1Lín tio̍h o-ló耶和華。　　我ê心ah，你tio̍h o-ló耶和華。Lín tio̍h o-ló Iâ-hô-hoa. Góa ê sim ah, lí tio̍h o-ló Iâ-hô-hoa.

2我一生beh o-ló耶和華；　　我iáu活ê時，beh唱歌o-ló我ê上帝。Góa it-seng beh o-ló Iâ-hô-hoa; Góa iáu-oa̍h ê sî, beh chhiùⁿ-koa o-ló góa ê Siōng-tè.

3Lín莫得óa靠君王，莫得óa靠世間人；　　In一點á bōe能幫贊。Lín bo̍h--tit óa-khò kun-ông, bo̍h--tit óa-khò sè-kan lâng; In chi̍t-tiám-á bōe-ōe pang-chān.

4伊一下斷氣，就歸土；　　伊所計畫-ê，tī hit日就消滅。I chi̍t-ē tn̄g-khùi, chiū kui-thó͘; I só͘ kè-e̍k--ê, tī hit-ji̍t chiū siau-bia̍t.

5有雅各ê上帝做伊ê幫贊，　　Ǹg望伊ê上帝耶和華ê，chit號人有福氣；Ū Ngá-kok ê Siōng-tè chòe i ê pang-chān, Ǹg-bāng i ê Siōng-tè Iâ-hô-hoa ê, chit-hō lâng ū hok-khì;

6伊是創造天，地，海，kap其中ê萬物；　　伊保守誠實到tī永遠；I sī chhòng-chō thiⁿ, tōe, hái, kap kî-tiong ê bān-mi̍h; I pó-siú sêng-si̍t kàu tī éng-oán;

7伊為tio̍h受冤屈ê人伸冤；　　賞賜食物hō͘ iau餓-ê。　　耶和華tháu放受關監-ê；I ūi-tio̍h siū un-khut ê lâng sin-oan; Siúⁿ-sù chia̍h-mi̍h hō͘ iau-gō--ê. Iâ-hô-hoa tháu-pàng siū koaiⁿ-kaⁿ--ê;

8耶和華開chhiⁿ-mî人ê目睭；　　耶和華扶起受壓制ê人；　　耶和華疼惜義人；Iâ-hô-hoa khui chhiⁿ-mî-lâng ê ba̍k-chiu; Iâ-hô-hoa hû-khí siū ap-chè ê lâng; Iâ-hô-hoa thiàⁿ-sioh gī-lâng;

9耶和華保護出外人；　　扶持孤兒寡婦；　　獨獨pháiⁿ人ê道路，hō͘伊彎曲。Iâ-hô-hoa pó-hō͘ chhut-gōa lâng; Hû-chhî ko͘-jî kóaⁿ-hū; To̍k-to̍k pháiⁿ-lâng ê tō-lō͘, hō͘ i oan-khiau.

10耶和華beh做王到永遠；　　錫安ah，你ê上帝beh做王到萬代。　　Lín tio̍h o-ló耶和華。Iâ-hô-hoa beh chòe ông kàu éng-oán; Sek-an ah, lí ê Siōng-tè beh chòe ông kàu bān-tāi. Lín tio̍h o-ló Iâ-hô-hoa.

1Lín tio̍h o-ló耶和華；　　因為唱歌o-ló咱ê上帝，是真好真妙；　　O-ló是合宜。Lín tio̍h o-ló Iâ-hô-hoa; In-ūi chhiùⁿ-koa o-ló lán ê Siōng-tè, sī chin-hó chin-biāu; O-ló sī ha̍p-gî.

2耶和華起造耶路撒冷；　　聚集以色列中受遷徙ê人；Iâ-hô-hoa khí-chō Iâ-lō͘-sat-léng; Chū-chi̍p Í-sek-lia̍t tiong siū chhian-sóa ê lâng;

3伊醫好傷心ê人；　　包in ê傷。I i-hó siong-sim ê lâng; Pau in ê siong.

4伊算星辰ê數額；　　Sûi粒kā伊號名。I sǹg chhiⁿ-sîn ê siàu-gia̍h; Sûi-lia̍p kā i hō-miâ.

