1大衛o-ló ê詩。1) 我ê上帝我ê王ah，　　我beh尊你做高，我beh永遠o-ló你ê名。Tāi-pi̍t o-ló ê si.1) Góa ê Siōng-tè góa ê Ông ah, Góa beh chun Lí chòe koâiⁿ, góa beh éng-oán o-ló Lí ê miâ.

2我beh日日祝謝你；　　亦beh永遠o-ló你ê名。Góa beh ji̍t-ji̍t chiok-siā Lí; Ia̍h beh éng-oán o-ló Lí ê miâ.

3耶和華至大，應該受大ê o-ló；　　伊ê大到bōe測度-得。Iâ-hô-hoa chì-tōa, eng-kai siū tōa ê o-ló; I ê tōa kàu bōe chhek-to̍k--tit.

4Chit代beh對hit代o-ló你ê所做；　　亦beh報揚你大權能ê事。Chit-tāi beh tùi hit-tāi o-ló Lí ê só͘-chòe; Ia̍h beh pò-iông Lí tōa koân-lêng ê sū.

5我beh靜靜想你尊貴榮光ê威嚴，　　Kap你奇妙ê所做。Góa beh chēng-chēng siūⁿ Lí chun-kùi êng-kng ê ui-giâm, Kap Lí kî-biāu ê só͘-chòe.

6人人beh講起你thang驚ê事ê大權能；　　我亦beh報揚你ê至大。Lâng-lâng beh kóng-khí Lí thang kiaⁿ ê sū ê tōa koân-lêng; Góa ia̍h beh pò-iông Lí ê chì-tōa.

7In beh報揚你大恩 ê記念，　　亦beh唱歌o-ló你ê公義。In beh pò-iông Lí tōa-un ê kì-liām, Ia̍h beh chhiùⁿ-koa o-ló Lí ê kong-gī.

8耶和華有恩惠，有憐憫；　　無快快受氣，大大有慈愛。Iâ-hô-hoa ū un-hūi, ū lîn-bín; Bô khoài-khoài siū-khì, tōa-tōa ū chû-ài.

9耶和華好款待萬類；　　伊ê憐憫致蔭伊一切所造ê。Iâ-hô-hoa hó khoán-thāi bān-lūi; I ê lîn-bín tì-ìm I it-chhè só͘ chō--ê.

10耶和華ah，你一切所造ê beh感謝你；　　你聖ê百姓亦beh o-ló你。Iâ-hô-hoa ah, Lí it-chhè só͘ chō--ê beh kám-siā Lí; Lí sèng ê peh-sìⁿ ia̍h beh o-ló Lí.

11In講起你ê國ê榮光；　　談論你ê大權能。In kóng-khí Lí ê kok ê êng-kng; Tâm-lūn Lí ê tōa koân-lêng.

12Thang hō͘世間人知你大權能ê所做，　　Kap你國威嚴ê榮光。Thang hō͘ sè-kan-lâng chai Lí tōa koân-lêng ê só͘-chòe, Kap Lí kok ui-giâm ê êng-kng.

13你ê國是永遠ê國；　　你執掌ê權柄到萬代。Lí ê kok sī éng-oán ê kok; Lí chip-chiáng ê koân-pèng kàu bān-tāi.

14凡若跋倒ê，耶和華扶持in；　　凡若受壓制ê，扶in起來。Hoān-nā poa̍h-tó--ê, Iâ-hô-hoa hû-chhî in; Hoān-nā siū ap-chè--ê, hû in khí--lâi.

15萬項有lóng kia̍h目ǹg你，　　你照時hō͘ in食物。Bān-hāng-ū lóng kia̍h-ba̍k ǹg Lí, Lí chiàu-sî hō͘ in chia̍h-mi̍h.

16你開你ê手，　　Hō͘有活氣ê lóng照所ài飽足。Lí khui Lí ê chhiú, Hō͘ ū oa̍h-khì--ê lóng chiàu só͘-ài pá-chiok.

17耶和華tī伊一切所行ê，無m̄公義，　　Tī伊一切所做ê，lóng有慈愛。Iâ-hô-hoa tī I it-chhè só͘ kiâⁿ--ê, bô m̄ kong-gī, Tī I it-chhè só͘ chòe--ê, lóng ū chû-ài.

18凡若求叫耶和華ê，耶和華kap in親近，　　就是親近hiah-ê誠實求叫伊ê。Hoān-nā kiû-kiò Iâ-hô-hoa ê, Iâ-hô-hoa kap in chhin-kūn, Chiū-sī chhin-kūn hiah ê sêng-si̍t kiû-kiò I ê.

