仰望你。Kiû Lí hō͘ góa chá-khí-sî thiaⁿ-kìⁿ Lí chû-ài ê siaⁿ, In-ūi góa óa-khò Lí; Kiû Lí hō͘ góa chai eng-kai kiâⁿ ê lō͘. In-ūi góa ê sim gióng-bōng Lí.

9耶和華ah，求你救我脫離我ê對敵；　　我走去bih tī你hia。Iâ-hô-hoa ah, kiû Lí kiù góa thoat-lī góa ê tùi-te̍k; Góa cháu--khì bih tī Lí hia.

10你是我ê上帝，求你教示我行你ê旨意；　　你ê神是好，求你chhōa我tī平直ê地。Lí sī góa ê Siōng-tè, kiû Lí kà-sī góa kiâⁿ Lí ê chí-ì; Lí ê sîn sī hó, kiû Lí chhōa góa tī pîⁿ-ti̍t ê tōe.

11耶和華ah，求你為tio̍h你ê名hō͘我活；　　照你ê公義，chhōa我出患難中。Iâ-hô-hoa ah, kiû Lí ūi-tio̍h Lí ê miâ hō͘ góa oa̍h; Chiàu Lí ê kong-gī, chhōa góa chhut hoān-lān-tiong.

12照你ê慈愛，除去我ê對敵，　　剿滅一切苦楚我ê人；　　因為我是你ê奴僕。Chiàu Lí ê chû-ài, tû-khì góa ê tùi-te̍k, Châu-bia̍t it-chhè khó͘-chhó͘ góa ê lâng; In-ūi góa sī Lí ê lô͘-po̍k.

1大衛ê詩。1) 耶和華我ê石磐，是應該o-ló-ê；　　伊教示我ê手能爭戰，　　教示我ê指頭á能相thâi。Tāi-pi̍t ê si.1) Iâ-hô-hoa góa ê chio̍h-pôaⁿ, sī eng-kai o-ló--ê; I kà-sī góa ê chhiú ōe cheng-chiàn, Kà-sī góa ê chńg-thâu-á ōe saⁿ-thâi.

2伊是我ê慈愛，我ê山寨，　　我ê高台，我ê救主；　　我ê藤牌，是我所óa靠ê；　　伊hō͘我ê百姓降服tī我ê下面。I sī góa ê chû-ài, góa ê soaⁿ-chē, Góa ê koâiⁿ-tâi, góa ê kiù-chú; Góa ê tîn-pâi, sī góa só͘ óa-khò--ê; I hō͘ góa ê peh-sìⁿ hâng-ho̍k tī góa ê ē-bīn.

3耶和華ah，人是甚麼，你竟然bat伊？　　人ê kiáⁿ是甚麼，你竟然siàu念伊？Iâ-hô-hoa ah, lâng sī sím-mi̍h, Lí kéng-jiân bat i? Lâng ê kiáⁿ sī sím-mi̍h, Lí kéng-jiân siàu-liām i?

4人親像pûn一個氣；　　伊ê日子親像影過去。Lâng chhin-chhiūⁿ pûn chi̍t ê khùi; I ê ji̍t-chí chhin-chhiūⁿ iáⁿ kè--khì.

5耶和華ah，求你hō͘天垂落，親身降臨；　　摸山，山就出煙。Iâ-hô-hoa ah, kiû Lí hō͘ thiⁿ sûi-lo̍h, chhin-sin kàng-lîm; Bong soaⁿ, soaⁿ chiū chhut ian.

6求你發出sih-nà，hō͘ in四散；　　射出你ê箭，hō͘ in擾亂。Kiû Lí hoat-chhut sih-nà, hō͘ in sì-sòaⁿ; Siā-chhut Lí ê chìⁿ, hō͘ in jiáu-loān.

7你tùi頂面伸手救我；　　救我出大水，救我脫離外邦人ê手。Lí tùi téng-bīn chhun-chhiú kiù góa; Kiù góa chhut tōa-chúi, Kiù góa thoat-lī gōa-pang lâng ê chhiú.

8In ê嘴講白賊，　　In ê chiàⁿ手是奸詐ê chiàⁿ手。In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú.

