1大衛ê祈禱。1) 耶和華ah，求你聽公義，留心聽我ê求叫；　　我ê祈禱m̄是tùi奸詐ê嘴唇出；求你àⁿ耳孔來聽。Tāi-pi̍t ê kî-tó.1) Iâ-hô-hoa ah, kiû Lí thiaⁿ kong-gī, liû-sim thiaⁿ góa ê kiû-kiò; Góa ê kî-tó m̄-sī tùi kan-chà ê chhùi-tûn chhut; kiû Lí àⁿ hī-khang lâi thiaⁿ.

2願我ê判詞tùi你ê面前發出，　　願你ê目睭鑑察正直。Goān góa ê phòaⁿ-sû tùi Lí ê bīn-chêng hoat-chhut, Goān Lí ê ba̍k-chiu kàm-chhat chèng-ti̍t.

3你已經試驗我ê心，你tī暝時鑑察我；　　你鍛鍊我，無chhē-tio̍h甚麼；　　我立志，hō͘我ê嘴無有過失。Lí í-keng chhì-giām góa ê sim, Lí tī mî--sî kàm-chhat góa; Lí thoàn-liān góa, bô chhē--tio̍h sím-mi̍h; Góa li̍p-chì, hō͘ góa ê chhùi bô ū kè-sit.

4論到人ê行做，我thàn你所講ê話，　　家己謹守，無行強惡人ê路。Lūn-kàu lâng ê kiâⁿ-chòe, góa thàn Lí só͘ kóng ê ōe, Ka-kī kín-siú, bô kiâⁿ kiông-ok lâng ê lō͘.

5我ê腳定定行你ê路，　　我ê腳bē-bat踏chhū。Góa ê kha tiāⁿ-tiāⁿ kiâⁿ Lí ê lō͘, Góa ê kha bē-bat ta̍h-chhū.

6上帝ah，論到我，我bat求叫你，因為你beh 應我；　　求你àⁿ耳孔聽我ê話。Siōng-tè ah, lūn-kàu góa, góa bat kiû-kiò Lí, in-ūi Lí beh ìn góa; Kiû Lí àⁿ hī-khang thiaⁿ góa ê ōe.

7求你顯明你各樣ê仁慈，你是用chiàⁿ手救óa靠你ê人，　　脫離hiah-ê起來攻擊in-ê。Kiû Lí hián-bêng Lí koh-iūⁿ ê jîn-chû, Lí sī ēng chiàⁿ-chhiú kiù óa-khò Lí ê lâng, Thoat-lī hiah ê khí-lâi kong-kek in--ê.

8求你保護我親像保護目睭仁，　　將我蓋密tī你ê翼下。Kiû Lí pó-hō͘ góa chhin-chhiūⁿ pó-hō͘ ba̍k-chiu-jîn, Chiong góa khàm-ba̍t tī Lí ê si̍t-ē.

9Hō͘我脫離hiah-ê搶劫我ê pháiⁿ人，　　就是圍困我，beh害我性命ê對敵。Hō͘ góa thoat-lī hiah ê chhiúⁿ-kiap góa ê pháiⁿ-lâng, Chiū-sī ûi-khùn góa, beh hāi góa sìⁿ-miā ê tùi-te̍k.

10In hō͘家己ê油包密；　　In ê嘴講驕傲ê話。In hō͘ ka-kī ê iû pau-ba̍t; In ê chhùi kóng kiau-ngō͘ ê ōe.

11In現在圍困阮ê腳步；　　In注目beh chhia倒阮tī地裡。In hiān-chāi ûi-khùn goán ê kha-pō͘; In chù-ba̍k beh chhia-tó goán tī tōe--nih.

12In親像獅siàu想beh咬物；　　Koh親像猛ê獅á-thûn bih tī暗密ê所在。In chhin-chhiūⁿ sai siàu-siūⁿ beh kā mi̍h; Koh chhin-chhiūⁿ béng ê sai-á-thûn bih tī àm-ba̍t ê só͘-chāi.

13耶和華ah，求你起來，抵擋對敵；　　將伊打倒；　　用你ê刀救我ê性命脫離pháiⁿ人。Iâ-hô-hoa ah, kiû Lí khí--lâi, tí-tng tùi-te̍k; Chiong i táⁿ-tó; Ēng Lí ê to kiù góa ê sìⁿ-miā thoat-lī pháiⁿ-lâng.