19敬畏伊ê，伊beh成in ê心所ài；　　亦beh聽in ê求叫，來拯救in。Kèng-ùi I ê, I beh chiâⁿ in ê sim só͘ ài; Ia̍h beh thiaⁿ in ê kiû-kiò, lâi chín-kiù in.

20耶和華保護一切疼伊ê人；　　總是一切做pháiⁿ ê人，伊beh滅無in。Iâ-hô-hoa pó-hō͘ it-chhè thiàⁿ I ê lâng; Chóng-sī it-chhè chòe-pháiⁿ ê lâng, I beh bia̍t-bô in.

21我ê嘴beh講出o-ló耶和華ê話；　　願見有血氣ê，lóng永遠o-ló伊ê聖名。Góa ê chhùi beh kóng-chhut o-ló Iâ-hô-hoa ê ōe; Goān kìⁿ ū hiat-khì--ê, lóng éng-oán o-ló I ê sèng-miâ.

1Lín tio̍h o-ló耶和華。　　我ê心ah，你tio̍h o-ló耶和華。Lín tio̍h o-ló Iâ-hô-hoa. Góa ê sim ah, lí tio̍h o-ló Iâ-hô-hoa.

2我一生beh o-ló耶和華；　　我iáu活ê時，beh唱歌o-ló我ê上帝。Góa it-seng beh o-ló Iâ-hô-hoa; Góa iáu-oa̍h ê sî, beh chhiùⁿ-koa o-ló góa ê Siōng-tè.

3Lín莫得óa靠君王，莫得óa靠世間人；　　In一點á bōe能幫贊。Lín bo̍h--tit óa-khò kun-ông, bo̍h--tit óa-khò sè-kan lâng; In chi̍t-tiám-á bōe-ōe pang-chān.

4伊一下斷氣，就歸土；　　伊所計畫-ê，tī hit日就消滅。I chi̍t-ē tn̄g-khùi, chiū kui-thó͘; I só͘ kè-e̍k--ê, tī hit-ji̍t chiū siau-bia̍t.

5有雅各ê上帝做伊ê幫贊，　　Ǹg望伊ê上帝耶和華ê，chit號人有福氣；Ū Ngá-kok ê Siōng-tè chòe i ê pang-chān, Ǹg-bāng i ê Siōng-tè Iâ-hô-hoa ê, chit-hō lâng ū hok-khì;

6伊是創造天，地，海，kap其中ê萬物；　　伊保守誠實到tī永遠；I sī chhòng-chō thiⁿ, tōe, hái, kap kî-tiong ê bān-mi̍h; I pó-siú sêng-si̍t kàu tī éng-oán;

7伊為tio̍h受冤屈ê人伸冤；　　賞賜食物hō͘ iau餓-ê。　　耶和華tháu放受關監-ê；I ūi-tio̍h siū un-khut ê lâng sin-oan; Siúⁿ-sù chia̍h-mi̍h hō͘ iau-gō--ê. Iâ-hô-hoa tháu-pàng siū koaiⁿ-kaⁿ--ê;

8耶和華開chhiⁿ-mî人ê目睭；　　耶和華扶起受壓制ê人；　　耶和華疼惜義人；Iâ-hô-hoa khui chhiⁿ-mî-lâng ê ba̍k-chiu; Iâ-hô-hoa hû-khí siū ap-chè ê lâng; Iâ-hô-hoa thiàⁿ-sioh gī-lâng;

9耶和華保護出外人；　　扶持孤兒寡婦；　　獨獨pháiⁿ人ê道路，hō͘伊彎曲。Iâ-hô-hoa pó-hō͘ chhut-gōa lâng; Hû-chhî ko͘-jî kóaⁿ-hū; To̍k-to̍k pháiⁿ-lâng ê tō-lō͘, hō͘ i oan-khiau.

10耶和華beh做王到永遠；　　錫安ah，你ê上帝beh做王到萬代。　　Lín tio̍h o-ló耶和華。Iâ-hô-hoa beh chòe ông kàu éng-oán; Sek-an ah, lí ê Siōng-tè beh chòe ông kàu bān-tāi. Lín tio̍h o-ló Iâ-hô-hoa.

1Lín tio̍h o-ló耶和華；　　因為唱歌o-ló咱ê上帝，是真好真妙；　　O-ló是合宜。Lín tio̍h o-ló Iâ-hô-hoa; In-ūi chhiùⁿ-koa o-ló lán ê Siōng-tè, sī chin-hó chin-biāu; O-ló sī ha̍p-gî.