9上帝ah，我beh對你唱新ê歌；　　用十條絃ê瑟，唱歌o-ló你。Siōng-tè ah, góa beh tùi Lí chhiùⁿ sin ê koa; Ēng cha̍p-tiâu-hiân ê sek, chhiùⁿ-koa o-ló Lí.

10你是hit-ê拯救列王ê，　　你是hit-ê救奴僕大衛脫離害命ê刀ê。Lí sī hit ê chín-kiù lia̍t-ông--ê, Lí sī hit ê kiù lô͘-po̍k Tāi-pi̍t thoat-lī hāi-miā ê to--ê.

11求你拯救我，救我脫離外邦人ê手；　　In ê嘴講白賊，　　In ê chiàⁿ手是奸詐ê chiàⁿ手。Kiû Lí chín-kiù góa, kiù góa thoat-lī gōa-pang lâng ê chhiú; In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú.

12阮ê ta-po͘-kiáⁿ當少年ê時，親像樹á大叢；　　阮ê cha-bó͘-kiáⁿ親像厝角ê石，照起宮ê款式雕琢ê。Goán ê ta-po͘-kiáⁿ tng siàu-liân ê sî, chhin-chhiūⁿ chhiū-á tōa-châng; Goán ê cha-bó͘-kiáⁿ chhin-chhiūⁿ chhù-kak ê chio̍h, chiàu khí-keng ê khoán-sit tiau-tok--ê.

13阮ê粟倉滿滿，倭出ta̍k樣ê米糧；　　阮ê羊tī山野生湠，chiâⁿ千chiâⁿ萬。Goán ê chhek-chhng móa-móa, ōe chhut ta̍k-iūⁿ ê bí-niû; Goán ê iûⁿ tī soaⁿ-iá siⁿ-thòaⁿ, chiâⁿ-chheng chiâⁿ-bān.

14阮ê牛拖物滿載；　　無有人入來侵佔，亦免出去爭戰；　　阮ê街市，亦無有啼哭ê聲。Goán ê gû thoa-mi̍h móa-chāi; Bô ū lâng ji̍p-lâi chhim-chiàm, ia̍h bián chhut-khì cheng-chiàn; Goán ê koe-chhī, ia̍h bô ū thî-khàu ê siaⁿ.

15Tú-tio̍h chit號景況ê百姓，有福氣；　　有耶和華做in ê上帝，chit號ê百姓有福氣。Tú-tio̍h chit-hō kéng-hóng ê peh-sìⁿ, ū hok-khì; Ū Iâ-hô-hoa chòe in ê Siōng-tè, chit-hō ê peh-sìⁿ ū hok-khì.

1大衛o-ló ê詩。1) 我ê上帝我ê王ah，　　我beh尊你做高，我beh永遠o-ló你ê名。Tāi-pi̍t o-ló ê si.1) Góa ê Siōng-tè góa ê Ông ah, Góa beh chun Lí chòe koâiⁿ, góa beh éng-oán o-ló Lí ê miâ.

2我beh日日祝謝你；　　亦beh永遠o-ló你ê名。Góa beh ji̍t-ji̍t chiok-siā Lí; Ia̍h beh éng-oán o-ló Lí ê miâ.

3耶和華至大，應該受大ê o-ló；　　伊ê大到bōe測度-得。Iâ-hô-hoa chì-tōa, eng-kai siū tōa ê o-ló; I ê tōa kàu bōe chhek-to̍k--tit.

4Chit代beh對hit代o-ló你ê所做；　　亦beh報揚你大權能ê事。Chit-tāi beh tùi hit-tāi o-ló Lí ê só͘-chòe; Ia̍h beh pò-iông Lí tōa koân-lêng ê sū.

5我beh靜靜想你尊貴榮光ê威嚴，　　Kap你奇妙ê所做。Góa beh chēng-chēng siūⁿ Lí chun-kùi êng-kng ê ui-giâm, Kap Lí kî-biāu ê só͘-chòe.