14耶和華ah，用你ê手救我脫離世間人；　　脫離hiah-ê tī 今生有福份ê世間人。　　你將你ê財寶充滿in ê腹肚；　　In有kiáⁿ兒到心滿意足；　　將其餘ê財物留hō͘ in ê嬰á。Iâ-hô-hoa ah, ēng Lí ê chhiú kiù góa thoat-lī sè-kan-lâng; Thoat-lī hiah ê tī kim-seng ū hok-hūn ê sè-kan-lâng. Lí chiong Lí ê châi-pó chhiong-móa in ê pak-tó͘; In ū kiáⁿ-jî kàu sim-móa ì-chiok; chiong kî-û ê châi-bu̍t lâu hō͘ in ê eⁿ-á.

15論到我，我beh tī義ê中間看見你ê面；　　我睏醒ê時，看見你ê形容，就心滿意足。Lūn-kàu góa, góa beh tī gī ê tiong-kan khòaⁿ-kìⁿ Lí ê bīn; Góa khùn-chhíⁿ ê sî, khòaⁿ-kìⁿ Lí ê hêng-iông, chiū sim-móa ì-chiok.

1耶和華ê奴僕大衛ê詩；交hō͘樂官。Tng耶和華救伊脫離一切ê對敵，kap掃羅ê手ê日，伊對耶和華念chit-ê詩ê話；講，1) 耶和華我ê氣力ah，我疼你。Iâ-hô-hoa ê lô͘-po̍k Tāi-pi̍t ê si; kau hō͘ Ga̍k-koaⁿ. Tng Iâ-hô-hoa kiù i thoat-lī it-chhè ê tùi-te̍k, kap Sò-lô ê chhiú ê ji̍t, i tùi Iâ-hô-hoa liām chit ê si ê ōe; kóng,1) Iâ-hô-hoa góa ê khùi-la̍t ah, góa thiàⁿ Lí.

2耶和華是我ê山巖，我ê山寨，我ê救主；　　我ê上帝，我ê石磐，我beh óa靠伊；　　伊是我ê藤牌，是救我ê角，是我ê高台。Iâ-hô-hoa sī góa ê soaⁿ-giâm, góa ê soaⁿ-chē, góa ê Kiù-chú; Góa ê Siōng-tè, góa ê chio̍h-pôaⁿ, góa beh óa-khò I; I sī góa ê tîn-pâi, sī kiù góa ê kak, sī góa ê koâiⁿ-tâi.

3我beh求叫應該o-ló ê耶和華；　　我就得tio̍h救脫離我ê對敵。Góa beh kiû-kiò eng-kai o-ló ê Iâ-hô-hoa; Góa chiū tit-tio̍h kiù thoat-lī góa ê tùi-te̍k.

4死無ê索纏我，　　匪類ê大水hō͘我驚。Sí-bô ê soh tîⁿ góa, Húi-lūi ê tōa-chúi hō͘ góa kiaⁿ.

5陰間ê索圍困我，　　死無ê羅網臨到我。Im-kan ê soh ûi-khùn góa, Sí-bô ê lô-bāng lîm-kàu góa.

6我tī苦難中祈求耶和華，　　對我ê上帝求叫；　　伊tùi伊ê殿內聽我ê聲，　　我tī伊ê面前所求ê入tī伊ê耳孔。Góa tī khó͘-lān-tiong kî-kiû Iâ-hô-hoa, Tùi góa ê Siōng-tè kiû-kiò; I tùi I ê tiān-lāi thiaⁿ góa ê siaⁿ, Góa tī I ê bīn-chêng só͘ kiû--ê ji̍p tī I ê hī-khang.

7因為伊受氣，地就搖koh choah；　　山ê地基亦振動搖choah。In-ūi I siū-khì, tōe chiū iô koh choah; Soaⁿ ê tōe-ki ia̍h tín-tāng iô-choah.

8Tùi伊ê鼻孔chhèng出煙，　　Tùi伊ê嘴內發出火，　　土炭tùi án-ni to̍h。Tùi I ê phīⁿ-khang chhèng-chhut ian, Tùi I ê chhùi-lāi hoat-chhut hé, Thô͘-thòaⁿ tùi án-ni to̍h.