5咱ê主至大，極有氣力；　　伊ê智慧無窮盡。Lán ê Chú chì-tōa, ke̍k ū khùi-la̍t; I ê tì-hūi bû-kiông-chīn.

6耶和華扶持謙卑ê人；　　將pháiⁿ人降低到土腳。Iâ-hô-hoa hû-chhî khiam-pi ê lâng; Chiong pháiⁿ-lâng kàng-kē kàu thô͘-kha.

7Lín tio̍h用感謝ǹg耶和華唱歌；　　彈琴唱歌，o-ló咱ê上帝。Lín tio̍h ēng kám-siā ǹg Iâ-hô-hoa chhiùⁿ-koa; Tôaⁿ-khîm chhiùⁿ-koa, o-ló lán ê Siōng-tè.

8伊起雲遮天，　　為tio̍h地備辦雨，　　Hō͘山發草。I khí-hûn jia-thiⁿ, Ūi-tio̍h tōe pī-pān hō͘, Hō͘ soaⁿ hoat-chháu.

9伊賞賜食物hō͘走獸，　　Kap teh-哮ê烏鴉kiáⁿ。I siúⁿ-sù chia̍h-mi̍h hō͘ cháu-siù, Kap teh-háu ê o͘-a-kiáⁿ.

10伊無意愛馬ê力大，　　伊無歡喜人ê腳gâu走。I bô ì-ài bé ê la̍t tōa, I bô hoaⁿ-hí lâng ê kha gâu-cháu.

11耶和華是歡喜敬畏伊，　　Kap ǹg望伊慈愛ê人。Iâ-hô-hoa sī hoaⁿ-hí kèng-ùi I, Kap ǹg-bāng I chû-ài ê lâng.

12耶路撒冷ah，你tio̍h稱呼耶和華；　　錫安ah，你tio̍h o-ló你ê上帝。Iâ-lō͘-sat-léng ah, lí tio̍h chheng-ho͘ Iâ-hô-hoa; Sek-an ah, lí tio̍h o-ló lí ê Siōng-tè.

13因為伊堅固你ê門栱；　　賜福hō͘你中間ê kiáⁿ兒。In-ūi I kian-kò͘ lí ê mn̂g-kông; Sù-hok hō͘ lí tiong-kan ê kiáⁿ-jî.

14伊hō͘你ê境內太平；　　用siōng好ê麥hō͘你食飽。I hō͘ lí ê kéng-lāi thài-pêng; Ēng siōng-hó ê be̍h hō͘ lí chia̍h-pá.

15伊發出命令tī地裡，　　伊ê話頒行真緊。I hoat-chhut bēng-lēng tī tōe--nih, I ê ōe pan-hêng chin-kín.

16伊降落雪親像棉花，　　亦落霜親像火灰。I kàng-lo̍h seh chhin-chhiūⁿ mî-hoe, Ia̍h lo̍h-sng chhin-chhiūⁿ hé-hu.

17伊 hiat落雹一塊一塊；　　伊發出寒凊，是誰擋ōe-tiâu？I hiat-lo̍h pha̍uh chi̍t-tè chi̍t-tè; I hoat-chhut kôaⁿ-chhìn, chī-chūi tòng-ōe-tiâu?

18伊一下出令，chiah-ê就lóng溶；　　伊hō͘風吹，水就流。I chi̍t-ē chhut-lēng, chiah-ê chiū lóng iûⁿ; I hō͘ hong chhe, chúi chiū lâu.

19伊將伊ê話指示雅各，　　將伊ê律例kap判斷，指示以色列。I chiong I ê ōe chí-sī Ngá-kok, Chiong I ê lu̍t-lē kap phòaⁿ-toàn, chí-sī Í-sek-lia̍t.

20伊m̄-bat án-ni款待別國；　　伊ê判斷，in lóng m̄-bat。　　Lín tio̍h o-ló耶和華。I m̄-bat án-ni khoán-thāi pa̍t-kok; I ê phòaⁿ-toàn, in lóng m̄-bat. Lín tio̍h o-ló Iâ-hô-hoa.