2耶和華起造耶路撒冷；　　聚集以色列中受遷徙ê人；Iâ-hô-hoa khí-chō Iâ-lō͘-sat-léng; Chū-chi̍p Í-sek-lia̍t tiong siū chhian-sóa ê lâng;

3伊醫好傷心ê人；　　包in ê傷。I i-hó siong-sim ê lâng; Pau in ê siong.

4伊算星辰ê數額；　　Sûi粒kā伊號名。I sǹg chhiⁿ-sîn ê siàu-gia̍h; Sûi-lia̍p kā i hō-miâ.

5咱ê主至大，極有氣力；　　伊ê智慧無窮盡。Lán ê Chú chì-tōa, ke̍k ū khùi-la̍t; I ê tì-hūi bû-kiông-chīn.

6耶和華扶持謙卑ê人；　　將pháiⁿ人降低到土腳。Iâ-hô-hoa hû-chhî khiam-pi ê lâng; Chiong pháiⁿ-lâng kàng-kē kàu thô͘-kha.

7Lín tio̍h用感謝ǹg耶和華唱歌；　　彈琴唱歌，o-ló咱ê上帝。Lín tio̍h ēng kám-siā ǹg Iâ-hô-hoa chhiùⁿ-koa; Tôaⁿ-khîm chhiùⁿ-koa, o-ló lán ê Siōng-tè.

8伊起雲遮天，　　為tio̍h地備辦雨，　　Hō͘山發草。I khí-hûn jia-thiⁿ, Ūi-tio̍h tōe pī-pān hō͘, Hō͘ soaⁿ hoat-chháu.

9伊賞賜食物hō͘走獸，　　Kap teh-哮ê烏鴉kiáⁿ。I siúⁿ-sù chia̍h-mi̍h hō͘ cháu-siù, Kap teh-háu ê o͘-a-kiáⁿ.

10伊無意愛馬ê力大，　　伊無歡喜人ê腳gâu走。I bô ì-ài bé ê la̍t tōa, I bô hoaⁿ-hí lâng ê kha gâu-cháu.

11耶和華是歡喜敬畏伊，　　Kap ǹg望伊慈愛ê人。Iâ-hô-hoa sī hoaⁿ-hí kèng-ùi I, Kap ǹg-bāng I chû-ài ê lâng.

12耶路撒冷ah，你tio̍h稱呼耶和華；　　錫安ah，你tio̍h o-ló你ê上帝。Iâ-lō͘-sat-léng ah, lí tio̍h chheng-ho͘ Iâ-hô-hoa; Sek-an ah, lí tio̍h o-ló lí ê Siōng-tè.

13因為伊堅固你ê門栱；　　賜福hō͘你中間ê kiáⁿ兒。In-ūi I kian-kò͘ lí ê mn̂g-kông; Sù-hok hō͘ lí tiong-kan ê kiáⁿ-jî.

14伊hō͘你ê境內太平；　　用siōng好ê麥hō͘你食飽。I hō͘ lí ê kéng-lāi thài-pêng; Ēng siōng-hó ê be̍h hō͘ lí chia̍h-pá.

15伊發出命令tī地裡，　　伊ê話頒行真緊。I hoat-chhut bēng-lēng tī tōe--nih, I ê ōe pan-hêng chin-kín.

16伊降落雪親像棉花，　　亦落霜親像火灰。I kàng-lo̍h seh chhin-chhiūⁿ mî-hoe, Ia̍h lo̍h-sng chhin-chhiūⁿ hé-hu.

17伊 hiat落雹一塊一塊；　　伊發出寒凊，是誰擋ōe-tiâu？I hiat-lo̍h pha̍uh chi̍t-tè chi̍t-tè; I hoat-chhut kôaⁿ-chhìn, chī-chūi tòng-ōe-tiâu?

18伊一下出令，chiah-ê就lóng溶；　　伊hō͘風吹，水就流。I chi̍t-ē chhut-lēng, chiah-ê chiū lóng iûⁿ; I hō͘ hong chhe, chúi chiū lâu.

19伊將伊ê話指示雅各，　　將伊ê律例kap判斷，指示以色列。I chiong I ê ōe chí-sī Ngá-kok, Chiong I ê lu̍t-lē kap phòaⁿ-toàn, chí-sī Í-sek-lia̍t.

20伊m̄-bat án-ni款待別國；　　伊ê判斷，in lóng m̄-bat。　　Lín tio̍h o-ló耶和華。I m̄-bat án-ni khoán-thāi pa̍t-kok; I ê phòaⁿ-toàn, in lóng m̄-bat. Lín tio̍h o-ló Iâ-hô-hoa.