9伊hō͘天垂落低，本身臨到，　　伊ê腳下烏暗暗。I hō͘ thiⁿ sûi-lo̍h kē, pún-sin lîm-kàu, I ê kha-ē o͘-àm-àm.

10伊騎ki-lō͘兵teh飛；　　伊用風ê翼緊緊飛。I khiâ ki-lō͘-peng teh pe; I ēng hong ê si̍t kín-kín pe.

11伊用烏暗做bih身ê所在，做帳房來圍伊；　　就是水ê烏暗，空中ê密雲。I ēng o͘-àm chòe bih-sin ê só͘-chāi, chòe tiùⁿ-pâng lâi ûi I; Chiū-sī chúi ê o͘-àm, khong-tiong ê ba̍t-hûn.

12因為伊頭前ê光，就伊ê密雲行過去，　　有雹kap to̍h ê土炭。In-ūi I thâu-chêng ê kng, chiū I ê ba̍t-hûn kiâⁿ kè-khì, Ū pha̍uh kap to̍h ê thô͘-thòaⁿ.

13耶和華tī天裡起雷，　　至koânê出伊ê聲；　　有雹kap to̍h ê土炭。Iâ-hô-hoa tī thiⁿ--nih khí lûi, Chì-koâiⁿ--ê chhut I ê siaⁿ; Ū pha̍uh kap to̍h ê thô͘-thòaⁿ.

14伊射出伊ê箭，hō͘對敵四散；　　發出chōe-chōe sih-nà，hō͘ in擾亂。I siā-chhut I ê chìⁿ, hō͘ tùi-te̍k sì-sòaⁿ; Hoat-chhut chōe-chōe sih-nà, hō͘ in jiáu-loān.

15耶和華ah，你ê責備一下發，　　你ê鼻孔ê氣一下出，　　水底就出現，　　大地ê根基亦露現。Iâ-hô-hoa ah, Lí ê chek-pī chi̍t-ē hoat, Lí ê phīⁿ-khang ê khì chi̍t-ē chhut, Chúi-tóe chiū chhut-hiān, Tōa-tōe ê kun-ki ia̍h lō͘-hiān.

16伊tùi頂面伸手khiú我，　　牽我出大水ê中間。I tùi téng-bīn chhun-chhiú khiú góa, Khan góa chhut tōa-chúi ê tiong-kan.

17伊救我脫離我猛ê對敵，　　以及hiah-ê怨恨我ê人；　　因為in比我khah強。I kiù góa thoat-lī góa béng ê tùi-te̍k, Í-ki̍p hiah ê oàn-hūn góa ê lâng; In-ūi in pí góa khah-kiông.

18我tú-tio̍h災難ê日，in來攻擊我；　　總是耶和華是我所óa靠ê。Góa tú-tio̍h chai-lān ê ji̍t, in lâi kong-kek góa; chóng-sī Iâ-hô-hoa sī góa só͘ óa-khò--ê.

19伊亦chhōa我到開闊ê所在，　　伊救我，因為伊歡喜我。I ia̍h chhōa góa kàu khui-khoah ê só͘-chāi, I kiù góa, in-ūi I hoaⁿ-hí góa.

20耶和華照我ê義報答我；　　照我手ê清氣報賞我。Iâ-hô-hoa chiàu góa ê gī pò-tap góa; Chiàu góa chhiú ê chheng-khì pò-siúⁿ góa.

21因為我遵守耶和華ê道路，　　Bē-bat做pháiⁿ，離開我ê上帝。In-ūi góa chun-siú Iâ-hô-hoa ê tō-lō͘, Bē-bat chòe-pháiⁿ, lī-khui góa ê Siōng-tè.

22伊ê法律lóng tī我ê面前；　　伊ê禮儀，我bē-bat棄sak。I ê hoat-lu̍t lóng tī góa ê bīn-chêng; I ê lé-gî, góa bē-bat khì-sak.

23我tī伊ê面前做完全，　　我亦保守家己，離開我ê罪惡。Góa tī I ê bīn-chêng chòe oân-choân, Góa ia̍h pó-siú ka-kī, lī-khui góa ê chōe-ok.

24所以耶和華報賞我，是照我ê義；　　亦是照我tī伊ê目睭前，我手ê清氣。Só͘-í Iâ-hô-hoa pò-siúⁿ góa, sī chiàu góa ê gī; Ia̍h sī chiàu góa tī I ê ba̍k-chiu chêng, góa chhiú ê chheng-khì.