1Lín tio̍h o-ló耶和華。　　Tùi天頂o-ló耶和華；　　Tī高ê所在o-ló伊。Lín tio̍h o-ló Iâ-hô-hoa. Tùi thiⁿ-téng o-ló Iâ-hô-hoa; Tī koâiⁿ ê só͘-chāi o-ló I.

2伊ê眾使者ah，lín tio̍h o-ló伊。　　伊ê眾天軍ah，lín tio̍h o-ló伊。I ê chèng sù-chiá ah, lín tio̍h o-ló I. I ê chèng thian-kun ah, lín tio̍h o-ló I.

3日kap月ah，lín tio̍h o-ló伊；　　發光ê星辰ah，lín lóng tio̍h o-ló伊。Ji̍t kap ge̍h ah, lín tio̍h o-ló I; Hoat-kng ê chhiⁿ-sîn ah, lín lóng tio̍h o-ló I.

4天頂ê天，kap 天以上ê水ah，　　Lín lóng tio̍h o-ló伊。Thiⁿ-téng ê thiⁿ, kap thiⁿ í-chiūⁿ ê chúi ah, Lín lóng tio̍h o-ló I.

5Chiah-ê lóng tio̍h o-ló耶和華ê名；　　因為伊一下命令，就lóng受創造。Chiah-ê lóng tio̍h o-ló Iâ-hô-hoa ê miâ; In-ūi I chi̍t-ē bēng-lēng, chiū lóng siū chhòng-chō.

6伊將chiah-ê建立，到永永遠遠；　　伊有定例，bōe會廢無。I chiong chiah-ê kiàn-li̍p, kàu éng-éng oán-oán; I ū tēng-lē, bōe-ōe hòe-bô.

7Tùi地上tio̍h o-ló耶和華，　　就是大魚kap一切ê深淵；Tùi tōe-chiūⁿ tio̍h o-ló Iâ-hô-hoa, Chiū-sī tōa-hî kap it-chhè ê chhim-ian;

8火kap冰雹，雪kap雲霧；　　Thàn伊ê話ê狂風；Hé kap peng-pha̍uh, seh kap hûn-bū; Thàn I ê ōe ê kông-hong;

9大山 kap一切ê小山；　　結果子ê樹，kap一切ê柏香樹；Tōa-soaⁿ kap it-chhè ê sió-soaⁿ; Kiat ké-chí ê chhiū, kap it-chhè ê pek-hiuⁿ-chhiū;

10野獸kap一切ê cheng-siⁿ；　　蟲thōa kap飛鳥；Iá-siù kap it-chhè ê cheng-siⁿ; Thâng-thōa kap pe-chiáu;

11世上ê君王kap萬民；　　貴族kap世上一切ê審判官；Sè-chiūⁿ ê kun-ông kap bān-bîn; Kùi-cho̍k kap sè-chiūⁿ it-chhè ê sím-phòaⁿ-koaⁿ;

12少年人kap在室女；　　老人kap gín-ná；Siàu-liân-lâng kap chāi-sek-lú; Lāu-lâng kap gín-ná;

13Chiah-ê lóng tio̍h o-ló耶和華ê名；　　因為只有伊ê名受尊做高；　　伊ê榮光pôaⁿ過天地。Chiah-ê lóng tio̍h o-ló Iâ-hô-hoa ê miâ; In-ūi chí-ū I ê miâ siū chun chòe koâiⁿ; I ê êng-kng pôaⁿ-kè thiⁿ tōe.

14伊興起伊ê百姓ê角，　　Hō͘伊聖ê百姓lóng o-ló伊，　　就是以色列人，親近主hit-ê百姓。　　Lín tio̍h o-ló耶和華。I heng-khí I ê peh-sìⁿ ê kak, Hō͘ I sèng ê peh-sìⁿ lóng o-ló I, Chiū-sī Í-sek-lia̍t lâng, chhin-kūn Chú hit ê peh-sìⁿ. Lín tio̍h o-ló Iâ-hô-hoa.