6人人beh講起你thang驚ê事ê大權能；　　我亦beh報揚你ê至大。Lâng-lâng beh kóng-khí Lí thang kiaⁿ ê sū ê tōa koân-lêng; Góa ia̍h beh pò-iông Lí ê chì-tōa.

7In beh報揚你大恩 ê記念，　　亦beh唱歌o-ló你ê公義。In beh pò-iông Lí tōa-un ê kì-liām, Ia̍h beh chhiùⁿ-koa o-ló Lí ê kong-gī.

8耶和華有恩惠，有憐憫；　　無快快受氣，大大有慈愛。Iâ-hô-hoa ū un-hūi, ū lîn-bín; Bô khoài-khoài siū-khì, tōa-tōa ū chû-ài.

9耶和華好款待萬類；　　伊ê憐憫致蔭伊一切所造ê。Iâ-hô-hoa hó khoán-thāi bān-lūi; I ê lîn-bín tì-ìm I it-chhè só͘ chō--ê.

10耶和華ah，你一切所造ê beh感謝你；　　你聖ê百姓亦beh o-ló你。Iâ-hô-hoa ah, Lí it-chhè só͘ chō--ê beh kám-siā Lí; Lí sèng ê peh-sìⁿ ia̍h beh o-ló Lí.

11In講起你ê國ê榮光；　　談論你ê大權能。In kóng-khí Lí ê kok ê êng-kng; Tâm-lūn Lí ê tōa koân-lêng.

12Thang hō͘世間人知你大權能ê所做，　　Kap你國威嚴ê榮光。Thang hō͘ sè-kan-lâng chai Lí tōa koân-lêng ê só͘-chòe, Kap Lí kok ui-giâm ê êng-kng.

13你ê國是永遠ê國；　　你執掌ê權柄到萬代。Lí ê kok sī éng-oán ê kok; Lí chip-chiáng ê koân-pèng kàu bān-tāi.

14凡若跋倒ê，耶和華扶持in；　　凡若受壓制ê，扶in起來。Hoān-nā poa̍h-tó--ê, Iâ-hô-hoa hû-chhî in; Hoān-nā siū ap-chè--ê, hû in khí--lâi.

15萬項有lóng kia̍h目ǹg你，　　你照時hō͘ in食物。Bān-hāng-ū lóng kia̍h-ba̍k ǹg Lí, Lí chiàu-sî hō͘ in chia̍h-mi̍h.

16你開你ê手，　　Hō͘有活氣ê lóng照所ài飽足。Lí khui Lí ê chhiú, Hō͘ ū oa̍h-khì--ê lóng chiàu só͘-ài pá-chiok.

17耶和華tī伊一切所行ê，無m̄公義，　　Tī伊一切所做ê，lóng有慈愛。Iâ-hô-hoa tī I it-chhè só͘ kiâⁿ--ê, bô m̄ kong-gī, Tī I it-chhè só͘ chòe--ê, lóng ū chû-ài.

18凡若求叫耶和華ê，耶和華kap in親近，　　就是親近hiah-ê誠實求叫伊ê。Hoān-nā kiû-kiò Iâ-hô-hoa ê, Iâ-hô-hoa kap in chhin-kūn, Chiū-sī chhin-kūn hiah ê sêng-si̍t kiû-kiò I ê.

19敬畏伊ê，伊beh成in ê心所ài；　　亦beh聽in ê求叫，來拯救in。Kèng-ùi I ê, I beh chiâⁿ in ê sim só͘ ài; Ia̍h beh thiaⁿ in ê kiû-kiò, lâi chín-kiù in.

20耶和華保護一切疼伊ê人；　　總是一切做pháiⁿ ê人，伊beh滅無in。Iâ-hô-hoa pó-hō͘ it-chhè thiàⁿ I ê lâng; Chóng-sī it-chhè chòe-pháiⁿ ê lâng, I beh bia̍t-bô in.

21我ê嘴beh講出o-ló耶和華ê話；　　願見有血氣ê，lóng永遠o-ló伊ê聖名。Góa ê chhùi beh kóng-chhut o-ló Iâ-hô-hoa ê ōe; Goān kìⁿ ū hiat-khì--ê, lóng éng-oán o-ló I ê sèng-miâ.