25慈愛ê人，你用慈愛款待伊；　　完全ê人，你用完全款待伊；Chû-ài ê lâng, Lí ēng chû-ài khoán-thāi i; Oân-choân ê lâng, Lí ēng oân-choân khoán-thāi i;

26清氣ê人，你用清氣款待伊；　　乖僻ê人，你用彎曲款待伊。Chheng-khì ê lâng, Lí ēng chheng-khì khoán-thāi i; Koāi-phiah ê lâng, Lí ēng oan-khiau khoán-thāi i.

27因為困苦ê百姓，你beh救伊；　　自高ê目睭，你beh hō͘伊hê落去。In-ūi khùn-khó͘ ê peh-sìⁿ, Lí beh kiù i; Chū-ko ê ba̍k-chiu, Lí beh hō͘ i hê--lo̍h-khì.

28因為你beh點to̍h我ê燈；　　耶和華我ê上帝beh照光我ê暗。In-ūi Lí beh tiám-to̍h góa ê teng; Iâ-hô-hoa góa ê Siōng-tè beh chiò-kng góa ê àm.

29因為我óa靠你，衝入軍隊，　　Óa靠我ê上帝跳過牆。In-ūi góa óa-khò Lí, chhiong-ji̍p kun-tūi, Óa-khò góa ê Siōng-tè thiàu-kè chhiûⁿ.

30論到上帝，伊ê路是完全；　　耶和華ê話是過鍛鍊ê；　　見若óa靠伊ê，伊就做in ê藤牌。Lūn-kàu Siōng-tè, I ê lō͘ sī oân-choân; Iâ-hô-hoa ê ōe sī kè thoàn-liān--ê; Kìⁿ-nā óa-khò I--ê, I chiū chòe in ê tîn-pâi.

31因為耶和華以外，是誰是上帝？　　阮ê上帝以外，是誰是石磐？In-ūi Iâ-hô-hoa í-gōa, chī-chūi sī Siōng-tè? Goán ê Siōng-tè í-gōa, chī-chūi sī chio̍h-pôaⁿ?

32就是hit-ê用氣力hâ我ê腰，　　Hō͘我ê路完全ê上帝。Chiū-sī hit ê ēng khùi-la̍t hâ góa ê io, Hō͘ góa ê lō͘ oân-choân ê Siōng-tè.

33伊hō͘我ê腳親像鹿母ê腳，　　Koh安置我tī我高ê所在。I hō͘ góa ê kha chhin-chhiūⁿ lo̍k-bú ê kha, Koh an-tì góa tī góa koâiⁿ ê só͘-chāi.

34伊教示我ê手gâu交戰，　　致到我ê手骨能開銅ê弓。I kà-sī góa ê chhiú gâu kau-chiàn, Tì-kàu góa ê chhiú-kut ōe khui tâng ê keng.

35你用你救恩ê藤牌hō͘我；　　你用chiàⁿ手扶持我；　　你ê溫和hō͘我最大。Lí ēng Lí kiù-un ê tîn-pâi hō͘ góa; Lí ēng chiàⁿ-chhiú hû-chhî góa; Lí ê un-hô hō͘ góa chòe tōa.

36你hō͘我所踏ê地開闊；　　我ê腳bē-bat踏chhū。Lí hō͘ góa só͘ ta̍h ê tōe khui-khoah; Góa ê kha bē-bat ta̍h-chhū.

37我beh追我ê對敵，亦beh jip-tio̍h in；　　In iáu未滅無ê事先，我無beh 倒tńg。Góa beh tui góa ê tùi-te̍k, ia̍h beh jip--tio̍h in; In iáu-bē bia̍t-bô ê tāi-seng, góa bô beh tò-tńg.

38我beh phah in thiám-thiám，致到in bōe起來；　　In beh倒tī我ê腳下。Góa beh phah in thiám-thiám, tì-kàu in bōe khí-lâi; In beh tó tī góa ê kha-ē.

39因為你bat用氣力hâ我ê腰，hō͘我gâu交戰；　　你hō͘ hiah-ê起來攻擊我ê，lóng降服tī我ê下面。In-ūi Lí bat ēng khùi-la̍t hâ góa ê io, hō͘ góa gâu kau-chiàn; Lí hō͘ hiah ê khí-lâi kong-kek góa--ê, lóng hâng-ho̍k tī góa ê ē-bīn.

40你亦hō͘我ê對敵oa̍t-tńg身逃走；　　Hō͘我能剿滅hiah-ê怨恨我ê人。Lí ia̍h hō͘ góa ê tùi-te̍k oa̍t-tńg-sin tô-cháu; Hō͘ góa ōe châu-bia̍t hiah ê oàn-hūn góa ê lâng.

41In求叫，亦無人救in；　　就求叫耶和華，伊亦無應。In kiû-kiò, ia̍h bô lâng kiù in; Chiū kiû-kiò Iâ-hô-hoa, I ia̍h bô ìn.

42我搥in到碎碎，親像風吹ê土粉；　　Piàⁿ出in，親像街路ê土糜。Góa tûi in kàu chhùi-chhùi, chhin-chhiūⁿ hong chhe ê thô͘-hún; Piàⁿ-chhut in, chhin-chhiūⁿ ke-lō͘ ê thô͘-bê.

43你救我脫離百姓ê相爭；　　你設立我做列邦ê頭；　　我本然m̄-bat ê百姓beh服事我；Lí kiù góa thoat-lī peh-sìⁿ ê saⁿ-chiⁿ; Lí siat-li̍p góa chòe lia̍t-pang ê thâu; Góa pún-jiân m̄-bat ê peh-sìⁿ beh ho̍k-sāi góa;

44In一下聽見我ê名就beh順thàn我；　　異邦ê人beh投降我。In chi̍t-ē thiaⁿ-kìⁿ góa ê miâ chiū beh sūn-thàn góa; Īⁿ-pang ê lâng beh tâu-hâng góa.

45異邦人beh衰退，　　驚惶ngia̍uh-ngia̍uh-chhoah，出in ê營寨。Īⁿ-pang lâng beh soe-thè, Kiaⁿ-hiâⁿ ngia̍uh-ngia̍uh-chhoah, chhut in ê iâⁿ-chē.

46耶和華是活ê，願我ê石磐得tio̍h o-ló；　　願救我ê上帝得tio̍h升高。Iâ-hô-hoa sī oa̍h--ê, goān góa ê chio̍h-pôaⁿ tit-tio̍h o-ló; Goān kiù góa ê Siōng-tè tit-tio̍h seng-koâiⁿ.

47Chit-ê上帝就是hit-ê kā我伸冤，　　Hō͘眾百姓降服tī我ê下面ê。Chit ê Siōng-tè chiū-sī hit ê kā góa sin-oan, Hō͘ chèng peh-sìⁿ hâng-ho̍k tī góa ê ē-bīn--ê.

48伊救我脫離我ê對敵，　　你將我舉起khah高hiah-ê起來攻擊我ê；　　你救我脫離強暴ê人。I kiù góa thoat-lī góa ê tùi-te̍k, Lí chiong góa kú-khí khah koâiⁿ hiah ê khí-lâi kong-kek góa ê; Lí kiù góa thoat-lī kiông-pō ê lâng.

49耶和華ah，因為án-ni我beh tī列邦中感謝你；　　唱歌o-ló你ê名。Iâ-hô-hoa ah, in-ūi án-ni góa beh tī lia̍t-pang-tiong kám-siā Lí; Chhiùⁿ-koa o-ló Lí ê miâ.

50耶和華賞賜極大ê救恩，hō͘伊所設立ê王；　　施出慈愛hō͘伊受抹油ê，　　就是hō͘大衛kap伊ê後裔，直到永遠。Iâ-hô-hoa siúⁿ-sù ke̍k-tōa ê kiù-un, hō͘ I só͘ siat-li̍p ê ông; Si-chhut chû-ài hō͘ I siū-boah-iû ê, Chiū-sī hō͘ Tāi-pi̍t kap i ê hō͘-è, ti̍t-kàu éng-oán.

1大衛ê詩；交hō͘樂官。1) Chiah-ê天講起上帝ê榮光，　　穹蒼報揚伊ê手所做ê。Tāi-pi̍t ê si; kau hō͘ Ga̍k-koaⁿ.1) Chiah ê thiⁿ kóng-khí Siōng-tè ê êng-kng, Kiong-chhong pò-iông I ê chhiú só͘ chòe--ê.

2Chit日tùi hit日發出言語，　　Chit暝tùi hit暝傳出知識。Chit-ji̍t tùi hit-ji̍t hoat-chhut giân-gú, Chit-mî tùi hit-mî thoân-chhut chai-bat.

3無言無語；　　In ê聲無thang聽見。Bô giân bô gú; In ê siaⁿ bô thang thiaⁿ-kìⁿ.

4In ê準繩遍tī天下，　　In ê言語到tī地極。　　上帝tī in中間為tio̍h日頭安置帳房。In ê chún-chîn piàn tī thiⁿ-ē, In ê giân-gú kàu tī tōe-ke̍k. Siōng-tè tī in tiong-kan ūi-tio̍h ji̍t-thâu an-tì tiùⁿ-pâng.

5日頭親像新kiáⁿ婿出伊ê房，　　亦親像猛勇ê人歡喜走伊ê路。Ji̍t-thâu chhin-chhiūⁿ sin-kiáⁿ-sài chhut i ê pâng, Ia̍h chhin-chhiūⁿ béng-ióng ê lâng hoaⁿ-hí cháu i ê lō͘.

6伊tùi天ê chit-pêng出，　　Se̍h到天ê hit-pêng；　　無一項物khǹg密，無得tio̍h伊ê熱氣。I tùi thiⁿ ê chit-pêng chhut, Se̍h kàu thiⁿ ê hit-pêng; Bô chi̍t-hāng-mi̍h khǹg-ba̍t, bô tit-tio̍h i ê jia̍t-khì.

7耶和華ê律法齊全，能hō͘人ê心神活起來；　　耶和華ê干證確實，能hō͘戇人有智慧。Iâ-hô-hoa ê lu̍t-hoat chiâu-chn̂g, ōe hō͘ lâng ê sim-sîn oa̍h--khí-lâi; Iâ-hô-hoa ê kan-chèng khak-si̍t, ōe hō͘ gōng-lâng ū tì-hūi.

8耶和華ê教示正直，能hō͘人ê心歡喜；　　耶和華ê命令清潔，能hō͘人ê目睭光明。Iâ-hô-hoa ê kà-sī chèng-ti̍t, ōe hō͘ lâng ê sim hoaⁿ-hí; Iâ-hô-hoa ê bēng-lēng chheng-kiat, ōe hō͘ lâng ê ba̍k-chiu kng-bêng.

9敬畏耶和華ê道理是清氣，永遠存在；　　耶和華ê判斷真實，一概是公義。Keng-ùi Iâ-hô-hoa ê tō-lí sī chheng-khì, éng-oán chûn-chāi; Iâ-hô-hoa ê phòaⁿ-toàn chin-si̍t, it-khài sī kong-gī.

10比金，比chōe-chōe好金，khah thang欣慕；　　比蜜，比蜂房滴落來ê蜜khah甜。Pí kim, pí chōe-chōe hó kim, khah thang him-bō͘; Pí bi̍t, pí phang-pâng tih--lo̍h-lâi ê bi̍t khah-tiⁿ.

11Koh你ê奴僕tùi chiah-ê受警戒；　　守chiah-ê有大賞賜。Koh Lí ê lô͘-po̍k tùi chiah-ê siū kéng-kài; Siú chiah-ê ū tōa siúⁿ-sù.

12Chī-chūi會知伊ê失錯ah？　　求你除去我暗靜ê過失。Chī-chūi ōe chai i ê sit-chhò ah? Kiû Lí tû--khì góa àm-chīⁿ ê kè-sit.

13求你阻止你ê奴僕，無故意犯罪；　　M̄准hit-ê罪惡管轄我；　　我就完全，免犯大罪。Kiû Lí chó͘-chí Lí ê lô͘-po̍k, bô kò͘-ì hoān-chōe; M̄-chún hit ê chōe-ok koán-hat góa; Góa chiū oân-choân, bián hoān tōa-chōe.

14耶和華我ê石磐，救贖我ê主ah；　　願我ê嘴所講ê，心所想ê，tī你ê面前得tio̍h接納。Iâ-hô-hoa góa ê chio̍h-pôaⁿ, kiù-sio̍k góa ê Chú ah; Goān góa ê chhùi só͘ kóng--ê, sim só͘ siūⁿ--ê, tī Lí ê bīn-chêng tit-tio̍h chiap-la̍p.